Акафист и Канон святому апостолу Фоме.

Акафист святому апостолу Фоме

Акафист святому апостолу Фоме
Утвержден: 25 декабря 2012 года, журнал №129.
Память: 19 октября (06 октября ст. ст.)
Утвержден для общецерковного использования.


Конда́к 1.
Избра́нный самови́дче Сло́ва и свиде́телю Его́ сла́вный, да́же до после́дних земли́ благовести́л еси́ ве́ру твою́: «Его́же ра́ны а́з осяза́х, Се́й е́сть Госпо́дь и Бо́г». Те́мже и ны́не, созерца́яй на́м незри́мая, за взыску́ющия ве́ры моли́ся, да зове́м ти́:

Ра́дуйся, апо́столе Фомо́, неве́рием до́брым ве́ру утверди́вый.

И́кос 1.
А́нгелом неве́домое та́инство позна́л еси́, Пло́ть Бо́га жи́ва дерзнове́нною десни́цею осяза́я, те́мже, ужаса́ющеся и дивя́щеся, зове́м ти́:

Ра́дуйся, я́ко дерзнове́ние твое́ Бо́г предуве́де; ра́дуйся, я́ко на служе́ние Свое́ тя́ предуста́ви.

Ра́дуйся, я́ко неве́рие твое́ не осуди́ся; ра́дуйся, я́ко ве́ра твоя́ утверди́ся.

Ра́дуйся, я́ко Христо́с в ли́к апо́стольский тя́ избра́; ра́дуйся, я́ко стопы́ твоя́ по словеси́ Своему́ напра́ви.

Ра́дуйся, я́ко уста́ ко усто́м тебе́ бы́сть Бо́жие веща́ние;

ра́дуйся, я́ко приклони́ся Госпо́дь к любопы́тнаго пе́рста осяза́нию.

Ра́дуйся, апо́столе Фомо́, неве́рием до́брым ве́ру утверди́вый.

Конда́к 2.
«Словеса́ ва́ша о явле́нии Воскре́сшаго неудобоприя́тельна ми́ явля́ются, — вопия́ше Фома́ ины́м ученико́м, — а́ще не ви́жду на руку́ Его́ я́звы гвозди́нныя, и не вложу́ пе́рста моего́ в я́звы гвозди́нныя, и вложу́ ру́ку мою́ в ре́бра Его́, не дерзну́ взыва́ти Сему́: Аллилу́ия».

И́кос 2.
Ра́зум недоразумева́емый догма́тов ве́ры разуме́ти и́щуще, вопроша́ем в смяте́нии: во двою́ естеству́ еди́но Лице́ ка́ко Це́рковь му́дрствует и воспева́ет? Оба́че неве́рием твои́м, апо́столе, уверя́еми в се́м, взыва́ем:

Ра́дуйся, я́ко Христо́с еди́н хле́б с тобо́ю вкуси́; ра́дуйся, я́ко еди́но со́лнце над ва́ма возсия́.

Ра́дуйся, я́ко хле́бом и́стины мно́ги насы́тил еси́; ра́дуйся, я́ко Со́лнце пра́вды возлюби́л еси́.

Ра́дуйся, я́ко еди́н исто́чник вы́ напои́; ра́дуйся, я́ко еди́на смоко́вница ва́ма се́нь даде́.

Ра́дуйся, я́ко ре́ки благода́ти источи́л еси́; ра́дуйся, я́ко не безпло́дная смоко́вница показа́лся еси́.

Ра́дуйся, апо́столе Фомо́, неве́рием до́брым ве́ру утверди́вый.

Конда́к 3.
«Си́ле Вы́шняго вся́ возмо́жна су́ть,– вопия́ше Фома́,– мо́жет бо и уме́ршия воскреша́ти, оба́че ка́ко сме́рти приобщи́ся Се́й, Ему́же подоба́ет воспева́ти: Аллилу́ия».

И́кос 3.
Богоприя́тну Де́ву прозре́ младе́нец, во чре́ве Елисаве́тином сы́й, мы́ же, о́чи иму́ще, не зри́м блага́я дела́ Госпо́дня, оба́че сло́во Христо́во, апо́столу рече́нное: блаже́ни не ви́девшии и ве́ровавшии, помина́ем с наде́ждою, и та́ко сему́ взыва́ем:

Ра́дуйся, спасе́ния возжела́вый; ра́дуйся, я́ко проро́ки ча́янная узре́л еси́.

Ра́дуйся, Ада́мом утра́ченная взыска́вый; ра́дуйся, я́ко Спаси́теля обре́л еси́.

Ра́дуйся, Све́том ми́ра просвеще́нный; ра́дуйся, я́ко Не́бо отве́рзеся ти́.

Ра́дуйся, Сло́вом О́тчим умудре́нный; ра́дуйся, я́ко та́йны Ца́рствия откры́шася ти́.

Ра́дуйся, апо́столе Фомо́, неве́рием до́брым ве́ру утверди́вый.

Конда́к 4.
«Бу́рю вну́трь име́ю помышле́ний сумни́тельных,– вопия́ше Фома́,– ка́ко бо во гро́б положе́н бы́сть по вода́м Ходи́вый и Ла́заря Воскреси́вый, Ему́же а́з жела́ю воспе́ти: Аллилу́ия».

И́кос 4.
Слы́шаша у́бо па́стырие А́нгелов, пою́щих Младе́нца Спа́са, и, ше́дше, поклони́шася Ему́; мы́ же, у́ши иму́ще, не вне́млем гла́су Госпо́дню, оба́че на твое́ предста́тельство, апо́столе, упова́ем и зове́м ти́:

Ра́дуйся, в корабли́ со Христо́м ходи́вый; ра́дуйся, по волна́м Ходя́щу поклони́выйся.

Ра́дуйся, мре́жею Христо́вою уловле́нный; ра́дуйся, в ковче́г спасе́ния ступи́вый.

Ра́дуйся, я́ко во́ды неве́рствия не поглоти́ша тя́; ра́дуйся, я́ко бу́ря сомне́ний тя́ не потопи́.

Ра́дуйся, я́ко Христо́с над бе́здною тя́ удержа́; ра́дуйся, я́ко десни́цу с я́звою ти́ простре́.

Ра́дуйся, апо́столе Фомо́, неве́рием до́брым ве́ру утверди́вый.

Конда́к 5.
«Боготе́чной звезде́ после́доваша волсви́,– вопия́ше Фома́,– та́ко и а́з вожделе́ю сле́довати Тебе́, Го́споди и Бо́же мо́й, да́ждь ми́ то́кмо прикосну́тися Ти́, да и а́з воспою́: Аллилу́ия».

И́кос 5.
Да́ры принесо́ша халде́йстии о́троцы седя́щу на руку́ Деви́чу Созда́телю тва́ри, мы́ же, ру́це иму́ще пра́здны от де́л благи́х, ка́ко присту́пим к Сему́, ве́ры прося́ще, а́ще не апо́стола Фому́ помина́юще и та́ко ему́ зову́ще:

Ра́дуйся, я́ко Господи́н жа́твы призва́ тя́; ра́дуйся, я́ко в вертогра́де Того́ до́бре потруди́лся еси́.

Ра́дуйся, я́ко де́латель и ни́ва яви́лся еси́; ра́дуйся, я́ко пло́д стори́цею прине́сл еси́.

Ра́дуйся, я́ко со Влады́кою дне́й у́треневал еси́; ра́дуйся, я́ко ча́шу Христо́ву испи́л еси́.

Ра́дуйся, я́ко и но́щь просвеще́ние ти́ бы́сть; ра́дуйся, я́ко Го́споду Сла́вы спросла́вился еси́.

Ра́дуйся, апо́столе Фомо́, неве́рием до́брым ве́ру утверди́вый.

Конда́к 6.
«Пропове́дницы богоно́сни бы́вше волсви́, — вопия́ше Фома́, — испове́даша Тя́, Христе́, я́ко Спа́са все́х; а́ще у́бо не уве́рую в Воскресе́ние Твое́, не явлю́ся ли и а́з я́ко И́род, не ве́дый пе́ти: Аллилу́ия».

И́кос 6.
Возсия́вый во Еги́пте Све́т и́стины да разсе́ет, я́ко ды́м, вся́ сомне́ния на́ша: ве́руем бо, Го́споди, помози́ неве́рию на́шему; ты́ же, апо́столе, укрепи́ свиде́тельством твои́м зову́щия ти́:

Ра́дуйся, в сла́дость Христа́ послу́шавый; ра́дуйся, во сла́ву Его́ пожи́вый.

Ра́дуйся, с терпе́нием Тому́ послужи́вый; ра́дуйся, с весе́лием за Него́ уме́рый.

Ра́дуйся, ра́ну Прободе́ннаго осяза́вый; ра́дуйся, Кро́вию Христо́вою искупле́нный.

Ра́дуйся, копие́м мучи́тельским прободе́нный; ра́дуйся, кро́вь за Христа́ пролия́вый.

Ра́дуйся, апо́столе Фомо́, неве́рием до́брым ве́ру утверди́вый.

Конда́к 7.
«Хотя́щу Симео́ну пра́ведному умре́ти, — вопия́ше Фома́, — вда́лся еси́ я́ко Младе́нец тому́, но позна́лся еси́ ему́ и Бо́г соверше́нный; сотвори́ у́бо, Го́споди, и мне́ та́ко, да а́бие воззову́ Ти́: Аллилу́ия».

И́кос 7.
Но́вое показа́ Творе́ц снисхожде́ние на́м, на безсме́ртнем Те́ле сме́ртныя я́звы яви́ти изво́ливый апо́столу Своему́, ему́же с любо́вию взыва́ем:

Ра́дуйся, от Прему́дрости му́дрость прие́мый; ра́дуйся, от Любве́ любви́ научи́выйся.

Ра́дуйся, у Смире́ния смире́нию навы́кший; ра́дуйся, Бла́гом во бла́зе утвержде́нный.

Ра́дуйся, Терпе́нием в терпе́нии наста́вленный; ра́дуйся, Кро́тости в кро́тости подража́вый.

Ра́дуйся, Послуша́нием к послуша́нию приведе́нный; ра́дуйся, Сы́ном Отцу́ усыновле́нный.

Ра́дуйся, апо́столе Фомо́, неве́рием до́брым ве́ру утверди́вый.

Конда́к 8.
«Стра́нное чу́до ви́жду, — вопия́ше Фома́. — Две́рем затворе́нным, я́ко ду́х, вхо́дит Христо́с. Осяза́ю оба́че ра́ны и я́звы Его́, и что́ у́бо реку́, то́кмо: Госпо́дь мо́й и Бо́г мо́й; что́ у́бо воспою́, то́кмо: Аллилу́ия».

И́кос 8.
Вси́ есмы́ в ни́жних и вы́шних ника́коже достига́ем, оба́че ве́руем, я́ко обоя́ соедини́ в Себе́ Госпо́дь, я́коже яви́ сие́ апо́столу Своему́, от на́с воспева́ему си́це:

Ра́дуйся, с четверодне́вным Ла́зарем вечеря́вый; ра́дуйся, увере́ния во и́стине ре́вностно взыска́вый.

Ра́дуйся, «Оса́нна в вы́шних!» возгласи́вый; ра́дуйся, любо́вию увере́ние сие́ улучи́вый.

Ра́дуйся, воплоще́ние Сло́ва уве́девый; ра́дуйся, ми́ром гони́мый.

Ра́дуйся, безслове́сная пло́ти попра́вый; ра́дуйся, ми́р от Христа́ прие́мый.

Ра́дуйся, апо́столе Фомо́, неве́рием до́брым ве́ру утверди́вый.

Конда́к 9.
«Вся́кое естество́ тва́рное вмести́ти Боже́ственное ника́коже возмога́ет, — вопия́ше Фома́, — Ты́ Еди́ный о́ба несли́тно и неразде́льно в Себе́ сочета́л еси́, Тебе́ пою́: Аллилу́ия».

И́кос 9.
Вети́и многовеща́ннии ничесо́же приложи́ти дерза́ют, апо́столе, до́брому испове́данию твоему́: Госпо́дь мо́й и Бо́г мо́й; за сие́ и от на́с приими́ сицева́я:

Ра́дуйся, я́ко но́зе ко умове́нию Христу́ просте́рл еси́; ра́дуйся, я́ко до́ма на земли́ не име́л еси́.

Ра́дуйся, я́ко но́зе на пу́ть ми́рен напра́вил еси́; ра́дуйся, я́ко оби́тель в дому́ О́тчи сниска́л еси́.

Ра́дуйся, я́ко строи́тель ца́рский наре́клся еси́; ра́дуйся, я́ко архите́ктон прему́дрый обре́лся еси́.

Ра́дуйся, я́ко зла́то ни́щим разда́л еси́; ра́дуйся, я́ко черто́г Небе́сный царю́ воздви́гл еси́.

Ра́дуйся, апо́столе Фомо́, неве́рием до́брым ве́ру утверди́вый.

Конда́к 10.
«Спасти́ хотя́ ми́р, — вопия́ше Фома́, — животворя́щею Кро́вию из прободе́нных ре́бр, Го́споди Бо́же мо́й, напои́л еси́ вся́, я́же осяза́в, Тебе́ пою́: Аллилу́ия».

И́кос 10.
Сте́ны Иерусали́ма Небе́снаго на двана́десяти основа́ниих утверди́шася; я́коже еди́но от си́х тя́ почита́ем, апо́столе сла́вне, и та́ко ти́ воспису́ем:

Ра́дуйся, я́ко язы́к о́гнен на тебе́ почи́; ра́дуйся, я́ко сла́ва Христо́ва тя́ осия́.

Ра́дуйся, я́ко язы́ки мно́ги просвети́л еси́; ра́дуйся, я́ко и́мя Христо́во просла́вил еси́.

Ра́дуйся, я́ко неду́жных исцеля́л еси́; ра́дуйся, я́ко ме́ртвых восставля́л еси́.

Ра́дуйся, я́ко и ду́си повинова́хуся ти́; ра́дуйся, я́ко и́мя твое́ написа́ся на Небеси́.

Ра́дуйся, апо́столе Фомо́, неве́рием до́брым ве́ру утверди́вый.

Конда́к 11.
«Пе́ние вся́кое побежда́ется,– вопия́ше Фома́,– тща́щееся воспе́ти сла́ву Воскресе́ния Твоего́, Го́споди, оба́че сие́ возвещу́ до после́дних земли́, да вся́к язы́к И́стинному Бо́гу зове́т: Аллилу́ия».

И́кос 11.
Светоприе́мную свещу́ зри́м тя́, апо́столе сла́вный, прикоснове́нием к обо́женной Пло́ти возжже́нную, те́мже прино́сим ти́ сицева́я:

Ра́дуйся, би́сере ри́зы церко́вныя; ра́дуйся, вертогра́дарю И́стины.

Ра́дуйся, ко́реню богосло́вия; ра́дуйся, цве́те благоче́стия.

Ра́дуйся, ро́ждие лозы́ боже́ственныя; ра́дуйся, благоуха́ние, прия́тно Бо́гови.

Ра́дуйся, злати́це, огне́м очище́нная; ра́дуйся, весно́ целому́дрия.

Ра́дуйся, апо́столе Фомо́, неве́рием до́брым ве́ру утверди́вый.

Конда́к 12.
«Благода́ть и жи́знь прише́дый да́ти вся́кой пло́ти, — вопия́ше Фома́ ины́м ученико́м, — не возда́ст ли сия́ Пода́вшей Ему́ пло́ть? Оба́че укажи́те мне́ гро́б Ея́, да со слеза́ми воззову́ Бо́гови: Аллилу́ия».

И́кос 12.
Пою́ще Успе́ние Богоро́дицы, апо́столи проводи́ша тя́ ко гро́бу Ея́, и, вше́д и обре́т се́й пу́ст, возда́л еси́ хвалу́ Го́споду; те́мже зове́м ти́:

Ра́дуйся, Бо́жиею Ма́терию возлю́бленный; ра́дуйся, ко проща́нию То́ю призва́нный.

Ра́дуйся, я́ко ма́терь, Ю́ возлюби́вый; ра́дуйся, Бо́жиим Про́мыслом удержа́нный.

Ра́дуйся, на гро́б Ея́ пла́кати прише́дый; ра́дуйся, ка́мень от него́ отвали́вый.

Ра́дуйся, ра́дость ве́лию лю́дем откры́вый; ра́дуйся, воста́ние Пречи́стыя возвести́вый.

Ра́дуйся, апо́столе Фомо́, неве́рием до́брым ве́ру утверди́вый.

Конда́к 13.
О пресла́вный апо́столе Христо́в Фомо́, ма́лое сие́ приими́ от на́с приноше́ние и умоли́ за ны́ Го́спода Сла́вы, да утверди́вшеся по́мощию твое́ю, обря́щем и мы́ ве́ры плоды́ благи́я, Творцу́ вся́ческих пою́ще: Аллилу́ия.

Этот конда́к читается трижды, затем 1-й и́кос и 1-й конда́к.

И́кос 1.
А́нгелом неве́домое та́инство позна́л еси́, Пло́ть Бо́га жи́ва дерзнове́нною десни́цею осяза́я, те́мже, ужаса́ющеся и дивя́щеся, зове́м ти́:

Ра́дуйся, я́ко дерзнове́ние твое́ Бо́г предуве́де; ра́дуйся, я́ко на служе́ние Свое́ тя́ предуста́ви.

Ра́дуйся, я́ко неве́рие твое́ не осуди́ся; ра́дуйся, я́ко ве́ра твоя́ утверди́ся.

Ра́дуйся, я́ко Христо́с в ли́к апо́стольский тя́ избра́; ра́дуйся, я́ко стопы́ твоя́ по словеси́ Своему́ напра́ви.

Ра́дуйся, я́ко уста́ ко усто́м тебе́ бы́сть Бо́жие веща́ние;

ра́дуйся, я́ко приклони́ся Госпо́дь к любопы́тнаго пе́рста осяза́нию.

Ра́дуйся, апо́столе Фомо́, неве́рием до́брым ве́ру утверди́вый.

Конда́к 1.
Избра́нный самови́дче Сло́ва и свиде́телю Его́ сла́вный, да́же до после́дних земли́ благовести́л еси́ ве́ру твою́: «Его́же ра́ны а́з осяза́х, Се́й е́сть Госпо́дь и Бо́г». Те́мже и ны́не, созерца́яй на́м незри́мая, за взыску́ющия ве́ры моли́ся, да зове́м ти́:

Ра́дуйся, апо́столе Фомо́, неве́рием до́брым ве́ру утверди́вый.

Моли́тва.
О благознамени́тый и сла́вный апо́столе Христо́в Фомо́! Егда́ на коне́ц веко́в к челове́ком прише́дый Бо́г избра́ тя́ в ученики́ Своя́ и даде́ ти́ вла́сть боля́щия исцеля́ти, прокаже́нныя очища́ти, ме́ртвыя воскреша́ти, бе́сы изгоня́ти, тогда́ не си́х ра́ди, но наипа́че любо́вию прилепи́лся еси́ ко Христу́, жела́нием вожделе́в да́же до сме́рти сле́довати по Не́м. Сего́ ра́ди, а́ще попуще́нием Боже́ственным и не зре́л еси́ со ины́ми ученики́ воскре́сшаго Спа́са, а́ще и отре́клся еси́ ве́ровати сему́, до́ндеже вложи́ши пе́рст сво́й в я́звы гвозди́нныя и вложи́ши ру́ку свою́ в ре́бра Его́, оба́че испо́лни Госпо́дь проше́ние се́рдца твоего́ и непрело́жно па́ки ве́ру твою́ утверди́. Те́мже мо́лим тя́: отве́рзи на́м о́чи ве́ры, да плотски́м неви́димая явя́тся на́м; пода́ждь на́м наде́жду на снисхожде́ние Бо́жие, да отча́яние грехо́вное не пожре́т ны́; откры́й на́м блаже́нство любве́, я́же крепка́ е́сть, я́ко сме́рть, и еди́на возмога́ет над то́ю, да порабо́тавше Христу́ на земли́, воздви́гнем и мы́ себе́ кро́вы Небе́сныя и с тобо́ю и все́ми святы́ми просла́вим пречестно́е и великоле́пое и́мя Отца́ и Сы́на и Свята́го Ду́ха. Ами́нь.

Канон святому апостолу Фоме
Припев: Святы́й апо́столе Фомо́, моли́ Бо́га о нас.
Память: 19 октября (06 октября ст. ст.)
Глас 4.


Пе́снь 1.
Ирмо́с: Триста́ты кре́пкия, Рожде́йся от Де́вы, безстра́стия во глубине́ души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.

Безнача́льна Сы́на Бо́жия, Бо́га Сло́ва, я́вльшагося на земли́, зра́ком Су́щим по на́м, Его́же ви́дел еси́, сла́вне, Его́же и ру́ки дла́нию, и ребро́ осяза́л еси́, умоли́ спасти́ па́ству твою́.

Зна́тель та́йных, и утро́бы истязу́яй, и сердца́ испыту́яй, Бо́г мо́й Иису́с, тя́, Фомо́ всеблаже́нне, Своего́ Богоявле́ния служи́теля, и свиде́теля, и апо́стола Боже́ственна прия́т.

Во́д та́инственных река́ ты́ показа́лся еси́, напая́ющая, Фомо́, лице́ земли́; церко́вный же со́нм струя́ми Богозна́ния и шу́мом Ду́ха многобо́жную пре́лесть отгна́л еси́.

Богоро́дичен: Сме́рти и тли́ потреби́тельница су́щи, нетле́ния исто́чник ро́ждшая, Христа́, Богоро́дице Всепе́тая, и безсме́ртия украси́вшаго благода́тию челове́ческое естество́, Пречи́стая.

Пе́снь 3.
Ирмо́с: Не му́дростию, и си́лою, и бога́тством хва́лимся, но Тобо́ю, О́тчею Ипоста́сною Му́дростию, Христе́: не́сть бо свя́т, па́че Тебе́, Человеколю́бче.

Доброде́тели добро́тою благоле́пен сы́й подо́бяся самови́дче, и чудесы́, инди́ов злови́дное све́том Боже́ственным озари́в, и ве́рою просвети́л еси́ те́х помраче́ние.

Заре́ю разже́гся самоде́тельством Ду́ха, я́ко стрела́ Богосве́тлая, по́слан бы́л еси́, Богоприя́тне, и ми́р просвети́л еси́, Фомо́, чудесы́.

Тайнонауче́н Боже́ственныя му́дрости догма́том, я́коже ско́рость мо́лнии преходя́щия, апо́столе Фомо́, све́том просвети́л еси́ ми́ра концы́.

Богоро́дичен: Неискусобра́чная, Бо́га пло́тию ро́ждши, страсте́й прило́ги коле́блема мя́ утверди́: не́сть бо, Пречи́стая, ра́зве Тебе́ помо́щницы.

Седа́лен, гла́с 8.
Мре́жею слове́с Боже́ственных ры́бы улови́в слове́сныя, сия́ прине́сл еси́ нача́ток Бо́гу на́шему, и в Христо́вы я́звы жела́я облещи́ся, подо́бник стра́сти Его́ яви́лся еси́. Те́м, соше́дшеся по до́лгу, чти́м, апо́столе сла́вне, всепра́зднственную па́мять твою́ и согла́сно вопии́м ти́: моли́ Христа́ Бо́га грехо́в оставле́ние дарова́ти чту́щим любо́вию святу́ю па́мять твою́.

Богоро́дичен: Я́ко Де́ву и Еди́ну в жена́х, Тя́, без се́мене Ро́ждшую Бо́га пло́тию, вси́ ублажа́ем ро́ди челове́честии: о́гнь бо всели́ся в Тя́ Божества́ и, я́ко младе́нца, дои́ши Зижди́теля и Го́спода. Те́м А́нгельский и челове́ческий ро́д досто́йно сла́вим пресвято́е рождество́ Твое́ и согла́сно вопие́м Ти́: моли́ Христа́ Бо́га согреше́ний оставле́ние дарова́ти покланя́ющимся ве́рою пресвято́му рождеству́ Твоему́.

Пе́снь 4.
Ирмо́с: Седя́й в сла́ве на Престо́ле Божества́, во о́блаце ле́гце прии́де Иису́с Пребоже́ственный, нетле́нною дла́нию, и спасе́ зову́щия: сла́ва, Христе́, си́ле Твое́й.

Велича́йшим чуде́с явле́нием наче́н и догма́тов Боже́ственных сла́ву све́тле излага́я, вселе́нную объя́л еси́ пропове́данием, взыва́ющу: сла́ва, Христе́, си́ле Твое́й.

Я́ко самови́дца тя́ Сло́ва и те́плаго служи́теля, и Того́ сла́вы и вели́чествия свиде́теля, и я́ко ве́рна строи́теля, и апо́стола восхваля́ем тя́, блаже́нне Фомо́, всече́стне.

Я́коже неве́стный черто́г и ски́нию Небе́сную, основа́ние на Ка́мени краеуго́льнем утверди́в, назда́л еси́, блаже́нне всеприснопа́мятне, зову́щим: сла́ва, Христе́, си́ле Твое́й.

Богоро́дичен: Зе́млю неора́нную, Кла́с жи́зни возде́лавшую, и о́блак ле́гкий, ту́чу, Жизнода́вца источи́вшую, Всесвяту́ю Де́ву имену́ем, зову́ще: сла́ва, Христе́, си́ле Твое́й.

Пе́снь 5.
Ирмо́с: Нечести́вии не у́зрят сла́вы Твое́й, Христе́, но мы́ Тя́, Единоро́дне, Оте́ческия сла́вы сия́ние Божества́, от но́щи у́тренююще, воспева́ем Тя́, Человеколю́бче.

Осия́н, апо́столе, сла́вою Христо́вою и, ребро́ животво́рное осяза́в, поче́рпл еси́ неизследи́мую Богосло́вия пучи́ну и ми́р обогати́л еси́.

Не прише́д к пе́рвому Твоему́ вхо́ду Фома́, не ве́руя же ученико́м, ве́ровав же последи́, ра́дуяся, возопи́, Тя́, Бо́га и Го́спода возвеща́я, Многоми́лостиве.

Я́ко не́бо одушевле́нное, сла́ву Твою́, Христе́, гро́мом духо́вным Фома́ возопи́, испове́дуя и Бо́га, и Го́спода, Тя́ ве́рным благовести́.

Богоро́дичен: Победи́теля покажи́, Всенепоро́чная, у́м страсте́й и помышле́ний стремле́ния покори́ си́х, Богоневе́сто, Бо́га Ро́ждшая, Спаси́теля ду́ш на́ших.

Пе́снь 6.
Ирмо́с: Пожру́ Ти́ со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися ра́ди ми́лости от ре́бр Твои́х исте́кшею Кро́вию.

Все́х неве́рие, Фомо́, душегу́бное, неве́рование твое́, блаже́нне, исцеля́ет: ты́ бо несумне́нно гвозде́й же и копия́ я́звы испыта́л еси́. Испусти́л еси́, я́ко си́лен, Христе́, апо́стола, я́ко стрелу́ изощре́ну, в сердца́ вра́г Твои́х, Жизнода́вче, и коры́стей объя́тие Тебе́ си́х приведе́.

Же́ртвы и́дольския, Ще́дре, упраздни́л еси́, закла́н бы́в на Дре́ве, и заколе́нии святы́ми Богоглаго́ливых апо́стол, подража́ющих Твоя́ страда́ния.

Богоро́дичен: О чу́до, все́х чуде́с нове́йшее: я́ко Де́ва во утро́бе вся́ческая Содержа́щаго, неискусому́жно заче́нши, не тесновмести́.

Конда́к, гла́с 4.
Прему́дрости благода́ти испо́лнен, Христо́в апо́стол и служи́тель и́стинный в покая́нии вопия́ше Тебе́: Ты́ мо́й еси́ Бо́г же и Госпо́дь.

И́кос.
Госпо́дню ученику́ и вели́кому тайнопове́дателю, Фоме́ Богоглаго́ливому, Пе́тр возопи́: ви́дехом Го́спода. Рече́ же то́й: а́ще не ви́жду а́з я́звы ру́к Его́, не уве́рую, вопия́ше близне́ц. Тогда́ Влады́ка все́х, я́коже ра́б прии́де, хотя́ спасти́ вся́, и глаго́лет Фоме́: осяжи́ ру́ки Моя́ и ре́бра и не не ве́руй: А́з бо е́смь Госпо́дь и Бо́г тво́й. О́н же с покая́нием возопи́: Ты́ мо́й еси́ Бо́г же и Госпо́дь.

Пе́снь 7.
Ирмо́с: В пещи́ Авраа́мстии о́троцы перси́дстей, любо́вию благоче́стия па́че, не́жели пла́менем опаля́еми, взыва́ху: Благослове́н еси́ в хра́ме сла́вы Твоея́, Го́споди.

С вы́шними ликостоя́ньми, я́ко апо́стол, ра́дуяся, лику́еши, блаже́нне, на небесе́х, воспева́еши же, веселя́ся: Благослове́н еси́ в хра́ме сла́вы Твоея́, Го́споди.

От коне́ц до коне́ц протече́ твое́ веща́ние и глаго́л твои́х Боже́ственных предложе́ние, зову́щия науча́ющее: благослове́н еси́ в хра́ме сла́вы Твоея́, Го́споди.

Хра́м бы́л еси́ ты́ Тро́ицы, прехва́льне, те́мже и хра́мы и́дольския и куми́ры разруши́л еси́, апо́столе, хра́мы же воздви́г во сла́ву и хвалу́ Христа́ Бо́га.

Богоро́дичен: Зако́нныя рабо́ты Твои́м Рождество́м изба́вихомся: Ты́ бо, Богоро́дице, Изба́вителя неискусому́жно на́м родила́ еси́. Благослове́нна ты́ в жена́х еси́, Всенепоро́чная Влады́чице.

Пе́снь 8.
Ирмо́с: О́троки благочести́выя в пещи́ Рождество́ Богоро́дичо спасло́ е́сть. Тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте дела́ и превозноси́те Его́ во вся́ ве́ки.

С Бо́гом бесе́дуя вопло́щшимся, пло́ть забы́в, яви́лся еси́, блаже́нне, преми́рным же обоже́нием обогати́лся еси́, приближе́нием к Бо́гу Боготвори́мь, и, Го́спода по́йте, зовя́, и превозноси́те Его́ во вся́ ве́ки. Любо́вию Христу́ сочета́вся, сме́рть с Ни́м, блаже́нне, возлюби́л еси́, и со апо́столом Твои́м и́дем, веща́в, и с ни́м сме́рть прии́мем: Го́спода по́йте, вопия́, и превозноси́те Его́ во вся́ ве́ки.

Ва́с Христо́с апо́столы, о́блаки во́льнаго дождя́ показа́, ту́чами наводня́ющия Боже́ственнаго позна́ния Це́ркви, прему́дрии, и напая́ющия пою́щих: Го́спода по́йте дела́ и превозноси́те Его́ во вся́ ве́ки.

Богоро́дичен: Поро́ков и скве́рн чиста́ и вся́кия святы́ни еси́ хра́м, Сло́во Всесвято́е, вся́ освяща́ющее, Отцу́ Собезнача́льное, породила́ еси́. Те́м Тя́, Де́во, пое́м и превозно́сим во вся́ ве́ки.

Пе́снь 9.
Ирмо́с: Ка́мень нерукосе́чный, от несеко́мыя горы́, Тебе́, Де́во, краеуго́льный отсече́ся, Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Колесни́ца светоно́сная яви́лся еси́ седя́щаго Сло́ва, на благоле́пнейшей твое́й души́ и Богоно́сней носи́ма, ко спасе́нию, сла́вне, направля́я пою́щих тя́.

Твою́ преблаже́нную па́мять соверша́юще, мо́лим вся́каго треволне́ния изба́витися хода́тайством дерзнове́ния твоего́, е́же, я́ко Христо́в апо́стол, и́маши, Богови́дче всече́стне.

Дне́сь па́мять твою́ вси́, Фомо́ апо́столе, соверша́ем, освяти́ и просвети́ ве́рою искуше́ний, и обстоя́ний, и страсте́й вся́ких избавля́я моли́твами твои́ми.

Богоро́дичен: Красе́н прозябе́ Кла́с от земли́ Деви́ческия, Бо́жие Сло́во, И́мже пита́емся ве́рнии, в Не́мже и живе́м и составля́емся. Те́м Тя́, Ро́ждшую, я́ко Богоро́дицу велича́ем.

Свети́лен.
Самови́дче и апо́столе Христа́ Всеще́драго, ми́р дарова́ти все́й вселе́нней и побе́ды во́инству на́шему, и прегреше́ний оставле́ние, и спасе́ние испроси́ тя́, Фомо́, восхваля́ющим я́ко ученика́ Богоглаго́лива.

Я́ко со́лнце восто́ка, инди́ом посла́ся, Фомо́ апо́столе, пресве́тлое, апо́столов сла́во, и те́х омраче́ние све́том слове́с твои́х и Тро́ическою ве́рою просвети́л еси́. Те́м святу́ю твою́ и Боже́ственную пра́зднуем па́мять.

Богоро́дичен: Моле́бницу Ти́ приво́дим и те́плую Засту́пницу, Пречи́стую Ма́терь Твою́, ве́рнии по до́лгу: сподо́би рабы́ Твоя́ причасти́тися сла́вы Твоея́, Христе́, и пра́ведных насле́дия, и пи́щи ра́йския, и да́ждь Ца́рство Небе́сное.

Комментарии (1)

Всего: 1 комментарий
  
#1 | Андрей Бузик »» | 18.10.2018 09:21
  
4
Акафист апостолу Фоме
Добавлять комментарии могут только
зарегистрированные пользователи!
 
Имя или номер: Пароль:
Регистрация » Забыли пароль?
© LogoSlovo.ru 2000 - 2024, создание портала - Vinchi Group & MySites
ЧИСТЫЙ ИНТЕРНЕТ - logoSlovo.RU