Акафисты и Канон святой блаженной Ксении Петербургской.

Ксения Петербургская, Христа ради юродивая
Акафист святой блаженной Ксении Петербургской
Одобрен решением Св. Синода 20 октября 1992 года.
Память: 06 февраля (24 января ст. ст.); 06 июня (24 мая ст. ст.)
Утвержден для общецерковного использования.

Конда́к 1.
Избра́нная уго́дница и Христа́ ра́ди юро́дивая, свята́я блаже́нная ма́ти Ксе́ние, избра́вшая по́двиг терпе́ния и злострада́ния, хвале́бное пе́ние прино́сим ти́, чту́щия святу́ю па́мять твою́. Ты́ же заступи́ на́с от вра́г ви́димых и неви́димых, да зове́м ти́:

Ра́дуйся, Ксе́ние блаже́нная, моли́твеннице о душа́х на́ших.

И́кос 1.
Равноа́нгельнаго жития́ взыска́ла еси́, блаже́нная ма́ти, по успе́нии му́жа твоего́ отве́ргла еси́ ми́ра сего́ красоту́ и вся́, я́же в не́м: по́хоть оче́с, по́хоть пло́ти и го́рдость жите́йскую, юро́дством ра́зум Христо́в стяжа́ла еси́. Того́ ра́ди услы́ши от на́с похвалы́, тебе́ возноси́мыя:

Ра́дуйся, житие́м твои́м Андре́ю, Христа́ ра́ди юро́дивому ра́вная; ра́дуйся, и́мени своего́ отре́кшаяся, себе́ же уме́ршей именова́вшая.

Ра́дуйся, в юро́дстве и́мя му́жа твоего́ Андре́я прия́вшая; ра́дуйся, и́менем му́жеским назва́вшись, не́мощи же́нской отреши́вшаяся.

Ра́дуйся, все́ име́ние твое́ до́брым лю́дям и ни́щим разда́вшая; ра́дуйся, нищету́ доброво́льную Христа́ ра́ди прия́вшая.

Ра́дуйся, ве́ка сего́ суему́дрия юро́дством твои́м отверга́тися на́с научи́вшая; ра́дуйся, блага́я уте́шительнице все́х, в моли́тве к тебе́ прибега́ющих.

Ра́дуйся, Ксе́ние блаже́нная, моли́твеннице о душа́х на́ших.

Конда́к 2.
Ви́дя стра́нное твое́ житие́, я́ко ты́ презре́ла еси́ до́м сво́й и вся́кое мирско́е бога́тство, родны́е по пло́ти безу́мной тя́ полага́ху, лю́дие же гра́да Петро́ва, ви́дя смире́ние твое́, нестяжа́ние и во́льную нищету́, воспе́ли Бо́гу: Аллилу́иа.

И́кос 2.
Ра́зум, от Бо́га тебе́ да́нный, ты́, Ксе́ние блаже́нная, в мни́мом безу́мии скры́ла еси́; в суете́ гра́да вели́каго а́ки пусты́нница жила́ еси́, моли́твы Бо́гу свои́ вознося́ непреста́нно. Мы́ же, дивя́щеся таково́му житию́ твоему́, взыва́ем тебе́ хвале́бно:

Ра́дуйся, кре́ст тя́жкий юро́дства, от Бо́га тебе́ да́нный, на ра́ма своя́ прия́вшая; ра́дуйся, мни́мым безу́мием сия́ние благода́ти скрыва́вшая.

Ра́дуйся, да́р прозорли́вости смире́нием кра́йним и по́двигом моли́твы стяжа́вшая; ра́дуйся, да́р се́й на по́льзу и спасе́ние стра́ждущих явля́вшая.

Ра́дуйся, страда́ния людски́я прозорли́во в да́ли необозри́мей зре́вшая; ра́дуйся, жене́ до́брой о рожде́нии сы́на проре́кшая.

Ра́дуйся, я́ко жене́ то́й у Бо́га ча́до испроси́вшая; ра́дуйся, все́х к Бо́гу в моли́тве прибега́ти научи́вшая.

Ра́дуйся, Ксе́ние блаже́нная, моли́твеннице о душа́х на́ших.

Конда́к 3.
Си́лою свы́ше, от Бо́га тебе́ дарова́нной, зно́й и лю́ту сту́жу му́жественно претерпева́ла еси́, распина́я пло́ть свою́ со страстьми́ и похотьми́. Те́м же Ду́хом Святы́м просвеща́емая, взыва́ла непреста́нно Бо́гу: Аллилу́иа.

И́кос 3.
Име́я, о блаже́нная, не́бо покро́вом себе́, зе́млю же ло́жем свои́м, отве́ргла еси́ плотоуго́дие Ца́рства Бо́жия ра́ди. Мы́ же, зря́ще таково́е твое́ житие́, со умиле́нием зове́м ти́:

Ра́дуйся, жили́ще свое́ земно́е лю́дям отда́вшая; ра́дуйся, небе́снаго кро́ва взыска́вшая и получи́вшая.

Ра́дуйся, ничто́же земно́е иму́щая, а все́х духо́вно богатя́щая; ра́дуйся, житие́м свои́м терпе́нию на́с науча́ющая.

Ра́дуйся, любо́вь Бо́жию лю́дям показу́ющая; ра́дуйся, плода́ми благоче́стия украше́нная.

Ра́дуйся, терпе́ние и незло́бие ми́ру яви́вшая; ра́дуйся, те́плая предста́тельница на́ша пред престо́лом Всевы́шняго.

Ра́дуйся, Ксе́ние блаже́нная, моли́твеннице о душа́х на́ших.

Конда́к 4.
Бу́рю жите́йскую, во гра́де Петро́ве мяту́щуюся, кро́тостию и незло́бием преодоле́ла еси́, блаже́нная ма́ти, безстра́стие же к тле́нному ми́ру стяжа́ла еси́. Те́м же и пое́ши Бо́гу: Аллилу́иа.

И́кос 4.
Слы́ша о тебе́, я́ко ты́, злостра́жда Христа́ ра́ди, ско́рбных утеша́еши, немощны́х укрепля́еши, заблу́ждших на пу́ть пра́вый наставля́еши, лю́дие стра́ждущия к по́мощи твое́й прибега́ху, воспева́юще тебе́:

Ра́дуйся, пу́ть Христо́в все́м се́рдцем возлюби́вшая; ра́дуйся, кре́ст Христо́в ра́достно поне́сшая.

Ра́дуйся, вся́кое поноше́ние от ми́ра, пло́ти и диа́вола претерпе́вшая; ра́дуйся, даро́в Бо́жиих преиспо́лненная.

Ра́дуйся, любо́вь к бли́жним яви́вшая; ра́дуйся, стра́ждущим лю́дям утеше́ние подава́вшая.

Ра́дуйся, сле́зу пла́чущих отира́вшая; ра́дуйся, благода́тию Ду́ха Свята́го чуде́сно согрева́емая.

Ра́дуйся, Ксе́ние блаже́нная, моли́твеннице о душа́х на́ших.

Конда́к 5.
Боготе́чной звездо́ю яви́лася свя́тость твоя́, Ксе́ние блаже́нная, освети́вшая небоскло́н гра́да Петро́ва. Уже́ бо лю́дем, ги́бнущим в безу́мии греха́, ты́ яви́ла пу́ть спасе́ния, все́х к покая́нию призыва́я, во е́же вопи́ти Бо́гу: Аллилу́иа.

И́кос 5.
Ви́дя по́двиги твоя́ в моли́тве, терпе́нии хла́да и зно́я, благочести́вые лю́ди пыта́хуся ума́лити страда́ния твоя́, оде́жду тебе́ и пи́щу принося́ще. Ты́ же вся́ сия́ ни́щим раздава́ла еси́, жела́я в та́йне по́двиг сво́й сохрани́ти. Мы́ же, дивя́ся во́льней нищете́ твое́й, взыва́ем ти́ си́це:

Ра́дуйся, зно́й и сту́жу Христа́ ра́ди доброво́льно терпе́вшая; ра́дуйся, в моли́тве непреста́нно пребыва́вшая.

Ра́дуйся, гра́д Петро́в всено́щным бде́нием от бе́д огражда́вшая; ра́дуйся, гне́в Бо́жий мно́гажды от него́ отвраща́вшая.

Ра́дуйся, во все́ дни́ го́да ноча́ми в по́ле моли́вшаяся; ра́дуйся, сла́дость ра́йскую в нищете́ духо́вной вкуси́вшая.

Ра́дуйся, я́ко в сла́дости се́й вся́ земна́я оста́вившая; ра́дуйся, я́ко вся́ в Бо́зе пребыва́вшая.

Ра́дуйся, Ксе́ние блаже́нная, моли́твеннице о душа́х на́ших.

Конда́к 6.
Пропове́дуют свя́тость жития́ твоего́, богоблаже́нная, вси́ изба́вленнии тобо́й от многоразли́чных боле́зней, бе́д и скорбе́й, бога́тии и убо́зии, ста́рцы и ю́ныя. Те́м же и мы́, прославля́юще тя́, Бо́гу вопие́м: Аллилу́иа.

И́кос 6.
Возсия́ла сла́ва по́двигов твои́х, блаже́нная ма́ти, егда́ ты́ но́щию строи́телем це́ркви Смоле́нской ка́мни та́йно носи́ла еси́, облегча́я де́лателей церко́вных. Сия́ ве́дуще, и мы́ гре́шнии зове́м ти́ такова́я:

Ра́дуйся, та́йно твори́ти доброде́тели на́с науча́ющая; ра́дуйся, к по́двигом благоче́стия все́х призыва́ющая.

Ра́дуйся, строи́телем хра́мов Бо́жиих помога́ющая; ра́дуйся, свя́тость церко́вную возлюби́вшая.

Ра́дуйся, труды́ на́ши на пути́ спасе́ния облегча́ющая; ра́дуйся, к тебе́ прибега́ющих ско́рая помо́щница.

Ра́дуйся, все́м скорбя́щим блага́я уте́шительница; ра́дуйся, гра́да Петро́ва небе́сная засту́пница.

Ра́дуйся, Ксе́ние блаже́нная, моли́твеннице о душа́х на́ших.

Конда́к 7.
Хотя́ изба́вити от ско́рби пла́чущаго врача́, жену́ хорони́вшаго, ты́ повеле́ла не́коей деви́це на О́хту бежа́ти и та́мо му́жа себе́ обрести́ и уте́шити. И соверши́шася та́ко, я́коже ты́ рекла́ еси́. Они́ же в ра́дости воспе́ша Бо́гу: Аллилу́иа.

И́кос 7.
Но́вое чу́до в моли́тве свое́й показа́ла еси́ ты́, блаже́нная ма́ти, егда́ рекла́ еси́ жене́ благочести́вой: “Возьми́ пята́к, поту́хнет”. Си́м прорекла́ е́й о пожа́ре до́ма ея́. И по моли́тве твое́й пла́мень огня́ угасе́. Мы́ же, ве́дяще сия́, вопие́м ти́ похва́льная:

Ра́дуйся, ско́рби людски́я угаша́ющая; ра́дуйся, дерзнове́ние пред Бо́гом за стра́ждущих яви́вшая.

Ра́дуйся, свече́ неугаси́мая, в моли́твах к Бо́гу я́рко горя́щая; ра́дуйся, предста́тельница на́ша в беда́х и напа́стех.

Ра́дуйся, страстьми́ одержи́мых от ги́бели спаса́ющая; ра́дуйся, благочести́вых де́в от бра́ка неве́рнаго отвраща́ющая.

Ра́дуйся, клевето́ю уя́звленных от отча́яния избавля́ющая; ра́дуйся, на суде́ непра́веднем ско́рая защи́тница.

Ра́дуйся, Ксе́ние блаже́нная, моли́твеннице о душа́х на́ших.

Конда́к 8.
Стра́нницей бездо́мней прошла́ еси́ пу́ть жи́зни твое́й в сто́льном гра́де оте́чества на́шего, в вели́цем терпе́нии ско́рби и поноше́ния неся́. Ны́не же в го́рнем Иерусали́ме пребыва́я, в ра́дости пое́ши Бо́гу: Аллилу́иа.

И́кос 8.
Все́м вся́ была́ еси́, Ксе́ние блаже́нная: скорбя́щим утеше́ние, немощны́м покро́в и защище́ние, печа́льным ра́дование, ни́щим одея́ние, боля́щим исцеле́ние. Сего́ ра́ди и вопие́м тебе́:

Ра́дуйся, в го́рних, оби́телях пребыва́ющая; ра́дуйся, о на́с гре́шных та́мо моля́щаяся.

Ра́дуйся, благи́й о́браз служе́ния Бо́гу яви́вшая; ра́дуйся, уни́женных и гони́мых покрови́тельница.

Ра́дуйся, правосла́вный люд моли́твами твои́ми заступа́ющая; ра́дуйся, оби́димых и моля́щихся тебе́ защища́ющая.

Ра́дуйся, оби́дящих вразумля́ющая; ра́дуйся, неве́рных и глуми́телей посрамля́ющая.

Ра́дуйся, Ксе́ние блаже́нная, моли́твеннице о душа́х на́ших.

Конда́к 9.
Вся́кия претерпе́ла еси́ боле́зни, блаже́нная ма́ти, нищету́ теле́сную, гла́д и жа́жду, еще́ же и поноше́ние от люде́й беззако́нных, и́же мня́ху тя́ безу́мной бы́ти. Ты́ же, Го́споду моля́ся, вы́ну взыва́ла Ему́: Аллилу́иа.

И́кос 9.
Вети́я многовеща́нныя не мо́гут разуме́ти, ка́ко ты́ безу́мием свои́м безу́мие ми́ра сего́ обличи́ла еси́ и не́мощию свое́ю посрами́ла еси́ кре́пкия и му́дрыя. Не ве́дают бо в тебе́ Бо́жией си́лы и Бо́жией прему́дрости. Мы́ же, по́мощь твою́ получи́вше, пое́м ти́ такова́я:

Ра́дуйся, Боже́ственнаго Ду́ха носи́тельнице; ра́дуйся, со апо́столом Па́влом не́мощию свое́ю хвали́вшаяся.

Ра́дуйся, мни́мым безу́мием свои́м ми́р обличи́вшая; ра́дуйся, красоту́ ве́ка своего́ спасе́ния ра́ди отве́ргшая.

Ра́дуйся, небе́сная бла́га все́м се́рдцем возлюби́вшая; ра́дуйся, на пу́ть спасе́ния на́с призыва́ющая.

Ра́дуйся, во грехе́ пия́нства гро́зная обличи́тельнице; ра́дуйся, безме́здным враче́м и ми́лостивым все́м бы́вшая.

Ра́дуйся, Ксе́ние блаже́нная, моли́твеннице о душа́х на́ших.

Конда́к 10.
Хотя́ спасти́ ду́шу, ты́ пло́ть свою́ со страстьми́ и похотьми́ распя́ла еси́ и, невозвра́тно себя́ отве́ргши, кре́ст сво́й на ра́ма своя́ возложи́ла еси́ и Христу́ все́м се́рдцем после́довала еси́, поя́ Ему́: Аллилу́иа.

И́кос 10.
Стена́ еси́ тве́рдая и прибе́жище необори́мое яви́лась моля́щимся тебе́, ма́ти Ксе́ние. Те́м же заступа́й и на́с от вра́г ви́димых и неви́димых моли́твами твои́ми, да зове́м ти́:

Ра́дуйся, на тру́д духо́вный на́с воздвига́ющая; ра́дуйся, от сете́й вра́жиих на́с избавля́ющая.

Ра́дуйся, фимиа́м кади́льный, Бо́гу приноси́мый; ра́дуйся, ми́р Бо́жий в сердца́ люде́й принося́щая.

Ра́дуйся, ду́х зло́бы в сердца́х озло́бленных угаша́ющая; ра́дуйся, де́тем благи́м благослове́ние подаю́щая.

Ра́дуйся, та́йною моли́твою и́х от боле́зней исцеля́ющая; ра́дуйся, ми́ру озло́бленному му́дрость Бо́жию яви́вшая.

Ра́дуйся, Ксе́ние блаже́нная, моли́твеннице о душа́х на́ших.

Конда́к 11.
Пе́ние хвале́бное прино́сят ти́, Ксе́ние блаже́нная, спа́сшиеся твои́ми моли́твами от бе́д и скорбе́й, и вся́ких напа́стей, и ку́пно с тобо́ю ра́достно пою́т Бо́гу: Аллилу́иа.

И́кос 11.
Светоза́рным све́том яви́лось житие́ твое́, свята́я ма́ти, во мра́ке жития́ сего́ освеща́ющим лю́ди. Ты́ бо па́дших из ти́ны греха́ изба́вила еси́ и к све́ту Христо́ву напра́вила еси́ пу́ть и́х. Те́м же и зове́м ти́:

Ра́дуйся, правосла́вных люде́й Бо́жиим све́том просвеща́ющая: ра́дуйся, Христо́ва уго́дница, в ми́ре надми́рно пожи́вшая.

Ра́дуйся, труды́ мно́гими вели́кую благода́ть стяжа́вшая; ра́дуйся, во тьме́ греха́ благода́тию Бо́жиею сия́вшая.

Ра́дуйся, отча́явшимся на пути́ спасе́ния ру́ку по́мощи подаю́щая; ра́дуйся, немощны́х в ве́ре укрепля́ющая.

Ра́дуйся, духо́в зло́бы посрамля́ющая; ра́дуйся, житие́м свои́м А́нгелов удиви́вшая.

Ра́дуйся, Ксе́ние блаже́нная, моли́твеннице о душа́х на́ших.

Конда́к 12.
Благода́ть оби́льно источа́еши, Ксе́ние блаже́нная, на чту́щих па́мять твою́ и прибега́ющих к покро́ву твоему́. Те́м же и на́м, тебе́ моля́щимся, источи́ от Бо́га струи́ исцеле́ния, да зове́м Ему́: Аллилу́иа.

И́кос 12.
Пою́ще мно́гая чудеса́ твоя́, блаже́нная ма́ти, восхваля́ем тя́ и всеусе́рдно мо́лим, не оста́ви на́с гре́шных в ско́рбных обстоя́ниях, но умоли́ Го́спода си́л, да не отпаде́м от ве́ры на́шея правосла́вныя, в Не́м же тобо́ю утвержда́еми зове́м ти́:

Ра́дуйся, сострада́ти стра́ждущим на́с науча́ющая; ра́дуйся, не́мощи на́ша всеусе́рдно врачу́ющая.

Ра́дуйся, распина́ти пло́ть со страстьми́ и похотьми́ науча́ющая; ра́дуйся, о чту́щих па́мять твою́ хода́таице и покрови́тельнице.

Ра́дуйся, ско́рбный пу́ть проше́дшая; ра́дуйся, спасе́ние ве́чное си́м улучи́вшая.

Ра́дуйся, ко гро́бу твоему́ притека́ющим отра́ду подаю́щая; ра́дуйся, о спасе́нии Оте́чества на́шего при́сно хода́тайствующая.

Ра́дуйся, Ксе́ние блаже́нная, моли́твеннице о душа́х на́ших.

Конда́к 13.
О, свята́я блаже́нная ма́ти Ксе́ние, в житии́ твое́м кре́ст тя́жкий поне́сшая! Приими́ от на́с, гре́шных, моле́ние сие́, к тебе́ приноси́мое. Огради́ на́с моли́твами твои́ми от наве́тов духо́в тьмы́ и все́х, мы́слящих на́м зла́я. Умоли́ всеще́драго Бо́га пода́ти на́м си́лу и кре́пость, да ки́йждо от на́с во́зьмет кре́ст сво́й и во сле́д Христу́ гряде́т, поя́ Ему́ с тобо́ю: Аллилу́иа.

Этот конда́к чита́ется три́жды, зате́м и́кос 1-й и конда́к 1-й.

И́кос 1.
Равноа́нгельнаго жития́ взыска́ла еси́, блаже́нная ма́ти, по успе́нии му́жа твоего́ отве́ргла еси́ ми́ра сего́ красоту́ и вся́, я́же в не́м: по́хоть оче́с, по́хоть пло́ти и го́рдость жите́йскую, юро́дством ра́зум Христо́в стяжа́ла еси́. Того́ ра́ди услы́ши от на́с похвалы́, тебе́ возноси́мыя:

Ра́дуйся, житие́м твои́м Андре́ю, Христа́ ра́ди юро́дивому ра́вная; ра́дуйся, и́мени своего́ отре́кшаяся, себе́ же уме́ршей именова́вшая.

Ра́дуйся, в юро́дстве и́мя му́жа твоего́ Андре́я прия́вшая; ра́дуйся, и́менем му́жеским назва́вшись, не́мощи же́нской отреши́вшаяся.

Ра́дуйся, все́ име́ние твое́ до́брым лю́дям и ни́щим разда́вшая; ра́дуйся, нищету́ доброво́льную Христа́ ра́ди прия́вшая.

Ра́дуйся, ве́ка сего́ суему́дрия юро́дством твои́м отверга́тися на́с научи́вшая; ра́дуйся, блага́я уте́шительнице все́х, в моли́тве к тебе́ прибега́ющих.

Ра́дуйся, Ксе́ние блаже́нная, моли́твеннице о душа́х на́ших.

Конда́к 1.

Избра́нная уго́дница и Христа́ ра́ди юро́дивая, свята́я блаже́нная ма́ти Ксе́ние, избра́вшая по́двиг терпе́ния и злострада́ния, хвале́бное пе́ние прино́сим ти́, чту́щия святу́ю па́мять твою́. Ты́ же заступи́ на́с от вра́г ви́димых и неви́димых, да зове́м ти́:

Ра́дуйся, Ксе́ние блаже́нная, моли́твеннице о душа́х на́ших.

Моли́тва пе́рвая.
О, свята́я всеблаже́нная ма́ти Ксе́ние! Под покро́вом Всевы́шняго жи́вшая, ведо́мая и укрепля́емая Богома́терию, гла́д и жа́жду, хла́д и зно́й, поноше́ния и гоне́ния претерпе́вшая, да́р прозорли́вости и чудотворе́ния от Бо́га получи́ла еси́ и под се́нию Всемогу́щаго поко́ишися. Ны́не свята́я Це́рковь, я́ко благоуха́нный цве́т, прославля́ет тя́. Предстоя́ще на ме́сте твоего́ погребе́ния, пред о́бразом твои́м святы́м, я́ко живе́й ти́, су́щей с на́ми, мо́лимся ти́: приими́ проше́ния на́ша и принеси́ и́х ко престо́лу милосе́рдаго Отца́ Небе́снаго, я́ко дерзнове́ние к Нему́ иму́щая, испроси́ притека́ющим к тебе́ ве́чное спасе́ние, на блага́я дела́ и начина́ния на́ша ще́дрое благослове́ние, от вся́ких бе́д и скорбе́й избавле́ние. Предста́ни святы́ми твои́ми моли́твами пред Всеми́лостивым Спаси́телем на́шим о на́с, недосто́йных и гре́шных. Помози́, свята́я блаже́нная ма́ти Ксе́ние, младе́нцы све́том свята́го креще́ния озари́ти и печа́тию да́ра Ду́ха Свята́го запечатле́ти, о́троки и отрокови́цы в ве́ре, че́стности, богобоя́зненности воспита́ти и успе́хи в уче́нии и́м дарова́ти; боля́щия и неду́гующия исцели́, семе́йным любо́вь и согла́сие ниспосли́, мона́шествующих по́двигом до́брым подвиза́тися удосто́й и от поноше́ний огради́, па́стыри в кре́пости Ду́ха Свята́го утверди́, наро́д и страну́ на́шу в ми́ре и безмяте́жии сохрани́, о лише́нных в предсме́ртный ча́с причаще́ния Святы́х Христо́вых Та́йн умоли́. Ты́ на́ша наде́жда и упова́ние, ско́рое услы́шание и избавле́ние, тебе́ благодаре́ние возсыла́ем и с тобо́ю сла́вим Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.

Моли́тва втора́я.
О препро́стая о́бразом жития́ своего́, бездо́мная на земли́, насле́днице же оби́телей Отца́ Небе́снаго, блаже́нная стра́ннице Ксе́ние! Я́коже пре́жде к надгро́бию твоему́ неду́жнии и ско́рбнии припа́давшии и а́бие утеше́ниями исполня́емии, си́це ны́не и мы́ (имена́), обурева́емии тлетво́рными обстоя́нии, тебе́ прибега́юще, с наде́ждою про́сим: помоли́ся, блага́я небоше́ственнице, дабы́ испра́вилися стопы́ на́ша по словеси́ Госпо́дню к де́ланию за́поведей Его́, и да упраздни́тся богобо́рное безбо́жие, плени́вшее гра́д тво́й и страну́ твою́, поверга́ющее на́с, многогре́шных, в сме́ртное братоненавиде́ние, го́рдое самовозбеше́ние и ху́льное отча́яние. О, блаже́ннейшая Христа́ ра́ди, посрами́вшая суему́дрость ве́ка сего́, испроси́ у Творца́ и Пода́теля вся́ческих бла́г дарова́ти на́м смире́ния, кро́тости и любве́ в сокро́вище се́рдца на́шего, ве́ры в укрепле́ние моли́твы, наде́жды в покая́нии, кре́пости в многотру́днем житии́, милосе́рдаго исцеле́ния души́ и те́ла на́шего, целому́дрия в супру́жестве и благопопече́ния о бли́жних и и́скренних свои́х, всего́ жития́ на́шего обновле́ние в чисти́тельней ба́не покая́ния, я́ко да всехва́льно воспева́юще па́мять твою́, просла́вим в тебе́ чудоде́йствующаго, Отца́ и Сы́на и Свята́го Ду́ха, Тро́ицу Единосу́щную и Неразде́льную во ве́ки веко́в. Ами́нь.

Моли́тва тре́тья.
О пресла́вная свята́я блаже́нная ма́ти на́ша Ксе́ние, те́плая о на́с пред Бо́гом моли́твеннице! Я́коже пре́жде к надгро́бию твоему́ припа́давшии, си́це ны́не и мы́ по прославле́нии твое́м к моще́м твои́м прибега́юще, про́сим: помоли́ся Го́споду, да освяти́т на́ши души́ и телеса́, да просвети́т у́м, очи́стит со́весть от вся́кия скве́рны, нечи́стых по́мыслов, лука́вых и ху́льных умышле́ний и от вся́каго превозноше́ния, го́рдости же и киче́ния, высокоу́мия же и де́рзости, от вся́каго фарисе́йскаго лицеме́рия, и от вся́каго сту́днаго и лука́ваго обы́чая на́шего; да да́рует на́м и́скреннее покая́ние, сокруше́ние серде́ц на́ших, смиренному́дрие, кро́тость же и ти́хость, благогове́ние, ра́зум же духо́вный со вся́ким благоразу́мием и благодаре́нием. Утаи́вшая себе́ от му́дрых ве́ка сего́, но Бо́гу зна́емая, испроси́ же стране́ на́шей Росси́йстей от бе́д лю́тых избавле́ние, всего́ на́шего жития́ обновле́ние и исправле́ние, соблюди́ на́с во вся́ком благочести́вом правосла́вном испове́дании ве́ры христиа́нския, я́ко да ублажа́юще тя́ сподо́бимся во вся́ дни́ воспева́ти, благодари́ти и сла́вити Отца́ и Сы́на и Свята́го Ду́ха, Тро́ицу Единосу́щную, Животворя́щую и Неразде́льную во ве́ки веко́в. Ами́нь.

Моли́тва четве́ртая.
О свята́я уго́дница Бо́жия блаже́нная Ксе́ние! При́зри ми́лостиво твои́м о́ком на на́с, ра́б Бо́жиих (имена́), честне́й твое́й ико́не уми́льно моля́щихся и прося́щих у тебе́ по́мощи и заступле́ния. Простри́ ко Го́споду Бо́гу на́шему те́плыя твоя́ моли́твы и испроси́ душа́м на́шим оставле́ние прегреше́ний. Се́ бо мы́ се́рдцем сокруше́нным, и ду́хом смире́нным тебе́ хода́таицу ми́лостивую ко Влады́це и моли́твенницу за ны́, гре́шныя, призыва́ем, я́ко ты́ прия́ла еси́ от Него́ благода́ть моли́тися за ны́ и от бе́д избавля́ти. Тебе́ у́бо про́сим, не пре́зри на́с недосто́йных, моля́щихся тебе́ и твое́й по́мощи тре́бующих, и исхода́тайствуй все́м вся́ ко спасе́нию поле́зная, я́ко да твои́ми ко Го́споду Бо́гу моли́твами получи́вши благода́ть и ми́лость просла́вим все́х благи́х Исто́чника и Даропода́теля и Бо́га Еди́наго, в Тро́ице Святе́й сла́вимаго. Отца́ и Сы́на и Свята́го Ду́ха, ны́не и при́сно и во ве́ки веко́в.

-------------------------------------------------------------------------------------------------

Акафист святой блаженной Ксении Петербургской (второй)

Конда́к 1.
Избра́нная уго́днице Христо́ва, свята́я блаже́нная Ксе́ние, хвале́бное пе́ние ти́ прино́сим, чту́ще терпе́ние твое́ и злострада́ние во́льное; ты́ же, иму́щи дерзнове́ние ко Го́споду, во вся́ких беда́х и напа́стех заступа́й на́с, гре́шных, взыва́ющих к тебе́:

Ра́дуйся, Ксе́ние блаже́нная, моли́твеннице о душа́х на́ших.

И́кос 1.
Равноа́нгельски на земли́ пожила́ еси́, блаже́нная ма́ти, по успе́нии му́жа твоего́, без приуготовле́ния христиа́нскаго внеза́пу сконча́вшагося, отве́ргла еси́ жи́знь мирску́ю, моля́щи Бо́га супру́га твоего́ ду́шу поми́ловати, по́двиг юро́дства на себе́ прия́вши, стяжа́ла еси́ соверше́нство духо́вное. Того́ ра́ди услы́ши от на́с похвалы́ сия́, тебе́ возноси́мыя:

Ра́дуйся, Христо́ва уго́днице, в ми́ре надми́рно пожи́вшая; ра́дуйся вся́ прило́ги ми́ра, пло́ти и диа́вола победи́вшая.

Ра́дуйся, нищету́ во́льную на всю́ жи́знь избра́вшая; ра́дуйся, сокро́вище на Небеси́ име́ти возжела́вшая.

Ра́дуйся, житие́м твои́м Андре́ю, Христа́ ра́ди юро́дивому, ра́вная; ра́дуйся, от все́х люде́й правосла́вных люби́мая и сла́вимая.

Ра́дуйся, о часе́ сме́ртнем по́мнити на́с призыва́ющая; ра́дуйся, бли́жняго ду́шу па́че ми́ра сего́ люби́ти на́с науча́ющая.

Ра́дуйся, Ксе́ние блаже́нная, моли́твеннице о душа́х на́ших.

Конда́к 2.
Ви́дяще стра́нное житие́ твое́, блаже́нная, я́ко во цве́те мла́дости твоея́ во оде́жду му́жа твоего́ усо́пшаго облекла́ся еси́, и́менем его́ нарекла́ся еси́, себе́ уме́ршую бы́ти глаго́лющи, до́м же тво́й и вся́ блага́я земна́я оста́вивши, скита́лицу себе́ сотвори́ла еси́, сро́дницы твои́ безу́мную тя́ бы́ти мня́ху, лю́дие же боголюби́вии воспе́ша: Аллилу́иа.

И́кос 2.
Ра́зум, от Бо́га ти́ дарова́нный, в безу́мии мни́мом сокры́ла еси́, блаже́нная Ксе́ние; в суете́ же гра́да вели́каго, а́ки пусты́нница, пребыва́ла еси́, моли́твы своя́ к Бо́гу вознося́щи непреста́нно. Мы́ же, дивя́щеся житию́ твоему́, воспева́ем ти́ си́це:

Ра́дуйся, кре́ст тя́жкий юро́дства, от Бо́га ти́ да́нный, на ра́мо свое́ прия́вшая; ра́дуйся, мни́мым безу́мием сия́ние благода́ти сокры́вшая.

Ра́дуйся, и́менем му́жеским наре́кшися, не́мощи же́нския отреши́вшаяся; ра́дуйся, печа́ли и ско́рби кро́тце терпе́вшая.

Ра́дуйся, все́ име́ние твое́ бе́дным лю́дем разда́вшая; ра́дуйся, жили́ще Ду́ху Свято́му в се́рдце твое́м угото́вившая.

Ра́дуйся, все́м прибега́ющим к тебе́ благо́е утеше́ние; ра́дуйся, от сме́рти внеза́пныя избавле́ние.

Ра́дуйся, Ксе́ние блаже́нная, моли́твеннице о душа́х на́ших.

Конда́к 3.
Си́лою, свы́ше ти́ дарова́нною, благода́тию и му́жеством, зно́й и сту́жу лю́тую претерпева́ла еси́, всено́щно моля́щися и покло́ны творя́щи; те́мже и просла́влена бы́сть свя́тость твоя́, блаже́нная Ксе́ние, во Оте́честве на́шем многострада́льнем и во все́м ми́ре правосла́внем, да зове́м с тобо́ю Бо́гу: Аллилу́иа.

И́кос 3.
Име́ла еси́, о ма́ти блаже́нная, не́бо покро́в и зе́млю ло́же свое́, о те́ле, во оде́жду ве́тхую облече́ннем, небрегла́ еси́, моли́твы же к Бо́гу пла́менне возноси́ла еси́, сего́ ра́ди воспева́ем ти́ си́це:

Ра́дуйся, ве́к тво́й земны́й без кро́ва прове́дшая; ра́дуйся, Небе́снаго кро́ва взыска́вшая и того́ улучи́вшая.

Ра́дуйся, по вся́ дни́ но́щию в по́ли моли́вшаяся; ра́дуйся, покло́ны земны́я на вся́ страны́ све́та та́мо твори́вшая.

Ра́дуйся, гра́д Петро́в всено́щным бде́нием от бе́д огражда́вшая; ра́дуйся, гне́в Бо́жий от него́ мно́гажды отвраща́вшая.

Ра́дуйся, благода́тию Ду́ха Свята́го чуде́сно согрева́емая; ра́дуйся, хла́д лю́тый ду́ш на́ших моли́твою твое́ю растаява́ющая.

Ра́дуйся, Ксе́ние блаже́нная, моли́твеннице о душа́х на́ших.

Конда́к 4.
Бу́рю жите́йскую, во гра́де Петро́ве мяту́щуюся, кро́тостию и незло́бием препобежда́ла еси́, ма́ти блаже́нная, безстра́стие же посреде́ ми́ра су́етнаго стяжа́ла еси́ и та́ко, Ду́хом Святы́м просвеща́емая, взыва́ла еси́ Пода́телю тишины́ серде́чныя Бо́гу: Аллилу́иа.

И́кос 4.
Слы́шаша лю́дие да́р прозре́ния чу́дный, тобо́ю явле́нный, свята́я ма́ти, и удиви́шася. Се́, жене́ не́коей рекла́ еси́: возми́ пята́к, зде́ ца́рь на коне́, поту́хнет. Та́ же не ве́дающи, я́ко ты́ запале́ние до́ма ея́ прозре́ла еси́, притече́ во своя́ си́ и узре́ до́м сво́й во огни́ горя́щ, и а́бие по моли́тве твое́й пла́мень огня́ угасе́. Мно́зи же стра́ждущии к по́мощи твое́й прибега́ху, ю́же стяжа́вше, та́ко взыва́ша ти́:

Ра́дуйся, да́р прозре́ния смире́нием кра́йним стяжа́вшая; ра́дуйся, да́р се́й на по́льзу и спасе́ние стра́ждущим явля́вшая.

Ра́дуйся, свеще́ негаси́мая, к Бо́гу в моли́твах горе́вшая; ра́дуйся, ве́рою твое́ю пла́менною запале́ние домо́в угаша́вшая.

Ра́дуйся, гряду́щия ско́рби людски́я, а́ки настоя́щия, зре́вшая; ра́дуйся, вра́ч безме́здный и милосе́рдый лю́дем бы́вшая.

Ра́дуйся, я́ко и на́с, немощны́х в ве́ре, укрепля́еши; ра́дуйся, я́ко сия́нием свя́тости твоея́ лю́ди правосла́вныя озаря́еши.

Ра́дуйся, Ксе́ние блаже́нная, моли́твеннице о душа́х на́ших.

Конда́к 5.
Боготе́чная звезда́ яви́ся свя́тость твоя́ на тве́рди гра́да Петро́ва, уго́днице Бо́жия, заре́ю свое́ю сердца́ просвеща́ющая: уже́ бо лю́дем, в безу́мии греха́ погиба́ющим, пу́ть спасе́ния указа́ла еси́, к покая́нию и́х наставля́ющи, во е́же вопи́ти Бо́гу: Аллилу́иа.

И́кос 5.
Ви́дяще по́двиги твоя́ моли́твенныя, терпе́ние хла́да и зно́я вели́кое, лю́дие осла́бити жела́ху злострада́ния твоя́; ты́ же оде́жду и вся́, и́ми приноси́мая, ни́щим раздава́ла еси́, нищету́ свою́, а́ки сокро́вище, храня́щи. Сего́ ра́ди слы́шиши от на́с сицева́я:

Ра́дуйся, бога́тство твое́ то́кмо в любви́ к Бо́гу и бли́жним полага́вшая; ра́дуйся, ничто́же земно́е име́вшая и все́х духо́вно богати́вшая.

Ра́дуйся, ми́лостивым твои́м се́рдцем стра́ждущим сострада́вшая; ра́дуйся, по́мощь и́м чрез до́брых люде́й посыла́вшая.

Ра́дуйся, чу́ждая ми́ру, в ми́ре живу́щим бла́го твори́вшая; ра́дуйся, ве́ка сего́ суему́дрия отверга́тися научи́вшая.

Ра́дуйся, пла́кати с пла́чущими на́с подвига́ющая; ра́дуйся, от тя́жкаго сна́ грехо́внаго пробужда́ющая.

Ра́дуйся, Ксе́ние блаже́нная, моли́твеннице о душа́х на́ших.

Конда́к 6.
Пропове́дана бы́сть свя́тость жития́ твоего́, блаже́нная, жи́телем гра́да твоего́, егда́ ты́, о младе́нце, еще́ не ро́ждшемся, пеку́щися, жене́ до́брей, в до́ме, тобо́ю дарова́нном, жи́вшей, рекла́ еси́: Бо́г тебе́ сы́на посла́, теки́ на кла́дбище Смоле́нское. Та́я же, со тща́нием прите́кши, сироту́, рожде́нна ма́терию, внеза́пу на пути́ пострада́вшею и сконча́вшеюся, в до́м сво́й прия́ла е́сть; вся́ же ле́та жития́ своего́, тебе́ благодаря́ще, сия́ семья́ благода́тная Бо́гу Человеколю́бцу взыва́ше: Аллилу́иа.

И́кос 6.
Возсия́ла е́сть сла́ва по́двигов твои́х, блаже́нная ма́ти Ксе́ние, егда́ но́щию на ве́рх хра́ма Смоле́нскаго ка́мение, тая́щися, носи́ла еси́, до́му Пречи́стей возгради́тися посо́бствующи. Ны́не же вси́ моля́щиися во святе́м хра́ме се́м и во все́м ми́ре Бо́жием, взира́юще на о́браз тво́й, воспева́ют ти́ такова́я:

Ра́дуйся, та́йно твори́ти добро́ науча́ющая; ра́дуйся, к по́двигом благоче́стия все́х призыва́ющая.

Ра́дуйся, строи́телем хра́мов Бо́жиих помога́ющая; ра́дуйся, святы́ню церко́вную возлюби́вшая.

Ра́дуйся, в де́лех благи́х усе́рдное поспеше́ние; ра́дуйся, трудо́в на́ших на пути́ спасе́ния облегче́ние.

Ра́дуйся, под кро́вом Бо́жия Ма́тере по́двиги твори́вшая и та́ко почи́вшая; ра́дуйся, с Не́ю ны́не на Небесе́х о на́с Христа́ моля́щая.

Ра́дуйся, Ксе́ние блаже́нная, моли́твеннице о душа́х на́ших.

Конда́к 7.
Хотя́ще судьбы́ людски́я во блага́я устро́ити, повеле́ла еси́ де́ве кро́тцей на О́хту тещи́, проре́кши, я́ко «му́ж тво́й та́мо жену́ погреба́ет». Та́ же, а́ще и недоумева́шеся, оба́че не ослу́шася глаго́ла твоего́, и та́мо вдовца́ мла́да, над гро́бом жены́ рыда́вшаго, сре́тила е́сть и утеше́ние в моли́тве ему́ подаде́. Ле́ту же мину́вшу, о́на венча́стася, и та́ко мно́гая ле́та в любви́ и согла́сии пожи́вше, ча́д свои́х наставля́ху тебе́, свята́я ма́ти, чти́ти, Бо́гу же воспева́ти пе́снь: Аллилу́иа.

И́кос 7.
Но́вое чу́до показа́ла еси́, блаже́нная, посреде́ скве́рны людски́я ду́шу твою́, юро́дством сокры́тую, в кро́тости а́нгельстей соблю́дши. Научи́ и на́с, ма́ти Ксе́ние, и ма́лыя до́ли скорбе́й твои́х не терпя́щих и в ро́поте на Бо́га и бли́жняго дни́ на́ши иждива́ющих, вся́ свы́ше посыла́емая в терпе́нии сноси́ти, да взира́юще на по́двиги твоя́, чи́стым се́рдцем зове́м ти́ си́це:

Ра́дуйся, ми́ру злохла́дному благода́тную му́дрость яви́вшая; ра́дуйся, нищеты́ духо́вныя блаже́нство вкуси́вшая.

Ра́дуйся, о́браз терпе́ния и благосе́рдия на́м подаю́щая; ра́дуйся, смире́нием и покая́нием от бе́д избавля́тися науча́ющая.

Ра́дуйся, с моли́твою и любо́вию дете́й благословля́вшая; ра́дуйся, прикоснове́нием руку́ твое́ю чуде́сно и́х исцеля́вшая.

Ра́дуйся, уны́ние тя́жкое, ду́шу сокруша́ющее, от на́с отводя́щая; ра́дуйся, наде́ждою несумне́нною на ми́лость Бо́жию окриля́ющая.

Ра́дуйся, Ксе́ние блаже́нная, моли́твеннице о душа́х на́ших.

Конда́к 8.
Стра́нница бездо́мная протекла́ еси́ пу́ть ско́рбный жития́ твоего́ в сто́льнем гра́де Оте́чества на́шего, ма́ти блаже́нная, взыску́ющи гра́да вы́шняго, Иерусали́ма Небе́снаго; ны́не же в не́м со А́нгелы и все́ми святы́ми пое́ши Бо́гу: Аллилу́иа.

И́кос 8.
Вся́ в моли́твах ко Творцу́ пребыва́ющи, ма́ти свята́я, до успе́ния твоего́, от страда́ний и по́двигов к жи́зни блаже́нней и ве́чней невозбра́нно прешла́ еси́. Сего́ ра́ди, преклоня́юще коле́на серде́ц на́ших, благогове́йное пе́ние ти́ прино́сим:

Ра́дуйся, во оби́телех го́рних с ли́ки святы́х лику́ющая; ра́дуйся, и на́с, тебе́ моля́щихся, та́мо не забыва́ющая.

Ра́дуйся, чудеса́ неисче́тная по успе́нии твое́м яви́вшая; ра́дуйся, сме́ртно боля́щих, врачми́ оста́вленных, исцеля́вшая.

Ра́дуйся, в пия́нстве ги́бнущих устраше́ние и исправле́ние; ра́дуйся, ме́ста служе́ния лиши́вшимся благо́е поспеше́ние.

Ра́дуйся, вдови́ц и же́н, супру́гом оста́вленных, покрови́тельнице; ра́дуйся, стра́нников и безприю́тных пита́тельнице.

Ра́дуйся, Ксе́ние блаже́нная, моли́твеннице о душа́х на́ших.

Конда́к 9.
Вся́кия утоли́ боле́зни, блаже́нная ма́ти Ксе́ние, на тя́ наде́ющихся и к по́мощи твое́й усе́рдно притека́ющих: я́коже помина́вших пре́жде ду́шу твою́ ра́ди души́ своея́ спасе́ния, по заве́ту твоему́, та́ко и ны́не помяни́ все́х, прославля́ющих тя́, Бо́гу же, в тебе́ ди́вно просла́вленному, вопию́щих непреста́нно: Аллилу́иа.

И́кос 9.
Вети́я суему́дренныя разуме́ти не мо́гут, ка́ко ты́ безу́мием свои́м безу́мие ми́ра сего́ обличи́ла еси́ и не́мощию свое́ю си́льныя и кре́пкия посрами́ла еси́: не ве́дают бо в тебе́ си́лы и прему́дрости Бо́жия. Мы́ же, тя́ почита́юще, с любо́вию зове́м ти́ си́це:

Ра́дуйся, Боже́ственнаго Ду́ха селе́ние; ра́дуйся, ве́лие к Бо́гу дерзнове́ние.

Ра́дуйся, у усыпа́льницы твоея́ моля́щимся явля́ющаяся и и́м помога́ющая; ра́дуйся, земле́ю и еле́ем от нея́ мно́гия освяти́вшая и от неду́г исцели́вшая.

Ра́дуйся, я́ко одержи́мых страстьми́ от ги́бели спаса́еши; ра́дуйся, я́ко отверга́тися себе́ на́с науча́еши.

Ра́дуйся, любве́ и смире́ния пу́ть во спасе́ние на́м указу́ющая; ра́дуйся, во хра́ме Бо́жием с на́ми незри́мо пребыва́ющая.

Ра́дуйся, Ксе́ние блаже́нная, моли́твеннице о душа́х на́ших.

Конда́к 10.
Спасти́ лю́ди хотя́щи, блаже́нная ма́ти Ксе́ние, при́сно да́руеши и́м заступле́ние твое́ чу́дное. Се́ де́ву благочести́вую с вдови́цею ма́терию ея́, в кану́н венча́ния у гробни́цы твоея́ усе́рдно моли́вшуюся, от бра́ка спасла́ еси́ со злоде́ем, и́же ра́тнаго челове́ка уби́, и́мя же и чи́н его́ себе́ присво́и. В де́нь то́йже уби́йца о́ный внеза́пу обличе́н бы́сть и, у́жасом объя́т, испове́да пред все́ми, я́ко си́ла Бо́жия сироту́ от бра́ка с ни́м изба́ви, мы́ же, дивя́щеся си́ле моли́тв твои́х, на́с спаса́ющих, воспева́ем Бо́гу: Аллилу́иа.

И́кос 10.
Стена́ еси́ неруши́мая, преблаже́нная ма́ти, и до́м правосла́вных. Не оста́ви и ны́не супру́ги разлуче́нныя, помози́ роди́телем, за грехи́ своя́ о ча́дех сле́зы пролива́ющим, научи́ ю́ноши и де́вы в чистоте́ себе́ храни́ти и все́х на́с святы́ню у́з семе́йных почита́ти, да еди́неми усты́ воспева́ем ти́ та́ко:

Ра́дуйся, де́в благочести́вых от бра́ка неве́рнаго избавля́ющая; ра́дуйся, спу́тника жи́зни до́браго и́м обрести́ помога́ющая.

Ра́дуйся, сро́дник вражду́ющих благо́е примире́ние; ра́дуйся, сле́з де́тских осуше́ние.

Ра́дуйся, от убие́ния младе́нцев во чре́ве жена́м гро́зное преще́ние; ра́дуйся, на ка́мени любве́ и ве́ры домо́в устрое́ние.

Ра́дуйся, супру́гов, сме́ртию разлуче́нных, утеше́ние; ра́дуйся, в жи́зни безсме́ртней ве́чное и́х соедине́ние.

Ра́дуйся, Ксе́ние блаже́нная, моли́твеннице о душа́х на́ших.

Конда́к 11.
Пе́ние благода́рственное прино́сят ти́, ма́ти блаже́нная, лю́дие правосла́внии, от бе́д и боле́зней моли́твами твои́ми изба́вленнии; и ны́не, а́ще попу́стит на́м Всепра́ведный Госпо́дь ско́рби гре́х на́ших ра́ди, со слеза́ми к тебе́ припаде́м, упова́юще на ми́лостивое твое́ о на́с к Бо́гу предста́тельство, да воспое́м Ему́: Аллилу́иа.

И́кос 11.
Светоза́рная луча́ во мра́це жития́ сего́, пу́ть ко Све́ту Непристу́пному освеща́ющая, яви́лася еси́, богому́драя Ксе́ние, чуде́с мно́жеством просия́вши. В лю́тую же годи́ну гоне́ний безбо́жных ве́рнии от часо́вни твоея́ не отступи́ша, но, презре́вше и стра́х сме́ртный, с ве́рою и упова́нием к тебе́ притека́ху, се́рдцем воспева́юще си́це:

Ра́дуйся, безнаде́жных наде́яние; ра́дуйся, в бе́здне отча́яния погиба́ющих спасе́ние.

Ра́дуйся, уни́женных и гони́мых покрови́тельнице; ра́дуйся, от клеветы́ и суда́ непра́веднаго защи́тнице.

Ра́дуйся, оби́димых и обездо́ленных утеше́ние; ра́дуйся, оби́дящих гро́зное вразумле́ние.

Ра́дуйся, гра́да свята́го Петра́ засту́пнице; ра́дуйся, ча́дом земли́ Росси́йския ма́ти и пита́тельнице.

Ра́дуйся, Ксе́ние блаже́нная, моли́твеннице о душа́х на́ших.

Конда́к 12.
Благода́ть утеше́ний оби́льно излива́еши, блаже́нная Ксе́ние, все́м чту́щим па́мять твою́ и к заступле́нию твоему́ притека́ющим. Те́мже и мы́, гре́шнии, на тя́ по Бо́зе наде́жду на́шу возлага́ем и мо́лимся тебе́ усе́рдно: не оста́ви на́с во обстоя́ниих ско́рбных, умоли́ Го́спода си́л, да не отпаде́м от ве́ры правосла́вныя, в не́йже тобо́ю утвержда́еми, зове́м Ему́ ве́рно: Аллилу́иа.

И́кос 12.
Пою́ще мно́гая твоя́ чудеса́, блаже́нная ма́ти Ксе́ние, восхваля́ем тя́, я́ко те́плую на́шу засту́пницу и ско́рую предста́тельницу. Улуча́юще же от тебе́ по́мощь благода́тную, неуста́нно воспева́ем ти́ си́це:

Ра́дуйся, све́том кро́тости твоея́ вся́ концы́ земли́ озари́вшая; ра́дуйся, житие́м твои́м по́стническим горды́ню диа́вольскую посрами́вшая.

Ра́дуйся, до́му ца́рскому поможе́ние и благослове́ние; ра́дуйся, ми́ра Бо́жия в сердца́ ве́рных насажде́ние.

Ра́дуйся, о спасе́нии Оте́чества на́шего при́сно моля́щаяся; ра́дуйся во Оте́чество Небе́сное на́м пу́ть указу́ющая.

Ра́дуйся, по Богоро́дице в ско́рбех и печа́лех на́ше утеше́ние; ра́дуйся, по Бо́зе грехо́в на́ших проще́ние и ве́чное спасе́ние.

Ра́дуйся, Ксе́ние блаже́нная, моли́твеннице о душа́х на́ших.

Конда́к 13.
О свята́я блаже́нная ма́ти Ксе́ние, в житии́ твое́м кре́ст тя́жкий поне́сшая. Приими́ от на́с, гре́шных, моле́ние сие́, тебе́ приноси́мое, огради́ на́с моли́твами твои́ми от наве́тов духо́в тьмы́, от бе́д и напа́стей, умоли́ Всеще́драго Бо́га пода́ти на́м си́лу и кре́пость, да взе́мше кре́ст сво́й, во сле́д Христу́ гряде́м, пою́ще Ему́ с тобо́ю во ве́ки: Аллилу́иа.

Этот конда́к чита́ется три́жды, зате́м и́кос 1-й и конда́к 1-й.

И́кос 1.
Равноа́нгельски на земли́ пожила́ еси́, блаже́нная ма́ти, по успе́нии му́жа твоего́, без приуготовле́ния христиа́нскаго внеза́пу сконча́вшагося, отве́ргла еси́ жи́знь мирску́ю, моля́щи Бо́га супру́га твоего́ ду́шу поми́ловати, по́двиг юро́дства на себе́ прия́вши, стяжа́ла еси́ соверше́нство духо́вное. Того́ ра́ди услы́ши от на́с похвалы́ сия́, тебе́ возноси́мыя:

Ра́дуйся, Христо́ва уго́днице, в ми́ре надми́рно пожи́вшая; ра́дуйся вся́ прило́ги ми́ра, пло́ти и диа́вола победи́вшая.

Ра́дуйся, нищету́ во́льную на всю́ жи́знь избра́вшая; ра́дуйся, сокро́вище на Небеси́ име́ти возжела́вшая.

Ра́дуйся, житие́м твои́м Андре́ю, Христа́ ра́ди юро́дивому, ра́вная; ра́дуйся, от все́х люде́й правосла́вных люби́мая и сла́вимая.

Ра́дуйся, о часе́ сме́ртнем по́мнити на́с призыва́ющая; ра́дуйся, бли́жняго ду́шу па́че ми́ра сего́ люби́ти на́с науча́ющая.

Ра́дуйся, Ксе́ние блаже́нная, моли́твеннице о душа́х на́ших.

Конда́к 1.
Избра́нная уго́днице Христо́ва, свята́я блаже́нная Ксе́ние, хвале́бное пе́ние ти́ прино́сим, чту́ще терпе́ние твое́ и злострада́ние во́льное; ты́ же, иму́щи дерзнове́ние ко Го́споду, во вся́ких беда́х и напа́стех заступа́й на́с, гре́шных, взыва́ющих к тебе́:

Ра́дуйся, Ксе́ние блаже́нная, моли́твеннице о душа́х на́ших.

Моли́тва.
О свята́я всеблаже́нная ма́ти Ксе́ние! Под кро́вом Всевы́шняго жи́вшая, ведо́мая и укрепля́емая Богома́терию, гла́д и жа́жду, хла́д и зно́й, поноше́ния и гоне́ния претерпе́вшая, и да́р прозорли́вости и чудотворе́ния от Бо́га прия́ла еси́ и под се́нию Всемогу́щаго поко́ишися. Ны́не Свята́я Це́рковь, я́ко благоуха́нный цве́т, прославля́ет тя́. Предстоя́ще на ме́сте погребе́ния твоего́, пред о́бразом твои́м святы́м, я́ко живе́й ти́, су́щей с на́ми, мо́лимся тебе́: приими́ проше́ния на́ша и принеси́ и́х ко Престо́лу милосе́рдаго Отца́ Небе́снаго, я́ко дерзнове́ние к Нему́ иму́щая. Испроси́ притека́ющим к тебе́ ве́чное спасе́ние, на блага́я дела́ и начина́ния на́ша ще́дрое благослове́ние, от вся́ких бе́д и скорбе́й избавле́ние. Предста́ни святы́ми твои́ми моли́твами пред Всеми́лостивым Спаси́телем на́шим о на́с, недосто́йных и гре́шных. Помози́, свята́я блаже́нная ма́ти Ксе́ние, младе́нцы све́том свята́го креще́ния озари́ти и печа́тию да́ра Ду́ха Свята́го запечатле́ти, о́троки и отрокови́цы в ве́ре, че́стности, богобоя́зненности воспита́ти и успе́хи в уче́нии и́м дарова́ти; боля́щия и неду́гующия исцели́, семе́йным любо́вь и согла́сие низпосли́, мона́шествующих по́двигом до́брым подвиза́тися удосто́й и от поноше́ний огради́, па́стыри в кре́пости Ду́ха Свята́го утверди́, лю́ди и страну́ на́шу в ми́ре и безмяте́жии сохрани́, о лише́нных в предсме́ртный ча́с причаще́ния Святы́х Христо́вых Та́ин умоли́. Ты́ на́ша наде́жда и упова́ние, ско́рое услы́шание и избавле́ние, тебе́ благодаре́ние возсыла́ем и с тобо́ю сла́вим Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.

-----------------------------------------------------------------------------------------------

Канон святой блаженной Ксении Петербургской

Припе́в: Свята́я блаже́нная ма́ти на́ша Ксе́ние, моли́ Бо́га о на́с!
Память: 06 февраля (24 января ст. ст.); 06 июня (24 мая ст. ст.)
Глас 8.


Пе́снь 1.
Ирмо́с: Во́ду проше́д я́ко су́шу, и еги́петскаго зла́ избежа́в изра́ильтянин вопия́ше: Изба́вителю и Бо́гу на́шему пои́м.

Водо́ю креще́ния омы́вшися, перворо́днаго греха́ изба́вилась еси́, ма́ти Ксе́ние, и на́ша сердца́ слеза́ми покая́ния очи́сти, просвеще́ние подаю́щи почита́ющым святу́ю па́мять твою́.

В воде́ креще́ния зми́я лука́ва потопи́вшая, житие́м твои́м страда́льческим вра́жию си́лу умертви́ла еси́, блаже́нная, от нея́же и на́м изба́витися Спа́са умоли́.

Сла́ва: Во́ду живу́ю неистощи́мых даро́в подаде́ тебе́ Христо́с, блаже́нная ма́ти, Его́же нищету́ во́льно возлюби́ла еси́.

И ны́не: Во́ды покая́ния пода́ждь ми́, Пречи́стая, и, очи́стивши мя́ от нечистоты́ грехо́вныя, чи́ста предста́ви, Богороди́тельнице, Сы́ну Твоему́ и Бо́гу.

Пе́снь 3.
Ирмо́с: Небе́снаго кру́га Верхотво́рче, Го́споди, и Це́ркве Зижди́телю, ты́ мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче.

Небе́снаго кру́га Зижди́телю все́ житие́ свое́ отда́вши, возлюби́ла еси́ до конца́, сподо́би и на́с моли́твами твои́ми, блаже́нная, люби́ти Го́спода до конца́ дни́й на́ших.

Небе́сныя жи́зни жела́я, в житии́ твое́м вся́ земна́я пренебрегла́ еси́, сподо́би и на́с, ма́ти Ксе́ние, моли́твами твои́ми Небе́сныя жи́зни дости́гнути.

Сла́ва: Небе́снаго черто́га жела́ющи, стра́нническое житие́ прешла́ еси́, и ны́не со все́ми святы́ми в Небе́сных черто́зех лику́еши.

И ны́не: Небе́снаго Творца́, Богоро́дице всепе́тая, ро́ждши, Небе́с простра́ннейшая яви́лася еси́. На́с от простра́ннаго пути́ поги́бельнаго укло́ньше, на Небе́сный пу́ть наста́ви, мо́лимся.

Седа́лен, гла́с 5­-й:
Я́ко стра́нница во гра́де свята́го Петра́ яви́лася еси́, благоволе́нием Бо́жиим укрепля́ема, ма́ти прему́драя, Боже́ственных даро́в и чуде́с удосто́ившаяся. Те́мже, иму́ще дерзнове́ние ко Христу́ Бо́гу, ми́р испроси́ душа́м на́шым и ве́лию ми́лость.

Пе́снь 4.
Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Услы́шавши, Ксе́ние, я́ко Небеса́ пове́дают сла́ву Бо́жию, отве́ргла еси́ суету́ мирску́ю и в по́двизе поста́ и лише́ния на земли́ Бо́га сла́вити возжеле́ла еси́, Его́же сла́вити и на́с сподо́би.

Услы́шавши и уразуме́вши дела́ Госпо́дня, просла́вила еси́ Его́ Божество́, наде́ждою и любо́вию к Нему́ украси́вши ду́шу твою́, по́двигами благоче́стия просвети́лася еси́, блаже́нная, Бо́жиею си́лою укрепля́емая.

Сла́ва: Услы́шавши преще́ния вра́жеския и вся́кия ко́зни от ни́х терпя́щи, непоколеби́ма пребыла́ еси́, и на́с непоколеби́мых в доброде́телех утверди́.

И ны́не: Услы́ши, Пречи́стая Влады́чице, моле́ния на́ша, и изба́ви на́с от наси́лия вра́жия, и гла́с Христо́в, призыва́ющий благослове́нныя в Ца́рство, услы́шати сподо́би.

Пе́снь 5.
Ирмо́с: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Просвеща́хуся ве́рнии лю́дие, зря́ще незло́бие и кро́тость твою́, ма́ти Ксе́ние, помози́ и на́м, блаже́нная, подража́ти твоему́ незло́бию.

Просвети́вши стезю́ жи́зни твоея́ све́том Богоразу́мия, Христа́ Го́спода вседу́шне возлюби́ла еси́, сподо́би и ны́, блаже́нная Ксе́ние, в се́м бы́ти тебе́ подража́тели.

Сла́ва: Просвети́ на́с, о ма́ти Ксе́ние, наде́ждою и любо́вию ко Го́споду, ны́не бо зря́щи Христа́ лице́м к лицу́, све́та неизрече́ннаго наслажда́ешися, Тому́ за ны́ моли́ся.

И ны́не: Просвети́ла еси́ омраче́нное естество́, Богоро́дице, Све́т И́стинный ро́ждши, те́мже и на́с све́том просвети́вши, от мра́чных вра́г свободи́.

Пе́снь 6.
Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися и молю́ся, я́ко Ио́на: от тли́, Бо́же, возведи́ мя.

Моли́тву, я́ко исто́чник приснотеку́щий, ны́не излива́еши, неду́жныя исцеля́ющи, кре́пость и си́лу стра́ждущым подаю́щи, сподо́би и на́с моли́твами твои́ми изба́витися от вся́ких лю́тых.

Моли́твою небе́сною и по кончи́не твое́й от неду́г свобожда́еши, цели́тельнице безме́здная, досто́йно хвали́ма еси́ на земли́, моли́ся о душа́х на́ших.

Сла́ва: Моли́тву на́шу приими́, ма́ти Ксе́ние, да в честны́й хра́м тво́й прии́дем со тща́нием, и неду́гов душе́вных и страсте́й теле́сных исцеле́ние ско́ро прии́мем.

И ны́не: Моли́твою Твое́ю Всемо́щною, Пречи́стая, изба́ви на́с от вра́г ви́димых и неви́димых, от грехо́в и вся́кия му́ки, я́ко ро́ждшая Человеколю́бца Бо́га.

Конда́к, гла́с 3­-й:
Дне́сь све́тло лику́ет гра́д свята́го Петра́, я́ко мно́жество скорбя́щих обрета́ют утеше́ние, на твоя́ моли́твы наде́ющеся, Ксе́ние всеблаже́нная, ты́ бо еси́ гра́ду сему́ похвало́ и утвержде́ние.

И́кос:
Ка́ко возмогу́, гре́шный а́з, скве́рный душе́ю и те́лом, пове́дати е́же во пло́ти равноа́нгельное житие́ твое́ и пресла́вная чудеса́? А́ще у́бо мно́зи прему́дрии не дерза́ют испове́дати мно́гаго твоего́ терпе́ния и смире́ния и те́плыя ко Христу́ любве́, но оба́че наде́яся на твое́ заступле́ние, о блаже́нная, вопию́ ти: Ра́дуйся, я́ко везде́ призыва́ющих тя́ ско́ро предваря́еши, ра́дуйся, я́ко мно́жество скорбя́щих обрета́ют тобо́ю утеше́ние, ра́дуйся, свята́я блаже́нная Ксе́ниа, гра́ду сему́ похвало́ и утвержде́ние.

Пе́снь 7.
Ирмо́с: О́троцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

О́троки евре́йския А́нгел от огня́ неопа́льны сохрани́ и тебе́, Ксе́ние, в стра́нничестем житии́ укрепи́, пою́щу: благослове́н еси́, Го́споди Бо́же, во ве́ки.

Де́тем ева́нгльски подража́ла еси́ в житии́ твое́м, стезю́ те́сную проше́дши в незло́бии, те́мже и на́с на по́двиг доброде́тели сия́ укрепи́, пою́щих: благослове́н еси́, Го́споди Бо́же, во ве́ки.

Сла́ва: Отроко́м в пещи́ халде́йстей подража́ющи, Ксе́ние, воспева́ла еси́ Христа́, да́вшаго ти́ кре́пость, те́мже и мы́, чту́ще тя́, блаже́нная, со дерзнове́нием зове́м: Благослове́н еси́, Го́споди Бо́же, во ве́ки.

И ны́не: Отрокови́це Де́во, простри́ на на́с ми́лость Сы́на Твоего́, да кроме́шныя тьмы́ изба́вимся мольба́ми Твои́ми, пою́ще: благослове́н еси́, Го́споди Бо́же, во ве́ки.

Пе́снь 8.
Ирмо́с: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те вся́ дела́ Госпо́дня Го́спода.

Победи́тельница страсте́й яви́лася еси́, Ксе́ние, лю́тая искуше́ния вра́жия побежда́ющи и непреста́нно пою́щи: благослови́те вся́ дела́ Госпо́дня Го́спода.

Побежда́ющи вся́кия стра́сти грехо́вныя, ты́, блаже́нная, я́ко све́тла звезда́ яви́лася еси́, приво́диши бо же́ны, па́дшия во грехи́, во е́же целому́дренно жи́ти и в покая́нии воспева́ти: благослови́те вся́ дела́ Госпо́дня Го́спода.

Сла́ва: Победи́тельница греха́ яви́лася еси́, блаже́нная ма́ти, благода́ть Вы́шняго иму́щи. Те́мже Небе́сная дости́гла еси́, иде́же ны́не со А́нгелы пое́ши: Благослови́те вся́ дела́ Госпо́дня Го́спода.

И ны́не: Побе́де во бра́нех духо́вных ве́рным посо́бствуеши, Пресвята́я Де́во, те́мже и лю́дем гра́да на́шего по́мощь Твою́ низпосли́, да Тя́ вы́ну пое́м: Благослови́те вся́ дела́ Госпо́дня Го́спода.

Пе́снь 9.
Ирмо́с: Вои́стинну Богоро́дицу Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Вои́стинну ра́зум Христо́в име́ла еси́, Ксе́ние, смире́ние, кро́тость, ве́ру несумне́нну, наде́жду и любо́вь, я́же к Бо́гу, и на́с сподо́би, да с тобо́ю Христа́ при́сно велича́ем.

Вои́стинну на тебе́, Ксе́ние блаже́нная, испо́лнися Христо́во прорече́ние: претерпе́вый до конца́, то́й спасе́н бу́дет, ны́не бо со все́ми спасе́нными Христа́ при́сно велича́еши.

Сла́ва: Вои́стинну никто́же, притека́яй к тебе́, блаже́нная ма́ти, то́щь благода́ти Бо́жия отхо́дит, ея́же и на́с испо́лни, да тя́ велича́ем.

И ны́не: Вои́стинну Богоро́дицу Тя́, Де́во и Ма́ти Сло́ва, Хода́таицу су́щую на́м, Со́лнце Пра́вды возсия́вшую, ве́рнии, единому́дренно пе́сньми велича́ем.

Свети́лен:
Я́коже со́лнце светоно́сно, возсия́ ны́не, блаже́нная ма́ти, па́мять твоя́, вся́ ве́рныя веселя́щи, и́же моли́твенно взыва́ют ти́: моли́ся приле́жно спасти́ся на́м.

Моли́тва:
О свята́я всеблаже́нная ма́ти на́ша Ксе́ниа! Оби́ды, поноше́ния и насме́шки Христа́ ра́ди претерпе́вшая, и за му́жа твоего́, без христиа́нскаго напу́тствия сконча́вшагося, непреста́нно моли́вшаяся. Ви́ждь тесноту́ души́ моея́ и ско́рбь о уме́рших без покая́ния и причаще́ния Святы́х Та́ин сро́дниках и зна́емых мои́х (имена), и умоли́ да́нною тебе́ благода́тию Человеколюби́ваго Влады́ку Христа́ Бо́га на́шего, да прости́т и́м вся́ согреше́ния во́льная и нево́льная, из глуби́н а́довых да изведе́т и́х, от муче́ний лю́тых изба́вит и мно́жеством милосе́рдия Своего́ ко избра́нным Свои́м сопричте́т и́х, иде́же ты́ ны́не в незаходи́мей сия́еши сла́ве, воспева́я премилосе́рдаго Творца́ во ве́ки веко́в. Ами́нь.

Комментарии (2)

Всего: 2 комментария
#1 | Лилия Никул »» | 05.02.2019 12:12
  
6
Я привыкла к холоду и дождю, не могу только привыкнуть к непогоде в сердцах людей. Не делай людям зла. Злоба людская ранит мне сердце. “Кто меня знал, да помянет мою душу для спасения своей души”. Аминь».

Святая Блаженная Ксения Петербургская
***

Радуйся, Ксения блаженная, молитвенница о душах наших.

Святая Блаженная матушка Ксения, моли Бога о нас!
Ксения Петербургская

http://www.logoslovo.ru/forum/all_896/topic_3360_2_55760/
  
#2 | Андрей Рыбак »» | 05.02.2019 15:28
  
4
Избра́нная уго́дница и Христа́ ра́ди юро́дивая, свята́я блаже́нная ма́ти Ксе́ние, избра́вшая по́двиг терпе́ния и злострада́ния, хвале́бное пе́ние прино́сим ти́, чту́щия святу́ю па́мять твою́. Ты́ же заступи́ на́с от вра́г ви́димых и неви́димых, да зове́м ти́:

Ра́дуйся, Ксе́ние блаже́нная, моли́твеннице о душа́х на́ших.
Добавлять комментарии могут только
зарегистрированные пользователи!
 
Имя или номер: Пароль:
Регистрация » Забыли пароль?
© LogoSlovo.ru 2000 - 2024, создание портала - Vinchi Group & MySites
ЧИСТЫЙ ИНТЕРНЕТ - logoSlovo.RU