Акафист и Канон святому преподобномученику Макарию, архимандриту Каневскому.

Макарий Ка́невский, Пинский, О́вручский, Переяславский
Акафист святому преподобномученику Макарию, архимандриту Каневскому
Память: 26 мая (13 мая ст. ст.); 20 сентября (07 сентября ст. ст.)

Кондак 1
Избранный от Бога угодниче и страстотерпче Христов, преподобномучениче Макарие, источаяй мирови многия милости и чудесная дарования! Похвальная восписуем ти, почитающе святую память твою. Ты же на Небеси предстоя Престолу Господа Славы, молися о всех нас, с верою притекающих к тебе и любовию зовущих: Радуйся, преподобномучениче Макарие, Переяславский и Каневский чудотворче.

Икос 1
Ангела земнаго и человека Небеснаго яви тебе от утробы матерни всего мира Создатель: ты бо, блаженне Макарие, еще во отроческих летех пребывая, земная веселия вся презрев, попечение о благочестии имел еси, ко храму Божию прилежа и ревнуя о учении и познании веры Православныя. Мы же, дивящеся сему, вопием: Радуйся, родителей благочестивых мудрый сыне. Радуйся, от утробы матерни Духом Святым осененный. Радуйся, от младенчества Богом избранный. Радуйся, от юности Христа возлюбивый. Радуйся, подвижниче, Божиею благодатию прославленный. Радуйся, многия скорби и мучения за имя Христово претерпевый. Радуйся, прекрасный плоде древа райскаго, Духом Святым возращенный. Радуйся, избранниче Христов, с Нимже ныне и царствуеши во веки. Радуйся, преподобномучениче Макарие, Переяславский и Каневский чудотворче.

Кондак 2
Видяще любовь твою к молитве и попечение, како угодити Богу, отец и мати и сродники твоя не прещаху, но паче споспешествоваху ти возрастати в разуме Божии и добродетели. И промышлением Божиим тако совершися, яко егда в земли твоей времена тяжкая для веры Православныя насташа, великий подвижник и поборник Тоя явился еси, да вси вернии воспоют Богу: Аллилуиа.

Икос 2
Разум несумненный дарова ти Христос, Божия Сила и Божия Премудрость, егда ты, отче Макарие, Моисею Боговидцу подражая, в годину тяжкую восхотел еси паче страдати с ревнители веры Православныя, неже привременныя греха сладости ради уклонитися ко прелести нечестия; сего ради мы грешнии, похваляюще таковое твое дерзновение по Бозе, умиленно вопием ти: Радуйся, душу твою сохранивый и освятивый ю светом Христовым. Радуйся, крест скорби и терпения за Христа в сердце своем водрузивый. Радуйся, верное и послушное чадо Божие. Радуйся, славный проповедниче Православия. Радуйся, сострадательно внемлющий гласу страждущих. Радуйся, отрадо к тебе притекающим. Радуйся, ухо твое не отвративый от вопля и рыдания страждущих. Радуйся, отверзый сердце твое спострадати скорбем и болезнем угнетенных. Радуйся, преподобномучениче Макарие, Переяславский и Каневский чудотворче.

Кондак 3
Силою Божиею укрепляемый и просвещаемый, пламенне возжелел еси, досточудне Макарие, по кончине отца твоего и матере всего себе вдати Господеви; того ради, славу тленнаго мира всю презревши, притекл еси во Овручскую обитель и тамо чин Ангельский прием, воспел еси Христу Богу: Аллилуиа.

Икос 3
Имея попечение об угождении не людем, но Богу, егда приял еси иноческий чин, блаженне Макарие, мнозе поучался еси в словесех Писания Божественнаго и Святых Отец творений, добре любяй Святаго Златоуста письмена; и был еси удостоен благодати священства и власти поставляти и поучати иноки. Мы же, ведуще веру твою во Христа Спаса пламенну и мудрость великую, ублажаем звании сими: Радуйся, смирения, кротости и воздержания учителю. Радуйся, воине Христов непобедимый. Радуйся, плотския похоти Бога ради умертвивый. Радуйся, пощением и молитвою, трудом и послушанием Богу угодивый. Радуйся, иноков похвало и достойный собеседниче Ангелов. Радуйся, яко тобою благодати Божия вернии исполняются. Радуйся, от юности иноческим обетом предавый Господеви чистое сердце твое. Радуйся, умертвивый похоти и страсти постом и молитвою. Радуйся, преподобномучениче Макарие, Переяславский и Каневский чудотворче.

Кондак 4
Бурю внутрь имеяй помышлений сумнительных, вначале отреклся еси, Макарие, правити обителию Овручскою, обаче егда братия гневахуся на тя и суд Божий представиша ти, аще не восхощеши правити обителию в тяжкую годину искушений и бед, ты, блаженне, предав себе воли Господни, приял власть, поюще со всеми Богу: Аллилуиа.

Икос 4
Слышавше и видевше святое житие твое, понеже наставник великий монахов был еси, учаще оныя, такожде и мирския люди словом и делом, како надлежит во благочестии жити, приходиша к тебе ближнии и дальнии послушати словес твоих и житию добродетельному учитися. Молим тя, блаженне Макарие, научи христианскому житию и нас, грешных, вопиющих ти таковая: Радуйся, сосуде, благодати Божия изобильно исполненный. Радуйся, добрый делателю винограда Небеснаго. Радуйся, мудрый сеятелю благочестия. Радуйся, великий наставниче заблуждших. Радуйся, скорый помощниче страждущим. Радуйся, Ангеле, во плоти миру явленный. Радуйся, стада Христова добрый и кроткий пастырю. Радуйся, яко научивый и сотворивый, и великим нареченный в Царствии Небеснем. Радуйся, преподобномучениче Макарие, Переяславский и Каневский чудотворче.

Кондак 5
Боготечней звезде уподобился еси, отче Макарие, егда, показуя людем путь твердый, ко Господу ведущий, в день, воньже нечестивии агаряне нападоша на град Овруч, ты теплою молитвою, исшед с братиею со святыми иконами, отгнал еси враги от града; и тии возмневше, яко полк зело мног на них ополчися, в бегство обратишася. Чудесно же спасеннии благодарственно воспеша Богу: Аллилуиа.

Икос 5
Видевше тя хранителя тверда веры Православныя, врази твои, книжником и фарисеем древним подобящеся, совет нечестивый сотвориша уловити тя и совратити с пути праведнаго. Посрамлени же быша, дышуще злобою, помышляху всячески о разорении и искоренении обители твоея; вскоре же агаряне, паки нашедше, разориша вконец и обитель твою. И ты, поруган зело, отшел еси подвизатися в Киево-Печерскую Лавру. Таковыя ради твоея ревности о Господе Вседержителе, вопием ти, святе Макарие, сице: Радуйся, поборниче Христов, в мужестве неодоленный. Радуйся, советом нечестивых не покоривыйся. Радуйся, непоколебимый столпе Церкве Христовы. Радуйся, щите веры, притупивый стрелы лукавых. Радуйся, молние, разгоняющая враги видимыя и невидимыя. Радуйся, звездо, путь ко Христу показующая. Радуйся, препоясавый чресла твоя истиною. Радуйся, молением поражающий врагов Церкви Христовой. Радуйся, преподобномучениче Макарие, Переяславский и Каневский чудотворче.

Кондак 6
Проповедницы быша твоего непоколебимаго стояния в вере Христовой иноцы, мирстии и святителие, видяще, яко уподобился еси розе среди шипов невредимо растущей, понеже врази, аще и тщахуся, не возмогоша погубити святости и благоухания в Тебе Божия. Мы же, величающе тя, яко преизящный крин Христов, вопием прославльшему тя Господу: Аллилуиа.

Икос 6

Возсиял еси дивным светом жития твоего и борения за веру Православную, отче Макарие, и сего ради якоже во Овруче граде был еси начальник обители, таковым поставлен был еси и во граде Каневе, и зде паки начаху приходити к тебе ближнии и дальнии учитися, како во Христе жити и зло побеждати со упованием на Господа. Ты же был монахом и мирским, яко отец чадом; и нам, грешным, наставник великий являешися, вопиющим ти: Радуйся, скорбящих и обуреваемых приятное утешение. Радуйся, изнемогающих тихое пристанище. Радуйся, заступниче вдов, сирот, немощных и убогих. Радуйся, защитниче обидимых и гонимых. Радуйся, истиннаго Богопочитания насадителю. Радуйся, яко добрая дела твоя сияют на тверди Небесней. Радуйся, многоценное миро любве Христовы, источаемое независтно всем притекающим. Радуйся, мудрый делателю винограда, егоже насади десница Господня. Радуйся, преподобномучениче Макарие, Переяславский и Каневский чудотворче.

Кондак 7
Хотяй путеводити люди ко спасению, якоже повелевают уставы Церковнии и совесть Христианская, в годину скорби учил еси, отче Макарие, яко скорби нуждни суть нам, еже святый Златоуст рече, понеже скорбьми велики подобает внити в Царство Небесное; ревностию же по Бозе пламенеющи, молил еси сильныя о покровении Церкве Православныя, да вси чада ея воспоют Богу: Аллилуиа.

Икос 7
Новую показа милость рабом Своим Спас мира, Христос Господь, тобою, отче Макарие, егда ты, внимая слезам некия жены благочестивыя, обратил еси ко Господу нерадиваго и неблагонравнаго сына ея, кротце научил онаго творити молитву Господню, и чтение тоя прилежное возроди душу человека сего. Мы же, таковаго ради деяния твоего, умиления исполнени, зовем ти та ко: Радуйся, падающих возводяй любовию ко Христу. Радуйся, заблуждших исправление от путей беззаконных. Радуйся, благодатный врачу немощных. Радуйся, прозорливче Божий, тайная ведый человеческая сердца. Радуйся, мечу, посекаяй всяку неправду и беззаконие. Радуйся, неотступный обличителю грешников духом кротости и милосердия. Радуйся, многих на путь истинный наставивый. Радуйся, вразумление нерадивых и неблагонравных. Радуйся, преподобномучениче Макарие, Переяславский и Каневский чудотворче.

Кондак 8
Странное и славное явление силы Божия видеша на тебе чада Церкве Христовы: твоими бо молитвами слепии прозреваху, бесы изгонишася, болящия от одра возставаху. Того ради мы, прославляюще тя, Макарие, яко Врача душ и телес наших - Христа - вернаго служителя, вопием: Аллилуиа.

Икос 8
Весь был еси помышлением твоим в вышних, сего ради и люди ревностне учил еси, како угождати Богу словесы и делы, грешныя же обличал еси, да покаются; в нихже научил еси жити; благочестно судию некоего, во граде живуща, мздоимца и неправедно суд людем творяща, сему тайно в субботы посылающе пенязи и краткия письмена увещания. И егда уведе от тебе судия, яко последняя отдавши, раскаяние и исправление яви. Молитвами твоими, Макарие, помози и нам к покаянию обратитися, зовущим ти: Радуйся, непрестанное о людех имый промышление. Радуйся, неверных на путь истины приводяй. Радуйся, неправо судящих грозный обличителю. Радуйся, праваго пути светило светозарное. Радуйся, сокровище многообразных дарований Животворящего Духа. Радуйся, человече Божий, грады и веси исполнивый славою добрых дел твоих. Радуйся, неотступный обличителю неправды. Радуйся, ищущий бисеров плодами веры и покаяния. Радуйся, преподобномучениче Макарие, Переяславский и Каневский чудотворче.

Кондак 9
Все естество Ангельское срадуется и свеселится Спасу Христу, зряще тя, блаженне Макарие, данный Ти от Господа талант возрастивша: ты бо, расточая стяжания твоя нищим и убогим, от нетленнаго богатства духовнаго питал еси вся приходившия к тебе, тщася всячески, да отложат вернии ветхаго человека с деяньми его, в новаго же облекутся, обновляемаго по образу Создавшаго его, в разуме поюще Богу: Аллилуиа.

Икос 9
Ветии многовещанныя не возмогут достойно славити дела твоя великая: ты бо еще в житии твоем, Спасу тя прославляющу, удостоен был еси от Господа дара прозрения, еже быти имать в летех грядущих. Тако предрекл еси разорение от врагов града Канева и обители твоея, беды лютыя и смерть многих; и увещавал еси братию николиже отпадати от веры, но верными даже до смерти Христу пребывати. Прославляюще твое о Господе мужество, Макарие, вопием ти: Радуйся, правило веры и ревности благочестивыя. Радуйся, древо, плодами благочестия украшенное. Радуйся, велию власть на диавола от Господа получивый. Радуйся, сподобивыйся от Бога дара прозрения будущих. Радуйся, верных твоих уготовавый ко дню воцарения со Христом в жизни вечней. Радуйся, подвигнувый чада твоя мужески терпети вся за имя Христово. Радуйся, душ наших радование. Радуйся, яко тобою сладостей духовных исполняемся. Радуйся, преподобномучениче Макарие, Переяславский и Каневский чудотворче.

Кондак 10
Спастися и в разум истины прийти всем человеком хотящу Спасу работая, егда час нашествия врагов на землю Украинскую и град Канев уже наста, повелел еси братии уготоватися к исходу от жития сего земнаго пощением и причащением Святых Тайн. Вси же послушавше тебе, воспеша Богу: Аллилуиа.

Икос 10
Стена явился еси братии обители твоея, Макарие, и всем верным во граде Каневе, егда врази сокрушивше врата обители и сокровища монастырския ищуще, изведоша тя вон и поруганию и избиению предаша. Вернии же людие со слезами: Отец наш! Отец наш!, - вопияху гласом. Ты же агаряном нечестивым рекл еси, отче: не на земли, но на Небеси Сокровище мое есть. Врази же злобою на тя ярящеся, отсекше главу твою, отъидоша. Моли о нас, мучениче Христов, да помянет во Царствии Небеснем Спас нас, якоже разбойника благоразумнаго, почитающих страдания твоя и зовущих ти: Радуйся, Господа прославивый подвиги твоими. Радуйся, страстотерпче Христов, молитвою и Крестом мучителей посрамивый. Радуйся, дух твой Господу предавый во глас любве к тебе верных. Радуйся, вольная страдания за Христа претерпевый. Радуйся, уничиженный и поруганный на земли. Радуйся, славою и честию украшенный на Небеси. Радуйся, усекновение главы твоея от агарян приявый. Радуйся, убеливый ризы твоя в крови Агнчей. Радуйся, преподобномучениче Макарие, Переяславский и Каневский чудотворче.

Кондак 11
Пение всеумиленное принесоша ти града Канева обитателие, имже судил есть Господь по отшествии нечестивых агарян живыми остати, егда пришедше на место, идеже стояше сожженный агаряны храм обители, и не нашедше останков сродник своих, обретоша токмо честное без главы тело твое, во власяницу одеяно и со Крестом в руце, и погребению честному предаша на месте, идеже стояше жертвенник, поюще Богу: Аллилуиа.

Икос 11
Светильник горяй и светяй был еси в житии твоем земнем, блаженне Макарие, и таковым и поныне всем верным являвшися, и сие узреша людие Православнии, егда десятилетию минувшу по разорении града Канева, обретени быша честныя мощи Твоя и поставлени в новоустроеннем храме обители, и тамо мнози чудеса источиша; такожде бысть и по пренесении мощей твоих во град Переяславль. Прославляюще тя, отче, яко помощника в скорбех и бедах наших, вопием ти: Радуйся, пресветлый светильниче, возсиявый на тверди Небесней. Радуйся, в немерцающем свете с Господем пребываяй. Радуйся, зрящий Господа Вседержителя на Небеси. Радуйся, унаследовавый вечныя радости в Царствии Небеснем. Радуйся, исцелений благодатный источниче. Радуйся, о спасении душ наших великий молитвенниче. Радуйся, псаломски вопиявый от сих ко Господу: не убоюся зла, яко Ты со мною еси. Радуйся, неверных страх и посрамление, венец исповедника Христова стяжавый. Радуйся, преподобномучениче Макарие, Переяславский и Каневский чудотворче.

Кондак 12
Благодать дарова ти обильную Христос Бог наш, святе Макарие, во еже путеводити люди ко спасению. И ныне источают оную честныя мощи твоя, недугующия душею и телом исцеляя. Поклоняющеся им с верою, вопием ти: Предстательством Твоим у Спаса Христа помози нам, преподобномучениче, благочестно на земли пожити, да и Царствия Небеснаго сподобимся, поюще Богу: Аллилуиа.

Икос 12
Поюще труды и подвиги твоя, преподобномучениче Макарие, прославляем Дивнаго во святых Своих Господа, ублажаем мученическую кончину Твою, и ведуще тя, яко Ангела во плоти на земли, Спасу благоугодивша и вольная страдания на Него претерпевша, и яко заступника великаго пред Престолом Господним за люди Православныя, из глубины души в похвалу тебе вопием: Радуйся, дивное сияние истины Евангельския. Радуйся, великий предстателю бедствующих в море житейстем. Радуйся, благодатный утешителю всех славящих имя твое. Радуйся, скорый послушниче всех с верою призывающих тя. Радуйся, теплый ходатаю у Престола Господня о всех, чтущих святую память твою. Радуйся, Небесный покровителю страны нашея, града и храма, идеже почивают святыя мощи твоя. Радуйся, исповедниче веры во Христа неустрашимый. Радуйся, воине Христов непобедимый. Радуйся, преподобномучениче Макарие, Переяславский и Каневский чудотворче.

Кондак 13
О, пресвятый и пречудный угодниче Христов, преподобномучениче Макарие, приими от нас малое моление сие наше, сердцем и устами в похвалу тебе приносимое, и умоли Христа Бога, да направит нас всемогущею силою Своею к житию праведному, и да удостоит деснаго стояния на Страшнем Судищи Своем, радостно поющих: Аллилуиа, Аллилуиа, Аллилуиа.

(Этот кондак читается трижды, затем икос 1 и кондак 1)

Молитва святому преподобномученику Макарию
О преславный преподобномучениче Макарие, скорый помощниче и теплый заступниче всех, притекающих к тебе, предстательством своим пред Господом умоли Спаса нашего, да обратит души наша к покаянию и исправлению, да дарует мир отечеству нашему и всей земли и да поможет всем нам твердыми быти в вере Православней и делех благих, да отженет от нас дух злобы и лукавства, и братолюбие вселит в нас, и да приносим во всем житии нашем плоды духовныя: любовь, благость, милосердие, веру нелицемерную, кротость и воздержание, и да, распявше на земли плоть нашу со страстьми и похотьми и духом живуще и ходяще, сподобимся жизни вечныя в веце грядущем, и, райския сладости присно наслаждающеся с тобою и со всеми святыми, прославим Отца, и Сына, и Святаго Духа, ныне, и присно, и во веки веков. Аминь.

Канон святому преподобномученику Макарию Каневскому
Припев: Преподобному́чениче Макáрие, моли́ Бо́га о на́с.
Память: 26 мая (13 мая ст. ст.); 20 сентября (07 сентября ст. ст.)
Глас 8.


Пе́снь 1.
Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Мно́гими содержи́м напа́стьми, к тебе́, преподобному́чениче Мака́рие, прибега́ю, утеше́ния душе́внаго иски́й. Предста́тельством свои́м у Влады́ки Христа́ ты́ ми́ помози́.

А́нгел во пло́ти все́м житие́м свои́м яви́лся еси́, Мака́рие, лю́ди правосла́вныя ко спасе́нию приводя́, и Це́ркве Христо́вы вели́кий свети́льник: те́мже па́мять твою́, ве́рнии, соше́дшеся, по до́лгу почита́ем.

Богоро́дичен: К Тебе́, Пречи́стая Влады́чице, Нача́льника спасе́ния на́шего ро́ждшая, со слеза́ми прибега́ю: покро́в ми́ бу́ди во все́х ско́рбех и обстоя́ниих.

Пе́снь 3.
Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче.

А́нгелов и челове́ков Творе́ц умудри́ тя́, блаже́нне Мака́рие, ми́р се́й су́етный оста́вити и в мона́шестем житии́ подвиза́тися: моли́, Мака́рие, Спа́са на́шего, да да́рует на́м любо́вь к Нему́ тве́рду име́ти и житие́ доброде́тельное проводи́ти.

Рабо́тати Христу́ Еди́ному все́м се́рдцем вожделе́в, прише́л еси́ по кончи́не роди́телей твои́х, Мака́рие, во оби́тель О́вручскую и та́мо, ду́хом Бо́жиим наставля́ем, пи́щею име́л еси́ писа́ния Боже́ственная; моли́ Спа́са на́шего, Мака́рие, да и мы́, гре́шнии, о́ная возлю́бим, я́ко исто́чник богодохнове́нный.

Богоро́дичен: Исцели́ душе́вныя моя́ я́звы, Влады́чице, к заступле́нию Твоему́ прибега́юща, и моли́ Сы́на Твоего́ от напа́стей изба́вити мя́, Ты́ бо Изба́вителя ми́ру несказа́нно родила́ еси́.

Седа́лен, гла́с 8:
А́гнца Бо́жия, грехи́ ми́ра взе́млющаго, кре́ст на рамена́х твои́х поне́сл еси́, Мака́рие, е́же гра́ды О́вруч и Ка́нев в де́лех твои́х очи́ма свои́ма узре́ша: Переясла́в же Приднепро́вский тобо́ю хва́лится, я́ко та́мо мо́щи твоя́ чудеса́ мно́га источи́ша, оба́че и Черка́ссы гра́д ра́дуется, имы́й мо́щи твоя́ ны́не: и́хже благогове́йно лобыза́юще, Христу́ Бо́гу пе́сньми свяще́нными хвалу́ возсыла́ем.

Сла́ва, и ны́не: Я́ко Де́ву в жена́х, без се́мене ро́ждшую Бо́га пло́тию, вси́ блажи́м, ро́ди челове́честии, О́гнь бо всели́ся в Тя́ Боже́ственный, и, я́ко Младе́нца, дои́ши Зижди́теля и Го́спода. Те́мже а́нгельстии собо́ри и челове́честии ро́ди досто́йно сла́вят пресвято́е рождество́ Твое́, и мы́ согла́сно вопие́м Ти́: моли́ Христа́ Бо́га согреше́ний оставле́ние дарова́ти воспева́ющим досто́йно па́мять Твою́.

Пе́снь 4.
Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Мно́гия лю́ди, Мака́рие, научи́л еси́ житию́ доброде́тельному, и́же приходи́ша к тебе́ во оби́тель послу́шати словеса́ твоя́ и утеше́ние душе́вное обрести́. Уте́ши и на́с, милосе́рдне, в находя́щих на ны́ ско́рбех и обстоя́ниих.

От ю́ности твое́й, Мака́рие, ни о чесо́м же земне́м, то́кмо об угожде́нии Бо́гу пеки́йся, житие́ мона́шеское возлюби́л еси́ и, вла́сть прие́м наставля́ти и поуча́ти и́ноки, не то́кмо о́ных, но и мирски́я лю́ди сло́ву Бо́жию ре́вностно учи́л еси́; помози́ на́м моли́твами твои́ми, о́тче, да и мы́ словеса́ Госпо́дня взы́щем, я́ко сокро́вище некра́домое.

Богоро́дичен: Лю́тыя неду́ги на́ша душе́вныя и теле́сныя исцели́ моли́твами твои́ми, Влады́чице, Ты́ бо Ма́ти все́м ве́рным еси́, на по́мощь и покро́в Тво́й наде́ющимся.

Пе́снь 5.
Ирмо́с: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Иски́й ми́ра, о не́мже Спа́с на́ш апо́столом ре́кл е́сть: ми́р оставля́ю ва́м, ми́р Мо́й даю́ ва́м, укроти́л еси́ в тру́дных обстоя́ниих, Мака́рие, гне́в бра́тии во оби́тели О́вручстей, прия́в вла́сть, во́ли Госпо́дней себе́ преда́в.

Твое́ богому́дрое наставле́ние, Мака́рие, я́ко ме́д сла́дкий напая́ше все́х к тебе́ приходя́щих: ты́ бо, по глаго́лу апо́столову, го́рняя, а не земна́я всегда́ му́дрствовати лю́ди учи́л еси́.

Богоро́дичен: Влады́чице и Ма́ти Изба́вителя, оживи́ ду́ши на́ша, мо́лим Тя́, грехо́м умерщвле́ннии, да пое́м Тя́, Живо́т и Воскресе́ние все́х ро́ждшую.

Пе́снь 6.
Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя́.

А́да и сме́рти Победи́теля, Христа́ Спа́са, во́ин преизря́дный яви́лся еси́, Мака́рие, егда́ е́реси лати́нския после́дователие словесы́ и де́лы злы́ми тща́хуся отврати́ти тя́ от пути́ пра́ваго; ты́ же, Спа́су все́х ти́ помога́ющу, вся́ ко́зни о́ных одоле́л еси́.

Мно́жество ага́рян, свя́те Мака́рие, восхоте́ша разори́ти гра́д О́вруч и оби́тель его́; ты́ же не мече́м, не копие́м, не я́драми о́гненными, но моли́твою ко Го́споду гра́д от враго́в спа́сл еси́.

Богоро́дичен: Исто́ргни мя́ от мра́чнаго сна́ грехо́внаго хода́тайством к Сы́ну Твоему́, Влады́чице, да То́й наста́вит мя́ сле́довати всегда́ Боже́ственным словесе́м Его́.

Конда́к, гла́с 2:
По́стническое и равноа́нгельное житие́ твое́ страда́льческими уясни́л еси́ по́двиги и А́нгелом совсе́льник яви́лся еси́, богоблаже́нне Мака́рие, с ни́ми Христу́ Бо́гу моля́ся не преста́й о все́х на́с.

И́кос:
Отве́рг ми́ра сего́ сла́ву тле́нную, восхоте́л еси́ Еди́ному Христу́ все́м житие́м свои́м угожда́ти, блаже́нне Мака́рие, те́мже труды́, и поще́нии, и моли́твою ко Спа́су непреста́нно воспита́в ду́шу свою́, страда́ний теле́сных и сме́рти не убоя́лся еси́, е́же и засвиде́тельствовал еси́, егда́ нечести́вии ага́ряне, гра́д Ка́нев разори́вше, муче́нием тя́ и главы́ отсече́нию преда́ша, не о земне́м бо, тле́нием, но о го́рнем помышля́л еси́ всегда́, Мака́рие, А́нгелом бо и святы́м дру́г тща́лся еси́ бы́ти, с ни́миже непреста́нно моли́ о все́х на́с.

Пе́снь 7.
Ирмо́с: От Иуде́и доше́дше, о́троцы в Вавило́не иногда́ ве́рою Тро́ическою пла́мень пе́щный попра́ша пою́ще: отце́в Бо́же, благослове́н еси́.

Милосе́рдия и по́мощи Спа́са Го́спода ча́я, егда́ разори́ша ага́ряне оби́тель О́вручскую, отше́л еси́, Мака́рие, подвиза́тися в Ки́ево-Пече́рскую Ла́вру. Похваля́юще дерзнове́ние твое́, вопие́м: оте́ц на́ших Бо́же, благослове́н еси́.

И в Ка́неве гра́де нача́льник оби́тели сы́й, я́коже и во О́вруче, учи́л еси́, Мака́рие, и́ноков и мирски́х по за́поведем Бо́жиим жи́ти, непреста́нно о душа́х челове́ческих попече́ние име́я, да благослове́н бу́дет Бо́г оте́ц на́ших.

Лени́ваго и неблагонра́внаго сы́на жены́ благочести́выя учи́л еси́ со тща́нием приле́жно твори́ти моли́тву Госпо́дню, и сие́ испра́ви неради́ваго и обрати́ о́наго ко Го́споду, Ему́же вси́ ве́рнии вопие́м: оте́ц на́ших Бо́же, благослове́н еси́.

Богоро́дичен: У́зы сме́рти и а́да Расто́ргшаго, страда́ньми, сме́ртию и Воскресе́нием ро́д челове́ческий от ве́чнаго осужде́ния Спа́сшаго Ма́ти, Того́ моли́, да проще́ние грехо́в все́м ве́рным да́рует.

Пе́снь 8.
Ирмо́с: Царя́ Небе́снаго, Его́же пою́т во́и а́нгельстии, хвали́те и превозноси́те во вся́ ве́ки.

Испра́вил еси́, богому́дре Мака́рие, посыла́нием та́йным пе́нязей и пи́сьменным увеща́нием судию́ гра́дскаго, мздои́мца и непра́ведно су́д лю́дем творя́щаго, Судию́ бо живы́м и ме́ртвым во уме́ свое́м зре́л еси́, блаже́нне, словеса́, дела́ и мы́сли челове́ческая ве́дуща, Его́же ве́рнии пое́м и превозно́сим во вся́ ве́ки.

Наше́ствие попуще́нием Бо́жиим враго́в на гра́д Ка́нев предве́дети и ве́рным откры́ти дано́ бы́сть тебе́, блаже́нне Мака́рие, благоче́стия ра́ди твоего́, да не уныва́ющий, но бо́дрствующий обря́щутся, егда́ низпо́слет испыта́ние Спа́с на́ш, Его́же пое́м и превозно́сим во вся́ ве́ки.

Тро́ичен: Страсте́й лю́тых, и́миже гре́шнии обдержи́ми есмы́, изба́ви ны́, Триипоста́сная Тро́ице, и помози́ на́м в житии́ на́шем дела́ блага́я твори́ти, да ве́чное спасе́ние приобря́щем.

Богоро́дичен: Влады́чице и Ма́ти Изба́вителя, услы́ши на́с, моля́щихся Тебе́ и прося́щих Твоея́ по́мощи и заступле́ния, умоли́ Сы́на Твоего́, Христа́ Бо́га на́шего, да прости́т прегреше́ния на́ша, и изба́вит на́с ве́чнаго осужде́ния и му́ки, и да поми́лует на́с в де́нь су́дный.

Пе́снь 9.
Ирмо́с: Вои́стину Богоро́дицу Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Сокруши́ти возмого́ша врази́ многочи́сленнии врата́ оби́тели Ка́невския, оба́че не возмого́ша сокруши́ти му́жество твое́, Мака́рие, егда́ узре́ша тя́ пред враты́ стоя́ща, во власяни́цу оде́яна, со кресто́м в руце́ и на пе́рсех; моли́ Спа́са о на́с, свя́те, да отжене́т от на́с ду́х боя́зни страда́ний и сме́рти теле́сныя. Пору́ган и уничиже́н бы́л еси́, Мака́рие, ага́ряны нечести́выми, и́же, би́вше и терза́вше те́ло твое́, главу́ твою́ отсеко́ша, оба́че на Небеси́ яви́лся еси́ сла́вою и че́стию укра́шен. Моли́ся, Мака́рие, да не лиши́т и на́с, гре́шных, Спа́с на́ш Небе́снаго Ца́рствия Своего́.

А́дова врата́ и вереи́ сокруши́вшему Христу́ Бо́гу на́шему после́довал еси́ во все́м житии́ твое́м, преподобному́чениче Мака́рие, те́мже прия́тие сме́рти от враго́в не устраши́ тя́, оба́че ре́кл еси́ о́ным безбоя́зненне: мое́ сокро́вище на Небесе́х е́сть, иде́же и живе́ши с го́рними Си́лами, блаже́нне.

Свети́льник све́тлый ми́ру всему́ яви́лся еси́, Мака́рие, я́ко еще́ при житии́ твое́м на земли́ моли́твами твои́ми многоразли́чная боля́щих исцеле́ния соверша́хуся; та́кожде и ны́не зри́м о́ныя от святы́х моще́й твои́х, во сла́ву Спа́са Христа́, Его́же ра́б благи́й и ве́рный яви́лся еси́.

Богоро́дичен: Ели́цы к заступле́нию Твоему́ притека́ют, Влады́чице, николи́же посра́млени отхо́дят: Ты́ бо наде́жда все́х конце́в земли́ еси́, я́ко Ма́ти Изба́вителя ду́ш на́ших, милосе́рдия ра́ди на зе́млю к лю́дем соше́дшаго.

Свети́лен, гла́с 2:
Вели́каго ве́ры и благоче́стия подви́жника, преподобному́ченика Мака́рия восхва́лим, мно́гия бо лю́ди сло́ва Бо́жия пропове́данием от ве́чныя сме́рти спасе́ и, я́ко до́бр во́ин Христо́в, по глаго́лу апо́столову, злопостражда́л е́сть, и ве́рным пу́ть показу́ет к Ца́рству Небе́сному.

Комментарии

Комментарии не найдены ...
Добавлять комментарии могут только
зарегистрированные пользователи!
 
Имя или номер: Пароль:
Регистрация » Забыли пароль?
© LogoSlovo.ru 2000 - 2020, создание портала - Vinchi Group & MySites