Акафист и Каноны святому великомученику Димитрию Солунскому.

Святой великомученик Димитрий Солунский

Акафист святому великомученику Димитрию Солунскому
Составлен схимонахом Аркадием. Одобрен решением Св. Синода 3 июля/8 августа 1877 года №1077.
Память: 08 ноября (26 октября ст. ст.)
Утвержден для общецерковного использования


Конда́к 1.
Ди́вный воево́до гра́да Солу́ня, вели́кий уго́дниче Христо́в и сла́вный страстоте́рпче, святы́й Дими́трие, источа́яй ми́рови ми́лости ми́ро, похва́льная воспису́ем ти́, чту́щии святу́ю па́мять твою́. Ты́ же име́яй дерзнове́ние ко Го́споду, от вся́ких бе́д избавля́й на́с, ве́рно зову́щих ти́:

Ра́дуйся, святы́й Дими́трие, сла́вный великому́чениче и чудотво́рче.

И́кос 1.
А́нгелов Творе́ц и Госпо́дь Си́л яви́ тя́, досточу́дне, а́нгела во пло́ти, му́ченика тве́рда и си́льнаго предста́теля ве́рных. Прибега́юще у́бо к заступле́нию твоему́, сицева́я ра́достная тебе́ прино́сим:

Ра́дуйся, звездо́ блиста́ющая на тве́рди церко́вней; ра́дуйся, свети́льниче, чудесы́ ми́р озаря́яй.

Ра́дуйся ве́ры непоколеби́мый сто́лпе; ра́дуйся, христиа́н несокруши́мый щи́те.

Ра́дуйся, Фесса́лии све́тлое украше́ние; ра́дуйся, Солу́ня похвало́ пресла́вная.

Ра́дуйся, апо́столов сограждани́не; ра́дуйся, му́чеников совсе́льниче.

Ра́дуйся, моля́щихся к тебе́ проше́ния прие́мляй; ра́дуйся, о все́х на́с Бо́гу моля́йся.

Ра́дуйся, святы́й Дими́трие, сла́вный великому́чениче и чудотво́рче.

Конда́к 2.
Ви́дяще себе́ безча́дна, благочести́вая роди́теля твоя́ приле́жно моля́ста Бо́га о дарова́нии ча́да. Прие́м же Всевы́шний моли́твы ею́, и помяну́в ми́лостыни, я́же творя́ста убо́гим, дарова́ и́м тебе́, блаже́нне. Сего́ ра́ди с весе́лием возопи́ста Бо́гу: Аллилу́иа.

И́кос 2.
Ра́зум боже́ственный име́я, я́ко отроча́ богодарова́нное, возгнуша́лся еси́ язы́ческия пре́лести, му́дре. Роди́тельское же благоче́стие возлю́бль, доброде́тельми а́ки ле́ствицею от си́лы в си́лу восходя́й, благода́ть Бо́жию приобре́л еси́, ю́же испроси́ получи́ти и на́м, почита́ющим тя́ зва́нии си́ми:

Ра́дуйся, благочести́вым роди́телем моли́твенное прозябе́ние; ра́дуйся, благоче́стия и́х насле́дниче.

Ра́дуйся, рожде́нием свои́м возвесели́вый мно́гих; ра́дуйся, от утро́бы ма́терния благода́тию свы́ше осене́нный.

Ра́дуйся, благоуха́нный кри́не де́вства и нетле́ния; ра́дуйся, освяще́нный душе́ю же и те́лом.

Ра́дуйся, вмести́лище дарова́ний Бо́жиих; ра́дуйся от ю́ности идолослуже́ние презре́вый.

Ра́дуйся, и́стинное богопочита́ние да́же до сме́рти возлюби́вый; ра́дуйся, я́ко благоче́стием твои́м угоди́л еси́ Христу́.

Ра́дуйся, я́ко благода́тию Его́ мно́г пло́д сотвори́л еси́.

Ра́дуйся, святы́й Дими́трие, сла́вный великому́чениче и чудотво́рче.

Конда́к 3.
Си́ла Вы́шняго сотвори́ тя́, Дими́трие, хра́бра во бра́нех, враго́м стра́шна, все́м лю́дем имени́та. Те́мже и злочести́вый ца́рь Максимиа́н вручи́ тебе́ гра́д Солу́нь, повелева́я, я́ко суему́дрый, гна́ти Христиа́ны, пою́щия Бо́гу: Аллилу́иа.

И́кос 3.
Име́яй благоприя́тную по благоче́стию ре́вность, я́ве пред неве́рными испове́дал еси́ Христа́, прехва́льне, и те́х ве́ровати и покланя́тися Тому́ научи́л еси́, и я́ко вторы́й Па́вел бы́л еси́ солу́няном, с ни́миже вопие́м ти́:

Ра́дуйся, Це́ркви Христо́вой драги́й би́сере; ра́дуйся, гра́да твоего́ украше́ние.

Ра́дуйся, боже́ственную ре́вность в се́рдцы свое́м носи́вый; ра́дуйся, мучи́телей кова́рства победи́вый.

Ра́дуйся, и́дольския пре́лести обличи́телю; ра́дуйся, и́дольское те́рние посеца́яй.

Ра́дуйся, благоче́стия учи́телю; ра́дуйся, на стези́ спасе́ния наста́вителю.

Ра́дуйся, враго́м ви́димым и неви́димым непристу́пне; ра́дуйся, во́ине Христо́в непобеди́ме.

Ра́дуйся, святы́й Дими́трие, сла́вный великому́чениче и чудотво́рче.

Конда́к 4.
Бу́рею одержи́м помышле́ний зло́бных, нечести́вый ца́рь смяте́ся, уве́дев тя́, всече́стне, ве́рнаго бы́ти раба́ Христо́ва, к ве́ре в Того́ приводя́ща и и́долы низлага́юща, солу́нян же науча́юща сла́вити трисвято́е и́мя Бо́жие и пе́ти Тому́: Аллилу́иа.

И́кос 4.
Слы́ша, я́ко ды́шащий на тя́, Дими́трие, я́ростию Максимиа́н гряде́т в Солу́нь, моли́твою и поще́нии предугото́вил еси́ себе́ к муче́нию, повелева́я Лу́ппу, ве́рному ти́ рабу́, вся́ име́ния твоя́ и бога́тства привре́менная расточи́ти убо́гим. Те́мже, восхваля́юще тя́, с любо́вию зове́м:

Ра́дуйся, преще́ния мучи́телева не убоя́выйся; ра́дуйся, да Христа́ приобря́щеши, вся́ расточи́вый.

Ра́дуйся, су́етную сла́ву ми́ра сего́ во уме́ты вмени́вый; ра́дуйся, небе́сную сла́ву у Христа́ Бо́га на́шего получи́вый.

Ра́дуйся, я́ко состра́ждеши все́м тре́бующим от тебе́ по́мощи; ра́дуйся, су́щим в ну́ждах ско́рый засту́пниче.

Ра́дуйся, ни́щих обогати́телю; ра́дуйся, си́рых предста́телю.

Ра́дуйся, убо́гим помо́щниче; ра́дуйся, а́лчущим пита́телю.

Ра́дуйся, святы́й Дими́трие, сла́вный великому́чениче и чудотво́рче.

Конда́к 5.
Боготе́чней звезде́ уподо́блься, Дими́трие, дерзнове́нно Со́лнце Пра́вды пропове́дал еси́ тьмо́ю одержи́мому царю́. В темни́це же и́м заключе́нный, славосло́вил еси́ в не́й, я́ко в черто́зе све́тле, Христа́ Бо́га на́шего, с весе́лием поя́ Тому́: Аллилу́иа.

И́кос 5.
Ви́дя добра́ ненави́стник диа́вол тече́ние, достоблаже́нне, сконча́тися иму́щее, за́вистию снеда́емь, устреми́ся на тя́ во о́бразе ско́рпии. Ты́ же, попра́в того́, узре́л еси́ во све́тлости вели́цей а́нгела Госпо́дня, укрепля́юща тя́ и вене́ц ра́йский тебе́ подаю́ща, приими́ у́бо и от на́с земны́х ма́лый вене́ц похвалы́ сицевы́я:

Ра́дуйся, трубо́, неве́рным Христа́ Бо́га возвести́вшая; ра́дуйся, свире́ле, услажда́ющая слы́шание ве́рным.

Ра́дуйся, я́ко му́жеством твои́м небожи́тели возвесели́л еси́; ра́дуйся, в темни́це мра́чней святы́м а́нгелом уте́шенный.

Ра́дуйся, пресве́тлый на небесе́х черто́г, я́ко му́ченик, унасле́довавый; ра́дуйся, во пло́ти безпло́тныя враги́ победи́вый.

Ра́дуйся, ко́зни и́х, а́ки паучи́ну разори́вый; ра́дуйся, све́тлый коне́ц побе́ды прие́мый.

Ра́дуйся, венце́м от Царя́ сла́вы венча́нный; ра́дуйся, сугу́быя благода́ти от Него́ сподо́бивыйся.

Ра́дуйся, ве́лие дерзнове́ние к Нему́ стяжа́вый.

Ра́дуйся, святы́й Дими́трие, сла́вный великому́чениче и чудотво́рче.

Конда́к 6.
Пропове́дник злоче́стия Максимиа́н ра́довашеся, я́ко прекре́пкий боре́ц его́ Ли́й убива́ше Христиа́ны. Блаже́нный же Не́стор не терпя́ того́ безчелове́чия, у тебе́, му́чениче, благослове́ние испроси́, и ше́д низве́рже того́ на ко́пия, поя́ Бо́гу: Аллилу́иа.

И́кос 6.
Возсия́вый в Солу́не просвеще́ние и́стины, свя́те, предпосла́л еси́ ко Го́споду Не́стора, чрез посече́ние от нечести́вых. Та́же и са́м, повеле́нием царе́вым, ко́пиями избоде́н бы́л еси́ за Христа́, пред Ни́мже помяни́ и на́с, помина́ющих страда́ния твоя́ и вопию́щих ти́:

Ра́дуйся, на Ли́ево низложе́ние Не́стора моли́твами твои́ми укрепи́вый; ра́дуйся, я́ко по умерщвле́нии Ли́я, сме́рть му́ченическую ку́пно с Не́стором прия́л еси́.

Ра́дуйся, я́ко за Прободе́ннаго на Кресте́ на́с ра́ди ко́пиями избоде́н бы́л еси́; ра́дуйся, со сла́вою на небеса́ по сме́рти от а́нгел провожде́нный.

Ра́дуйся, в немерца́ющем све́те душе́ю пребыва́яй; ра́дуйся, с му́ченики и со все́ми святы́ми ликовству́яй.

Ра́дуйся, покро́ве песносло́вящих тя́; ра́дуйся, моли́твенниче о чту́щих святу́ю па́мять твою́.

Ра́дуйся, святы́й Дими́трие, сла́вный великому́чениче и чудотво́рче.

Конда́к 7.
Хотя́ блаже́нный Лу́пп благослове́ние от тебе́, страстоте́рпче Христо́в, получи́ти, взя́ по кончи́не твое́й пе́рстень тво́й и ри́зу, кро́вию твое́ю омоче́нную, и мно́га чудеса́ и исцеле́ния те́ми сотвори́в, усе́чен бы́сть во главу́, да пое́т ку́пно с тобо́ю и Не́стором в Тро́ице сла́вимому Бо́гу: Аллилу́иа.

И́кос 7

Но́вый хра́м созида́я тебе́, досточу́дне, исцеле́нный тобо́ю Лео́нтий, обре́те в земли́ святы́я мо́щи твоя́, источа́ющая ми́ро, его́же благоуха́ния испо́лнися ве́сь гра́д и мно́жество боля́щих исцеле́. Те́мже уврачу́й и облагоуха́й и на́с, вопию́щих ти́ си́це:

Ра́дуйся, благоуха́ние доброде́телей от ю́ности возлюби́вый; ра́дуйся, нра́в а́нгельский от младе́нчества стяжа́вый.

Ра́дуйся, сосу́де благода́ти; ра́дуйся, хра́ме непоро́чности и чистоты́.

Ра́дуйся, я́ко Госпо́дь оби́тель в тебе́ сотвори́ со Отце́м и Ду́хом; ра́дуйся, я́ко То́й просла́ви мо́щи твоя́ нетле́нием благода́ти.

Ра́дуйся, благово́нное Ми́ро от те́х источа́яй; ра́дуйся, освяще́ние и цельбы́ те́ми подава́яй.

Ра́дуйся, я́ко па́че на́рда и сми́рны благоуха́еши; ра́дуйся, я́ко благоуха́нием твои́м злово́ние страсте́й отгоня́еши.

Ра́дуйся, зе́млю и оде́жды твоя́ кро́вию твое́ю освяти́вый; ра́дуйся, я́звами свои́ми на́ша я́звы душе́вныя и теле́сныя врачу́яй.

Ра́дуйся, святы́й Дими́трие, сла́вный великому́чениче и чудотво́рче.

Конда́к 8.
Стра́нное и ди́вное чу́до сотвори́л еси́, пречу́дне, возвраща́вшемуся во своя́ си храмозда́телю твоему́, прии́м бо то́й плащани́цу от святы́х твои́х моще́й, волну́ющуюся и многово́дную реку́ немо́кренно пре́йде. Те́мже прославля́емому в тебе́ Бо́гу се́рдцем и усты́ воспева́ше: Аллилу́иа.

И́кос 8.
Ве́сь горя́ любо́вию и усе́рдием к тебе́ Лео́нтий вторы́й в че́сть твою́, свя́те, созда́ хра́м во Иллири́и, оте́честве свое́м, и та́мо, я́коже и в Солу́не, мно́жество боля́щих и стра́ждущих от ду́х нечи́стых, моли́твами твои́ми исцеля́шеся, и и́на мно́га соверша́хуся чудеса́. И́мже мы́, дивя́шеся тебе́, вопие́м:

Ра́дуйся, любо́вию прославля́ющим тя́ кре́пкий засту́пниче; ра́дуйся, созида́ющим во и́мя твое́ хра́мы чу́дный покро́ве.

Ра́дуйся, здра́вия пода́телю; ра́дуйся, неду́гов врачева́телю.

Ра́дуйся, то́ки кро́ви уставля́яй; ра́дуйся, епа́рха Мари́на от стру́пов и гно́я свободи́вый.

Ра́дуйся, оде́ждою твое́ю, я́коже Па́вел убру́сцами, чудоде́йствуяй; ра́дуйся, име́вшему ю́ Лео́нтию немо́кренный на реце́ пу́ть показа́вый.

Ра́дуйся, я́ко повину́ются тебе́ быстрины́ ре́чныя; ра́дуйся, я́ко ду́си зло́бы бе́гают от призыва́ющих и́мя твое́.

Ра́дуйся, я́ко предста́тельством твои́м и мы́ упова́ем от наве́тов вра́жиих сохрани́тися; ра́дуйся, я́ко заступле́нием твои́м и мы́ ве́руем от пото́па ины́х бе́д изба́витися.

Ра́дуйся, святы́й Дими́трие, сла́вный великому́чениче и чудотво́рче.

Конда́к 9.
Вся́кое естество́ а́нгельское удиви́ся, Дими́трие святы́й, вели́каго твоего́ дерзнове́ния де́лу. Хотя́щу бо Го́споду враго́м преда́ти Солу́нь, и явле́нием а́нгельским, повеле́вшу ти́ оста́вити гра́д, не оста́вил еси́ того́, сла́вне. Те́мже сподо́бивыйся ужа́снаго виде́ния и слы́шания, Иллю́стрий с тре́петом возглаша́ше: Аллилу́иа.

И́кос 9.
Вити́и многовеща́нныя не возмо́гут разуме́ти, ка́к плене́нныя иногда́ де́вы, о́браз тво́й, свя́те, плени́вшему и́х кня́зю шве́нием угото́вавшия, внеза́пу восхище́ни бы́ша тобо́ю, и у гро́ба твоего́ поста́влени, бде́нию на па́мять твою́ соверша́ющуся, благословя́ще у́бо о тебе́ Го́спода, со умиле́нием зове́м ти́:

Ра́дуйся, за и́стину на земли́, да́же до кро́ви пострада́вый; ра́дуйся, на небеси́ со дерзнове́нием престо́лу Бо́жию предстоя́й.

Ра́дуйся, благопотре́бная отту́ду ве́рным посыла́яй; ра́дуйся, от бе́д призыва́ющия тя́ свобожда́яй.

Ра́дуйся, я́ко во озлобле́нии су́щим ско́ро помога́еши; ра́дуйся, я́ко Госпо́дь моли́твам твои́м благоутро́бно вне́млет.

Ра́дуйся, чуде́с неисчерпа́емый кла́дезю; ра́дуйся, зна́мений неоскудева́емый исто́чниче.

Ра́дуйся, плене́нных свободи́телю; ра́дуйся, ва́рварския де́рзости укроти́телю.

Ра́дуйся, печа́льным утеше́ние посыла́яй; ра́дуйся, скорбя́щим ра́дость подава́яй.

Ра́дуйся, святы́й Дими́трие, сла́вный великому́чениче и чудотво́рче.

Конда́к 10.
Спасти́ хотя́ гра́д тво́й от гла́да, явля́лся еси́, Дими́трие, во приста́нищех морски́х и ото́цех, повелева́я иму́щим пшени́цу плы́ти с то́ю в Солу́нь. Те́мже тобо́ю от сме́рти изба́вленнии, благода́рственне поя́ху о тебе́ Бо́гу: Аллилу́иа.

И́кос 10.
Стена́ яви́лся еси́ гра́ду твоему́ несокруши́мая, богому́дре, и необори́мый защи́тник все́м призыва́ющим тя́, зане́ та́ко благоволи́ о тебе́ небесе́ и земли́ Творе́ц. Те́мже и на́с научи́ приглаша́ти тебе́:

Ра́дуйся, милосе́рдия вели́кий люби́телю; ра́дуйся, о бе́дствующих сострада́тельный попечи́телю.

Ра́дуйся, от гла́да ве́рныя спаса́яй; ра́дуйся, от наше́ствия язы́ков те́х изыма́яй.

Ра́дуйся, мно́жицею изба́вивый солу́нян от у́з рабо́ты го́рькия; ра́дуйся, губи́тельную я́зву и и́ный вре́д от ни́х удали́вый.

Ра́дуйся, воево́до, ники́мже в му́жестве одоли́мый; ра́дуйся, ратобо́рче, николи́же в си́ле оскудева́ющий.

Ра́дуйся, вся́ на гра́д тво́й устремля́ющияся, я́ко Моисе́й Амали́ка, низлага́яй; ра́дуйся, я́ко Сампсо́н, иноплеме́нники прогоня́яй.

Ра́дуйся, царе́м ве́рным на враги́ одоле́ние подава́яй; ра́дуйся, христолюби́вым во́ином на бра́ни помога́яй.

Ра́дуйся, святы́й Дими́трие, сла́вный великому́чениче и чудотво́рче.

Конда́к 11.
Пе́ние вся́кое побежда́ется, прехва́льне, пред сия́нием сла́вы твоея́ и вели́чием чуде́с. Егда́ бо Иустиниа́н ца́рь, возжеле́ име́ти в Софи́йстем хра́ме ча́сть моще́й твои́х, о́гнь изы́де от гро́ба твоего́ на посла́нные от него́, возбраня́юще прикаса́тися ра́це твое́й. Те́мже удивле́ннии со стра́хом возопи́ша Бо́гу: Аллилу́иа.

И́кос 11.
Светоза́рную звезду́, су́щим во тьме́ неразу́мия, зри́м тя́, свя́те. Служа́щу бо у гро́ба твоего́ Ониси́фору тьмо́ю святота́тства держи́му, двукра́тным явле́нием твои́м возбрани́л ему́ похища́ти свещи́, возжига́емыя ве́рными у моще́й твои́х. Сего́ ра́ди со благогове́нием зове́м ти́:

Ра́дуйся, пре́жде му́ченическия кончи́ны свя́то пожи́вый; ра́дуйся, по кончи́не чудесы́ просла́вивыйся.

Ра́дуйся, я́ко жи́в во гра́де мощми́ твои́ми почива́еши; ра́дуйся, я́ко присноживы́й чудеса́ те́ми содева́еши.

Ра́дуйся, я́ко пра́вду ми́лостию растворя́еши; ра́дуйся, я́ко огне́м ре́вности по сла́ве Бо́жией гори́ши.

Ра́дуйся, святы́я мо́щи твоя́ неприкоснове́нны име́яй; ра́дуйся, каса́тися и́м дерза́ющия, я́ко мо́лния опаля́яй.

Ра́дуйся, согреша́ющих вразуми́телю; ра́дуйся, святота́тцев наказа́телю.

Ра́дуйся, освяще́ние подава́яй благогове́ющим к тебе́ усе́рдно; ра́дуйся, ми́ром облагоуха́яй чту́щих тя́ ве́рно.

Ра́дуйся, святы́й Дими́трие, сла́вный великому́чениче и чудотво́рче.

Конда́к 12.
Благода́ть прия́л еси́, Дими́трие, цели́ти вся́к неду́г и вся́ку я́зю в лю́дех. Пода́ждь у́бо и на́шим душа́м и телесе́м исцеле́ние, да Бо́гу, дарова́вшему на́м тебе́, помо́щника и врачева́теля, благода́рственне воспои́м: Аллилу́иа.

И́кос 12.
Пою́ще твоя́ чудеса́, ублажа́ем тя́, досточу́дне, пред нечести́выми Христа́ Бо́га дерзнове́нно испове́давша, прославля́ем му́ченическую кончи́ну твою́, почита́ем па́мять твою́, и сицева́я ра́достная тебе́ прино́сим:

Ра́дуйся, стопа́м Христа́ Спаси́теля все́х ре́вностный после́дователю; ра́дуйся, страсте́м его́ му́жественный подража́телю.

Ра́дуйся, с небе́сными си́лами прославля́яй Бо́га; ра́дуйся, с Цари́цею небесе́ и земли́ моля́йся о ми́ре.

Ра́дуйся, многоцеле́бнаго ми́ра сподобля́яй ве́рных; ра́дуйся, разсла́бленныя те́лом и ду́хом исцеля́яй.

Ра́дуйся, святы́й Дими́трие, сла́вный великому́чениче и чудотво́рче.

Конда́к 13.
О, святы́й великому́чениче и ве́рный уго́дниче Христо́в, Дими́трие мироточи́ве, ма́лое сие́ песносло́вие от на́с прие́мше, моли́ Христа́ Бо́га на́шего, да вселя́ется и благоуха́ет в сердца́х на́ших святы́ня правосла́вной ве́ры, да умножа́ется в житии́ на́шем еле́й благи́х де́л, да не уга́снут свети́льники на́ши в полу́нощный ча́с сре́тения Небе́снаго Жениха́, и да сподо́бимся вме́сте с тобо́ю воспева́ти Ему́ в ве́чном Ца́рствии: Аллилу́иа.

Этот конда́к чита́ется три́жды, зате́м и́кос 1-й и конда́к 1-й.

И́кос 1.
А́нгелов Творе́ц и Госпо́дь Си́л яви́ тя́, досточу́дне, а́нгела во пло́ти, му́ченика тве́рда и си́льнаго предста́теля ве́рных. Прибега́юще у́бо к заступле́нию твоему́, сицева́я ра́достная тебе́ прино́сим:

Ра́дуйся, звездо́ блиста́ющая на тве́рди церко́вней; ра́дуйся, свети́льниче, чудесы́ ми́р озаря́яй.

Ра́дуйся ве́ры непоколеби́мый сто́лпе; ра́дуйся, христиа́н несокруши́мый щи́те.

Ра́дуйся, Фесса́лии све́тлое украше́ние; ра́дуйся, Солу́ня похвало́ пресла́вная.

Ра́дуйся, апо́столов сограждани́не; ра́дуйся, му́чеников совсе́льниче.

Ра́дуйся, моля́щихся к тебе́ проше́ния прие́мляй; ра́дуйся, о все́х на́с Бо́гу моля́йся.

Ра́дуйся, святы́й Дими́трие, сла́вный великому́чениче и чудотво́рче.

Конда́к 1.
Ди́вный воево́до гра́да Солу́ня, вели́кий уго́дниче Христо́в и сла́вный страстоте́рпче, святы́й Дими́трие, источа́яй ми́рови ми́лости ми́ро, похва́льная воспису́ем ти́, чту́щии святу́ю па́мять твою́. Ты́ же име́яй дерзнове́ние ко Го́споду, от вся́ких бе́д избавля́й на́с, ве́рно зову́щих ти́:

Ра́дуйся, святы́й Дими́трие, сла́вный великому́чениче и чудотво́рче.

Моли́тва.
Святы́й и сла́вный великому́чениче Христо́в Дими́трие, ско́рый помо́щниче и те́плый засту́пниче с ве́рою притека́ющих к тебе́! Предстоя́ с дерзнове́нием Небе́сному Царю́, испроси́ у Него́ проще́ние согреше́ний на́ших и о е́же изба́витися на́м от всегуби́тельныя я́звы, тру́са, пото́па, огня́, меча́ и ве́чныя ка́зни. Моли́ бла́гость Его́, е́же уще́дрити гра́д се́й, оби́тель сию́ и вся́кую страну́ христиа́нскую. Исхода́тайствуй у Царя́ Ца́рствующих на враги́ побе́ду и одоле́ние правосла́вным христианам, все́й держа́ве правосла́вной ми́р, тишину́, тве́рдость в ве́ре и преспе́яние во благоче́стии; на́м же, чту́щим честну́ю па́мять твою́, испроси́ благода́тное укрепле́ние на дела́ блага́я, да благоутро́бное Влады́це на́шему Христу́ Бо́гу зде́ творя́ще, сподо́бимся моли́твами твои́ми насле́довати Ца́рствие Небе́сное для ве́чнаго прославле́ния Его́ со Отце́м и Святы́м Ду́хом. Ами́нь.

Канон святому великомученику Димитрию Солунскому (первый)
Припев: Святы́й великому́чениче Дими́трие, моли́ Бо́га о на́с.
Память: 08 ноября (26 октября ст. ст.)
Глас 4.


Пе́снь 1.
Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Боже́ственным муче́ния венце́м увязе́н, при Бо́зе лику́еши, блиста́нии отону́дными сия́я и просвеще́ния исполня́емь, великому́чениче досточу́дне.

Я́ко су́ща И́стины свиде́теля, и да́же до кро́ве подви́гшася, блаже́нне, терпели́вно, тве́рдо же противле́ние к мучи́телем показа́вша, тя́ Влады́ка прия́т.

Зло́бы обрета́теля низложи́л еси́ на зе́млю, Дими́трие, му́ченическим твои́м копие́м уби́в, Боже́ственною бла́гостию, па́че ума́ си́лою, на сие́, блаже́нне, укрепля́емь.

Богоро́дичен: Безма́терен я́коже Бо́г пе́рвее Сы́й, бы́сть е́же по на́м безо́тчий из Тебе́, Богоро́дице Всепе́тая, пло́ть прие́мь по едине́нию, е́же па́че сло́ва и ра́зума.

Пе́снь 3.
Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Вмени́ся в ничто́же мучи́телей от тебе́ повеле́ние, сло́во бо Бо́жие па́че все́х, страстоте́рпче, предче́ствовал еси́.

Све́щник светови́ден муче́ния в ски́нии бы́л еси́, Боже́ственным Све́том сия́ющ, му́чениче страстоте́рпче Дими́трие.

Врачева́ний тя́ исто́чник свяще́нный и ди́вный, гра́д тво́й и сокро́вище некра́домо стяжа́в, вся́ким весе́лием обогати́ся.

Богоро́дичен: Врачу́я о́браз истле́вший земны́х, Пречи́стая, си́м из Тебе́ облачи́тся, пребы́в я́коже бе́ Человеколю́бец.

Седа́лен му́ченика, гла́с 4.
Я́ко до́блему страда́льцу и во́ину кре́пку всецарю́ющаго Христа́, взыва́ем псало́мски: ра́дуйся, му́чеников украше́ние и ле́пота; ра́дуйся, све́тлая Це́ркве звездо́ и стено́, и приста́нище прибега́ющих к тебе́, великому́чениче сла́вне Дими́трие, тя́ пою́щия спаса́й от вся́каго вре́да чужда́го и озлобле́ния вся́.

Пе́снь 4.
Ирмо́с: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Победи́вшаго лжу́ нече́стия, Бо́жие Всевысоча́йшее ви́дев Сло́во, сла́вою венча́ тя́, Дими́трие, пою́ща: сла́ва си́ле Твое́й, Го́споди.

На ле́сть побе́ду возста́вив, победи́тельный вене́ц пра́вды прия́л еси́, Дими́трие, зовя́ Зижди́телю твоему́: сла́ва си́ле Твое́й, Го́споди.

Направля́емь дла́нию жизноно́сною, к приста́нищем дости́гл еси́ тиша́йшим, иде́же, ны́не ра́дуяся, зове́ши, Дими́трие: сла́ва си́ле Твое́й, Го́споди.

Богоро́дичен: Я́ко тва́рей все́х свяще́ннейшая, Ма́ти Бо́га бы́ти Еди́на сподо́билася еси́, Сего́ бо ро́ждши, ми́р благода́тию богозна́ния просвети́ла еси́.

Пе́снь 5.
Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

О́гнь любве́ Боже́ственныя в се́рдцы прие́м, о́гнь угаси́л еси́ безбо́жнаго идолонеи́стовства, сла́вне Дими́трие.

Избавля́я ны́ от бе́д, яви́ся, Дими́трие, моли́твами твои́ми покрыва́я ве́рою и любо́вию восхваля́ющия тя́.

И́же ве́рою к твоему́ усе́рдно притека́юще хра́му, Дими́трие, неду́гов и страсте́й душетле́нных вско́ре избавля́ются.

Богоро́дичен: Сло́во Бо́жие, Отцу́ единосу́щное, Тво́й быва́ет, Богома́ти, па́че ума́ же и сло́ва, Сы́н, Тебе́ единосу́щен.

Пе́снь 6.
Ирмо́с: Пожру́ Ти́ со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Согла́сно соше́дшеся, пое́м сла́вную и светоно́сную твою́ па́мять, и чуде́с по́лную, и дарова́ний Свята́го и Честна́го, всеблаже́нне, Ду́ха.

Разреши́ моя́ плени́цы согреше́ний моли́твами твои́ми, я́ко бо непобеди́мь му́ченик дерзнове́ние и́маши ко Влады́це, и бу́ди ми́ прибе́жище и покро́в, Дими́трие.

Богоро́дичен: Чи́сту Тя́ посреде́ те́рния обре́т, я́ко чисте́йший кри́н и удо́льный цве́т, о Богома́ти, Жени́х во утро́бу Твою́ Сло́во всели́ся.

Конда́к му́ченика, гла́с 2:
Крове́й твои́х струя́ми, Дими́трие, Це́рковь Бо́г обагри́, да́вый тебе́ кре́пость непобеди́мую и соблюда́я гра́д тво́й невреди́мь: того́ бо еси́ утвержде́ние.

И́кос:
Сего́ вели́каго вси́ воспои́м, соше́дшеся ве́рою, я́ко ору́жника Христо́ва и му́ченика, Дими́трия, в пе́снех и пе́ниих совзыва́юще Влады́це и Зижди́телю вселе́нныя: изба́ви ны́ тру́са и ну́жды, Человеколю́бче, моли́твами Богоро́дицы и все́х святы́х му́чеников Твои́х. На Тя́ бо вси́ наде́емся изба́витися бе́д и скорбе́й: Ты́ бо еси́ на́ше утвержде́ние.

Пе́снь 7.
Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Преукра́шен Боже́ственною сла́вою и благода́тию, му́чениче страстоте́рпче, сия́еши светови́дно и просвеща́еши зову́щия: благослове́н еси́ в хра́ме сла́вы Твоея́, Го́споди.

Я́ко багряни́цею, укра́шен твое́ю кро́вию, име́я вме́сто ски́птра, сла́вне, кре́ст; со Христо́м ца́рствуеши ны́не, му́чениче Дими́трие, благослове́н еси́, зовы́й, в хра́ме сла́вы Твоея́, Го́споди.

Богоро́дичен: Препросла́вленная, просвеще́нная, Ма́ти Де́во, вся́, чту́щия Тя́ всеи́стинную Богоро́дицу, огради́; благослове́на Ты́ в жена́х Всенепоро́чная Влады́чице.

Пе́снь 8.
Ирмо́с: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Омрачи́л еси́ ве́сь вра́жий гне́в, сла́вне, и боре́ния неотъе́млемою си́лою Христа́ облече́н и победоно́сец бы́в, му́чениче Дими́трие, вопия́л еси́: благослови́те вся́ дела́ Госпо́дня Го́спода.

Му́чеников благостоя́ние показа́в, му́чеников благозва́ние, му́чениче, насле́довал еси́, ба́нею омы́вся свято́ю, я́же вторы́ми не оскверня́ется грехо́вными прило́ги, копие́м пробода́емь, и зовы́й: благослови́те вся́ дела́ Госпо́дня Го́спода.

Чуде́с твои́х мно́жество, па́че ума́ дарова́ний, и́хже тебе́ подаде́ Христо́с, все́м показу́ет, сла́вне, и благода́ть исцеле́ний, я́же па́че сло́ва, я́ве твою́ благода́ть пропове́дает на́м, вопию́щим: благослови́те вся́ дела́ Госпо́дня Го́спода.

Богоро́дичен: Еди́ну во все́х роде́х, Де́ву Ма́терь и Богоро́дицу Чи́стую, песносло́вим, Та́ бо спасе́ния на́шего Хода́таица, я́ко ми́ра Изба́вителя, Сло́во ро́ждшая, Ему́же вопие́м: благослови́те вся́ дела́ Госпо́дня Го́спода.

Пе́снь 9.
Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Раздери́ у́зы прегреше́ний тя́ пою́щих, страстоте́рпче, уста́ви страсте́й прило́ги, молву́ разори́ ересе́й и напа́стей ути́ши бу́рю моли́твами твои́ми.

Напра́ви к стезя́м пра́вым небе́снаго Ца́рствия свяще́ннейшую твою́ па́ству, венцено́сче му́чениче Дими́трие, на па́жить спаси́тельную, на ме́сто ве́чное.

Да венце́в сла́вы и небе́снаго Ца́рствия получе́ния пою́щим тя́ сего́ улучи́ти моли́, му́чениче Дими́трие, Жизнода́вца Го́спода и Царя́ си́л.

Богоро́дичен: Я́ко ко́рень, исто́чник и вину́ нетле́ния Тя́, Де́во, вси́ ве́рнии, наде́ющеся, хвала́ми почита́ем: Ты́ бо Ипоста́сное на́м Безсме́ртие источи́ла еси́.

Свети́лен.
Кресто́м вооружи́л еси́ Не́стора, чрез о́наго Ли́еву разори́в горды́ню, Дими́трие, на три́знищи, я́коже Христо́с, отверза́еши копие́м ре́бра твоя́, и́миже ста́до твое́ храни́.

Канон святому великомученику Димитрию Солунскому (второй)
Припев: Святы́й великому́чениче Дими́трие, моли́ Бо́га о на́с.
Память: 08 ноября (26 октября ст. ст.)
Глас 8.


Пе́снь 1.
Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Ми́ра благово́нна и че́стна, Дими́трие, отве́рзеный исто́чниче, страсте́й скве́рны се́рдце мое́ омы́й, и доброде́телей дея́нием благово́ние мя́ показа́в Христо́во, у́м мо́й облагода́тстви, благода́ти твоя́ боже́ственныя пе́ти.

Воды́ живы́я ре́ки истека́ти от чре́ва ве́рных, Сло́во Бо́жие глаго́лет. Те́мже твоего́ пролива́ются ми́ра исто́чницы приснотеку́щии, и́хже струи́ веселя́т Бо́жий гра́д, сла́вящий му́ченическое дерзнове́ние твое́.

Же́зл у́бо дре́вле Моисе́ев, уда́рив ка́мень в земли́ пусты́нней, отве́рзе струи́ ре́к многоте́чныя; те́ло же твое́, Дими́трие, прободе́нное копие́м, ми́ра исто́чник показа́, но́ваго Изра́иля прохлажда́ющее.

Я́же у́бо и́маши воздая́ния, Дими́трие, му́ченических твои́х я́зв, ниже́ о́ко ви́де, ниже́ у́хо слы́ша; ны́не же ми́ра мо́ре, воздая́ния чистоты́ пролива́еши ми́ра конце́м, стра́сти ду́ш очища́ющее.

Богоро́дичен: Пренескве́рно прия́телище, Всечи́стая, Сло́во обре́т Тя́ Бо́жие, в Твоя́ всели́ся ложесна́: и е́же из Тебе́ прия́тие пома́зав Свои́м Божество́м, Еди́н про́йде от двою́, и истоще́нное ми́ро нарече́ся, Христо́с бо Бо́г же и Челове́к.

Пе́снь 3.
Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Роди́вся с небе́с от Бо́га, бы́л еси́ Боже́ственных бла́г насле́дник, сы́н нарица́емь, снасле́дник Христо́в, ца́рствуеши же с Ни́м, ми́ро бо о́браз сего́, Дими́трие.

Вкорени́вся, я́коже дре́во Дави́дски, сла́вне, при исхо́дищах во́д, вели́к возда́л еси́ муче́ния пло́д и ны́не исто́чник показа́лся еси́ ми́ра, проходя́щ, земли́ концы́.

Поче́рп благода́ть Христо́ву, ребра́ с Кро́вию источи́вшаго во́ду, кро́вь излия́л еси́ твою́, Его́ ра́ди пробо́дся; и ны́не, я́ко во́ду, пролива́еши сердца́м благово́нное ми́ро, Дими́трие.

Богоро́дичен: Свяще́ннии Твои́ сосу́ди душе́внии, Пречи́стая, по́лны арома́т и ми́ра Боже́ственнаго Ду́ха, наше́дшаго на Тя́, и́бо Бо́га ро́ждши, ве́рныя измени́ла еси́ от злово́ния страсте́й.

Седа́лен му́ченика, гла́с 4.

Я́ко до́блему страда́льцу и во́ину кре́пку всецарю́ющаго Христа́, взыва́ем псало́мски: ра́дуйся, му́чеников украше́ние и ле́пота; ра́дуйся, све́тлая Це́ркве звездо́ и стено́, и приста́нище прибега́ющих к тебе́, великому́чениче сла́вне Дими́трие, тя́ пою́щия спаса́й от вся́каго вре́да чужда́го и озлобле́ния вся́.

Пе́снь 4.
Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.

Скве́рну вся́ку отве́рг рожде́ния, ба́нею порожде́ния, чистоту́, яви́лся еси́, соблюда́я да́же до кончи́ны. Те́мже Христо́с тебе́, Дими́трие, есте́ственную вла́гу претворя́ет в ми́ро, я́коже и во́ду в вино́ преложи́.

Я́коже огня́ естество́ всему́ преподае́тся, це́лу спаса́ющ си́лу, та́ко твое́ ми́ро, страда́льче, все́ми у́бо почерпа́ется, оба́че же пребыва́ет неума́лено. Те́мже ны́не благоче́ствующии, покланя́ющеся, пое́м Бо́га, И́же благода́ть тебе́ даде́.

Кто́ слы́шаны Твоя́ хвалы́ сотвори́т, Христе́ Сло́ве, ви́дя Твоя́ благода́ти, я́же страда́льцем Твои́м по́дал еси́? Дими́трия бо се́ ми́ро му́ченика, я́ко исто́чник, у́бо истека́ет, благово́ние же ды́шет и разоря́ет зо́л омраче́ние.

Напая́ше у́бо исто́чник, от земли́ восходя́щий, пе́рвее, не́же одожди́ти все́ сея́ лице́, ты́ же сокры́вся, му́чениче, под зе́млю, исто́чник яви́лся еси́ благово́нна ми́ра, Дими́трие; ко́пий бо мно́жество отверзо́ша жи́лы и ны́не ми́ра напоя́еши концы́.

Богоро́дичен: Неве́сту Бо́жию Тя́ и Ма́терь ве́мы, Богоро́дице, Тебе́ бо, я́ко миродохнове́нный ши́пок, обре́т Сло́во Бо́жие, цвету́щ во удо́ле смире́ннем челове́честве, возжеле́ Твоея́ добро́ты, из Тебе́ Плотоно́сец проше́д, ве́рныя облагово́нствоваше.

Пе́снь 5.
Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя́, и к све́ту за́поведей Твои́х пути́ моя́ напра́ви, молю́ся.

Бы́л еси́ прия́телище с небе́с Снизше́дшаго за ми́лость, я́коже дождя́ или́ ка́пли, ка́плющия кро́тко, упои́л еси́ та́инственными дарова́нии и ны́не из гро́ба ми́ра исто́чник то́чиши, Дими́трие.

Страда́льцем, я́коже зако́н, вся́кия мирски́я обнажи́вся любве́, упита́лся еси́, му́чениче, еле́ем благода́тей Ду́ха. Победи́в же тмы́ нача́ла, мзду́ прия́л еси́ точи́ти ми́ро сладково́нное, Дими́трие.

Ши́пок яви́лся еси́, процветы́й вну́трь злачника́ Госпо́дня, Дими́трие, обагре́н кро́вию муче́ния и ра́нами сече́ний, и боле́зньми страда́льческими, и разжже́нием пе́щи, и ны́не ми́ро источа́еши приснотеку́щее.

Се́ па́ки зри́тся боже́ственный ковче́г — хра́м му́ченика, иде́же све́щник вну́трь — гро́б, нося́й ми́ро и еле́й, его́же о́крест взыгра́им духо́вно, и лику́юще, восхва́лим вели́каго Дими́трия.

Но́вый я́коже Илия́, ре́вностию уя́звлен Христо́вы любве́, царя́ облича́еши и тебе́ сама́го предае́ши на сме́рть. Оба́че живе́ши, и еще́ ми́ра исто́чник показа́в гро́б, я́коже скуде́льник еле́я неистоще́н.

Богоро́дичен: Напису́ет Твое́, Де́во, дре́вле та́инство, поя́ пра́отец Тво́й: Царе́вы Дще́ре сла́ва вся́ внутрьу́ду. И́же и Тя́ просла́вив, я́ко Блаже́нную челове́ком. Ра́дуйся, ми́ра всего́ воззва́ние.

Пе́снь 6.
Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Процве́л еси́ духо́вно, я́коже ма́слина плодови́тая, и копиено́сными рука́ми ну́ждно изгнете́ся. Ве́рных же утеша́еши, ми́ро ны́не точа́ из боже́ственнаго гро́ба твоего́, Дими́трие.

Пчелы́ о́бразом тебе́ сама́го де́лателя вся́кия показа́л еси́ боготво́рныя доброде́тели, ду́шу, блаже́нне, непоро́чну, я́ко со́тову телеси́, соблюда́я, и ми́ро ны́не источа́еши, услажда́ющее ду́ши.

Возлюби́л еси́ от души́ Христа́, и Сему́ после́довал еси́ к ми́ру благово́ния, и Сего́ причасти́лся еси́ срастворе́нием лу́чшим. И ны́не ми́ра струи́ то́чиши непреста́нныя, Дими́трие.

Ка́пли страда́льческих на зе́млю крове́й твои́х ка́плюще, благово́ния исто́чник ми́ра ту́ю соде́лаша. И ны́не сие́ непреста́нно почерпа́ющим источа́еши, Дими́трие.

По́том твои́х, му́дре, крове́й облия́н, я́коже и́н но́вый исто́чник ре́чно, тре́бующим бога́тно подае́ши во исцеле́ние твое́ ми́ро, блаже́нне, усе́рдно приходя́щим.

Богоро́дичен: Зря́ще златови́дный све́та Све́щник неугаси́мый, мно́жеством грехо́в ду́ши омрачи́вшии, присту́пим: дае́т бо просвеще́ние и вся́кое отгоня́ет омраче́ние.

Конда́к му́ченика, гла́с 2:
Крове́й твои́х струя́ми, Дими́трие, Це́рковь Бо́г обагри́, да́вый тебе́ кре́пость непобеди́мую и соблюда́я гра́д тво́й невреди́мь: того́ бо еси́ утвержде́ние.

И́кос:
Сего́ вели́каго вси́ воспои́м, соше́дшеся ве́рою, я́ко ору́жника Христо́ва и му́ченика, Дими́трия, в пе́снех и пе́ниих совзыва́юще Влады́це и Зижди́телю вселе́нныя: изба́ви ны́ тру́са и ну́жды, Человеколю́бче, моли́твами Богоро́дицы и все́х святы́х му́чеников Твои́х. На Тя́ бо вси́ наде́емся изба́витися бе́д и скорбе́й: Ты́ бо еси́ на́ше утвержде́ние.

Пе́снь 7.
Ирмо́с: О́троцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Во́ду почерпсти́ Иса́ия жа́ждущим, Дими́трие, предповелева́ет. А́ще бы ви́дел тво́й гро́б, возопи́л бы вся́ко: ми́ра исто́чнику приходи́те и почерпи́те спасе́ние.

Земли́ у́бо поро́д бы́л еси́, всели́лся же еси́ в земли́ кро́тких, иде́же вода́ сла́дости; ея́же напи́вся в сы́тость, ми́ра исто́чник при́сный ны́не, Дими́трие, пролива́еши.

Возра́сл еси́, я́ко розга́ в виногра́де, пребыва́я неотсе́чен Бо́гу и совокупле́н. И Сего́ испо́лнився ту́ка неизрече́ннаго, ми́ро, я́ко струи́, все́м ны́не, Дими́трие, то́чиши.

О, но́вых твои́х боре́ний! О, стра́нных му́ченических страда́ний! Твоя́ бо по́ты, за Него́ пролия́нныя, блаже́нне, Христо́с прии́м, исто́чник ми́ра тя́ показу́ет.

Струю́ ми́ра твоего́ пролива́я, ве́лию пучи́ну просте́рл еси́ чуде́с, и ду́ш и теле́с неду́ги потопля́еши, и напа́стей, Дими́трие, вся́ку бу́рю успову́я.

Богоро́дичен: Млеко́м пита́ла еси́, Де́во, Плотоно́сца, Твоего́ Бо́га рожде́ннаго, я́ко да боле́знь Ада́мову су́щую во а́де облегчи́т, от дре́ва сне́дша зна́ния, и за́поведи преслу́шавша.

Пе́снь 8.
Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Да Бо́г явле́нна сотвори́т тя́ су́щим в ми́ре, Дими́трие, негаси́му свещу́ душе́вную сохра́нша, еле́ем дея́ний умаще́ну всегда́, и я́ко черто́га, тебе́ отверзо́шася две́ри, приснотеку́щ исто́чник тя́ ми́ра боже́ственнаго показу́ет, возме́здие чистоты́ сию́ дая́ благода́ть.

Не из крове́й, я́коже рече́ честно́е Ева́нгелие, ниже́ из по́хоти пло́ти, Дими́трие, Бо́гом же роди́лся еси́, Воплоще́ннаго почита́я Бо́га: кро́вь же усе́рдно Того́ ра́ди твою́ истощи́в, восприя́л еси́ свы́ше чуде́сную благода́ть, источа́еши боже́ственное ми́ро, ду́ши благоуха́яй.

Ты́ ле́ствица яви́лся еси́ одушевле́нная, на земли́ у́бо утвержде́нная стопа́ми пло́ти, до небе́с же дося́жущая, Бо́гом бо обогати́лся еси́, утвержде́нным, му́чениче, в тебе́. Сто́лп же яви́вся, пома́зан еле́ем по́двигов муче́ния, и ны́не источа́еши ве́рою приступа́ющим исто́чник боже́ственнаго ми́ра.

Тя́ реку́ прописа́ Бо́жию наводне́ну, поя́ Дави́д проро́чески, Дими́трие: се́ бо неистоща́емо прихожде́ние ми́ра твоего́. Те́м и мно́жество ре́к, наводня́ющеся, гла́сы своя́ возвыша́ют, рука́ми же пле́щут в сла́ву си́ми все́ми просла́вльшаго тя́ Бо́га.

Госпо́дь Еди́н Трисвяты́й, Ты́, Бо́же Всемо́щнейше, Его́же богосло́вствуяй страда́лец Дими́трий в темни́це заключа́ется, и с скорпи́ею чу́вственною зми́я умори́в мы́сленнаго, и горды́ню Ли́еву низложи́в чрез Не́стора боже́ственнаго, копие́м пробода́ется, и ми́ро ны́не из гро́ба то́чит.

Богоро́дичен: За Ада́ма — Госпо́дь, за Е́ву — Ты́, Всечи́стая, Гаврии́л же — за льсти́внаго зми́я, Кре́ст же — за дре́во, вертогра́д гро́ба — вме́сто Еде́ма, ра́дуйся — вме́сто печа́ли, копие́ — вме́сто пла́меннаго ору́жия, и багряни́ца — вме́сто смоко́внаго ли́ствия: Тя́ у́бо пое́м, Отрокови́це, я́ко все́х вино́вну.

Пе́снь 9.
Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, А́нгелов и челове́к чинонача́лия велича́ют.

Прие́м тво́й алава́стр душе́вный, доброде́телей боже́ственнаго ми́ра испо́лнен, име́я же Христа́, прекло́нша тебе́, му́чениче, главу́, я́ко упоко́ившася жития́ твоего́ све́тлостию чистоты́. Те́м ублажи́лся еси́ и благода́ти испо́лнился еси́, мироточи́ти ми́ра конце́м.

Се́ ожида́ющих тя́ воздая́ний неизрече́нных све́тлая проображе́ния, се́ исто́чник ми́ра приснотеку́щаго, о страда́льче! Бо́гу у́бо предстоя́ со дерзнове́нием му́ченическим, Импера́тору на́шему испроси́ на враги́ побе́ду, и ца́рства коне́ц неотъе́млемь.

О́бразом Креста́ Победотво́рца победи́л еси́ Ли́ево суровство́, и победи́теля Не́стора, и сострада́льца поста́вив. И ны́не вся́к язы́к ва́рварский рабо́тен покори́ Импера́тору на́шему, соде́йствуя, сво́инствуя, укрепля́я, велича́яй земны́я концы́ Дими́трие.

Те́плою от се́рдца любо́вию к твоему́ честно́му ковче́гу прибега́ющия, му́чениче Христо́в, ми́ро пролива́ющему река́ми, твои́ми моли́твами изба́ви де́л душетле́нных и пото́па страсте́й злосмра́дия; обоня́ния же покажи́ сия́ Го́споду благово́ннейша.

Де́нь ра́дости духо́вныя соверша́ем, Дими́трие, ви́дяще ми́ра твоего́ непреста́нно точа́щ исто́чник. Ты́ же страсте́й омраче́ние разоря́я, я́ко боже́ственнаго испо́лнен све́та, я́ко во дни́ дава́й ходи́ти благообра́зно, Бо́жий же ви́дети Све́т непристу́пный.

Богоро́дичен: Ты́, Всечи́стая, злата́я голуби́ца еси́, я́ко суче́ц ма́сличный, нося́щая Сло́во Бо́жие, пома́завшее пло́ть Свою́ еле́ем Божества́. Его́же в се́рдцы, я́ко ковче́г, прие́м страда́лец, из гро́ба ми́ро то́чит, и умаща́ет ве́рных ли́ца.

Свети́лен.
Кресто́м вооружи́л еси́ Не́стора, чрез о́наго Ли́еву разори́в горды́ню, Дими́трие, на три́знищи, я́коже Христо́с, отверза́еши копие́м ре́бра твоя́, и́миже ста́до твое́ храни́.

Комментарии участника: Лидия Новикова (1)

Всего: 1 комментарий
#1 | Лилия Никул | 07.11.2018 11:09
  
3
8 ноября. Святого великомученика Димитрия Солунского.

Всех Дмитриев поздравляем с днём ангела!

Тропарь великомученика Димитрия Солунского

глас 3

Велика обрете в бедах тя поборника вселенная, страстотерпче,/ языки побеждающа./ Якоже убо Лиеву низложил еси гордыню,/ и на подвиг дерзновенна сотворив Нестора,/ тако, святе Димитрие,/ Христу Богу молися// даровати нам велию милость.
Кондак великомученика Димитрия Солунского

глас 2

Кровей твоих струями, Димитрие,/ Церковь Бог обагри,/ давый тебе крепость непобедимую/ и соблюдая град твой невредим,// того бо еси утверждение.
Величание великомученику Димитрию Солунскому

Величаем тя, страстотерпче святый Димитрие, и чтим честная страдания твоя, яже за Христа претерпел еси.

Молитва великомученику Димитрию Солунскому

Святый и славный великомучениче Христов Димитрие, скорый помощниче и теплый заступниче с верою притекающих к тебе! Предстоя с дерзновением Небесному Царю, испроси у Него прощение согрешений наших и о еже избавитися нам от всегубительныя язвы, труса, потопа, огня, меча и вечныя казни. Моли благость Его, еже ущедрити град сей, обитель сию и всякую страну христианскую. Исходатайствуй у Царя Царствующих на враги победу и одоление православным христианам, всей державе православной мир, тишину, твердость в вере и преспеяние во благочестии; нам же, чтущим честную память твою, испроси благодатное укрепление на дела благая, да благоутробное Владыце нашему Христу Богу зде творяще, сподобимся молитвами твоими наследовати Царствие Небесное для вечнаго прославления Его со Отцем и Святым Духом. Аминь.

Молитва вторая

Святый великомучениче Христов Димитрие! Предстоя со дерзновением Небесному Царю, испроси у Него прощение согрешений наших и о еже избавитися нам, окаянным (имена) от всегубительныя язвы, огня и вечныя казни.
Моли благость Его, еже ущедрити приход (или дом) сей и храм наш. Испроси нам благодатное укрепление на дела благая, да благоугодное Владыце нашему Христу Богу зде творяще, сподобимся молитвами Твоими наследовати Царствие Небесное и тамо прославляти Его, со Отцем и Святым Духом, во веки веков.
***

Дмитрий Солунский - проконсул, который был послан для искоренения христианства в Фессалоникийской области. Прибыв на место, открыто исповедовал себя христианином, и стал ревностным учителем веры в Солуни. Димитрий Солунский - небесный покровитель управленцев и воинов, миссионеров и катехизаторов. Ему молятся о помощи при нашествии врагов, для защиты дома, села от нападений, воровства и убийств и, конечно, во всякой немощи и болезни
Добавлять комментарии могут только
зарегистрированные пользователи!
 
Имя или номер: Пароль:
Регистрация » Забыли пароль?
© LogoSlovo.ru 2000 - 2024, создание портала - Vinchi Group & MySites
ЧИСТЫЙ ИНТЕРНЕТ - logoSlovo.RU