Акафист и Каноны положению честного пояса Пресвятой Богородицы.

Положение честно́го Пояса Пресвятой Богородицы (395–408)
Акафист пречестному Поясу Пресвятой Богородицы
Память: 13 сентября (31 августа ст. ст.)

Конда́к 1.
Ко пречестно́му Богоро́дице боже́ственному по́ясу Твоему́, со благогове́нием притека́юще, исполня́емся просвеще́ния и благоуха́ния преми́рнаго, но я́ко пучи́но су́щи Де́во бла́гости, препоя́ши ны́ си́лою его́ Непоро́чная, зову́щия:

Ра́дуйся, по́ясе пречестны́й.

И́кос 1.
А́нгели неви́димо по́яс Тво́й святы́й со стра́хом обстоя́ще Отрокови́це, мы́ же во пло́ти су́щия, с ве́рою припа́даем к нему́, освяще́ние прие́млюще, и во благогове́нии вопие́м:

Ра́дуйся, по́ясе Богоро́дицы; ра́дуйся, сия́ние всему́ ми́ру.

Ра́дуйся, Непоро́чныя Де́вы препоя́сание; ра́дуйся, Це́ркве всея́ сокро́вище.

Ра́дуйся, по́ясе многоце́нный Влады́чицы небе́с; ра́дуйся, цве́те благоуха́нный благочести́вых христиа́н.

Ра́дуйся, я́ко те́ло Де́выя препоя́саеши; ра́дуйся, я́ко кре́пость льсти́ваго ослабля́еши.

Ра́дуйся, свети́льниче благода́ти всесве́тлый; ра́дуйся, исто́чниче чуде́с неизсяка́емый.

Ра́дуйся, и́мже ве́рнии светозаря́ются; ра́дуйся, и́мже врази́ упраздня́ются.

Ра́дуйся, по́ясе пречестны́й.

Конда́к 2.
Воззри́ Богороди́тельнице, о́ком благоутро́бным, ко и́же ве́рою ко свято́му Ти́ по́ясу, я́коже исто́чнику во́д освяще́нных че́стно припа́дающих, и прося́щих благода́ти Твоея́, необори́мую бо си́лу те́мже пода́ждь вопию́щим: Аллилу́ия.

И́кос 2.
Бы́сть Богоро́дице честна́го Ти́ по́яса принесе́ние во Ца́рский Гра́д, исто́чник весе́лия и́стиннаго, цари́цу бо ско́ро исцели́л еси́, на́м же благода́ть оби́льную при́сно подае́т вопию́щим:

Ра́дуйся, исто́чниче ра́дости ве́чныя; ра́дуйся, ча́ше душепи́щнаго бра́шна.

Ра́дуйся, и́мже Всечи́стая Де́во препоя́сася; ра́дуйся, и́же во Афо́не я́ко све́т возсия́.

Ра́дуйся, я́ко Зо́ю цари́цу исцели́л еси́; ра́дуйся, я́ко то́чиши все́м весе́лие у́мное.

Ра́дуйся, плени́це всесвята́я Чи́стыя Богоро́дицы; ра́дуйся, стрело́ огнено́сная на врага́ человекоуби́йцу.

Ра́дуйся, ра́дости вина́ и хода́таю; ра́дуйся, ти́хое душа́м приста́нище.

Ра́дуйся, Христу́ благоче́стно связу́ющий; ра́дуйся, страсте́й стремле́ния упраздня́ющий.

Ра́дуйся, по́ясе пречестны́й.

Конда́к 3.

По́яс Тво́й Фоме́ предаде́ Богоро́дице, к Сы́ну Твоему́ восходя́ще, и чрез о́наго же я́ко че́стен да́р и бла́г исполне́ние его́ на́м оста́вила еси́ Всепе́тая, пою́щим и вопию́щим Ти́: Аллилу́ия.

И́кос 3.
Име́ет свята́я Оби́тель Твоя́ Ватопе́дская, я́ко неотъе́млемо бога́тство Отрокови́це, и я́ко сто́лп Твоего́ заступле́ния, миродохнове́нный и всечестны́й Тво́й по́яс, ему́же благоче́стно припа́дающе, во умиле́нии зове́т:

Ра́дуйся, бога́тство нетле́ния; ра́дуйся, сто́лпе сострада́ния.

Ра́дуйся, пода́телю бла́г неисчерпа́емый; ра́дуйся, и́ноком водруже́ние незы́блемое.

Ра́дуйся, по́ясе всече́стне, А́нгелом ра́досте; ра́дуйся, мона́хом утвержде́ние и бе́д отринове́ние.

Ра́дуйся, Ватопе́ду хвало́ многоце́нная; ра́дуйся, благочести́вым побе́дное пе́ние.

Ра́дуйся, благово́нием небе́сным дыха́ющий; ра́дуйся, кре́пость непобеди́мую подаю́щий.

Ра́дуйся, тобо́ю бо мона́шествующия укрепля́ются; ра́дуйся, тобо́ю бо вражду́ющия упраздня́ются.

Ра́дуйся, по́ясе пречестны́й.

Конда́к 4.
Живоно́сный киво́т всечестна́го Ти́ по́яса, подае́т благоуха́ние Де́во, и злосмра́дие страсте́й отгоня́ет при́сно от ду́ш на́ших, те́мже вели́чию Твоему́ дивя́щеся вопие́м: Аллилу́ия.

И́кос 4.
По́яс Тво́й святы́й Всесвята́я Де́во, я́ко све́т сия́ет на горе́ Афо́нстей, и лучи́ златови́дными, вся́ облиста́ет твое́й благода́тию, те́мже чудеса́ того́ почита́юще, ве́рою вопие́м:

Ра́дуйся, чуде́с пода́телю; ра́дуйся, благода́тей светоли́тие.

Ра́дуйся, сокро́вищь сокро́вище свято́е; ра́дуйся, свеще́ серде́ц богому́дрых.

Ра́дуйся, по́ясе, его́же носи́ла еси́ Всенепоро́чная на земли́; ра́дуйся, вся́кую подаю́щий благода́ть и мно́гую кре́пость.

Ра́дуйся, я́ко показу́еши Де́выя сла́ву; ра́дуйся, я́ко отвраща́еши де́монския лу́ки.

Ра́дуйся, мно́гая исцеле́ния источа́ющий; ра́дуйся, души́ страсте́й свобожда́ющий.

Ра́дуйся, ве́рным ликова́ние боже́ственное; ра́дуйся, честна́я милосе́рдия кле́те.

Ра́дуйся, по́ясе пречестны́й.

Конда́к 5.
Богодарова́нный да́р и небе́сное бога́тство, по́яс Тво́й держа́ще Отрокови́це, на стра́сти си́лу непобеди́мую, е́юже препояса́емся, благода́ть бо и ми́лость при́сно подае́т вопию́щим: Аллилу́ия.

И́кос 5.
Исцеле́ние источа́ет по́яс Тво́й святы́й души́ и те́лу Отрокови́це, я́коже ро́су весне́ннюю, я́ко бо Иса́иа глаго́лет Всенепоро́чная, и сла́дость небе́сную благогове́йно тому́ вопию́щим:

Ра́дуйся, исто́чниче во́д невеще́ственных; ра́дуйся, пото́че мно́гих даро́в.

Ра́дуйся, Всечи́стыя по́яс всечестны́й; ра́дуйся, Це́ркви ра́дость небе́сная.

Ра́дуйся, сокро́вище свято́е дарова́ний духо́вных; ра́дуйся, ве́нче сла́вный христиа́н благочести́вых.

Ра́дуйся, Ватопе́ду стена́ неруши́мая; ра́дуйся, всему́ ми́ру сто́лпе кре́пости боже́ственныя.

Ра́дуйся, честно́е Де́выя опоя́сание; ра́дуйся, Бо́гом на́м да́нная ку́пля.

Ра́дуйся, Еди́ныя Де́выя по́ясе; ра́дуйся, ве́рным богодарова́нная си́ло.

Ра́дуйся, по́ясе пречестны́й.

Конда́к 6.
Стяжа́ Оби́тель Твоя́ Ватопе́дская, я́ко сокро́вище боже́ственное Отрокови́це, по́яс Тво́й ди́вный, и чудесы́ того́ хва́лится, и благода́рственныя пе́сни Тебе́ воспева́ет глаго́люще: Аллилу́ия.

И́кос 6.
Све́т сия́ющий зря́шеся по́яс Тво́й святы́й, внегда́ принесе́ся во о́стров Ти́ра, отону́дуже со благогове́нием мно́гим во Оби́тель Твою́ се́й принесо́ша, пою́ще Твое́ промышле́ние и ра́достию вопию́щи:

Ра́дуйся, по́ясе Богоро́дицы; ра́дуйся, Ватопе́ду сла́ва.

Ра́дуйся, его́же осеня́ет благода́ть Ду́ха Свята́го; ра́дуйся, его́же похваля́ет наро́д христоимени́тый.

Ра́дуйся, чредо́ всечестна́я дарова́ний небе́сных; ра́дуйся, песнопе́ние непреста́нное мона́хом и по́стником.

Ра́дуйся, я́ко струи́ исцеле́ний то́чиши; ра́дуйся, я́ко пла́мень страсте́й угаша́еши.

Ра́дуйся, честно́е Чи́стыя препоя́сание; ра́дуйся, все́м ве́рным спасе́ние.

Ра́дуйся, све́та заре́ облиста́ющая; ра́дуйся, страсте́й уставля́еши па́губу.

Ра́дуйся, по́ясе пречестны́й.

Конда́к 7.
Велича́ем вси́, мно́гая вели́чия, е́же о на́с Твоего́ попече́ния, и по́яс Тво́й свяще́нный ве́рою обстоя́ще Всепе́тая, освяще́ния исполня́емся, и Сы́ну Твоему́ взыва́ем: Аллилу́ия.

И́кос 7.
Я́ко о́блак мы́сленный, по́яс Тво́й святы́й, простри́ на ны́ Богоро́дице, и душа́ на́ша испо́лни, освяще́ния и умиле́ния боже́ственнаго, к Тебе́ бо прибега́ем, и по́ясу Твоему́ взыва́ем:

Ра́дуйся, жили́ще благода́ти боже́ственныя; ра́дуйся, сострада́ния кла́дязе.

Ра́дуйся, даро́в богода́нных сокро́вище; ра́дуйся, Чи́стыя Богоро́дицы препоя́сание.

Ра́дуйся, тве́рдый соу́зе и ми́ра пода́телю; ра́дуйся, благочести́вым утвержде́ние незы́блемо и сла́дость.

Ра́дуйся, я́ко чуде́с лучи́ испуща́еши; ра́дуйся, я́ко свире́пства боле́зней разоря́еши.

Ра́дуйся, Бо́жией бла́гости луче́; ра́дуйся, кре́посте на́ша богодарова́нная.

Ра́дуйся, ра́дость и́стинную подаю́щий; ра́дуйся, тлю́ душе́вную умерщвля́ющий.

Ра́дуйся, по́ясе пречестны́й.

Конда́к 8.
Стра́нна твоя́ чудеса́, о по́ясе пречестны́й Всецари́цы Де́вы, пове́трия губи́тельнаго Ца́рский Гра́д свободи́л еси́, чудя́хубося и дивля́хуся во умиле́нии вопию́щия: Аллилу́ия.

И́кос 8.
Приста́нище обурева́емым, по́яс Тво́й святы́й показа́ся Богоро́дице Де́во, благода́ть бо Твоя́ я́же на не́м, де́йствует бо чудесы́ приходя́щим, те́мже к нему́ припа́дающе, с любо́вию взыва́ем:

Ра́дуйся, ра́ко до́брых небе́сных; ра́дуйся, чуде́с точе́ние разли́чных.

Ра́дуйся, Де́вы на́м посеще́ние; ра́дуйся, скорбя́щим душа́м засту́пниче.

Ра́дуйся, боже́ственное жили́ще де́йства боже́ственнаго; ра́дуйся, благода́ти Де́выя свято́е сокро́вище.

Ра́дуйся, я́ко холе́ры Гра́д Ца́рский спаса́еши; ра́дуйся, я́ко ско́рое все́м заступле́ние посыла́еши.

Ра́дуйся, у́гль погаша́ющий стра́сти; ра́дуйся, вся́ ны́ возвеселя́ющий.

Ра́дуйся, мно́гих даро́в пала́то; ра́дуйся, сла́вы боже́ственныя честно́е храни́лище.

Ра́дуйся, по́ясе пречестны́й.

Конда́к 9.
Испо́лнь сла́вы святы́я ви́дится, по́яса Ти́ киво́т вои́стину святы́й, Богоро́дице Де́во Чи́стая, ра́зум на́м удивля́ющий, благоуха́нием бо ды́шит преми́рным вопию́щим: Аллилу́ия.

И́кос 9.
Же́зл кре́пости боже́ственныя, по́яс Тво́й на́м даде́ся, ди́вная Богома́терь, у́мным бо того́ соде́йствием, от вся́кия беды́ избавля́емся и благода́ти исполня́емся, во благогове́нии вопию́ще:

Ра́дуйся, сосу́де свята́го благоуха́ния; ра́дуйся, диади́ма нетле́ния.

Ра́дуйся, мона́шествующым честно́е прибе́жище; ра́дуйся, и́мже во Афо́не дая́ние препе́тое.

Ра́дуйся, Чи́стыя Де́вы всечестно́е свяще́ние; ра́дуйся, Ея́ же вои́стину на́м да́р всесоверше́нный.

Ра́дуйся, Ватопе́ду весе́лие и́стинное; ра́дуйся, вся́кому се́рдцу благоче́стному ра́досте.

Ра́дуйся, цвето́в благода́ти благоуха́ние; ра́дуйся, го́рней красоты́ дыха́ние.

Ра́дуйся, фиа́ло арома́тов боже́ственных; ра́дуйся, святы́м боже́ственное пе́ние.

Ра́дуйся, по́ясе пречестны́й.

Конда́к 10.
Покро́в и предста́тельство, и Бо́жию по́мощь, при́сно плодя́ще Всесвята́я, от миродохнове́ннаго Ти́ по́яса, с ве́рою к нему́ приступа́ем, и благогове́йно припа́дающе, из Тебе́ Ро́ждшемуся вопие́м: Аллилу́ия.

И́кос 10.
Благода́тию свята́го Ти́ по́яса Богоро́дице, си́лу на́м препоя́ши на врага́ началозло́бнаго, я́ко ле́в на ны́ рыка́ющаго, я́коже да одоле́ем зло́бу того́ вопию́щия:

Ра́дуйся, Чи́стыя Де́вы по́ясе; ра́дуйся, ча́ше Госпо́дния кре́пости.

Ра́дуйся, связу́ющий ны́ и спаса́ющий; ра́дуйся, у́зы страсте́й разреша́ющий.

Ра́дуйся, по́ясе драгоце́ннейший Ро́ждшия Христа́; ра́дуйся, благоче́стному наро́ду дая́ние свяще́ннейшее.

Ра́дуйся, боже́ственныя на́м си́лы пода́телю; ра́дуйся, вра́жие неи́стовство отверга́ющий.

Ра́дуйся, о по́ясе Богома́тери; ра́дуйся, о сла́ва на́м и соу́зе.

Ра́дуйся, Це́ркви Христо́вой украше́ние; ра́дуйся, наро́ду правосла́вному утвержде́ние.

Ра́дуйся, по́ясе пречестны́й.

Конда́к 11.
Благода́рственными пе́сньми, по́ясе всепрече́стне все́х Зижди́теля Ро́ждшия, твою́ благода́ть воспева́ем при́сно, мно́гих чуде́с твои́х наслажда́ющеся, и сла́вим Чи́стую Всецари́цу, Христу́ вопию́ще: Аллилу́ия.

И́кос 11.
Светоприе́мную свещу́, по́яс Тво́й святы́й, иму́ще Оби́тель Ватопе́дская, светле́ется Де́во при́сно, и сла́вит е́же о не́й Твое́ промышле́ние, я́ко то́й дарова́ся по́яс Тво́й ве́рно вопию́щей:

Ра́дуйся, по́ясе Богоро́дицы; ра́дуйся, свети́льниче све́та трисве́тлаго.

Ра́дуйся, разделе́нным боже́ственное сочета́ние; ра́дуйся, неду́гующим богода́нная си́ло.

Ра́дуйся, по́ясе боже́ственный держа́ву ве́рным подаю́щий; ра́дуйся, всево́инства велиа́рова полки́ погубля́ющий.

Ра́дуйся, я́ко си́лы душа́м укрепля́еши; ра́дуйся, я́ко к восхожде́ниям до́брым направля́еши.

Ра́дуйся, я́звы ду́ш омыва́ющий; ра́дуйся, колесни́цы враго́в сокруша́ющий.

Ра́дуйся, и́стинное на́м весе́лие; ра́дуйся, ве́рным боже́ственное утеше́ние.

Ра́дуйся, по́ясе пречестны́й.

Конда́к 12.
Ра́дуется, Богоро́дице, Оби́тель Ватопе́дская, по́ясом боже́ственным Ти́ облада́юще, и ко славосло́вию вели́чий Твои́х оби́тели вся́ созыва́ет, сла́вяще сла́ву Твою́, Тро́ице же вопию́ще: Аллилу́ия.

И́кос 12.
Пою́ще по до́лгу, Богоро́дице Де́во, по́яса Ти́ благода́ть преоби́льную, и пропове́дуем я́сно Чи́стая, е́же о на́с бога́тное Ти́ попече́ние, и пресвято́му Ти́ по́ясу всеблагода́рно вопие́м:

Ра́дуйся, Де́выя честна́я плени́це; ра́дуйся, Ватопе́ду ра́досте.

Ра́дуйся, ве́рных к Бо́гу возводя́щий; ра́дуйся, ко и́стинней жи́зни влеку́щий.

Ра́дуйся, по́ясе всечестны́й; Це́ркви сокро́вище; ра́дуйся, ми́ру весе́лие и ми́ра пода́телю.

Ра́дуйся, благоче́ствующым прибе́жище спасе́ния; ра́дуйся, мона́шествующым бога́тство утеше́ния.

Ра́дуйся, и́мже страсте́й очища́юся; ра́дуйся, и́мже све́та исполня́юся.

Ра́дуйся, души́ моея́ ра́дость и́стинная; ра́дуйся, жи́зни моея́ приста́нище ве́рное.

Ра́дуйся, по́ясе пречестны́й.

Конда́к 13.
О пречестны́й по́ясе Пречи́стыя Богоро́дицы, препоя́савый те́ло непоро́чное, подава́й на́м от сокро́вища все́льшияся в тя́ благода́ти боже́ственныя, де́йство животворя́щее, я́ко да Христу́ при́сно вопие́м: Аллилу́ия.

Этот конда́к читается трижды, затем 1-й и́кос и 1-й конда́к.

И́кос 1.
А́нгели неви́димо по́яс Тво́й святы́й со стра́хом обстоя́ще Отрокови́це, мы́ же во пло́ти су́щия, с ве́рою припа́даем к нему́, освяще́ние прие́млюще, и во благогове́нии вопие́м:

Ра́дуйся, по́ясе Богоро́дицы; ра́дуйся, сия́ние всему́ ми́ру.

Ра́дуйся, Непоро́чныя Де́вы препоя́сание; ра́дуйся, Це́ркве всея́ сокро́вище.

Ра́дуйся, по́ясе многоце́нный Влады́чицы небе́с; ра́дуйся, цве́те благоуха́нный благочести́вых христиа́н.

Ра́дуйся, я́ко те́ло Де́выя препоя́саеши; ра́дуйся, я́ко кре́пость льсти́ваго ослабля́еши.

Ра́дуйся, свети́льниче благода́ти всесве́тлый; ра́дуйся, исто́чниче чуде́с неизсяка́емый.

Ра́дуйся, и́мже ве́рнии светозаря́ются; ра́дуйся, и́мже врази́ упраздня́ются.

Ра́дуйся, по́ясе пречестны́й.

Конда́к 1.
Ко пречестно́му Богоро́дице боже́ственному по́ясу Твоему́, со благогове́нием притека́юще, исполня́емся просвеще́ния и благоуха́ния преми́рнаго, но я́ко пучи́но су́щи Де́во бла́гости, препоя́ши ны́ си́лою его́ Непоро́чная, зову́щия:

Ра́дуйся, по́ясе пречестны́й.

Моли́тва пе́рвая.
О, Благода́тная Богома́ти, Пренепоро́чная и Обра́дованная, да ра́дуемся и мы́, немощны́я лю́дие Твои́, я́ко Си́лою и Вла́стию Твое́ю сокруши́ши все́х враго́в на́ших ви́димых и неви́димых, да просла́вим и возвели́чим Тя́, я́ко Непобеди́мую Побе́ду Всеси́льную.

Моли́тва втора́я.
Цари́це моя́ преблага́я, наде́ждо моя́ Богоро́дице, прия́телище си́рых и стра́нных предста́тельнице, скорбя́щих ра́досте, оби́димых покрови́тельнице! Зри́ши мою́ беду́, зри́ши мою́ ско́рбь, помози́ ми́ я́ко не́мощну, окорми́ мя́ я́ко стра́нна. Оби́ду мою́ ве́си, разреши́ ту́, я́ко во́лиши: я́ко не и́мам ины́я по́мощи ра́зве Тебе́, ни ины́я предста́тельницы, ни благи́я уте́шительницы, то́кмо Тебе́, о Богома́ти, я́ко да сохрани́ши мя́ и покры́еши во ве́ки веко́в. Ами́нь.

-------------------------------------------------------------------------------------

Канон положению честного пояса Пресвятой Богородицы (первый)

Припев: Пресвята́я Богоро́дице, спаси́ на́с.
Память: 13 сентября (31 августа ст. ст.)
Глас 8.


Пе́снь 1.

Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Кре́постию мя́ Боже́ственною благоче́стно препоя́ши, песносло́вяща Тво́й свяще́нный по́яс, боже́ственно су́щи гра́ду Твоему́ опоя́сание, и держа́ва, Отрокови́це, и незы́блемо остене́ние, Чи́стая Де́во Препе́тая.

Ты́ Бо́га си́льнаго родила́ еси́, препоясу́ющаго благочести́выя вся́ си́лою, Всенепоро́чная. Те́мже Тя́ блажи́м и боже́ственный Тво́й по́яс, ра́достно облобыза́юще, благода́ть почерпа́ем и ми́лость.

Ра́достно положе́нию дне́сь о́крест лику́ем свяще́ннаго по́яса честны́я Богоотрокови́цы, от Нея́же на́м препоя́сание нетле́ния истка́ся, и нераздира́ема оде́жда, и ри́за свяще́ния.

Под Твою́ Твои́ лю́дие, Всенепоро́чная, притека́ют си́лу, под Тво́й покро́в прибега́ют всегда́, все́м бу́ди по́мощь и я́же ко спасе́нию все́м пода́ждь проше́ния, спаса́ющи от бе́д ду́ши на́ша.

Пе́снь 3.

Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Обновля́ется се́рдце, ве́рою те́плою прикаса́ющеся по́ясу свяще́нному Де́вы, и препоясу́ется си́лою непобеди́мою на стра́сти нечи́стыя и вра́г безпло́тных, невреди́мо пребыва́юще.

Пребыва́ет нетле́нен еще́ свяще́нный по́яс Тво́й, и́же Твое́ нетле́нное те́ло, Отрокови́це, опоя́са, освяща́ющ благоче́стно приступа́ющии, и тли́ изыма́ющ неду́г и скорбе́й.

Была́ еси́ до́м преудо́брен, Чи́стая, Сло́ва, из Тебе́ воплоще́ннаго, и во святе́м хра́ме Твое́м благоволи́ла еси́ по́яс Тво́й положи́ти: его́же облобыза́юще, освяща́емся.

Честны́й Тво́й по́яс че́стно вси́ ра́достным се́рдцем облобыза́ем, че́сть су́щую все́х ве́рных, Богоро́дице, я́ко пречестно́му Твоему́ прикосну́вшуся телеси́.

Конда́к, гла́с 2.
Богоприя́тное Твое́ чре́во, Богоро́дице, объе́мший по́яс Тво́й честны́й, держа́ва гра́ду Твоему́ необори́ма и сокро́вище е́сть, благи́х неоску́дно, еди́на ро́ждшая Присноде́во.

Седа́лен, гла́с 4.

Я́ко боже́ственное возложе́ние, во хра́ме Бо́жии, Чи́стая, освяти́ся по́яс всечестны́й, и́мже препоя́сала еси́ ложесна́ непоро́чная, Бо́га заче́ншая. Те́мже, сему́ ве́рою прикаса́ющеся и стра́хом че́стно облобыза́юще, освяща́емся.

Сла́ва, и ны́не: Положе́ние Твоего́ честна́го по́яса Це́рковь Твоя́ све́тло пра́зднует и приле́жно зове́т Ти́, Де́во Чи́стая: вся́ опоя́ши на си́лу вра́жию, низложи́ шата́ние безбо́жных ва́рвар, и на́ш упра́ви живо́т, де́лати Госпо́дня Боже́ственная хоте́ния.

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.

Взя́тся к Све́ту незаходи́мому, преста́вльшися, оста́вила еси́ Тя́ блажа́щим, вме́сто телесе́ Твоего́, Чи́стая, честны́й по́яс, исто́чник чуде́с су́щи, и ме́сто спасе́ния, и огражде́ние сему́, чту́щему Тя́ гра́ду, Пречи́стая.

Я́ко в но́во не́бо, мы́ вхо́дим в Тво́й хра́м, иде́же сокро́вище положи́ся, я́коже со́лнце светоза́рно, Тво́й Боже́ственный по́яс, лучи́ чуде́с испуща́ющ, и все́х сердца́ озаря́ющ, Отрокови́це, и страсте́й мглу́ отгоня́ющ.

Ты́ киво́т мы́сленнаго свяще́ния еси́, Чи́стая Всепе́тая, и честну́ю сию́ ра́ку, иму́щую по́яс, его́же на Себе́ носи́ла еси́, подае́ши лю́дем Твои́м прибе́жище ве́лие, и исто́чник исцеле́ний неистоща́емый.

Принесе́ся Твоему́ гра́ду многобога́тный да́р — честны́й по́яс Тво́й, Всенепоро́чная, и положи́ся све́тло в се́й де́нь в се́м Боже́ственнем хра́ме Твое́м, и бы́сть ве́лия пра́здника, Богоро́дице, те́пле лю́бящим Тя́ вина́.

Зако́на се́ни и проро́к гада́ния предсказа́ху: бы́ти Тебе́, Пречи́стая, Бо́гу Ма́терь всеи́стинную, Е́юже кля́тва исчезе́ и процвете́ соверше́нное благослове́ние, и спаси́тельная благода́ть, ве́рою и любо́вию пою́щим Тя́.

Пе́снь 5.
Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя́, и к све́ту за́поведей Твои́х пути́ моя́ напра́ви, молю́ся.

По́ясу боже́ственному, положе́ну дне́сь во хра́ме Твое́м, Богора́дованная, с ни́м положи́ся благи́х вся́ко дая́ние тре́бующим, и наполня́ется вся́к, кто́ свяще́ния приходя́й, проше́ния ве́рно прие́мля.

Украси́ся, Де́во, Сло́ва Прекра́снаго поро́ждши, и во Твое́м кра́снем благоволи́ла еси́ дому́ положи́тися кра́сному по́ясу, и́же Твое́ кра́сное те́ло, Богоро́дице, красно́ опоя́са.

Тво́й святы́й хра́м, я́коже други́й ра́й, все́м познава́ется: посреде́ стяжа́, я́коже благово́нен шипо́к, по́яс Тво́й, благово́ния Боже́ственнаго исполня́ющь сердца́, ве́рно приступа́ющим, Всенепоро́чная.

Ту́чи Боже́ственныя о́блак была́ еси́, Пренепоро́чная, иска́пающий спасе́ния во́ду, и зе́млю, олядене́вшую грехми́, к плодоно́сию преводя́щи благоче́стия. Сего́ ра́ди ве́рно Тя́ сла́вим.

Пе́снь 6.

Ирмо́с: Бе́здна грехо́в и прегреше́ний бу́ря мя́ смуща́ет и во глубину́ ну́жднаго ре́ет мя́ отча́яния, но Твою́ кре́пкую ру́ку мне́ простри́, я́ко Петро́ви, о Упра́вителю! и спаси́.

Но́во родила́ еси́ на́м я́ко Отроча́, пре́жде ве́к су́щаго, и обновля́еши сердца́, грехми́ обетша́вшая, прие́мшая обновле́ние, положе́нием честна́го по́яса Твоего́, Отрокови́це Присноде́во.

Свята́я Твоя́ це́рковь ди́вна в пра́вду е́сть, и́же чу́дный Тво́й по́яс, точа́щий чудеса́, стяжа́вши, бе́дным пучи́на явля́ется исцеле́ний, Богороди́тельнице Ма́ти Де́во.

Возвесели́ся вся́ка душа́, совоку́пльшися во святе́м хра́ме Твое́м и в не́м зря́щи, Богоро́дице, по́яс Тво́й, я́коже со́лнце све́тло, све́т облиста́ющ дарова́ний Вседе́теля и Боже́ственнаго Ду́ха.

Укрепи́ на́ша, Чи́стая, сердца́, презре́вши вся́ согреше́ния, и препоя́ши си́лою, по́яс Тво́й ве́рно я́коже многоце́нно стяжа́вших, и неотъе́млемо сокро́вище.

Конда́к:
Честна́го по́яса Твоего́ положе́ние пра́зднует дне́сь Тво́й, Препе́тая, хра́м и приле́жно взыва́ет Ти́: ра́дуйся, Де́во, христиа́н похвало́.

И́кос:
Твои́м мя́ просвети́ све́том, Де́во Богоро́дице, и разруши́ мою́ тму́, во уме́ лежа́щую лю́те, я́ко да чи́сто Тебе́ приступлю́, Чи́стей, земны́я обожи́вшей, воспою́ Тво́й, Всенескве́рная и Непоро́чная, боже́ственный по́яс, светле́йший со́лнца, его́же ми́р се́й и́мать я́ко тве́рд покро́в и наде́жду, побежда́ющ сове́ты враго́в беззако́нных, и си́х кова́рства разоря́ющ, и всегда́ сохраня́ющ Твоя́ рабы́. Ра́дуйся, Де́во, христиа́н похвало́.

Пе́снь 7.
Ирмо́с: Бо́жия снисхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших.

Все́х Цари́ца, к небе́сным се́лом отше́дши, оста́ви бога́тство царю́ все́х градо́в — Сво́й по́яс, и́мже спаса́ются от наше́ствия ви́димых и неви́димых вра́г. Ко исто́чнику ны́не присту́пим, иска́пающему благода́ть и ми́лость, ра́це честне́й, иму́щей по́яс всечестны́й поче́тшия челове́ческое смеше́ние честны́м Рождество́м Свои́м, Де́вы же и Ма́тере.

Хвали́те Го́спода, си́лы вся́ небе́сныя, и Сего́ Ро́ждшую, челове́честии язы́цы вси́, просла́вите: я́ко по́яс Сво́й дарова́, прибе́жище и́стинно и спасе́ние ве́рным.

Да кропя́т свы́ше пра́вду о́блацы дне́сь, положе́нием по́яса Твоего́, О́блаче богора́дованный, и да сладкопое́т душа́ вся́ка, ра́дующися: благослове́н Бо́г оте́ц на́ших.

Пе́снь 8.
Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Я́коже престо́л свя́т, ковче́г положи́ся, вну́трь невходи́мых свяще́нных све́тло, еди́ныя Богоотрокови́цы и Цари́цы все́х Чи́стыя по́яс иму́щий поко́йный: от него́же тружда́ющимся во мно́гих боле́знех поко́й соверше́н прихо́дит незави́стно.

На земли́ Го́спода свяще́нно воплоти́ла еси́ и рука́ми святы́ми вои́стинну опоя́сала еси́, препоясу́ющаго благочести́выя си́лою; ны́не же возше́дши небе́с превы́ше, оста́вила еси́ челове́ком честны́й Тво́й по́яс, Де́во Богоро́дице, держа́ву и покро́в.

Неду́гующих исцеле́ние, поползну́вшихся утвержде́ние и уныва́ющих благоду́шие боже́ственно, корми́ло пла́вающих, заблу́ждших обраще́ние, после́дующая честно́му Твоему́ по́ясу, Чи́стая Де́во, Боже́ственная благода́ть вои́стинну е́сть, ему́же ве́рою покланя́емся во вся́ ве́ки.

Соверша́юще дне́сь свято́е положе́ние по́яса Твоего́ боже́ственнаго, свяще́нное торжество́, раби́ Твои́, чти́м и ра́достию вопие́м Ти́: ра́дуйся, Богоро́дице, ра́досте а́нгелов и все́х челове́ков, ве́рою пою́щих: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Пе́снь 9.
Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, А́нгелов и челове́к чинонача́лия велича́ют.

Се́ Боже́ственный о́др Соломо́нов, его́же си́льнии окружа́ют шестьдеся́т, рече́ния писа́ний, я́коже на одре́ ца́рсте, в ковче́зе че́стне дне́сь по́яс полага́ет Сво́й, на воззва́ние все́м ве́рным и благочести́вым в снабде́ние.

О, Гра́де Царя́ небе́снаго, о не́мже возглаго́лашася пресла́вная! Положи́ Твоему́ гра́ду да́р че́стен и свя́т, всесвяты́й Тво́й по́яс, во утвержде́ние все́м ве́рным, и́мже венцено́сцы побежда́ют супоста́ты, Правосла́вием сия́юще.

Иска́пайте, го́ры, ны́не сла́дость, и хо́лми, весе́лие ве́чное, патриа́рх собо́ри и му́ченик ли́цы, проро́ков же сосло́вие, боже́ственных апо́столов со́нм честны́й, весели́теся со все́ми на́ми, в положе́нии боже́ственнаго по́яса Богоотрокови́цы.

Освяти́ла еси́ вся́ Твои́м, Пресвята́я Де́во, рождество́м и ны́не на́м подала́ еси́ премно́гое просвеще́ние — пресвяты́й по́яс Тво́й, его́же положе́нием вся́ земля́ лику́ет и почита́ет Тя́, ра́дости неизглаго́ланныя испо́лнившую челове́чество.

Любве́ мя́ ле́стныя страсте́й, и врага́, всегда́ искуша́ющаго грехо́в тягото́ю, уны́ния же лю́таго отведе́ния, Пречи́стая, и плене́ния, и греха́, к Твое́й прибега́ющаго ми́лости, вско́ре, я́ко ми́лостива, Чи́стая, премени́.

Свети́лен.
По́яс честны́й Тво́й, и́мже свяще́нное Твое́ препоя́сала еси́ те́ло, Богоотрокови́це Де́во, чту́ще, пра́зднуем сего́ ны́не положе́ние, и́мже тли́ избавля́емся, и бе́д, и напа́стей, Ма́ти Бо́га Вы́шняго.

Канон положению честного пояса Пресвятой Богородицы (второй)

Припев: Пресвята́я Богоро́дице, спаси́ на́с.
Память: 13 сентября (31 августа ст. ст.)
Глас 4.


Пе́снь 1.
Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Свещу́ светоявле́нную и незаходи́мую, Де́вы хра́м я́ко Не́бо обре́т све́тло, тоя́ пресве́тлый по́яс вселе́нную дне́сь чуде́с облиста́ет заря́ми.

Кре́пость же и утвержде́ния сою́з, Твои́м, Пречи́стая, Боже́ственным я́ко вои́стинну по́ясом, мы́сленне опоя́сан гра́д Тво́й, держа́ву нераздра́нну и́мать: те́мже и о Тебе́ хва́лится.

Дре́вле я́ко вои́стинну пречестна́го киво́та, Твоя́ ра́ка, Богороди́тельнице, яви́ся су́щим на земли́, не скрижа́ли нося́щая, но ве́рно соблюда́юща и́стины позна́ния.

Арома́ты та́йныя пролива́ются, во хра́ме Чи́стыя, от честны́я дне́сь ра́ки: и исполня́ют духо́внаго благово́ния все́х, любо́вию к то́й притека́ющих.

Пе́снь 3.
Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище и утвержде́ние.

Да почти́м, ве́рнии, я́ко совокупле́ния к Бо́гу сою́з, Чи́стыя дне́сь по́яс, и ве́рно да поклони́мся.

Всегда́шнии то́ки благода́тей, Чи́стая, от пречи́стыя Твоея́ ра́ки теку́щии, все́х ве́рных напая́ют.

Исцеле́ния ве́рным многопе́тый на́м дне́сь Пречестны́я честны́й по́яс, источа́ет благода́тию.

Я́ко роса́ у́тренняя, весе́лие Твое́, Чи́стая, точа́щи, страсте́й пе́щь, Тя́ при́сно воспева́ющим угаша́ет.

Конда́к, гла́с 2.
Богоприя́тное Твое́ чре́во, Богоро́дице, объе́мший по́яс Тво́й честны́й, держа́ва гра́ду Твоему́ необори́ма, и сокро́вище е́сть, благи́х неоску́дно, еди́на ро́ждшая Присноде́во.

Седа́лен, гла́с 4.
Я́ко Боже́ственное возложе́ние во хра́ме Бо́жии, Чи́стая, освяти́ся по́яс всечестны́й, и́мже препоя́сала еси́ ложесна́, непоро́чная, Бо́га заче́ншая. Те́мже сему́ ве́рою прикаса́ющеся, и стра́хом че́стно облобыза́юще, освяща́емся.

Сла́ва, и ны́не: Положе́ние Твоего́ честна́го по́яса, Це́рковь Твоя́ све́тло пра́зднует, и приле́жно зове́т Ти́, Де́во чи́стая: вся́ опоя́ши на си́лу вра́жию, низложи́ шата́ние безбо́жных ва́рвар: и на́ш упра́ви живо́т, де́лати Госпо́дня Боже́ственная хоте́ния.

Пе́снь 4.
Ирмо́с: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Я́ко пречестно́е утвержде́ние, Богоро́дице, Творе́ц и Созда́тель Тя́ водрузи́в, я́коже звезда́ми украси́л Тя́ е́сть, Боже́ственными сия́нии, и́миже просвеща́еши концы́.

Тя́ держа́ву гра́д Тво́й, Богоро́дице, и тве́рдое основа́ние име́я, Боже́ственным по́ясом Твои́м содержи́тся: сою́з неразори́мь се́й в бра́нех притяза́ющ.

От земли́ на́с возвлачи́т, Богороди́тельнице, к Небеси́ Боже́ственный по́яс Тво́й, любо́вию Твое́ю и того́ возводи́мых. те́м Тя́ сла́вим, я́ко вину́ сла́вы лу́чшия.

Се́ благода́ть неисчерпа́емая, прииди́те вси́ усе́рдным се́рдцем, почерпи́те ре́ки точа́щия незави́стно празднолю́бцы, от честны́я ра́ки Пречи́стыя Ма́тере.

Пе́снь 5.

Ирмо́с: Ты́, Го́споди мо́й, Све́т в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Ты́, Го́споди, твою́ Ма́терь возвели́чил еси́, Ты́ возвы́сил еси́ над вся́ мы́сленныя вла́сти, без сравне́ния сла́вы Тоя́.

Благода́ть Бо́жия ны́не незави́стно подае́тся, Пречи́стая Богоро́дице, от честны́я ра́ки Твоея́, ве́рою покланя́ющимся Тебе́.

Твое́ю си́лою ве́рнии ца́рие опоясу́ются, тя́ сою́з, Богоро́дице, Тво́й гра́д хва́лящи, по́ясом твои́м честву́ется.

Ве́дома Твоя́ вои́стинну благода́ть показа́ся, Пречи́стая, пресла́вно де́йствующая си́лы, и зна́мения по все́й земли́.

Пе́снь 6.

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею Кро́вию.

Всю́ Тя́ преесте́ственне просла́ви Госпо́дь, всю́ возвы́сив Тя́ еди́ну, всю́ Тя́ почте́ па́че сло́ва, Богоро́дице, хра́м с по́ясом и Боже́ственною ра́кою.

Истека́ют из пучи́ны струи́ благода́ти от ра́ки Пречи́стыя, и тва́рь всю́ окружа́ют напая́юще, ве́рно покланя́ющияся Рождеству́ Твоему́.

Кре́пость Тя́ ве́рнии стяжа́вше, и похвалу́, опоясу́ются сла́вою, честны́й тво́й по́яс, Богороди́тельнице, иму́ще я́ко пресве́тлую у́тварь и честну́ю.

Конда́к.

Честна́го по́яса Твоего́ положе́нием пра́зднует дне́сь, Тво́й, Препе́тая, хра́м, и приле́жно взыва́ет ти́: ра́дуйся, Де́во, христиа́н похвало́.

И́кос.
Твои́м мя́ просвети́ све́том, Де́во Богоро́дице, и разруши́ мою́ тьму́ во уме́ лежа́щую лю́те, я́ко да чи́сто Тебе́ приступлю́ Чи́стей, земны́я обожи́вшей: воспою́ Тво́й, Всенескве́рная и Непоро́чная, Боже́ственный по́яс, светле́йший со́лнца, его́же ми́р се́й и́мать я́ко тве́рд покро́в и наде́жду, побежда́ющ сове́ты враго́в беззако́нных, и си́х кова́рства разоря́ющ, и всегда́ сохраня́ющ Твоя́ рабы́. Ра́дуйся, Де́во, христиа́н похвало́.

Пе́снь 7.
Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем опаля́еми, взыва́ху: благослове́н еси́ в хра́ме сла́вы твоея́, Го́споди.

Ты́ я́ко Со́лнце пра́вды, Еди́не сы́й Светода́вче, Боже́ственне хра́м Чи́стыя просвети́л еси́ разли́чными Твои́ми дарова́нии: и́мже сия́ющи лучи́ изъясня́ет по́яс Тоя́.

Я́ко злату́ю ста́мну Тво́й по́яс окружа́юще, еди́на Чи́стая, Боже́ственней вои́стинну причаща́емся ны́не сла́дости благода́тей, Всеблагослове́нная, и скрижа́лей вы́шшую Ти́ я́ко су́щую, почита́ем сию́.

Источа́ют вои́стинну чуде́с, Отрокови́це Чи́стая, ча́ши Твоя́ благода́ть ве́рным: и незави́стно от Твоея́ ра́ки происхо́дят, я́ко от ина́го Еде́ма ре́ки.

Ны́не приступи́те с весе́лием вси́, и́же на земли́, прииди́те, ра́ка прорица́ет та́йно Госпожи́: объе́млите Пресла́вную, во мне́ сокро́виществовавшую по́яс Сво́й.

Пе́снь 8.
Ирмо́с: Ру́це распросте́р Дании́л, льво́в зия́ния в ро́ве затче́, о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те, вся́ дела́ Госпо́дня, Го́спода.

Скрижа́ли Боже́ственныя дре́вле киво́т, руко́ю напи́санныя Бо́жиею, содержа́ше Пречи́стая: Твоя́ же Чи́стая Влады́чице, чествова́нная и честна́я ра́ка по́яс содержи́т. те́х законополо́жника содержа́щия в себе́ стра́шное та́инство.

А́нгели, Пречи́стая Чи́стая, ны́не в честне́м Твое́м хра́ме слику́ют, и объе́млют, Влады́чице, честны́й и святы́й Тво́й по́яс: ему́же любо́вию и ра́достию и весе́лием мно́гим покланя́емся, тя́ воспева́юще, сла́ву ро́да на́шего.

Же́зл, я́же цве́т жи́зни прозя́бший, ты́ еси́ все́х ра́дость, многоце́нная чи́стая мирополо́жница Ду́ха, сокро́вище благи́х, арома́т исто́чник, из нея́же ми́ро исцеле́ний излива́ет Боже́ственная ра́ка.

Воспева́ют, Пречи́стая Чи́стая, вели́чия Твоя́, мы́сленная во́инства, пропове́дуют вси́ патриа́рси и проро́цы я́вственно, апо́столи со свяще́нными, и му́чеников ли́кове: с ни́миже покланя́емся Тебе́.

Пе́снь 9.
Ирмо́с: Ка́мень нерукосе́чный от несеко́мыя горы́ Тебе́, Де́во, краеуго́льный отсече́ся, Христо́с, совокупи́вый разстоя́щаяся естества́. Те́м веселя́щеся, Тя́, Богоро́дице, велича́ем.

Черто́г пречестны́й вои́стинну, Богороди́тельнице, ра́ка Твоя́ яви́ся, святы́й Тво́й по́яс, де́вственную и неве́стническую я́ко оде́жду, досто́йне содержа́щи и соблюда́ющи, я́ко живота́ сокро́вище.

Боже́ственною диади́мою красоты́, Це́рковь, Богоро́дице, оде́явшися, Боже́ственным и всесвяты́м Твои́м по́ясом дне́сь ца́рски весели́тся, и красу́ется сла́вою Твое́ю.

Хра́м по всему́ подо́бящийся небесе́м благокра́сный дне́сь Де́вы, ве́рнии прие́мше дарова́ний зари́, я́коже зве́здными красота́ми осия́еми, светли́теся.

И́мать святы́й тво́й по́яс, Богороди́тельнице, гра́д тво́й, сою́з ми́ра и сте́ну, и догма́т Боже́ственное еди́нство, и правосла́вных похвалу́, и во́ем одоле́тельная.

Воспева́ем неизглаго́ланную сла́ву, и неизче́тную Твою́ благода́ть: Ты́ бо еси́ исто́чник прему́дрости, из нея́же сло́во все́м происхо́дит чту́щим Тя́, Пречи́стая, и велича́ющим рождество́ Твое́.

Свети́лен.
По́яс честны́й Тво́й, и́мже свяще́нное Твое́ препоя́сала еси́ те́ло, Богоотрокови́це, Де́во, чту́ще пра́зднуем сего́ ны́не положе́ние, и́мже тли́ избавля́емся, и бе́д и напа́стей, Ма́ти Бо́га вы́шняго.

Комментарии

Комментарии не найдены ...
Добавлять комментарии могут только
зарегистрированные пользователи!
 
Имя или номер: Пароль:
Регистрация » Забыли пароль?
Просьба о помощи
© LogoSlovo.ru 2000 - 2019, создание портала - Vinchi Group & MySites