Акафист и Канон святым девяти мученикам Кизическим.

Девять мучеников Кизических
Акафист святым девяти мученикам Кизическим
Память: 12 мая (29 апреля ст. ст.)

Конда́к 1.

Избра́нии от Царя́ Си́л, Го́спода Иису́са, страстоте́рпцы Христо́вы девяточи́сленнии, от разли́чных стра́н в гра́де Ки́зице во еди́но со́браннии и Христа́ дерзнове́нне, му́к и сме́рти не убоя́вшеся, испове́давшии, торжеству́ем духо́вне во святе́м пра́зднице ва́шем и, воспева́юще благода́тную терпе́ния ва́шего до́блесть, мо́лим ва́с, во́и Христо́вы многострада́льнии и утвержде́ннии в во́ле Христо́вой, и на́м спасе́ния испроси́те, зову́щим:

Ра́дуйтеся, прехва́льнии му́ченицы Христо́вы девяточи́сленнии.

И́кос 1.
Я́ко А́нгели преми́рнии, возне́сшеся мы́слию от земны́х к небе́сным, ко Христу́, Влады́це все́х, непреста́нно ве́ры очи́ма взира́юще, му́ченицы святи́и, Феогни́де, Ру́фе, Антипа́тре, Феости́хе, Арте́мо, Ма́гне, Феодо́те, Фавма́сие, Филимо́не, посреде́ кумирослужи́телей гра́да Кизи́ческаго испове́дасте себе́ безбоя́зненно христиа́ны бы́ти и, си́лою Бо́жиею укрепля́еми, мно́гия му́ки му́жественне за Христа́ претерпе́сте и под ме́ч главы́ ва́ша преклони́сте, те́мже, ублажа́юще страда́ния ва́ша и усекнове́ние, глаго́лем:

Ра́дуйтеся, земны́я ра́дости презре́вшии;

Ра́дуйтеся, бла́г небе́сных возжела́вшии.

Ра́дуйтеся, испове́дницы Христо́вы непобеди́мии, ве́ру непоро́чну соблю́дшии;

Ра́дуйтеся, стра́сти Христо́ве после́довавшии и сме́рть Христо́ву сме́ртию свое́ю подража́вшии.

Ра́дуйтеся, си́лою Воскре́сшаго держа́ву а́дову попра́вшии;

Ра́дуйтеся, души́ своя́ в ру́це Бо́жии преда́вшии и побе́дныя венцы́ прие́мшии.

Ра́дуйтеся, прехва́льнии му́ченицы Христо́вы девяточи́сленнии.

Конда́к 2.
Ви́дяще и́долов по́лн су́щь гра́д Кизи́ческий, вы́, о богому́дренное му́чеников Христо́вых сочета́ние девяточи́сленное, возмути́стеся ду́хом и, ре́вностию о Бо́зе горя́ще и благода́тию Боже́ственною укрепля́еми, нача́сте провещава́ти и учи́ти о и́мени Го́спода Иису́са, заблужде́ние и́дольское облича́юще; лю́дие же, тьмо́ю неве́рия ослепле́ннии, взя́ша ва́с а́бие и свя́занных, а́ки злоде́ев, гра́дскому в Ки́зице кня́зю на истяза́ние предста́виша; вы́ же ста́сте пред нечести́вым князе́м и, обо́лкшеся во вся́ ору́жия Бо́жия, я́ко во́ини Христо́вы ве́рнии, ника́коже отступи́сте от взбра́ннаго Воево́ды, Го́спода своего́, взыва́юще Ему́: Аллилу́иа.

И́кос 2.
Разуме́вше, я́ко претерпе́вый до конца́, то́й спасе́н бу́дет, терпе́нием теко́сте, страстоте́рпцы Христо́вы, на предлежа́щий ва́м по́двиг, взира́юще на Нача́льника ве́ры и Соверши́теля Иису́са, и му́ки и терза́ния теле́с ва́ших претерпе́ли есте́, ра́дующеся и красу́ющеся ра́нами, я́же подъя́ли есте́ за любо́вь ко Го́споду ва́шему, те́мже:

Ра́дуйтеся, я́ко Христа́ Го́спода, за ны́ ду́шу Свою́ на Кресте́ положи́вшаго, и вы́, святи́и му́ченицы, взаи́м возлюби́сте;

Ра́дуйтеся, я́ко потща́стеся Тому́ бы́ти подо́бны му́к терпе́нием.

Ра́дуйтеся, страда́ния и му́ки в торжество́ ве́ры обрати́вшии;

Ра́дуйтеся, Христа́ ра́ди излия́вшимися кро́вию просла́вленнии.

Ра́дуйтеся, я́ко блаже́нна земля́, напои́вшаяся кро́вию ва́шими;

Ра́дуйтеся, я́ко ду́ши своя́ любо́вию за Христа́ положи́сте.

Ра́дуйтеся, прехва́льнии му́ченицы Христо́вы девяточи́сленнии.

Конда́к 3.

Си́лою Бо́жиею укрепля́емии, му́ченицы девяточи́сленнии преди́внии, не убоя́стеся преще́ний злове́рнаго кня́зя Кизи́ческаго, ниже́ ко́зней неви́димаго кня́зя ми́ра сего́, но свиде́тельствовасте о Христе́ Иису́се, усты́ ва́шими испове́дающе Того́ и́стиннаго бы́ти Бо́га, То́й бо даде́ ва́м уста́ и прему́дрость, и́мже не можа́ше что́ проти́ву отвеща́ти мучи́тель, но посрамля́шеся, и́стиною побежда́емый, еще́ же и страда́ньми ва́шими свиде́тельствовасте все́ ва́ше к Бо́гу жела́ние, и ужаса́хуся лю́дие, ви́дяще ва́ше до́блественное терпе́ние, и познава́ху на ва́с си́лу и по́мощь всеси́льнаго Бо́га, Ему́же взыва́сте: Аллилу́иа.

И́кос 3.
Иму́ще в па́мяти словеса́ Госпо́дня: и вла́с главы́ ва́шея не поги́бнет, ве́ровасте та́ко: не то́кмо власы́, Христа́ ра́ди терза́емии, це́ли явя́тся во сла́ве воскресе́ния, но и са́мое те́ло, ра́ны и раздробле́ние за Христа́ претерпе́вшее, це́ло воста́нет со сла́вою мно́гою. Сего́ ра́ди, страстоте́рпцы Христо́вы досточу́днии, ве́рою укрепля́еми и о наде́жде сла́вы Бо́жия хва́лящеся, до́брое тече́ние му́ченическаго по́двига соверши́сте и ду́ши своя́ святы́я в ру́це Бо́га преда́сте, те́мже и мы́ возно́сим ва́м сия́ пе́сненныя хвалы́:

Ра́дуйтеся, пречу́дное му́жество яви́вшии;

Ра́дуйтеся, я́ко наде́ждою воскресе́ния Христо́с непобеди́мы ва́с пред мучи́тели сотвори́.

Ра́дуйтеся, я́ко Христо́с преобрази́т те́ло смире́ния ва́шего, во е́же бы́ти сему́ сообра́зну те́лу сла́вы Его́;

Ра́дуйтеся, ве́чныя блаже́нныя жи́зни соприча́стницы.

Ра́дуйтеся, я́ко со А́нгелы пе́снь побе́дную воспева́ете.

Ра́дуйтеся, прехва́льнии му́ченицы Христо́вы девяточи́сленнии.

Конда́к 4.
Мучи́мый за святу́ю ве́ру во и́мя Христа́ Го́спода, бу́ря искуше́ний и бе́д возшуме́ на тя́, Феогни́де, но не возмо́же поколеба́ти хра́мины души́ твоея́, основа́на бо бе́ на Ка́мени, И́же е́сть Христо́с, Сы́н Бо́га Жива́го; егда́ бо приведо́ша тя́ к кня́зю гра́дскому на суди́ще, тебе́, во свиде́тельство мучи́телем, ни темни́ца, ни жесто́кая бие́ния и ра́ны не отверго́ша от Христа́, но, по земле́ протяже́нный и неща́дно жи́лами бие́мый и ногтьми́ желе́зными стружа́емый, в страда́нии кре́пок и му́жествен яви́лся еси́, струя́ми же крове́й свои́х, я́ко багряни́цею, оде́явся и серде́чное о́ко к Бо́гу впери́в, воспева́л еси́ Ему́: Аллилу́иа.

И́кос 4.
Слы́шавше гро́зное повеле́ние влады́ки нечести́ваго, да отве́ргшеся Христа́, же́ртвы принесе́те и́долом, ви́дяще же мучи́тельская ору́дия, угото́ванная на вы́, страстоте́рпцы достосла́внии, помы́слисте де́нь втора́го прише́ствия на зе́млю Влады́ки Христа́ и нестерпи́мый гне́в суда́ Его́, егда́ прии́дет во сла́ве Свое́й с небе́с и вси́ святи́и А́нгели с Ни́м; сего́ ра́ди, во́ини Христо́вы, неодоле́ннии в терпе́нии мно́зе, преда́стеся на ра́ны и му́ки Ца́рствия ра́ди Небе́снаго, приими́те у́бо от на́с хвале́бныя пе́сни сия́:

Ра́дуйтеся, помяну́вшии словеса́ Госпо́дня: отве́ргшийся Мене́ пред челове́ки, отве́ржен бу́дет пред А́нгелы Бо́жиими;

Ра́дуйтеся, внима́вшии глаго́ланным от Христа́: не убо́йтеся от убива́ющих те́ло, души́ же не могу́щих уби́ти, убо́йтеся же па́че могу́щаго и ду́шу, и те́ло погуби́ти в гее́нне.

Ра́дуйтеся, ре́кшии са́ми себе́: мучи́тельства я́рых челове́к вре́менна су́ть, му́ки же гее́нския ве́чны; да избу́дем му́к ве́чных, вре́менных убоя́тися не и́мамы;

Ра́дуйтеся, раби́ Христо́вы, ве́рнии да́же до сме́рти, и́мже возда́ст Госпо́дь вене́ц живота́.

Ра́дуйтеся, я́ко на стра́шнем суди́щи Госпо́дь су́щим одесну́ю сопричте́т ва́с и ча́сти возлюби́вших Его́ сподо́бит;

Ра́дуйтеся, и́мже рече́т Ца́рь Сла́вы: прииди́те, благослове́ннии Отца́ Моего́, насле́дуйте угото́ванное ва́м Ца́рствие от сложе́ния ми́ра.

Ра́дуйтеся, прехва́льнии му́ченицы Христо́вы девяточи́сленнии.

Конда́к 5.
Боготе́чная звезда́, путеводя́щая к Со́лнцу Пра́вды Христу́ Бо́гу, яви́лся еси́, святы́й му́чениче Ру́фе, и све́том по́двига твоего́ страда́льческаго возсия́л еси́ лю́дем, во тьме́ неве́рия седя́щим, си́ла бо благода́ти Госпо́дни в не́мощи твое́й соверша́шеся. Сего́ ра́ди, свя́занный по рука́ма и нога́ма, безче́стие и поруга́ние претерпе́л еси́, на му́ки дерзну́л еси́ и жи́зни не пощади́л еси́ за Го́спода своего́, но, же́злием и бичи́ узла́ты же́стоко бие́н и огне́м опаля́ем, взыва́л еси́ к Нему́ велегла́сно: Аллилу́иа.

И́кос 5.
Ви́девше себе́ в у́зах стра́ждущия за и́мя Го́спода Иису́са Христа́, Его́же возлюби́сте и в Него́же ве́ровасте, вы́, страда́льцы Христо́вы девяточи́сленнии, Ду́хом Святы́м в ско́рби ва́шей и тесноте́ темни́чней утеша́еми, ра́дующеся, дру́г ко дру́гу глаго́ласте: пло́ти и кро́ви не пощади́м, ста́нем небоя́зненно ко вся́кому муче́нию, у́мрем о Христе́, да во вся́ ве́ки поживе́м с Ни́м, лику́юще непреста́нно. Те́мже, по́двиги ва́ша чу́дныя сла́вяще, восхваля́ем ва́с си́це:

Ра́дуйтеся, сердца́ ва́ша в ру́це Бо́жии положи́вшии;

Ра́дуйтеся, благода́ти Свята́го Ду́ха избра́нии сосу́ди.

Ра́дуйтеся, прекра́сное Ду́ха Свята́го жили́ще;

Ра́дуйтеся, пра́вду, ми́р и ра́дость о Ду́се Свя́те стяжа́вшии.

Ра́дуйтеся, ве́чныя на́м ра́дости благоприя́тнии хода́таи;

Ра́дуйтеся, Ду́хом Влады́чним утвержде́ннии, И́мже ра́дость спасе́ния о Го́споде даде́ся.

Ра́дуйтеся, прехва́льнии му́ченицы Христо́вы девяточи́сленнии.

Конда́к 6.

Пропове́дник Христо́ва на́с ра́ди страда́ния яви́лся еси́, му́чениче святы́й Антипа́тре, к столбу́ бо привяза́нный и терно́вными розга́ми бие́н зло́бными мучи́тели, сообра́зен бы́л еси́ Христу́ Го́споду, венце́м от те́рния увенча́нну. Сего́ ра́ди ко Христу́ взира́л еси́, на́с ра́ди уя́звленному и поруга́нному, и, терпя́ за Него́ мно́гия му́ки, я́коже и То́й претерпе́ за ны́, воспева́л еси́ Ему́, Влады́це твоему́, от любве́ кре́пкия: Аллилу́иа.

И́кос 6.
Возсия́сте, святи́и девяточи́сленнии страстоте́рпцы, в гра́де Ки́зице све́точ доброде́телей христиа́нских, я́ко светоно́сных зве́зд схожде́ние, и просвети́сте но́щь глубо́кую идолослуже́ния. Христо́с бо Госпо́дь ма́нием Свои́м Боже́ственным посла́ ва́с, я́ко о́вцы посреде́ волко́в; вы́ же А́гнцу Христу́, во́лею закла́нному за ми́р Сы́ну Бо́жию, и́стиннии после́дователие показа́стеся, му́дростию Бо́жиею, я́же о Ду́се Свя́те, просвеща́емии, уразуме́сте мимоходя́щую жи́знь и неради́сте о му́ках, ве́чныя ра́ди жи́зни пра́вую ве́ру соблюдо́сте, о чесо́м удивля́ющеся, вопие́м к ва́м си́це:

Ра́дуйтеся, я́ко по сло́ву Госпо́дню, му́дри я́ко зми́я, му́дри во благо́е, и це́ли я́ко го́лубие, прости́ во зло́е, бы́сте;

Ра́дуйтеся, я́ко подо́бящеся Христу́, И́же кро́ток бе́ и смире́н се́рдцем, и вы́ доса́ды и укоре́ния кро́тце претерпе́сте.

Ра́дуйтеся, я́ко в злострада́ниих не проти́вистеся озлобля́вшим ва́с, но во смире́нии ва́шем я́ко о́вцы на заколе́ние ведо́стеся;

Ра́дуйтеся, я́ко доброде́телем Христо́вым подража́сте в житии́ свое́м.

Ра́дуйтеся, а́гнцы, Христу́ себе́ в же́ртву прине́сшии;

Ра́дуйтеся, и́хже Христо́с ублажи́ и насле́дники земли́ живы́х показа́.

Ра́дуйтеся, прехва́льнии му́ченицы Христо́вы девяточи́сленнии.

Конда́к 7.
Хотя́ вра́г спасе́ния ро́да челове́ческаго устраши́ти тя́, небоя́зненнаго во́ина Христо́ва, страстоте́рпче святы́й Феости́хе, подви́же на гне́в и я́рость злочести́ваго кня́зя гра́да Ки́зика, и́же повеле́ лю́те му́чити тя́; ты́ же, бие́н бы́в па́лицами без пощаде́ния, чрепы́ стро́ган и рожны́ избоде́н, благодари́л еси́ Христа́, я́ко сподо́би тя́ муче́ния страда́ти, сла́вы ра́ди и́мене Его́ свята́го. Си́лою Бо́жиею укрепля́ем, отрази́л еси́ сове́т неви́димаго врага́ и ве́рно воспева́л еси́ Бо́гу: Аллилу́иа.

И́кос 7.
Ди́вный Христо́с Бо́г и прославля́яйся во святы́х Свои́х, дарова́ ва́м, му́ченицы, не то́кмо единому́дренне в Него́ ве́ровати, но и ходи́ти единомышле́нием в до́брем испове́дании Божества́ Его́ и по Не́м страда́ти. Христо́с бо собра́ ва́с, пресве́тлое му́ченическое во́инство, в собо́р му́чеников еди́н, в Це́рковь Бо́га Жи́ва, и пребы́сть с ва́ми, те́мже ра́достно прино́сим ва́м такова́я:

Ра́дуйтеся, я́ко и ва́м рече́ Госпо́дь во Ева́нгелии: иде́же еста́ два́ или́ трие́, со́брани во и́мя Мое́, ту́ е́смь посреде́ и́х;

Ра́дуйтеся, я́ко и ва́с уте́ши ева́нгельским глаго́лом: в ми́ре ско́рбни бу́дете, но дерза́йте: А́з победи́х ми́р.

Ра́дуйтеся, я́ко и ва́м обетова́, глаго́ля: се́ А́з с ва́ми е́смь во вся́ дни́ до сконча́ния ве́ка;

Ра́дуйтеся, я́ко даде́ся ва́м побе́да Го́сподем на́шим Иису́сом Христо́м.

Ра́дуйтеся, я́ко благода́тию Бо́жиею укрепля́еми, проти́витися мучи́телем, па́че же и все́й диа́вольстей си́ле, возмого́сте;

Ра́дуйтеся, я́ко Христо́с Бо́г бы́сть ва́м сто́лп кре́пости от лица́ вра́жия.

Ра́дуйтеся, прехва́льнии му́ченицы Христо́вы девяточи́сленнии.

Конда́к 8.
Странноужа́сную и жесто́кую ше́ствовал еси́ стезю́, Арте́мо, му́чеником сла́во, к колеси́ привяза́нный и с верху́ горы́ до́лу низпуще́нный, я́ко у́ди твои́ сокруши́шася. Пу́ть же твоего́ страда́ния подо́бно све́ту све́тится, Све́та Незаходи́маго луча́ми озаре́н, зане́ на Го́спода взира́л еси́, мы́слию и любо́вию ко Христу́ привя́зан. Христо́с бо Си́ла, Бо́г и Госпо́дь, Ему́же взыва́л еси́, страстоте́рпче: Аллилу́иа.

И́кос 8.
Ве́сь со́нм ва́ш, му́ченицы святи́и девяточи́сленнии, наде́ястеся на Христа́ Бо́га на́шего, я́ко и́мать с высоты́ смотре́ти на по́двиг ва́ш со мно́жеством святы́х А́нгелов и помога́ти ва́м, немощны́м, бу́дет. Ве́рен же Бо́г, И́же не оста́ви ва́с искуси́тися па́че, е́же мого́сте, но сотвори́ со искуше́нием и избавле́ние, я́ко возмощи́ ва́м понести́, те́мже приими́те от на́с похвалы́ сия́:

Ра́дуйтеся, я́ко Бо́г уте́ши ва́с во вся́кой ско́рби ва́шей;

Ра́дуйтеся, зане́ я́коже избы́точествоваху страда́ния Христо́ва и ва́с, та́ко Христо́м избы́точествова и утеше́ние ва́ше.

Ра́дуйтеся, я́ко си́ла Христо́ва всели́ся в вы́, сего́ ра́ди вся́ возмого́сте о укрепля́вшем вы́ Иису́се Христе́;

Ра́дуйтеся, я́ко любы́ Бо́жия излия́ся в сердца́ ва́ша Ду́хом Святы́м и дарова́ ва́м упова́ние сла́вы Бо́жия непосты́дное.

Ра́дуйтеся, я́ко Госпо́дь Си́л, Помо́щник в ско́рбех, с ва́ми бы́сть, и ничто́же возмо́же ва́с разлучи́ти от любве́ Бо́жия;

Ра́дуйтеся, я́ко ду́ши ва́ша, я́ко пти́цы, изба́вишася от се́ти ловя́щих и возлете́ша в прекра́сная селе́ния ра́йская.

Ра́дуйтеся, прехва́льнии му́ченицы Христо́вы девяточи́сленнии.

Конда́к 9.
Все́ те́ло твое́ уя́звенно до косте́й име́л еси́, до́брый страда́льче Ма́гне, егда́ мучи́тель, обнажи́в тя́, на земли́ простре́ и бия́ше по хребту́ без ми́лости и по чре́ву надо́лзе, та́же клеща́ми разжже́нными терза́ше тя́. Госпо́дь же, неви́димою си́лою тебе́ сопрису́тствуя, облегчава́ше боле́зни твоя́ и утвержда́ше се́рдце твое́ в терпе́нии и любви́ Боже́ственней, те́мже в му́ках воспева́л еси́ Христу́ Бо́гу: Аллилу́иа.

И́кос 9.
Вити́и многовеща́ннии не возмо́гут изрещи́ ва́м досто́йныя хвалы́, му́ченицы Христо́вы девяточи́сленнии, мече́м бо преклони́сте вы́и Христа́ ра́ди, прекло́ньшаго небеса́ и соше́дшаго, и излия́сте кро́вь ва́шу, о́бщницы Сего́ страсте́й бы́вше. Мы́ же, недосто́йнии, сия́ пе́сненныя да́ры прино́сим ва́м, глаго́люще:

Ра́дуйтеся, Христо́с бо даде́ ва́м ча́шу Свою́ пи́ти и креще́нием, и́мже Са́м крести́ся, крести́тися;

Ра́дуйтеся, я́ко пред очи́ма су́ть Бо́жиима путие́ и по́двизи ва́ши.

Ра́дуйтеся, Христа́ вседу́шно возлюби́вшии;

Ра́дуйтеся, я́ко со Христо́м пострада́сте, да с Ни́м и просла́витеся.

Ра́дуйтеся, ве́чную сла́ву и одея́ние нетле́ния от Него́ прие́мшии;

Ра́дуйтеся, я́ко сокро́вища небе́сная ва́с прия́ша, я́ко пшени́цу зре́лу.

Ра́дуйтеся, прехва́льнии му́ченицы Христо́вы девяточи́сленнии.

Конда́к 10.
Спасти́ прише́дшаго ми́р, любо́вию Сы́на Бо́жия разжига́ем, Феодо́те му́чениче, огня́ си́льнейший яви́лся еси́. На сковраду́ па́льну, вельми́ разжже́нну, на́г возложе́нный, та́же в клоко́чущий коно́б вве́рженный, опале́ние и му́ку го́рькую до́блественне презре́л еси́; от любве́ же Христо́вы ника́коже разлучи́вся, Тому́ пе́л еси́ умиле́нно: Аллилу́иа.

И́кос 10.
Царю́ Преве́чному, Христу́ во все́м послушли́ви бы́вше, му́ченицы многострада́льнии, от разли́чных ме́ст и стра́н в Ки́зице собра́стеся во еди́но, и, во гра́д вше́дше, Христа́ Сы́на Бо́жия, во пло́ти прише́дшаго, пропове́дасте, сла́внии, и без стра́ха сло́во Бо́жие глаго́ласте. Егда́ же лю́дие гра́да Ки́зика благовествова́ния Христо́ва не прия́ша, ва́с же му́кам и ка́знем и лю́тей сме́рти преда́ша, вы́, благове́стницы Бо́жии, исходя́ще отту́да не те́лом, но душе́ю, не пра́х, приле́пший ва́м от гра́да, оттрясо́сте и́м от но́г ва́ших, но бре́нная телеса́ ва́ша, за благове́стие Христа́ уму́ченная, оста́висте во свиде́тельство на ня́ в де́нь су́дный, те́мже благогове́йно взыва́ем ва́м:

Ра́дуйтеся, ва́шими христопосле́довательными стопа́ми во гра́д Кизи́к ше́ствовавшии;

Ра́дуйтеся, Ева́нгелия Христо́ва благове́стницы.

Ра́дуйтеся, я́ко Бо́га воплоще́нна пропове́дасте;

Ра́дуйтеся, я́ко му́ки, о́гнь и ме́чное усече́ние за Него́ в сла́дость вмени́сте.

Ра́дуйтеся, я́ко лю́дем, и́же не прия́ша вы́, ниже́ послу́шаша ва́с, во свиде́тельство по́двига ва́шего, во спасе́ние и́х подъя́таго, телеса́ ва́ша честна́я оста́висте;

Ра́дуйтеся, я́ко тече́ние му́ченическаго по́двига до́бре сконча́сте, ве́ру соблюдо́сте, про́чее соблюде́тся ва́м вене́ц пра́вды.

Ра́дуйтеся, прехва́льнии му́ченицы Христо́вы девяточи́сленнии.

Конда́к 11.
Пе́ние прино́сим, Фавма́сие, тебе́, му́чениче. Душа́ твоя́ яви́ кре́пкое терпе́ние и по́двига до́блесть, приложи́ша бо тебе́ неми́лостивии мучи́телие ра́ны к ра́нам и боле́зни к боле́знем, и́бо ноже́м избожда́ху и ре́заху пло́ть твою́, еще́ же и копие́м ре́бра твоя́ лю́те пронзи́ша. Ты́ же, му́чениче Фавма́сие, сообра́зен бы́в Христу́ Го́споду, на Кресте́ от еди́наго из во́инов копие́м в ре́бра прободе́нному, глаго́лал еси́, ра́дуяся и сла́вя Бо́га: Аллилу́иа.

И́кос 11.
Светоприе́мная богосия́нная свеща́ су́щим во тьме́ неве́рия и многобо́жия и́дольскаго яви́шася нетле́нная телеса́ ва́ша, святи́и девяточи́сленнии му́ченицы. Егда́, воцари́вшуся вели́кому Константи́ну, преста́ гоне́ние и све́т благоче́стия возсия́ по вселе́нней, тогда́ бо в Ки́зице, в хра́ме ва́шем, мно́гая чудеса́ и исцеле́ния от святы́х моще́й ва́ших бы́ша, и того́ ра́ди мно́жество наро́да неве́рнаго обраща́хуся ко Христу́. Те́мже в похвалу́ ва́шу зове́м:

Ра́дуйтеся, я́ко лю́дие гра́да Ки́зика, зря́ще благода́ть Бо́жию, в многоцеле́бных моще́х ва́ших чудоде́йствующую, прия́ша святу́ю ве́ру во Христе́;

Ра́дуйтеся, я́ко и́доли и и́дольстии хра́ми в Ки́зице сокруши́шася, а вме́сто те́х хра́ми Бо́жии воздвиго́шася.

Ра́дуйтеся, пода́телие неоску́днии исцеле́ний;

Ра́дуйтеся, ве́лия бо ва́ша, му́ченик Христо́вых, богоблагода́тная си́ла, во гробе́х бо лежи́те и ду́хи зло́бы прогоня́ете, и, я́ко жи́ви, ве́рою притека́ющим даете́ проше́ния.

Ра́дуйтеся, я́ко чуде́с преди́вных сия́нием ве́рныя озаря́ете и неве́рныя ко Христу́ обраща́ете;

Ра́дуйтеся, святы́я бо мо́щи ва́ша я́ко зна́мя побе́дное все́м яви́шася.

Ра́дуйтеся, прехва́льнии му́ченицы Христо́вы девяточи́сленнии.

Конда́к 12.
Благода́ть Боже́ственная укрепля́ше тя́ в му́ченичестем по́двизе, Филимо́не страстоте́рпче: за ре́бра багро́м желе́зным оцепле́нный и на дре́ве ужа́сно пове́шенный, непрекло́нен пребы́л еси́ во испове́дании Христа́ и Бо́га, Ему́же хвале́бную пе́снь воспева́л еси́: Аллилу́иа.

И́кос 12.
Пою́ще мно́гая и пресла́вная чудотворе́ния ва́ша, восхваля́ем ва́с, всехва́льнии му́ченицы Христо́вы девяточи́сленнии: егда́ бо в Ки́зице благове́рнии христиа́не телеса́ ва́ша, из под спу́да земна́го изъе́мше и нетле́нная обре́тше, в хра́м, во и́мя ва́ше созда́нный, внесо́ша, чудесы́, я́ко све́тлыми луча́ми, возсия́сте от святы́х моще́й ва́ших. Мы́ же, любо́вию воспева́юще да́нную ва́м от Бо́га благода́ть исцеле́ний, зове́м:

Ра́дуйтеся, я́ко по кончи́не ва́шей чуде́сныя целе́б исто́чники источи́ Христо́с Бо́г в прославле́ние ва́ше;

Ра́дуйтеся, духо́в нечи́стых от челове́ка прогони́телие.

Ра́дуйтеся, сляче́нных цели́телие и тряса́вичными боле́зньми одержи́мых всеконе́чнии уврачева́телие;

Ра́дуйтеся, я́ко во́днаго труда́ изба́вися му́ж не́кий, прикосну́вся честне́й ра́це моще́й ва́ших.

Ра́дуйтеся, я́ко и сами́м призыва́нием честны́х име́н ва́ших тряса́вичный неду́г отгоня́ется и вся́кая боле́знь все́х с ве́рою притека́ющих врачу́ется;

Ра́дуйтеся, добропобе́днии му́ченицы, венцы́ побе́ды от Христа́ Спа́са на́шего увенча́ннии, я́ко страда́ния ва́ша возме́ришася ва́м сла́вою и че́стию Ца́рствия Небе́снаго.

Ра́дуйтеся, прехва́льнии му́ченицы Христо́вы девяточи́сленнии.

Конда́к 13.
О добропобе́днии и многострада́льнии му́ченицы Христо́вы девяточи́сленнии, ми́лостивно приими́те от на́с, недосто́йных и гре́шных, возноси́мое к ва́м ны́не хвале́бное песносло́вие; и, я́ко предстоя́телие го́рния сла́вы, иму́щии дерзнове́ние мно́го ко Христу́ Бо́гу на́шему, помяни́те ны́, ублажа́ющия ва́с любо́вию и чту́щия ва́ша чу́дныя по́двиги; испроси́те на́м у Го́спода оставле́ние грехо́в, в ве́ре утвержде́ние, в до́брых де́лех укрепле́ние, от бе́д и напа́стей избавле́ние, да всегда́ благода́рными усты́ воспева́ем Бо́гу: Аллилу́иа.

Этот конда́к чита́ется три́жды, зате́м 1-й и́кос и 1-й конда́к.

И́кос 1.
Я́ко А́нгели преми́рнии, возне́сшеся мы́слию от земны́х к небе́сным, ко Христу́, Влады́це все́х, непреста́нно ве́ры очи́ма взира́юще, му́ченицы святи́и, Феогни́де, Ру́фе, Антипа́тре, Феости́хе, Арте́мо, Ма́гне, Феодо́те, Фавма́сие, Филимо́не, посреде́ кумирослужи́телей гра́да Кизи́ческаго испове́дасте себе́ безбоя́зненно христиа́ны бы́ти и, си́лою Бо́жиею укрепля́еми, мно́гия му́ки му́жественне за Христа́ претерпе́сте и под ме́ч главы́ ва́ша преклони́сте, те́мже, ублажа́юще страда́ния ва́ша и усекнове́ние, глаго́лем:

Ра́дуйтеся, земны́я ра́дости презре́вшии;

Ра́дуйтеся, бла́г небе́сных возжела́вшии.

Ра́дуйтеся, испове́дницы Христо́вы непобеди́мии, ве́ру непоро́чну соблю́дшии;

Ра́дуйтеся, стра́сти Христо́ве после́довавшии и сме́рть Христо́ву сме́ртию свое́ю подража́вшии.

Ра́дуйтеся, си́лою Воскре́сшаго держа́ву а́дову попра́вшии;

Ра́дуйтеся, души́ своя́ в ру́це Бо́жии преда́вшии и побе́дныя венцы́ прие́мшии.

Ра́дуйтеся, прехва́льнии му́ченицы Христо́вы девяточи́сленнии.

Конда́к 1.
Избра́нии от Царя́ Си́л, Го́спода Иису́са, страстоте́рпцы Христо́вы девяточи́сленнии, от разли́чных стра́н в гра́де Ки́зице во еди́но со́браннии и Христа́ дерзнове́нне, му́к и сме́рти не убоя́вшеся, испове́давшии, торжеству́ем духо́вне во святе́м пра́зднице ва́шем и, воспева́юще благода́тную терпе́ния ва́шего до́блесть, мо́лим ва́с, во́и Христо́вы многострада́льнии и утвержде́ннии в во́ле Христо́вой, и на́м спасе́ния испроси́те, зову́щим:

Ра́дуйтеся, прехва́льнии му́ченицы Христо́вы девяточи́сленнии.

Моли́тва пе́рвая.
О всехва́льнии святи́и му́ченицы, до́блественнии раби́ Христо́вы, Феогни́де, Ру́фе, Антипа́тре, Феости́хе, Арте́мо, Ма́гне, Феодо́те, Фавма́сие и Филимо́не, и́же Христа́ ра́ди от разли́чных стра́н собра́стеся и Того́ соверше́нна Бо́га и Челове́ка дерзнове́нно в Ки́зице пропове́дасте; принужда́еми бы́вше куми́ром поклони́тися, и́долы попра́сте и кня́зя посрами́сте, разли́чных томле́ний и о́гненных преще́ний не убоя́стеся, и по разли́чнем страда́нии о́стрием меча́ посе́чени бы́сте, и пролия́сте за Христа́ кро́вь свою́, я́ко во́ду, и то́ю, я́ко багряни́цею, Це́рковь Христо́ву, я́ко неве́сту, украси́сте; те́мже и ны́не, увенча́ннии неувяда́емым венце́м безсме́ртныя сла́вы, при́сно в неизглаго́ланней ра́дости с ли́ки а́нгельскими в небе́сных селе́ниих водворя́етеся, Боже́ственным све́том облиста́еми и зре́нием Его́ добро́ты неизрече́нныя наслажда́ющеся. Сего́ ра́ди и мы́, смире́ннии, к ва́м притека́ем и, уми́льно на святы́й ва́ш о́браз взира́юще, мо́лим: вы́ моли́те за ны́ Христа́ Бо́га, я́ко дерзнове́ние к Нему́ иму́щии, да ва́шими святы́ми моли́твами вся́каго неду́га душе́внаго и теле́снаго изба́вимся. Ва́м бо от Бо́га даде́ся враче́бный да́р от вся́ких скорбе́й с ве́рою к ва́м припа́дающия цели́ти, я́коже и о́наго сла́внаго му́жа от тряса́вичныя боле́зни уврачева́сте, да и мы́, ве́рнии, то́жде получи́вше, почита́ем ва́с, святи́и му́ченицы, толи́ка дарова́ния иму́щих от Христа́ Бо́га, Ему́же и сла́ва ку́пно со Отце́м и Ду́хом Святы́м всегда́, ны́не и при́сно и во ве́ки веко́в. Ами́нь.

Моли́тва втора́я.
О вели́цыи уго́дницы Бо́жии, святи́и му́ченицы Христо́вы: Феогни́де, Ру́фе, Антипа́тре, Феости́хе, Арте́мо, Ма́гне, Феодо́те, Фавма́сие и Филимо́не! Вы́ Царя́ Христа́ ве́рнии слуги́ бы́сте и по́двигом до́брым подвиза́стеся, претерпе́вше за Него́ му́ки; те́мже, по нело́жному Его́ глаго́лу: иде́же е́смь А́з, ту́ и слуга́ Мо́й бу́дет, и вы́ ны́не со А́нгелы предстоите́ Влады́це Христу́ и с высоты́ небе́сныя сла́вы призира́ете ми́лостивно на хра́м ва́ш и на моля́щихся в не́м.

Умоли́те у́бо Го́спода Си́л Це́рковь Его́ Святу́ю и правосла́вное Оте́чество на́ше сохрани́ти от напа́стей и бе́д, от все́х вра́г ви́димых и неви́димых, низложи́ти пре́лесть неве́рия и безбо́жия и ста́до Христо́во изба́вити от волко́в, губя́щих е́, глаго́лющих лука́вое до́брое, и до́брое лука́вое, полага́ющих тьму́ све́т, и све́т тьму́; от шата́ния умо́в, я́ко тро́сть, ве́тром коле́блемых, и от грехо́внаго ду́ш разслабле́ния.

Богодарова́нную благода́ть чуде́с ва́ших, му́ченицы Христо́вы девяточи́сленнии, простри́те ко все́м на́м, ве́рою к ва́м прибега́ющим, и вся́ на́ша неду́ги душе́вныя и теле́сныя уврачу́йте, и вся́ проше́ния на́ша во бла́го испо́лните.

Е́й, страстоте́рпцы святи́и, моли́те за ны́ Го́спода, да низпо́слет на́м Боже́ственную благода́ть и да́р Свята́го Ду́ха, всегда́ немощна́я врачу́ющаго и оскудева́ющая восполня́ющаго, во е́же соде́ловати на́м спасе́ние свое́, заступле́нием Христа́ Спа́са на́шего, и изба́витися на́м от се́ти вра́жия и грехо́в, и поми́ловатися душа́м на́шим, да и мы́ ку́пно с ва́ми и все́ми святы́ми просла́вим Бо́га, в Тро́ице сла́вимаго, Отца́ и Сы́на и Свята́го Ду́ха. Ами́нь.

----------------------------------------------------------------------------------

Канон святым девяти мученикам Кизическим
Припев: Святи́и му́ченицы, моли́те Бо́га о на́с.
Память: 12 мая (29 апреля ст. ст.)
Глас 4.


Пе́снь 1.
Ирмо́с: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.

Боже́ственными добро́тами наслажда́ющеся вку́пе, и пото́ка пи́щнаго напита́ющеся бога́тно, и прича́стием обожа́еми, му́ченицы венцено́сцы, ва́с блажа́щия от лю́тых бе́д изба́вите.

Я́коже со́лнечныя лучи́, возсия́вше, заря́ми тве́рдых по́двиг, страда́льцы, и чуде́с сия́нии вся́ просвеща́ете, страсте́й но́щь решите́ и де́монов мра́к разоря́ете.

Умерщвле́ни на земли́ я́звами боле́зней, к неболе́зненней жи́зни преидо́сте вку́пе, ю́нии многострада́льнии. Те́мже то́чите исцеле́ния, вся́ку боле́знь облегча́юще богоприя́тными моли́твами, пребога́тии.

Богоро́дичен: Родила́ еси́ Бо́га из чи́стых Твои́х крове́й, вопло́щшася па́че ума́ зра́ком и́же по на́с, Ма́ти Пренепоро́чная. Те́мже вси́ Тя́, ро́дове родо́в, ублажа́ют, святы́х му́ченик утвержде́ние.

Пе́снь 3.
Ирмо́с: Не му́дростию, и си́лою, и бога́тством хва́лимся, но Тобо́ю, О́тчею ипоста́сною Му́дростию, Христе́: не́сть бо свя́т, па́че Тебе́, Человеколю́бче.

Ме́ртвым истука́нным пожре́ти ника́коже восхоте́вше, Поже́ршемуся на́с ра́ди же́ртва жива́ принесо́стеся, о́троцы прекра́снии, святи́и му́ченицы.

Зако́ны Боже́ственными, укрепля́еми си́лою Ду́ха, беззако́ннующих сове́ты и ловле́ния низложи́сте и, зако́нне пострада́вше, сла́ву улучи́сте.

Да восхва́лится Арте́ма и Филимо́н, Феости́х и Ма́гн, Ру́ф сла́вный, и Антипа́тр, и Фавма́сий, Фео́гний и Феодо́т великоимени́тии.

Богоро́дичен: Ору́жия вся́ вра́жия ны́не до конца́ оскуде́ша, Тебе́ ро́ждшей Христа́, уя́звлена копие́м, Всенепоро́чная, о Не́мже му́ченицы, уязви́вшеся, пострада́ша.

Седа́лен:

Ли́к светови́ден свяще́нных страда́лец, совокупле́ние красно́, богособра́нен собо́р, девяточи́сленный соста́в, пострада́вше кре́пко, попра́вше вра́жие мучи́тельство и причто́стеся а́нгельским лико́м, Го́сподеви предстоите́.

Пе́снь 4.
Ирмо́с: Седя́й в сла́ве на Престо́ле Божества́, во о́блаце ле́гце прии́де Иису́с Пребоже́ственный нетле́нною дла́нию и спасе́ зову́щия: сла́ва, Христе́, си́ле Твое́й.

Сожже́ния страда́льцы и богожре́нная заколе́ния, приноше́ние соверше́нно, же́ртвы прия́тны, приведо́стеся во́лею поже́ршемуся и сме́рть умертви́вшему. Те́мже ва́с ублажа́ем.

Чу́до вели́кое показу́юще, сля́ченныя испра́висте, страда́льцы, ру́ки, и во́днаго труда́ изба́висте прибе́гшаго с любо́вию к ра́це ва́шей, наро́чита му́жа иногда́, досточу́днии.

Да ублажа́тся досто́йно Арте́ма и Антипа́тр, Феости́х и Ру́ф, Ма́гн, и Филимо́н, и Фео́н, и Фео́гн с сла́вным Феодо́том, пострада́вшии, зову́т: сла́ва, Христе́, си́ле Твое́й.

Богоро́дичен: И́же в не́дрех О́тчих неизрече́нно седя́й, на Твои́х объя́тиих седи́т, Де́во, я́ко Младе́нец, Его́же блаже́нную стра́сть вообража́юще, добропобе́днии о́троцы изво́лиша умре́ти.

Пе́снь 5.
Ирмо́с: Нечести́вии не у́зрят сла́вы Твоея́, Христе́, но мы́ Тя́, Единоро́дне, Оте́ческия сла́вы Сия́ние Божества́, от но́щи у́тренююще, воспева́ем Тя́, Человеколю́бче.

Я́коже мы́сленное у́глие, вже́гше у́м, попали́сте вои́стинну хвра́стную вся́ку пре́лесть, блаже́ннии, и запале́ние угаси́сте и́дольское росо́ю ве́ры.

Разделе́ния в телесе́х не име́сте мно́зех, за Неразде́льную пострада́ти, страда́льцы, Тро́ицу иду́ще, те́мже разруши́сте диа́вола ополче́ние вся́ко.

Воспева́ет чудеса́ ва́ша от лука́ваго легео́на разреши́выйся де́монска, му́ченицы богови́днии, к честны́м ковче́гом ва́шим прише́дый со усе́рдием.

Богоро́дичен: Избавля́ющи яви́ся на́с от бе́д и прегреше́ний, тлетво́рных страсте́й, и скорбе́й, и обстоя́ний, ве́рою пою́щия Тя́, Богоро́дице, Присноде́во.

Пе́снь 6.
Ирмо́с: Приидо́х во глубины́ морски́я, и потопи́ла мя́ е́сть бу́ря мно́гих грехо́в, но я́ко Бо́г из глубины́ возведи́ живо́т мо́й, Многоми́лостиве.

Честна́ сме́рть яви́ся боже́ственных страда́льцев пред Тобо́ю, Бо́же вся́ческих, и́хже ны́не почита́я, врачевство́ безме́здное боля́щим яви́л еси́.

Возвы́сивше ру́це и сердца́ высо́ким нра́вом к Вы́шнему мужеу́мно, лука́ваго возноше́ния, му́ченицы богоно́сцы, низложи́сте.

Богоро́дичен: Я́коже сто́г, чре́во Твое́, Чи́стая, яви́ся, пшени́цу нося́щий безсме́ртия, все́х ве́рных ду́ши пита́ющую и му́ченики просвеща́ющую.

Конда́к:
Тве́рдый и всесве́тлый ли́к му́ченик девяти́, Трисо́лнечнаго Божества́ испове́дницы, на суди́щи Тому́ нача́льно взыва́ху: кро́вь и ду́ши на́ша с телесы́, я́ко непоро́чную же́ртву, прино́сим Тебе́, Влады́ко, в ли́цех небе́сных Твои́х сопричти́, я́ко Бо́г Ми́лостивый.

Пе́снь 7.
Ирмо́с: Ю́ноши три́ в Вавило́не, веле́ние мучи́телево на бу́йство прело́жше, посреде́ пла́мене вопия́ху: благослове́н еси́, Го́споди, Бо́же оте́ц на́ших.

Иска́пают ва́ши тру́дове, му́ченицы, боже́ственныя струи́ исцеле́ний всегда́, боле́зней ре́ки изсуша́юще и скве́рну вся́ку отмыва́юще страсте́й, досточу́днии.

Ра́довахуся страстоте́рпцы, внегда́ скорбе́ти и́м, ра́достию неизглаго́ланною, поя́ху, усека́еми мече́м: благослове́н еси́, Го́споди, Бо́же оте́ц на́ших.

Тяготу́ неду́гов, стра́сти серде́чныя и боле́зни теле́сныя, вся́ку же находя́щую ско́рбь на́м облегчи́те, сла́внии страда́льцы.

Богоро́дичен: Яви́вшися все́м му́чеником, Чи́стая Ма́ти Бо́жия, держа́ва ве́лия, яви́лася еси́ челове́ком заступле́ние, Тя́ пою́щим всегда́ свяще́нными пе́сньми.

Пе́снь 8.
Ирмо́с: Изба́вителю все́х Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся́ дела́, благослови́те, по́йте Го́спода.

Ра́достную хвалу́ принесе́м вели́кия на́м засту́пники, страстоте́рпцы му́ченики Пода́вшему, вопию́щим: вся́ дела́, благослови́те Госпо́дня Го́спода.

Укорени́вшеся на ка́мени ве́ры благоро́дне, я́коже ве́тви, му́ченицы, плоды́ на́м страда́ния принесо́ша, ве́рою пою́щим: благослови́те, вся́ дела́ Госпо́дня, Го́спода.

Вра́чеве страсте́й великоимени́тии, души́ моея́ стра́сти исцели́те, и гее́нны изба́вите, и тмы́ о́ныя кроме́шния, моля́ще Христа́ Бо́га на́шего.

Богоро́дичен: Законода́вца Христа́ родила́ еси́, зако́нно страда́вшия венча́вшаго, страстоте́рпцы му́ченики, Его́же моли́ зако́ном греха́ побежде́на мя́, Отрокови́це, исцели́ти.

Пе́снь 9.
Ирмо́с: Е́ва у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Се́ отверзо́шася ва́м небе́сная врата́, пострада́вшим, — рече́ Христо́с страстоте́рпцем, — вни́дите и приими́те, ра́дующеся, воздая́ния боле́зней досто́йная, от ве́ка хра́брствовавшим.

Кра́сни в ра́нах теле́сных бы́сте и а́нгелом уподо́бистеся, ны́не же предстоите́ все́х красоте́, ра́дующеся при́сно, прича́стием я́ве удобря́еми кра́сных, всечестни́и.

Ста́нем в дому́ Бо́жии, восхваля́юще Антипа́тра, Феости́ха же, Ру́фа и Филимо́на страда́ния, боже́ственнаго Фавма́сия чудеса́, Ма́гна и Арте́ма, Фео́гния и Феодо́та непобе́дное.

Де́нь спасе́ния на́м возсия́ святы́х торжество́, е́же соверша́юще моле́бно, вопие́м и́м с ве́рою: му́чеников светоза́рный ве́рше, все́х сердца́ озари́те.

Богоро́дичен: Обле́кся из Тебе́ Ца́рь в теле́сную багряни́цу, про́йде, ве́сь красе́н, из утро́бы Твоея́, и вся́ враги́ победи́, и побе́ду страда́льцем подаде́, Чи́стая еди́на Присноде́во.

Комментарии

Комментарии не найдены ...
Добавлять комментарии могут только
зарегистрированные пользователи!
 
Имя или номер: Пароль:
Регистрация » Забыли пароль?
Просьба о помощи
© LogoSlovo.ru 2000 - 2019, создание портала - Vinchi Group & MySites