Старец схиигумен Алексий Пензенский - акафист.

схиигумен Алексий Пензенский

Ты только вспомни и подумай обо мне и я на помощь к тебе приду.
Старец Алексий.

«Все, кто будет ежедневно читать мне акафист, за того и я буду молиться».
«Во время чтения акафиста за этого человека идет молитва перед Престолом Божиим».
«Пусть никто не сомневается в этих словах».

Эти слова старца Алексия были засвидетельствованы многими его духовными чадами.

Жизнеописание и наставления старца схиигумена Алексия Пензенского
http://www.logoslovo.ru/forum/all/topic_12906/


https://www.youtube.com/watch?v=pVld8St-Atg


АКАФИСТ
Преподобному и богоносному отцу нашему Алексию,
последних времен Чудотворцу (10.11.1930 – 08.01.2005 гг.)

Написание этого акафиста было освящено благословением
самого Батюшки Алексия
(Для келейного чтения)

Кондак 1
Избра́нный от Господа уго́дниче Христов преблаже́нне Алекси́е, твоим заступле́нием и предста́тельством огражда́еми, ныне всечестну́ю память твою пра́зднующе, мо́лим тя усе́рдно: путево́дствуй нас на пути спасе́ния, изба́ви от всяких бед и напа́стей, с любовию зову́щих ти:
Радуйся, преподо́бне о́тче наш Алекси́е, засту́пниче после́дних христиа́н.

Икос 1
Ангел земны́й и человек Не́бесный яви́лся еси́, преподо́бне Алекси́е, все житие твое в по́двизе страда́льчествования проводи́л еси́, и рая́ присноблаже́ннаго дости́гл еси́, иде́же ныне лику́я услы́ши и нас, на земли́ пою́щих ти такова́я:
Радуйся, от младе́нчества Богом избра́нный.
Радуйся, Ангелом собесе́дниче преди́вный.
Радуйся, гра́ду Пензе преславное украше́ние.
Радуйся, Бо́жия Ма́тери верное и возлю́бленное чадо.
Радуйся, измла́да на земли́ много пострада́вший.
Радуйся, а́ки кро́ткий а́гнец вся терпе́вый.
Радуйся, всего́ себе́ Богу преда́вый.
Радуйся, с Небесе́ утеше́ние прие́мый.
Радуйся, преподо́бне о́тче наш Алекси́е, засту́пниче после́дних христиа́н.

Кондак 2
Видевши роди́тели твоя́ и зна́емии я́ко благодать Бо́жия почи́ на тебе́, блаже́нне, ра́достию свято́ю ра́довахуся и Христа́ о сем благодаря́ще, сла́вяще Бога: Аллилуиа.

Икос 2
Ра́зума Боже́ственна испо́лнився, не име́еши богосло́вского позна́ния, на про́поведь Христо́ву Бо́гом призва́нный, от ве́си Ломо́вки во град Пензу отпра́вился еси́, прославля́я Просла́вльшаго тя, мы же дивя́щеся таково́му о тебе́ Бо́жию промышле́нию вопие́м ти:
Радуйся, благочести́выя ма́тери твоея́ отра́до и утеше́ние.
Радуйся, неизрече́нных дарова́ний сподо́бивыйся.
Радуйся, и́стинной Правосла́вной ве́ры насади́телю.
Радуйся, благоуха́ние Христо́во.
Радуйся, сто́лпе о́гненный, среди́ мглы безбо́жия путь спасе́ния показу́ющий.
Радуйся, граду Пензе Небе́сное заступле́ние.
Радуйся, услажда́ющий сердца́ челове́ков к тебе притека́ющих.
Радуйся, учи́телю благоче́стия.
Радуйся, преподо́бне о́тче наш Алекси́е, засту́пниче после́дних христиа́н.

Кондак 3
Си́лою свы́ше безме́рныя ско́рби и боле́зни претерпе́в и всеце́лую пре́данность всесвяте́й во́ли Бо́жии показа́в, живы́й о́браз Христо́вых страда́ний яви́лся еси́, отче Алекси́е. О вели́кое долготерпе́ние вели́каго страда́льца! Восхваля́юще таковое долготерпе́ние и чи́стое доброде́тельное житие́ твое́, взыва́ем к Богу: Аллилуиа.

Икос 3
Име́юще тя про́ста, я́ко не позна́х кни́жная, рожде́нная челове́ческою му́дростию, му́дрыя ве́ка сего́ посрами́л еси́. Уче́наго прему́дре обличи́в вразумля́юще, на путь и́стинный наставля́л еси́. Мы же прославля́юще Бо́га, Ди́внаго во святых Свои́х, вопие́м:
Радуйся, прему́дрости Бо́жия испо́лненный, ейже никто́же от челове́к проти́вится не мо́жет.
Радуйся, я́ко мня́щимся му́дрыми бы́ти посрами́л еси́.
Радуйся, и́стинный свет, просвеща́яй и освеща́яй вся́ческая.
Радуйся, свое́ю не́мощею си́льных ми́ра сего́ посрами́вый.
Радуйся, смире́нный Богому́дрый страда́льче.
Радуйся, в тя́жких боле́знех свои́х ника́коже уны́нию преда́выйся.
Радуйся, я́ко гнуша́хуся тебе́ и восстава́ху на тя неразу́мные лю́ди.
Радуйся, Христо́ву всепроще́нию науча́ющий.
Радуйся, я́ко в терпе́нии и злострада́нии Иову Многострада́льному уподо́бивыйся.
Радуйся, преподо́бне о́тче наш Алекси́е, засту́пниче после́дних христиа́н.

Кондак 4
Многоразли́чных бед и искуше́ний ве́ры ра́ди Правосла́вныя и жития́ чи́стаго претерпе́вый и еди́наго то́чию на потре́бу ища́ е́же ка́ко Бо́гу угоди́ти, оби́тель по повеле́нию Бо́жия Ма́тери учреди́в, в не́йже с ли́ки и́ночествующих вопия́л еси́ Бо́гу: Аллилуиа.

Икос 4
Ви́дя Богома́тернюю оби́тель, я́ко звезду́ до сконча́ния ве́ка сия́ющую и Небе́сным сия́нием освеща́ющую путь земна́го жития́ на́шего, прославля́ем труды́ и моле́ния твоя́ пресла́вне ста́рче, в устрое́нии оби́́тели сия потруди́вшийся, и благода́рне вопие́м ти:
Радуйся, но́вый Но́е, ковче́га спасе́ния после́дним христиа́ном строи́телю.
Радуйся, и нам ти́хую при́стань спасе́ния указа́вый.
Радуйся, святии хра́мы во оби́тели созда́вый.
Радуйся, безче́стие, клеветы́ и укоре́ние за сие без ро́пота претерпе́вый.
Радуйся, всем се́рдцем благолепие До́ма Бо́жия возлюби́л еси́.
Радуйся, мона́шиствующих пречу́дная красото́.
Радуйся, па́стырю до́брый, Христу́ подража́вый.
Радуйся, са́де благоче́стия.
Радуйся, стра́же оби́тели ве́чный.
Радуйся, Богоро́дицы заступле́нию и покро́ву оби́тель твою́ поручи́вый.
Радуйся, преподо́бне о́тче наш Алекси́е, засту́пниче после́дних христиа́н.

Кондак 5
Боготе́чной звезде́ уподо́бился еси́ всеблаже́нне, ты Отца́ Небе́снаго ча́до досто́йное был еси́ и све́том Христо́вым возсия́л еси́ пред челове́ки. Ви́деша дела́ твоя́ благая и пречу́дная мно́зи во след тебе́ направля́ху стопы́ своя́ от распу́тий грехо́вных, о́вии у́бо на ну́жды оби́тели твоея́ от име́ний свои́х принося́ще, и мно́зим ты отцем духо́вным стал еси́. Мы же за такову́ю ми́лость Бо́жию к нам воспева́ем Бо́гу: Аллилуиа.

Икос 5
Ви́дя по́двиги твоя́ о́тче, пое́м хвалу́ Бо́гу, в тебе́ кро́тцем и смире́ннем рабе́ ди́вно бо просла́вися, яви́в тя па́дшему и развраще́нному ми́ру, обурева́емому вселука́вым беснова́нием ги́бнущего в безу́мии греха́; мы же, во тьме страсте́й утопа́ющия, сле́зно вопие́м ти:
Радуйся, фа́кел освеща́ющий нашу грехо́вность.
Радуйся, ко́локол пробужда́ющий нашу совесть.
Радуйся, возводя́щий наши о́чи от земли́ к Небеси́.
Радуйся, от страсти пия́нства исцеля́ющий.
Радуйся, от страсти наркома́нии избавля́ющий.
Радуйся, в борьбе́ с блу́дной стра́стию нам помога́ющий.
Радуйся, сокруше́ние се́рдца и сле́зы раска́яния пробужда́ющий.
Радуйся, я́ко мно́зим в ми́ре сем тобо́ю спасе́ние яви́ся.
Радуйся, преподо́бне о́тче наш Алекси́е, засту́пниче после́дних христиа́н.

Кондак 6
Пропове́дуют труды́ и боле́зни твоя́, смиренному́дре Алекси́е, и́хже ра́ди ди́вно просла́ви тя Госпо́дь, оби́льныя исцеле́ний струи́ тобо́ю источа́я нам, да выну пое́м ему: Аллилуиа.

Икос 6
Вся́кую стяжа́л еси́ чудоде́йствия си́лу благода́тию ди́внаго во святы́х Свои́х Бо́га, о́тче Алекси́е, не то́кмо бо моли́твами твои́ми устра́шил еси́ бесы, но и си́лою любви́ твоея́ соверше́нно измени́л еси я, бе́са во а́нгела преврати́в. Воспомина́я сию́ побе́ду твою́ над злы́ми ду́хи преподо́бне, науча́ем всех вопи́ти тебе си́це:
Радуйся, я́ко власть на ду́хи нечи́стыя име́вый.
Радуйся, я́ко де́мони при ви́де тя и не хотя́ще себе́ открыва́ют.
Радуйся, бесну́ющихся от наси́лия диа́вольскаго свободи́телю.
Радуйся, разсла́бленных укрепи́телю.
Радуйся, стра́сти в душа́х на́ших искореня́ющий.
Радуйся, уны́ние от серде́ц на́ших отгоня́ющий.
Радуйся, не позна́вшим духо́вной ра́дости внеза́пно сердца́ ра́достию наполня́ющий.
Радуйся, стра́ждущим благо́е утеше́ние.
Радуйся, преподо́бне о́тче наш Алекси́е, засту́пниче после́дних христиа́н.

Кондак 7
Хотя́ Всеблаги́й Госпо́дь яви́ти тя свети́льника ми́ру, и не под спу́дом, а на све́щнице высо́ком поста́вити, та́ко да просвети́тся свет твой пред челове́ки дабы прославити Отца́ Небе́снаго. Лю́ди же правосла́вныя обре́тши тя вели́каго засту́пника, а́ки би́сер многоце́нный, ра́довахуся неизрече́нно и возсыла́ху благода́рственное пе́ние Богу: Аллилуиа.

Икос 7
Моли́твы твоя, Боголюби́ве о́тче Алекси́е, подо́бно кади́лу, елею и ми́ру благоуха́нному, восхо́дят бо ко Престо́лу Вседержи́теля и си́лою благослове́ния твоего́ ми́лость Его́ преклоня́ют к нам; те́м же укрепля́еми с любо́вию зове́м ти:
Радуйся, я́ко твои́м благослове́нием блага́я наме́рения успешно соверша́ются.
Радуйся, я́ко твои́м благослове́нием ко́зни бесо́вские разруша́ются.
Радуйся, я́ко твои́м благослове́нием благопотре́бное от Бо́га подается.
Радуйся, я́ко твоего́ благослове́ния де́мони трепе́щут.
Радуйся, моли́твенное благоуха́ние к Бо́гу.
Радуйся, моли́тву Иису́сову усты́ непреста́нно твори́вый и во уме́ содержа́вый.
Радуйся, возду́х моли́твою твое́ю освеща́ющий.
Радуйся, моли́твенниче наш пречу́дный.
Радуйся, преподо́бне о́тче наш Алекси́е, засту́пниче после́дних христиа́н.

Кондак 8
Стра́нное и пресла́вное чу́до ви́дится всем притека́ющим к тебе́, о́тче Алекси́е, я́ко и вода́ из кладенца́ твоего́, че́рплемая с ве́рою, теле́сныя и душе́вныя неду́ги исцеля́ет, науча́я чудодею́щему Бо́гу пе́ти: Аллилуиа.

Икос 8
Весь еси был Любо́вь, Богоно́се о́тче наш Алекси́е, не ве́дал еси поко́я до конца́ многотру́днаго жития́ твоего́, всем се́рдцем твои́м и свято́ю любо́вию твое́ю ча́дом и бли́жним послужи́л еси́. Мы же ви́дящи тя, преблаги́й о́тче, ра́дующагося с ра́дующимися и пла́чущаго с пла́чущими воспева́ем ти сицева́я:
Радуйся, любве́ вели́кое вмести́лище.
Радуйся, я́ко всем любвеоби́льно вхо́ды до́ма твоего́ отверза́л еси́.
Радуйся, си́рых и убогих любо́вию свое́ю согрева́л еси́.
Радуйся, пла́чущия утеша́л еси́.
Радуйся, в беда́х и обстоя́ниях ско́рый помо́щниче.
Радуйся, призыва́ющим тя усе́рдный засту́пниче.
Радуйся, приме́р христиа́нской любви́ и терпе́ния всем нам оста́вивый.
Радуйся, любо́вь в сердца́х на́ших возжига́ющий.
Радуйся, преподо́бне о́тче наш Алекси́е, засту́пниче после́дних христиа́н.

Кондак 9
Вся́кое естество́ челове́ческое удиви́ся да́ру прозорли́вости иму́щи от Бо́га преподо́бне, я́ко ты духо́вными очесы́ предрека́л еси́ бу́дущая я́ко настоя́щая. Лю́дие слы́шащия сие́ со всех сторо́н стека́хуся к те́бе с недоуме́ньми, скорбьми́ и печа́льми свои́ми и, утеше́ние и сове́т благоразумен приимше, благодариша Бога: Аллилуиа.

Икос 9
Вети́я многовеща́нныя, я́ко ры́бы безгла́сныя, не мо́гут уразуме́ти я́ко восста́л свяще́нник ино́й по чи́ну Мелхиседе́ка, иже не по зако́ну за́поведи плотски́я бысть, но по силе живота́ неразруша́емаго.
О пра́ведне о́тче Алекси́е, неизрече́ннаго Бо́га свя́тилище!
О ди́вное явле́ние Бо́жие нашему малове́рному вре́мени!
Мы же ви́дяще сия́, воспева́ем ти похва́льная:
Радуйся, Олтаря́ Госпо́дня досто́йный предстоя́телю.
Радуйся, драгоце́нный сосу́де Ду́ха Свята́го, сокро́вище благих.
Радуйся, ма́лое и сла́бое вмести́лище, невмести́мыя Ангельския Си́лы вмеща́ющее.
Радуйся, тайнови́дче душ челове́ческих.
Радуйся, я́ко му́дростию свое́ю над все́ми высо́ко стоя́л еси́.
Радуйся, преиспо́лненный блаже́ннаго обще́ния с Бо́гом.
Радуйся, луч пресве́тлый Ве́чнаго Со́лнца Пра́вды.
Радуйся, Святы́я Це́ркве свети́льниче неме́ркнущий.
Радуйся, преподо́бне о́тче наш Алекси́е, засту́пниче после́дних христиа́н.

Кондак 10
Спасти́ хотя́ вся, Госпо́дь Бог но́ваго тя свята́го посла́л еси́ нам, тем чрез тебя́ из те́мных глуби́н греха́ воззва́л еси́ нас от жи́зни грехо́вныя к жи́зни святе́й, воспева́юще Ему: Аллилуиа.

Икос 10
Стена́ еси́ и огражде́ние от ерети́ческаго омраче́ния ми́ра сего́ был еси́, о́тче наш Алекси́е, про́тиву экстрасе́нсов и други́х слуг сатаны́ боро́лся еси́; и еретика́ премудре обличи́в, из Це́ркви изгна́л еси́. Защити и нас сла́бых и не́мощных от де́монскаго прельще́ния и просвети́ омраче́нныя о́чи серде́ц на́ших, с ве́рою вопию́щих ти.
Радуйся, ду́ши на́ша осле́пшия просвеща́ющий.
Радуйся, выводя́щий из поги́бели обольще́ния.
Радуйся, учи́телю многопло́дный волко́в хи́щных обличи́телю.
Радуйся, наста́вниче вели́кий на путь спасе́ния.
Радуйся, радость истинную во Христе нам показавый.
Радуйся, непоколеби́мый сто́лпе, тве́рдо содержа́щий су́щих в вере.
Радуйся, покро́ве духо́вный, от бед и напа́стей лю́ди твоя́ покрыва́яй.
Радуйся, стено́ неви́димо огражда́ющая, паче стен ка́менных.
Радуйся, преподо́бне о́тче наш Алекси́е, засту́пниче после́дних христиа́н.

Кондак 11
Пение благода́рсвенное Го́споду прино́сим о тебе́ чту́щия тя, святы́й преподо́бне о́тче Алекси́е, я́ко даров́а Госпо́дь нетле́нное те́ло твое́ земли́ Пе́нзенской во утеше́ние и огражде́ние, гра́ду Пе́нзе во сла́ву и защище́ние, скорбя́щим во утеше́ние, бе́дствующим во отра́ду и по́мощь, боля́щим во исто́чник исцеле́ний, и всем с ве́рою притека́ющим к тебе́, во спасе́ние. Те́мже Бо́гу вопие́м: Аллилуиа.

Икос 11
Светоза́рное со́лнце, собесе́дниче Ангелом был еси́ на земли́, преподо́бне о́тче наш Алекси́е, с моли́твою на уста́х преда́в святу́ю ду́шу твою́ в ру́це Бо́жии пресели́лся еси в Го́рняя Селе́ния, моля́ся за весь мир пред Престо́лом Всевы́шняго. Мы же, живу́щие на земли́, вопие́м ти:
Радуйся, лампа́до Боже́ственнаго сия́ния.
Радуйся, нетле́ния цве́те прекра́сный.
Радуйся, таи́нниче Бо́жий еще на земли́ благ Небе́сных вкуси́вый.
Радуйся, сла́достей духо́вных пода́телю.
Радуйся, звездо́ путево́дная путь к Ца́рствию Бо́жию нам указу́ющая.
Радуйся, я́ко и по преставле́нии твое́м с на́ми пребыва́еши.
Радуйся, в со́ниих и виде́ниих ча́дом твоим явля́яся.
Радуйся, в моли́твах твои́х о нас к Бо́гу те́плый предста́телю.
Радуйся, преподо́бне о́тче наш Алекси́е, засту́пниче после́дних христиа́н.

Кондак 12
Покро́в и прибе́жище бы́вый всем к тебе́ притека́ющим еще в житии́ твое́м ты, отче, не оста́вил еси нас си́рых, и по твое́м успе́нии я́ко сам во утеше́ние всех изре́кл еси: умер бо е́смь, но аз жив. Бог сохрани́ святы́я мо́щи твоя́ нетле́нными во укрепле́ние Правосла́вныя ве́ры и благоче́стия, в зна́мение безсме́ртия. Его́же прослявля́юще вопие́м: Аллилуиа.

Икос 12
Воспева́ем тя, преподобне о́тче Алекси́е, я́ко удиви́л еси́ мир чудесы́, истека́ющими от святы́х моще́й твоих. Вси бо с ве́рою приходя́щии и лобыза́ющии их получа́ют вся благопотре́бно проси́мая. И мы прославля́юще Бо́га, Да́вшего тебе кре́пость, Венча́вшего тя венце́м нетле́ния и Де́йствующего тобо́ю, вопие́м ти си́це:
Радуйся, сла́во правосла́вных и Це́ркви непоколеби́мое утвержде́ние.
Радуйся, земли́ Пензенския свяще́нное украшение.
Радуйся, Небе́сный наш покрови́телю и ско́рый помо́щниче.
Радуйся, на высоту́ безстра́стия возше́дый.
Радуйся, со Апо́столы у Престо́ла Царя Славы ликовству́яй.
Радуйся, мучеников добропобе́дных сострадальче.
Радуйся, звездо́ сия́ющая в со́нме преподо́бных.
Радуйся, граждани́не Иерусали́ма Го́рняго.
Радуйся, свя́тче Бо́жий со всеми святы́ми прославля́емый.
Радуйся, наш свети́льниче все све́тлый и вселюбимый.
Радуйся, преподо́бне о́тче наш Алекси́е, засту́пниче после́дних христиа́н.

Кондак 13
О всесвяты́й и пресла́вный уго́дниче Бо́жий, преподо́бне о́тче наш Алекси́е! Прииме воздыха́ние благода́рных серде́ц на́ших, с любо́вию тебе приноси́мое.
Преклоня́ем коле́на наша пред твои́ми многоле́тними тя́жкими страда́ньми. Твои́ми всеси́льными у Престо́ла Бо́жия моли́твами пода́ждь и нам немощны́м твердыми во искуше́ниях и злострада́ниях бы́ти, тве́рдо наде́ятися ве́рою Правосла́вною спасти́ся, да и мы с Тобо́ю и со все́ми святы́ми сподо́бимся в Го́рнем Иерусалиме пе́ти Всеблаго́му Бо́гу на́шему ве́чно немо́лчное: Аллилуиа.
(Читается трижды: затем снова 1-й икос и 1-й кондак).



МОЛИТВА

К преподобному старцу Алексию, последних времен Чудотворцу
(чтомая в Свято-Михайловской обители у святых мощей Батюшки)

О Преподо́бне и Богоно́се отче наш Алекси́е, Упова́ние христиа́н, Кре́посте на́ша, свя́тостию жития́ и чудесы́ твои́ми в земли́ Пе́нзенской просия́вший и по отше́ствии твое́м Сонм Святы́х попо́лнивший, где Ангели Небе́снии со все́ми Святы́ми ра́достно лику́ют, прия́ша чи́стую ду́шу твою́ во обит́ели ра́йския, возлете́вшую на Небеса́ я́ко Небопа́рная Орля, и мы гре́шнии на земли́ ра́достно прославля́ем тя со все́ми Го́рними Си́лами и усе́рдно про́сим:

Па́стырю наш до́брый и учи́телю Прему́дрый, Ду́ха Свята́го Сосу́де Избра́нный, Ди́вный во Святы́х, Богодухнове́нный Светоза́рный Ангеле, Вели́кий Чудотво́рче и Моли́твенниче наш те́плый, всему ми́ру Свети́ло, к тебе во умиле́нии душ и сокруше́нии серде́ц на́ших, благонаде́жно притека́ем и вопия́ усе́рдно про́сим по́мощи твоея́ и те́плаго ко Преблаго́му Богу хода́тайства, да твои́ми умиле́нными моли́твами испроси́ нам от Него́ человеколю́бную милость, оставле́ние многих наших согреше́ний, души́ и телеси́ здра́вие, со спасе́нием; и я́ко Благ и Человеколю́бец, да благоволи́т безбе́дно в мире сем ходи́ти нам до сконча́ния живота на́шего.

Да егда́ найдет на ны испыта́ния час, укрепи́т нас ве́ры ра́ди Православныя подвизатися до сме́рти, Це́рковь Святу́ю в правове́рии утверди́т. От язы́к безбо́жных, от отсту́пник и от еретико́в поги́бельными ересьми́ ослепле́нных огради́т. Град Пе́нзу и вся гра́ды и ве́си, Оби́тель твою от стихи́йных бед и многоразли́чных обстоя́ний сохрани́т. Месту сему́ всемо́щное покрови́тельство яви́т и не даст пора́доваться враго́м, хотя́щим погуби́ти Святы́ню Госпо́дню. И да полу́чат здесь изба́вление от вся́ких зол вси приходя́щии сюда с ве́рою!

Имя же Госпо́дне да просла́вится на ме́сте сем и да возвели́чится заступничество твое, Уго́дниче Христо́в. Во вре́мя же разлуче́ния от жития́ сего ду́ши на́ша в покая́нии и ми́ре Ангелом Своим Святы́м ми́лостивно прия́ти повели́т, и от мра́чных и злокова́рных и лю́тых духо́в де́монских на возду́се проше́д невозбра́нно к Нему непосты́дно предста́ти поклони́тися и безме́рныя ра́дости Небе́снаго Ца́рствия вкуси́ти, и блаже́нныя жизни сподо́бит со все́ми Святыми во ве́ки. Аминь.


Тропарь, глас 2:
Образ Христовой любви и терпения являя́/ покров и защище́ние земли Пензенской/ и Непобедимого Православия/ Всесла́вне, Божий Угодниче Истинный Алекси́е/ к служению Христову от чрева ма́терняя предъизбра́нный/ Богу угоди́л еси/ Тем же тя Господь даром прозрения и исцеления обогати́/ и ныне в черто́зех Небесных Престолу Божию предстои́ши// и мо́лишися о душах наших.

Слава и ныне:

Кондак, глас 3:
Днесь радостно ликует Церковь Русская/ прославляющи тя́ Преподобне отче наш Алекси́е/ последних времен Чудотворца Преди́внаго/ Православия одеждею свыше истка́нною// Веры Истинной Хранителю.

Величание:

Ублажаем тя/ Преподобне отче наш Алекси́е,/ и чтим святу́ю память твою́/ наста́вниче мона́хов// и собесе́дниче Ангелов.


Благословение у Батюшки Алексия на наступающий день (или ночь)

Святый угодниче Христов, преподобне отче наш Алексие! Благослови меня грешнаго (ую) и помози мне без греха провести наступающий день сей (ночь сию), сохрани и защити меня твоим небесным заступлением на всяком месте, на всякое время и на всякий час и молитвами твоими приведи меня грешнаго (ую) к тихому пристанищу спасения.
Аминь.

Комментарии (1)

Всего: 1 комментарий
#1 | Анна. »» | 26.04.2016 23:06
  
19
Тропарь, глас 2:

Образ Христовой любви и терпения являя́/ покров и защище́ние земли Пензенской/ и Непобедимого Православия/ Всесла́вне, Божий Угодниче Истинный Алекси́е/ к служению Христову от чрева ма́терняя предъизбра́нный/ Богу угоди́л еси/ Тем же тя Господь даром прозрения и исцеления обогати́/ и ныне в черто́зех Небесных Престолу Божию предстои́ши// и мо́лишися о душах наших.
Добавлять комментарии могут только
зарегистрированные пользователи!
 
Имя или номер: Пароль:
Регистрация » Забыли пароль?
Просьба о помощи
© LogoSlovo.ru 2000 - 2019, создание портала - Vinchi Group & MySites