Акафисты и Канон Пресвятой Богородице пред иконой «Владимирская»

Владимирская икона Божией матери.
Акафист Пресвятой Богородице пред иконой «Владимирская»
Память: 03 июня (21 мая ст. ст.); 06 июля (23 июня ст. ст.); 08 сентября (26 августа ст. ст.); 03 июня (21 мая ст. ст.); 06 июля (23 июня ст. ст.); 08 сентября (26 августа ст. ст.)
Утвержден для общецерковного использования.


Конда́к 1.
Взбра́нной Воево́де, Засту́пнице на́шей, взира́юще на первопи́санный о́браз Тво́й, хвале́бное пе́ние воспева́ем Ти́ раби́ Твои́, Богома́ти. Ты́ же, я́ко иму́щая держа́ву непобеди́мую, сохрани́ и спаси́ благода́рне Тебе́ вопию́щия:

Ра́дуйся, Пречи́стая, от ико́ны Твоея́ ми́лости на́м источа́ющая.

И́кос 1.
А́нгельския Си́лы на Небеси́ немо́лчно воспева́ют Тя́, Пречи́стая, зря́ще Сла́ву Пребоже́ственную, е́юже Сы́н Тво́й просла́ви Тя́; но и на́с, земны́х, не оста́вила еси́, я́ко не́кую лучу́, низпосла́вши на́м ико́ну Твою́, святы́м Луко́ю первопи́санную. О не́й бо не́когда изрекла́ еси́: «С си́м о́бразом благода́ть Моя́ и си́ла да пребу́дут». Те́мже ве́рнии раби́ Твои́, по вся́ дни́ и на вся́ком ме́сте сбытие́ слове́с Твои́х зря́ще, ко о́бразу Твоему́ цельбоно́сному притека́ем и, я́коже Само́й Ти́, с на́ми су́щей, вопие́м:

Ра́дуйся, А́нгелов Цари́це; ра́дуйся, всего́ ми́ра Влады́чице.

Ра́дуйся, на Небеси́ при́сно сла́вимая; ра́дуйся, и на земли́ велича́емая.

Ра́дуйся, благода́ть Твою́ ико́не Твое́й се́й дарова́вшая; ра́дуйся, на спасе́ние челове́ков ту́ю поста́вившая.

Ра́дуйся, Бо́жия бла́гости ско́рая Пода́тельнице; ра́дуйся, моле́ний на́ших усе́рдная послу́шнице.

Ра́дуйся, Пречи́стая, от ико́ны Твоея́ ми́лости на́м источа́ющая.

Конда́к 2.
Ви́дя чуде́с мно́жество, от принесе́нныя в Вы́шград святы́я ико́ны Твоея́ быва́емое, благове́рный кня́зь Андре́й возгоре́ся ду́хом и умоля́ше Тя́, да ска́жеши святу́ю во́лю Твою́ и да благослови́ши его́ в преде́лы Росто́вския отъити́. Те́мже улучи́в жела́емое и ико́ну Твою́ взе́м, идя́ше в пу́ть сво́й, ра́дуяся и поя́ Бо́гу: Аллилу́иа.

И́кос 2.
Разуме́ша вси́ лю́дие ди́вное ше́ствие Твое́, Цари́це Небе́сная, от Ки́ева в зе́млю Росто́вскую, боля́щии бо исцеля́хуся и и́на зна́мения и чудеса́ быва́ху все́м с ве́рою притека́ющим ко о́бразу Твоему́. Сего́ ра́ди воспе́ша Тебе́:

Ра́дуйся, чудесы́ ше́ствие ико́ны Твоея́ зна́менавшая; ра́дуйся, мно́ги немощны́я исцели́вшая.

Ра́дуйся, воздыха́ния на́ша не отверга́ющая; ра́дуйся, недосто́йныя моли́твы на́ша прие́млющая.

Ра́дуйся, Ма́терния щедро́ты Твоя́ на на́с излива́ющая; ра́дуйся, ико́ною Твое́ю на́м благоде́ющая.

Ра́дуйся, во обстоя́нии су́щим ско́рую по́мощь да́рующая; ра́дуйся, отча́янным наде́жду возвраща́ющая.

Ра́дуйся, Пречи́стая, от ико́ны Твоея́ ми́лости на́м источа́ющая.

Конда́к 3.
Си́лою Твое́ю огражда́емь, благове́рный кня́зь Андре́й преде́л Влади́мирских дости́же и зде́ благу́ю во́лю твою́, Влады́чице, позна́. В нощно́м бо виде́нии тому́ я́вльшися, повеле́ла еси́ от ме́ста сего́ не отходи́ти и чудотво́рную ико́ну Твою́ зде́, во гра́де Влади́мире, поста́вити, да бу́дет се́верней стране́ на́шей в благослове́ние и лю́дем Твои́м в покро́в, вопию́щим Бо́гу: Аллилу́иа.

И́кос 3.
Име́я в себе́ благода́тное сокро́вище, ико́ну Твою́ Влади́мирскую, преуспева́ше от си́лы в си́лу Оте́чество на́ше. Во дни́ бо обстоя́ний и напа́стей не оста́вила еси́ ро́д на́ш, Влады́чице, и во благовре́мении бли́з была́ еси́, всеси́льным предста́тельством Твои́м ве́рныя лю́ди Твоя́ заступа́ющи, пою́щия Ти́:

Ра́дуйся, гне́в Бо́жий, пра́ведно на ны́ дви́жимый, утоля́ющая; ра́дуйся, на ми́лость к на́м, гре́шным, Го́спода преклоня́ющая.

Ра́дуйся, я́ко смире́нным мольба́м рабо́в Твои́х вне́млеши; ра́дуйся, я́ко утеше́ние Твое́ на́м пода́ти поспеша́еши.

Ра́дуйся, я́ко ико́ною Твое́ю от вся́ких на́с бе́д огражда́еши; ра́дуйся, я́ко то́ю ко́зни вра́жия разруша́еши.

Ра́дуйся, в ча́с ско́рби лю́ди Твоя́ укрепля́ющая; ра́дуйся, ти́хое и безмяте́жное житие́ те́м да́рующая.

Ра́дуйся, Пречи́стая, от ико́ны Твоея́ ми́лости на́м источа́ющая.

Конда́к 4.
Бу́рю помышле́ний сумни́тельных про́йде благове́рный кня́зь Андре́й, от мно́жества враго́в не́когда обстои́мь; Ты́ же, Всепе́тая, ди́вным от ико́ны Твоея́ зна́мением сла́вную побе́ду тому́ предвозвести́ла еси́. Те́мже ве́рою обнови́ся и о и́мени Твое́м дерза́я, воспе́ Бо́гу: Аллилу́иа.

И́кос 4.
Слы́шавше мяте́жницы убие́ние благове́рнаго кня́зя Андре́я, гра́д Влади́мир расхи́тити устреми́шася, но ико́ну Твою́ чудотво́рную, на сто́гны гра́да изнесе́нную, внеза́пу узре́вше, умили́шася се́рдцем и, на коле́на па́дше, во гресе́ свое́м пока́яшася. Благочести́вии же лю́дие, таково́му от ико́ны Твоея́ благода́тному явле́нию ра́дующеся, пе́снь благода́рственную воспе́ша Тебе́:

Ра́дуйся, междоусо́бных бра́ней утоле́ние; ра́дуйся, ожесте́вших серде́ц умягче́ние.

Ра́дуйся, я́ко заблу́ждшия на пу́ть пра́вый возвраща́еши; ра́дуйся, я́ко от собла́знов су́етных на́с огражда́еши.

Ра́дуйся, па́губы вседуше́вныя низлага́ющая; ра́дуйся, душевре́дная науче́ния облича́ющая.

Ра́дуйся, к Ца́рствию Небе́сному пу́ть невозбра́нный на́м указу́ющая; ра́дуйся, ми́р ве́чный и ра́дость на́м подаю́щая.

Ра́дуйся, Пречи́стая, от ико́ны Твоея́ ми́лости на́м источа́ющая.

Конда́к 5.
Боготе́чная звезда́ отце́м на́шим бы́сть ико́на Твоя́, Влады́чице, ея́же све́том ведо́ми, мно́гажды побежда́ху ца́рствия, возмога́ху от не́мощи, обраща́ху в бе́гство полки́ чужди́х и пу́ть к земно́му преуспе́янию и небе́сному спасе́нию обрета́ху. Сего́ ра́ди по до́лгу сла́вит Тя́ земля́ Росси́йская, пою́щи Бо́гу: Аллилу́иа.

И́кос 5.
Ви́девше не́когда лю́дие влади́мирстии в чу́днем виде́нии гра́д сво́й на возду́се вознесе́н, и ико́ну Твою́ верху́ его́, я́коже со́лнце, сия́ющу, со умиле́нием разуме́ша, Влады́чице, неотсту́пный покро́в Тво́й гра́ду и́х и, Твое́ ми́лостивое промышле́ние о ни́х сла́вяще, воспе́ша Ти́:

Ра́дуйся, Ма́ти милосе́рдия; ра́дуйся, исто́чниче чуде́с.

Ра́дуйся, бо́драя на́ша Храни́тельнице; ра́дуйся, гра́ду на́шему Покро́ве.

Ра́дуйся, горе́ к Небе́снем сокро́вищем у́м на́ш возводя́щая; ра́дуйся, любо́вь к Бо́гу в сердца́х ве́рных насажда́ющая.

Ра́дуйся, малове́рныя вразумля́ющая; ра́дуйся, неве́рных смы́слы просвеща́ющая.

Ра́дуйся, Пречи́стая, от ико́ны Твоея́ ми́лости на́м источа́ющая.

Конда́к 6.
Пропове́дник неизрече́нных чуде́с Твои́х, Влады́чице, яви́ся собо́рный хра́м Тво́й во гра́де Влади́мире, свято́ю ико́ною Твое́ю укра́шенный. Попуще́нием бо Бо́жиим все́ благоле́пие его́ не́когда во огни́ поги́бе, ико́на же свята́я Твоя́, я́коже купина́ неопали́ма пребы́сть, да и ви́девше и осяза́вше прису́тствие Твое́, ве́рнии воспою́т: Аллилу́иа.

И́кос 6.
Возсия́ па́ки све́т ико́ны Твоея́, Богоро́дице, во дни́ лю́таго наше́ствия Баты́ева. А́ще бо нечести́вии ага́ряне и пожго́ша огне́м собо́рный хра́м Тво́й, и святи́теля Влади́мирскаго и лю́ди, моля́щияся в це́ркви, умертви́ша, и вся́ коне́чному истребле́нию преда́ша, оба́че ико́на Твоя́ и па́ки неврежде́на обре́теся, подвиза́ющи пе́ти Тебе́:

Ра́дуйся, Купино́ Неопали́мая; ра́дуйся, Сокро́вище неиждива́емое.

Ра́дуйся, Стено́ несокруши́мая; ра́дуйся, прибе́жище все́м упова́ющим на Тя́.

Ра́дуйся, ико́ну Твою́ и во пла́мени це́лу сохрани́вшая; ра́дуйся, на́м во утеше́ние и спасе́ние ту́ю оста́вившая.

Ра́дуйся, Ты́ бо еси́ на́ше защище́ние; ра́дуйся, Ты́ бо еси́ все́х благочести́вых непреста́нное ра́дование.

Ра́дуйся, Пречи́стая, от ико́ны Твоея́ ми́лости на́м источа́ющая.

Конда́к 7.
Хотя́ вели́кий кня́зь Васи́лий защище́ние стяжа́ти сто́льному гра́ду своему́, повеле́ Влади́мирскую ико́ну Твою́ в Москву́ пренести́. И во сре́тение ея́ усе́рдно изше́дше кня́зь и святи́тель моско́вский Киприа́н со освяще́нным собо́ром и все́м мно́жеством люде́й, до земли́ пред не́ю поклони́шася, я́коже бо Са́мую Тя́, Пречи́стая, к ни́м приходя́щую, срета́ху, зову́ще Тебе́: «О Ма́ти Бо́жия, спаси́ зе́млю Ру́сскую», вку́пе же и пою́ще Бо́гу: Аллилу́иа.

И́кос 7.
Но́вое зна́мение сотвори́ла еси́, Пренепоро́чная, в де́нь пра́зднования сре́тения ико́ны Твоея́ Влади́мирския в Москве́: в гро́зном бо виде́нии, я́ко всемогу́щая Цари́ца, мно́жеством во́инств Небе́сных обстои́ма, со святи́тели Моско́вскими яви́лася еси́ нечести́вому ага́рянскому ха́ну и от преде́л земли́ Ру́сския отъити́ повеле́ла еси́. Тогда́ ве́рнии лю́дие Твои́, врага́ ви́девше посра́млена и бежа́вша, с весе́лием поя́ху Тебе́:

Ра́дуйся, Побе́до непобеди́мая; ра́дуйся, Цари́це Небе́сных Си́л.

Ра́дуйся, врага́ гро́зное посрамле́ние; ра́дуйся, рабо́в Твои́х Ра́досте неча́янная.

Ра́дуйся, Наде́ждо все́х лише́нных наде́жды; ра́дуйся, спасе́ние во дно́ а́дово низше́дших.

Ра́дуйся, прише́ствием ико́ны Твоея́ Москву́ возвесели́вшая; ра́дуйся, заступле́нием Твои́м и гра́д Влади́мир не оста́вившая.

Ра́дуйся, Пречи́стая, от ико́ны Твоея́ ми́лости на́м источа́ющая.

Конда́к 8.
Стра́нную побе́ду всеси́льною по́мощию Твое́ю, Влады́чице, без бра́ни соверши́вшуюся, и до ны́не Це́рковь Правосла́вная све́тло прославля́ет, сре́тение ико́ны Твоея́ Влади́мирския пра́зднующи и вся́ ве́рная ча́да Своя́ созыва́ющи ми́лости Твоя́ благода́рне испове́дати, Сы́ну же Твоему́ и Бо́гу пе́ти: Аллилу́иа.

И́кос 8.
Всю́ Тя́ Бо́г освяти́, Пренепоро́чная, и, я́ко Ма́терь Свою́, в гото́вое прибе́жище и те́плый покро́в все́м на́м дарова́. Те́мже от ме́ньших земли́ и незна́емых возвели́чися благослове́нный Тобо́ю гра́д Москва́, благоче́стно ико́ну Твою́ почита́яй; вся́ бо племена́ ру́сская воеди́но собра́ и о́бласть свою́ над окре́стными язы́ки от мо́ря и до мо́ря и да́же до коне́ц земли́ распростре́, все́м ве́ру Христо́ву возвеща́яй, Тебе́ же вопия́:

Ра́дуйся, земли́ на́шея забра́ло; ра́дуйся, Це́ркве утвержде́ние.

Ра́дуйся, моли́твенников на́ших похвало́; ра́дуйся, люде́й Твои́х спасе́ние.

Ра́дуйся, враги́ на́ша устраша́ющая; ра́дуйся, полки́ чужди́х дале́че отгоня́ющая.

Ра́дуйся, я́ко Тобо́ю Ру́сь правосла́вная содержи́тся; ра́дуйся, я́ко Тобо́ю ро́д христиа́нский хва́лится.

Ра́дуйся, Пречи́стая, от ико́ны Твоея́ ми́лости на́м источа́ющая.

Конда́к 9.
Вся́кое естество́ а́нгельское восхваля́ет Тя́, Богороди́тельнице, у престо́ла Сы́на Твоего́ предстоя́щую и за страну́ на́шу и вся́ христиа́ны моля́щуюся. Мы́ же, лю́дие Твои́, моли́тв Твои́х де́йство разумева́юще, к чудотво́рней ико́не Твое́й с любо́вию притека́ем и Бо́гу приле́жно вопие́м: Аллилу́иа.

И́кос 9.
Вити́й земны́х худо́жество не довле́ет по достоя́нию благохвали́ти Тя́, Пресвята́я Всенепоро́чная, и ико́ны Твоея́ чудеса́ исчи́слити, и́миже Це́рковь Правосла́вная велича́ется, гра́ди на́ши утвержда́ются и вси́ христиа́не Боже́ственне веселя́тся. Те́мже, за премно́гую любо́вь Твою́ к на́м и вся́ ми́лости Твоя́, приими́ от на́с сие́ хвале́бное пе́ние:

Ра́дуйся, собо́ром святы́х, в стране́ на́шей просия́вших, окружа́емая и сла́вимая; ра́дуйся, предста́телей на́ших, чудотво́рцев росси́йских, моле́ния прие́млющая.

Ра́дуйся, хода́тайством Твои́м о на́с Бо́га умилостивля́ющая; ра́дуйся, честны́м покро́вом Твои́м на́с при́сно осеня́ющая.

Ра́дуйся, страны́ на́шея пресла́вная Защи́тнице; ра́дуйся, призыва́ющим Тя́ ско́рая Помо́щнице.

Ра́дуйся, тружда́ющихся благода́тное укрепле́ние; ра́дуйся, ка́ющихся гре́шников несумне́нное спасе́ние.

Ра́дуйся, Пречи́стая, от ико́ны Твоея́ ми́лости на́м источа́ющая.

Конда́к 10.
Спасе́ния и́щуще, к Тебе́ прибега́ем, Милосе́рдная Ма́ти, и, чудотво́рную Твою́ ико́ну ны́не обстоя́ще, вся́ ми́лости Твоя́, то́ю отце́м на́шим явле́нныя, с любо́вию воспомина́ем. Да не тще́тна бу́дет, Влады́чице, и на́ша наде́жда на Тя́, на не́мощь на́шу умилосе́рдися и спаси́ вопию́щия Бо́гу: Аллилу́иа.

И́кос 10.
Стена́ еси́ и заступле́ние все́м с ве́рою прибега́ющим к Тебе́, Всеблаже́нная Отрокови́це; всегда́ бо ми́лости Твоя́ ро́ду христиа́нскому явля́ла еси́ и отце́м на́шим многоча́стне и многообра́зне благоде́яла еси́, от наше́ствия иноплеме́нник и от вся́кия беды́ и ну́жды те́х избавля́ющи. Не оскуде́й и ны́не, Влады́чице, утоля́ющи лю́тыя на ны́ возста́ния грехо́вныя, и о́блак искуше́ний отжени́, Тебе́ бо навыко́хом пе́ти:

Ра́дуйся, Ма́ти Бо́жия, Ма́тернюю любо́вь к на́м, гре́шным, простира́ющая; ра́дуйся, си́лою Твое́ю на́шу не́мощь восполня́ющая.

Ра́дуйся, милосе́рдие Бо́жие разуме́ти на́с науча́ющая; ра́дуйся, к дело́м милосе́рдия и на́с возбужда́ющая.

Ра́дуйся, стра́х Бо́жий в сердца́ ве́рных влага́ющая; ра́дуйся, гре́шники к покая́нию призыва́ющая.

Ра́дуйся, невнима́нию на́шему долготерпя́щая; ра́дуйся, от сна́ ле́ности на́с возставля́ющая.

Ра́дуйся, Пречи́стая, от ико́ны Твоея́ ми́лости на́м источа́ющая.

Конда́к 11.
Пе́ние похва́льное воспе́ша моско́встии лю́дие, спасе́ние Твое́ не́когда улучи́вше; верху́ бо я́вльшися, светоза́рною оде́ждою оде́яна, хра́м Тво́й и гра́д Москву́ от запале́ния о́гненнаго ри́зою Твое́ю защити́ла еси́. Неотсту́пна пребу́ди, Всемо́щная, от ме́ста сего́ и ны́не, и на́м избавле́ние Твое́ ви́дети да́руй, да веселя́щеся воспое́м: Аллилу́иа.

И́кос 11.
Све́т ра́дости возсия́ла еси́, Влады́чице, и во дни́ ты́я, егда́ смотре́нием Бо́жиим дре́вняя красота́ церко́вная к на́м па́ки возврати́ся и свяще́нный собо́р гра́ду Москве́ Патриа́рха, все́й же стране́ на́шей еди́наго па́стыря и моли́твенника утверди́. Ты́ же, Пречи́стая, от ико́ны Твоея́ Влади́мирския жре́бий первосвяти́тельства сего́ избра́ннику Твоему́ дарова́ла еси́, да расточе́нныя о́вцы слове́снаго ста́да Це́ркве Росси́йския па́ки воеди́но собере́т. Сего́ ра́ди вопие́м Тебе́:

Ра́дуйся, скорбя́щих ра́досте; ра́дуйся, обурева́емых приста́нище.

Ра́дуйся, в напа́стех на́с не оста́вившая; ра́дуйся, во уничиже́нии на́шем све́т наде́жды на́м возсия́вшая.

Ра́дуйся, на смире́нныя призре́вшая; ра́дуйся, низше́дшия возвели́чившая.

Ра́дуйся, Це́ркве на́шея Похвало́; ра́дуйся, люде́й Твои́х весе́лие.

Ра́дуйся, Пречи́стая, от ико́ны Твоея́ ми́лости на́м источа́ющая.

Конда́к 12.
Благода́ть Твою́ не отъими́ от на́с, ми́лости Исто́чниче, я́коже во дни́ лихоле́тия святи́телей на́ших И́ова и Ермоге́на услы́шала еси́ и зе́млю Ру́сскую от коне́чнаго расхище́ния, правосла́вную же ве́ру в не́й от истребле́ния спасла́ еси́, да изба́вленнии Тобо́ю Бо́гу воспое́м: Аллилу́иа.

И́кос 12.
Пою́ще неисче́тныя ми́лости Твоя́, от ле́т дре́вних ро́ду на́шему явле́нныя и доны́не не оскудева́ющия, хва́лим Тя́, Пречи́стая, я́ко неусы́пную Храни́тельницу на́шу и заступле́ние, и, Ма́тернюю любо́вь Твою́ к ста́ду Сы́на Твоего́ ве́дуще, со дерзнове́нием, а́ще и раби́ неключи́ми есмы́, вопие́м Тебе́:

Ра́дуйся, Ру́сь Правосла́вную возлюби́вшая; ра́дуйся, ве́ру и́стинную в не́й утверди́вшая.

Ра́дуйся, отцы́ на́ша во благоче́стии сохрани́вшая; ра́дуйся, и на́ше неможе́ние не отри́нувшая.

Ра́дуйся, утвержде́ние на́ше незы́блемое; ра́дуйся, Наде́ждо на́ша непосты́дная.

Ра́дуйся, Моли́твеннице на́ша те́плая; ра́дуйся, Засту́пнице усе́рдная.

Ра́дуйся, Пречи́стая, от ико́ны Твоея́ ми́лости на́м источа́ющая.

Конда́к 13.
О Всепе́тая Ма́ти, Засту́пнице Всеми́лостивая, Де́во Богоро́дице, обы́чным Твои́м милосе́рдием ма́лое моле́ние сие́ на́ше прие́млющи, я́коже дре́вле, та́ко и ны́не поми́луй зе́млю на́шу Ру́сскую и от вся́ких бе́д рабы́ Твоя́ изба́ви, о Тебе́ вопию́щия: Аллилу́иа.

Этот конда́к чита́ется три́жды, зате́м 1-й и́кос и 1-й конда́к.

И́кос 1.
А́нгельския Си́лы на Небеси́ немо́лчно воспева́ют Тя́, Пречи́стая, зря́ще Сла́ву Пребоже́ственную, е́юже Сы́н Тво́й просла́ви Тя́; но и на́с, земны́х, не оста́вила еси́, я́ко не́кую лучу́, низпосла́вши на́м ико́ну Твою́, святы́м Луко́ю первопи́санную. О не́й бо не́когда изрекла́ еси́: «С си́м о́бразом благода́ть Моя́ и си́ла да пребу́дут». Те́мже ве́рнии раби́ Твои́, по вся́ дни́ и на вся́ком ме́сте сбытие́ слове́с Твои́х зря́ще, ко о́бразу Твоему́ цельбоно́сному притека́ем и, я́коже Само́й Ти́, с на́ми су́щей, вопие́м:

Ра́дуйся, А́нгелов Цари́це; ра́дуйся, всего́ ми́ра Влады́чице.

Ра́дуйся, на Небеси́ при́сно сла́вимая; ра́дуйся, и на земли́ велича́емая.

Ра́дуйся, благода́ть Твою́ ико́не Твое́й се́й дарова́вшая; ра́дуйся, на спасе́ние челове́ков ту́ю поста́вившая.

Ра́дуйся, Бо́жия бла́гости ско́рая Пода́тельнице; ра́дуйся, моле́ний на́ших усе́рдная послу́шнице.

Ра́дуйся, Пречи́стая, от ико́ны Твоея́ ми́лости на́м источа́ющая.

Конда́к 1.
Взбра́нной Воево́де, Засту́пнице на́шей, взира́юще на первопи́санный о́браз Тво́й, хвале́бное пе́ние воспева́ем Ти́ раби́ Твои́, Богома́ти. Ты́ же, я́ко иму́щая держа́ву непобеди́мую, сохрани́ и спаси́ благода́рне Тебе́ вопию́щия:

Ра́дуйся, Пречи́стая, от ико́ны Твоея́ ми́лости на́м источа́ющая.

Моли́тва
О Всеми́лостивая Госпоже́ Богоро́дице, Небе́сная Цари́це, Всемо́щная Засту́пнице, непосты́дное на́ше Упова́ние! Благодаря́ще Тя́ о все́х вели́ких благодея́ниях, в ро́ды родо́в лю́дем росси́йским от Тебе́ бы́вших, пред пречи́стым о́бразом Твои́м мо́лим Тя́: сохрани́ гра́д се́й (или́: ве́сь сию́, или́: святу́ю оби́тель сию́) и предстоя́щия рабы́ Твоя́ и всю́ Зе́млю Ру́сскую от гла́да, губи́тельства, земли́ трясе́ния, пото́па, огня́, меча́, наше́ствия иноплеме́нных и междоусо́бныя бра́ни. Сохрани́ и спаси́, Госпоже́, Вели́каго Господи́на и Отца́ на́шего (и́мя ре́к), Святе́йшаго Патриа́рха Моско́вскаго и всея́ Руси́, и Господи́на на́шего (и́мя ре́к), Преосвяще́ннейшаго епи́скопа (или́ : архиепи́скопа, или́ : митрополи́та) (титул), и вся́ Преосвяще́нныя митрополи́ты, архиепи́скопы и епи́скопы правосла́вныя. Да́ждь и́м Це́рковь Росси́йскую до́бре упра́вити, ве́рныя о́вцы Христо́вы неги́блемы соблюсти́. Помяни́, Влады́чице, и ве́сь свяще́ннический и мона́шеский чи́н, согре́й сердца́ и́х ре́вностию о Бо́зе и досто́йно зва́ния своего́ ходи́ти коего́ждо укрепи́. Спаси́, Госпоже́, и поми́луй и вся́ рабы́ Твоя́ и да́руй на́м пу́ть земна́го по́прища без поро́ка преити́. Утверди́ на́с в ве́ре Христо́вой и во усе́рдии ко Правосла́вней Це́ркви, вложи́ в сердца́ на́ша ду́х стра́ха Бо́жия, ду́х благоче́стия, ду́х смире́ния, в напа́стех терпе́ние на́м пода́ждь, во благоде́нствии — воздержа́ние, к бли́жним любо́вь, ко враго́м всепроще́ние, в до́брых де́лех преуспе́яние. Изба́ви на́с от вся́каго искуше́ния и от окамене́ннаго нечу́вствия, в стра́шный же де́нь Суда́ сподо́би на́с хода́тайством Твои́м ста́ти одесну́ю Сы́на Твоего́, Христа́ Бо́га на́шего, Ему́же подоба́ет вся́кая сла́ва, че́сть и поклоне́ние со Отце́м и Святы́м Ду́хом, ны́не и при́сно и во ве́ки веко́в. Ами́нь.

Акафист Пресвятой Богородице пред иконой «Владимирская» (иной)

Память: 03 июня (21 мая ст. ст.); 06 июля (23 июня ст. ст.); 08 сентября (26 августа ст. ст.); 03 июня (21 мая ст. ст.); 06 июля (23 июня ст. ст.); 08 сентября (26 августа ст. ст.)

Кондак 1
Взбранной Воеводе, Пресвятей Владычице нашей, хвалебную песнь воспеваем смиреннии раби Твои, взирающе на первописанный образ Твой, Богомати, с Предвечным Младенцем Иисусом, на руку Твоею седящим, поклоняемся Ти с любовию и молим Тя, Пресвятая Богородице. Ты же, яко имущая державу непобедимую, сохрани и спаси ны, умиленно Тебе вопиющия:

Радуйся, Пресвятая Владычице Богородице, благодать и милость иконою Твоею нам являющая.

Икос 1
Архангел и ангел лицы сопредсташа окрест святыя иконы Твоея, Небесная Царице, благодатно Тобою осененныя: егда бо святый евангелист Лука первее образ твой написа и принесе к Тебе, Пречистая, Ты же, о Госпоже Царице, возрадовалася еси спасения нашего ради и прорекла еси пречистыми усты Твоими: «с сим образом благодать Моя и сила да пребудут». Темже убо взирающе на икону Твою в Божественных храмех, благолепно преукрашенную, ублажаем честное и благодатное происхождение ея, преклоняем колена пред величеством Твоим, Владычице, и со слезами воспеваем сице:

Радуйся, Небесная Царице, Мати Бога и Господа небесе и земли;

радуйся, архангелов и ангелов Владычице.

Радуйся, Божественныя благости Подательнице;

радуйся, рода христианскаго Заступнице.

Радуйся, Всемилостивая, первописанный образ Твой от апостола приимшая;

радуйся, той дати на спасение рода человеческаго изволившая.

Радуйся, яко благоволила еси ему пребывати сохранно на земли;

радуйся, яко даровала еси тому благодать исцелений.

Радуйся, иконою Твоею от всякаго зла нас сохраняющая;

радуйся, тою источники чудес всюду источающая.

Радуйся, яко Твоим ходатайством всяких благ наслаждаемся;

радуйся, яко Тебе и Сыну Твоему пред честною иконою Твоею благоговейно поклоняемся.

Радуйся, Пресвятая Владычице Богородице, благодать и милость иконою Твоею нам являющая.

Кондак 2
Видя чудес множество, бываемое во храме от принесенныя в Вышград святыя Твоея, Пречистая, иконы, яже иногда возвышашеся и стояше на воздусе, иногда же ношашеся во храме сюду и сюду, благоверный князь Андрей, возгоревся духом пламеннаго усердия, паде на земли пред чудотворною иконою Твоею, и внезапу осенен бысть велиим светом от лика Твоего, Пресвятая Богородице, темже умоляше Тя, да явиши святую волю Твою, и да благословиши его отити в пределы своя. И мы убо под пречистый покров Твой прибегаем и тепле вопием: помози нам, Всеблагая Мати, достойно прейти земное поприще жизни, да обрящем страну светоносную и безпредельную, восхваляюще Тя и поюще Господеви: Аллилуия.

Икос 2

Разум не доразумевает достойно песньми духовными восхваляти Тя, небесная Царице, егда многое множество чудес от иконы Твоея, несенныя во град Ростов, явила еси: мнози бо болящии исцелишася; человек некий, утопаяй и уже во глубину погрузивыйся, от потопления дивно Тобою избавися; пресвитера некоего жена умершая оживе и здрава бысть. Благодать Твоя, Владычице, не престает и до ныне обильно чудодействовати, точащи, яко от источника, от пречистыя Твоея иконы всяких недугов исцеления. Темже убо прославляем Тя благочестным пред святым образом Твоим поклонением, умиленно поюще Ти:

Радуйся, Всемилостивая, славою дивнаго врачевания шествие иконы Твоея знаменовавшая;

радуйся, многия немощныя исцелившая.

Радуйся, Всеблагая, благою помощию уповающих на Тя не оставляющая;

радуйся, отчающимся надежду возвращающая.

Радуйся, Заступнице наша, упование нас, недостойных, не отвергающая;

радуйся, наша усердныя молитвы приемлющая.

Радуйся, Всеблаженная, безмерныя Твоя щедроты на нас изливающая;

радуйся, Твоею благостынею нам благодеющая.

Радуйся, всемощная Помощнице наша, во всякой нужде молящимся Ти скоро помогающая;

радуйся, от напрасныя смерти нас спасающая.

Радуйся, Богоблагодатная, страх Божий в сердца наша вселяющая;

радуйся, истинно нас молитися научающая.

Радуйся, Пресвятая Владычице Богородице, благодать и милость иконою Твоею нам являющая.

Кондак 3
Силою, данною от Тебе, Владычице, честная Твоя икона не на пути точию цельбоносно прославися, но и чудным проявлением святыя воли Твоея: егда бо благоверный князь нощию пред иконою Твоею пламенне моляшеся, Ты Сама, небесная Царице, Божественным светом сияющи, явилася еси ему, глаголющи, не отходити от предел Владимирских; он же со благоговением и радостию возблагодари Тя, яко сподобися узрети Матерь Божию, и тогожде дне повеле церковь заложити и, велелепно украсив ю, внесе в ню торжественне чудотворную Твою икону, нареченную «Владимирскою». Мы же вси, смиренно припадающе пред чудною Твоею иконою, восхваляем дивная дела Твоя, имиже от древних времен страна сия славно прославляется, и благодарне воспеваем Тя, яко устроила еси и зде, во храме сем, благодатное утверждение, из глубины души хваляще Тя и взывающе ко Господу: Аллилуия.

Икос 3
Имущи премногую милость к роду человеческому, Пресвятая Владычице, не оставила еси страну Российскую в день брани со враги, пришедшими от брегов Волжских, при князе Андрее, иже, исходя на брань, слезно умоляше Тя, такожде и вси воини вопияху Ти, да от рук вражиих избавиши я. Ты же, Пресвятая Богомати, не отринула еси их усердныя молитвы, и дивным от чудотворныя Твоея иконы явлением славную победу над враги предзнаменовала еси, озаривши велиим светом и огненными лучи все воинство христолюбивое. Темже и мы, преклоньше колена, молим Тя: охраняй и ныне отечество наше, спаси Благочестивейшаго Государя нашего Императора [имярек], огради и Его в годину брани, укрепи Его мышщу, и возвыси десницу, покори под нозе Его всякаго врага и супостата, да в мире и тишине воспеваем Ти сице:

Радуйся, Заступнице, Твоим всемощным заступлением от меча иноплеменных нас избавляющая;

радуйся, усердныя молитвы о нас ко Господу приносящая.

Радуйся, предстательством Твоим праведно движимый гнев Божий утоляющая;

радуйся, ходатайством Твоим пред Господем на милость к нам Его преклоняющая.

Радуйся, яко смиренным молением нашим внемлеши;

радуйся, яко скорое утешение нам подати поспешаеши.

Радуйся, яко иконою Твоею от всякаго бедствия нас покрываеши;

радуйся, яко Тою от всякаго злаго обстояния нас соблюдаеши.

Радуйся, в годину брани Твоею помощию уповающих на Тя не оставляющая;

радуйся, тихое и безмолвное житие нам дарующая.

Радуйся, скиптры благочестивых царей утверждающая;

радуйся, от всех вражиих сил и козней нас защищающая.

Радуйся, Пресвятая Владычице Богородице, благодать и милость иконою Твоею нам являющая.

Кондак 4
Бурею гордости одержим быв, и презрев страх Божий и святыню града Владимира, владыка Феодор неразумная словеса изрече на святую икону Твою, Пресвятая Богородице, церковь, идеже та пребываше, дерзну затворити, и тако Бога прогнева, и абие праведным судом Божиим на смерть осужден бысть. Мы же, таковое вразумление Твое непочитающим Тя видяще, и чудотворному образу Твоему покланяющеся, умиленное благоговение с верою и любовию приносим Ти, и уповающе на милость Твою, смиренно молим Тя: милостива к нам пребуди, Владычице, и избави ны от всякия беды и напасти, да выну славим и восхваляем Твое милосердие, взывающе Богу: Аллилуия.

Икос 4
Слышавше внезапу весть о убиении благовернаго князя Андрея, буйнии мятежницы от народа, движимии безначалием и убийцами, ринушася град Владимир опустошати и расхищати. Лик же священников и вси благочестивии людие притекоша к Тебе, Богомати, и носяще чудотворную Твою икону, слезныя мольбы на стогнах града вознесоша Ти, да прекратиши безумное умов движение, и мир во граде водвориши. Тогда убо дивное зрелище бысть, идеже бо святую икону Твою пронесоша, толпы народа смиряхуся и, падше на колена, со слезами и рыданием моляхуся. Мы же, видяще толико чудную силу сердца жестокия умягчати, смиренно молим Тя, Пресвятая Владычице, умилосердися на ны, грешныя и непотребныя, уврачуй души наша на стропотнем пути греха и страстей, обуревающих ны, и приими сию хвалебную песнь:

Радуйся, Путеводительнице, шествовати по пути благочестия христианом помогающая;

радуйся, в добрых делех преуспевающих укрепляющая.

Радуйся, отечество наше от междоусобныя брани охраняющая;

радуйся, злая начинания и козни вражия расторгающая.

Радуйся, от пагубнаго духа века сего нас отклоняющая;

радуйся, повиноватися властем нас научающая.

Радуйся, дерзновенно возстающих противу богопоставленныя власти обличающая;

радуйся крамолы нечестивых сынов погибельных разрушающая.

Радуйся, юныя умы от заблуждений на путь правый направляющая;

радуйся, душевредная учения низлагающая.

Радуйся, житие наше на земли добре устрояющая;

радуйся, к Царствию небесному путь нам показующая.

Радуйся, Пресвятая Владычице Богородице, благодать и милость иконою Твоею нам являющая.

Кондак 5
Боготечней звезде уподобившися, икона Твоя, Богомати, лучами чудес освещает страну нашу православную. Кто бо исчислит вся благодеяния, яже от нея подаеши всем требующим? Како явила еси чудо новое и преславное, охраняющи град Твой от великих бедствий, како невидимою всемогущею десницею изгнала еси безчисленная полчища вражия, и предстательством Твоим вручила еси державу благочестивому князю Михаилу, и тако благодеющи, всесильным Твоим заступлением не оставила еси погибнути уповающих на Тя. Сего ради с усердием поклоняемся пречестней иконе Твоей, и достойно славословим Тя, поюще Богу: Аллилуия.

Икос 5

Видевше людие града Владимира икону Твою, Владычице, и весь град свой на воздусе, с умилением уразумеша, яко в чудном видении проявися великое Твое, Богомати, благоволение к избранию на престол Владимирский благовернаго князя Всеволода, благочестия ради его. Дивна сила Твоя, Богородице, яко солнце светиши в явлении Твоем на облацех небесных и тем показуеши святую волю Твою. Благоволи убо, Пречистая, ниспослати нам с благодатию и силу молитвы, да, бодрствующе со благодарением, воспеваем хвалы сия:

Радуйся, Всеблагая, яко любовь ко благочестию в верных вселяеши;

радуйся, яко благочестие в земли нашей ограждаеши.

Радуйся, яко сохраняеши и защищаеши Православие;

радуйся, яко научаеши и соблюдаеши пастырей Церкви.

Радуйся, Всесвятая, яко святую спасительную веру на земли утверждаеши;

радуйся, яко ереси и расколы обличаеши.

Радуйся, Благодатная, живоносный источник благодати верующим источающая;

радуйся, слово премудрости просящим дарующая.

Радуйся, маловерныя и суеверныя вразумляющая;

радуйся, неверных смыслы Божественным светом озаряющая.

Радуйся, блага земная и суетная презирати научающая;

радуйся, к небесным и нетленным сокровищам умы и сердца наша направляющая.

Радуйся, Пресвятая Владычице Богородице, благодать и милость иконою Твоею нам являющая.

Кондак 6
Проповедует чудеса Твоя и великия Твоя милости вся земля православная, яко дивно оградила еси святым покровом чудотворную Твою икону от огненнаго пламене, объявшаго соборный храм, в немже святая икона пребываше. Темже и мы Тебе вопием: о, Пресвятая Владычице, призри всемилостивым оком Твоим и на ны, со слезами предстоящия пред чудотворным Твоим образом, и молитвами Твоими пред престолом Всевышняго избави ны от пламене огня вечнаго, да с веселием благодарственныя хвалы приносим Ти, воспевающе Господеви: Аллилуия.

Икос 6
Возсия паки светом чудес пречестная икона Твоя, Владычице, во время нашествия татарскаго, егда бо нечестивыя полчища Батыя, вшедше во святый храм, начаша вся разрушати, злато, сребро и другая украшения с прославленнаго образа Твоего похищати, и предавати вся мечу и огню. Тогда преславное чудо показася всем православным христианом: святая икона Твоя паки в пламени пребысть неврежденна. Тако уверившеся о Твоем покрове, Пречистая, сохраняющем и защищающем страну Российскую, благодарственне прославляем великая чудеса Твоя, и от глубины сердечныя вопием Ти:

Радуйся, святую икону Твою во спасение наше из пламене чудесно сохранившая;

радуйся, сию премногими чудесы по всей вселенней прославившая.

Радуйся, яко молящимся пред святою иконою Твоею душевное и телесное здравие подаеши;

радуйся, яко всем уповающим на Тя спасение даруеши.

Радуйся, яко Ты еси святых храмов первейшее украшение;

радуйся, яко Ты еси всех домов благословение.

Радуйся, яко Ты еси святых обителей покров и защищение;

радуйся, яко Ты еси подвижников дивное укрепление.

Радуйся, всех благочестивых всевеселящее радование;

радуйся, всего рода христианскаго заступление.

Радуйся, Путеводительнице наша, вводящая многих в чертог Царства небеснаго;

радуйся, Заступнице, престолу Сына Твоего и Бога предстоящая и о нас ходатайствующая.

Радуйся, Пресвятая Владычице Богородице, благодать и милость иконою Твоею нам являющая.

Кондак 7
Хотя великий князь Василий пренести святую икону Твою, Владычице, в Москву на защищение стольному граду, егда бысть великое нашествие агарянское, посла во Владимир от духовнаго чина люди за честною иконою Твоею, нарицаемою «Владимирскою», крепкое бо заступление от тоя позна. Приближающейся же святей иконе, в сретение ея изыдоша сам князь с бояры, и святитель Божий Киприан со всем священным собором и множеством народа, и поклонишася пред нею до земли, яко Самой Тебе, Пречистая Богородице, к ним приходящей. И вси, взирающе на образ Твой, многи слезы проливаху, святая же Церковь радостно взываше: «приидите, Российстии собори, приидите, верных совокупления, во сретение Царицы Богоотроковицы!» И ныне вси православнии людие, притекая к цельбоносней Твоей иконе, с любовию Тя славят, поюще Богу: Аллилуия.

Икос 7
Дивная чудеса быша от Тебе, Заступнице, в нашествие агарянское, тогожде бо дне, в оньже в Москву принесена бысть честная икона Твоя, явилася еси вождю агарянскому с ангелы небесными, обнаженныя мечи держащими, и сим видением устрашивши вражия полки, заставила еси я спешно бежати от предел Московских. Кто же возможет изрещи Твою к нам любовь, Богородице? Кто возглаголет силы Твоя, дарованныя иконе Твоей? Сего ради песнь хвалы и благодарения воспеваем Ти сице:

Радуйся, во граде Москве чудотворною Твоею иконою пребывати благоволившая;

радуйся, и град Владимир, по пренесении иконы, Твоим заступлением не оставившая.

Радуйся, иконою Твоею град Москву освятившая;

радуйся, тою уповающих на Тя возвеселившая.

Радуйся, яко мольбы народа, во сретение святыя иконы изшедшаго услышала еси;

радуйся, яко слезныя возгласы его: «о, Мати Божия, спаси землю Российскую», прияла еси.

Радуйся, яко явлением со святители московскими и множеством вооруженных ангелов врага устрашила еси;

радуйся, яко от предел Московских отъити грозно ему повелела еси.

Радуйся, славную победу над враги без брани подавшая;

радуйся, без пролития крове одоление православному воинству даровавшая.

Радуйся, град Москву от разорения избавльшая;

радуйся, страну нашу от порабощения спасшая.

Радуйся, Пресвятая Владычице Богородице, благодать и милость иконою Твоею нам являющая.

Кондак 8
Странней и предивней совершившейся помощию Твоею, Владычице, победе, вси концы земли удивишася и хвалу воспеша Ти; великий же князь узрев чудотворную Твою икону, во сретение его из града изнесенную, со слезами припаде к ней и возблагодари Тя сице: «о, Всепетая, непостыдная христиан Заступнице! Ты явила еси нам велие милосердие, паче упования избавльши ны от безбожных врагов». Темже и святая Церковь прославляет сию дивную память, священно совершающи ю. Мы же веруем и надеемся, яко не презриши и ныне глас моления рабов Твоих, имя Твое на помощь призывающих и воспевающих Богу: Аллилуия.

Икос 8
Вси православнии людие славят имя Твое, о Всепетая Мати, честным бо предстательством Твоим многое множество чудес явила еси, страну Российскую сохраняющи, и множество врагов, нападающих на ню, устрашающи и далече от нея отгоняющи. Несть числа милостем Твоим, Владычице: дивна суть дела Твоя, и дивна пречестная Твоя икона, пред неюже припадающе, с верою и упованием глаголем Ти сице:

Радуйся, Заступнице усердная, молитвы святителя Ионы о спасении града Москвы услышавшая;

радуйся и святыни его невредимо сохранившая.

Радуйся, моления угодника Божия инока Антония милостивно приявшая;

радуйся, чрез него победу над враги предвозвестившая.

Радуйся, во святый град нечестивое воинство не допустившая;

радуйся, святыя храмы от поругания избавившая.

Радуйся, яко Российскую державу и ныне защищаеши;

радуйся, христолюбивому воинству российскому силу и мужество дарующая.

Радуйся, Твоим заступлением враги наша устрашающая;

радуйся, полки чуждия в бегство обращающая.

Радуйся, грады и веси Российския от разрушения спасающая;

радуйся, земное наше житие добре устрояющая.

Радуйся, Пресвятая Владычице Богородице, благодать и милость иконою Твоею нам являющая.

Кондак 9
Всякое естество ангельское, видя Тя, Богородительнице, у престола Сына Твоего предстоящую, и за страну Российскую и за вся христианы молящуюся, восхваляет Тя. Людие же града Москвы, видевше, како великим князем Иоанном дивно побежден бысть хан орды татарския, и силою Твоего предстательства безчисленная полчища его бежаша, со слезами славу благодарения Ти принесоша, яко всемогущей Заступнице и всесильной Помощнице. И мы убо, в сем милость к нам Божию и молитв Твоих действо разумевающе, прославляем Всевышняго Господа, чудотворную силу иконе Твоей даровавшаго, и Ею нас от татарскаго рабства избавльшаго, воспевающе Ему: Аллилуия.

Икос 9
Витийство человеческое не возможет по достоянию благохвалити Тя, Пресвятая Богородице, и воспети неисчетная чудеса Твоя, от первописанныя Твоея иконы являемая, имиже Церковь святую благоукрашаеши, грады Российския от бед избавляеши, и вся христианы от всякаго зла невредимы соблюдаеши. Обаче, Благая сущи, приими от нас, за премногую любовь к нам и милость Твою, сие хвалебное пение, да сохраняеми Твоим всемощным заступлением, благодарственне вопием Ти:

Радуйся, Хранительнице наша, яко молитвы первосвятителей российских Петра, Алексия и Ионы прияла еси;

радуйся, яко сожещи град Москву врагу возбранила еси.

Радуйся, яко слезныя мольбы блаженнаго Василия услышала еси;

радуйся, яко тому чудесное видение явила еси.

Радуйся, яко молебное пение святых Сергия и Варлаама прияти благоволила еси;

радуйся, яко ходатайством Твоим правосудие Божие умилостивила еси.

Радуйся, яко Ты еси державы нашея преславная Защитнице;

радуйся, яко Ты еси призывающих Тя непостыдное упование.

Радуйся, яко Ты еси всех труждающихся помощь и укрепление;

радуйся, теплая пред Богом о кающихся грешницех Предстательнице.

Радуйся, Пресвятая Владычице Богородице, благодать и милость иконою Твоею нам являющая.

Кондак 10

Спасти хотя душу свою и сокрушение имый о своих прегрешениих, великий князь Василий с молитвою и слезами притекаше к Тебе, Пресвятая Владычице, наипаче же при конце жития своего умиленно пред чудотворною Владимирскою иконою Твоею моляшеся, слезныма очима взирая на ню, и тако тихую и непостыдную кончину прият. Темже и мы, преклоньше колена пред Твоим пречестным образом, молим Тя, небесная Царице, не тщу сотворити надежду нашу на помощь Твою, и ходатайством Твоим избавити ны от лютыя смерти, да во утешении зовем Спасителю Богу: Аллилуия.

Икос 10

Стена еси и заступление всем, с верою и любовию прибегающим к Тебе, Пречистая Владычице, яко чудесне избавила еси царство Российское от полчищ татар крымских и казанских, внемлющи молитвам венценоснаго отрока Иоанна, иже умиленно пред святою иконою Твоею взываше к Тебе: «о, Пресвятая Госпоже Богородице, покажи милость Твою на роде христианстем и избави ны от нашествия неверных». Сего ради, осеняеми Твоим, Богомати, заступлением, и к Твоему взирающе пречистому образу, благодарственне вопием Ти:

Радуйся, Мати Божия, матернею любовию нас, грешных, возлюбившая;

радуйся, святою иконою Твоею, яко облаком светлым, нас ограждающая.

Радуйся, Милосердая, милосердия двери нам отверзающая;

радуйся, к делом милосердия и благотворения нас возбуждающая.

Радуйся, Всесвятая, святыя заповеди исполняти нас научающая;

радуйся, еже любити друг друга по заповеди Господни нас наставляющая.

Радуйся, Пренепорочная, в непорочнем житии верных укрепляющая;

радуйся, нас, грешных, к покаянию призывающая.

Радуйся, Богоблагодатная, благодатию Сына Твоего и Бога мрак греха в нас разгоняющая;

радуйся, осенением святыя Твоея иконы злых духов от нас отгоняющая.

Радуйся, Присноблаженная, блаженныя обители нам уготовляющая;

радуйся, молитвами Твоими двери райския нам отверзающая.

Радуйся, Пресвятая Владычице Богородице, благодать и милость иконою Твоею нам являющая.

Кондак 11
Пение всякое не довлеет к прославлению величества Твоего, Владычице, яко избавила еси град Москву от огненнаго разрушения: егда бо пламень огненный град обнимаше и приближашеся ко храму, идеже чудная сия икона Твоя стояше, мнози благочестивии людие ко храму устремишася, во еже спасти ю от огненнаго пламене, но не возмогоша подъяти ю и изнести из храма; тою бо ты Сама, Заступнице, оградила еси святый храм и укротила еси бурю огненную во граде, явльшися верху храма во светозарнем одеянии, и ризами Твоими святый храм и град покрывающи. Темже, дивная дела Твоя поминающе, молим Тя, Пресвятая Богородице, и ныне воздвигни руце Твои к Сыну Твоему и Богу нашему, да милосердие Его неотступно будет от нас, вопиющих Ему: Аллилуия.

Икос 11
Светозарне сияет святая Твоя икона, Пречистая Владычице, явленными чудесы утешающи православныя люди российския, иже притекают к Тебе с молитвою в трудных обстояниих, уповающе на Твое заступление. Царь же Иоанн, исходя на брань ко граду Казани, все царство свое под покров Твой поручи; Ты же не отринула еси молитв его, и помощию Твоею славная победа над враги даровася. И мы убо, припадающе к Твоему святому образу, и все упование на Тя возложивше, воспеваем милость Твою сице:

Радуйся, усердная Заступнице, заступление во всех путех жизни нам подавающая;

радуйся, от всякия беды и напасти избавляющая.

Радуйся, Хранительнице наша, от нападения злых разбойников и тайных убийц нас охраняющая;

радуйся, от грабителей и татей жилища и достояния наша ограждающая.

Радуйся, Путеводительнице, путешествующим по морю тихое пристанище дарующая;

радуйся, страшныя бури и волны морския молитвами Твоими укрощающая.

Радуйся, Покровительнице, от огненнаго пламене нас покрывающая;

радуйся, от труса и потопления нас сохраняющая.

Радуйся, скорая Заступнице, от навета клеветников и поношения человеческаго нас защищающая;

радуйся, в сердцах наших злобы и вражды искореняющая.

Радуйся, теплая Молитвеннице, молитвами Твоими тлетворныя ветры и смертоносныя язвы прекращающая;

радуйся, от бездождия, града и глада нас спасающая.

Радуйся, Пресвятая Владычице Богородице, благодать и милость иконою Твоею нам являющая.

Кондак 12
Благодатию Твоею, Пресвятая Богородице, якоже древле, и днесь притекающия к цельбоносней Твоей иконе не оставляеши и призывающим Тя благопоспешне вспомоществуеши. И якоже услышала еси моления скорбнаго святителя Иова, слезне взывавшаго к Тебе, да спасеши в земли Российстей Православие, сице и от нас, грешных, приими умиленная моления, не остави милость Твою от нас, припадающих к пречестному образу Твоему, избави же нас от всякия беды и в печалех бедствующим скоро помози, да Твоим пречистым ходатайством спасаеми, благодарными усты поем Богови: Аллилуия.

Икос 12
Поюще дивная Твоя чудеса, умиленно припадаем пред пречистым образом Твоим, Владычице, и благоговейно лобызающе его, благодарственне воспоминаем заступление Твое царствующему граду в нашествие ляхов. Услышала бо еси скорбныя молитвы верных рабов Твоих и предвозвестила еси им скорое освобождение от врагов; и тако Тобою избавленнии, многия слезы благодарения пред святою иконою Твоею приношаху Ти. Приими и от нас похвальную песнь сию:

Радуйся, всемощная Владычице, благодатною Твоею силою от враг видимых и невидимых нас избавляющая;

радуйся, от смертоносных язв и тяжких недугов свобождающая.

Радуйся, Мати Света, слепым очеса отверзающая;

радуйся, истинным Светом сущих во тме и сени смертней озаряющая.

Радуйся, разслабленным утверждение и хромым хождение дарующая;

радуйся, падших благодатию Твоею возставляющая.

Радуйся, Мати Слова, немым и косноязычным словеса открывающая;

радуйся, неверующих, еже прославляти Бога и воспевати Тя, научающая.

Радуйся, Врача рождшая, оставленных врачами на руце Свои приемлющая;

радуйся, нераскаянных грешников к покаянию обращающая.

Радуйся, всех Помоще, скорбным вдовицам и сирым помогающая;

радуйся, алчущих и жаждущих правды к Богу приводящая.

Радуйся, Пресвятая Владычице Богородице, благодать и милость иконою Твоею нам являющая.

Кондак 13

О, Всепетая и Всемилостивая Мати, Пречистая Госпоже Богородице! Приими малое сие моление ныне Тебе приносимое от нас, грешных и недостойных рабов Твоих, к чудотворному образу Твоему припадающих; призри милостивно на веру и упование наше, избави ны от всяких бед и скорбей, подаждь нам в жизни сей руку помощи, испроси у Сына Твоего и Бога нашего премногим грехом нашим прощение, и в час смертный сподоби ны прияти кончину живота нашего мирну, непостыдну, и внити в Царствие небесное, да выну прославляем безмерное милосердие Божие и Твое дивное о нас заступление, воспевающе вечно Богу: Аллилуия.

Сей Кондак глаголи трижды. И паки чтется 1-й Икос: Архангел и ангел лицы... и Кондак 1-й: Взбранной Воеводе...

Молитва ко Пресвятей Богородице
О, всемилостивая Госпоже Богородице, небесная Царице, всемощная Заступнице, непостыдное наше Упование! Благодарим Тя о всех великих благодеяниих, российским людем от Тебе бывших, от древле и до днесь от чудотворныя иконы Твоея явленных. И ныне, преблагая Владычице, призри на ны, грешныя и недостойныя рабы Твоя, яви нам милость Твою и моли Сына Твоего, Христа и Бога нашего, о еже избавитися нам от всякаго зла и сохранитися царствующим градом, всякому граду и веси, и всей стране нашей от глада, губительства, труса, потопа, огня, меча, нашествия иноплеменник и междоусобныя брани. Испроси Благочестивейшему, Самодержавнейшему, Великому Государю нашему Императору [имярек] и всему Царствующему Дому благоденственное и мирное житие, здравие, долгоденствие, во всем благое поспешение и спасение. [или: страждущую же страну Российскую от лютых безбожник и власти их Господь да свободит, и да возставит престол православных царей; верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот нашъ.] Сохрани и умудри пастырей Церкви, еже достойно пасти стадо Христово и право правити слово истины; укрепи христолюбивое всероссийское воинство, подаждь дух совета и разума военачальником, градоначальником и всем, иже во власти суть; ниспосли святое Твое благословение и всем православным христианам, покланяющимся и молящимся Ти пред цельбоносною Твоею иконою. Буди нам Заступница и Ходатаица пред престолом Всевышняго, идеже предстоиши. K кому убо прибегнем, аще не к Тебе, Владычице? Кому принесем слезы и воздыхания, аще не к Тебе, Пресвятая Богородице? Не имамы бо иныя помощи, не имамы иныя надежды, разве Тебе, небесная Царице. Под Твой покров притекаем, молитвами Твоими ниспосли нам мир, здравие, земли плодоносие, воздуха благорастворение, избави ны от всяких бед и скорбей, от всяких недугов и болезней, от внезапныя смерти и от всех озлоблений врагов видимых и невидимых. Вразуми и научи ны, о Всемилостивая Заступнице, како безгрешно прейти путь земнаго сего жития: Ты веси немощи наша, веси и согрешения наша, но и веру веси, и упование видиши; даруй же нам исправление греховныя жизни и умягчи злая сердца наша. Укрепи в нас правую веру, вложи в сердца наша дух страха Божия, дух благочестия, дух смирения, терпения и любве, в добрых делех преуспеяние, избави же ны от искушений, от пагубных душевредных учений, от неверия, развращения и погибели вечныя. Тебе убо просим, Пречистая Владычице, и припадающе пред святою Твоею иконою, молимся, умилосердися на ны и помилуй ны, в страшный же день Суда ходатайством и заступлением Твоим сподоби ны стати одесную Сына Твоего, Христа Бога нашего, Емуже подобает всякая слава, честь и поклонение, со безначальным Его Отцем, и Пресвятым и Благим и Единосущным Его Духом, ныне и присно и во веки веков. Аминь.

Канон Пресвятой Богородице пред иконой «Владимирская»
Припев: Пресвята́я Богоро́дице, спаси́ на́с.
Память: 03 июня (21 мая ст. ст.); 06 июля (23 июня ст. ст.); 08 сентября (26 августа ст. ст.)
Глас 4.


Пе́снь 1.
Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Просвети́, Влады́чице, ду́ши на́ша заре́ю Боже́ственною, па́че ума́ благода́тию Твое́ю, и незави́стный да́р пода́ждь ми́ воспе́ти Тя́, я́ко Помо́щницу челове́ческому существу́, Препе́тая, ве́рное заступле́ние, на враги́ побе́ду оте́честву на́шему.

Прииди́те, собери́теся, росси́йстии собо́ри, в пречестны́й хра́м Всенепоро́чныя Влады́чицы и возопи́йте, уми́льно моля́щеся, к честно́му о́бразу взира́юще: Богоро́дице Безневе́стная, хва́лящия Тя́ спаси́.

Тво́й, Богома́ти, всечестны́й о́браз Богогла́сный Ева́нгелия Христо́ва списа́тель, пребоже́ственный Лука́, написа́в, Творца́ все́х на Твои́х честны́х рука́х вообрази́, к нему́же притека́ющия напа́сти и печа́ли избавля́еши и вся́ покрыва́еши Твое́ю ми́лостию.

Хра́м прекра́сный, Соде́тель все́х еди́ну Тя́ обре́т, в Тя́ всели́ся и челове́ки обожи́. К Нему́же за ны́, Богоро́дице, моли́ся, спасти́ ны от пога́ных плене́ния и вся́кия ины́я ско́рби, находя́щия на ны́, да Твоего́ дне́сь о́браза сре́тение всече́стно пра́зднуем.

Пе́снь 3.
Ирмо́с: Твоя́ песносло́вцы, Богоро́дице, Живы́й и Незави́стный Исто́чниче, ли́к Себе́ совоку́пльшия, духо́вно утверди́, в Боже́ственней Твое́й сла́ве венце́в сла́вы сподо́би.

Все́ помышле́ние отве́ргше, Богому́дрии, прииди́те в сре́тение прекра́сныя зари́, держа́щия пресве́тлую лучу́, вся́ просвеща́ющую и ми́лостию ве́сь ми́р обога́щшую.

Твою́, Богома́ти, всечестну́ю и чудотво́рную ико́ну росси́йстии лю́ди стяжа́вше, я́ко заступле́ние кре́пко и сте́ну неруши́му, мо́лятся Ти́, на враги́ побе́ду дарова́ти оте́честву на́шему.

О́блак светоза́рный показа́ся, росо́ю благода́ти вся́ омыва́ющи теле́сныя скве́рны и ду́ши просвеща́ющи, еди́на Всепе́тая.

Дре́во многопло́дно яви́лася еси́, пи́щею неги́блющею вся́ насыща́ющи, ду́ши же веселя́щи, Богоневе́сто Чи́стая, добродея́ния все́м источи́ и от скорбе́й, ну́ждных спаси́.

И́н конда́к, гла́с 8
К Взбра́нней Воево́де и Засту́пнице, Де́ве и Богоро́дице, в чи́стей со́вести, ве́рою утверди́вшеся, ру́сстии наро́ди, невозвра́тно наде́жду иму́ще, притеце́м, к чудотво́рному Ея́ и пречи́стому о́бразу, и возопие́м Е́й: ра́дуйся, Неве́сто Неневе́стная.

Седа́лен, гла́с 4.
Наро́ди боголюби́вии, прииди́те в сре́тение: се́ бо прихо́дит Де́ва, все́х проро́ков превы́шши, честны́м Свои́м о́бразом, Жизнода́теля ми́ру на рука́х име́ющи, гра́д Сво́й сохраня́ти стра́ждущий, ва́рварскую де́рзость низложи́ти, вообрази́тися все́м Храни́тельница тверда́, держа́ва и огражде́ние ве́рно моля́щимся.

Пе́снь 4.
Ирмо́с: Неизсле́дный Бо́жий сове́т, е́же от Де́вы воплоще́ния Тебе́, Вы́шняго, проро́к Авваку́м усмотря́я, зовя́ше; сла́ва си́ле Твое́й, Го́споди.

Го́ру преве́лию, ю́же Дании́л ви́де, от нея́же ка́мень отсече́ся без руки́ и вся́ собла́зны истни́, ве́рныя же просвети́, и́стинное светоза́рное со́лнце показа́, луча́ми просвеща́ющи, Богоро́дице Присноде́во.

Вооружа́ются на лю́ди Твоя́, Чи́стая Богоро́дице, сы́нове Ага́рины, злы́й сове́т творя́ще, гра́ды разоря́юще, ве́рныя же погубля́юще, но Ты́, Всепе́тая, Твое́ю ми́лостию вся́ низложи́, исма́ильтяны враги́ покаря́ющи оте́честву на́шему.

Не́бо одушевле́но, еди́на Богома́ти, Све́т ве́лий прие́мши, вся́ просвеща́ющи, тьму́ держа́щих бе́д разжени́ и на́с Вы́шняго прича́стия сподо́би.

Дави́д пред киво́том ликовству́ет, леви́ти же воспева́ют, па́че же пред Тобо́ю, Богороди́тельнице Чи́стая, Росси́я хвала́ми я́ко Цари́цу воспева́ет, гла́сы моле́бными приле́жно Ти́ вопию́щи: ра́дуйся, Засту́пнице гра́да на́шего.

Пе́снь 5.
Ирмо́с: Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая.

Тебе́, Богома́ти, вели́кий во проро́цех Иса́ия прови́де Ду́хом, У́гль име́ющу во чре́ве, ве́рныя просвеща́ющь и собла́зны вся́ пожига́ющ, спаса́я ро́д челове́чь.

Же́зл Ааро́нов прозябла́ еси́ и зло́бный ко́рень исто́ргнула еси́, Де́во Богоневе́стная, Жизнода́теля ро́ждши ми́ру, Его́же моли́ сему́ гра́ду спасти́ся от мно́гих напа́стей.

Ны́не у́бо приступи́те с весе́лием, Богоизбра́нное ста́до, росси́йстии собо́ри, ко Всечестне́й Бо́жии Ма́тери и честны́й Ея́ о́браз любе́зно приими́те: се́ бо благода́ть неисчерпа́емая, во́ды точа́щи Боже́ственныя неоску́дно, Ю́же, ве́рнии, почти́м и честно́му о́бразу Ея́ поклони́мся.

От ко́рене Иессе́ева дре́во возрасте́ все́м живо́тное, Пло́д у́бо прозябла́ еси́ во утро́бе Твое́й, Де́во Чи́стая, вся́ лю́ди насыща́ющи Твое́ю ми́лостию.

Пе́снь 6.
Ирмо́с: Боже́ственное сие́ и всечестно́е соверша́юще пра́зднество, Богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

От Тебе́, Богома́ти, истече́ пото́к сла́дкий, вся́ напая́я лю́ди, ду́ш измыва́я скве́рны, Богоро́дице Влады́чице, спаси́ все́х, поклоня́ющихся ве́рно честно́му о́бразу Твоему́.

Вси́ у́бо, совоку́пльшеся вку́пе, воспое́м Чи́стую Де́ву, Богоизбра́нную ле́ствицу Иа́ковлю, Гедео́ново же руно́, ра́дости Хода́таицу, кре́пость и похвалу́ спаса́емых, Богороди́тельницу Чи́стую.

Се́ ны́не весе́лие приближа́ется, ско́рбь же потребля́ется, ве́рнии спаса́ются, я́ко от исто́чника ра́дость почерпа́юще, вы́ну хвала́ми воспева́ют: ра́дуйся, Чи́стая Влады́чице, спасе́ния на́шего нача́ток и все́х ве́рных стена́ и похвала́.

Пода́ждь на́м по́мощь мольба́ми Твои́ми, Пречи́стая Богоро́дице, ско́рби у́бо нахо́дят на ны́ и печа́ли умножа́ются, врази́ ополча́ются, но Ты́, Пречи́стая, предста́вши, изба́ви, враго́в на́ших шата́ние низложи́, на враги́ побе́ду да́руй, да посра́мятся вси́, явля́ющии рабо́м Твои́м зла́я.

Конда́к, гла́с 8.
Взбра́нной Воево́де победи́тельная, я́ко изба́вльшеся от злы́х прише́ствием Твоего́ честна́го о́браза, Влады́чице Богоро́дице, све́тло сотворя́ем пра́зднество сре́тения Твоего́ и обы́чно зове́м Ти́: ра́дуйся, Неве́сто Неневе́стная.

И́кос:
А́нгел предста́тель с Небесе́ по́слан бы́сть рещи́ Богоро́дице: ра́дуйся, и, со безпло́тным гла́сом воплоща́ема Тя́ зря́, Го́споди, ужаса́шеся, и стоя́ше, зовы́й к Не́й такова́я: ра́дуйся, Е́юже ра́дость возсия́ет; ра́дуйся, Е́юже кля́тва исче́знет. Ра́дуйся, па́дшаго Ада́ма воззва́ние; ра́дуйся, сле́з Е́виных избавле́ние. Ра́дуйся, высото́ неудобовосходи́мая челове́ческими по́мыслы; ра́дуйся, глубино́ неудобозри́мая и а́нгельскима очи́ма. Ра́дуйся, я́ко еси́ Царе́во седа́лище; ра́дуйся, я́ко но́сиши Нося́щаго вся́. Ра́дуйся, звездо́, явля́ющая со́лнце; ра́дуйся, утро́бо Боже́ственнаго воплоще́ния. Ра́дуйся, Е́юже обновля́ется тва́рь; ра́дуйся, Е́юже покланя́емся Творцу́. Ра́дуйся, Неве́сто Неневе́стная.

Пе́снь 7.
Ирмо́с: Не послужи́ша тва́ри Богому́дрии па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Я́ко порфи́рою и ви́ссом, червле́ною хлами́дою, Де́во Богоро́дице Влады́чице, гра́д Тво́й, Тобо́ю оде́яся, Христа́ велича́ет и прише́ствие честна́го Твоего́ о́браза сла́вит, я́вльшася па́че лу́чь со́лнечных и немра́чным све́том просвеща́юща велегла́сно хва́лящия Тя́.

Скрижа́ли, богопи́санныя пе́рстом Ду́ха, в я́рости Моисе́й сокруши́; но в Тебе́, Чи́стая, пресла́вный Творе́ц всели́вся, невре́дну Тя́ сохрани́. Ему́же пое́м: оте́ц на́ших Бо́же, благослове́н еси́.

Приими́ Твои́х ра́б мольбы́, Пречи́стая Де́во Богоро́дице, непостоя́нную бу́рю ути́ши моли́твами Твои́ми и сове́ты проти́вных враго́в разжени́, напа́дающих на ста́до Твое́, Всенепоро́чная Влады́чице.

Тебе́ еди́ну помо́щницу ро́ду челове́ческому, Богоро́дице Мари́е, Зижди́тель все́х рождество́м Свои́м назна́мена и проро́цы прообрази́ша: о́в Тя́ две́рь, и́н же Тя́ ло́жницу Бо́жию; мы́ же Тя́ воспева́ем Роди́тельницу Бо́жию, и Хода́таицу к Бо́гу, и Засту́пницу от все́х зо́л, находя́щих на ны́.

Пе́снь 8.
Ирмо́с: О́троки благочести́выя в пе́щи Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Ка́ко Тя́, Де́во, по достоя́нию воспое́м? По́мощь тве́рдую, Храни́тельницу жи́зни на́шея и Хода́таицу непрело́жну к Сы́ну Твоему́ и Бо́гу на́шему, Его́же воспева́ем и превозно́сим во ве́ки.

Цве́те прекра́сный и воня́ пи́щная, облагоуха́еши, Богоро́дице Мари́е, вся́, и спаса́еши, и от неду́г исцеля́еши, бе́сы прогоня́еши. Те́мже Ти́ вопие́м: ра́дуйся, Помо́щнице все́м моля́щимся ве́рным.

Сто́лп я́вльшися, Богома́ти, нахожде́ния проти́вных отгоня́: Тя́ бо чту́щим се́рдцем те́плым яви́лася еси́ стена́, и огражде́ние, и спаси́тельное прибе́жище.

Дави́дски воспева́ем Ти́ пе́снь, го́ру Бо́жию Тя́ имену́юще, Пречи́стая Де́во: Исто́чника бо су́щим приснотеку́щаго источи́ла еси́. Его́же пое́м и превозно́сим во ве́ки.

Пе́снь 9.
Ирмо́с: Вся́к земноро́дный да взыгра́ется, Ду́хом просвеща́емь, да торжеству́ет же Безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Ра́дости Хода́таице, возвесели́ на́ш смы́сл вопи́ти Тебе́, Богоро́дице Чи́стая: ра́дуйся, Храни́тельнице на́ша, держа́во, и огражде́ние, и спаси́тельное прибе́жище.

Да восхва́лят согла́сно Тя́ не́бо и земля́, я́ко Жизнода́теля ми́ру ро́ждши: ра́дуйся, ти́хое приста́нище, живо́тныя воды́ исто́чниче неисчерпа́емый, Влады́чице.

Собра́вшеся дне́сь, лю́дие, во сре́тение Пречи́стыя Бо́жия Ма́тере, Я́же виногра́да мы́сленнаго гре́зн нося́щи, вино́ источа́ющь всегда́ и весе́лия все́х исполня́ющь, я́ко Богоро́дицу по до́лгу сла́вим.

Боже́ственная река́ во́д живо́тных, вся́ удо́лия напоя́ющи, на́ша собла́зны, Богома́ти, погрузи́ и до конца́ потреби́.

Свети́лен.
Да почти́тся дне́сь Богома́ти, Зижди́теля ро́ждшая, ра́йских двере́й отверзе́ние и всего́ ми́ра очище́ние, побе́ду да́вшая христолюби́вому во́инству, о Се́й бо проро́цы глаго́лаша, То́й поклони́мся.

Сла́ва, и ны́не: Пресве́тлая дне́сь ми́лостивная све́тлость, Бо́жия благода́ть, вся́ ра́достно одождя́ет небе́сными ту́чами, на стези́ сла́дкия направля́ющи, Богоро́дице Влады́чице, все́х, позна́вших Тя́ земны́х, Присноде́во, ны́не бо вся́ земля́ Росси́йская ра́дуется, ве́рою Тя́ сла́вящи.

Комментарии

Комментарии не найдены ...
Добавлять комментарии могут только
зарегистрированные пользователи!
 
Имя или номер: Пароль:
Регистрация » Забыли пароль?
© LogoSlovo.ru 2000 - 2019, создание портала - Vinchi Group & MySites