Акафист и Каноны святителю Иоанну Златоустому.

Святитель Иоанн Златоуст, Константинопольский
Акафист святителю Иоанну Златоустому
Составлен епископом Белгородским Никодимом (Кононовым). Одобрен в 1908 году.
Память: 09 февраля (27 января ст. ст.); 27 сентября (14 сентября ст. ст.); 26 ноября (13 ноября ст. ст.)
Утвержден для общецерковного использования.


Конда́к 1.
Возбра́нный вождю́ Це́ркве Христо́вы, златослове́сный учи́телю Иоа́нне! От ю́ности доброде́тельми украси́вся, до́бре потруди́лся еси́, и за и́мя Христо́во гоне́ние претерпе́в, во изгна́нии житие́ сконча́л еси́: сего́ ра́ди на небесе́х сугу́бо просла́влен еси́, му́дрый чи́на Церко́внаго устрои́телю. Те́мже и мы́ умиле́нне чти́м тя́, зову́ще:

Ра́дуйся, святи́телю вели́кий Иоа́нне Златоу́сте.

И́кос 1.
А́нгельский о́браз нося́, во пло́ти а́ки безпло́тен пожи́л еси́, Иоа́нне; во спасе́ние бо бра́тий мно́гия труды́ подъе́мля, де́лы до́брыми Отца́ Небе́снаго просла́вил еси́. Те́мже ти́ глаго́лем:

Ра́дуйся, Це́ркве Правосла́вныя украше́ние; ра́дуйся, роди́телей имени́тых ча́до благослове́нное.

Ра́дуйся, еще́ во о́трочестве от ма́тере твоея́ любо́вию ко сло́ву Бо́жию напое́нный; ра́дуйся, от ю́ности ра́зум и́гу Христо́ву покори́вый.

Ра́дуйся, Бо́гови усе́рдно послужи́вый; ра́дуйся, вселе́нныя учи́телю.

Ра́дуйся, христиа́н все́х време́н в моли́твах наста́вниче; ра́дуйся, жития́ и́ноческаго в Царегра́де обнови́телю.

Ра́дуйся, го́тфов и ски́фов просвети́телю; ра́дуйся, богоукрепле́нный пра́вды ревни́телю.

Ра́дуйся, вше́дый в ра́дость Го́спода твоего́; ра́дуйся, усе́рдный о на́с предста́телю.

Ра́дуйся, святи́телю вели́кий Иоа́нне Златоу́сте.

Конда́к 2.
Ви́дя Христо́с роди́телей твои́х Секу́нда и Анфу́сы житие́ чи́стое, благоволи́ я́ просла́вити, и тя́, Иоа́нне, и́ма во утеше́ние дарова́; да ве́рнии, доброде́тели твоя́ помина́юще, превозно́сят чету́ пра́ведную, тя́ израсти́вшую, и, то́й ревну́юще, пою́т Бо́гови: Аллилу́иа.

И́кос 2.
Ра́зум уче́нием умудри́вый, се́рдцем же во благоче́стии от мла́дости воспита́нный, ра́дость и утеше́ние бы́л еси́, Иоа́нне, ма́тери твое́й, егда́ супру́га своего́ и дще́ре лиши́ся. Те́мже прино́сим тебе́ хвалы́ сицевы́я:

Ра́дуйся, отроко́м звездо́ благонра́вия; ра́дуйся, а́нгела храни́теля увеселе́ние.

Ра́дуйся, я́ко того́ николи́же опеча́лил еси́; ра́дуйся, при́сных люби́миче.

Ра́дуйся, во уче́нии преспева́вый и те́м мудрецы́ ми́ра сего́ удиви́вый; ра́дуйся, я́ко, еще́ учени́к сы́й, Анфи́мия богоху́льника посрами́л и вразуми́л еси́.

Ра́дуйся, угнете́нных сле́зы го́рькия в суде́х узре́вый; ра́дуйся, от творя́щих беззако́ния уклони́выйся.

Ра́дуйся, пути́ незло́бия спаси́тельнаго взыска́вый; ра́дуйся, по успе́нии ма́тере в пусты́ню заключи́выйся.

Ра́дуйся, та́мо за роди́тели преста́вльшияся Бо́гови усе́рдно моли́выйся; ра́дуйся, я́ко ти́и дне́сь, со Влады́чицею и святы́ми лику́юще, от земноро́дных велича́ются и хва́лятся.

Ра́дуйся, святи́телю вели́кий Иоа́нне Златоу́сте.

Конда́к 3.
Си́лы, во е́же сло́вом и де́лом Христу́ рабо́тати, стяжа́л еси́, Иоа́нне, а́ки тезоиме́нный ти́ Предте́ча, в пусты́ни. Та́мо бо, посто́м стра́сти плотски́я умертви́в, моли́твою ду́х окрили́л еси́ и́, я́ко во́ин, проти́ву кня́зя вла́сти возду́шныя во вся́ ору́жия Бо́жия обле́клся еси́, со упова́нием поя́ Бо́гу кре́пкому: Аллилу́иа.

И́кос 3.
Име́я власяни́цу и по́яс усме́н о чре́слех, Крести́теля Христо́ва ревни́телю, бы́лием пита́лся еси́, Иоа́нне, в пусты́ни, из нея́же, я́ко му́ж си́лы испо́лнь, изше́л еси́. Те́мже вопие́м ти́:

Ра́дуйся, воздержа́нием Илии́ Проро́ку уподо́бивыйся; ра́дуйся, нищеты́ Христо́вы подража́телю.

Ра́дуйся, целому́дрием неможе́ние телесе́ укрепи́вый; ра́дуйся, богомы́слием уны́ние отгна́вый.

Ра́дуйся, па́мятию всеве́дения Бо́жия се́рдце непоро́чно соблюды́й; ра́дуйся, бде́нием ко́зни бесо́вския посрами́вый.

Ра́дуйся, искуше́ния са́м победи́вый и ины́я последи́ тому́жде научи́вый; ра́дуйся, в де́лании духо́внем подвиза́ющихся му́дрый укрепи́телю.

Ра́дуйся, дру́га твоего́ Фео́дора от паде́ния грехо́внаго удержа́вый; ра́дуйся, дру́га твоего́ епи́скопа Васи́лия во служе́нии утверди́вый.

Ра́дуйся, от ми́ра изгна́нным приста́нища ти́хаго указа́телю; ра́дуйся, и́ноческаго жития́ защи́тниче.

Ра́дуйся, святи́телю вели́кий Иоа́нне Златоу́сте.

Конда́к 4.
Бу́рю искуше́ний но́вую победи́л еси́, Иоа́нне, в пеще́ре еди́н всели́вся; боле́зни же ра́ди из пусты́ни изше́д во Антиохи́ю, от свята́го Меле́тия во диа́кона поста́влен бы́л еси́ и попече́нию о неиму́щих ре́вностно преда́лся еси́. Е́же ви́дяще, ве́рнии ра́достно поя́ху Бо́гови: Аллилу́иа.

И́кос 4.
Слы́шав от ве́рных о тебе́ ре́чи хвале́бныя, святы́й Флавиа́н по достоя́нию благода́ть свяще́нства низведе́ на тя́, Иоа́нне. Те́мже лю́дие антиохи́йстии веселя́хуся и, труды́ твоя́ пра́ведно чту́ще, та́ко тя́ велича́ху:

Ра́дуйся, о себе́ попече́ние вся́кое отверги́й; ра́дуйся, убо́гим покро́ве.

Ра́дуйся, те́плое си́рым прибе́жище; ра́дуйся, скорбе́й утоли́телю.

Ра́дуйся, о людски́х неве́жествиих печа́льниче; ра́дуйся, де́вственнаго жития́ сладкогла́сный ублажа́телю.

Ра́дуйся, мно́ги иуде́и просвети́вый; ра́дуйся, иска́вшия спасе́ния пра́вым уче́нием оглаша́вый.

Ра́дуйся, житие́м твои́м сего́ уче́ния не посрами́вый; ра́дуйся, благоче́стия свети́льниче.

Ра́дуйся, апо́столом единонра́вниче; ра́дуйся, я́ко пра́ведно даде́ся ти́ жре́бий па́стырскаго о душа́х попече́ния.

Ра́дуйся, святи́телю вели́кий Иоа́нне Златоу́сте.

Конда́к 5.
Богото́чною кро́вию от ве́чныя сме́рти искупле́нныя соблюда́я, егда́ са́н свяще́нства прия́л еси́, Иоа́нне, де́ло благове́стника трезвя́ся до́бре сотвори́л еси́, облича́я, запреща́я, умоля́я со вся́ким долготерпе́нием и уче́нием и поя́ Бо́гу: Аллилу́иа.

И́кос 5.
Ви́дя нестрое́ния во гра́де, скорбя́ же о се́м, поко́я не позна́л еси́, Иоа́нне, неве́рныя бо благове́стием оглаша́л еси́, ве́рныя же та́инствы церко́вными освяща́я и та́йнам ве́ры уча́, досто́йно стяжа́л еси́ и́мя Злата́я уста́, слы́шав от все́х сицева́я:

Ра́дуйся, па́стырю до́брый; ра́дуйся, святы́м креще́нием мно́га ча́да Це́ркви Христо́ве породи́вый.

Ра́дуйся, пома́занием ми́ра печа́ть да́ра Ду́ха Свята́го те́м дарова́вый; ра́дуйся, святе́йшия Трапе́зы предстоя́телю умиле́нный.

Ра́дуйся, пи́щею нетле́ния ча́да твоя́ пита́вый; ра́дуйся, покая́нием серде́ц очисти́телю.

Ра́дуйся, супру́жеств о Го́споде сочета́телю; ра́дуйся, еле́а пома́занием цели́телю.

Ра́дуйся, сло́ва Бо́жия нело́жный истолкова́телю; ра́дуйся, ересе́й мо́щный обличи́телю.

Ра́дуйся, глубо́кий кла́дязю и́стиннаго богосло́вия; ра́дуйся, я́ко притяжа́л еси́ па́ствы сердца́, любве́ к тебе́ испо́лненная.

Ра́дуйся, святи́телю вели́кий Иоа́нне Златоу́сте.

Конда́к 6.
Пропове́дник покая́ния наипа́че яви́лся еси́, Иоа́нне, егда́ лю́дие антиохи́йстии, царя́ подо́бие низве́ргше, гне́ву того́ досто́йно подпадо́ша. Бо́жиим бо милосе́рдием утеша́я, ко исправле́нию жития́ словесы́ твои́ми вле́кл еси́ вся́, во е́же се́рдцем чи́стым пе́ти Бо́гу: Аллилу́иа.

И́кос 6.
Возсия́ Антиохи́я ра́достию, егда́ по словеси́ твоему́ беззако́ния своя́ опла́кавши, царе́во проще́ние получи́. Оба́че ско́рбию омрачи́ся вско́ре, с тобо́ю разлуча́ема: во архиепи́скопа бо Царюгра́ду при́зван бы́л еси́, Иоа́нне. Те́мже тебе́ вопие́м:

Ра́дуйся, а́ки Иса́ия, скорбьми́ гра́да оте́ческаго поболе́вый; ра́дуйся, а́ки Иереми́я, злонра́вие людско́е опла́кавый.

Ра́дуйся, а́ки Иезеки́иль, беззако́нники ко обраще́нию призыва́вый; ра́дуйся, мо́лние, горды́ню низложи́вшая.

Ра́дуйся, гро́ме, беззако́нно жи́вшия устраши́вый; ра́дуйся, корыстолю́бия обличи́телю.

Ра́дуйся, па́губу тщесла́вия показа́вый; ра́дуйся, сту́днаго е́ллинскаго многобо́жия посрами́телю.

Ра́дуйся, смяте́нных серде́ц умири́телю; ра́дуйся, споспе́шниче епи́скопу Флавиа́ну, ста́рцу пра́ведному.

Ра́дуйся, со пустынножи́тели ца́рския приста́вники на ми́лость преклони́вый; ра́дуйся, Ио́не, Ниневи́ю спа́сшему, ра́вный.

Ра́дуйся, святи́телю вели́кий Иоа́нне Златоу́сте.

Конда́к 7.
Хотя́ це́рковь Царегра́дскую, а́ки неве́сту Христо́ву, досто́йно украси́ти, во благоле́пие вся́ приве́л еси́, Иоа́нне. Всено́щными бо бде́нии от сбо́рищ ариа́нских ве́рныя отврати́л еси́ и чи́н Боже́ственныя Литурги́и му́дре устро́ил еси́, я́ко благово́нное ми́ро, источи́в моли́твы, и́миже назида́ющеся, о тебе́ Бо́гови пое́м: Аллилу́иа.

И́кос 7.
Но́вое зна́мение ми́лости Бо́жия бы́сть о тебе́, святи́телю: моли́твами бо твои́ми ве́рнии все́х време́н, Бо́гови бесе́дующе, во спасе́ние умудря́ются. Приими́ у́бо от на́с сицевы́я хвалы́:

Ра́дуйся, а́ки Дави́д, словесы́ моли́твенными Це́рковь Бо́жию обогати́вый; ра́дуйся, а́ки бра́т Бо́жий Иа́ков, чи́н Боже́ственныя Литурги́и написа́вый.

Ра́дуйся, в то́мже Вели́кому Васи́лию подража́вый; ра́дуйся, Ду́ха Свята́го прия́телище.

Ра́дуйся, тобо́ю бо Ду́х Святы́й написа́ словеса́ спаси́тельная; ра́дуйся, я́ко моли́твами твои́ми, от сна́ воста́вше, Отца́ благодари́м.

Ра́дуйся, я́ко твои́ми словесы́, ко сну́ гряду́ще, от Ду́ха Свята́го прегреше́ний оставле́ния про́сим; ра́дуйся, я́ко усты́ твои́ми Сы́на Бо́жия умоля́ем, да не в су́д прича́стие Боже́ственных Та́ин прии́мем.

Ра́дуйся, ра́бе Бо́жий, уничиже́нныя на ве́черю Христо́ву глаша́яй; ра́дуйся, пропове́дниче Распя́таго на кресте́ за мирски́й живо́т и спасе́ние.

Ра́дуйся, я́ко в сло́во твое́, а́ки в ри́зы позлаще́ны, та́йны ве́ры оде́яшася; ра́дуйся, песнотво́рче и вити́я ди́вный.

Ра́дуйся, святи́телю вели́кий Иоа́нне Златоу́сте.

Конда́к 8.
Стра́нник во юдо́ли земне́й бы́в, смире́ния, воздержа́ния и чистоты́ о́браз показа́л еси́, Иоа́нне, житие́м во ца́рствующем гра́де: та́мо бо оби́тели и́ноческия обнови́л и созда́л еси́ и уста́вы жития́ мона́шескаго да́л еси́ де́вам непоро́чным; от ни́хже, а́ки фимиа́м благово́нный, вознесе́ся Бо́гови пе́снь вели́кая: Аллилу́иа.

И́кос 8.
Все́ю душе́ю Христо́ви рабо́тая, челове́ком угожда́ти не восхоте́л еси́, Иоа́нне. Имени́тым бо ве́чери устроя́ти преста́в, убо́гим трапе́зы умно́жил еси́, странноприи́мницы же и безме́здныя враче́бницы неду́жным созда́в, научи́л еси́ пе́ти тебе́:

Ра́дуйся, Никола́я, святи́теля Мирлики́йскаго, соревнова́телю; ра́дуйся, стяжа́вый смире́нием высо́кая.

Ра́дуйся, приобреты́й нището́ю бога́тая; ра́дуйся, си́ми доброде́тельми и́ноком о́браз бы́вый.

Ра́дуйся, гла́дных пита́телю; ра́дуйся, а́ки Авраа́м, стра́нныя приима́вый.

Ра́дуйся, безприю́тных сиро́т прия́телище; ра́дуйся, безпомо́щных ста́рцев и ста́риц попечи́телю.

Ра́дуйся, избы́тки своя́ неиму́щим расточи́вый; ра́дуйся, я́ко коему́ждо в го́рестех, а́ки а́нгел уте́шитель, явля́лся еси́.

Ра́дуйся, ру́ки бога́тых на благодея́ния отверза́вый; ра́дуйся, я́ко о глубине́ милосе́рдия твоего́ Ма́ти Бо́жия возра́довася.

Ра́дуйся, святи́телю вели́кий Иоа́нне Златоу́сте.

Конда́к 9.
Вся́к язы́к спасти́ хотя́, пропове́дники Ева́нгелия ко ски́фом, пра́отцем на́шим, посла́л еси́, Иоа́нне, из Константи́на гра́да, в не́мже хра́м во и́мя Апо́стола Па́вла созда́л еси́ го́тфом, да и ти́и, е́ресь а́риеву отве́ргше, правосла́вными усты́ пою́т Бо́гови: Аллилу́иа.

И́кос 9.
Вити́и правосла́вия к неве́рным посла́в, к це́рквам ве́рных, во Аси́и су́щим, са́м подви́глся еси́, Иоа́нне, и ты́я посеща́я, неради́выя облича́я, усе́рдныя же похваля́я, вся́ смотри́тельне устро́ил еси́. Те́мже тя́ сла́вим:

Ра́дуйся, правосла́вия свети́ло; ра́дуйся, па́стырю до́брый, о заблу́ждших овца́х попеки́йся.

Ра́дуйся, я́ко в земли́ ски́фстей дне́сь и́мя твое́ прославля́ется; ра́дуйся, я́ко во и́мя твое́ це́ркви Бо́жия зде́ воздвиза́ются.

Ра́дуйся, служе́ния апо́стольскаго прича́стниче; ра́дуйся, по словеси́ Апо́стола Петра́ ста́до Бо́жие пасы́й.

Ра́дуйся, не ну́ждею, но во́лею и по Бо́зе сие́ посеща́вый; ра́дуйся, мздои́мства тве́рдый искорени́телю.

Ра́дуйся, пра́вил церко́вных нелицеприя́тный блюсти́телю; ра́дуйся, лени́выя рабы́ пра́ведно изгна́вый.

Ра́дуйся, я́ко во благо́е труди́вшиися от тебе́ похвали́шася и укрепи́шася; ра́дуйся, Це́ркве испы́танный упра́вителю.

Ра́дуйся, святи́телю вели́кий Иоа́нне Златоу́сте.

Конда́к 10.
Спасе́нию па́ствы твоея́ служи́ти не преста́л еси́, Иоа́нне, от Аси́и в Царьгра́д возврати́вся. Егда́ же цари́цы и имени́тых злонра́вное житие́ облича́ти безбоя́зненне нача́л еси́, ско́рби мно́ги прия́л еси́; тобо́ю бо облича́емии, не могу́ще а́бие я́ве загради́ти пра́ведная уста́ твоя́, та́йно ко́вы де́яху, во е́же погуби́ти тя́, чи́сте Бо́гови взыва́юща: Аллилу́иа.

И́кос 10.
Стена́ неви́нно гони́мым и́ноком яви́лся еси́, Иоа́нне: сего́ ра́ди я́ве обнажи́ся зло́ба ве́лия, ю́же врази́ на тя́ име́яху. Льсти́вый бо Фео́фил со цари́цею нечести́во на собо́рищи оболга́ и низложи́ тя́, не помяну́в трудо́в твои́х во бла́го оте́чествия. Мы́ же сия́ благода́рне воспомина́ем, глаго́люще:

Ра́дуйся, ди́вную любо́вь ко оте́честву земно́му показа́вый; ра́дуйся, Царягра́да от ва́рварскаго наше́ствия свободи́телю.

Ра́дуйся, Гаи́ны, гро́знаго вождя́ го́тфскаго, укроти́телю; ра́дуйся, ми́лостей дре́вних, Це́ркви царьми́ дарова́нных, охрани́телю.

Ра́дуйся, Евтро́пию вла́стному убе́жище церко́вное отъя́ти не попуска́вый; ра́дуйся, последи́ в се́м убе́жищи того́жде Евтро́пия гони́ма спасы́й.

Ра́дуйся, огражде́ния ра́ди нитри́йских и́ноков непра́вды собо́рища беззако́ннаго кро́тце претерпе́вый; ра́дуйся, я́ко сло́во Писа́ния «любы́ долготерпи́т», на тебе́ оправда́ся.

Ра́дуйся, ополча́тися за тя́ при́сным воспрети́вый; ра́дуйся, меча́ проти́ву враго́в не подъе́мый.

Ра́дуйся, власте́м повину́выйся и сего́ ра́ди во́лею в ру́ки во́инов но́щию преда́выйся; ра́дуйся, из оте́чествия пра́вды ра́ди изгна́нный.

Ра́дуйся, святи́телю вели́кий Иоа́нне Златоу́сте.

Конда́к 11.
Пе́нием ра́достным измени́ся вско́ре пла́чь па́ствы твоея́, до́блий страда́льче: во изгна́ние бо влеко́му ти́, внеза́пу гро́м возгреме́, мо́лния возблиста́ и, ве́тром шумя́щим, земля́ поколеба́ся. Я́же ви́дящи и трепе́щущи, цари́ца раска́яся и че́стне тя́ возврати́, смире́нно вопию́щи Бо́гу: Аллилу́иа.

И́кос 11.
Све́тлую правосла́вия свещу́, сугу́бо цари́ца возненави́де тя́ вско́ре, егда́ обличи́л еси́ ю́, подо́бие свое́ бли́з хра́ма поста́вльшую: сего́ ра́ди, втори́цею осужде́нный, в Куку́зе, ве́си да́льней и ма́лей, заточе́н бы́л еси́, Иоа́нне. Приими́ у́бо от на́с сицевы́я хвалы́:

Ра́дуйся, по словеси́ Иереми́ину от ю́ности яре́м Бо́жий подъе́мый; ра́дуйся, по глаго́лу Христо́ву, ру́ку де́лания на ра́ло духо́вное возложи́вый.

Ра́дуйся, до конца́ вспя́ть не отврати́выйся; ра́дуйся, проти́ву цари́цы злонра́вныя возгреме́вый.

Ра́дуйся, то́ю, а́ки Крести́тель Иродиа́дою, возненави́денный; ра́дуйся, от уби́йц незри́мо а́нгелом спасе́нный.

Ра́дуйся, в дому́ твое́м любо́вию па́ствы твоея́ храни́мый; ра́дуйся, клевре́тми непра́ведных суде́й уничиже́нный.

Ра́дуйся, в заточе́ние со смире́нием безро́потно ше́дый; ра́дуйся, ве́рными опла́канный.

Ра́дуйся, за Го́спода распя́таго изъязвле́нный и зауше́нный; ра́дуйся, я́ко му́ченицы со Предте́чею на небесе́х о терпе́нии твое́м ликова́ху.

Ра́дуйся, святи́телю вели́кий Иоа́нне Златоу́сте.

Конда́к 12.
Благода́ть Бо́жия и во изгна́нии соблюда́ше тя́, Иоа́нне, та́мо бо, а́ки Па́вел святы́й во у́зах, финики́яном и пе́рсом Ева́нгелие возвеща́л еси́, посла́ньми ве́рныя утеша́я. И та́ко упа́сл еси́ Це́рковь да́же до дне́, во́ньже злата́я уста́ твоя́ изреко́ша словеса́ после́дняя: Сла́ва Бо́гу за вся́! Душа́ же твоя́ на небеса́ пренесена́ бы́сть святы́ми А́нгелы, побе́дне вопию́щими: Аллилу́иа.

И́кос 12.
Пою́ще ра́достно, ве́рнии пренесо́ша святы́я мо́щи твоя́, Иоа́нне, в Царьгра́д, отню́дуже сла́ва твоя́ про́йде до после́дних земли́ и обы́де всю́ вселе́нную, уча́щи все́х пе́ти тебе́ си́це:

Ра́дуйся, стра́нниче, во оте́чествие небе́сное вше́дый; ра́дуйся, все́х церкве́й моли́твами напу́тствованный.

Ра́дуйся, на пути́ в Пифиу́нт да́льний в Кома́нех тече́ние сконча́вый; ра́дуйся, я́ко кончи́ну ти́ предрече́ священному́ченик Васили́ск.

Ра́дуйся, от сего́ услы́шавый: Бра́те, зау́тра ку́пно обря́щемся; ра́дуйся, Святы́х Та́ин прия́тием к восхожде́нию в ра́й укрепи́выйся.

Ра́дуйся, я́ко душа́ твоя́ от многотру́днаго телесе́ ти́хо разлучи́ся; ра́дуйся, я́ко тле́ние не прикосну́ся косте́м твои́м.

Ра́дуйся, я́ко на си́х во хра́мех Же́ртва Безкро́вная дне́сь возно́сится; ра́дуйся, небе́сных высо́т обита́телю, све́том невече́рним осия́нный.

Ра́дуйся, я́ко со святы́ми Васи́лием Вели́ким и Григо́рием Богосло́вом я́влься, восхваля́ти тя́ ку́пно со о́неми вся́ научи́л еси́; ра́дуйся, сла́во Це́ркве вселе́нския.

Ра́дуйся, святи́телю вели́кий Иоа́нне Златоу́сте.

Конда́к 13.
О святи́телю вели́кий Иоа́нне Златоу́сте! При́зри с небе́сных высо́т на ны́, до́лу пове́рженныя, и прие́м сие́ от любве́ на́шея приноси́мое ти́ хвале́ние, умоли́ Го́спода Бо́га, да излие́т на ны́ благода́ть Свою́, немощна́я врачу́ющую, су́щия во правосла́вии укрепи́т, отпа́дшия же от Це́ркве па́ки в ло́но тоя́ приведе́т, благоутро́бием Свои́м оскудева́ющая восполня́я, и все́х сподо́бит с тобо́ю и все́ми святы́ми пе́ти Ему́ во ве́ки: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.
А́нгельский о́браз нося́, во пло́ти а́ки безпло́тен пожи́л еси́, Иоа́нне; во спасе́ние бо бра́тий мно́гия труды́ подъе́мля, де́лы до́брыми Отца́ Небе́снаго просла́вил еси́. Те́мже ти́ глаго́лем:

Ра́дуйся, Це́ркве Правосла́вныя украше́ние; ра́дуйся, роди́телей имени́тых ча́до благослове́нное.

Ра́дуйся, еще́ во о́трочестве от ма́тере твоея́ любо́вию ко сло́ву Бо́жию напое́нный; ра́дуйся, от ю́ности ра́зум и́гу Христо́ву покори́вый.

Ра́дуйся, Бо́гови усе́рдно послужи́вый; ра́дуйся, вселе́нныя учи́телю.

Ра́дуйся, христиа́н все́х време́н в моли́твах наста́вниче; ра́дуйся, жития́ и́ноческаго в Царегра́де обнови́телю.

Ра́дуйся, го́тфов и ски́фов просвети́телю; ра́дуйся, богоукрепле́нный пра́вды ревни́телю.

Ра́дуйся, вше́дый в ра́дость Го́спода твоего́; ра́дуйся, усе́рдный о на́с предста́телю.

Ра́дуйся, святи́телю вели́кий Иоа́нне Златоу́сте.

Конда́к 1.
Возбра́нный вождю́ Це́ркве Христо́вы, златослове́сный учи́телю Иоа́нне! От ю́ности доброде́тельми украси́вся, до́бре потруди́лся еси́, и за и́мя Христо́во гоне́ние претерпе́в, во изгна́нии житие́ сконча́л еси́: сего́ ра́ди на небесе́х сугу́бо просла́влен еси́, му́дрый чи́на Церко́внаго устрои́телю. Те́мже и мы́ умиле́нне чти́м тя́, зову́ще:

Ра́дуйся, святи́телю вели́кий Иоа́нне Златоу́сте.

Моли́тва.
О святи́телю вели́кий Иоа́нне Златоу́сте! Мно́гая и разли́чная дарова́ния от Го́спода прия́л еси́ и́, я́ко ра́б благи́й и ве́рный, вся́ да́нныя тебе́ тала́нты до́бре умно́жил еси́: сего́ ра́ди вои́стинну вселе́нский учи́тель бы́л еси́, я́ко вся́к во́зраст и вся́ко зва́ние от тебе́ поуча́ется. Ты́ еси́ отроко́м – послуша́ния о́браз, ю́ным – целому́дрия свети́ло, муже́м – трудолю́бия наста́вник, ста́рым – незло́бия учи́тель, и́ноком – воздержа́ния пра́вило, моля́щимся – во́ждь от Бо́га вдохнове́нный, му́дрости и́щущим – ума́ просвети́тель, вити́ям доброглаго́ливым – сло́ва жива́го исто́чник неисчерпа́емый, благотворя́щим – милосе́рдия звезда́, нача́льствующим – правле́ния му́драго о́браз, пра́вды ревни́телем – дерзнове́ния вдохнови́тель, пра́вды ра́ди гони́мым – терпе́ния наста́вник: все́м вся́ бы́л еси́, да вся́ко не́кия спасе́ши. Над все́ми же си́ми стяжа́л еси́ любо́вь, я́же е́сть соу́з соверше́нства, и то́ю, я́ко си́лою Боже́ственною, вся́ дарова́ния во еди́нем лице́ твое́м во еди́но совокупи́л еси́ и ту́южде любо́вь, разделе́нная примиря́ющую, в толкова́нии слове́с апо́стольских все́м ве́рным пропове́дал еси́. Мы́ же гре́шнии, по еди́ному ки́йждо свое́ дарова́ние иму́ще, едине́ния ду́ха в сою́зе ми́ра не и́мамы, быва́ем тщесла́вни, дру́г дру́га раздража́юще, дру́г дру́гу зави́дяще; сего́ ра́ди дарова́ния на́ша разделе́нная не в ми́р и спасе́ние, но во вражду́ и осужде́ние на́м явля́ются. Те́мже к тебе́, святи́телю Бо́жий, припа́даем, раздо́ром обурева́еми, и в сокруше́нии се́рдца про́сим: моли́твами твои́ми отжени́ от серде́ц на́ших вся́ку го́рдость и за́висть, на́с разделя́ющия, да во мно́зех у́дех еди́но те́ло церко́вное бу́дем, да по словеси́ твоему́ моли́твенному возлю́бим дру́г дру́га и единомы́слием испове́мы Отца́ и Сы́на и Свята́го Ду́ха, Тро́ицу Единосу́щную и Неразде́льную, ны́не и при́сно и во ве́ки веко́в. Ами́нь.

------------------------------------------------------------------------------------------------------

Канон святителю Иоанну Златоусту
Припев: Святи́телю о́тче Иоа́нне, моли́ Бо́га о на́с.
Память: 09 февраля (27 января ст. ст.); 27 сентября (14 сентября ст. ст.); 26 ноября (13 ноября ст. ст.)
Глас 8.


Пе́снь 1.
Ирмо́с: Колесницегони́теля фарао́на погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца, спасе́, пе́снь Бо́гови воспева́юща.

Покая́ния бы́в тепле́йший пропове́дник, Златоу́сте, пока́ятися мне́, о́тче, Бо́гу моли́ся от всего́ се́рдца моего́ и дре́вних прегреше́ний исцели́ти я́звы твои́м страда́тельством умоли́.

Всю́ зарю́ Свята́го Ду́ха, о́тче, прии́м, всесве́тел яви́лся еси́ сто́лп, предводи́телен Це́ркве, преподо́бне, све́тел же о́блак, всеблаже́нне, осеня́ющ правосла́вных собо́ры.

От Христа́ рукоположе́н учи́тель, Боже́ственная уче́ния златови́дным язы́ком, мы́слию же Богому́дрою бога́тно ты́ источи́л еси́: Бо́жия бо река́, во́д испо́лнен Ду́ха, яви́лся еси́, Богоявле́нне Златоу́сте.

Богоро́дичен: Преукра́шена разли́чием благода́ти, Богора́дованная, О́тчее Сло́во, пло́ть бы́вшее за благоутро́бие мно́гое па́че ума́ и словесе́, Благослове́нная, родила́ еси́, пребы́вши Де́ва нескве́рная.

Пе́снь 3.
Ирмо́с: Утвержде́й в нача́ле Небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, Еди́не Человеколю́бче.

Умо́м Ты́ Христо́вым обога́щся, твои́м чи́стым житие́м челове́ком спасе́ния бы́л еси́ споспе́шник и повествова́тель, де́йствитель, Златоу́сте, учи́тельства точа́ спаси́тельная, Богодохнове́нне.

От невеще́ственных сокро́вищ Ду́ха ты́ обогати́вся, от исто́чников спасе́ния поче́рпл еси́ приснотеку́щий исто́чник уче́ний и напои́л еси́ все́ Це́ркве, преподо́бне о́тче, лице́.

Олядене́вшия душе́вныя, Златоу́сте, ни́вы, прему́дрым земледе́ланием слове́с изчи́стил еси́, му́дре, и плодоно́сны показа́л еси́, Небе́сными ту́чами сия́ напая́я, Богоприя́тне.

Богоро́дичен: Поро́ка в Тебе́ и скве́рны не́сть отню́д, Де́во, оби́тель же па́че яви́лася еси́ Небе́сных бла́гостей, в Тебе́ бо всели́ся доброде́телей вся́ святы́ня, Всенепоро́чная.

Седа́лен.
Неизрече́нныя му́дрости Богови́дно поче́рпл еси́ бога́тство ра́зума, все́м сокро́вищствовал еси́ Правосла́вия во́ды, ве́рных у́бо сердца́ Боже́ственне веселя́щия, неве́рных же мне́ния досто́йно погружа́ющия: те́м отобою́ду благоче́стия по́тами показа́лся еси́ непобе́дный Тро́ицы побо́рник, Иоа́нне Златоу́сте. Моли́ Христа́ Бо́га грехо́в оставле́ние дарова́ти пра́зднующим любо́вию святу́ю па́мять твою́.

Пе́снь 4.
Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.

Ина́го на́м апо́столов единонра́внаго, и́же промышле́нием все́х промышля́я, я́ко Бла́г, даде́ Христо́с тя́, Небе́снаго тайново́дства пропове́дника и Боже́ственнаго сказа́теля та́ин Го́рних, Иоа́нне всеблаже́нне Златоу́сте.

Златоза́рнаго и златослове́снаго, почти́м Златоу́стаго Иоа́нна, вся́ позлати́вшаго златови́дными сия́нии уче́ния и ми́р язы́ком просвети́вша, зла́та светле́йшим и све́та полне́йшим, источа́ющим благода́ть Боже́ственную.

Ве́сь бы́л еси́ Бо́жие жили́ще, ве́сь яви́лся еси́ орга́н Ду́ха, возглаша́ющ вся́кия доброде́тели Богодохнове́нную пе́снь, и спасе́ния вину́, и добро́ту явля́я Небе́снаго Ца́рствия, Иоа́нне всеблаже́нне Златоу́сте.

Ты́ Бо́жие благоутро́бие пропове́дал еси́, покая́ния о́бразы излага́я, и злы́х отбежа́ния изя́щнейше поуча́я, преблаже́нне и всесоверше́ннейше, и о де́лех изря́дных поуче́ния источа́я, всече́стне о́тче Златоу́сте.

Богоро́дичен: По Бо́зе предста́тельницу Тя́ стяжа́хом, Ты́ бо Бо́жия Ма́ти была́ еси́ Творца́ и Соде́теля, и на́ш зра́к прие́мшаго, Всенепоро́чная, и се́й спа́сшаго от тли́ и сме́рти и сла́вою Боже́ственною просла́вившаго.

Пе́снь 5.
Ирмо́с: Вску́ю мя́ отри́нул еси́ от лица́ Твоего́, Све́те Незаходи́мый, и покры́ла мя́ е́сть чужда́я тьма́, окая́ннаго; но обрати́ мя́ и к све́ту за́поведей Твои́х пути́ моя́ напра́ви, молю́ся.

Церко́внаго свети́льника вси́ тя́ ве́мы светови́днейшаго и душа́м спаси́тельнаго, восхища́ющаго сия́ из горта́ни смертоно́сныя и к жи́зни путеводя́ща ве́чней, о́тче приснопева́емый.

Разруша́еши ополче́ния ерети́чествующих, треблаже́нне, огради́вся благоче́стия ору́жии и му́жеством души́, свяще́ннейше, собира́еши же, ра́дуяся пресве́тло, правосла́вных ли́ки сою́зом Ду́ха.

Испо́лнены, я́коже фиа́лы, Боже́ственных арома́т лани́ты твоя́ и вселе́нную у́мными благово́нии веселя́т мирова́рным тайново́дством разуме́ний и добро́тою слове́с твои́х, всему́дре.

Богоро́дичен: Я́ко Бо́га заче́нши, Соде́теля же, и Зижди́теля, и Го́спода, ро́ди Тя́ вси́ челове́честии, Чи́стая, ублажа́ют, и Безтеле́сных разу́мная чинонача́лия я́ко Ма́терь Бо́жию Тя́ сла́вят.

Пе́снь 6.
Ирмо́с: Очи́сти мя́ Спа́се, мно́га бо беззако́ния моя́, и из глубины́ зо́л возведи́, молю́ся: к Тебе́ бо возопи́х, и услы́ши мя́, Бо́же спасе́ния моего́.

Му́дростию духо́вною ми́р ве́сь обогати́л еси́, словесе́ раздава́тель бы́в бога́тый: бога́та бо свы́ше, иера́рше, благода́ть излия́ся твои́м устна́м.

Во всю́, я́ко мо́лния, зе́млю изы́де веща́ние твое́, и си́ла же твои́х глаго́л, Златоу́сте, я́ко труба́ велегла́сная, вселе́нныя вся́ огласи́ концы́.

Свы́ше во истка́нную ри́зу оде́явся, всеблаже́нне, доброде́телей и слове́с красото́ю обложи́вся, и́стины яви́лся еси́ сла́вное утвержде́ние.

Богоро́дичен: Вседержи́тельною си́лою нося́й вся́ческая, в немощну́ю пло́ть из Тебе́ оде́явся, Де́во Пренепоро́чная, на благодея́ние челове́ков Человеколю́бец.

Конда́к, гла́с 6.
От Небе́с прия́л еси́ Боже́ственную благода́ть, и твои́ми устна́ми вся́ учи́ши покланя́тися в Тро́ице еди́ному Бо́гу, Иоа́нне Златоу́сте, всеблаже́нне преподо́бне, досто́йно хва́лим тя́: еси́ бо наста́вник, я́ко Боже́ственная явля́я.

И́кос.
Все́х Творцу́ преклоня́ю коле́на, преве́чному Сло́ву ру́ки простира́ю, сло́ва ища́ дарова́ние, да воспою́ преподо́бнаго, его́же Са́м возвели́чи, глаго́лет бо проро́ком Живы́й во ве́ки: просла́влю ве́рою сла́вящия Мя́. И́же у́бо в дре́вних Самуи́ла возвы́сивый, просла́ви ны́не иера́рха: тала́нт бо, ему́же вве́рися, до́бре ку́пльствовав, Царю́ принесе́, те́м и превозвы́шши его́ Пресу́щественный. Сего́ благода́ти прошу́ недосто́йный а́з сло́во прия́ти ми́, да возмогу́ благоче́стно воспе́ти того́: конце́й бо то́й е́сть наста́вник, я́ко Боже́ственная явля́я.

Пе́снь 7.
Ирмо́с: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́ ра́дованною ного́ю, я́ко во цве́тнице, лику́юще, поя́ху: благослове́н еси́, Бо́же оте́ц на́ших.

Бла́гости бе́здну и благоутро́бия навы́к Бо́жия, пору́чник яви́лся еси́ спасе́ния ка́ющимся те́пле и вседу́шно Го́споду зову́щим: благослове́н Бо́г оте́ц на́ших.

Управля́еши, Златоу́сте, уче́нии твои́ми вся́кую мы́сль, и душе́вныя врачу́еши не́мощи, я́ко сострада́тельнейший, и благотеку́щим спое́ши, веселя́ся: благослове́н Бо́г оте́ц на́ших.

Возвы́сился еси́, бы́в избра́н, преподо́бен, незло́бив, свяще́нник Высоча́йшаго, пра́вдою оде́ян све́тло и весе́лием, зовы́й, всебога́те: благослове́н Бо́г оте́ц на́ших.

Богоро́дичен: Зачала́ еси́, Пречи́стая, Су́щаго над все́ми Бо́га и Го́спода, благоволи́вшаго спасти́ челове́ческий ро́д от тле́ния и сме́рти. Его́же, досто́йно пою́ще, зове́м: благослове́н Бо́г оте́ц на́ших.

Пе́снь 8.
Ирмо́с: Седмери́цею пе́щь халде́йский мучи́тель Богочести́вым неи́стовно разжже́, си́лою же лу́чшею спасе́ны, сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

И́же разу́мно словесе́м твои́м бесе́дующе, Златоу́сте, Богосло́вия честно́му у́чимся, и всепло́дствуем благи́х поле́зное, и зло́бы отбега́ем вре́да: о́бщий бо строи́тель спасе́ния бы́л еси́, вопия́: превозноси́те Христа́ во ве́ки.

За ны́ моли́ Влады́ку, Златоу́сте, сострада́тельнейшее дерзнове́ние име́я и ми́лостивною и человеколю́бною твое́ю, о́тче, любо́вию: тя́ бо ко Спа́су предлага́ем, ве́рнии, хода́тая же, и предста́теля, и тепле́йша моли́твенника, Богому́дре иера́рше, всеблаже́нне Иоа́нне.

Ю́ношское противле́ние, и непрекло́нное мудрова́ние, и ца́рствующих непра́вду обличи́л еси́, те́пле предста́тельствуя оби́димыя, преподо́бне; и сиро́т, и вдо́в, и ни́щих оте́ц бы́л еси́ любо́вным предложе́нием, превозноси́те, вопия́, Христа́ во ве́ки.

Богоро́дичен: Теле́сными образова́нии, и разли́чными гада́нии, и символи́ческими, и знамена́тельными предъявле́ньми, Твое́ провозвести́ша Богоглаго́ливии рождество́, преесте́ственное и чу́дное, Де́во; те́м Тя́, веселя́щеся, благоче́стно воспева́ем, Христа́ превознося́ще во вся́ ве́ки.

Пе́снь 9.
Ирмо́с: Ужасе́ся о се́м Не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее Небе́с: те́м Тя́, Богоро́дицу, А́нгелов и челове́к чинонача́лия велича́ют.

И́стинно наслажда́яся, о́тче, жи́зни, о не́йже подвиза́лся еси́, ели́ко мо́щно, на земли́ житие́м преизя́ществовав А́нгельским и Христо́в стяжа́в язы́к и уста́ ти́хая: спасти́ся, Богоглаго́ливе, моли́ тя́ ве́рою изя́щне блажа́щим.

Словеса́ твоя́, треблаже́нне, словеса́ жи́зни, жи́знь хода́тайствующая неконе́чную: тя́ бо исто́чника теку́ща показа́ Христо́с и реку́, пролива́ющу Боже́ственных пото́ки уче́ний, сла́дости и́стинно пото́к, оставле́ния же струю́ и покая́ния све́тла пропове́дника.

Хода́тай яви́лся еси́, священнонача́льниче, Бо́га и челове́ков пресве́тлый, ты́ бо свети́льник яви́лся еси́ благоче́стия Богосве́тлый и Боже́ственнаго зна́ния и ми́лостыни наказа́тель: те́м тя́, златосло́ве, серде́чною любо́вию ны́не досто́йно велича́ем.

Богоро́дичен: Чи́стая препросла́вленная Ма́ти Бо́жия, пою́щия Тя́ любо́вию спаса́й, искуше́ний молву́ разреша́ющи ми́лостивно. Я́ко бо Бо́га ро́ждши, вся́, ели́ко хо́щеши, соверша́еши, успева́еши невозбра́нно и мо́жеши, Де́во. Те́м Тя́ вси́ велича́ем.

Свети́лен.
Златоза́рными словесы́ твои́ми Христо́ва Це́рковь светле́ется я́сно, о Златоу́сте о́тче! Ду́ши же веселя́тся ве́рных, почита́ющия всесвяту́ю твою́ па́мять, ты́ бо все́м показа́лся еси́ покая́ния наста́вник и во́ждь спасе́ния.

Канон святителю Иоанну Златоустому (второй)
Припев: Святи́телю о́тче Иоа́нне, моли́ Бо́га о на́с.
Память: 09 февраля (27 января ст. ст.); 27 сентября (14 сентября ст. ст.); 26 ноября (13 ноября ст. ст.)
Глас 6.


Пе́снь 1.
Ирмо́с: Се́ченое сече́тся мо́ре Чермно́е, волнопита́емая же изсуша́ется глубина́, та́яжде ку́пно безору́жным бы́вши проходи́ма, и всеору́жным гро́б. Пе́снь же богокра́сная воспева́шеся: сла́вно просла́вися Христо́с, Бо́г на́ш.

Невече́рния, преподо́бне, зари́ исполня́емь, и престо́лу Боже́ственному предстоя́ при́сно со все́ми избра́нными, на́м, ве́рно чту́щим тя́ и боже́ственное твое́ соверша́ющим возвраще́ние, дарова́ти моли́ ми́р и ве́лию ми́лость.

Земля́ лику́ет, и не́бо с челове́ки ра́дуется, с на́ми боголе́пно в твое́м, му́дре, святе́м пра́зднице, в не́мже свяще́нное твое́ те́ло возврати́ся к твоему́ ста́ду, сла́вне Златоу́сте, Ду́ха честно́е жили́ще.

Ума́ твоего́ боже́ственная, блаже́нне, блиста́ния многоко́зненный не терпя́, искуше́ния воздвиза́ет на тя́, я́коже дре́вле на И́ова, но у́бо омрачи́ся мно́жае: се́ бо по заточе́нии светле́йший в па́ству твою́ вше́л еси́.

Всезлаты́ми словесы́ твои́ми помышле́ния, Златосло́ве, позлати́л еси́ ве́рных и, заточе́н бы́в от ста́да зави́стно, Бо́жиим же манове́нием па́ки к сему́ по погребе́нии возврати́лся еси́, све́тло восхваля́емь, всеблаже́нне Златоу́сте.

Богоро́дичен: Святе́йши яви́лася еси́ херуви́мов, Пресвята́го ро́ждши Бо́га: Его́же моли́, я́ко все́х Творца́, Чи́стая, освяти́ти вся́, святы́ми Тя́ гла́сы ублажа́ющия, отце́в похвало́, челове́ков по́моще.

Пе́снь 3.
Ирмо́с: Госпо́дь, Сы́й, все́х и Зижди́тель Бо́г, созда́нное, Безстра́стный, обнища́в, Себе́ соедини́, и Па́сха, за я́же хотя́ше умре́ти, Са́м Сы́й Себе́ предпожре́, — яди́те, — вопия́, — Те́ло Мое́ и ве́рою утверди́теся.

Бы́л еси́ прия́телище Бо́жие чи́стое и догма́тов испыта́л еси́ глубину́, блаже́нне Златоу́сте, зломы́слящих потопля́я умы́, ве́рных же напая́я сердца́, те́мже честно́е твое́ дне́сь пра́зднуем возвраще́ние.

Златы́й орга́н, возглаша́ющий на́м неизрече́нная, бы́л еси́ ты́, блаже́нне Златоу́сте, сего́ ра́ди пое́м тя́ ве́рно в возвраще́ние твои́х моще́й, а́нгеле Бо́жий земны́й и челове́че небе́сный.

Глаго́лы жи́зни отры́гнул еси́ ве́рным и, непра́ведно зави́ден бы́в, всеблаже́нне, в да́льная заточе́н бы́сть изгна́ния и в ско́рби мно́ги, но вседе́тельным манове́нием па́ки по кончи́не, преподо́бне, твоему́ ста́ду подава́ешися.

Богоро́дичен: Высоту́ неизрече́ннаго и глубину́ Твоего́ Рождества́ кто́ сказа́ти и́мать, Отрокови́це? Бо́га бо родила́ еси́ па́че сло́ва и ума́ всего́, изба́вльшаго от тли́ челове́ки. Те́мже по до́лгу, вси́ ве́рнии, Тя́ блажи́м.

Седа́лен, гла́с 8.
Ю́же с высоты́ му́дрость уве́дев и благода́ть слове́с от Бо́га, все́м просия́л еси́, я́ко зла́то в горни́ле, и Святу́ю Тро́ицу во Еди́нстве пропове́дал еси́, сребролю́бную ле́сть устрели́в словесы́ твои́ми. Те́мже и ре́вностию цари́цу обличи́в, А́риево посрами́л еси́ иноплеме́нное мудрова́ние. Иоа́нне Златоу́сте, моли́ Христа́ Бо́га прегреше́ний оставле́ние дарова́ти пра́зднующим любо́вию святу́ю па́мять твою́.

Богоро́дичен: От Тро́ицы Еди́наго преесте́ственно заче́нши, Де́во, и чу́дно Сего́ породила́ еси́ па́че сло́ва и мы́сли, и о́бщно Боже́ственнаго естества́ устро́ила еси́ челове́ческое естество́, дре́вле изгна́нное. Те́мже, соше́дшеся, Рождество́м Твои́м вси́ спа́сшиися, Всенепоро́чная, Твои́м словесе́м после́дующе, до́лжно Тя́ ублажа́ем, моля́ще Христа́ Бо́га прегреше́ний оставле́ние дарова́ти ве́рою Тя́ сла́вящим, Ма́терь Его́.

Пе́снь 4.
Ирмо́с: Прови́дев проро́к та́йну Твою́ неизрече́нную, Христе́, провозгласи́: положи́л еси́ тве́рдую любо́вь кре́пости, О́тче Ще́дрый, Единоро́днаго бо Сы́на, Благи́й, очище́ние в ми́р посла́л еси́.

Уста́ огнедохнове́нная и язы́к стяжа́в, о́тче преподо́бне, писа́ния я́сность разшири́л еси́ я́ве и у́мерл еси́ в непра́веднем заточе́нии. Дне́сь на́м блаже́нное подаде́ся, я́ко да́р, те́ло твое́.

Сказа́тель неизглаго́ланных да возвели́чится ны́не Златоу́стый: се́ бо по вре́менней сме́рти до́бре Бо́жиим манове́нием па́ки прихо́дит к Ца́рскому гра́ду, свяще́нно пе́сньми Боже́ственными честву́емь.

Ум, облиста́емь заре́ю Всесвята́го Ду́ха, име́я, просвеща́еши подсо́лнечную Боже́ственными уче́нии и тму́ отго́ниши нече́стия, о́тче свяще́нне Златоу́сте, святы́х а́нгелов собесе́дниче.

Блаже́н яви́лся еси́ пра́вды ра́ди, преподо́бне, от па́ствы отгна́н за́вистию лука́вою, и ны́не же возвраща́яся, и от все́х пе́сньми свяще́нными почита́емь му́дре, святи́телю Госпо́день Златоу́сте.

Богоро́дичен: Из Тебе́, Де́во, спасе́ние ми́ру прии́де и яви́ся, из Тебе́ избавле́ние возсия́, Христо́с: те́м Тя́ по до́лгу песносло́вим, все́х свяще́нных похвало́, Чи́стая, и ве́рных свяще́нное очисти́лище.

Пе́снь 5.
Ирмо́с: Сою́зом любве́ связу́еми, апо́столи, влады́чествующему все́ми себе́ Христу́ возло́жше, кра́сны но́ги очища́ху, благовеству́юще все́м ми́р.

Свети́льник яви́лся еси́ все́м, сия́я в нощи́ жития́ су́щим, облиста́я лучи́ Боже́ственных слове́с, о́тче Златоу́сте, и озаря́я помышле́ния на́ша. Те́мже по до́лгу тя́ песносло́вим.

Бога́тство слове́с разда́л еси́, обогати́в смы́слы, преподо́бне, а́лчущия, Златоглаго́ливе, и, непра́ведно заточе́н, судо́м пра́ведным па́ки возврати́лся еси́ к твоему́ ста́ду, ра́дующуся твои́ми вели́чии.

Я́коже розга́ многопло́дна, умиле́ния вино́ прине́сл еси́ и, цари́цу облича́я, виногра́д вдови́цы восхи́тившую, заточе́н бы́л еси́, о́тче Златоу́сте. Те́мже возвраще́ние твое́ честву́ем.

Богоро́дичен: Во́инства безпло́тных Его́же не мо́гут ви́дети, Влады́чице, во объя́тиих Твои́х я́ко Младе́нца вмести́вшася, в Тебе́ носи́ла еси́ за благоутро́бие пло́тию обнища́вша, я́ко да обнища́вший ми́р обогати́т.

Пе́снь 6.
Ирмо́с: Бе́здна после́дняя грехо́в обы́де мя́, и, волне́ния не ктому́ терпя́, я́ко Ио́на Влады́це, вопию́ Ти: от тли́ мя возведи́.

Источи́ язы́к тво́й, всеблаже́нне Златоу́сте, струи́ всезлаты́я Це́ркви и а́лчущая сердца́ обогаща́ет, свяще́нно сла́вящая тя́.

Честна́, всеблаже́нне, сме́рть твоя́ пред Бо́гом яви́ся на́шим, в не́йже сла́вится па́ки прише́ствием твои́м, о́тче, ко престо́лу твоему́, Златоу́сте.

Блаже́н гро́б, и́же честно́е твое́ содержи́т те́ло, я́ко обогаща́я чудоде́йствии притека́ющия ве́рою, всеблаже́нне, святи́телю Златоу́сте.

Богоро́дичен: Высоча́йшаго ро́ждши, Пресвята́я Богоневе́сто, до́ле лежа́щее естество́ на́ше к небеси́ возво́диши, те́мже тя́ по до́лгу сла́вим.

Конда́к, гла́с 1.
Возвесели́ся та́инственно честна́я Це́рковь возвраще́нием честны́х твои́х моще́й, и, сия́ сокры́вши, я́ко зла́то многоце́нное, пою́щим тя́ неоску́дно подава́ет моли́твами твои́ми исцеле́ний благода́ть, Иоа́нне Златоу́сте.

И́кос:
Свеща́ де́л мои́х дряхла́ бы́сть, Иоа́нне Златоу́сте, и ужаса́юся к сре́тению свяще́нных твои́х моще́й, но ты́ са́м наста́ви мя́ и стези́ моя́ испра́ви, покая́ния подая́ ми́ вре́мя, всесвя́те, я́ко Того́ еси́ пропове́дник Боже́ственный, и страсте́й мои́х многови́дных ути́ши бу́рю и, от се́тей велиа́ровых исхи́тив мя́, в коне́ц спаси́ мя́, я́ко да пою́ твое́ досто́йне сла́вное возвраще́ние, я́ко пре́жде и успе́ние дерзну́в просла́вих, Иоа́нне Златоу́сте.

Пе́снь 7.
Ирмо́с: О́троцы в Вавило́не пе́щнаго пла́мене не убоя́шася, но, посреде́ пла́мене вве́ржени, ороша́еми, поя́ху: благослове́н еси́, Го́споди, Бо́же оте́ц на́ших.

Чудоде́йствии сия́я, богосло́вием украша́яся златоза́рным, му́дре, заточе́нием лю́тым преда́лся еси́; от ни́хже возвраща́яся, от все́х просла́вился еси́.

Изсека́еши коре́ния зло́бы секи́рою Боже́ственных уче́ний твои́х и насажда́еши душа́м Боже́ственное зна́ние, святи́телю Златоу́сте. Те́м твои́х возвраще́ние моще́й прославля́ем.

Преподо́бне, возврати́вся, разстоя́щаяся умири́л еси́ и положи́лся еси́ в хра́ме прему́дрых апо́столов, Златоу́сте, и́хже честно́ю обогати́лся еси́ вла́стию, всехва́льне.

Богоро́дичен: Пресу́щественныя Тро́ицы Еди́наго родила́ еси́, Всечи́стая, Иису́са Христа́, Его́же моли́ премно́гая моя́ прегреше́ния за милосе́рдие неизрече́нное прости́ти, Всенепоро́чная.

Пе́снь 8.
Ирмо́с: За зако́ны оте́ческия блаже́ннии в Вавило́не ю́ноши, предбе́дствующе, царю́ющаго оплева́ша повеле́ние безу́мное и, совоку́плени, и́мже не свари́шася огне́м, Держа́вствующему досто́йную воспева́ху пе́снь: Го́спода по́йте, дела́, и превозноси́те во вся́ ве́ки.

Реши́ти же и вяза́ти, преподо́бне, име́я вла́сть, вся́ разреши́ прегреше́ния Боже́ственное твое́ возвраще́ние све́тло пра́зднующих и Ца́рствия сподо́битися небе́снаго умоли́ пою́щим во умиле́нии се́рдца: Го́спода по́йте, дела́, и превозноси́те во вся́ ве́ки.

В заточе́нии претерпе́л еси́, о́тче богому́дре, боле́зни, в не́мже прие́мь блаже́нную, Златоу́сте, и сла́вную кончи́ну, хоте́нием Боже́ственным па́ки возвраща́ешися к твоему́ Боже́ственному престо́лу, честву́емь от пою́щих: Го́спода по́йте, дела́, и превозноси́те во вся́ ве́ки.

Глаго́лов стре́лы терпе́ти, преподо́бне, твои́х не моги́й, зми́й льсти́вый испроша́ет искуси́ти тя́, я́коже Иова до́бляго, но побежде́н бы́сть твои́м Христа́ ра́ди терпе́нием, вели́к я́влься сме́х тебе́, ве́рою песнопою́щу: Го́спода по́йте, дела́, и превозноси́те во вся́ ве́ки.

Тро́ичен: Безнача́льне О́тче, и Собезнача́льне Сы́не, и Боже́ственный Ду́ше, Тро́ице Неразде́льная, еди́но естество́, еди́на си́ла и еди́на вла́сть, Тя́ пою́щия испо́лни вся́ких бла́г и муче́ния изба́ви непреста́нно пою́щия: Го́спода по́йте, дела́, и превозноси́те во вся́ ве́ки.

Богоро́дичен: Разуме́ти не мо́жет у́м челове́ческий е́же па́че ума́ и сло́ва, Отрокови́це, та́инство неизрече́ннаго Твоего́ рождества́: Бо́г бо Плотоно́сец из Тебе́ яви́ся, спаса́я па́дшия во тлю́ и на пе́рвое досто́инство возводя́ пою́щия: Го́спода по́йте, дела́, и превозноси́те во вся́ ве́ки.

Пе́снь 9.
Ирмо́с: Недоуме́ет вся́к язы́к благохвали́ти по достоя́нию, изумева́ет же у́м и преми́рный пе́ти Тя́, Богоро́дице: оба́че Блага́я су́щи, ве́ру приими́, и́бо любо́вь ве́си Боже́ственную на́шу, Ты́ бо христиа́н еси́ Предста́тельница, Тя́ велича́ем.

Свяще́нства бы́л еси́ пра́вило, богоглаго́ливе, оде́ян пра́вдою, я́коже боже́ственною оде́ждею, и обогати́в словесы́ твои́ми Це́рковь, и писа́ния обнажи́в у́м духо́вно. Те́мже твое́ возвраще́ние, о́тче, торжеству́ем.

Красе́н, я́коже сла́вий, о́тче, яви́лся еси́, боже́ственную ве́сну покая́ния сказу́я зиме́ грехо́вней рабо́тающим; заточе́н же бы́в наве́том льсти́ваго, му́дре, па́ки притека́еши, ра́дуяся, к жела́ющему тя́ ста́ду, блаже́нне Златоу́сте.

Игра́ют дне́сь все́х сердца́, зря́ще чи́стаго тя́, преподо́бне, жениха́, твое́й неве́сте Це́ркви подае́ма благода́тию, и Да́теля благи́х пою́т непреста́нными гла́сы, тебе́ же восхваля́ют досто́йно и ублажа́ют.

Прии́де свети́льник на све́щнице положи́тися от Кома́н, приспе́ украше́ние Бо́жия Це́ркве, воспо́йте Го́споду, по́йте с весе́лием, и, сре́тение творя́ще ему́ духо́вное, вси́ возопии́м: о́тче, моли́твами твои́ми спаси́ на́с.

Богоро́дичен: Светле́йшими, Отрокови́це, блиста́нии Ро́ждшагося из Тебе́ неизрече́нно просвети́, Свята́я Богоро́дице, ду́шу мою́, вся́цеми преступле́ньми, Всечи́стая, омраче́нную и не хотя́щую сотвори́ти до́брое, я́ко да непреста́нно возвеща́ю вели́чия Твоя́.

Свети́лен.
Ра́дуйся, гра́де градо́в все́х Ца́рствующий, я́ко до́браго твоего́ па́стыря и пастыренача́льника те́ло восприе́мый дне́сь, тя́ и ми́р ве́сь пра́вяща и спаса́юща медото́чными Златоу́стаго, и восплеща́й пе́сньми.

Богоро́дичен: Ра́дуйся, Бо́жия пала́то, ра́дуйся, горо́ присе́нная; ра́дуйся, неопали́мая купино́, ра́дуйся, престо́ле сла́вы; ра́дуйся, Боже́ственная трапе́зо, ра́дуйся, ста́мно всезлата́я; ра́дуйся, свети́льниче всесве́тлый, ра́дуйся, ле́гкий о́блаче, Де́во Ма́ти Мари́е.

Канон святителю Иоанну Златоустому (третий)
Припев: Святи́телю о́тче Иоа́нне, моли́ Бо́га о на́с.
Память: 09 февраля (27 января ст. ст.); 27 сентября (14 сентября ст. ст.); 26 ноября (13 ноября ст. ст.)
Глас 2


Пе́снь 1.
Ирмо́с: Во́ды дре́вле, ма́нием Боже́ственным, во еди́но со́нмище совокупи́вый, и раздели́вый мо́ре Изра́ильтеским лю́дем, Се́й Бо́г на́ш, препросла́влен е́сть, Тому́ Еди́ному пои́м, я́ко просла́вися.

Боговеща́нная уста́, златогла́сный орга́не, све́тлостию слове́с мо́й просвети́ мольба́ми твои́ми у́м, я́ко да воспою́ возвраще́ния твоего́ па́мять, Иоа́нне, благода́ти Боже́ственныя тезоиме́нне.

Я́ко звезда́ светоно́сна, я́ко просвеща́ющее челове́ки со́лнце, я́ко свети́ло благоче́стия, под зе́млю заше́д, преподо́бне, зако́ны есте́ственными, па́ки возсия́л еси́ на́м, ча́дом твои́м, посыла́я чуде́с оби́льная озаре́ния.

Златоглаго́ливым твои́м язы́ком уче́ний испо́лнил еси́ всю́ подсо́лнечную и златы́ми у́ды исцеле́ний зари́ все́м облиста́л еси́, страда́ний тме́ исче́знути творя́, преподо́бне, возвраще́нием твои́м.

Богоро́дичен: Вити́йствуя Боже́ственная, еди́нственную Ипоста́сь сказа́л еси́, Сло́во, а́ще и сугу́б бе́, из Пречи́стыя проше́дый, пло́ть прие́м, Ю́же благослови́м непреста́нно и ве́рно сла́вим, боже́ственный Златоу́сте.

Пе́снь 3.
Ирмо́с: И́же от не су́щих вся́ приведы́й, Сло́вом созида́емая, соверша́емая Ду́хом, Вседержи́телю Вы́шний, в любви́ Твое́й утверди́ мене́.

В заточе́ния тя́ сокры́ верте́пех, свети́льника всесве́тлаго, цари́ца осле́пшая; Христо́с же на высоча́йшем тя́ све́щнице, и па́ки возвра́щь, поставля́ет.

Иска́пая струи́ чуде́с и ре́ки пролива́я врачева́ний, возврати́лся еси́, Златоу́сте, ве́рно честву́ющим возвраще́ния твоего́ па́мять, Иоа́нне.

Златоте́чный Ни́л наводня́яй в словесе́х же и чудесе́х возврати́ся; да стеце́мся и ве́рно почерпе́м оби́льно вси́, во все́х да насы́тимся.

Богоро́дичен: Земно́е естество́ не мо́жет Тя́ воспе́ти, Ю́же а́нгели пою́т, я́ко Бо́га пло́тию роди́вшую: оба́че ве́рно, раби́ Твои́, дерза́ем пе́ти Тя́ и сла́вити.

Седа́лен, гла́с 8.
Ю́же с высоты́ му́дрость уве́дев и благода́ть слове́с от Бо́га, все́м просия́л еси́, я́ко зла́то в горни́ле, и Святу́ю Тро́ицу во Еди́нстве пропове́дал еси́, сребролю́бную ле́сть устрели́в словесы́ твои́ми. Те́мже и ре́вностию цари́цу обличи́в, А́риево посрами́л еси́ иноплеме́нное мудрова́ние. Иоа́нне Златоу́сте, моли́ Христа́ Бо́га прегреше́ний оставле́ние дарова́ти пра́зднующим любо́вию святу́ю па́мять твою́.

Богоро́дичен: От Тро́ицы Еди́наго преесте́ственно заче́нши, Де́во, и чу́дно Сего́ породила́ еси́ па́че сло́ва и мы́сли, и о́бщно Боже́ственнаго естества́ устро́ила еси́ челове́ческое естество́, дре́вле изгна́нное. Те́мже, соше́дшеся, Рождество́м Твои́м вси́ спа́сшиися, Всенепоро́чная, Твои́м словесе́м после́дующе, до́лжно Тя́ ублажа́ем, моля́ще Христа́ Бо́га прегреше́ний оставле́ние дарова́ти ве́рою Тя́ сла́вящим, Ма́терь Его́.

Пе́снь 4.
Ирмо́с: Положи́л еси́ к на́м тве́рдую любо́вь, Го́споди: Единоро́днаго бо Твоего́ Сы́на за ны́ на сме́рть да́л еси́. Те́мже Ти́ зове́м, благодаря́ще: сла́ва си́ле Твое́й, Го́споди.

Слове́с рачи́телие, слове́с вели́каго украси́теля словесы́ свяще́нными, ра́достне па́ки возвраща́ющася, прииди́те, да почита́ем, словеса́ суему́дренная прему́дростию слове́с буесло́вившей обличи́вшаго.

Обогати́вый на́с уче́ний бога́тством, Златоу́сте, ру́ку же востяга́еши, тя́жестно лихоима́ния бога́тством отягча́вшую, облича́яй явле́ннейше и со еди́нем то́кмо бога́тством Боже́ственныя благода́ти.

Лу́к си́льных лю́тости мучи́тельския сокруши́ся, ты́ же, в не́мощи пло́ти а́нгельски пожи́в, превозмо́гл еси́, моле́бники, Златоу́сте, су́щия пре́жде гони́тели, име́яй, свяще́ннейше.

Богоро́дичен: Чи́ни у́мнии песнопе́нии Тя́ хва́лят, Отрокови́це: Его́же бо не мо́гут зре́ти, из чи́стыя утро́бы Твоея́ породила́ еси́, пло́ть восприе́мша неизме́нно, Всечи́стая Богоневе́сто.

Пе́снь 5.
Ирмо́с: К Тебе́ у́тренюю, все́х Творцу́, преиму́щему вся́к у́м ми́рови: зане́ све́т повеле́ния Твоя́, в ни́хже наста́ви мя́.

Я́коже весна́, яви́лся еси́, благоуха́я та́инственне цве́ты благода́тей ве́рных мно́жества, разреша́я злы́х зи́му, о́тче, в возвраще́нии твое́м.

Боже́ственная струя́, исто́чник дарова́ний возврати́ся: жа́ждущии, прии́дите, во́ду жи́зни почерпи́те ве́рою, боже́ственне веселя́щеся.

Заше́д, сокры́лся еси́, увы́ мне́! добро́та моя́, но возврати́лся еси́ мне́, вожделе́нне, во вре́мя свое́, — Христо́ва Це́рковь вопие́т ти́ возврати́вшемуся.

Богоро́дичен: Ми́лостива мне́ сотвори́ проше́дшаго из Твоея́ утро́бы, Всенепоро́чная, Плотоно́сца Сло́ва, Его́же в хра́ме Симео́н на руку́ держа́, я́ко Созда́теля велича́ше.

Пе́снь 6.
Ирмо́с: Бе́здна после́дняя грехо́в обы́де мя́, и исчеза́ет ду́х мо́й, но простры́й, Влады́ко, высо́кую Твою́ мы́шцу, я́ко Петра́, мя, Упра́вителю, спаси́.

Отсека́ет тя́ от Це́ркве Христо́вы безу́мная цари́ца, свире́по облича́ющая, но а́бие сама́ отсека́ется, ты́ же облича́еши ю́ и по сме́рти, чуде́сное пресече́ние соде́лавый.

Орга́н показа́лся еси́ Вседе́тельнаго, Златоу́сте, Ду́ха, зело́ благосли́чнейше глася́щий; глуха́ же быва́ет мучи́тельница, я́коже а́спида проте́к обава́нием, и зело́ окая́нною возмеря́ется е́й сме́ртию.

Ме́ртвости, а́ще и у́мре, не пострада́ти ему́ я́ве научи́ цари́ Златоу́стый. Те́х бо повеле́нием не повину́вся пре́жде, на моле́ния же те́х возврати́ся пото́м.

Богоро́дичен: Еди́наго Тя́, су́щаго от Де́вы, помышля́я, а́ще и пло́ть прия́л еси́, и сугу́б бы́л еси́, дале́че отрази́ и сече́ние, и сли́тие Златоу́стый Иоа́нн, Богочелове́че Иису́се.

Конда́к, гла́с 1.
Возвесели́ся та́инственно честна́я Це́рковь возвраще́нием честны́х твои́х моще́й, и, сия́ сокры́вши, я́ко зла́то многоце́нное, пою́щим тя́ неоску́дно подава́ет моли́твами твои́ми исцеле́ний благода́ть, Иоа́нне Златоу́сте.

И́кос:
Свеща́ де́л мои́х дряхла́ бы́сть, Иоа́нне Златоу́сте, и ужаса́юся к сре́тению свяще́нных твои́х моще́й, но ты́ са́м наста́ви мя́ и стези́ моя́ испра́ви, покая́ния подая́ ми́ вре́мя, всесвя́те, я́ко Того́ еси́ пропове́дник Боже́ственный, и страсте́й мои́х многови́дных ути́ши бу́рю и, от се́тей велиа́ровых исхи́тив мя́, в коне́ц спаси́ мя́, я́ко да пою́ твое́ досто́йне сла́вное возвраще́ние, я́ко пре́жде и успе́ние дерзну́в просла́вих, Иоа́нне Златоу́сте.

Пе́снь 7.
Ирмо́с: Я́коже дре́вле благочести́выя три́ о́троки ороси́л еси́ в пла́мени халде́йстем, све́тлым Божества́ огне́м и на́с озари́, — благослове́н еси́, — взыва́ющия, — Бо́же оте́ц на́ших.

Чу́жду сотвори́ти вдови́цу, прему́дре, непроще́нну бы́ти пове́дающа от свои́х е́й, чу́жда тя́ твори́т от ца́рствующаго гра́да вседе́рзая жена́, чу́жда быва́ет и сама́ Боже́ственныя благода́ти, отчужди́вшая себе́ от прему́дрых уче́ний твои́х.

Но возврати́лся еси́ сла́достен, я́коже со́лнце, о́блаки покры́то бы́вшее, зело́ велича́йший свети́льниче, светоно́сных та́йным светозаре́нием златы́х уче́ний твои́х просвети́вшимся все́м, Иоа́нне Златоу́сте.

Простира́ю ти́ дла́ни моя́, Златоу́сте, вну́трь огра́д мои́х тя́ прия́ти, невестово́дца, возвраща́ющася све́тле, зело́ любе́зна, я́ко ле́ты закосне́вшаго, — Це́рковь вопие́т ти́, пра́зднующи дне́сь.

Богоро́дичен: Я́ко та́йная клеща́ не́кая, Угль нося́щая мы́сленный, гряде́ши ко хра́му, Его́же, Симео́н просвети́ся, на ру́це, Пречи́стая, прие́м, и о зна́мениих стра́сти Его́ проро́чествовати и́мать зело́ ясне́йше.

Пе́снь 8.
Ирмо́с: Нестерпи́мому огню́ соедини́вшеся, богоче́стия предстоя́ще, ю́ноши, пла́менем же неврежде́ни, Боже́ственную пе́снь поя́ху: благослови́те, вся́ дела́ Госпо́дня Го́спода, и превозноси́те во вся́ ве́ки.

Сосца́ми благоче́стия, о́тче преподо́бне, воспита́вшую тя́ пита́еши Це́рковь, отдая́ седмокра́тным хле́бом Боже́ственныя благода́ти, твою́, пита́телю, сла́дость пролива́я, я́ко питие́ же врачева́ний, всеблаже́нне Златоу́сте.

Во всю́ зе́млю произы́де, о́тче, веща́ние твои́х догма́тов, безу́мная же цари́ца тя́ изгна́ти ме́стне повеле́, но солга́ся: ты́ бо, я́ко исполи́н высокоте́чен, везде́ осиява́еши слове́с твои́х луча́ми.

Да просвети́тся дне́сь сосло́вие ве́рных, с весе́лием срета́юще преизря́днейшаго учи́телей: прии́де бо и теле́сне настои́т, раздая́ все́м благода́ть оби́льную, ея́же да наслади́мся, ра́дующеся бога́тно.

Богоро́дичен: Зрю́ Тя на рука́х Ма́терских, ве́м же Тя́ непристу́пна Божества́ естество́м. Ка́ко у́бо, Сло́ве, рука́ми держи́мь еси́, И́же в руце́ всю́ тва́рь и́маши? — рече́ Симео́н, Богочелове́че, неизрече́нную Твою́ сла́вя си́лу.

Пе́снь 9.
Ирмо́с: Но́вое чу́до и боголе́пное! Деви́ческую бо две́рь затворе́нную я́ве прохо́дит Госпо́дь, на́г во вхо́де, и Плотоно́сец яви́ся во исхо́де Бо́г, и пребыва́ет две́рь затворе́на. Сию́ неизрече́нно я́ко Богома́терь велича́ем.

Во́инство а́нгелов, собо́р проро́ков, апо́столов же и му́чеников боже́ственный ли́к с на́ми веселя́тся све́тло, сообща́ющеся пра́зднику, всеблаже́нне, и пе́ний твои́х свою́ непщу́юще благода́ть: все́х бо име́л еси́ в себе́, житие́ изобража́я.

Се́ ми́ра возсия́ све́т, превысо́кая яви́ся в не́м Боже́ственная свеща́, сладкотво́рная пучи́на Боже́ственных даро́в. Да напита́емся, прииди́те, све́та, бра́тие, да согре́емся, да почерпе́м, от се́рдца пе́сньми вси́ златоглаго́ливаго велича́юще.

Я́ко две́ ца́те, тебе́ пе́ние сие́ от недосто́йныя и окая́нныя души́ моея́, от вся́ких у́бо благи́х окая́нне вдо́вствующия, от усе́рдия же Боже́ственнаго бога́тства принося́щия сие́, бла́гости подража́нием Боже́ственныя приими́, благода́ть проти́ву воздая́ ми богатода́рную.

Богоро́дичен: Ступа́я, трясу́ся, — рече́ Симео́н, — колеба́тися же Творя́щаго свы́ше призира́нием то́кмо все́й земли́, держа́ на руку́, укрепля́емь е́смь, Твое́ рожде́ние, Де́во, от трясу́щияся уже́ пло́ти отпуща́емь, извеще́нию хотя́щих ми́ бы́ти уже́ сбыва́ющуся, ра́дуяся, ношу́, и су́щим во а́де избавле́ние благовеству́я.

Свети́лен.
Ра́дуйся, гра́де градо́в все́х Ца́рствующий, я́ко до́браго твоего́ па́стыря и пастыренача́льника те́ло восприе́мый дне́сь, тя́ и ми́р ве́сь пра́вяща и спаса́юща медото́чными Златоу́стаго, и восплеща́й пе́сньми.

Богоро́дичен: Ра́дуйся, Бо́жия пала́то, ра́дуйся, горо́ присе́нная; ра́дуйся, неопали́мая купино́, ра́дуйся, престо́ле сла́вы; ра́дуйся, Боже́ственная трапе́зо, ра́дуйся, ста́мно всезлата́я; ра́дуйся, свети́льниче всесве́тлый, ра́дуйся, ле́гкий о́блаче, Де́во Ма́ти Мари́е.

Комментарии (1)

Всего: 1 комментарий
  
#1 | Андрей Рыбак »» | 08.02.2019 15:47
  
3
Возбра́нный вождю́ Це́ркве Христо́вы, златослове́сный учи́телю Иоа́нне! От ю́ности доброде́тельми украси́вся, до́бре потруди́лся еси́, и за и́мя Христо́во гоне́ние претерпе́в, во изгна́нии житие́ сконча́л еси́: сего́ ра́ди на небесе́х сугу́бо просла́влен еси́, му́дрый чи́на Церко́внаго устрои́телю. Те́мже и мы́ умиле́нне чти́м тя́, зову́ще:

Ра́дуйся, святи́телю вели́кий Иоа́нне Златоу́сте.
Добавлять комментарии могут только
зарегистрированные пользователи!
 
Имя или номер: Пароль:
Регистрация » Забыли пароль?
© LogoSlovo.ru 2000 - 2024, создание портала - Vinchi Group & MySites
ЧИСТЫЙ ИНТЕРНЕТ - logoSlovo.RU