Акафист и Каноны Собору Святых Славных и Всехвальных Двенадцати Апостолов

Собор святых славных и всехвальных 12-ти Апостолов Христовых
Акафист святым двунадесяти Апостолам
Память: 13 июля (30 июня ст. ст.)

Кондак 1
Избраннии самовидцы и свидетелие Слова воплощения, мира ловцы и сосуди Христовы благодати, Церкве пресветлыя звезды, вселенныя светильницы и проповедницы веры, яко лучами блистающии зарями духовными, всечестная двоенадесятице ученик Спаса Христа Бога, светоносную и преблаженную память вашу благочестно творим ныне. Вы же, яко Божественнаго света причастницы и дерзновение ко Христу имущии, молитеся Ему прилежно, да к свету богоразумия нас всех истинно наставит, в вере твердей укрепит и в мире глубоце соблюдет зовущих вам: Радуйтеся, апостолов двоенадесятице, мира концы учением Христовым просветившии.

Икос 1
Ангельскую службу воплощенному нас ради Божественному Слову приносяще, вселенную всю обтекосте, святии апостоли, яко богопосланнии вестницы грядущаго миру спасения. Темже словом истины Христовы от словес ваших озареннии и благодатию Святаго Духа спасеннии чрез веру, вси концы мира от дний древних и до днесь немолчно восхваляют вас сице:
Радуйтеся, вселенныя светильники; радуйтеся, благославнии трубы. Радуйтеся, твердыя веры проповедники; радуйтеся, учений небесных благовещаннии сказатели. Радуйтеся, церковнии столпи; радуйтеся, разорители идольския лести. Радуйтеся, избраннии понести пред языки Божественное имя. Радуйтеся, апостолов двоенадесятице, мира концы учением Христовым просветившии.

Кондак 2
Видяще Господа Славы, в зраке раба во плоти пришедшаго, и слышавше Того Предтечею свидетельствуема Агнца Божия быти, грех мира вземлющаго, вся в мире оставльше, вслед Того устремистеся, согласно вси поюще тако изволившему о вас Богу: Аллилуиа.

Икос 2
Разумнаго восхождения от дольних на горняя явили есте образ, богомудрии апостоли, егда домы, братию и имения своя во уметы вменили есте и востекли, себе отвергшеся, стезею правою к тесным вратом Царствия Христова. Того ради достойно слышите от всех сицевая:
Радуйтеся, вина раствореннаго премудростию Божией на трапезе духовней полезно вкусившии; радуйтеся, губительное безумие жизни привременныя по гласу, вы звавшему, без сумнения всякаго оставльшии. Радуйтеся, сокровище духовное на селе при пути вашем обретшии; радуйтеся, бисера добраго мыслию сердца вашего искавшии. Радуйтеся, на рало Христово руце ваша несумнительно и твердо волею своею возложшии. Радуйтеся, апостолов двоенадесятице, мира концы учением Христовым просветившии.

Кондак 3
Силою свыше укрепленнии, всемудрии апостоли, благоразумием вашим и огнем духовным всякую вражию прелесть попаливше, человеческий род верою просветили есте. Темже молим вы: омраченная грехми души наша просветите, да воспрянем еже пети Богу: Аллилуиа.

Икос 3
Имуще премудрость вселенную всю словом спасительным просветити, озарили есте во тьме и сени смертней седящия люди; просветите убо и наша души, омраченныя мраком страстей, да восхвалим вас тако:
Радуйтеся, светильницы востока мысленнаго, тьму неразумия прогнавшии верою; радуйтеся, напоившии землю струями Божественных вещаний. Радуйтеся, живоносным током словес Христовых орошающии нас бедствующих зноем скорбей; радуйтеся, возбраняющии лукавым помыслом омраченнаго сердца нашего. Радуйтеся, мрежею благодати из глубины потопляющих нас сует мира сего любовию всех, с верою взирающих к вам, возводящии. Радуйтеся, апостолов двоенадесятице, мира концы учением Христовым просветившии.

Кондак 4
Бурею внутреннею и волнами морскими иногда в корабли обуреваеми, святии апостоли, ко Христу вопиясте: «Учителю, спаси ны, погибаем!». Приявше же того всемогущую помощь, явистеся по благодати, вам данней, сами всех кормчии, к благотишному пристанищу надежно приводящии. И нас, в пучине зол бедне мятущихся и напастьми житейскими присно колеблемых, управите ко брегу безстрастия, идеже всеми спасаемыми поется Богу: Аллилуиа.

Икос 4
Слышавше от Пастыреначальника и Господа вашего призывающее слово: «Жатва убо многа, делателей же мало; молитеся убо Господину жатвы, яко да изведет делатели на жатву Свою», исполнишася, блаженнии апостоли, огнепальною ревностию сему делу Христову послужити, благословеннии на подвиг сей, обтекосте грады и веси многия, благовествующе Евангелие Царствия, исцеляя всяк недуг и всяку язю в людех. Умолите убо, яко вратарие Божественнаго Царствия, и нам спасение обрести, со умилением зовущим вам тако:
Радуйтеся, добрии вестницы Христовы, сослужебницы мысленным чином; радуйтеся, иже от рыбарей умудреннии паче риторов. Радуйтеся, трубы Христовы благогласнии, ко пристанищу спасения вся привлекшии; радуйтеся, Пастыря добраго богоизбранныя овцы, волков мысленных во овчую кротость верою преложившии. Радуйтеся, уста огнедухновенная Христовы, от уст имущаго поглотити нас врага избавляющии. Радуйтеся, апостолов двоенадесятице, мира концы учением Христовым просветившии.

Кондак 5
Боготечныя звезды, светлостьми Божественных добродетелей сияющии, явистеся, всехвальнии апостоли, яко солнце имуще, земныя концы обновисте. Светлым блистанием вашим убо и нас озарите и страстей избавите всех вопиющих Богу: Аллилуиа.

Икос 5
Видевше, апостоли святии, во образе человечестем Владыку мира и Сына Божия, усты первоверховнаго апостола Петра Христа проповедасте, и Той яко откровение Отчее исповедание ваше приемый. Сего ради и мы, во исповедании вашем утвердившеся, ублажаем вас тако:
Радуйтеся, богоозареннии исповедницы неизреченныя Божественныя славы воплотившагося Слова; радуйтеся, с небес приемшии благодать богословия Христова. Радуйтеся, мир вещании вашими соблюдшии; радуйтеся, яко от Самаго Господа ублажени бысте во исповедании вашем. Радуйтеся, яко от Него приясте Божественную власть вязати и решити грехи человеков. Радуйтеся, апостолов двоенадесятице, мира концы учением Христовым просветившии.

Кондак 6
Проповедание Владыки и Господа своего, яко подобает Ему много во Иерусалиме пострадати от старец, и архиерей, и книжник, и убиену быти, слышавше, дивистеся зело, недоумеюще, како сбудутся писания о славе и чести Сына Человеческаго. Вразумленнии же, яко не человеческою мыслию, но неисповедимою волею Отца Небеснаго путие вси в мире исправляются, научистеся смиренно пети Богу, благоволившему тако о Сыне своем: Аллилуиа.

Икос 6
Возсия солнца светлее на Фаворстей горе слава Божественнаго зрака Христова пред вами, святии апостоли, онем убо избранным, на гору совозшедшим. Темже Моисея и Илию видевше, во облак светел вшедшия, и глас Отчаго свидетельства о Единороднем Сыне с небес слышавше, толикия благодати небеснаго озарения сподобльшимся, усердно возглашаем сице:
Радуйтеся, в неприступнем свете Христа на Фаворе облиставшася зревшии; радуйтеся, от Отца свидетельствуема Сына Божия слышавшии. Радуйтеся, Моисея и Илию, явльших Христово Божество, на горе славы сретившии; радуйтеся, беседою тех о исходе Христа, во Иерусалиме быти хотящем, просвещеннии. Радуйтеся, премирныя славы Христовой сообщницы. Радуйтеся, апостолов двоенадесятице, мира концы учением Христовым просветившии.

Кондак 7
Хотя душепитательную уготовати миру трапезу Животворящаго Тела и Крове Cвоея Господь всех и Зиждитель, предъизобрази всесвятое свое заколение и безсмертия чашу в проповедании о хлебе жизни вечныя, и егда мнози слышавшии слово сие роптаху и блазняхуся и вспять идяху от Христа, вы, апостоли блаженнии, усты Симона Петра единомысленно рекосте: «Господи, к кому идем? Глаголы живота вечнаго имаши, и мы веровахом и познахом, яко Ты еси Христос, Сын Бога Живаго». Сие исповедание ваше ублажающе, тепле припадем ныне к Богу, поя Ему: Аллилуиа.

Икос 7
Новыя Божественныя Пасхи, не от Египта, но от Сиона грядущия, причаститися сподобистеся, богоблаженнии апостоли, и омысте нозе ваша от препоясаннаго лентием Владыки, смирения образ тем явившаго, собеседницы на Вечери Тайней Христа Господа бысте. Темже величаем вас сице:
Радуйтеся, в горницу Сионскую яко под сень небесную вшедшии; радуйтеся, честнаго омовения от Владыки Христа сподобленнии. Радуйтеся, заповедь Господню: да будет последним хотяй первым быти — из уст Учителя вашего приемшии; радуйтеся, Безкровныя Жертвы и словесныя службы великим Архиереем Завета Новаго, за весь мир приносимыя, участницы. Радуйтеся, руками чистыми и усты нескверными хлеб жизни и веселия Божественнаго чашу от рук Тайновершителя Господа вземшии. Радуйтеся, апостолов двоенадесятице, мира концы учением Христовым просветившии.

Кондак 8

Странное вещание своего Учителя и Господа, яко един от вас предатель имать быти, слышавша, смутистеся, святии апостоли, и скорбию и страхом одержими, «Кто есть сей?» Учителя вопрошасте. Егда же по малем часе сбытие слова сего страшнаго в сыне погибельнем яве открыся, духом сокрушенным принесосте Богу псалом: Аллилуиа.

Икос 8
Весь закон и пророцы, яже о Христе преднаписаша, того исполнение в честных страданиих, погребении, предивном восстании Спаса тридневнем и славнем видевше, глубину сия вся строившей премудрости Божественныя и разума не всю испытали есте тогда, бездну же судеб Господних не у постигли есте, зане просвещени Духом не бысте. Но в волю Христа Господа себе предавше, видением Того распята не соблазнистеся, воскресению достигосте, верно поклонистеся и научению Христову себе смиренно подклонисте, к послушанию веры и к разумению тайны любве Божественныя и нас, апостоли Христовы приведите, да поем вам тако:
Радуйтеся, яко не смутися сердце ваше, еже веровати в Бога распинаема; радуйтеся, яко не в соблазн и не в безумие, но во спасение силою Божиею видение Креста Господня прияли есте. Радуйтеся, не оставленнии сирыми по отшествии Владычнем; радуйтеся, рождие живоноснии лозы Христовой. Радуйтеся, яко о вас молитва Христова пролияся, да соблюдени будете от неприязни и священни во истину евангельскаго слова. Радуйтеся, апостолов двоенадесятице, мира концы учением Христовым просветившии.

Кондак 9
Всю скорбь и печаль отъя Христос от сердец вас, другов своих, многочастне и многообразне денми четыредесятми являяся вам по воскресении Своем, с вами же ядый и пияй, и всяко уверяя о Своем славнем возстании, да будете свидетелие Ему даже до последних земли. Темже радостию несказанною исполнени бывше и тайнам Царствия Божия наученнии, союзом любве связуеми, единодушно бысте вкупе, глаголюще: Аллилуиа.

Икос 9
Витийства земнаго превышшее таинство восхода Господа на облацех на небо от горы Масличныя, апостоли Христовы, зрети приведеннии, тамо многолюбезны дары научения последняго, яко от Владыки мира, от Христа получисте, премирное благословение от Него приясте, во Иерусалим возвратистеся с радостию велиею, выну благословяще Бога. Тако о вас благоволившему Промыслителю мира величия дающе хвалы, согласно приносим вам, воспевая сице:
Радуйтеся, мир от Господа, вседшаго на облаки небесныя, приявшии; радуйтеся, соединение горних с дольними в восходе Христове яве узревшии. Радуйтеся, с собором безплотных возносящася от земли на небо восхвалившии; радуйтеся, на горе восхождения Христова светообразному лица Его зраку последняя от земнородных боголепно поклонившиися. Радуйтеся, имже заповедь научити языки слову Христову дадеся. Радуйтеся, апостолов двоенадесятице, мира концы учением Христовым просветившии.

Кондак 10
Спасения путь ища обрести ученический лик, Тебе видя от земли взимаема, глаголаше: «Владыко, како ныне оставляеши рабы Твоя и камо идеши, рукама содержай концы?»; егда же услышасте Спаса, глаголюща: «Не оставлю вас, яже собрах, но послю вам Духа Пресвятаго; вы же, с высоты оболкшеся силою, идите во вся языки, глаголя вещания спасения». Темже убо в радости снидосте с горы Елеонския, славя Божественное вознесение Христово, творя: Аллилуиа.

Икос 10
Стены дома, идеже с Богоматерию апостоли святии беша, моляшеся о имени Христове, потрясеся свыше носиму дыханию бурну, егда в день пятидесятный, исполняя преждереченная, послал Христос Духа Святаго, иже и сошед на вы видом огненным, ужасом исполнь языков собрание; языки бо глаголющих кийждо свою беседу слышаше. Темже мы, наследницы тоя благодати, вас зарею богоначальною облистанных, апостоли богоноснии, славим:
Радуйтеся, яко по обетованию Христову яве крестистеся Духом Святым и огнем; радуйтеся, яко бысте жилище пречистей благодати. Радуйтеся, яко в вас естеством святыни своея вселися с небесе сила Духа, от Отца исходяща и в Сыне почивающа; радуйтеся, во гласе дыхания Духом восхищеннии провещати величия Божия. Радуйтеся, яко чрез ваша священныя главы огнь Утешителя Духа на землю сниде. Радуйтеся, апостолов двоенадесятице, мира концы учением Христовым просветившии.

Кондак 11

Пение благодарственное Святей и Живоначальней Троице в явлении Духа Святаго принесше, святии апостоли, радости и всякаго ведения исполнистеся и дерзновение приясте, многими знаменьми и чудесы Церкве доброе начало положисте и велиею силою воздасте свидетельство воскресению Господа Иисуса, поя Богу: Аллилуиа.

Икос 11
Светоподательное проповедание ваше со смиренномудрием и многими слезами и напастьми исполняшеся; внимаху же народи глаголемым от вас единодушно, слышаще и видяще знамения от рук ваших бывающая, и крещахуся мнози. Вы же Церкви утверждасте, от места к месту преходяще, да и иным градовом благовестится слово Божие. Сего труда вашего ради взываем вам сице:
Радуйтеся, союзом любве Христовой связаннии, любовь и мир Церквем заветом вечным положившии; радуйтеся, ига, егоже немощно бе понести, на выи ученик никакоже возложити восхотевшии. Радуйтеся, всем вся бывшии, да всяко спасутся нецыи; радуйтеся, посещати братию во всех градех, в нихже проповедасте Евангелие Христово, выну тщавшиися. Радуйтеся, нощми и денми люди паствы своея непрестанно учившии. Радуйтеся, апостолов двоенадесятице, мира концы учением Христовым просветившии.

Кондак 12
Благодати небесныя причастником и самовидцем Слова, еже по плоти Матере Его успение видети подобаше, еже на Ней таинство, яко не токмо Спасово от земли восхождение узрят, но и рождшия Его преставление свидетельствуют. Темже приспевшу дневи Богоматере отшествия отвсюду Богоначальным мановением апостоли собравшеся, Сиона достигше, и на небо предпослаша Вышшую Херувим, пение надгробное Пречистей творя Богокрасною песнию: Аллилуиа.

Икос 12
Поюще дивная дела ваша, болезнем и трудом евангельскаго благовестия дивящеся, честная ваша страдания почитаем, богоизбраннии апостоли: весь бо всюду мир проидосте, Евангелие Христово коленом всем, языком и странам проповедавше. Темже и мы славим вас вси:
Радуйтеся, мрежею словесною уловившии всякаго рода избранных; радуйтеся, ихже словом врата смерти отверзахуся и отдаяху затворенная мертвецы. Радуйтеся, Кровию Агнца от людей первенцы Богу купленнии; радуйтеся, имже храм скинии свидения на небесех предуготовася. Радуйтеся, Церкве Христовы великая славо. Радуйтеся, апостолов двоенадесятице, мира концы учением Христовым просветившии.

Кондак 13
О, всехвальнии и богоблагословеннии апостоли, Христом нареченнии Его друзи и служения Церкве наследницы, вышняго престола окрест обстоящии в неувядаемых венцех! Моление наше, любовию к вам ныне пролиянное, приемше, сотворите всех Богу молитву, да соблюдет Церковь Cвою святую во единомыслии и мире, пастырем ея дарует святыню имени Его ревностно исповедати и веры нелицемерней дерзновение показати. Разсеянныя же ветром суемудрия чада да соберет во единое Царство и да сподобит тамо во свете неприступнем с собором вашим Ему немолчно воспевати: Аллилуиа.

Сей кондак глаголи трижды. Также икос 1-й и кондак 1-й.

-------------------------------------------------------------------------------------------

Канон Собору Святых Славных и Всехвальных Двенадцати Апостолов (первый)
Припев: Святи́и апо́столи, моли́те Бо́га о на́с.
Память: 13 июля (30 июня ст. ст.)
Глас 4.

Пе́снь 1.
Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зныма Моисе́овыма рука́ма Амали́кову си́лу в пусты́ни победи́л е́сть.

Ли́к апо́стольский пе́ти ми́ жела́ющу, Христе́, моли́твами и́х, я́ко Бо́г, зарю́ Пресвята́го Ду́ха да́руй ми́ и све́т прему́дрости Твоея́.

Укре́пльшеся си́лою Твое́ю и благода́тию, Христе́, си́лу проти́вных вра́г разруши́ша честни́и Твои́ апо́столи, Богови́дцы бы́вше неоску́дным к Тебе́ манове́нием.

Исцеле́ния творя́ще, Влады́ко, Твои́м И́менем, язы́ческая совокупле́ния Твои́м позна́нием улови́ша сла́внии апо́столи и све́том Твои́м просвети́ша.

Прему́дрости Небе́сныя научи́вшеся, пресла́внии Христо́вы апо́столи, я́вственно, прему́дрии, обуи́сте многосло́вия нечести́вых поспеше́нием пропове́дания.

Богоро́дичен: От Тро́ицы Пребоже́ственныя Еди́наго, Пречи́стая, родила́ еси́, из Тебе́ пло́тию я́вльшагося по на́м, благоволе́нием ро́ждшаго И́, и де́йством Ду́ха Пресвята́го, Де́во Ма́ти.

Пе́снь 3.
Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Небе́сная и честна́я боговеща́юще на земли́ уче́ния, язы́ки о́гненными известву́юще, пропове́дницы Христо́вы, пре́дали есте́.

Показа́л еси́ небеса́ слове́сная – ученики́ Твоя́, Влады́ко, сла́ву Твою́ пове́дающия все́м конце́м.

Напи́сани бы́вше на Небесе́х и я́вльшеся Христу́ ссе́льницы, чту́щих ва́с любо́вию ны́не, прему́дрии, сохрани́те.

Богоро́дичен: Всели́выйся в на́с, И́же в Вы́шних живы́й, Пречи́стая, пло́ть бо прии́м от Тебе́ без се́мене, яви́ся.

Седа́лен, гла́с 4.
Всели́вшеся во Све́те Непристу́пнем, я́ко жили́ще Све́та су́щии, хра́м ва́ш святы́й просвеща́ете при́сно Боже́ственными пропове́дании. Те́мже ве́рою вопие́м: тьмы́ на́с избавля́йте, и вся́ческих бе́д, и лю́таго язы́ческаго наше́ствия, умоля́юще Зижди́теля, апо́столи.

Богоро́дичен: Я́ко Де́ву и еди́ну в жена́х, Тя́, без се́мене ро́ждшую Бо́га пло́тию, вси́ ублажа́ем, ро́ди челове́честии, О́гнь бо всели́ся в Тя́ Божества́ и я́ко Младе́нца млеко́м пита́еши Зижди́теля и Го́спода. Те́м, А́нгельский и челове́ческий ро́д, досто́йно сла́вим пресвято́е рождество́ Твое́ и согла́сно вопие́м Ти́: моли́ Христа́ Бо́га согреше́ний оставле́ние дарова́ти покланя́ющимся ве́рою пресвято́му рождеству́ Твоему́.

Пе́снь 4.
Ирмо́с: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Глаго́лов Боже́ственных апо́стол веща́ние огнеобра́зно про́йде вселе́нную всю́, ле́сти у́бо ве́щь попаля́ющее и просвеща́ющее благода́тию благочести́вых совокупле́ния.

Почерне́вший мра́ком безбо́жия ми́р Богозра́чная свети́ла просвети́ша заря́ми благода́ти, ученицы́ Госпо́дни, я́вльшеся сия́нием пропове́дания.

Свяще́нными заря́ми просвеще́ни мы́сленнаго Со́лнца, я́ко со́лнце, в ми́ре сия́ете, прехва́льнии, све́том Боже́ственным пре́лести мглу́ отгоня́юще.

Же́зл си́лы иму́ще, Кре́ст Тво́й, сла́ное жития́ самови́дцы Твои́, Сло́ве, мо́ре пресеко́ша, я́ко ко́ни, смуща́юще многобо́жия во́ды.

Богоро́дичен: Укра́шена разли́чным светоли́тием, Не́бо одушевле́нное Тебе́, Царя́ ца́рствующих, Христе́, Деви́ца Пречи́стая, ны́не я́ко Богоро́дица сла́вима е́сть.

Пе́снь 5.
Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Боже́ственныя Твоя́ и прему́дрым служи́тели све́т показа́л еси́ в ми́ре, Тебе́, Незаходи́маго Све́та, все́м возвеща́ющия.

И́же вся́ку доброде́тель я́вственно проше́дше, апо́столи, разли́чныя бесо́вския зло́бы сплете́ния разруши́сте.

Яви́ша на́м Тро́йческое сия́ние во еди́нстве Божества́, о́гненными язы́ки веща́юще апо́столи.

Богоро́дичен: Тя́ ору́жие непобеди́мое на враги́ предлага́ем, Тя́ утвержде́ние и наде́жду на́шего спасе́ния, Богоневе́сто, стяжа́хом.

Пе́снь 6.
Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися ра́ди ми́лости от ре́бр Твои́х исте́кшею Кро́вию.

Утверди́в ученики́ Твоя́, Спа́се, прему́дростию и чудесы́, си́льнейшия соде́лал еси́ е́ллинскаго буесло́вия, и си́х преле́стная разруши́ша веле́ния.

Боже́ственныя ре́ки прему́дрости напо́лниша спаси́тельных во́д удо́лия вся́ церко́вная, от исто́чник спаси́тельных струя́ми обога́щше.

Я́вльшеся живо́тныя зве́зды, прехва́льнии, разори́сте всю́ мра́чную пре́лесть светоза́рными сия́нии и Богоразу́мия све́т возсия́вше.

Богоро́дичен: Всю́ Тя, Голуби́цу соверше́нну и предо́бру, све́тлый обре́т кри́н и удо́льный цве́т, о Богома́ти, Жени́х мы́сленный в Тя́ всели́ся.

Конда́к, гла́с 2.
Ка́мень Христо́с ка́меня ве́ры прославля́ет све́тло, ученико́в преизря́дна, и с Па́влом ве́сь дванадесяточи́сленный собо́р дне́сь; и́хже па́мять соверша́юще ве́рно, си́х Просла́вльшаго прославля́ем.

И́кос:
Всечестну́ю и преблаже́нную па́мять ва́шу творя́щии ны́не, в пе́снех приле́жно вопие́м к ва́м: пресве́тлая и Богозра́чная свети́ла ми́ра, возлю́бленнии ученицы́ Христо́вы двана́десяте, я́ко иму́ще к Нему́ дерзнове́ние, моли́теся за ны́, ва́м бо дана́ е́сть благода́ть исцеле́ний и грехо́в проще́ния, приле́жно у́бо Его́ моли́те грехо́в и напа́стей изба́витися на́м, да еди́наго Человеколю́бца, ва́с просла́вльшаго, прославля́ем.

Пе́снь 7.
Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Сы́ны сотвори́в ученики́ Твоя́, И́же пре́жде естество́м Бо́г, любо́вию насле́дники показа́л еси́ оте́ческаго насле́дия, Преблаги́й, и ходи́ти с Тобо́ю, я́ко с Бо́гом и Влады́кою, изво́лил еси́.

Прему́дрости изли́тие, серде́чную широту́, язы́к доброглаго́лив, Сло́ве, пода́в Боже́ственным ученико́м Твои́м, посла́л еси́ пропове́дати Ева́нгелие Ца́рствия все́м конце́м.

Я́вльшеся, я́ко о́блацы Бо́жия све́та, апо́столи все́м одождева́ют во́ду животворя́щую, зову́ще: благослове́н еси́ в хра́ме сла́вы Твоея́, Го́споди.

Богоро́дичен: Преукраше́нна Бо́жиею сла́вою яви́лася еси́, Пречи́стая, еди́на от ве́ка Сло́во Бо́жие заче́ншая, Ма́ти Де́во: благослове́нна Ты́ в жена́х, Всенепоро́чная Влады́чице.

Пе́снь 8.
Ирмо́с: Ру́це распросте́р, Дании́л льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Боже́ственный прему́дрый ли́к апо́стол Христо́вых огне́м Ду́ха, я́коже пле́велы, попали́ша многоразли́чная бесо́вская чти́лища и ве́рных сердца́ просвети́ша, вопию́ще: благослови́те, вся́ дела́ Госпо́дня, Го́спода.

Согла́сно Боже́ственныя ученики́, Христо́вы апо́столы, и́же возгреме́вшия на́м Боже́ственная веле́ния, приста́нища ве́рных, благода́тели о́бщия челове́честву, Спа́су служи́тели почти́м.

Всечестны́я и вмести́тельныя сосу́ды доброде́телей, челове́ческия нача́тки, пропове́дания трубы́, пото́ки нетле́нныя жи́зни, богоно́сныя мо́лнии, исцеле́ний исто́чники, кра́сныя но́ги Ева́нгелия почти́м.

Богоро́дичен: По́лный Сы́й смиря́ется на́с ра́ди, да исполне́ния Его́ причасти́мся: в пречи́стое бо чре́во Твое́ вше́д Необыме́нный, от Оте́ческих не́др не отсту́пль, воплоти́ся. Те́м Тя́ вси́ благослови́м, Мари́е Богоневе́стная.

Пе́снь 9.
Ирмо́с: Ка́мень нерукосе́чный от несеко́мыя горы́ Тебе́, Де́во, краеуго́льный отсече́ся, Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Реши́ти плени́цы прегреше́ний вла́сть прие́мше от Влады́ки, Богови́дцы, воспева́ющих ва́с ми́лостивно грехи́ очи́стите и спасе́ния сподо́бите.

Вседухо́вную зарю́, су́щественно ва́м я́вльшуюся, вси́ восприя́сте, апо́столи сла́внии, в го́рнице научи́вшеся высо́ким пропове́данием и уче́нием, и ны́не досто́йно блажи́ми есте́.

Ва́м Христо́с ны́не, друго́м Свои́м почи́вшим, венцы́ подае́т неувяда́емыя и виде́ния Боже́ственнаго исполня́ет, Ему́же ны́не моли́теся Це́ркви вся́ спасти́.

Богоро́дичен: Пло́тию приити́ восхоте́в, украси́вый сло́вом вся́ческая в Тя́ всели́ся, еди́ну Святе́йшую все́х обре́т и Богоро́дицу показа́ и́стинную, Ма́ти Де́во.

Свети́лен.
Ученико́в всечестну́ю двоенадеся́тицу ра́достно восхвали́ти стеце́мся, ра́дуйтеся, и́же всю́ подсо́лнечную обше́дше и язы́ков уло́вльше злове́рныя чреды́, научи́вшеся Боже́ственным.

Сла́ва: Двоенадесяточи́сленный ли́к дне́сь восхва́лим, вси́ ве́рнии, я́ко утверди́вшеся от ни́х, и Христу́ возопие́м: моли́твами и́х, Спа́се, ми́р Тво́й умири́.

Богоро́дичен: Мы́ о Тебе́ хва́лимся, Богоро́дице, и к Бо́гу Тя́ и́мамы предста́тельство: простри́ ру́ку Твою́ святу́ю и сокруши́ враги́ на́ша, Твои́м низпосли́ рабо́м по́мощь от Свята́го.

Канон Собору Святых Славных и Всехвальных Двенадцати Апостолов (второй)

Припев: Святи́и апо́столи, моли́те Бо́га о на́с.
Память: 13 июля (30 июня ст. ст.)
Глас 4.

Пе́снь 1.
Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав, Изра́иль Амали́кову си́лу в пусты́ни победи́л е́сть.

Верхо́внейшаго апо́столов дне́сь, Петра́, я́ко предстоя́теля Христо́вы Це́ркве и первопресто́льника, Богодухнове́нными пе́сньми досто́йно воспои́м.

На ка́мени твоего́ Богосло́вия водрузи́ Влады́ка Иису́с Це́рковь непрекло́нну, в не́йже тя́, апо́столе Пе́тре, сла́вим.

Я́коже дре́вле, Христе́, десни́цею Твое́ю по воде́ пе́ша ходя́ща Петра́ спа́сл еси́, и мене́, потопля́ема бу́рею лю́тых напа́стей, спаси́, я́ко Милосе́рд.

Егда́ Све́т узре́л еси́, возсия́вший на Фаво́ре, со́лнечныя покрыва́ющий лучи́, све́том, су́щим от Све́та, озари́лся еси́, Пе́тре, и ве́рныя просвети́л еси́.

Три́жды отве́рглся еси́ Христа́, те́мже вопроше́нием трикра́тным исцеля́ет твое́ согреше́ние, Пе́тре пресла́вне, и утвержде́ние показу́ет мно́гих коле́блющихся.

Богоро́дичен: Ты́, Пресвята́я Богома́ти, похвала́ Христо́вых апо́столов была́ еси́, му́чеников же сла́ва и проро́ков основа́ние, те́мже, ве́рнии, Тя́ вси́ достодо́лжно велича́ем.

Пе́снь 3.
Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Воспои́м, ве́рнии, Петро́ва сро́дника, Андре́я, Христо́ва ученика́: То́й бо, мо́ре мре́жами испыта́в иногда́, ры́бы улови́, ны́не же вселе́нную тро́стию ло́вит креста́, и язы́ки от пре́лести обраща́ет ко Креще́нию, и, Христу́ предстоя́, про́сит ми́ра ми́ру и душа́м на́шим ве́лию ми́лость.

Я́ко Боже́ственнаго ученика́ и первозва́ннаго все́х Христо́вых ученико́в похваля́ем тя́ любо́вию, Андре́е апо́столе, и ве́рно вопие́м ти́: изба́ви па́ству твою́, е́йже от Бо́га вве́рился еси́, вся́кия ско́рби, и ну́жд, и вся́каго озлобле́ния.

Первозва́ннаго апо́стола Христо́ва, Ева́нгелия свята́го пропове́дника, Росси́йския страны́ Богодухнове́ннаго просвети́теля, Андре́я пресла́внаго пе́сньми восхва́лим.

Неизрече́нную Твою́ добро́ту Андре́й предуве́дев, Иису́се, сро́дника призва́ све́тле: Пе́тре единокро́вне, обрето́хом Месси́ю, в зако́не и проро́цех пропове́даннаго, гряди́, прилепи́мся и́стинно жи́зни.

Вожделе́вый креста́, Христо́в учениче́ Андре́е, получи́л еси́ кресто́м твои́м нетле́нное Ца́рство, к нему́же вся́ привле́кл еси́ кресто́м Боготаи́нники, насле́дство подая́й Богосло́вом Того́.

Богоро́дичен: Бо́га, Его́же родила́ еси́, Де́во Всенепоро́чная, моли́ о все́х, благоче́стно Тя́ чту́щих, с первозва́нным Андре́ем, улучи́ти Боже́ственнаго осия́ния Твоего́ Сы́на и стоя́ния избра́нных и святы́х, и́бо мо́жеши, я́ко хо́щеши.

И́н конда́к, гла́с 2.
Петра́, ве́рнии, ка́меня ве́ры, похва́лим и Па́вла Богому́драго, созыва́ют бо все́х пра́здновати ве́рою, собо́рне вку́пе вся́ двана́десяте, я́ко пропове́дники ве́ре, прося́ща грехо́в оставле́ния.

Седа́лен, гла́с 4:
Свети́ла в конце́х, ученики́ Твоя́, Христе́, яви́л еси́, сия́ющия душа́м, су́щим во тьме́, ра́зум Тво́й, Влады́ко, и, ле́сть и́дольскую те́х ра́ди омрачи́в, уче́ньми благоче́стия просвети́л еси́ ми́р. Те́х мольба́ми спаси́ ду́ши на́ша.

Сла́ва: Все́льшеся во Све́те непристу́пнем, я́ко жили́ще све́та су́щии, хра́м ва́ш святы́й просвеща́ете при́сно Боже́ственными пропове́дании. Те́мже ве́рою вопие́м: тьмы́ на́с избавля́йте, и вся́ческих бе́д, и лю́таго язы́ческаго наше́ствия, умоля́юще Зижди́теля, апо́столи.

Богоро́дичен: Я́ко Де́ву и еди́ну в жена́х, Тя́ без се́мене ро́ждшую Бо́га пло́тию, вси́ ублажа́ем ро́ди челове́честии, О́гнь бо всели́ся в Тя́ Божества́ и я́ко Младе́нца млеко́м пита́еши Зижди́теля и Го́спода. Те́м, а́нгельский и челове́ческий ро́д, досто́йно сла́вим пресвято́е рождество́ Твое́ и согла́сно вопие́м Ти́: моли́ Христа́ Бо́га согреше́ний оставле́ние дарова́ти покланя́ющимся ве́рою пресвято́му рождеству́ Твоему́.

Пе́снь 4.
Ирмо́с: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Апо́стол Христо́в бы́л еси́ избра́нный и Богосло́ву возлю́бленному бра́т единоро́дный, всехва́льне Иа́кове, испроси́ душа́м на́шим грехо́в оставле́ние.

Пропове́дник Христо́в бы́в, Боже́ственный Иа́кове, ты́, зва́н у́бо, ско́ро после́довал еси́, оте́ческую любо́вь презре́в и ве́чная измени́в теку́щими, те́мже неизрече́ннаго Небе́снаго насле́дия сподо́бился еси́, блаже́нне приснопа́мятне.

Све́тел тя́ о́блак Сло́ва, облиста́юща сла́вою обоже́на, на Фаво́рстей горе́ осени́, блаже́нне Иа́кове, и гла́с слы́шати Оте́ческий сподо́бился еси́, известву́яй Того́ Сыновство́.

Ве́рно торжеству́ем пречестну́ю па́мять твою́, Иа́кове сла́вне, не Алфе́ева тя́ сы́на, но я́ко апо́стола Христо́ва почита́юще. Те́мже, Влады́чню Престо́лу предстоя́, приле́жно моли́ся спасти́ся на́м.

Приими́, Богогла́се апо́столе Иа́кове, моле́бную пе́снь, ю́же ти́ прино́сим, твою́ празднуюіце пречестну́ю и пресве́тлую па́мять: изба́ви от грехо́в рабы́ твоя́, верхо́вный Христо́в апо́столе.

Богоро́дичен: Сове́та Вели́каго А́нгел, от Де́вы Ма́тере я́влься ми́ру, пло́ть прие́м, я́ко доброде́тельми укра́шена ученика́ тя́ показу́ет и Богогла́сника, Иа́кове, словеса́ Его́ вети́йствующа.

Пе́снь 5.
Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

От ры́барей лове́ц челове́ков и Богосло́в бы́л еси́, му́дре Иоа́нне, пренебре́г оте́ческую и мирску́ю любо́вь, Влады́це Сло́ву жела́нием Боже́ственных возсле́дуя.

Небе́сных ра́зум прии́м Богослове́снейше, Бо́га Сло́ва пропове́дал еси́: в нача́ле бе́ Сло́во, и Сло́во бе́ к Бо́гу, и Бо́г бе́ Сло́во – благовеству́я, науча́л еси́.

Я́коже мо́лния све́тлая, проходя́щи, вселе́нней, блаже́нне Иоа́нне, яви́лся еси́, чистоты́ све́тлостию, де́вства же блиста́нием и благоче́стия догма́ты ми́р просвеща́я, возлю́бленне Христу́ Бо́гу.

Гро́мов сы́н бы́в, челове́ком богосло́вил еси́, е́же в нача́ле бе́ Сло́во, апо́столе Иоа́нне, возлеги́й бо на пе́рси Влады́ки твоего́ и отту́ду поче́рп Богосло́вия струи́, тва́рь всю́ напая́еши.

Благове́стниче Иоа́нне, равноа́нгельне, де́вственниче, Богосло́ве, Богонауче́нне, правосла́вно ми́ру пречи́стое ребро́, кро́вь и во́ду источи́вшее, пропове́дал еси́, и́мже ве́чную жи́знь обрета́ем душа́м на́шим.

Богоро́дичен: Егда́ предста́ла еси́ с возлю́бленным ученико́м у Креста́ Сы́на Твоего́, услы́шала еси́ от Него́: се́ сы́н Тво́й. С ни́мже Тя́ вси́ пое́м, Богороди́тельнице Де́во.

Пе́снь 6.
Ирмо́с: Пожру́ Ти́ со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися ра́ди ми́лости от ре́бр Твои́х исте́кшею Кро́вию.

О́тчую тебе́ сла́ву Собо́ю показа́вый, Фили́ппе, ли́ку ученико́в тя́ Христо́с вчини́, твою́ прове́дый доброде́тель, Богоблаже́нне.

Тече́ние кра́сных твои́х но́г, Фили́ппе, возврати́в к ше́ствию Небе́сному, возше́л еси́, ра́дуяся, и, Тро́ице предста́в, во Отце́ ви́диши Сы́на и Ду́ха Боже́ственнаго, сего́ ра́ди ве́рою всесвяще́нную твою́ и Боже́ственную пра́зднуем па́мять.

Со апо́столы все́ми честны́ми, и проро́ки, и страстоте́рпцы, Фили́ппе, преподо́бными, иера́рхи и пра́ведными, с Богоро́дицею моли́ разреше́ние грехо́в мно́гих и прегреше́ний да́ти очище́ние ве́рою светоно́сную и Боже́ственную па́мять твою́ соверша́ющим.

Прече́стна тя́ Ка́меня живота́ ка́мень показа́, на не́мже созда́ Це́рковь Свою́, Варфоломе́е, апо́столе Госпо́день. Те́мже тя́ чти́м и ублажа́ем.

Кресто́м блаже́нную кончи́ну, сла́вне Варфоломе́е, прие́м, сообра́зен бы́л еси́ страсте́м Учи́теля твоего́ и прича́стник све́тлости, Боже́ственныя сла́вы, при́сно со А́нгелы Тому́ предстоя́ и неизрече́ннаго све́та сподобля́емь.

Богоро́дичен: Из Тебе́ па́че сло́ва Бо́г Сло́во роди́тися благоизво́ли пло́тию, Де́во, Ма́ти Чи́стая, ученика́ избра́в и служи́теля при́снаго, Варфоломе́я сла́внаго.

Конда́к, гла́с 2.
Ка́мень Христо́с ка́меня ве́ры прославля́ет све́тло, ученико́в преизря́дна, и с Па́влом ве́сь дванадесяточи́сленный собо́р дне́сь, и́хже па́мять соверша́юще ве́рно, си́х Просла́вльшаго прославля́ем.

И́кос:
Всечестну́ю и преблаже́нную па́мять ва́шу творя́щии ны́не, в пе́снех приле́жно вопие́м к ва́м: пресве́тлая и Богозра́чная свети́ла ми́ра, возлю́бленнии ученицы́ Христо́вы двана́десяте, я́ко иму́ще к Нему́ дерзнове́ние моли́тися за ны́, ва́м бо дана́ е́сть благода́ть исцеле́ний и грехо́в проще́ния, приле́жно у́бо Его́ моли́те грехо́в и напа́стей изба́витися на́м, да еди́наго Человеколю́бца, ва́с просла́вльшаго, прославля́ем.

Пе́снь 7.
Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Руко́ю любопы́тною Боже́ственная ре́бра испыта́в и гвозде́й я́звы, я́же Безсме́ртный на́с ра́ди подъя́т, и неве́рие преложи́в ра́достне во благове́рие, Фомо́, возопи́л еси́: Ты́ еси́ Бо́г мо́й и Госпо́дь.

Осия́н, апо́столе Фомо́, сла́вою Христо́вою, и, ребро́ животво́рное осяза́в, поче́рпл еси́ неизсле́димую Богосло́вия пучи́ну, и ми́р обогати́л еси́.

Христо́с, Вели́кое Со́лнце, лучу́ тя́ многосве́тлую во Инди́ю посыла́ет, мра́чную ле́сть, таи́нниче, вско́ре разгоня́юща, Фомо́, прему́дре апо́столе, и лю́ди просвеща́юща Тро́ицу почита́ти Боже́ственную, Е́юже вси́ сохраня́емся.

Пе́рвый Христо́во Ева́нгелие написа́в и всю́ просвети́в подсо́лнечную тва́рь, Матфе́й, зело́ прему́дрейший и Христо́в таи́нник изя́щный, ны́не почита́емь свяще́нными пе́сньми, все́м отпуще́ния грехо́в про́сит, любо́вию чту́щим Того́.

Евангели́ст от мыта́рства, я́ко после́дова Тебе́, Христе́, претвори́ся Богоглаго́ливый всеси́льною Твое́ю кре́постию, Матфе́й всеизря́днейший.

Богоро́дичен: Всепе́тую Де́ву написа́л еси́ Боже́ственными твои́ми словесы́, Творца́ все́х ро́ждшую, апо́столе Матфе́е, Ему́же вси́ пое́м: препе́тый отце́в Госпо́дь и Бо́г, благослове́н еси́.

Пе́снь 8.
Ирмо́с: Ру́це распросте́р, Дании́л льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Иу́до, бра́тия твоя́ тя́ похваля́ют, бра́та я́вльшася, и непщу́ема я́вльшагося пло́тию Сло́ва преве́чнаго, от Присносу́щнаго возсия́вшаго, от Нерожде́нна Роди́теля.

Апо́столе Иу́до, посыла́еши все́м челове́ком све́тлое и уче́ния ду́ха испо́лненно посла́ние, священноявле́нне, пречу́дне.

Иу́до, апо́столе Христо́в, учени́к бы́в вопло́щшагося Бо́га на́шего, от Него́же, я́ко овча́ посреде́ волко́в, вои́стинну посла́лся еси́, сло́вом твои́м си́х претворя́я злоче́стие ко благоче́стию и Боже́ственному разуме́нию Святы́я Тро́ицы. Те́мже восхваля́ем тя́.

Ре́вности тезоимени́т нарече́нный, Си́моне досточу́дне, ре́вностию поревнова́л еси́ по Го́споде Бо́зе Вседержи́тели.

Я́ко красны́, Си́моне, твои́ но́ги, благоле́пен е́сть и язы́к, глаго́лющ сла́ву Христо́ву, и научи́ зва́ти: Го́спода по́йте и превозноси́те во вся́ ве́ки.

Богоро́дичен: Вся́ А́нгелов во́инства, Предте́че Госпо́день, апо́столов двоенадеся́тице, святи́и вси́ с Богоро́дицею, сотвори́те моли́тву, во е́же спасти́ся на́м.

Пе́снь 9.
Ирмо́с: Тя́ Пресла́вную Неве́сту и Всесвяту́ю Богоро́дицу, Зижди́теля ро́ждшую неви́димых же и все́х ви́димых, пе́сньми велича́ем.

Ученико́в двоенадеся́тых яви́лся еси́, исполня́я ли́к блаже́нный, из него́же преда́тель себе́ отве́рг, приобре́те го́рькое удавле́ние, на Христа́ воздви́г пя́ту, тайновеща́телю Матфи́е чу́дне.

Светоза́рное, я́ко со́лнце, во ве́сь ми́р изше́дшее, веща́ние твое́ просвеща́ет язы́ческую Це́рковь благода́тию, чудоно́сче Матфи́е апо́столе.

Излия́ся благода́ть во устна́х твои́х, сла́вне апо́столе Матфи́е, и бы́л еси́ свети́льник Це́ркве Христо́вы, уча́ слове́сныя о́вцы ве́ровати в Τрόицу Единосу́щную и во Еди́но Божество́.

Досади́тель и гони́тель Це́ркве бы́л еси́, Па́вле, всеблаже́нне, с Небесе́ же зва́н бы́в, защити́л еси́ сию́ пресла́вно, е́йже ны́не моли́ изба́витися от бе́д и спасти́ся душа́м на́шим.

Па́вле, уста́ Госпо́дня, основа́ние уче́ний, иногда́ у́бо гони́тель Иису́са Спа́са, ны́не же и первопресто́льник апо́столов бы́в, блаже́нне. Те́мже неизглаго́ланная ви́дел еси́, му́дре, да́же до тре́тияго Небесе́ возше́д, и взыва́л еси́: прииди́те со мно́ю, и благи́х не лиши́мся.

Богоро́дичен: Со святы́ми А́нгелы, с Боже́ственными апо́столы, со сла́вными му́ченики Твоего́ моли́ Сы́на и Бо́га, Богороди́тельнице Пречи́стая, от бе́д изба́вити ду́ши на́ша.

Свети́лен.
Ученико́в всечестну́ю двоенадеся́тицу ра́достно восхвали́ти стеце́мся: ра́дуйтеся, и́же всю́ подсо́лнечную обше́дше и язы́ков уло́вльше злове́рныя чреды́, научи́вшеся Боже́ственным.

Сла́ва: Двоенадесяточи́сленный ли́к дне́сь восхва́лим, вси́ ве́рнии, я́ко утверди́вшеся от ни́х, и Христу́ возопие́м: моли́твами и́х, Спа́се, ми́р Тво́й умири́.

Богоро́дичен: Мы́ о Тебе́ хва́лимся, Богоро́дице, и к Бо́гу Тя́ и́мамы предста́тельство, простри́ ру́ку Твою́ святу́ю и сокруши́ враги́ на́ша, Твои́м низпосли́ рабо́м по́мощь от Свята́го.

Комментарии

Комментарии не найдены ...
Добавлять комментарии могут только
зарегистрированные пользователи!
 
Имя или номер: Пароль:
Регистрация » Забыли пароль?
© LogoSlovo.ru 2000 - 2019, создание портала - Vinchi Group & MySites