Акафист и Канон святому преподобному Симеону Столпнику

Преподобный Симеон Столпник
Акафист святому преподобному Симеону Столпнику
Память: 14 сентября (01 сентября ст. ст.)

Кондак 1
Избранному от младенчества светильнику мира и целителю недугов душевных и телесных к преподобному отцу нашему Симеону смиренно притекающе, яко могущему нас свободити от страстей и всяких бед, из глубины души принесем хваление и молитву, усердно зовуще: Радуйся, Симеоне, дивный столпниче и великий чудотворче.

Икос 1
Ангел Хранитель дан бысть тебе от Бога, егда плод молитвы усердныя дарован был еси родителем твоим. Той бе тя сохраняя, паче же в мудрости духовней поучая, егда снегосветлою одеждею одеялся еси при крещении твоем. Мы же, ведяще тя чуднаго избранника Божия быти, сия похвалы тебе, яко должныя, дерзаем принести: Радуйся, родителей твоих плод молитвы богодарованный. Радуйся, даров Святаго Духа во святем крещении сподобивыйся. Радуйся, Божия благодати сосуде избранный. Радуйся, любве Божия человеком явление. Радуйся, земней мудрости ненаученный. Радуйся, небесною сугубо обогащенный. Радуйся, Телом и Кровию Христовою таинственно обоженный. Радуйся, в молитве восхищенный. Радуйся, Симеоне, дивный столпниче и великий чудотворче.

Кондак 2
Видя Господь смирение и простоту сердца твоего, избра тя во оружие Свое, да посрамиши лукавое мудрование мудрецов века сего, и от овец отчих сотвори тя пастыря овец словесных стада Христова, да купно поете Творцу: Аллилуиа.

Икос 2
Разум твой имея алчущий и жаждущий правды Христовы, не усумнелся еси вопросити честнаго старца о словесех святаго Евангелия. И, поучився его богонаученных глаголов, в томже часе твердо возжелал еси оставити дом отчий и вся красная мира сего и тесным путем, ведущим в живот вечный, поити. Сего ради вопием ти: Радуйся, во храме пребывание от юности возлюбивый. Радуйся, из дома отча изшедый. Радуйся, бегающих мира покрове. Радуйся, богоугождения образе. Радуйся, благое иго Христово с любовию восприявый. Радуйся, плоть яко мечем посекий. Радуйся, заблуждших наставляяй. Радуйся, добре жительствующих утверждаяй. Радуйся, Симеоне, дивный столпниче и великий чудотворче.

Кондак 3
Откровением Божиим бысть тебе во сне видение: основание зданию полагая, ров копал еси и глас слышал еси трикраты, паче углублятися, и, достигшу ти многия глубины, повеле ти Господь со всем усердием твоим созидати. И сбыстся чудное видение сие над тобою: глубиною смирения положил еси твердое основание добродетелем всем, имиже украшен, непрестанно Господу взывал еси: Аллилуиа.

Икос 3
Имея желание крепкое жития иноческаго, ко единей обители пришел еси. Смирения же ради семь дний без ястия и пития пред враты ея пад на земли пребыл еси, дерзновения не имый в тую внити. Блаженный же игумен тоя обители, провидя тя Божия избранника быти, минувшими деньми испыта тя, яко хощеши Господеви работати, и лику братии своея сопричте. И мы вси почитаем тя: Радуйся, истинный послушателю велений Христовых. Радуйся, житию равноангельному поревновавый. Радуйся, мир сей оставивый. Радуйся, жития постническаго пламенне возжелевый. Радуйся, воздержанием на страсти вооруживыйся. Радуйся, добрый воине Христов. Радуйся, во смирении на послушание себе покоривый. Радуйся, тщание велие к научению монастырскому явивый. Радуйся, Симеоне, дивный столпниче и великий чудотворче.

Кондак 4
Бурю страстей утишая, яко ягнец кроток отцев духовных всегда послушал еси и, за смирение твое, еще юн сый, образа ангельскаго сподобился еси, в немже воздержание и труды усугубляя, плоть умерщвлял еси, душу спасая, и в глубине сердца взывая Богу: Аллилуиа.

Икос 4
Слыша игумен братию поведающу, яко смрад от тебе исходит и черви спадают с телесе твоего, вопроси тя, чесого ради бысть ти тако. Ты же, главу преклонивый, в молчании предстоял еси. Тогда взяша одужду с тебе и кровию обагренное тело твое узреша, с вервием жестким вонзенным в него. Со ужасом многим страдания твоя помышляя и мы сице зовем ти: Радуйся, Святаго Духа жилище освященное. Радуйся, образ Божий не помрачивый в себе. Радуйся, терпением Иовлем братию удививый. Радуйся, великое мужество в себе явивый. Радуйся, ревнителю истины. Радуйся, лампадо елеа благовоннаго.Радуйся, растленныя храмы душ наших обновляяй. Радуйся, кумиры мудрования нашего низлагаяй. Радуйся, Симеоне, дивный столпниче и великий чудотворче.

Кондак 5
Благодатною силою укрепляем, новыя подвиги во умерщление плоти твоея понесл еси. Страха же ради, яко и братия, подражающе тебе, подвиги не по разуму восприимет, повеле ти игумен отъити о них. Ты же, незлобив, волю его исполняя, в пустыни в кладези безводнем вселился еси, паки и тамо воспевал Христу Богу песнь: Аллилуиа.

Икос 5
Видя блаженный игумен Тимофей видение во сне, яко множество народа обитель его обстоит и о рабе Божием Симеоне вопрошают, ужасом одержим бе и, воспрянув от сна, братии поведа сие. Абие же купно с ними иде в пустыню и воззва тя. Почитающе подвиги твоя, и мы по долгу величаем тя: Радуйся, силу духа Иосифа явивый. Радуйся, велия подвиги Христа ради совершивый. Радуйся, Крест Христов безропотно понесый. Радуйся, Церкви украшение. Радуйся, правды Божия дивный служителю. Радуйся, добрый кормчий корабля Иисусова. Радуйся, правило веры благочестивыя. Радуйся, образе кротости духовныя. Радуйся, Симеоне, дивный столпниче и великий чудотворче.

Кондак 6
Проповедник слова Божия епископ Васс по воле Божией прииде, егда в келии пустынней водворился еси. Велию ревность о Моисеи и Илии показав, четыредесятидневнаго поста возжелел еси. Да не приобщишися брашна во время сие, невходну келию твою святителя устроити моляше, еже и сотвори, и отъиде, Господеви поя: Аллилуиа.

Икос 6
Возсиял еси, преподобне, чудным воздержанием твоим, егда прешедшим днем поста твоего обрете тя святитель Божий яко мертва, на земли лежаща, воздвиже тя и Таин безсмертных Христовых причастия сподоби. Посем многим братиям поведав о дивнем подвизе твоем, научи их прославляти Господа, дивная дела во святых Своих являюща, и тебе, угоднику Его, воспевати сицевая: Радуйся, земный путь твой по стопам Христовым шествовавый. Радуйся, постом Моисею и Илии подражавый. Радуйся, на Господа упование твое возложивый. Радуйся, во уповании сем пищи и пития не приобщивыйся. Радуйся, яко светом божественным озарялся еси. Радуйся, яко и нас, верных, молитвами твоими укрепляеши. Радуйся, яко воздержанием безплотным уподобился еси. Радуйся, тем, яко оружием духовным, невидимых врагов победил еси. Радуйся, Симеоне, дивный столпниче и великий чудотворче.

Кондак 7
Хотя подвиги твоя паче усугубити, яко на лествицу возводящую к небеси, на верх горы возшел еси: да не сойдеши оттуду, оковами себе на ней утверди, глаголов же святителя Мелетия послушав, не плоть, но разум в Христово послушание пленив, до конца живота своего взывал еси: Аллилуиа.

Икос 7
Новая Вифесда явися гора, на нейже подвизался еси, препободне. Не токмо единою в лето и первее входящим исцеления на той подавашася, но и всегда и всем в бедах, болезнех и скорбех сущим и с надеждою к Богу притекающим благая помощь твоя даровашеся, и вси возвращахуся, славя Бога, и тя, угодника Его величаху, зовуще: Радуйся, свеще, Божественным пламенем возженная. Радуйся, светильниче горяй и светяй. Радуйся, целителю болезней душевных. Радуйся, врачу недугов телесных. Радуйся, питателю алчущих правды. Радуйся, источниче жаждущим истины. Радуйся, молитвенниче о душах наших. Радуйся, ходатаю нам и благ земных. Радуйся, Симеоне, дивный столпниче и великий чудотворче.

Кондак 8
Странно житие свое сотворил еси, блаженне, егда видя народ мног, грядущ к тебе, уразуме, яко чтут и прославляют тя. Славы убегая, смирение же возлюбив, на столпе высоцем пребывати благоволил еси и, яко по степенем лествицы к небесней высоте восходя, и мраз, и дождь, и зной палящий претерпевая, Господеви непрестанно пел еси: Аллилуиа.

Икос 8
Весь исполнился еси послушания, испытующим тя святым отцем пустынником: повинуяся бо велению их, яко Божию, потщался еси снити со столпа твоего на землю, еже и видяще тии, уразумеша, яко от Бога дело твое, и реша, да пребудеши на столпе твоем невозбранно. Тогда враг рода человеча умысли искусити тя: во образе ангела светла предста ти, ты же на мгновение не уразумел еси, блаженне, лести вражия, обаче знамением честнаго Креста победил еси того коварство. Послежде покаяние велие Господу принесл еси, сему же и мы поучившеся, хвалим тя сице: Радуйся, стрелы лукаваго разжженныя отразивый. Радуйся, коварство врага победивый. Радуйся, силою крестною вооруживыйся. Радуйся, ложь огнем истины попаливый. Радуйся, молитвою, яко мечем, вооруженный. Радуйся, шлемом спасения венчанный. Радуйся, сугубое покаяние Богу принесый. Радуйся, на Божие милосердие надежду возложивый. Радуйся, Симеоне, дивный столпниче и великий чудотворче.

Кондак 9
Всякаго грешника кающагося приемляй Господь и твое покаяние прият, и паки прослави тя. Диавол же, подвига твоего не терпяще, язвою лютою порази тя, и бысть в нозе твоей лютый гной с червями. По мнозем времени уведев о тебе мати твоя, прииде ко столпу твоему и плакася горько. Ты же, блаженне, на волю Господню уповая, в будущем веце усрести тя ей обещал еси и, над предавшею дух ея в руце Господни, молитву сотворив, Господеви воспел еси: Аллилуиа.

Икос 9
Ветии суемудреннии не возмогут изъяснити силу чудотворений твоих, ихже в славу Божию и чудным именем Господним совершал еси. Воды не имевшу месту тому, молитвою твоею, святе, земля потрясеся и воду обильно даде. Жена некая, змию малую в воде во чрево свое приемшая, водою твоею напоившися, исцеле абие. И ины мнози исцелеваху у столпа твоего святыми твоими молитвами. Людие же, видяще велия чудеса Божия, с радостию прославляху тя: Радуйся, Небеснаго Царя рабе благий и верный. Радуйся, приятый от Него талант усугубивый. Радуйся, житием твоим небеса возвеселивый. Радуйся, чудесы вселенную удививый. Радуйся, помощниче наш и молитвенниче. Радуйся, от искушений вражиих защитниче. Радуйся, яко тобою страсти наша утоляются. Радуйся, яко тобою благая желания наша исполняются. Радуйся, Симеоне, дивный столпниче и великий чудотворче.

Кондак 10
Спасти хотя грешныя и к покаянию призвати, последовал еси стопам Господа нашего Иисуса Христа и прибегшаго под кров твой разбойника Ионафана хотящим убити его не предал еси, но после велия его покаяния, отъити ему с миром ко Господу умолил еси, дабы блаженства райскаго улучив, в вечности восхвалит Всещедраго Человеколюбца Бога благодарственною песнию: Аллилуиа.

Икос 10
Царя Небеснаго и Господа благий раб и верный служитель был еси, чадом же твоим духовным - отец и наставник многомилостивый: на единем месте, на столпе тебе обитающу, множество народа, и верных, и неверных, к тебе прихождаху, и всем всяк помощник был еси, всякия болезни душевныя и телесныя врачуя, наипаче же неверующия светом Христова Евангелия просвещал еси, яко да крещеннии во имя Пресвятыя Троицы, Господа превознесут и тебе, доброму пастырю своему, воззовут: Радуйся, зерцало Трисияннаго Света. Радуйся, небеснаго озарения исполненный. Радуйся, от богатства духа ближния просвещаяй. Радуйся, страху Божию научаяй. Радуйся, воли Господней безропотный исполнителю. Радуйся, о славе Его ревнителю. Радуйся, пастырю наш добрый. Радуйся, отце милостивый и кроткий. Радуйся, Симеоне, дивный столпниче и великий чудотворче.

Кондак 11
Пение возлюбленному Христу в житии твоем принося, дара пророчества сподобился еси, грядущую засуху, глад и мор предвозвещая, нашествие неверных предрекл еси и многими слезами и теплою молитвою Господа умилостивил еси, да отвратит гнев Свой, праведно движимый, и не попустит языком победити христианы, приносящих покаяние и благодарящих Господа за Его велию милость и непрестанно поющих Ему: Аллилуиа.
Икос 11
Света небеснаго сосуде избранный показался еси, егда приспе час твой от мира сего в селения возлюбленная и желаемая прейти. О блаженней кончине твоей тако ученик твой Антоний повествует: «Во един день, в пяток, по девятом часе, ожидающим нам его поучения и благословения, не призрел он на нас со столпа. Такожде и в субботу, и в неделю. И устрашился аз, и взыдох на столп, и узрех преподобнаго со главою поникшею долу и руце на персех. Мняху, яко молитву деет, умолчах аз, последи же рекох: «Благослови нас, отче!» Он же не отвеща. Тогда помыслих, яко аще ко Господу отъиде преподобный отец, и уразумех, яко есть тако, и восплакахся горько, и, приступив, лобызах его, глаголя: «На кого оставляеши нас, отче?» И мы просим тя: и нас грешных не оставляй твоими благоприятными ко Господу молитвами, из глубины души зовущих ти: Радуйся, от младенчества всего себя Господеви предавый. Радуйся, заповеди Бога, яко благое сокровище в сердце свое приемый. Радуйся, благодатию райскою облагоуханный. Радуйся, светом молитвы просвещенный. Радуйся, во Христа облеченный. Радуйся, ризою нетления украшенный. Радуйся, ко Господу вся помышления твоя обративый. Радуйся, ближних якоже себе возлюбивый. Радуйся, Симеоне, дивный столпниче и великий чудотворче.

Кондак 12
Благодати дар испроси у Господа, отче, тебя верно хваляшим; вонми воздыханием нашим, и слез наших не презри, и не остави нас, якоже обещался еси не оставляти ни столпа твоего, ни горы, тобою избранныя, во благодеяние прибегающим к тебе человеком, под кровом твоим сохраняемым, Господеви же поющим: Аллилуиа.

Икос 12
Воспевая житие твое, богоблаженне отче, прославляем Бога, и, якоже на погребение твое стекошася ко гробу твоему святители, и пастыри, и мирстии со слезами и молитвы многими, свещи и фимиам носяще, тако и мы, сошедшеся в день памяти твоея, усердныя хвалы и моления приносим ти: Радуйся, от юности миру умерый. Радуйся, благое иго Христово вземый. Радуйся, из темницы телесе к вечному житию радостно изшедый. Радуйся, лицезрением Божественнаго света наслаждающийся. Радуйся, яко присно Пресвятей Троице предстоиши. Радуйся, яко непрестанно молитвы о нас возсылаеши. Радуйся, цельбоносныя мощи нам оставивый. Радуйся, рода христианскаго помощниче. Радуйся, Симеоне, дивный столпниче и великий чудотворче.

Кондак 13
О великий и предивный угодниче Божий, преподобне отче наш Симеоне! Ныне престолу Божию предстоиши и прошения наша Господу приносиши, и сия малая моления от нас грешных приими, и, якоже не отринул еси разбойника, прибегшаго к твоему столпу, но и от земных бед избавил еси того, и вождь был еси Ему в Царство Небесное, тако и нас, грешных, не остави твоим заступлением, но и во временней жизни сей помогай нам, и в будущей небесных обителей молитвами твоими достигнути сподоби, идеже с тобою Христу, Спасителю нашему, воззовем: Аллилуиа.
(Этот кондак читается трижды, затем икос 1 и кондак 1).

Молитва
О святый и великий угодниче Божий Симеоне! Подвигом добрым подвизався на земли, восприял еси на небесех венец правды, егоже уготовал есть Господь всем любящим Его. Темже, взирающе на святый твой образ, радуемся о преславнем скончании жительства твоего и чтим святую память твою. Ты же, предстоя Престолу Божию, приими моления наша и ко Всемилостивому Богу принеси, о еже простити нам всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веце и сподобимся предстательством твоим, аще и недостойни есмы, видети благая на земли живых, славяще Единаго во святых Своих славимаго Бога, Отца и Сына и Святаго Духа, ныне и присно и во веки веков. Аминь.

Канон преподобному Симеону Столпнику
Припев: Преподо́бне о́тче Симео́не, моли́ Бо́га о на́с.

Пе́снь 1.
Ирмо́с: Пои́м Го́сподеви, вси́ лю́дие, в мо́ри Чермне́м фарао́на погрузи́вшему, побе́дную пе́снь пою́ще, я́ко просла́вися.
Да́ждь мне́, орга́ном язы́ка гнилы́м, о богоно́се Симео́не, пе́снь тебе́ плету́щему, мольба́ми твои́ми зна́ния све́т богонауче́н.
Позна́ша му́дрость, о́тче, твою́ пе́рсяне, ефио́пляне, инди́ане, и ски́фяне, и ара́вов мно́жество и просла́виша Христа́, тобо́ю прославля́емаго.
Благода́ти испо́лнився духо́вныя, от пасту́шеских бо ста́нищ, я́ко Иа́ков, Дави́д и Моисе́й, началово́ждь слове́сных яви́лся еси́ па́ств, блаже́нне.
Богоро́дичен: Пречи́стая Богоро́дице, ра́дуйся, Честна́я, невмести́маго Бо́га во утро́бе Твое́й вмести́вшая, изба́витися лю́тых испроси́ пою́щим Тя́.

Пе́снь 3.
Ирмо́с: Стра́х Тво́й, Го́споди, всади́ в сердца́ ра́б Твои́х и бу́ди на́м утвержде́ние, Тя́ во и́стине призыва́ющим.
Ско́ро избе́г зи́мныя беды́ духо́в, ко спаси́тельней устреми́лся еси́ оби́тели, Симео́не, из нея́же и нестаре́емую жи́знь прия́л еси́.
Приклони́л еси́, ра́дуяся, покорли́вый слу́х тво́й, всеблаже́нне, Влады́це блажа́щу и блаже́нную обре́л еси́ жи́знь.
Сло́ва прие́м се́мена се́рдца твоего́ бразда́ми и сле́з напое́нии, Христу́ умно́жен кла́с доброде́телей пожа́л еси́.
Богоро́дичен: Неизрече́нно зачала́ еси́, Богоневе́сто, Спа́са и Го́спода, избавля́ющаго ны́ от лю́тых, Тя́ во и́стине призыва́ющия.

Седа́лен, гла́с 8:
Земна́я вся́ оста́вив и в ми́ре сы́й теле́сне, ду́хом бы́л еси́ Небе́сный А́нгел, находя́щия бо стра́сти умертви́в пло́тию, Тро́ицы яви́лся еси́ уго́дник, блаже́нне. Те́мже неду́гующих исцеля́еши стра́сти и сло́вом ду́хи отгоня́еши благода́тию, Симео́не преблаже́нне, моли́ Христа́ Бо́га согреше́ний проще́ние дарова́ти честву́ющим любо́вию святу́ю па́мять твою́.
Богоро́дичен: Наста́ви ны́ на пу́ть покая́ния, уклоня́ющияся при́сно к злы́м безпу́тием и Преблага́го прогне́вающия Го́спода, Неискусобра́чная, Благослове́нная Мари́е, прибе́жище отча́янных челове́ков, Бо́жие обита́лище.

Пе́снь 4.
Ирмо́с: Услы́шах, Го́споди, слу́х Тво́й и убоя́хся, разуме́х дела́ Твоя́ и просла́вих держа́ву Твою́, Го́споди.
Не на песце́, преблаже́нне, но на глубоча́йших труде́х твои́х положи́в основа́ние воздержа́ния, доброде́телей созда́л еси́ сто́лп непоколеби́м.
Всели́в те́ло твое́ в жили́ще же́стоко, стра́хом пригвозди́л еси́ ду́ха и жили́ще насле́дия боже́ственнаго обре́л еси́, преподо́бне.
Укроти́л еси́ теле́сныя сокрове́нныя стра́сти, пребога́те, в гнои́ лежа́ черве́й, о́тче, благово́ние обре́л еси́.
По стра́сти во́льней Жизнотвори́вому Мертвецу́ подо́бяся, я́коже гро́бу, ро́ву те́мному са́м себе́ жи́ва пре́дал еси́.
Богоро́дичен: Бо́га, Его́же родила́ еси́, Пречи́стая Мари́е, моли́ всегда́ рабо́м Твои́м дарова́ти согреше́ний проще́ние.

Пе́снь 5.
Ирмо́с: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.
Но́ваго Дании́ла, Симео́не, Христо́с тя́ показа́, из ро́ва бо зве́рска тя́ явле́нием неврежде́на возврати́.
Ве́сь са́м себе́ Го́споду возложи́в, слоте́, и мра́зу, и зно́ю проти́вным озлобле́нием обнажи́лся еси́.
Но́вый Моисе́й и Илия́ показа́лся еси́, еди́нощи чре́з всю́ четыредеся́тницу пи́щу прие́мля во все́й жи́зни твое́й, преподо́бне.
Я́ко златоза́рным, Симео́не, мони́стом, преподо́бне, у́жем облага́емь, небоше́ственник показа́лся еси́ Боже́ственными кри́лы.
Богоро́дичен: Моли́ при́сно Сы́на Твоего́ и Бо́га на́шего, Неискусобра́чная Мари́е Чи́стая, низпосла́ти на́м, ве́рным, ве́лию ми́лость.

Пе́снь 6.
Ирмо́с: Ри́зу мне́ пода́ждь све́тлу, одея́йся све́том, я́ко ри́зою, Многоми́лостиве Христе́ Бо́же на́ш.
Зна́мений и чуде́с тя́ Христо́с самоде́теля показа́, Боже́ственнаго, блаже́нне, де́йства прия́тно жили́ще.
Возне́сл еси́ те́ло твое́, Симео́не, я́ко на кре́ст, на сто́лп. Те́м спросла́вился еси́ на Дре́во тебе́ ра́ди возне́сшемуся Христу́.
Вы́шнее ше́ствие обре́т, Симео́не чу́дне, к высоте́ Небе́сней пою́щия тя́ ве́рно возведи́.
Богоро́дичен: Го́ру, Ю́же прови́де Дании́л, из Нея́же несеко́мый Ка́мень ве́ры отсече́ся, Христо́с, Тя́ познава́ем.

Конда́к, гла́с 2:
Вы́шних ища́й, вы́шним совокупля́яйся и колесни́цу о́гненную сто́лп соде́лавый, те́м собесе́дник А́нгелом бы́л еси́, преподо́бне, с ни́ми Христу́ Бо́гу моля́ся непреста́нно о все́х на́с.

И́кос:
Симео́ново непоро́чное житие́ ки́й язы́к челове́чь довле́ет когда́ к похвале́ испове́дати? Оба́че воспою́, Бо́жиею му́дростию, до́бляго сего́ исполи́на страда́ние же и по́двиги, я́же на земли́, я́ко свети́льника я́вльшася все́м челове́ком, мно́гим терпе́нием в ли́це а́нгельстем возсия́вша, с ни́ми бо поя́ непреста́нно Христу́, воздержа́нием чистоту́ стяжа́, моля́ся непреста́нно о все́х на́с.

Пе́снь 7.
Ирмо́с: О́троцы благочести́вии в Вавило́не о́бразу злато́му не поклони́шася, но, посреде́ пе́щи о́гненныя ороша́еми, пе́снь воспева́ху, глаго́люще: превозноси́мый отце́в и на́с Бо́же, благослове́н еси́.
Разреши́л еси́ у́бо сухоту́ недоуме́ющимся, и врата́ те́м дожде́вныя отве́рзл еси́, и зе́млю коле́блющуюся моли́твами уста́вил еси́, и лю́ди зва́ти научи́л еси́: благослове́н Бо́г отце́в на́ших.
Я́ко велича́йший свети́льник церко́вный и многосве́тлое, Симео́не, со́лнце, всю́ду лучи́ испуща́я, просвети́л еси́ и лю́ди зва́ти научи́л еси́: благослове́н Бо́г отце́в на́ших.
Во́ды отвсю́ду стеко́шася, уго́дниче Христо́в, челове́ков пучи́на во огра́де твоего́ собра́ся воздержа́ния, от тебе́ вопи́ти наказу́еми: благослове́н Бо́г отце́в на́ших.
Дре́вле у́бо ста́рца объя́тии, скрижа́льми же твоего́ се́рдца, преподо́бне, неви́димою си́лою Христо́с упоко́ися, Симео́не. Те́мже взыва́л еси́: благослове́н Бо́г отце́в на́ших.
Богоро́дичен: Подоба́ше безсе́менно Вопло́щшемуся из Тебе́ проити́, Де́во Чи́стая, Ты́ бо яви́лася еси́ чистото́ю все́х пребо́льши, Ему́же, вопию́ще, пе́сньми зове́м: благослове́н Бо́г отце́в на́ших.

Пе́снь 8.
Ирмо́с: На горе́ святе́й просла́вльшася и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся́ ве́ки.
От вся́каго отлучи́вся пристра́стия и ма́терню не́мощь уще́дрив, я́ко живе́й яви́лся еси́ по сме́рти: Го́спода по́йте и превозноси́те Его́, вопия́, во ве́ки.
Ю́ношу стя́гнул еси́ разсла́блена и о́др Фи́ларху повелева́еши на ра́му нести́, свяще́ннейше, вопия́: Го́спода по́йте и превозноси́те Его́ во вся́ ве́ки.
Уясни́вый И́ова стра́стию, согни́вшия пло́ти твоея́ гни́лость в би́сер претвори́ многоце́нен, тя́, Христо́в уго́дниче Симео́не, Сла́вяй во вся́ ве́ки.
Богоро́дичен: От А́нгела ра́дость прие́мшую, и ро́ждшую Го́спода сла́вы, и све́т ми́ру возсия́вшую, вси́ Тя́ пое́м, Де́во Богоро́дице, во вся́ ве́ки.

Пе́снь 9.
Ирмо́с: Проявле́нное на горе́ законополо́жнику во огни́ и купине́ Рождество́ Присноде́вы в на́ше, ве́рных, спасе́ние пе́сньми немо́лчными велича́ем.
Воцари́вшася над страстьми́ терпе́нием, Христо́с тя́ прия́т, Симео́не богоно́се, Своему́ о́бщника Ца́рству: те́м тя́ пе́сньми почита́ем.
Целе́бней благода́ти сподо́бився от некра́домых Ду́ха сокро́вищ, богоно́се Симео́не, исцеле́ния подае́ши торжеству́ющим па́мять твою́.
Возше́д, преподо́бне, небе́снаго тече́ния на доброде́тельный возду́х, страда́ньми препоя́сан, возлете́в к ски́ниям небе́сным, моли́ спасти́ся душа́м на́шим.
Богоро́дичен: Купина́, горя́щая огне́м и неопаля́ема, яви́лася еси́, о Влады́чице, заче́нши безсе́менно Бо́га и Спа́са ми́ра, Его́же непреста́нно велича́ем.

Свети́лен.
Я́коже свети́ло, преподо́бне, светоно́сное твое́ житие́ облиста́вшее просвети́ подсо́лнечную всю́ чуде́с луча́ми. Столпо́м бо, о́тче, возше́л еси́, я́ко ле́ствицею, к Бо́гу, иде́же все́х жела́ний, Симео́не, коне́чное и́стинно восприя́тие е́сть, о на́с моля́ся, честву́ющих Тя́, блаже́нне.
Богоро́дичен: Соде́телю и Прави́телю всея́ тва́ри сы́й, времена́ и ле́та положи́в в Твое́й вла́сти, ле́тний кру́г, благослове́ньми, Ще́дре, бла́гости венча́й, в ми́ре сохраня́я Твоя́ лю́ди невре́дны и це́лы, мо́лимся, моли́твами Ро́ждшия Тя́ и Боже́ственных А́нгел.

Комментарии (1)

Всего: 1 комментарий
#1 | Лилия Никул »» | 13.09.2018 10:42
  
2
Аминь!
Добавлять комментарии могут только
зарегистрированные пользователи!
 
Имя или номер: Пароль:
Регистрация » Забыли пароль?
© LogoSlovo.ru 2000 - 2024, создание портала - Vinchi Group & MySites
ЧИСТЫЙ ИНТЕРНЕТ - logoSlovo.RU