Акафист и Каноны блаженному Василию, Христа ради юродивому, Московскому чудотворцу

Васи́лий Московский, Христа ради юродивый
Акафист блаженному Василию, Христа ради юродивому, Московскому чудотворцу
Память: 15 августа (02 августа ст. ст.)

Конда́к 1.

Избра́нный сосу́д Бо́жией благода́ти, ми́ром доброде́телей преиспо́лненный, достоуго́дне Васи́лие, я́ко избавля́еми от вся́ких бе́д и напа́стей твои́м о на́с ко Го́споду те́плым предста́тельством, благода́рственное сие́ тебе́ пе́ние принося́ще зове́м:

Ра́дуйся, преблаже́нне Васи́лие, юро́де богому́дре, моско́вский чудотво́рче.

И́кос 1.
Ангелоподо́бно житие́ твое́ бы́сть богоблаже́нне и чистота́ вои́стину нескве́рна: ве́дый бо, я́ко любве́ ми́ра сего́ вражда́ Бо́гу е́сть, не восхоте́л еси́ дру́г ми́ру бы́ти, но преда́л еси́ всего́ себе́ Бо́гу, таково́му вели́чию по́двига твоего́ дивя́щеся вопие́м:

Ра́дуйся, ве́рный Го́спода служи́телю, лоза́ преди́вная Христо́ва виногра́да; ра́дуйся, жития́ доброде́тельнаго учи́телю, овча́ избра́нное Госпо́дня ста́да.

Ра́дуйся, ло́на Авраа́ма насе́льниче, рая́ пресла́достнаго жи́тель; ра́дуйся, Ца́рствия Небе́снаго насле́дниче, та́мо себе́ восприя́вый оби́тель.

Ра́дуйся, преблаже́нне Васи́лие, юро́де богому́дре, моско́вский чудотво́рче.

Конда́к 2.
Ви́де, я́ко вся́ я́же в ми́ре: по́хоть пло́ти, по́хоть оче́с и го́рдость жите́йская, учи́л еси́, преблаже́нне, презира́ти пло́ть, прехо́дит бо: прилежа́ти же о души́ безсме́ртной, воспева́я непреста́нно Бо́гу: Аллилу́иа.

И́кос 2.
Ра́зум неуразуме́нен, труды́ и по́двиги твоя́, достоблаже́нне Васи́лие, и́миже се́дмьдесят и два́ ле́та во гра́де се́м Москве́, пло́ть твою́ удруча́л еси́. Мы́ же, многострада́льным терпе́нием твои́м умиля́еми, зове́м:

Ра́дуйся, преуго́дный а́нгеле земны́й, земна́я в се́рдце вся́ попра́вый; ра́дуйся, преди́вный челове́че небе́сный, небе́снаго оте́чества взыска́вый.

Ра́дуйся, огнезра́чный херуви́ме, в душе́ свое́й вся́ стра́сти попали́вый; ра́дуйся, преблаже́нне Васи́лие, юро́де богому́дре, моско́вский чудотво́рче.

Конда́к 3.
Си́лою благода́ти от Бо́га свы́ше укрепля́емь, жела́нием к небе́сному возгоре́лся еси́, всеблаже́нне, и чистото́ю жития́ твоего́ оби́телей ве́чных дости́гл еси́, в ни́х ны́не вопие́ши Бо́гу: Аллилу́иа.

И́кос 3.
Име́яй в се́рдце сло́во Госпо́дне: ка́я бо по́льза челове́ку, а́ще приобря́щет ми́р ве́сь, и отщети́т ду́шу свою́; вся́ кра́сная ми́ра сего́ во уме́ты вмени́л еси́, те́мже прославля́юще тя́, зове́м:

Ра́дуйся, в ми́ре се́м вне́ ми́ра жи́вый, и сла́ву всю́ его́ презре́вый; ра́дуйся, во пло́ти а́ки безпло́тен бы́вый, небе́сныя сла́вы восхоте́вый.

Ра́дуйся, ду́шу свою́ возлюби́вый, спасе́ния ве́чнаго иска́вый; ра́дуйся, те́ло свое́ я́ко врага́ смири́вый, пу́ть по́двига избра́вый.

Ра́дуйся, преблаже́нне Васи́лие, юро́де богому́дре, моско́вский чудотво́рче.

Конда́к 4.
Бу́рю ве́лию зло́бы многомяте́жный диа́вол воздви́же на тя́, богоблаже́нне Васи́лие, ты́ же убежа́л еси́ ловле́ния льсти́ваго сего́ мироде́ржца, и увя́злся еси́ венце́м нетле́ния, воспева́я Бо́гу: Аллилу́иа.

И́кос 4.
Слы́ша Христо́ву за́поведь: ищи́те пре́жде всего́ Ца́рствия Бо́жия и пра́вды его́, отря́сл еси́ вся́кое мирско́е пристра́стие. Восхваля́юще такову́ю о Бо́зе ре́вность твою́, вопие́м:

Ра́дуйся, от ю́ности до́м оте́ческий оста́вивый и сро́дники своя́ и дру́ги вся́ поки́нувый; ра́дуйся, к до́му Отца́ Небе́снаго стопы́ своя́ напра́вивый, широ́кий пу́ть сласте́й отри́нувый.

Ра́дуйся, нея́сыти пусты́нней уподо́бивыйся, кро́ва себе́ на земли́ не име́вый; ра́дуйся, оби́телей ра́йских сподо́бивыйся, приста́нище благооти́шное та́мо обреты́й.

Ра́дуйся, преблаже́нне Васи́лие, юро́де богому́дре, моско́вский чудотво́рче.

Конда́к 5.
Боготе́чней звезде́, светоза́рный пу́ть спасе́ния показу́ющей, уподо́бился, блаже́нне, на́с, во тме́ грехо́вней блужда́ющих, на пу́ть пра́вый наста́ви, да спасе́ннии тобо́ю, воспое́м Бо́гу: Аллилу́иа.

И́кос 5.
Ви́дя злохи́трство диа́вола, и́щуща жите́йскими попече́ньми одержи́мых в се́ти своя́ уловля́ти, противуста́л еси́ ко́знем вра́жиим, ни о че́м же земне́м печа́ся. Ви́дяще сицево́е твое́ благо́е произволе́ние, зове́м ти́:

Ра́дуйся, всего́ себе́ измла́да Го́споду вручи́вый и к Тому́ Еди́ному напра́вивый ве́сь тво́й слу́х; ра́дуйся, того́ еди́наго все́м се́рдцем возлюби́вый, и того́ еди́наго смире́нный ра́б и ве́рный дру́г.

Ра́дуйся, стезе́ю по́двига все́ житие́ свое́ проше́дший, и доброде́телию свое́ю со́нмы а́нгелов удиви́вый; ра́дуйся, небе́сный би́сер многоце́нный на земли́ обре́тший, чистото́ю твое́ю ли́к пра́ведных возвесели́вый.

Ра́дуйся, преблаже́нне Васи́лие, юро́де богому́дре, моско́вский чудотво́рче.

Конда́к 6.
Пропове́дуя па́че вся́каго сло́ва житие́м твои́м не люби́ти ми́ра, ни я́же в ми́ре, доброде́телей ку́плю мно́гу стяжа́л еси́ и Влады́це Христу́ я́ко всепло́дие же́ртвенное прине́сл еси́, вопия́ Ему́: Аллилу́иа.

И́кос 6.
Возсия́, я́ко свети́ло лучеза́рное, по́двиги твоя́, всеблаже́нне, ре́вностию духо́вною разгоре́вся, ко мно́жайшему труду́ просте́рл еси́ себе́: Ада́му первозда́нному подо́бяся, на́г на земли́ ходи́л еси́, пло́ть свою́ удруча́я. Такову́ю кре́пость души́ твоея́ восхваля́юще, зове́м:

Ра́дуйся, одея́ний тле́нных совле́кшийся, те́ло свое́ наготе́ преда́вый; ра́дуйся, безстра́стием святы́м обле́кшийся, доброде́тели ри́зу све́тлую избра́вый.

Ра́дуйся, мра́за лю́таго не убоя́выйся, теплоты́ ра́йския иска́вый; ра́дуйся, зно́я со́лнечнаго не уклони́выйся, прохлажде́ния небе́снаго жела́вый.

Ра́дуйся, преблаже́нне Васи́лие, юро́де богому́дре, моско́вский чудотво́рче.

Конда́к 7.
Хотя́й му́дрости небе́сныя сподо́битися, после́довал еси́ гла́су Па́вла апо́стола: а́ще кто́ мни́тся му́др бы́ти в ве́це се́м, юро́д да быва́ет, да прему́др бу́дет, и Христа́ ра́ди юро́д бы́л, я́ко безу́мна явля́я себя́ ми́ру, умудри́вшему же тя́ Го́споду воспева́я: Аллилу́иа.

И́кос 7.
Ди́вно и пречу́дно юро́дство твое́ бы́сть, преблаже́нне, вся́кое нече́стие и беззако́ние небоя́зненно облича́л еси́, мно́гия досажде́ния и ра́ны за то́ претерпева́я. Таково́й вели́кий по́двиг тво́й ублажа́я, зове́м ти́:

Ра́дуйся, у́м земно́й отри́нувый, небе́сный ра́зум восприя́вый; ра́дуйся, земну́ю му́дрость всю́ поки́нувый, юро́дства по́двиги себе́ избра́вый.

Ра́дуйся, диа́вола свои́м юро́дством прехитри́вый и льсти́вых сете́й его́ избежа́вый; ра́дуйся, безу́мна ми́ру себе́ яви́вый, му́дрых ве́ка сего́ все́х попра́вый.

Ра́дуйся, преблаже́нне Васи́лие, юро́де богому́дре, моско́вский чудотво́рче.

Конда́к 8.
Стра́нник и прише́лец бы́л еси́, преблаже́нне Васи́лие, небе́снаго гра́да Иерусали́ма взыску́я, его́же дости́гл еси́, и ны́не воспева́еши та́мо Бо́гу немо́лчно: Аллилу́иа.

И́кос 8.
Ве́сь к Бо́гу впери́в тво́й у́м, и возлюби́ небе́сная, земно́е все́ отря́сл еси́, те́мже на́с ны́не земли́ приве́рженных к небе́сному обрати́, да изба́вльшеся от земна́го пристра́стия и суеты́ мирски́я, благода́рственно возопии́м ти́:

Ра́дуйся, те́лом на земли́ пребыва́вый, но земна́я вся́ презре́вый; ра́дуйся, ду́хом же на не́бе обита́вый.

Ра́дуйся, ди́вный Бо́жий уго́дниче, житие́м свои́м, я́ко со́лнце, сия́ющий; ра́дуйся, многотерпели́вый Христо́в подви́жниче, и на́с к по́двигом призыва́ющий.

Ра́дуйся, преблаже́нне Васи́лие, юро́де богому́дре, моско́вский чудотво́рче.

Конда́к 9.
Вся́ чи́нове а́нгельстии с небе́с на зе́млю мы́сленными прини́кше очи́ма и ви́дяще твоя́ по́двиги, во умиле́нии воспева́ху Бо́гу: Аллилу́иа.

И́кос 9.
Вети́йствовати хотя́щий язы́к на́ш безгла́сием связу́ется, я́ко не могу́щий по достоя́нию восхвали́ти доброде́тели твоя́. Не пре́зри на́с, зову́щих ти́:

Ра́дуйся, росо́ю благода́ти ду́шу свою́ напои́вый и се́мена благи́е измла́да в не́й насади́вый; ра́дуйся, плоды́ спаси́тельныя в се́рдце свое́м возрасти́вый по́двигами свои́ми, я́ко ка́мением многоце́нным, себе́ украси́вый.

Ра́дуйся, кри́не ра́йский, доброде́телями благоуха́ющий и се́рдце на́ше услажда́ющий; ра́дуйся, свети́льник пресве́тлый во тьме́ грехо́вней сия́ющий, на́с же све́том благоразу́мия просвеща́ющий.

Ра́дуйся, преблаже́нне Васи́лие, юро́де богому́дре, моско́вский чудотво́рче.

Конда́к 10.
Спасти́ хотя́й от бу́ри в мо́ре потопля́емых и к тебе́ о спасе́нии свое́м возопи́вших, яви́лся еси́ и́м на мо́ри, во гра́де Москве́ неотсту́пно пребыва́я, и от потопле́ния изба́вил еси́, да восхваля́ют Бо́га, чуде́сне тобо́ю и́х спа́сшаго, и возопию́т ему́: Аллилу́иа.

И́кос 10.
Го́спода Бо́га непреста́нно умо́м зря́, не да́л еси́ очи́ма свои́ма сна́, ни ве́ждома – дрема́ния, в моли́тве церко́вней но́щи пребыва́я. Лю́дие же ви́дяще таково́е твое́ к Бо́гу усе́рдие, взыва́ху ти́:

Ра́дуйся, высото́ю смире́ния твоего́ умы́ на́ша удивля́ющий, глубино́ю смире́ния сердца́ на́ша умиля́ющий; ра́дуйся, ду́шу свою́ хра́мину ду́ха свята́го сотвори́вый и страсте́м вхо́д в ню́ загради́вый.

Ра́дуйся, креста́ Госпо́дня носи́тель терпели́вый, все́м се́рдцем его́ взыска́вый; ра́дуйся, и́го Госпо́дне я́ко благо́е возлюби́вый, бре́мя ле́гкое его́ ра́достно подъя́вый.

Ра́дуйся, преблаже́нне Васи́лие, юро́де богому́дре, моско́вский чудотво́рче.

Конда́к 11.
Пе́ние всеумиле́нное тебе́, всеблаже́нне, принося́ще, вопие́м: я́коже дре́вле чудоде́йствуя, разсла́бленных исцеля́л еси́, слепы́м прозре́ние дарова́л еси́, та́ко и ны́не ду́ши на́ша, греха́ми разсла́бленныя и похотьми́ ослепле́нныя, исцели́, да вопие́м Бо́гу: Аллилу́иа.

И́кос 11.
Светопода́тельна свети́льника вели́каго зри́м тебе́, преблаже́нне Васи́лие, наставля́юща на пу́ть пра́вый блужда́ющих во тьме́ и се́ни сме́ртней. Того́ ра́ди вопие́м ти́:

Ра́дуйся, лучу́ пра́вды Христо́вой посо́бствующий, мглу́ помысло́в су́етных разгоня́ющий; ра́дуйся, заре́ и́стины Ева́нгельския, тьму́ страсте́й освеща́ющая и объя́тых е́ю от ги́бели ве́чныя спаса́ющая.

Ра́дуйся, у́гль боже́ственный, по́хоти на́ша опаля́ющий, лука́выя ко́зни бесо́вския потребля́ющий; ра́дуйся, пла́мень небе́сный, хла́дныя сердца́ на́ша возгрева́ющий, умы́ же све́том Боже́ственным озаря́ющий.

Ра́дуйся, преблаже́нне Васи́лие, юро́де богому́дре, моско́вский чудотво́рче.

Конда́к 12.
Благода́тию Бо́жиею просвеща́емый, богоблаже́нне Васи́лие, просвети́ на́ш у́м и очи́сти на́ше се́рдце, да сподо́бимся и мы́ воспева́ти с тобо́ю ку́пно Бо́гу: Аллилу́иа.

И́кос 12.
Пою́щих твоя́ по́двиги, восхваля́ющих твоя́ злострада́ния, прославля́ющих твое́ юро́дство, дивя́щихся твои́м доброде́телем не оста́ви свои́м хода́тайством пред Го́сподом, да воспое́м ти́:

Ра́дуйся, непреста́нный о на́с Бо́гу моли́твенниче, ми́лость Бо́жию на на́с призыва́ющий; ра́дуйся, кре́пкий на́ш защи́тниче, от бе́д и скорбе́й на́с охраня́ющий.

Ра́дуйся, напа́ствуемых ско́рый изба́вителю, на пу́ть спасе́ния наставля́ющий; ра́дуйся, гра́ду на́шему Москве́ всегда́шний покрови́телю, по́мощь свою́ все́м чту́щим тя́ при́сно явля́ющий.

Ра́дуйся, преблаже́нне Васи́лие, юро́де богому́дре, моско́вский чудотво́рче.

Конда́к 13.
О преблаже́нне и достоуго́дне Васи́лие, ма́лое сие́ похвале́ние от на́с я́ко пло́д благодаре́ния приими́, я́ко гла́с проше́ния услы́ши, да изба́вимся твои́ми о на́с Бо́гу моли́твами от обыше́дших зо́л и напа́стей, и возопие́м Бо́гу, Спаси́телю на́шему: Аллилу́иа.

Этот конда́к чита́ется три́жды, зате́м и́кос 1-й и конда́к 1-й.

И́кос 1.
Ангелоподо́бно житие́ твое́ бы́сть богоблаже́нне и чистота́ вои́стину нескве́рна: ве́дый бо, я́ко любве́ ми́ра сего́ вражда́ Бо́гу е́сть, не восхоте́л еси́ дру́г ми́ру бы́ти, но преда́л еси́ всего́ себе́ Бо́гу, таково́му вели́чию по́двига твоего́ дивя́щеся вопие́м:

Ра́дуйся, ве́рный Го́спода служи́телю, лоза́ преди́вная Христо́ва виногра́да; ра́дуйся, жития́ доброде́тельнаго учи́телю, овча́ избра́нное Госпо́дня ста́да.

Ра́дуйся, ло́на Авраа́ма насе́льниче, рая́ пресла́достнаго жи́тель; ра́дуйся, Ца́рствия Небе́снаго насле́дниче, та́мо себе́ восприя́вый оби́тель.

Ра́дуйся, преблаже́нне Васи́лие, юро́де богому́дре, моско́вский чудотво́рче.

Конда́к 1.
Избра́нный сосу́д Бо́жией благода́ти, ми́ром доброде́телей преиспо́лненный, достоуго́дне Васи́лие, я́ко избавля́еми от вся́ких бе́д и напа́стей твои́м о на́с ко Го́споду те́плым предста́тельством, благода́рственное сие́ тебе́ пе́ние принося́ще зове́м:

Ра́дуйся, преблаже́нне Васи́лие, юро́де богому́дре, моско́вский чудотво́рче.

Моли́тва пе́рвая.
О вели́кий уго́дниче христо́в, и́стинный дру́же и ве́рный ра́бе всетворца́ Го́спода Бо́га, преблаже́нне Васи́лие! Услы́ши ны́ многогре́шныя, ны́не вопию́щыя к тебе́ и призыва́ющыя и́мя твое́ свято́е: поми́луй ны́ припа́дающыя дне́сь к ра́це моще́й твои́х: приими́ ма́лое на́ше и недосто́йное сие́ моле́ние, умилосе́рдися над убо́жеством на́шим, и моли́твами твои́ми исцели́ вся́к неду́г и боле́знь ду́ши и те́ла на́шего гре́шнаго, и сподо́би ны́ тече́ние жи́зни сея́ невреди́мо от ви́димых и неви́димых вра́г безгре́шно прейти́, и христиа́нскую кончи́ну непосты́дну, ми́рну, безмяте́жну, и Небе́снаго Ца́рствия насле́дие получи́ти со все́ми святы́ми во ве́ки веко́в. Ами́нь.

Моли́тва втора́я (от слепоты́, боле́зни но́г, ко́жных боле́зней).

О блаже́нная душе́, о прему́дрости испо́лненный ра́зуме: возсия́ бо на́м светонезаходи́мое со́лнце весе́лия, просвеща́я Росси́йское Ца́рство: от бесо́в уя́звленных исцели́тель, па́че же и сами́х бесо́в прогони́тель, слепы́м прозре́ние, хромы́м хожде́ние, сля́ченным исправле́ние, боля́щим все́м исцеле́ние и здра́вие: от бе́д и скорбе́й избавле́ние, печа́льным утеше́ние.

Моли́тва тре́тия.

О уго́дниче христо́в, преблаже́нне Васи́лие! Услы́ши ны́, многогре́шныя, ны́не вопию́щия к тебе́: поми́луй ны́, ра́б Бо́жиих (имена́), и умилосе́рдися над убо́жеством на́шим. И моли́твами твои́ми исцели́ вся́к неду́г и боле́знь ду́ши и те́ла на́шего гре́шнаго, и сподо́би ны́ тече́ние жи́зни сея́ невреди́мо, от ви́димых и неви́димых вра́г, и безгре́шно прейти́, и христиа́нскую кончи́ну непосты́дну, ми́рну, безмяте́жну, и Небе́снаго Ца́рствия насле́дие получи́ти, со все́ми святы́ми, во ве́ки веко́в.

---------------------------------------------------------------------------------------------

Каноны святому блаженному Василию, Христа ради юродивому, Московскому чудотворцу
Припев: Святы́й блажéнный óтче Васи́лие, моли́ Бо́га о на́с.
Память: 15 августа (02 августа ст. ст.)
Глас 8.


Пе́снь 1.
Ирмо́с: Посе́ченный несеко́маго пресече́, и ви́де со́лнце зе́млю, ю́же не ви́де, лю́таго врага́ вода́ потопи́, и непроходи́мое про́йде Изра́иль, пе́снь же воспева́шеся: Го́сподеви пои́м, сла́вно бо просла́вися.

Одея́йся све́том, я́ко ри́зою, оде́я тя́, Васи́лие чу́дне, ри́зою безстра́стия. Те́мже взима́яся ду́хом к Боже́ственному виде́нию и озари́вся благода́тию Бо́жия про́мысла, стра́нен показа́лся еси́ от все́х сро́дник и зна́емых, и пресели́лся еси́ к сро́дству небе́сному, и ны́не живе́ши жи́знь безконе́чную.

Показа́лся еси́ Росси́йской земли́ свети́ло вели́кое, просвеща́я на́с све́том твои́х доброде́телей. И кто́ мо́жет изчести́ мно́гия по́двиги и труды́ твоя́, и всено́щная стоя́ния, и ины́х мно́жества к си́м доброде́телей, и́мже возме́здие от Бо́га прия́л еси́?

Ума́ челове́ча превзы́де чи́н, ди́вное на земли́ житие́ пожи́л еси́, бдя́, и моля́ся, и тружда́яся, и на́г на земли́ скита́яся, не име́я где́ главы́ подклони́ти, во все́м животе́ твое́м. И сего́ ра́ди всели́лся еси́ во оби́тели небе́сныя. Мно́ги бо, — рече́ Госпо́дь, — оби́тели в дому́ Отца́ Моего́, по ме́ре доброде́телей.

Богоро́дичен: Ко́е спасе́ние и́но таково́, я́коже Ты́, Пречи́стая Богоро́дице, кре́пкое поможе́ние и те́плое заступле́ние? Изба́ви ду́шу мою́ от се́ти диа́воли, Ты́ бо еси́ все́х земны́х спасе́ние, спаси́ и мене́, лю́те потопля́ема волна́ми грехо́вными, моли́твами уго́дника Твоего́ Васи́лия.

И́н. Гла́с 2.
Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Возлюби́вый усе́рдно Го́спода и жела́тельно подвиза́яся дости́гнути Ца́рства небе́снаго, просвети́лся еси́ Боже́ственною благода́тию. Те́мныя о́блаки души́ моея́ разгони́, и у́м ми́ озари́, и отве́рзи ми́ устне́ к пе́нию, восхвали́ти тя́, преблаже́нне Васи́лие.

Анто́ний Вели́кий рече́: име́ющим здра́в у́м не тре́бовати писа́ния; на тебе́ же сбы́стся, прему́дре Васи́лие. Главу́ твою́ всегда́ име́я к небеси́ возведе́ну, очи́ма же го́рняя зря́, ума́ чистото́ю тща́лся еси́ ко Ада́му и к ве́рному Авраа́му.

Стра́нен сро́дник твои́х бы́л еси́, и бли́жних любве́ чу́ждь, и во твое́м язы́це, я́ко иноязы́чен, во ино́м же в ра́зуме седя́й. И ничто́же от земны́х одея́ний на те́ле твое́м носи́л еси́, я́коже Ада́м, до́ндеже не ви́дел еси́ обнаже́ния души́ твоея́, ниже́ безобра́зие пло́ти твоея́ позна́л еси́.

И́же себе́ позна́вый, пости́гл еси́ стра́х Госпо́день. Разжже́ние плотско́е хла́дом Свята́го Ду́ха угаси́в, всегда́ душе́вныма очи́ма на у́мныя си́лы взира́ти изво́лил еси́ и преплы́л еси́ вели́кую сию́ жите́йскую пучи́ну жесто́ким путе́м, богоблаже́нне.

Богоро́дичен: Влады́чице, Ма́ти Бо́жия Пречи́стая, Благослове́нная и Пренепоро́чная, души́ моея́ стру́пы исцели́ и стра́сти плотски́я умертви́, у́м мо́й от вся́каго вре́да вра́жия и напа́стей изми́, Богоро́дице.

Пе́снь 3.
Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Ды́м, и пра́х, и се́нь вмени́л еси́ кра́сная ве́ка сего́ и ничто́же от любве́ Христо́вы па́че изво́лил еси́, Сего́ жела́я насы́титися сла́вы и весе́лия присносу́щнаго, в ня́же жела́ют а́нгели прини́кнути. И, си́х ра́дости получи́в, предстои́ши во све́те Святе́й Тро́ице, ра́дуяся, Е́йже моли́ся за ны́, преблаже́нне Васи́лие.

Воцари́вся над страстьми́, великоду́шне Васи́лие, одоле́л еси́ плотско́е жела́ние, и яви́лся еси́ чистоты́ сокро́вище духо́вное, и сего́ ра́ди прия́л еси́ та́влу белу́, на не́йже напи́сано и́мя но́во, ди́вно, неве́домо. И не бы́сть на души́ твое́й скве́рны, ни вра́ски: убели́л бо еси́ ю́ то́ки сле́з твои́х, и ны́не непреста́нно ра́дуешися.

Ве́ру неоску́дну в души́ име́я, преблаже́нне, да́нный тебе́ тала́нт трудолю́бно возде́лал еси́ и прия́л еси́ вла́сть над десятию́ градо́в доброде́телей, бе́сы прогоня́ти, прокаже́нныя очища́ти, разсла́бленныя бы́стро ходи́ти, слепы́я просвеща́ти, и усугу́би да́р все́м исцеле́ния, творя́щим святу́ю па́мять твою́.

Богоро́дичен: А́з, Де́во Свята́я Богоро́дице, наде́жду име́я на Тя́, спаса́юся. Разгони́, Влады́чице, враги́ души́ моея́ и напра́ви мя́ на пу́ть жи́зненный, да, спа́сся, вопию́ Ти: ра́дуйся, Помо́щнице ми́ра, наде́жда христиа́нская; ра́дуйся, Госпо́дь с Тобо́ю, Благослове́нная.

И́н.
Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Любо́вию Бо́жиею угаси́л еси́ любо́вь роди́телей, ме́чь же духо́вный всегда́ воздвиза́я, и́мже во́лю хоте́ния твоего́ отсеца́я, утверди́л еси́ стопы́ ра́зума твоего́ на ка́мени любве́ Христо́вы.

И́же о твое́й пло́ти не пе́кся, жи́знь ми́ра сего́ возненави́дел еси́ и о плотски́х небре́гл еси́, всегда́ подвиза́яся у́м чи́ст к Бо́гу предста́вити. И прине́сл еси́ себе́, я́ко непоро́чну и благоприя́тну Вели́кому Архиере́ю же́ртву.

Е́же стяжа́л еси́ от младе́нства ве́рою несумне́нною смиреному́дрие и соверше́нную к Бо́гу любо́вь и, вся́ чу́вства порабо́тив, я́ко безстра́стен бы́л еси́, у́м от тва́ри возвы́сив, лицу́ же Госпо́дню ду́шу предста́вил еси́.

Богоро́дичен: Спаси́ мя, Ма́ти Бо́жия, спасе́ния нача́ло ми́ру я́вльшися, и изба́ви молвы́, и нечи́стых страсте́й, и вся́кия проти́вныя ско́рби, да сла́влю Тя́, Богоро́дице.

Седа́лен, гла́с 8.
От земны́х на небе́сная помы́слив и де́лом соверши́в, кра́сная ми́ра сего́ во уме́ты вмени́л еси́, Христа́ ра́ди юро́д бы́в на земли́, терпе́нием и жесто́ким подвиза́нием сы́н све́та показа́лся еси́ и в Ца́рствии небе́снем све́тло зри́ши Святу́ю Тро́ицу, преблаже́нне Васи́лие. Ю́же моли́ согреше́ний оставле́ние дарова́ти пра́зднующим любо́вию святу́ю па́мять твою́.

Сла́ва: Бы́в до́м Бо́жий и жили́ще Свята́го Ду́ха, блаже́нне Васи́лие, це́рковь те́ла твоего́ непоро́чну соблю́л еси́, и, прише́д, всели́ся в тя́ Оте́ц, и Сы́н, и Святы́й Ду́х, и дарова́ тебе́ терпе́ние, и му́жество, и хра́брость духо́вную, и несму́тною мы́слию по Боже́ственному пути́ ше́ствовати. И, прие́м да́р исцеле́ний, моли́ Христа́ Бо́га спасти́ ду́ши на́ша.

Богоро́дичен: Красоте́ Твое́й, Богора́дованная, арха́нгел Гаврии́л предстоя́, дивля́шеся и вопия́ше Ти́: О, Неве́сто неискусобра́чная, Отрокови́це небла́зненная! Ка́ко Ти́ изреку́ пре́жде ве́к сокрове́нную та́йну? Ты́ бо еси́ небе́сным и земны́м соедине́ние. Ра́дуйся, Обра́дованная, Госпо́дь с Тобо́ю.

Пе́снь 4.
Ирмо́с: Проро́к Авваку́м у́мныма очи́ма прови́де, Го́споди, прише́ствие Твое́, те́м и вопия́ше: от ю́га прии́дет Бо́г. Сла́ва си́ле Твое́й, сла́ва снизхожде́нию Твоему́!

Бы́л еси́ под влады́кою учине́н Христо́ва повеле́ния, и повелева́я рабу́ своему́, те́лу, сотвори́ти слу́жбу свою́, Христу́ рабо́тая, и покори́ уму́, влады́це, страстны́я по́мыслы, и бы́л еси́ сы́н послуша́ния, вопия́ Христу́: си́ле Твое́й сла́ва, Человеколю́бче.

Име́ющим це́л у́м не тре́бовати писа́ния, — рече́ вели́кий Анто́ний. На тебе́ сие́ сбы́стся, прему́дре Васи́лие: не учи́вся кни́гам, вся́ разуме́л еси́ Боже́ственная Писа́ния, непреста́нно поя́ Христу́: си́ле Твое́й сла́ва, Человеколю́бче.

Во гра́де, я́ко в пусты́ни, живы́й, преблаже́нне Васи́лие, и ни от чего́же смуща́яся, но венча́лся еси́ ра́ди трудо́в твои́х, посеща́я вдови́цу, я́коже Илия́ проро́к Саре́фтяныню, и поя́ пе́снь немо́лчную: си́ле Твое́й сла́ва, Человеколю́бче.

Богоро́дичен: И́же Отцу́ и Ду́ху Собезнача́льный от Тебе́ изво́ли роди́тися на́шего ра́ди спасе́ния и дарова́ Тя ро́ду христиа́нскому те́плую Засту́пницу и в беда́х ско́рую Помо́щницу. Те́мже, Ма́ти безму́жная, покланя́емся ве́рно Рождеству́ Твоему́.

И́н.
Ирмо́с: Прише́л еси́ от Де́вы, не хода́тай, ни а́нгел, но Са́м, Го́споди, вопло́щся, и спа́сл еси́ всего́ мя челове́ка. Те́м зову́ Ти: сла́ва си́ле Твое́й, Го́споди.

Ми́ра сего́ вся́ возненави́дел еси́, пло́ть ду́ху порабо́тив, и, удали́вшуся тебе́ теле́сныя любве́, в юро́дство претвори́лся еси́, до́бре разсмотри́в преити́ тя́жкую пучи́ну, успе́х прия́ти сподо́бился еси́, чу́дне Васи́лие.

Омраче́ние возненави́дев грехо́вное и пла́менем чистоты́ пресе́к пла́мень, терпе́нием и мудре́йшим юро́дством, я́ко златы́ми крила́ми, на небеса́ возлете́л еси́ и равноа́нгельную дости́гл еси́ степе́нь.

Любо́вию Христо́вою сро́дников отре́клся еси́ и над страстьми́ ца́рь показа́лся еси́, ско́рбным путе́м ше́ствуя, и, дости́гнув простра́ннаго жили́ща, на́с, плене́нных грехо́вными страстьми́, свободи́, преблаже́нне.

Богоро́дичен: Кро́в, и заступле́ние, и прибе́жище бу́ди ми́, Де́во, рабу́ Твоему́, и исцели́ мя от безме́рных зо́л, да пою́, Пречи́стая: сла́ва Рождеству́ Твоему́.

Пе́снь 5.
Ирмо́с: Мра́к души́ моея́ разжени́, Светода́вче Христе́ Бо́же, началоро́дную тму́ изгна́в бе́здны, и да́руй ми́ све́т повеле́ний Твои́х, Сло́ве, да у́тренюя, сла́влю Тя́.

Процве́т, я́ко кипари́с, посреде́ земли́ Росси́йския, уго́дниче Христо́в Васи́лие, прине́сл еси́ плоды́ ду́ха во мно́зе терпе́нии, безъиме́нство, и теле́сное удруче́ние, и от бесо́в и злы́х челове́к озлобле́ние. Сего́ ра́ди прия́л еси́ ны́не ве́чное утеше́ние.

Си́ла бо Моя́, — рече́ Госпо́дь, — в не́мощи соверша́ется. Се́ бо на тебе́ соверши́ся Бо́жие смотре́ние, чу́дне Васи́лие, си́лою Христо́вою ди́вен яви́лся еси́ в житии́ твое́м, зло́ стражда́, ника́коже боле́зни ощуща́л еси́: облегчева́ше тя́ жела́ние бу́дущих бла́г, я́же получи́л еси́.

Зва́ние твое́ не от челове́к бы́сть, но от Бо́га, прему́дре Васи́лие. И, я́ко еле́нь, жаждя́, на исто́чники воды́ живы́я поте́кл еси́, напитава́я ду́шу Христо́вою любо́вию, и ктому́ ника́коже от зно́я грехо́внаго вжажда́лся еси́: укрепи́ бо тя́ на се́ Ца́рь ми́ра.

Богоро́дичен: А́нгели и арха́нгели, херуви́ми и серафи́ми многоочи́тии, нача́ла, и вла́сти, и госпо́дьствия раболе́пно покланя́ются Рождеству́ Твоему́, Богоро́дице, сла́вяще Тя́, Влады́чице. Те́мже и мы́, Ма́ти Преблагослове́нная, покланя́емся со стра́хом и мо́лим Тя́: спаси́ ду́ши на́ша.

И́н.
Ирмо́с: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.

И́же до тре́тияго небесе́ возше́дый рече́: мы́ юро́ди Христа́ ра́ди. Ты́ же, преблаже́нне, по благода́ти в таково́е юро́дство преложи́лся еси́, досажде́ние неразу́мных люде́й претерпе́в, и ко́зни бесо́вския попра́л еси́, и я́ко а́нгел на земли́ яви́лся еси́ на́м.

Бо́га ра́ди житие́ сла́вы ми́ра сего́ от младе́нства возненави́дел еси́, возлюби́в нищету́ и терпе́ние, огне́м печа́ли очны́я сле́зы изсуши́л еси́ и вся́ ско́рбная претерпе́л еси́, преблаже́нне Васи́лие.

Прему́дростию Бо́жиею просвеще́н еси́, о́гнь веще́ственный невеще́ственным угаси́в, и чистото́ю жития́ твоего́ безтеле́снаго во́инства усвое́нию сподо́бился еси́.

Богоро́дичен: Источа́еши исцеле́ний струи́ боля́щим, Де́во, всю́ду, Тя́ бо исто́чника показа́ милосе́рдия, Влады́чице, ми́лости Госпо́дь, из Тебе́ рожде́йся па́че ума́.

Пе́снь 6.
Ирмо́с: Я́коже проро́ка изба́вил еси́ из глубины́ преиспо́дния, Христе́ Бо́же, и мене́ от грехо́в мои́х изба́ви, я́ко Человеколю́бец, и упра́ви живо́т мо́й, молю́ся.

Кто́ мо́жет изчести́ чудеса́ прему́драго Васи́лия, его́же ви́дяху по мо́рю ше́ствующа немо́кренно, я́ко по су́ху? И ви́дяху неве́рнии язы́цы, дивля́хуся и, прише́дше в Росси́ю, пове́даху: мы́, — реко́ша, — ви́дехом такова́ челове́ка, по мо́рю ше́ствующа; и́стинно бо свиде́тельство и от вра́г прино́сится. Мы́ же глаго́лем: сла́ва Бо́гу, творя́щему чудеса́ ди́вная.

Уподо́бился еси́, прему́дре Васи́лие, все́ми нра́вы и обы́чаем Симео́ну, юро́дивому Христа́ ра́ди, и Андре́ю Царегра́дскому, и вели́кому отцу́ Мака́рию, и Ону́фрию, и Па́влу Фиве́йскому, и Макси́му чу́дному, и Проко́пию Вели́кому. С ни́миже сожи́тель яви́лся еси́ во Ца́рствии Христа́ Бо́га на́шего.

О, прему́дре Васи́лие, чу́дный житие́м и ра́зумом! Мо́лим тя́, блаже́нне: моли́ Христа́ Бо́га на́шего за лю́ди правосла́вныя, и все́м ве́рным спасе́ние испроси́, и ми́ру ми́р, и от гре́х свобожде́ние, и умоли́ Ца́рствию бы́ти насле́дником.

Богоро́дичен: Кто́ на́с изба́вит от му́ки ве́чныя и от сме́рти душе́вныя, а́ще не Ты́ возде́жеши пречи́стеи ру́це, Богоро́дице, Сы́ну Твоему́ и Бо́гу на́шему? Да спасе́т ны́, ни отку́дуже иму́щия по́мощи, Твои́м покро́вом, Преблагослове́нная.

И́н.
Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

О́стр у́м всегда́ к Бо́гу име́в, я́ко нечу́вствен ко все́м жите́йским бы́л еси́, вся́ же кова́рства лука́ваго, я́ко се́ть, расто́ргнул еси́ и пресве́тлое свети́ло ми́рови показа́лся еси́, богоблаже́нне Васи́лие.

Ду́хом Бо́жиим наставля́емь, благоюро́диве, чистоту́ естества́ твоего́ преесте́ственну, небесоподража́тельное житие́ име́л еси́ и ангелоле́пное виде́ние. Те́мже моли́ спасти́ся на́м от вра́г на́ших.

А́нгел житие́м на земли́ показа́лся еси́, и, на го́ру безсме́ртия возше́д доброде́тельми, а́нгельския полки́ удиви́л еси́, и на враги́ храбо́рник чу́ден показа́лся еси́. И ны́не посо́бствуй во́инству на́шему, преблаже́нне, да твои́ми моли́твами проти́внии побежда́ются.

Богоро́дичен: Ру́ки Твоя́ пречи́стыя, Де́во Ма́ти, просте́рши, покры́й на Тя́ наде́ющияся и Сы́ну Твоему́ зову́щия: все́м пода́ждь, Христе́, ми́лости Твоя́.

Конда́к, гла́с 4:
Ду́хом Бо́жиим води́мь, преблаже́нне Васи́лие, оттря́сл еси́ мирски́й мяте́ж, и жития́ треволне́ния возгнуша́лся еси́, и, совле́кся одея́ний тле́нных и обле́кся в ри́зу безстра́стия, убежа́л еси́ ловле́ния льсти́ваго мироде́ржца, и бы́л еси́ стра́нен во твое́м язы́це, и, па́че земна́го бога́тства избра́в бога́тство небе́сное, увя́злся еси́ венце́м терпе́ния. И ны́не, преблаже́нне Васи́лие, моли́ Христа́ Бо́га о творя́щих святу́ю па́мять твою́, да зове́м ти́: ра́дуйся, преблаже́нне Васи́лие.

И́кос:
Трудолю́бному житию́ твоему́ а́нгели удиви́шася, му́жески бо воста́л еси́ на естество́: разуме́в непостоя́нное жития́ сего́, совле́клся еси́ одея́ний и, на́г сы́й, ста́л еси́ проти́ву ко́знем диа́вольским, я́коже хра́брый ратобо́рец, по словеси́, преблаже́нне, апо́столову: не́сть на́ша бра́нь к кро́ви и пло́ти, но к нача́лом, и ко власте́м, и к миродержи́телем тмы́ ве́ка сего́. И, сему́ нагото́ю теле́сною спле́тся до́блественне, ни от ко́еяже стра́сти победи́лся еси́, но все́х сете́й убежа́л еси́ го́рдаго велиа́ра, прескочи́в про́пасть а́дову, ю́же изры́ вра́г между́ Ла́зарем и бога́тым, и ны́не у Авраа́ма на ло́не почива́еши, отнесе́н святы́ми а́нгелы. Моли́ся, преблаже́нне, Христу́ Бо́гу на́шему о творя́щих святу́ю па́мять твою́, да зове́м ти́: ра́дуйся, преблаже́нне Васи́лие.

Пе́снь 7.
Ирмо́с: На по́ле Деи́ре иногда́ мучи́тель пе́щь поста́ви на муче́ние богоно́сных, в не́йже три́ о́троки песносло́вяху Еди́наго Бо́га, тро́ично воспева́ху, глаго́люще: оте́ц Бо́же, благослове́н еси́.

Де́нь Госпо́день всегда́ пред очи́ма зря́, прему́дре Васи́лие, предстоя́л еси́ на́г, я́коже суди́щу нелицеме́рному Сы́на Бо́жия, и послужи́л еси́ Влады́це твоему́ во мно́зе терпе́нии, воспева́я: оте́ц на́ших Бо́же, благослове́н еси́.

Разуме́в, блаже́нне Васи́лие, я́ко ничто́же ну́жднее души́, за ню́же Христо́с у́мре и воскре́се, не оскверни́л еси́ ри́зы душе́вныя, ю́же прия́л еси́ от свята́го креще́ния. И ны́не, предстоя́ Христу́, взыва́еши: оте́ц на́ших Бо́же, благослове́н еси́.

Ничто́же разлучи́т мя́ от любве́ Христо́вы, — сия́ преблаже́нный Васи́лий глаго́лаше, — ни высота́, ни глубина́, ни а́нгели, ни си́лы, ни сла́ва, ни бога́тство, ничто́же бо хощу́ кра́сных ми́ра сего́, па́че Иису́са сла́дкаго, Ему́же вопию́: оте́ц на́ших Бо́же, благослове́н еси́.

Богоро́дичен: Пре́жде рождества́ пребы́сть Де́вою Ма́ти Сы́на Бо́жия и по рождестве́ яви́ся па́ки Де́ва: Бо́г бо бе́, иде́же хо́щет, побежда́ются естества́ чи́ни. Ты́ бо яви́лася еси́ село́ простра́нно Сы́на О́тча, Благослове́нная, Ему́же вопие́м: благослове́н Бо́г оте́ц на́ших.

И́н.
Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Тве́рдый душе́ю адама́нт показа́лся еси́, блаже́нне, вои́стинну житие́ твое́ па́че естества́, я́коже в ка́ющихся оби́тели, и осяза́нием и сластьми́ ми́ра сего́ безстра́стен пребыва́я, ве́лий же от виде́ния пребы́л еси́ без вре́да.

Испо́лнился еси́ Свята́го Ду́ха благода́ти, разуме́в Госпо́дне благове́стие, широ́кий и простра́нный пу́ть, вводя́й в па́губу, возненави́дел еси́ и возлюби́л еси́ безмо́лвие; те́сным и приско́рбным путе́м Христу́ после́дуя, от земны́х к небе́сным оби́телем пресла́вно возше́л еси́.

Благода́рное сие́ пе́ние, приноси́мое тебе́, не пре́зри, преблаже́нне, но ми́лостивно приими́ и ра́дости духо́вныя испо́лни на́с, умоли́ Го́спода пода́ти це́ркви на́шей утвержде́ние и ми́ру устрое́ние.

Богоро́дичен: Благоутро́бия ми́лости иму́щи, смире́нныя моея́ души́ не пре́зри, ве́рно молю́ Тя, Отрокови́це, но уще́дри вско́ре, и спаси́ мя от пучи́ны согреше́ний мои́х, и, обно́вльши благода́ть Твою́ на мне́, просвети́, Де́во Чи́стая.

Пе́снь 8.
Ирмо́с: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся́ дела́ Госпо́дня, Го́спода.

Ви́дя Госпо́дь труды́ твоя́ и мно́гия по́двиги, чуде́с да́ром обогати́ тя́, просия́л бо еси́ на све́щнице Христо́ва сия́ния, и яви́ тя вселе́нней зна́ема ра́ди чуде́с исцеле́ния, и вси́ вопию́т с тобо́ю, преблаже́нне: благослови́те, вся́ дела́ Госпо́дня, Го́спода и превозноси́те Его́ во ве́ки.

Слы́шал еси́, прему́дре Васи́лие, Спа́сову за́поведь: а́ще, рече́, челове́к ве́сь ми́р приобря́щет и оттщети́т ду́шу свою́, что́ да́ст изме́ну на души́ свое́й? Ты́ же сие́ в се́рдцы твое́м скры́л еси́ и пе́клся еси́, ка́ко угоди́ти Бо́гу, Ему́же взыва́еши: благослови́те, вся́ дела́ Го́спода и превозноси́те Его́ во ве́ки.

Ничи́мже ме́ньши пре́жних святы́х, чу́дне Васи́лие, яви́лся еси́, изря́ден мно́гими труды́ и по́двиги и та́йными к Бо́гу моли́твами, а́ще челове́ком и неве́домы, но Бо́гом вся́ зри́мы и ве́домы, Ему́же вопие́ши: благослови́те, вся́ дела́ Го́спода и превозноси́те Его́ во ве́ки.

Богоро́дичен: Благослови́те, вся́ дела́ Госпо́дня, Го́спода, ро́ждшагося от Де́вы Мари́и, и спа́сшаго всеро́днаго Ада́ма от паде́ния, и возне́сшаго па́ки челове́чество на высоту́ небе́сную, и седя́щаго одесну́ю Отца́, Ему́же вопию́т вси́ а́нгели: да благослови́т вся́ тва́рь Го́спода и превозно́сит Его́ во ве́ки.

И́н.
Ирмо́с: В пе́щь о́гненную ко отроко́м евре́йским снизше́дшаго, и пла́мень в ро́су прело́жшаго Бо́га, по́йте дела́, я́ко Го́спода, и превозноси́те во вся́ ве́ки.

О́гнь стра́шный разумева́я, земны́х ничто́же возлюби́л еси́. Печа́лию душе́вною и глубо́ким се́тованием у́м во глубину́ смире́ния погрузи́л еси́, жела́я всели́тися в небе́сное Ца́рство, е́же и получи́в, ны́не ра́дуешися ра́достию безконе́чною.

Равноа́нгельную че́сть досто́йно получи́л еси́, преблаже́нне Васи́лие, и, со безпло́тными Бо́гу предстоя́, призира́й на ны́ с небе́снаго кру́га, ра́дости пода́телю, и возсия́й све́т тво́й на́м, я́ко да ви́дим твоя́ чудеса́.

И́мже о́бразом жела́ет еле́нь пали́мь на исто́чники, си́це и ты́, преблаже́нне, всегда́ подвиза́яся, жела́л еси́ боже́ственнаго хоте́ния и вся́ благоуго́дно Го́сподеви соверши́л еси́. И ны́не со святы́ми пое́ши непреста́нно: по́йте, вся́ дела́, Го́спода и превозноси́те Его́ во ве́ки.

Богоро́дичен: Лука́во вре́мя живота́ моего́ и вся́кия зло́бы испо́лнено, сатане́ лука́вому лю́те мя́ смуща́ющу, Ты́ мя исто́ргни того́, Богороди́тельнице, па́кости, на Тя́ бо все́ возложи́х ча́яние мое́, спаси́ мя Твои́ми бо́дрыми моли́твами.

Пе́снь 9.
Ирмо́с: Благослове́н Госпо́дь Бо́г Изра́илев, воздви́гнувый ро́г спасе́ния на́м в дому́ Дави́дове, О́трока Своего́, в ни́хже посети́ на́с Восто́к с высоты́ и напра́вил ны́ е́сть на пу́ть ми́ра.

Я́коже рече́ Христо́с, са́мая И́стина, вну́трь ва́с е́сть Ца́рство небе́сное. Ты́ бо, Васи́лие чу́дне, бы́л еси́ сы́н и насле́дник Ца́рствия Бо́жия, е́же скры́л еси́ вну́трь себе́ доброде́тельми. Сего́ ра́ди тя́ вси́ ублажа́ем, Христа́ велича́юще.

Бди́те, — рече́ Госпо́дь, — и моли́теся, не ве́сте бо дне́ и часа́, ка́ко прии́дет Сы́н Бо́жий. Ты́ же, пра́ведне Васи́лие, всегда́ гото́в сы́й, ожида́л еси́ прише́ствия Христа́ Царя́ Небе́снаго, Его́же и ра́достно усре́л еси́ и прия́л еси́ блаже́нство ве́чное, Христа́ велича́я.

Егда́ преста́вился еси́, преблаже́нне Васи́лие, тогда́ стеко́шася ца́рие и кня́зи и вси́ собо́ри Росси́йстии, ю́ноши и де́вы, ста́рцы с ю́нотами твои́м честны́м моще́м поклони́тися, и воскли́кнуша ку́пно вси́ па́мять ве́чную, Христа́ велича́юще.

Богоро́дичен: Возвели́чим Ма́терь Бо́га на́шего, Ю́же пою́т вси́ а́нгели и арха́нгели, и вси́ ро́ди и коле́на покланя́ются и блажа́т от ны́не и до ве́ка, вопию́ще: ра́дуйся, о Благода́тная, Госпо́дь с Тобо́ю.

И́н.
Ирмо́с: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Святы́м Ду́хом утеше́ние стяжа́в, у́мных си́л име́л еси́ жи́тельство, преблаже́нне. Те́м светоно́сную твою́ па́мять похваля́юще, мо́лим: испо́лни на́с ра́дости и весе́лия духо́внаго.

Умо́м и душе́ю укра́шен, преблаже́нне, и многострада́льным житие́м све́тло просия́ па́мять твоя́, и мы́, благода́тными твои́ми луча́ми просвеща́ющеся, бе́д и неду́г избавля́емся.

Блага́я восприя́л еси́ на небесе́х, и обре́л еси́ ра́дость неизрече́нную, и на́с просвети́л еси́ чудесы́, и ны́не пребыва́еши со святы́ми а́нгелы во све́те Святы́я Тро́ицы, преблаже́нне Васи́лие, сего́ ра́ди тя́ велича́ем.

Богоро́дичен: А́нгельстии собо́ри Тя́, Богороди́тельнице, сла́вят, и челове́честии ро́ди пе́сньми Тя́ почита́ют непреста́нно, Ты́ бо Боже́ственным Рождество́м земны́я с небе́сными совокупи́ла еси́, те́м Тя́ почита́ем.

Свети́лен:
Све́т Христо́в всели́ся в се́рдце твое́, Васи́лие чу́дне, совле́клся бо еси́ ве́тхаго челове́ка и яви́лся еси́ но́в, горя́ ду́хом по Христо́ве за́поведи. И, умно́жив тала́нт трудо́в твои́х, яви́лся еси́ чу́ден в да́льных страна́х и Росси́йскую зе́млю просвети́л еси́, чуде́с зарю́ испуща́я. И ны́не предстои́ши во све́те Святы́я Тро́ицы, ра́дуяся.

Богоро́дичен: Све́т ро́ждши ду́ш на́ших, Богоро́дице, Христа́, от Отца́ возсия́вшаго и отгна́вшаго тму́ идолобе́сия, просвети́вшаго вся́ ве́рныя и дарова́вшаго на́м бы́ти благода́тию ча́дом Бо́жиим, во све́те присносу́щнем водворя́тися и Ду́хом Бо́жиим освяща́тися, Тя́ воспева́ющим.

Комментарии

Комментарии не найдены ...
Добавлять комментарии могут только
зарегистрированные пользователи!
 
Имя или номер: Пароль:
Регистрация » Забыли пароль?
© LogoSlovo.ru 2000 - 2019, создание портала - Vinchi Group & MySites