Акафист и Канон святителю Софронию, епископу Иркутскому.

Святитель Софроний, епископ Иркутский и всея Сибири чудотворец
Акафист святителю Софронию, епископу Иркутскому
Память: 12 апреля (30 марта ст. ст.); 13 июля (30 июня ст. ст.)

Кондак 1
Возбранный Воеводо, Творец веков, Господь, Царь Славы, глубиною мудрости помышляя полезное в роды родов о Церкви Своей, видев наше маловерие, греховный сон и охлаждение, чудес действо сугубо даде по сгорении мощей угоднику своему, сим показуя велие дерзновение его ко Господу, да вси люди страны сибирския возгорающеся, верою и любовию, воспоют новому чудотворцу и цельбоподателю и молитвеннику своему, от всяких бед свободи ны, отче, зовущия Ти:

Радуйся, Софроние, горящий к Богу огнем любве неугасимыя.

Икос 1
Ангелов Творец, Господь Вседержитель благодатию Своею возвышая человеки в первое достоинство на небеси, избра тя, отче Софроние, да служиши Ему во ангельском чину и монашествуеши на земли. Мы же воспоминающе юность и подвиги твоя глаголем сице:

Радуйся, духовных родителей духовное чадо; радуйся, от юности положивый доброе начало. Радуйся, носяй имя соименно перводиакону Стефану; радуйся, сподобивыйся слышати небесный глас во храме. Радуйся, премудрости Божией сын возлюбленный; радуйся, в пострижении Софронием нареченный. Радуйся, еще юн сый, бывый монахов наставниче; радуйся, отче любвеобильный и строгий подвижниче.

Радуйся, Софроние, горящий к Богу огнем любве неугасимыя.

Кондак 2
Видя Елизавета, венчанная Царице, благонравие твое и святость жития, изволением Божиим избра тя в предстоятеля Лавры Невския, да якоже славил еси Бога на юге России, тако и на севере, в стольном граде, научиши монахи и бельцы непрестанно пети Богу ангельскую песнь: Аллилуиа.

Икос 2
Разум, от премудрости Божией дарованный, не можаше укрытися в тебе, но яко пресветлая звезда возсия на высоте архиерейства и учительства, озаряя всю страну пространныя Сибири учением своим, внушая верным чадам Церкви благодарственно вопити просветителю своему:

Радуйся, святителю богоизбранный и трудолюбивый; радуйся, тя бо не устраши путь лишениями многотрудный. Радуйся, мы бо тя приемлем яко друга Божия; радуйся, имел бо и ты друга душе инока праведна Синесия. Радуйся, мужу желаний, благодати Божией носителю; радуйся, архипастырю Иркутский, Иннокентия святого вторый заместителю. Радуйся, иерарше Богом избранный и людем благоприятный; радуйся, от священнаго собора и от житель града Иркутска радостно приятый.

Радуйся, Софроние, горящий к Богу огнем любве неугасимыя.

Кондак 3
Силою свыше облечен быв, святителю Софроние, обходя грады и веси паствы твоей, отечески наказуя клирики и иереи, да служат Богу со страхом, по достоинству сана своего, да учат дети, отцы и матери разумно пети небесную песнь: Аллилуиа.

Икос 3
Имея ревность по Бозе, яко же и пророк Илия, всякаго власть имущаго учил еси право ходити в законе Господни, правду и суд творити, заступати, немощныя, сирых и вдовиц от напасти избавляти, к нищым милостивым быти, за еже ублажающе тя, тако глаголем:

Радуйся, отче, правых путей любителю; радуйся, злокозненных нравов искоренителю. Радуйся, истин евангельских провозвестниче; радуйся, злаго властелина усмирителю. Радуйся, яко града Нерчинска первый быв посетитель; радуйся, своим служением оставивый память чадам и родителям. Радуйся, от сосуда сердца своего благодать всем изливаяй; радуйся, земли нерчинской небесное благословение подаваяй.

Радуйся, Софроние, горящий к Богу огнем любве неугасимыя.

Кондак 4
Бурю внутренних волнений не могий стерпети, ревнителю благочестия, яко не воздается честь благовестом Церковному песнопению в Литургии, Вечерни и Утрени: таже горя любовию ко славе Божией, повелел еси на «Достойно», «Господи воззвах» и на «Честнейшую» ударяти в кампан, да христиане в домех и на пути слышаше глас церкви, воспоют хвалу Богу: Аллилуиа.

Икос 4
Слышав речение Господне: «Иже сотворит и научит, сей велий наречется в Царствии Небеснем», делом слово исполняя: молитву, пост, поклоны и всяко томление плоти восприял еси, к сим же и человеколюбия не оставляя к меньшей братии, яко прежде кончины возмогл еси святость стяжати, за еже приими похвалу сию:

Радуйся, отче, любве ради Христовы земная оставивый; радуйся, еяже ради вся красныя ни вочтоже вменивый. Радуйся, блаженство облобызавый нищеты духовныя; радуйся, страхом Божиим попаливый страсти греховныя. Радуйся, приявый иго Христово на рамена измлада; радуйся, узким путем шествовавый неуклонно до вышняго града. Радуйся, нетленных благ на небеси обладателю; радуйся, дивныя славы во светлости святых созерцателю.

Радуйся, Софроние, горящий к Богу огнем любве неугасимыя.

Кондак 5
Боготочною кровию, обновившему род человеческий, Христу последовал еси, блаженне, принося Ему бескровную жертву во оставление грехов людей твоих, таже и всего себе принесл еси во всесожжение, являяся источником исцелений, бесов прогонитель и зритель таин сердечных, возбуждая люди зрящия чудеса, пети Богу: Аллилуиа.

Икос 5
Видевше сынове великия Сибирския пречудное твое житие, аще и в последняя лета возсиял еси в новопросвещенней стране, отче Софроние, обаче древних отец сподобляяся чести, равное дарование и чудес творение приял еси от Бога, Его же благодаряще, тя величаем приветствии сими:

Радуйся, иерарше, Николая Чудотворца ревнителю; радуйся, дивному Иннокентию верный подражателю. Радуйся, соседателю в вышних всем святителем; радуйся, и земных являяся от искушений хранителем. Радуйся, благочестие и веру соблюдый нескверно; радуйся, в венце славы предстоя свету невечерню. Радуйся, на свет явивыйся, егда Христос родися; радуйся, ты бо во светлыя дни Пасхи ко Господу преставился.

Радуйся, Софроние, горящий к Богу огнем любве неугасимыя.

Кондак 6
Проповедник бывый веры Христовы и познания истины в монголех и во всяком языце ближния и дальния Сибири, пришел еси и ко своему пределу, еже есть земля еси и в землю отыдеши, отдав дух Богу, тело же оставив верным на многа лета в пещере, да приходящие поют надгробную песнь: Аллилуиа.

Икос 6
Возсиявшее солнце в земли Иркутстей, Святый Софроний, в старости преклонней позна запад свой, оставив земная, восприял есть от руки Господни вечная благая, еже мы познахом от чудес и целебныя силы, присущия святым мощем его, и удивляяся поем ему таковая:

Радуйся, пастырю, неусыпно пасый Христово стадо; радуйся, надеждо ненадежных и сердечной туге отрадо. Радуйся, ты бо отшел еси прияти венец славы; радуйся, ибо оправдася на тебе суд Божией правды. Радуйся, твоя бо душа вчинена есть в святителей лики; радуйся, яко сице блаженство пребудет в бесконечные веки. Радуйся, тело бо твое остася нетленно; радуйся, яко чудо сие бысть всей Церкви Российской явленно.

Радуйся, Софроние, горящий к Богу огнем любве неугасимыя.

Кондак 7
Хотя Господь утешити избранныя люди своя, междоусобным искушением угнетенныя, волною неверия колеблемыя и вкупе с пастырми гонимыя, открыл есть славу угодника своего преблаженнаго Софрония, юже имать со святыми на небеси, да притекающе людие к его молитвенной помощи, поют Христу Богу: Аллилуиа.

Икос 7
Дивное знамение нача являтися у раки святых мощей твоих, отче преподобне. Уврачевал бо еси первее языкоболие, таже зубов возболение, таже и силу огневицы отрочат угасил еси, за еже благодарственно приносим ти песни сия:

Радуйся, врачу безмездный и цельбоподателю; Радуйся, помазанием елеа болезней облегчителю. Радуйся, изливаяй милость на книжных, разумных и простых; радуйся, обновляяй веру искушением колеблемых. Радуйся, явлением своим от позорныя смерти избавляяй; радуйся, молитвою твоею и кони свирепыя укрощаяй. Радуйся, теплое утешение всех гонимых и скорбящих; радуйся, предстателю Господень за всех к тебе прибегающих.

Радуйся, Софроние, горящий к Богу огнем любве неугасимыя.

Кондак 8
Странно чудо, како части костей святых мучеников источают исцеления, се ныне видим кости святителя Софрония огнем изнурены, и от нас грешных сокровенны, раны и вред врачуют, и всяко томление души скорбящия на радость прелагают. Воистину чудо преславно, сего ради чудес дателю Богу поем: Аллилуиа.

Икос 8
Весь еси ты отче, водворяешися в вышних, но и нижних, нас грешных, от скорби и от духа уныния долу поникших не оставляеши, присно бо притекающим к тебе помоществуеши, печаль на радость и скудость на довольство прелагаеши. За вся сия тя ублажающе, глаголем сице:

Радуйся, источниче присный благодатных исцелений; радуйся, разрешаяй жен от тяжких рождений. Радуйся, умом изумленным разум возвращаяй; радуйся, явлением во сне изломление костей исправляяй. Радуйся, избавление от страха нощнаго боязливыя; радуйся, прогонителю блуднаго беса и подателю целомудрия. Радуйся, оком твоим свыше на иноческия обители призирающий; радуйся, огненным столпом в возгорении, града мощи твоя показующий.

Радуйся, Софроние, горящий к Богу огнем любве неугасимыя.

Кондак 9
Всякий естества закон превосходит, еже ты твориши, о, великий Чудотворче! Изподспуда бо земнаго являяся, глаголеши избранным: «Прославите мя и аз вас прославлю» и повелеваеши, да сотворят ограждение над гробом твоим, да не попирается ногами место святое, но со страхом, ходяще людие окрест, поют: Аллилуиа.

Икос 9
Ветии многовещаннии неразумеюще тайны Божией яже, о Софроние! Егда узреша дым запаления от святых мощей, велиим гласом, на стогнах града и в домех велемудренно кричаху православным: «Уа! Где есть вера ваша? Где святость? Где мощи? Аще Софроний бе свят, почто не противися огню?» И ругахуся вере Христовой. Таже видевше множество чудес паче прежняго, познаша яко Бог поругаем не бывает: зазираху себе, возжигаху свещи, припадаху к честным останкам святых мощей, бияху в перси своя и в глубоцем молчании, сердцем вопияху:

Радуйся, Софроние, чудес делателю новоявленный; радуйся, подаяй прощение в покаянии просящим смиренно. Радуйся, имеяй власть вязати и решити; радуйся, и мощем своим ниспославый множайшую силу благодати. Радуйся, огнепальным действом лику сочетавыйся священномучеников; радуйся, отче милостивый, вразумителю мощей твоих хульников. Радуйся, ограждаяй паству твою от диавольских умышлений: радуйся, подателю благословения в начале добрых начинаний.

Радуйся, Софроние, горящий к Богу огнем любве неугасимыя.

Кондак 10
Спасти хотя град свой от кровопролитныя брани, миротворный отче, явился еси прославляющемуся тя сопрестольнику твоему архипастырю Иоанну: «Мужайся» рекл еси ему. Таже и прежде явлейся, показуя гроб свой и глаголя: «гроб сей ветхий, нетребен ми еси», еже знаменова самоприношение в умилостивительную жертву о граде. Познати тайну сию Иоанн можаше. Егда сбыстся реченное, он и вся люди со умилением воспеша хвалу Богу: Аллилуиа.

Икос 10
Стена каменна прямо, стена одесную, стена ошуюю в пещере, идеже бо хранимо тело твое, Угодниче Христов, яко несть возможно проникнути тамо пламени. Обаче Христос Господь, премудростию своею устрояяй полезное церкви, попустил есть, да сгорит гроб твой и тело твое, показуя сим, яко догмат Святаго Православия несть чувственное и осязаемое, но сердечною верою постигаемое и надеждою возмогаемое, и пети тебе любовию научающее:

Радуйся, мысленный изъявителю православия; радуйся, смотрительно предавый мощи своя на сожжение. Радуйся, венцем священномученика украсивыйся по преставлении; радуйся, кротчайший отче, никого же обличивый в запалении. Радуйся, правды Божией и премудрости честное орудие; радуйся, предваривый Иоанну во сне быти имущее. Радуйся, яко по сгорении усугубивый чудодействия; радуйся, сими бо чудесы возвеселишася люди Иркутска.

Радуйся, Софроние, горящий к Богу огнем любве неугасимыя.

Кондак 11
Пение всеумиленное и горячую молитву вознесл еси к Богу в годину междоусобныя брани о граде твоем, великий наш заступниче, яко ни единому гласу оружному слышатися во граде в день прославления твоего, и тако священный собор и множество верных возмогоша в мирной тишине воспети тебе хвалу и Богу: Аллилуиа.

Икос 11
Светильника Церкви – третияго епископа Иркутскаго – устрои тя Бог, в триех Ипостасех славимый, богоблаженне Софроние. Всесвятый же Дух, Бог Всемогущий, всепремудрый, самовладычный, самоповелительный исполнил есть тя духа премудрости, духа разума, духа страха Божия: да сими дарами Духа Святаго приведеши люди ко спасению, вопиющия ти:

Радуйся, вместилище даров Духа Святаго; радуйся, очистилище человеческаго злаго нрава. Радуйся, от страсти пьянственныя люди свобождаяй; радуйся, от боли главы, зубов и стомаха избавляяй. Радуйся, течение крови и воды яже в теле прикосновением уставляяй; радуйся, и срачицею возложенною на гроб твой, здравие подаваяй. Радуйся, устрояяй бедствующим жилища к пребыванию; радуйся, неимущим, где главу подклонити кров дающий и пропитание.

Радуйся, Софроние, горящий к Богу огнем любве неугасимыя.

Кондак 12
Благодать, данную ти от Бога ведуще прилежно просим тя, отче Софроние, пролей ныне теплую твою молитву о нас ко Господу, да презрев вся наша согрешения, дарует нам мирное житие, друг ко другу любве исполненное. Грады и Церкви не разоримы да сохранит, обилие всяких плодов земли да дарует, и всех нас да спасет и помилует: мы же благодарным сердцем воспоем ему: Аллилуиа.

Икос 12
Поюще дивнаго во святых своих, Царя Небеснаго, прославльшаго тя, вернаго раба Своего, милостивое твое скорое нам во всяких нуждах поможение, прославляем и Бога благодаряще, радостно ти глаголем:

Радуйся, великославный Сибирский заступниче; радуйся, совершенный в добродетелех человече. Радуйся, подражателю святых и священномучеников; радуйся, благий и добрый наставниче иноков. Радуйся, Пресвятыя Богородицы известный умилостивителю; радуйся, молитвенниче за град наш и всея страны покровителю. Радуйся, света Евангельскаго всесветлое сияние; радуйся, во тьме греховней сущим просвещающее озарение.

Радуйся, Софроние, горящий к Богу огнем любве неугасимыя.

Кондак 13
О, чудотворче преславный и заступниче наш, богомудре Софроние, приими малое сие моление наше, якоже Христос приял вдовицы две лепты и богоприятным твоим ходатайством умоли Господа сил силу свыше нам подати на исправление жития, да Того благодатию от грехов очистившимся, геенны избавитися и грядущия на небесех благая улучити, вопиющим Ему: Аллилуиа.

(Этот кондак читается трижды, затем икос 1 и кондак 1)

Молитва первая
Святителю Христов Софроние! Предстоя у престола Божия, призри с небесе на нас, грешных и недостойных раб Божиих (имена)! Возгрей сердца немощных людей и призови к покаянию и исправлению жизни греховныя. Утверди нас твоею благодатною помощию, предстательством твоим и молитвами приход сей от всякого зла и навета вражия огради, спаси и сохрани именем Господа Бога и Спаса нашего Иисуса Христа, Емуже славу приносим во веки. Аминь.

Молитва вторая
Святче Божий, святителю Христов, добрый пастырю словеснаго стада, человече Божий, новый чудотворче и неусыпный к Богу молитвенниче за страну сию, отче Софроние, призри с высоты Небесныя на нас, с верою и любовию покланяющихся образу твоему и честным останкам святых мощей, в наше утешение избывшим от всепоядающаго огня. Призри, святче Божий, и виждь наше нестроение и раздоры, нашу тугу, скорбь и сердечную болезнь, от лишения братския любве пребывающия. Испроси у Христа Бога коемуждо нам благодати смирения, познание своея греховности и самоукорения, да, внимающе кийждо своей совести, престанем осуждати ближняго, клеветати и поношати, но, соединившеся ко друг другу любовию, сподобимся мирно во смирении прочее время живота нашего пожити и улучити христианскую кончину. Да, совокупльшеся в будущей жизни со всеми святыми и с тобою, пастырю наш, прославим Единаго в Троице славимаго Бога, Отца и Сына и Святаго Духа во веки веков. Аминь.

--------------------------------------------------------------------------------------

Канон святителю Софронию, епископу Иркутскому
Припев: Святи́телю, о́тче на́ш, Софро́ние, моли́ Бо́га о на́с.
Память: 12 апреля (30 марта ст. ст.); 13 июля (30 июня ст. ст.)
Глас 2.


Пе́снь 1.
Ирмо́с: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты Еги́петския, я́ко просла́вися.

Сла́ву возсле́м Христу́, Бо́гу на́шему, ди́вному во святы́х Свои́х, па́мять уго́дника Его́ дне́сь прославля́юще.

Втора́го тя́ засту́пника гра́ду на́шему прия́хом, от вся́ких находя́щих на ны́ зо́л твои́м предста́тельством на́с сохрани́.

Все́х благи́х де́л о́браз себе́ показу́я па́стве твое́й, привле́кл еси́ мно́ги ду́ши во спасе́ние, и́же и улучи́ша ра́йскаго утеше́ния наслажде́ние, пою́ще: не́сть свя́т, па́че Тебе́, Го́споди.

Богоро́дичен: Бу́ря напа́стей обдержи́т ны́, Влады́чице, и во́лны скорбе́й, но, предвари́вши, пода́ждь на́м ру́ку по́мощи и те́плое заступле́ние и предста́тельство Твое́.

Пе́снь 3.
Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Я́ко адама́нт драгоце́ннейший, возсия́л еси́ ко украше́нию Це́ркве Росси́йския, блиста́яй непоро́чностию жития́, да и мы́, недосто́йнии, све́та Христо́ва наслади́мся.

Теплото́ю ве́ры согре́й сердца́ на́ша, от мра́ка грехо́внаго иззя́бшия, ду́х благоче́стия и стра́ха Бо́жия вкорени́ в на́с, па́мять твою́ ублажа́ющих.

Любо́вию утверди́вся Христо́вою, яви́лся еси́, я́ко река́, Сиби́рскую страну́ напая́я уче́нием слове́с, богоблаже́нне Софро́ние, те́мже любо́вию па́мять твою́ соверша́ем.

Богоро́дичен: Удиви́ла еси́ вои́стину ны́не на на́с благодея́ния и ми́лости Твоя́, Влады́чице, те́мже сла́вим мно́гое милосе́рдие Твое́.

Седа́лен:
Блаже́н ты́, иера́рше Софро́ние, вои́стину и треблаже́н еси́: соверше́нною прилепля́яся к Бо́гу любо́вию, и вся́ лю́ди возлюби́л еси́, ду́шу полага́я за па́ству твою́, бе́дствующим благодея́ния творя́, ду́ши напая́я смире́нием и покоре́нием промышле́нию Боже́ственному. Сего́ ра́ди тя́ ублажа́ем.

Богоро́дичен: Стена́ непобеди́мая на́м, христиа́ном, Ты́ еси́, Де́во Богоро́дице, к Тебе́ бо прибега́юще, невреди́ми пребыва́ем и, па́ки согреша́юще, и́мамы Тя́ Моли́твенницу. Те́м, благодаря́ще, вопие́м Ти́: ра́дуйся, Благода́тная, Госпо́дь с Тобо́ю.

Пе́снь 4.
Ирмо́с: Услы́шах, Го́споди, сла́вное Твое́ смотре́ние и просла́вих, Человеколю́бче, непостижи́мую Твою́ си́лу.

Иера́рше Бо́жий, предстоя́ престо́лу Го́спода сла́вы, моли́ся у́бо ми́р дарова́ти стране́ на́шей и от все́х лю́тых изба́витися.

Та́ко просвети́ся све́т тво́й пред челове́ки твои́ми до́брыми де́лы, и́мже яви́лся еси́ в ско́рбех уте́шитель, боля́щим вра́чь благода́тный, да, вси́ лю́дие Ирку́тстии, просла́вим Отца́ Небе́снаго, дарова́вшаго на́м тебе́, вели́каго чудотво́рца.

Ду́ха Пресвята́го хра́м, о́тче, бы́л еси́, вмеща́я в себе́ Боже́ственную Прему́дрость, на домострои́тельство Це́ркве Христо́вы и мона́шествующим на утвержде́ние.

Богоро́дичен: Удивля́ется вся́ земля́ и вси́ язы́цы чудя́тся, зря́ще мно́гое Твое́ милосе́рдие, Влады́чице, к стране́ на́шей и ро́ду христиа́нскому, оба́че неисправле́ние на́ше ве́рою ко благоче́стию премени́.

Пе́снь 5.
Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Ели́цы во Христа́ крести́хомся, лю́дие Ирку́тския па́ствы, вку́пе соше́дшеся дне́сь, облеко́хомся в ра́дость духо́вную, па́мять святи́теля прославля́юще.

Любве́ Христо́вы подража́тель бы́в, вся́ на́ша братоненавиде́ния умири́, да, тобо́ю в любви́ ева́нгельстей споспешеству́еми, благогове́йно хва́лим тя́.

Непреобори́мь яви́лся еси́ в де́ле Госпо́дни, Софро́ние, во все́м покаря́яся во́ли Его́ святе́й, нима́ло не взира́я на челове́ков негодова́ния, поя́ всегда́: ра́зве Тебе́ ино́го Бо́га не зна́ю.

Богоро́дичен: Боже́ственным Твои́м сия́нием, Блага́я, исцели́ на́ша стра́сти, я́же от невнима́ния на́м прихо́дят: мо́лит Тя́ о се́м и святы́й Софро́ний.

Пе́снь 6.
Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Яви́ся па́ки благода́ть спаси́тельная па́стве Ирку́тстей в прославле́нии, блаже́нне, па́мяти твоея́, не бо́ по грехо́м на́шим воздаде́ся на́м, но те́плаго моли́твенника обрето́хом, чту́щии па́мять твою́.

Па́стыря тя́ до́браго ве́мы, до́бре ста́до свое́ упа́сшаго, и ны́не па́ству твою́ в ве́ре и единомы́слии сохрани́, во е́же пребы́ти на́м в сою́зе любве́ и ми́ра и досто́йным бы́ти ве́чныя любве́.

Напита́л еси́ а́лчущия пра́вды пи́щею небе́сною: хле́б бо а́нгельский бы́сть сло́во твое́, Софро́ние, изыма́я от плене́ния грехо́внаго ду́ши ча́д твои́х и ко Христу́ те́х приводя́.

Богоро́дичен: Тре́петом содержи́ми есмы́, Блага́я, ужаса́ют бо на́с ловле́ния лука́ваго, но Ты́, Влады́чице, от бе́здны грехо́вныя на́с возведи́.

Конда́к:
Соиме́ннаго целому́дрию иера́рха, изря́дное Це́ркве Ирку́тския украше́ние, отца́ на́шего святи́теля Софро́ния любо́вию восхва́лим, вси́ ве́рнии, то́й бо е́сть храни́тель гра́да и страны́ сея́ и моли́твенник о душа́х на́ших.

И́кос:
Целому́дрия добро́тами уязви́вся, святи́телю, невозвра́тным жела́нием после́довал еси́ Сотво́ршему тя́, вся́ко плотско́е наслажде́ние возненави́дел еси́ и я́ко ино́е со́лнце Ирку́тстей па́стве возсия́л еси́, те́м и Христо́с да́ром тя́ чуде́с обогати́. Помина́й на́с, чту́щих пресве́тлую па́мять твою́, да зове́м ти́: ра́дуйся, архиере́йскаго са́на удобре́ние; ра́дуйся, гра́да Ирку́тска духо́вное украше́ние; ра́дуйся, полу́денныя страны́ Росси́йския прозябе́ние; ра́дуйся, полу́нощныя страны́ Сиби́рския похвало́; ра́дуйся, чуде́с не ума́ливый в опале́нии моще́й твои́х; ра́дуйся, нося́й вене́ц пра́вды в небе́снем Ца́рствии. Ра́дуйся, Софро́ние богому́дре, моли́твенниче о душа́х на́ших.

Пе́снь 7.
Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Ра́дости исполня́емся, лю́дие гра́да Ирку́тска, соше́дшеся на честно́е прославле́ние твое́, да еди́неми усты́ и се́рдцем Тро́ицу Единосу́щную, тя́ просла́вльшую, почти́м, Е́йже ты́, святи́телю, предстои́ши, моля́ся о душа́х на́ших.

О́тче, святи́телю Софро́ние, предстоя́ на небесе́х, не забу́ди на́с, до́лу су́щих: от вся́кия находя́щия напа́сти сохрани́, вся́ раздо́ры и бра́ни умири́, да про́чее вре́мя живота́ на́шего безпеча́льни пребу́дем, огражда́еми моли́твами твои́ми.

Трисо́лнечный Све́т почи́л е́сть в тебе́, святи́телю Софро́ние, пресве́тлую свещу́ показа́ тя лю́дем Свои́м, целе́бника и врача́ безме́здна, пою́щим Го́сподеви: Сы́й благослове́н и препросла́влен.

Богоро́дичен: Ма́ти Де́во Препросла́вленная, угаси́ пе́щь страсте́й на́ших милосе́рдием Твои́м, да воспое́м Тя́ во ве́ки со избра́нными Твои́ми.

Пе́снь 8.
Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода.

Сла́вы, я́же от челове́к, восприя́ти не восхоте́в, Бо́жиим произволе́нием честны́я мо́щи твоя́ о́гненным запале́нием премени́л еси́, да то́чию от Христа́ Бо́га просла́вишися, науча́я на́с не земна́го, но небе́снаго Ца́рствия жела́ти, его́же улучи́ти ча́ем моли́твами твои́ми.

Я́ко лу́ч све́та Христо́ва возсия́л еси́ в стране́ Сиби́рстей, святи́телю блаже́нне Софро́ние, просвеща́я вся́каго гряду́щаго путе́м ева́нгельским, да, све́том твои́м озаря́еми, не заблу́дим в пути́ грехо́внем и ве́чнаго Све́та дости́гше, вку́пе с тобо́ю жи́знь ве́чную насле́дуем.

Апо́стола втора́го Сиби́ри, Софро́ния, просла́вим, непоро́чному житию́ его́ после́дуим и, вся́ грехо́вная злопомне́ния отри́нувше, зове́м: ра́дуйся, Софро́ние, гра́да на́шего заступле́ние.

Богоро́дичен: Свя́т вои́стину де́нь се́й, в о́ньже собра́ на́с Ма́ти Бо́жия просла́вити уго́дника Своего́ Софро́ния, во хра́ме Ея́ почива́ющаго и чудесы́ свои́ми пе́ти на́с побужда́ющаго: благослови́те, вся́ дела́ Госпо́дня, Го́спода.

Пе́снь 9.
Ирмо́с: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Ве́ру соблюде́, тече́ние сконча́, про́чее даде́ся тебе́ вене́ц в Ца́рствии Христо́ве. Утверди́ и на́с, малове́рием коле́блемых, да не бу́дем неве́рни, но ве́рни, и, взира́юще на честны́й о́браз тво́й, спасе́ние улучи́м.

И́же с ве́рою призыва́ху тя́, уго́дниче Бо́жий, ве́лию благода́ть получи́ша, явля́ешибося в ско́рбех жите́йских уте́шитель, в печа́лех помо́щник, неду́г многообра́зных цели́тель, от вся́ких бе́д и зо́л изба́витель: но не оста́ви чудотво́рною по́мощию на́с, па́мять твою́ ве́рою чту́щих.

Мы́слию твое́ю к ве́чным и нетле́нным устреми́лся еси́, вся́ же земна́я отри́нул еси́. Помози́ и на́м, наста́вниче ди́вный, взыска́ти пра́вды и Ца́рствия Бо́жия, да в ча́с сме́ртный христиа́нския кончи́ны сподо́бимся и вку́пе с тобо́ю лицезре́ти Го́спода сла́вы досто́йни бу́дем.

Богоро́дичен: А́нгелов Цари́цу, архиере́йскаго, пресви́терскаго и мона́шескаго чи́на Влады́чицу и всего́ ро́да христиа́нскаго Покрови́тельницу, прииди́те, вси́, восхва́лим и поклони́мся Ей, Та́ бо нело́жно обеща́ся бы́ти на́м Помо́щница до сконча́ния ве́ка.

Свети́лен:
Све́т Христо́в бога́тно в тя́ всели́ся, прему́дре Софро́ние, да, предугото́вав чистото́ю ду́шу твою́, сотвори́т тя́ насле́дника Ца́рствия небе́снаго и моли́твенника о душа́х на́ших.

Богоро́дичен: Сла́досте а́нгелов, святи́телей и преподо́бных ра́дование, христиа́н все́х Предста́тельнице, Де́во Ма́ти Госпо́дня, заступи́ на́с и изба́ви от ве́чных му́к.

Комментарии

Комментарии не найдены ...
Добавлять комментарии могут только
зарегистрированные пользователи!
 
Имя или номер: Пароль:
Регистрация » Забыли пароль?
© LogoSlovo.ru 2000 - 2019, создание портала - Vinchi Group & MySites