Акафист и Канон святой благоверной княжне преподобной Евфросинии Суздальской.

Прп. Евфросиния Суздальская.
Акафист святой благоверной княжне преподобной Евфросинии Суздальской
Одобрено: решение Св. Синода 28 января/11 февраля 1872 года №116
Память: 01 октября (18 сентября ст. ст.); 08 октября (25 сентября ст. ст.)
Утвержден для общецерковного использования.


Кондак 1
Избранная от чрева матерня, угоднице Христова княжна Евфросиние, прославляюще прославльшаго тя Христа Господа, хвалебная приносим ти песни, мати преподобная; ты же, яко имущая дерзновение ко Господу, от всяких нас бед свободи, да зовем ти:
Радуйся, Евфросиние, невесто Христова прекрасная.

Икос 1
Ангелов царица и мати Господа, провидящи равноангельное житие твое, услыша молитву святых твоих родителей, и разреши тобою неплодство их, трикратно тем явившися во сне, в знамение твоего избрания, блаженная. Мы же таковое о тебе Божие смотрение прославляюще, взываем ти:
Радуйся, святый плоде, молитвами неплодствовавших испрошенный.
Радуйся, честный даре, Приснодевою безчадствовавшым дарованный.
Радуйся, чудным фимиамом, яко будущее благоуханное селение духа, до зачатия предзнаменованная.
Радуйся, в предосвященном молитвою и Божиим благословением чреве зачатая.
Радуйся, по зачатию, яко чистая голубица, от Пречистыя Девы даемою голубицею предобразованная.
Радуйся, до рождения Царицею неба и земли в служебный лик себе предизбранная.
Радуйся, еяже рождение Богородицею со святыми Антонием и Феодосием яве предвозвещено бысть.
Радуйся, ейже имя, яко имевшей быти верною Богу рабою, Феодулия пронаречено бысть.
Радуйся, рождением своим бывшее свыше обетование оправдавшая.
Радуйся, по рождении абие великое свое предназначение проявившая.
Радуйся, еще в пеленах сущи, пост иноческий державшая.
Радуйся, от сосцу доилицы, егда тая мяса ядаше, николиже млека вкусити хотевшая.
Радуйся, Евфросиние, невесто Христова прекрасная.

Кондак 2
Видяще родители твои, яко услышана бысть молитва их о тебе, блаженная, и чудящеся о явлениих Богоматере, во сне яко яве бывших, слагаху тая в сердце своем; велие же некое о тебе Божие смотрение в тех провидяще, радостно вопияху Богу: Аллилуиа.

Икос 2
Разумети хотя, по рождении твоем, Божие о тебе изволение, боголюбивая мати твоя, молящися усну, и виде себе во сне окриленну, в высоту парящу, и тя отроковицу Богу в руце вдающу; чесо ради Богу тя посвящающи по святом Крещении, вручи тя покрову и заступлению Царицы Небесныя. Мы же таковое предустроение о тебе славяще, хвалебно взываем ти:
Радуйся, по изволению Божию, в дар Богу от рождения определенная.
Радуйся, изначала, яко в небесная парити имущая, предуказанная.
Радуйся, от купели живаго со Христом общения, взыскательницею быти предъявленная.
Радуйся, во святом Крещении во Христа облекшися, христоподражательницею быти назнаменанная.
Радуйся, в троекратном во имя Пресвятыя Троицы погружении, во свете лица Ея пребывати начавшая.
Радуйся, в белы, во образ чистоты, ризы одеянием в чин непорочных вступившая.
Радуйся, с возложением креста на выю, благое иго Христово носити восприявшая.
Радуйся, с препоясанием чресл бодренною подвижницею Христовою быти себе показавшая.
Радуйся, с горящею при купели свещею, в светлый лик благодатно освященных вчиненная.
Радуйся, в троекратном окрест купели хождении, яко обрученная Христу невеста ликовавшая.
Радуйся, в залог вечнаго с Небесным Женихом единения, святым миром запечатленная.
Радуйся, в осуждение всякия скверны греховныя, на всех чувствах знамение дара Духа Святаго приявшая.
Радуйся, Евфросиние, невесто Христова прекрасная.

Кондак 3
Силою свыше управляема, преуспевала еси возрастом и благодатию у Бога и человек; о чесом родители твои и южики радующеся, Богу, из уст младенец хвалу себе совершающему, взываху: Аллилуиа.

Икос 3
Имуще в памяти бывшыя о тебе знамения, и чудящеся необычному в отрочестве разуму твоему, родители твои разсудиша наипаче поучением божественных книг возгревати живущий в тебе дар благодатныя жизни, еже и соверши сам боголюбивый родитель твой святый благоверный князь Михаил. Хвалу воздающе таковому о тебе родителей твоих мудрому попечению, взываем ти:
Радуйся, Премудрости Божией пространное приятелище.
Радуйся, младенцем открываемых таин верное хранилище.
Радуйся, отроковице, млеком слова животнаго воспитанная.
Радуйся, дево, чистыми токи небесных истин напоенная.
Радуйся, теплотою учения родительскаго, огнь любве к Господу в сердце твоем возгревшая.
Радуйся, живыя стремления юности от земных к небесным возведшая.
Радуйся, невесто, отцем по плоти в уневещение Христу Господу руководствованная.
Радуйся, красото, паче всех красных мира, красоты райския любити наученная.
Радуйся, розго Лозы Истинныя, Вертоград Христов измлада украшавшая.
Радуйся, древо, от корене свята плоды благи рано приносити начавшее.
Радуйся, из детства чистотою небесным силам подобившаяся.
Радуйся, во всю жизнь осенением Приснодевы в непорочном девстве сохранившая.
Радуйся, Евфросиние, невесто Христова прекрасная.

Кондак 4
Бурю внутрь имеяху помышлений родители твои, егда приспе время преподавати ти внешняя учения, да не како теми охладится сердце твое к небесным; ведуще же страх Божий и святое житие богомудраго болярина Феодора, того призваша научити тя всякой внешней мудрости, Богу просвещающему умы воспевающе: Аллилуиа.

Икос 4
Слышащи преподаваемая тебе о мире Божием учения, яко пчела, о внешних собирала еси сок, силою действовавшия в тебе благодати сладчайшаго паче меда Господа, в духовный сот превращала еси той, и вся искушающи, добрая точию держала еси. Таковую мудрость твою хваляще, взываем ти:
Радуйся, от видимых тварей к невидимым Божиим возносившаяся.
Радуйся, от красот мира к краснейшему паче всех любовию возгаравшаяся.
Радуйся, созерцанием небес, славу Божию поведающих, к снисканию славы пренебесныя воскрилявшаяся.
Радуйся, от излияния света солнечнаго на злыя и благия, богоподобной любви научавшаяся.
Радуйся, во образе солнца, всевидящее око Божие умным оком своим зрети учившаяся.
Радуйся, в различии славы солнца, луны и звезд, различие небеснаго по делом прославления познававшая.
Радуйся, от воздыханий суете неволею повинувшияся твари, блаженный о гресех плач восприявшая.
Радуйся, в тяготе вещей земных, тяготу грехов проразумевавшая.
Радуйся, стремлением огня горе, горняя мудроствовати научавшаяся.
Радуйся, прехождением образа мира сего, в любви к благом непреходящим утверждавшаяся.
Радуйся, в строении вещей земных, тайны устроения спасения прозревавшая.
Радуйся, яко злато огнем искушаемое, очистительный искушений огнь радостно терпети предначинавшая.
Радуйся, Евфросиние, невесто Христова прекрасная.

Кондак 5
Боготечной звезде, волхвов к Солнцу Правды приведшей иногда, подобящися в дому и княжении родителей твоих, на путь спасения приводила еси всех, на святое житие твое взиравших, и словес данныя тебе премудрости слушавших, иже, тобою просвещаеми, Богу тя умудряющему радостно взываху: Аллилуиа.

Икос 5
Видеша тя умом и красотою паче всех дщерей высокородных славну сынове княжестии, и молением стужиша родителем твоим, пояти тя ищуще; но не получиша желаемаго, Богу лучшее нечто о тебе устрояющу. Мы же о тебе путем Божиим чудящеся, взываем ти:
Радуйся, красотою души, паче неже лепотою тела, всех другинь превосходившая.
Радуйся, святостию жития, паче неже благородством рода, прославившаяся.
Радуйся, славных и прекрасных искателей твоих ни во что же вменившая.
Радуйся, краснейшаго паче всех человек всем сердцем взыскавшая.
Радуйся, к единому жениху Христу тайным сердца желанием влекомая.
Радуйся, Тому, Егоже возлюби душа твоя, невидимым Божиим промышлением блюдомая.
Радуйся, единаго Господа невозвратным помыслом себе избравшая.
Радуйся, умом и сердцем в Нем исчезавшая.
Радуйся, именем Иисуса, паче мира благоуханна, услаждавшаяся.
Радуйся, теплотою любве Христовы, паче солнца светозарна, согревавшаяся.
Радуйся, во еже духовне Христу обручитися достойно себе уготовлявшая.
Радуйся, боголюбезным добронравием, внутрь и вне, богато себе украсити ревновавшая.
Радуйся, Евфросиние, невесто Христова прекрасная.

Кондак 6
Провозвестницы бывше божественнаго о тебе промышления родители твои, тайным Божиим велением влекоми, соизволиша на моление Мины, князя суздальскаго, паче других искателей твоих и родом и делы славна, и на Бога все упование возложше, на брак тя с ним благословиша, воспевающе вся премудре строющему: Аллилуиа.

Икос 6
Возсия свет утешения в души твоей, егда в слезных молитвах поведавши скорби сердца твоего владычице Богородице, о внезапном устроении жизни твоей не по сердцу твоему, услышала еси радостный Тоя глас, волю родителей исполнити тебе повелевавший, и не разоритися обетом и желанием твоим обещавший. Таковое Матери Божией к тебе благоволение славяще, ублажаем тя, вопиюще:
Радуйся, невесто, дивными путьми во объятия Христова наставленная.
Радуйся, дево, матерним Приснодевы попечением руководствованная.
Радуйся, теплым воли родителей повиновением связуемая.
Радуйся, и неизменным желанием девства снедаемая.
Радуйся, таковое в сердце распятие ради Господа претерпевшая.
Радуйся, преданностию воли Божией, яко на кресте себе в жертву Богу принесшая.
Радуйся, любовь ко Господу с покорностию родителем сочетавшая.
Радуйся, уповательным послушанием и честь браку воздавшая, и честнейшее брака девство сохраншая.
Радуйся, на брак ити напутствованная, и в безбрачии пребыти несомненно чаявшая.
Радуйся, на пути во мрак сокровенных о тебе путей Божиих с трепетом воззревавшая.
Радуйся, в приражении недоумений о будущем, на камени упования крепко утвердившаяся.
Радуйся, в данном тебе Богородицею обетовании, яко на лоне матернем упокоевавшаяся.
Радуйся, Евфросиние, невесто Христова прекрасная.

Кондак 7
Хотящу тако Божию вседержительству, князь Мина, еще не доспевшей тебе града Суждаля, предаде дух свой в руце Божии. Ты же от всяких уз земных свободу улучивши, радостно воспела еси славу Богу: Аллилуиа.

Икос 7
Новую показала еси добродетель, блаженная, егда твердое восприяла еси намерение не возвращатися в дом родителей, вселитися же во граде Суждале, во обители положения риз Божия Матере; идеже сокровища своя бедным иждивши, ангельский образ прияла еси. Таковое твое мудрое о себе и спасительно бывшее нам изволение славяще, взываем ти:
Радуйся, во уповании своем не постыжденная.
Радуйся, получением желания своего обрадованная.
Радуйся, от треволнений мира в небурном пристанищи укрывшаяся.
Радуйся, вожделенному тебе лику дев радостно сопричетшаяся.
Радуйся, вся утехи земныя во уметы вменившая.
Радуйся, сокровища вена твоего руками нищих в небесныя сокровищницы предпославшая.
Радуйся, любве ради ко Христу в нищету Его облекшаяся.
Радуйся, всю славу мира иноческим смирением поправшая.
Радуйся, в пострижении иноческом желанием строгаго постничества горевшая.
Радуйся, с принятием иноческаго образа духовное всеоружие восприявшая.
Радуйся, по оставлении мира о едином на потребу точию помышлявшая.
Радуйся, по вселении во обитель черноризиц, духом в общении ангел и святых жити наченшая.
Радуйся, Евфросиние, невесто Христова прекрасная.

Кондак 8
Странно житие восприяла еси во обители, преподобная, смиривши себе паче всех; княжна бо сущи, черноризицам проста рода Христа ради служила еси, поношением Христовым честь рода своего возвеличивши, Богу дивныя подвиги твоя прославльшу, Емуже вопием: Аллилуиа.

Икос 8
Вся в вышних была еси духом, преподобная, и божественною укрепляема благодатию, во всех добродетелех преуспевала еси, образ совершеннаго иноческаго жития всем, сподвизавшымся ти, подавающи. Темже ублажаем тя, всехвальная:
Радуйся, подвигом добрым подвизавшаяся.
Радуйся, чтение свое добре совершившая.
Радуйся, страхом Божиим всякое нечистое желание побеждавшая.
Радуйся, памятию о смерти всякое суетное попечение отгонявшая.
Радуйся, пощении и бдении плоть свою смирявшая.
Радуйся, умным деланием душу свою выну горе восторгавшая.
Радуйся, всегдашним уединением от соблазнов мира чувства своя соблюдавшая.
Радуйся, бодренным трезвением от злых помыслов сердце свое охранявшая.
Радуйся, в молитвах неусыпная, и в чтении Божественных книг ненасытимая.
Радуйся, на всякое послушание скорая, на исполнение же воли своей косная.
Радуйся, терпения, кротости и любве зерцало.
Радуйся, сердечнаго сокрушения, всегдашняго плача и покаяния правило.
Радуйся, Евфросиние, невесто Христова прекрасная.

Кондак 9
Ангелоподобным житием просиявши, жезл настоятельства прияла еси, блаженная, и добре правящи обитель сию молитвою и примером жизни своея, словом научения и устроением чина иноческаго, душы тебе вверенныя к Богу приводила еси, научающи вся пети Ему: Аллилуиа.

Икос 9
Витийствующий язык не может изглаголати мудрости твоея начальственныя, егда дев от вдовиц отделила еси, да не како от взора и речей помыслы о сластех житейских приемше, осквернятся теми в сердце своем, и в добром течении своем запяты будут. Чесо ради дань хвалы тебе приносяще, взываем:
Радуйся, душ боголюбивых мудрая руководительнице.
Радуйся, невест Христовых неусыпная блюстительнице.
Радуйся, в управлении своем простоту с мудростию соединившая.
Радуйся, в начальствовании своем снисхождение с взыскательностью сочетавшая.
Радуйся, строгость власти материнскою любовию умерявшая.
Радуйся, материнскую любовь строгостию власти отрезвлявшая.
Радуйся, мудрыми наставлении добрых в добре утверждавшая.
Радуйся, и единым взором неисправных к исправности подвизавшая.
Радуйся, крепкою молитвою невидимыя стрелы вражеския от обители отражавшая.
Радуйся, мудрыми порядками внешния соблазны мира от сестр отвращавшая.
Радуйся, теплыми попечении земную обитель в рай претворившая.
Радуйся, устроением истиннаго иночества, вход в Царство Небесное всем угладившая.
Радуйся, Евфросиние, невесто Христова прекрасная.

Кондак 10
Спасти хотя тобою душы многих, милосердый Господь многими дары обогати тя, преподобная, чудотворения и пророчества, прозорливости же и слова помазаннаго, имиже прославляющи ущедрившаго тя Господа, подвигла еси пети Ему всех: Аллилуиа.

Икос 10
Стена была еси обители твоей, егда от неистовства Батыева молитвами твоими сохранила еси ю невредиму. Таковое дивное твое заступление поминающе, взываем ти:
Радуйся, трудолюбным Богу служением дерзновение к Нему стяжавшая.
Радуйся, совершенным страстей очищением Божие благоволение к себе привлекшая.
Радуйся, благодатей богоизбранный сосуде.
Радуйся, духа благодвижный органе.
Радуйся, алчущия ведения душы манною Божественных истин питавшая.
Радуйся, благочестивых чувства благоуханием обетований услаждавшая.
Радуйся, недуги душевныя словом действенным врачевавшая.
Радуйся, болезни телесныя именем Иисусовым исцелявшая.
Радуйся, будущая яко настоящая, провидевшая.
Радуйся, дальняя, яко близ сущая зревшая.
Радуйся, помышления сердечная Духом Божиим прозревавшая.
Радуйся, потаенныя страсти Божиим озарением обличавшая.
Радуйся, Евфросиние, невесто Христова прекрасная.

Кондак 11
Пение всякое превосходят небесная утешения, богоблаженная, имиже труды и подвиги твоя увенча Христос Господь в небесных обителех, идеже водворяющися со ангелы и всеми святыми непрестанно воспеваеши Ему: Аллилуиа.

Икос 11
Светоподателен светильник всякаго утешения была еси, по преставлении твоем, преподобная мати; яви бо тя Христос Господь молитвенницу и ходатаицу всем, с верою к тебе прибегавшым. Мы же твоим заступлением ограждаеми, зовем ти:
Радуйся, по преставлении своем Господом Неба и земли милостивно приятая.
Радуйся, по отшествии от земных в Небесных обителех водворенная.
Радуйся, венцем славы за смирение венчанная.
Радуйся, на престоле царствия за победы над страстьми посажденная.
Радуйся, от манны сокровенныя за сокрушение и слезы услаждаемая.
Радуйся, от древа животнаго за многия лишения питаемая.
Радуйся, с Царицею Небесною у Престола Царя царей предстоящая.
Радуйся, с ангелы и всеми святыми заступлением своим нас приосеняющая.
Радуйся, мати, и с Неба любящих тя теплотою любве согревати не преставшая.
Радуйся, и среди небесных утешений земных чад своих не забывшая.
Радуйся, ходатаице усердная, прибегающих к тебе не посрамляющая.
Радуйся, молитвеннице крепкая, смиренных к тебе молитв не презирающая.
Радуйся, Евфросиние, невесто Христова прекрасная.

Кондак 12
Благодать на благодать бысть нам открытие нетленных мощей твоих, преподобная, в нихже источник всякаго утешения стяжавше, величаем возвеличившаго тя Христа Господа, благодарно поюще Ему: Аллилуиа.

Икос 12
Поюще дивнаго во святых своих Господа, тя, яко избранную невесту свою, славою и честию венчавша, и твое милостивое и скорое во всех нуждах наших заступление и всепоможение прославляюще, благодарно зовем ти:
Радуйся, всеусердная наша предстательнице.
Радуйся, неотступная наша хранительнице.
Радуйся, обители сея твердое ограждение.
Радуйся, града нашего верное защищение.
Радуйся, скорбящим отрадо и утешение.
Радуйся, обидимым прибежище и заступление.
Радуйся, болящих неоскудное врачевание.
Радуйся, бедствующих благонадежное избавление.
Радуйся, благочестивым царем нашым скорая помощнице.
Радуйся, христолюбивому воинству необоримая споборнице.
Радуйся, сене, от праведнаго гнева Божия нас укрывающая.
Радуйся, росо, огнь всяких скорбей и страстей прохлаждающая.
Радуйся, Евфросиние, невесто Христова прекрасная.

Кондак 13
О преславная мати, приими малое сие тебе наше приношение, и твоим теплым у Престола Божия ходатайством, избави нас от враг видимых и невидимых, от всяких бед и скорбей, от всякаго губительства и вечныя смерти, да с тобою и всеми святыми, в Царствии Небесном, сподобимся со всеми пети Богу Спасителю нашему: Аллилуиа.
Кондак сей глаголи трижды, таже Икос 1 и Кондак 1.

Молитва
О преславная мати, скорая наша помощнице и заступнице, и неусыпная о нас молитвеннице! Предстояще раце мощей твоих, и тя яко живу сущу зряще, припадающе молимся тебе: приими прошения наша, и принеси я ко Престолу милосердаго Отца Небеснаго, яко дерзновение к Нему имущая, испроси притекающим к тебе и всем православным христианом вечное спасение и временное благоденствие, на вся благая дела и начинания наша щедрое благословение, от всяких бед и скорбей скорое избавление. Ей, чадолюбивая мати наша, тебе предстоящей Престолу Божию, ведомы нужды наша духовныя и житейския, призри на ня матерним оком, и твоими молитвами отврати от нас колебание всяким ветром учения, злых и богопротивных обычаев умножение; утверди же во всех веры согласное ведение, взаимную любовь и единомыслие, да всем и словесы, и писании, и делы, славится среди нас всесвятое имя Отца и Сына и Святаго Духа, Единаго Бога, в Троице покланяемаго, Емуже честь и слава, во веки веков. Аминь.

Канон преподобной Евфросинии Суздальской
Припев: Преподо́бная ма́ти Евфроси́ние, моли́ Бо́га о на́с.
Глас 8.

Пе́снь 1.
Ирмо́с: Во́ду проше́д я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.
Све́том моли́тв твои́х озари́ на́с, с любо́вию приступа́ющих святу́ю па́мять твою́ воспе́ти, преподо́бная ма́ти.
Испро́шена моли́твами и от чре́ва ма́терня избра́на бы́вши, всю́ себе́ в же́ртву Христу́ Бо́гу принесла́ еси́ и сосу́д избра́н боже́ственных даро́в яви́лася еси́, блаже́нная.
Сохрани́ти хотя́щи де́вство Христу́ Жениху́ и послуша́ние соблюсти́ роди́телем, моли́твенно воззва́ла еси́ к Богоро́дице и Тоя́ хода́тайством жела́нное устрое́ние жи́зни улучи́ла еси́, пресла́вная.
Богоро́дичен: Всего́ мя́ спаса́ет Сло́во Пребоже́ственное, из чре́ва Твоего́ воплоти́тися благоволи́вшее, Чи́стая Ма́ти Де́во.

Пе́снь 3.
Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.
Свобо́ду получи́вши от бра́ка Бо́жиим смотре́нием, кра́сному добро́тою Христу́ обручи́лася еси́ произволе́нием и, Тому́ усе́рдно порабо́тавши, ны́не в Небе́сных оби́телех Того́ утеша́ешися оби́льно.
Небе́сная возлюби́вши, вся́ кра́сная ми́ра сего́ оста́вила еси́, преподо́бная, и, во оби́тель все́льшися, неле́ностными труды́ по́стничества Бо́гу угоди́ла еси́, Его́же моли́ спасти́ся душа́м на́шим.
Всено́щными стоя́нии твои́ми безпло́тным А́нгелом подо́билася еси́, те́х споспе́шники иму́щи в твои́х непреста́нных к Бо́гу моли́твах.
Богоро́дичен: При́зри на не́мощь рабо́в Твои́х, Всепе́тая Богоро́дице, и изба́ви на́с от скры́тых сете́й врага́ и губи́теля ду́ш на́ших.

Седа́лен, гла́с 3.
Пасо́ма от Го́спода, я́ко овча́ кро́ткое, сопроти́вных полки́ победи́ла еси́ благода́тию Свята́го Ду́ха и, сконча́вши му́жественно по́двиг, венцы́ побе́дныя прия́ла еси́ в Небе́сных селе́ниих, иде́же упокоева́ющися, Бо́га приле́жно моли́ спасти́ся душа́м на́шим.

Пе́снь 4.
Ирмо́с: Услы́шах, Го́споди, слу́х Твоего́ смотре́ния и просла́вих Тя́, Еди́не Человеколю́бче.
Бо́дренным о́ком ума́ твоего́ в зре́нии неви́димаго Бо́га вы́ну пребыва́ла еси́, блаже́нная: Его́же лицезре́нием ны́не наслажда́ющися, моли́ уны́ния дрема́нию оттрясти́ся от оче́й на́ших.
Боже́ственным сло́вом и благода́тию Свята́го Ду́ха воспита́вшися, на высоту́ доброде́телей востекла́ еси́, преподо́бная ма́ти, и́хже стезе́ю ше́ствовати и на́с укрепи́ моли́твами твои́ми.
Огне́м Боже́ственнаго стра́ха попали́вши страсте́й те́рние и теплото́ю Уте́шителя согре́вшися, была́ еси́ безстра́стия зерца́ло, его́же прича́стники и на́с покажи́ хода́тайством твои́м.
Богоро́дичен: Омраче́нныя грехми́ ду́ши на́ша просвети́, Пречи́стая, и во све́те за́поведей Сы́на Твоего́ и Бо́га ходи́ти научи́ ны́.

Пе́снь 5.
Ирмо́с: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.
Нося́щи кре́ст сво́й, после́довала еси́ позва́вшему тя́ Го́споду бо́дренно, свети́льник и́нокиням бы́вши в житии́ твое́м, пресла́вная ма́ти.
В терпе́нии, послуша́нии и во́ли своея́ отрече́нии те́сный пу́ть соверши́вши, ны́не в простра́нных селе́ниих обита́еши, в ня́же доспе́ти и на́с устро́и.
Вся́ кра́сная ми́ра сего́ попра́вши, бу́ди на́м помо́щница, изнемога́ющим в боре́нии с пре́лестьми ве́ка сего́.
Богоро́дичен: Присноде́ву пое́м Тя́, Богоро́дице: Ты́ бо Бо́га Сло́ва пло́тию ми́рови ро́ждши, пребыла́ еси́ Де́ва.

Пе́снь 6.
Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя́.
Мно́гими по́двиги плотска́я умертви́вши стремле́ния, и на́с, подража́ти тебе́ в по́стничестве возжела́вших, те́сным путе́м твои́м ше́ствовати умудри́.
Воздержа́ние, моли́тву и любо́вь стяжа́вши, преподо́бная, и́ноческаго жития́ о́браз яви́лася еси́, в не́мже преуспе́ти и на́м посо́бствуй хода́тайством твои́м.
Послуша́ния труды́ преше́дши и все́ми доброде́тельми украси́вшися, же́зл настоя́тельства прия́ла еси́ во оби́тели и́ночестей, ны́не же венце́м сла́вы уве́нчана еси́: сего́ ра́ди ублажа́ем тя́, преподо́бная.
Богоро́дичен: Я́же Бо́га Сло́ва Изба́вителя ми́ру пло́тию ро́ждшая, изба́ви, мо́лимся, от сете́й вра́жиих ду́ши на́ша, Богороди́тельнице Чи́стая.

Конда́к, гла́с 2.
Де́вства чи́стый сосу́д еле́ем моли́твы и любве́ испо́лнивши, неугаси́мый свети́льник в се́рдце свое́м возжгла́ еси́, преподо́бная, с ни́мже бо́дренно в сре́тение Небе́снаго Жениха́ изше́дши, в черто́г Того́ пресве́тлый прия́та была́ еси́, иде́же ны́не водворя́ющися с ли́ки А́нгелов и святы́х, моли́ся, мо́лимся, Христу́ Бо́гу, ча́сти де́в юро́дивых изба́витися на́м.

И́кос.
Де́вство возлюби́вши, сохране́ния того́ испроси́ла еси́ у Присноде́вы и, к земно́му ше́ствующи жениху́, Небе́снаго сре́тила еси́, Ему́же уневе́стившися, вся́ жите́йская оста́вила еси́ и, притру́дное соверши́вши по́стническое житие́, в Небе́сный черто́г прия́та бы́ти сподо́билася еси́, иде́же ны́не с ли́ки А́нгелов и святы́х водворя́ющися, моли́ Христа́ Бо́га сотвори́ти и на́с прича́стники блаже́нныя ча́сти твоея́.

Пе́снь 7.
Ирмо́с: От Иуде́и доше́дше, о́троцы в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.
Восте́кши на высоту́ доброде́телей и безстра́стным во пло́ти житие́м А́нгелом уподо́бльшися, рая́ сла́дости насле́дница бы́ти сподо́билася еси́, взыва́ющи: благослове́н еси́, Го́споди Бо́же, во ве́ки.
Сия́ющи све́том безстра́стия, от страсте́й моли́твами твои́ми избавля́еши притека́ющих к тебе́ моли́твенно, преподо́бная, взыва́ющих: благослове́н еси́, Го́споди Бо́же, во ве́ки.
Престо́лу предстоя́щи Вседержи́теля, избавле́ние от бе́д и скорбе́й моли́твами твои́ми испроси́ на́м, чту́щим па́мять твою́, да взыва́ем: благослове́н еси́, Го́споди Бо́же, во ве́ки.
Богоро́дичен: Пресвята́я Де́во Богоро́дице, хода́тайством Твои́м исцели́ на́ша теле́сныя не́мощи и душе́вныя неду́ги, да Тебе́ ра́достно воспое́м: ра́дуйся, Благода́тная.

Пе́снь 8.
Ирмо́с: Царя́ Небе́снаго, Его́же пою́т во́и А́нгельстии, хвали́те и превозноси́те во вся́ ве́ки.
За́поведи Го́спода внима́ющи, трезве́нием и бо́дренностию вся́ наве́ты и ко́зни врага́ препобеди́ла еси́, от ни́хже и на́м изба́витися моли́твами твои́ми сподо́би.
Щито́м ве́ры и шле́мом упова́ния вооружи́вшися, по́лчища вра́жеская отрази́ла еси́ моли́твами твои́ми от оби́тели, и ны́не на́с храни́ти не преста́й хода́тайством твои́м.
Сра́мных страсте́й совлещи́ся ру́бищ, в кра́сныя же доброде́тели ри́зы облещи́ся сподо́би на́с моли́твами твои́ми.
Богоро́дичен: Влады́чице Чи́стая, на́с, к Тебе́ усе́рдно прибега́ющих, от страсте́й и бе́д свободи́ моли́твами Твои́ми.

Пе́снь 9.
Ирмо́с: Вои́стину Богоро́дицу Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.
Нечистота́ми грехо́вными оскверне́нных на́с убели́, блаже́нная Евфроси́ние, моли́твами твои́ми, к покая́нию подви́гши ожесте́вшия ду́ши на́ша.
Нестяжа́нием упраздни́вшися, безбе́дно преплыла́ еси́ жите́йское мо́ре, преподо́бная, его́же треволне́ний изба́витися сподо́би и на́м, чту́щим па́мять твою́.
То́ки сле́з твои́х о́гнь страсте́й угаси́ла еси́, блаже́нная, и́хже жже́ния изба́ви и на́с моли́твами твои́ми.
Богоро́дичен: Бу́ди на́м прибе́жище, стена́ и покро́в, Пречи́стая Де́во, да Тя́ с безпло́тными ли́ки непреста́нно велича́ем.

Свети́лен.
Свети́льник нога́м на́шим бы́сть житие́ твое́, преподо́бная, ему́же после́дующе, невече́рняго Све́та безбе́дно дости́гнем

Комментарии

Комментарии не найдены ...
Добавлять комментарии могут только
зарегистрированные пользователи!
 
Имя или номер: Пароль:
Регистрация » Забыли пароль?
© LogoSlovo.ru 2000 - 2020, создание портала - Vinchi Group & MySites