Молитвы на Рождество Пресвятой Богородицы, 29637 просмотров, оценка: 6
загрузить оригинал на диск »
6
20 сентября 2012 в 20:39 29637 просмотров 2 комментария
Тип: Фотораздел: Иконы
Код для текстов www.logoslovo.ru:
Ссылка:
Код для блога:

Комментарии (2)

Всего: 2 комментария
  
#1 | Лидия Новикова »» | 20.09.2012 20:42
  
5
Молитвы на Рождество Пресвятой Богородицы

Тропарь праздника Рождества Пресвятой Богородицы

Рождество Твое, Богородице Дево,
радость возвести всей вселенней:
из Тебе бо возсия Солнце Правды, Христос Бог наш,
и, разрушив клятву, даде благословение,
и, упразднив смерть, дарова нам живот вечный.

Кондак праздника Рождества Пресвятой Богородицы (глас 4)

Иоаким и Анна поношения безчадства
и Адам и Ева от тли смертныя свободистася, Пречистая,
во святем рождестве Твоем.
То празднуют и людие Твои,
вины прегрешений избавльшеся,
внегда звати Ти:
неплоды раждает Богородицу и Питательницу Жизни нашея.

Величание Богородице (глас 4)
Величаем Тя,
Пресвятая Дево,
и чтим святых Твоих родителей,
и всеславное славим рождество Твое.

Задостойник праздника Рождества Пресвятой Богородицы (глас 8)
Величай, душе моя,
преславное рождество Божия Матере.
Чужде матерем девство,
и странно девам деторождение:
на Тебе, Богородице, обоя устроишася.
Тем Тя, вся племена земная, непрестанно величаем.


Молитва первая


О, Пресвятая Владычице, Христа Спасителя нашего Богоизбранная Мати,
у Бога святыми молитвами испрошенная, Богу посвященная и Богом возлюбленная!

Кто Тебе не ублажит или кто не воспоет, Твоего преславного рождества.
Рождество бо Твое бысть началом спасения человеков, и мы,
седящии во тме согрешений, зрим Тя, Неприступного Света жилище.
Сего ради витийствующий язык не может песнословити Тя по достоянию.
Паче бо серафим возвысилась еси, Пречистая.
Обаче приими от недостойных раб Твоих нынешнее похваление и не отрини мольбы нашея.

Твое величие исповедуем,
Тебе во умилении припадаем и скорую в заступлении чадолюбивую
и благоусердную Матерь дерзновенно просим:
умоли Сына Твоего и Бога нашего даровати нам,
много согрешающим, искреннее покаяние и благочестное житие,
да возможем творити вся Богу угодная и душам нашим полезная.

Возненавидим вся злая, укрепляемии Божественною благодатию во благом произволении нашем.
Ты непостыдная надежда наша в час смерти, даруй нам христианскую кончину,
безбедное шествие на страшных мытарствах воздушных и наследие вечных
и неизреченных благ Царствия Небеснаго, да со всеми святыми немолчно исповедуем Твое
о нас заступление и да славим единаго Истиннаго Бога,
во Святей Троице покланяемаго, Отца и Сына и Святаго Духа.
Аминь.

Молитва вторая

Преблагословенная Дево Марие, Царице небесе и земли,
Твоему чудотворному образу припадающе, умиленно глаголем:
призри милостиво на рабы Твоя и Твоим всесильным ходатайством ниспосли коемуждо потребная.
Вся верныя чада Святыя Церкви спаси, неверныя обрати, заблуждших на путь правый настави,
старость и слабость сил поддержи, юных в вере святой возрасти, мужество ко благу направи,
грешников к покаянию приведи и всех христиан мольбы услыши, болящих уврачуй, скорби утоли,
путешествующим спутешествуй.

Ты веси, Всемилостивая,
яко немощны, яко грешнии, яко озлобляеми и недостойни прощения Божия,
обаче буди нам в помощь, да ни коим грехом самолюбия, соблазна и диавольского прельщения
прогневляем Бога: Тя имамы Предстательницу, Иже не отринет Господь.

Аще бо восхощеши, вся даровати нам можеши яко благодатный источник,
верно поющим Ти и превозносящим преславное Твое рождество.
Избави, Владычице, грехопадений и бед всех, благочестно призывающих святое имя Твое
и покланяющихся честному образу Твоему.

Ты бо молитвами беззакония наша туне очищаеши, темже Тебе припадаем и паки вопием:
отжени от нас всякаго врага и супостата, всякия напасти и губительнаго неверия;
молитвами Твоими, подающи дожди благовременны и земле обильное плодоносие,
вложи в сердца наша страх Божественный ко исполнению заповедей Господних,
да вси тихо и мирно поживем во спасение душ наших, во благо ближних и во славу Господа,
Ему бо, яко Творцу, Промыслителю и Спасителю нашему всякая подобает слава, честь и поклонение,
ныне и присно и во веки веков.
Аминь.

Молитва третья

О, Пречистая и Преблагословенная Дево, Владычице Богородице,
от неплодове по обетованию рождшаяся и чистоты ради души и тела Твоего сподобльшаяся
быти Материю Сына Божия, Господа нашего Иисуса Христа, с Нимже ныне на небеси пребывавши
и имаши велие дерзновение ко Пресвятой Троице, от Неяже, яко Царица,
венцем вечнаго царствования увенчана еси.

Темже смиренно к Тебе прибегаем и просим: исходатайствуй нам у Всемилостиваго Господа Бога
прощение всех прегрешений наших вольных и невольных; страждущему отечеству нашему спасения,
мира, тишины и благочестия возстановление, времена мирны и безмятежны, крамол злых непричастны;
ко изобилию же плодов земных, воздуха благорастворения, дожди мирны и благовременны.
И вся, яже к житию и спасению нашему потребная, испроси нам у Сына Твоего, Христа Бога нашего.
Наипаче же благопоспеши нам украситися благими нравы и добрыми делы, да, елико мощно,
подражатели будем святому Твоему житию, имже от юности на земли украшалася еси,
благоугождающи Господу; сего ради явилася еси честнейшая Херувим и славнейшая Серафим.

Ей, Госпоже Пресвятая,
буди нам во всем скорая Помощница и премудрая ко спасению Наставница,
да Тебе последствующи и Тобою воспомоществуеми, сподобимся наследницы быти
Небеснаго Царствия, страданиями Сына Твоего исходатайственнаго, исполнителям же святых
заповедей Его обещаннаго.
Ты бо еси, Госпоже, едина наша по Бозе надежда и упование, и Тебе весь живот наш предаем,
чающе Твоего ради ходатайства и заступления не посрамлены быти в час исхода нашего от жития сего,
и на Страшном Суде Сына Твоего, Христа Бога нашего деснаго Его стояния сподобитися,
и тамо вечно радоватися со всеми от века Ему благоугодившими и немолчно славити, хвалити,
благодарити и благословляти Его со Отцем и Духом во веки веков.
Аминь.

http://www.hram-feodosy.kiev.ua/iconostas_21_m.htm
  
#2 | Еве »» | 21.09.2012 14:22
  
4
Похвала Богородице

Похвала Богородице

Приидите, христиане,
Приснодеве Пресвятой
Воспоем хвалы и песни
Сердцем всем и всей душой.

Величаем, Приснодево,
Мы Твое смиренье,
Даровавшее нам Спаса
И Его спасенье.

Ублажаем, Богомати,
Мы Твое избранье,
За любовь, и веру в Бога,
И за послушанье.

Ублажаем, Мати Божья,
Подвиг Твой терпенья
Всех скорбей, и всех болезней,
И уничиженья.

Восхваляем, превозносим
Пением священных слов
Все труды Твои земные
И ко всем любовь.

Радуйся, Святая Дева,
Радуйся, Святая Мать,
Заслужила Ты у Бога
Жен всех больше благодать.

Ты же, Всесвятая Мати,
По Твоей святой любви
Прииди к нам, просвети,
И всех нас благослови.

За святое посещенье
И за всю Твою любовь
Ублажать Тебя мы будем
Песненно во век веков.

Прииди к нам с утешеньем
В день сей праздника святой;
Прииди с благословеньем,
Будь всем Матерью родной.

Испроси нам всем у Бога,
Всеблагая Мать,
Сердце чистое и Духа
Всесвятаго благодать.

Мы же, восприяв благая
От любви Твоей святой,
Будем петь Тебя и славить
Сердцем, разумом, душой.
Добавлять комментарии могут только
зарегистрированные пользователи!
 
Имя или номер: Пароль:
Регистрация » Забыли пароль?
Просьба о помощи
© LogoSlovo.ru 2000 - 2018, создание портала - Vinchi Group & MySites