Акафист и Канон святому великомученику Феодору Стратилату

Фео́дор Стратилат, Гераклийский
Акафист святому великомученику Феодору Стратилату
Память: 21 февраля (08 февраля ст. ст.); 21 июня (08 июня ст. ст.)

Конда́к 1.
Возбра́нному воево́де и сла́вному во страда́льцех во́ину, свято́му великому́ченику Фео́дору, прииди́те пе́снь хвале́бную вку́пе воспои́м. Ты́ же, великому́чениче, я́ко име́я дерзнове́ние ко Го́споду, от вся́ких на́с бе́д свободи́, да зове́м ти́:

Ра́дуйся, святы́й великому́чениче Фео́доре, Вели́кий Стратила́те.

И́кос 1.
А́нгелов Творе́ц и всея́ тва́ри Созда́тель яви́ тя́ Це́ркви Свое́й, я́ко страда́льца до́блественна и во́ина непобеди́ма, да вси́ по достоя́нию страда́ния твоя́ восхва́лят, страстоте́рпче Фео́доре. Сего́ ра́ди и мы́, я́ко му́ченика дне́сь чту́ще, восхваля́ем ти́, вопию́ще:

Ра́дуйся, и́дольскаго служе́ния пре́лесть обличи́вый.

Ра́дуйся, я́рость безу́мнаго царя́ язы́ческаго презре́вый.

Ра́дуйся, сего́ ра́ди муче́ния ве́лия и ра́ны сме́ртныя претерпе́вый.

Ра́дуйся, я́ко Христо́с от Пила́та, от Лики́ния царя́ пло́тию на кресте́ пригвожде́нный.

Ра́дуйся, от А́нгела Госпо́дня па́ки живо́т и кре́пость ди́вно восприя́вый.

Ра́дуйся, с ра́достию о Го́споде главу́ свою́ честну́ю под ме́ч преклони́вый.

Ра́дуйся, святы́й великому́чениче Фео́доре, Вели́кий Стратила́те.

Конда́к 2.
Зря́ще страда́льца до́блественна и во́ина непобеди́ма свята́го великому́ченика Фео́дора, страда́ньми венцы́ побе́дныя прия́вша и со А́нгелы сочета́вшася и чуде́с сокро́вище ми́ру дарова́вша, ве́рнии единому́дренне почти́м, воспева́юща Бо́гу: Аллилу́иа.

И́кос 2.
Ра́зум боже́ственный стяжа́в, зми́я ве́лия и стра́шна, бли́з Евхаи́тска гра́да вогнезди́вшася, кресто́м и мече́м порази́л еси́, во́ине Христо́в, те́мже и стратила́т, еси́ воево́да, возста́влен бе́ на земли́. Мы́ же я́ко небе́сному воево́де вопие́м ти́:

Ра́дуйся, си́лою Христо́вою от зми́я того́ лю́таго оте́чество свое́ свободи́вый.

Ра́дуйся, мно́гое наро́да мно́жество ко Христу́ обрати́вый.

Ра́дуйся, ору́жием ве́ры де́монов полки́ победи́вый.

Ра́дуйся, я́ко победоно́сный яви́лся еси́ на земли́ страда́лец.

Ра́дуйся, чуде́с мно́жество с ве́рою к тебе́ прибега́ющим подава́яй.

Ра́дуйся, Христу́ Бо́гу моли́тися за ны́ ми́лостиво не оскудева́яй.

Ра́дуйся, святы́й великому́чениче Фео́доре, Вели́кий Стратила́те.

Конда́к 3.
Си́лою Бо́жией умерщвле́на зми́я Фео́дором Стратила́том ви́девше, Евхаи́тский гра́д и вси́ лю́дие окре́стныя чудя́шеся зело́ и взыва́ху глаго́лющее: «Ве́лий е́сть Бо́г Фео́доров, се́й е́сть Бо́г и́стинный»,– Ему́же мы́ вопие́м: Аллилу́иа.

И́кос 3.
Име́я обы́чай благи́й но́щию моли́тися неусы́пно, Фео́доре святы́й, виде́ния боже́ственнаго сподо́бился еси́: покро́ву хра́мины, я́ко отве́рсту яви́вшуся и све́ту небе́сному, я́ко огню́ ве́лию, осия́вшу тя́; та́кже и гла́с слы́шал еси́ свы́ше глаго́лющ: «Дерза́й, Фео́доре с тобо́ю бо е́смь». Си́м позна́л еси́, я́ко вре́мя прии́де страда́ния твоего́ за Христа́, возвесели́ся ду́хом. Те́мже вопие́м ти́:

Ра́дуйся, я́ко сла́ву неизглаго́ланную Христа́ Бо́га узре́л еси́.

Ра́дуйся, я́ко и преми́рных виде́ний зри́тель бы́л еси́.

Ра́дуйся, я́ко и на земли́ небе́сныя собесе́дники име́л еси́.

Ра́дуйся, вели́ких бо Та́ин открове́ний в земно́й жи́зни сподо́бился еси́.

Ра́дуйся, проро́ческое просвеще́ние.

Ра́дуйся, свети́льниче мы́сленный, све́том Христо́вым облиста́емый.

Ра́дуйся, святы́й великому́чениче Фео́доре, Вели́кий Стратила́те.

Конда́к 4.
Бу́рю муче́ний бли́зящуся разуме́в, си́це моли́лся еси́ со слеза́ми, блаже́нне Фео́доре, Христу́ Бо́гу: «Го́споди, Бо́же, всеси́льный, бу́ди ми́ ми́лостив и соблюди́ мя́ от пре́лести вра́жия, да не пора́дуются врази́ мои́». Та́коже и мы́ с тобо́ю Бо́гу вопие́м: Аллилу́иа.

И́кос 4.
Слы́шав злочести́ваго царя́ прельсти́тельныя глаго́лы, я́ко да же́ртвы и кади́лы и арома́ты принесо́ша ме́рзким бога́м, Фео́доре треблаже́нне, сокруши́л еси́ я́ в но́щь еди́ну и, раздроби́в вся́ и́долы зла́ты и сре́бряны в ча́сти ма́лы, раздели́л еси́ я́ си́рым и убо́гим. Сего́ ра́ди неустраши́мому твоему́ по́двигу вельми́ дивя́щеся, си́це вопие́м:

Ра́дуйся, прему́дростию слове́с твои́х безсту́днейшаго царя́ посрами́вый.

Ра́дуйся, сла́ву Бо́га жи́ва и и́стинна пред язы́ки пропове́давый.

Ра́дуйся, я́ко вои́стину Фео́дор, е́же сказу́ется да́р Бо́жий, яви́лся еси́.

Ра́дуйся, я́ко ны́не со а́нгелы и ли́ки му́чеников блаже́нне ра́дуешися.

Ра́дуйся, я́ко дерзнове́ние име́яй к Бо́гу, от скорбе́й и страсте́й на́с все́х избавля́еши.

Ра́дуйся, святы́й великому́чениче Фео́доре, Вели́кий Стратила́те.

Конда́к 5.
Богоме́рзкия и́долы егда́ я́ко зла́то и сребро́ обы́чно рассе́к у́си руко́ю челове́ческою, безу́мнаго царя́ нечести́ваго поруга́л еси́, великому́чениче, глаго́ля ему́: «Ты́ кла́няешися бога́м ме́ртвым, а́з же поклоня́юся Бо́гу Живо́му». Ему́же с тобо́ю и мы́ поклоня́емся, взыва́юще: Аллилу́иа.

И́кос 5.
Ви́дев нечести́вый мучи́тель те́ло твое́ честно́е на муче́ние предае́мо, руга́шеся тебе́, страстоте́рпче. Ты́ же, святы́й, вся́ сия́ му́жественно терпя́, ничто́же и́но глаго́лал еси́ то́чию: «Сла́ва Тебе́, Бо́же мо́й!» Терпе́нию твоему́ дивя́щеся, си́це вопие́м ти́:

Ра́дуйся, жи́лами воло́выми и пру́тьми оловя́нными безпоща́дно бие́мый.

Ра́дуйся, мно́гие ра́ны к ра́нам и́мже не́сть числа́, от мучи́теля претерпе́вый.

Ра́дуйся, я́ко венцы́ побе́дныя та́ко от Христа́ прия́вый.

Ра́дуйся, твои́ми ко Христу́ хода́тайствы ве́рныя спаса́яй.

Ра́дуйся, святы́й великому́чениче Фео́доре, Вели́кий Стратила́те.

Конда́к 6.
Пропове́дник сла́вы Христо́вой яви́лся, в темни́цу вве́ржен бы́л еси́, страстоте́рпче Фео́доре, неи́стовым мучи́телем ру́це и но́зи име́яй свя́зана и ничесо́же яды́й да́же до дни́й пяти́. А́нгел же свя́т прише́д разреши́ти ты́ свя́зана, да вопие́ши Бо́гу: Аллилу́иа.

И́кос 6.
Возсия́ша по́чести твоя́ Фео́доре. Я́коже бо иногда́ Христо́с Госпо́дь на́ш от Пила́та, та́кожде и ты́, блаже́ннее, от Лики́ния царя́ на кресте́ про́пят бы́л еси́, ру́це и но́зе име́я пригвожде́нна. Сего́ ра́ди прии́дем вси́ ве́рни пе́сненными венцы́ Фео́дора Му́ченика пресла́внаго велича́ем глаго́лющее:

Ра́дуйся, ко кресту́ пригвожде́нный.

Ра́дуйся, стре́лы о́стрыми и гво́здием прободе́нный.

Ра́дуйся, мече́м усече́нный. Ра́дуйся, вся́кими хитростьми́ боле́зней предупрежде́нный.

Ра́дуйся, я́ко в муче́ниих непрекло́нен и непобеди́м яви́лся еси́.

Ра́дуйся, святы́й великому́чениче Фео́доре, Вели́кий Стратила́те.

Конда́к 7.
Хотя́ от земны́х разреши́тися и на дре́во вше́д уя́звленною пло́тию, великому́чениче Фео́доре, си́це моли́лся еси́ ко Го́споду: «Помяни́ мя́, Го́споди, претерпева́юща кре́ст Тебе́ ра́ди». Ему́же и мы́ с тобо́ю вопие́м: Аллилу́иа.

И́кос 7.
Но́ва по страда́нии яви́ А́нгел Госпо́день, Фео́дора му́ченика, в пе́рвую бо стра́жу но́щи ви́сящу тому́ на кресте́ сни́де с небесе́ и сня́т со креста́ и сотвори́ всего́ це́ла и здра́ва, я́коже и пре́жде, и лобза́я рече́ ему́: «Ра́дуйся и укрепля́йся, Фео́доре, се́ бо с тобо́ю Госпо́дь». Сего́ ра́ди и мы́ со безпло́тными ку́пно воззове́м тому́ глаго́люще:

Ра́дуйся, целова́ние а́нгельское прие́мый.

Ра́дуйся, спаси́тельную стра́сть Зижди́теля изобрази́вый.

Ра́дуйся, во вся́ких ну́ждах предста́тельством твои́м спаса́яй.

Ра́дуйся, вся́ку душегуби́тельную печа́ль и обстоя́ние отгоня́й.

Ра́дуйся, чуде́с мно́жество су́щим в ми́ре подава́яй.

Ра́дуйся, ве́рным сердца́ неви́димо подава́яй.

Ра́дуйся, святы́й великому́чениче Фео́доре, Вели́кий Стратила́те.

Конда́к 8.
Стра́нное о тебе́ содева́ется, блаже́нне Фео́доре, мучи́тель бо злочести́вый мня́ тя́ ра́спята ме́ртва су́ща, оста́ви те́ло твое́ на кресте́ ви́сяща, ты́ же от А́нгела це́л и здра́в бы́в, на́чал еси́ пе́ти Го́сподеви пе́снь хвале́бную: Аллилу́иа.

И́кос 8.
Всего́ тя́ истреби́ти хотя́ще мучи́тель, сего́ ра́ди и со́тник повеле́ поя́ти те́ло твое́ со креста́ и в ковче́г оловя́н вложи́ти и в пучи́ну морску́ю вве́ргнути, да ника́ко христиа́не е́ во́змут и че́стно погребу́т. Со́тницы же зна́мения мно́гая и ве́лия от свята́го узре́вше, ко Христу́ обрати́вшася; сего́ ра́ди и мы́ чту́ще честну́ю му́ченика па́мять си́це вопие́м:

Ра́дуйся, Небе́снаго Царя́ воево́до предо́брый.

Ра́дуйся, ри́торе изря́дный, па́че мудрецо́в ми́ра мудре́йший.

Ра́дуйся, вся́ ми́ра сего́ кра́сная ни во что́ же вмени́вый.

Ра́дуйся, терпе́ния соверше́ннейший о́браз все́м показа́вый.

Ра́дуйся, в Сио́не го́рнем со А́нгелы и святы́ми ку́пно всели́выйся.

Ра́дуйся, хода́тай те́плый за ны́ пред Бо́гом яви́выйся.

Ра́дуйся, святы́й великому́чениче Фео́доре, Вели́кий Стратила́те.

Конда́к 9.
Вся́кая похвала́ подоба́ет тебе́ великому́чениче Фео́доре, претерпе́в бо кре́ст и по страда́нии па́ки це́л и здра́в со креста́ соше́д, А́нгелом чуде́сным де́йствием, неве́рные со́тники ца́рския и во́ины мно́ги пре́жде нечести́вые просвети́л еси́ и научи́л еси́ ве́ровати Христу́ Бо́гу и Пе́ти Ему́ ку́пно с тобо́ю: Аллилу́иа.

И́кос 9
Вети́я, сказу́яй сла́ву Бо́жию неизче́тными зна́мении твои́ми, яви́лся еси́ ми́ру сла́во му́чеников Фео́доре, от тебе́ бо исцеле́ние неоску́дно почерпа́ем, вси́ к тебе́ с ве́рою прибега́ющии и стра́сти твои́ воспева́ющии си́це:

Ра́дуйся, у́зники мно́ги от у́з разреши́вый.

Ра́дуйся, две́ри темни́чныя сло́вом еди́ным отверза́яй.

Ра́дуйся, неду́жным исцеле́ние подава́яй.

Ра́дуйся, де́моном злы́м одержи́мыя свобожда́яй.

Ра́дуйся, то́чию прикаса́ющиеся ко оде́жде твое́й а́бие исцеля́яй.

Ра́дуйся, вме́сто кро́вных ка́пель исцеле́ний то́ки одождя́яй.

Ра́дуйся, святы́й великому́чениче Фео́доре, Вели́кий Стратила́те.

Конда́к 10.

Спаси́тельную ве́ру восприя́вша вси́ лю́дие ве́лия зна́мение твоя́ зря́щии, треблаже́нне Фео́доре, те́мже и́долов ме́рзких отве́ргше, Христу́ прилепи́шася, глаго́люще: «Ве́лий бо е́сть Бо́г Фео́доров, се́й е́сть Бо́г и́стинный»,– Ему́же при́сно вопие́м: Аллилу́иа.

И́кос 10.
Сте́ну необори́мую му́жества твоего́ во́ине Христо́в, не одоле́в лю́тый мучи́тель, уби́йством на тя́ ды́шуще и кро́ве твоея́ а́ки пе́с а́лчный жа́ждал, посла́ мече́м уби́ти тя́, ты́ же помоли́вся и зна́мением кре́стным зна́менався, во́лею приклони́л еси́ под ме́ч главу́ твою́. Твое́ усекнове́ние чту́ще си́це вопие́м ти́:

Ра́дуйся, мече́м сме́рть му́ченическую восприя́вый.

Ра́дуйся, во успе́нии свое́м зна́мения мно́ги сотвори́вый.

Ра́дуйся, ве́ру и любо́вь Христо́ву да́же до сме́рти сохрани́вый.

Ра́дуйся, я́ко в вы́шних черто́зех со а́нгелы и святы́ми всели́лся еси́.

Ра́дуйся, я́ко за гре́шныя те́плый ко Христу́ предста́тель яви́лся еси́.

Ра́дуйся, о душа́х на́ших непреста́нный моли́твенниче.

Ра́дуйся, святы́й великому́чениче Фео́доре, Вели́кий Стратила́те.

Конда́к 11.
Пе́ние надгро́бное со свеща́ми и кади́лы воспе́ша лю́дие вси́, че́сть тебе́ воздаю́ще, Фео́доре, егда́ глава́ твоя́ честна́я мече́м усе́чена бы́сть, те́мже взя́ше те́ло твое́ свято́е и в ме́сте наро́чите положи́вша е́, последи́ же и в Евхаи́тский гра́д принесо́ша, Христа́ Бо́га сла́вяще и пою́ще Ему́ пе́снь: Аллилу́иа.

И́кос 11.
Све́том зна́мения изря́днаго порази́л еси́ нечести́выя сараци́ны на честны́й хра́м тво́й, и́же в Ка́рсате, наше́дших, егда́ стрело́ю устрели́ о́браз тво́й, а́бие истече́ кро́вь в обличе́ние те́х омраче́нных безу́мием. Те́мже зна́мению сему́ чудя́щеся, ве́рно вопие́м ти́, чудотво́рче Фео́доре:

Ра́дуйся, я́ко безу́мие сараци́н посрами́л еси́.

Ра́дуйся, я́ко Це́рковь Бо́жию от поруга́ния огради́л еси́.

Ра́дуйся, я́ко о́браз тво́й све́тлый чудотво́рен яви́лся еси́.

Ра́дуйся, я́ко и́мя твое́ и в неве́рных просла́вил еси́.

Ра́дуйся, па́че ве́рныя к тебе́ прибега́ти в мольба́х научи́л еси́.

Ра́дуйся, святы́й великому́чениче Фео́доре, Вели́кий Стратила́те.

Конда́к 12.
Благода́тным зна́мением не вразуми́вшеся неве́рнии сараци́ны хра́м тво́й святы́й оскверни́ша и о́бразу твоему́ честно́му поруга́тися мня́ху, оба́че сме́рть лю́ту по ма́лех дне́х прия́ху, ве́рни же вси́ ико́ну твою́ святу́ю, я́ко чудоде́йственну вельми́ чту́ще взыва́ют Бо́гу: Аллилу́иа.

И́кос 12.

Пою́т ди́вныя по́двиги и чудеса́ твоя́ вси́ ве́рни по все́й земли́ христиа́нстей по вся́ дни́ в неисчи́слимых хра́мах и оби́телех во и́мя твое́ созда́нных, собира́ющеся и пе́сненными венцы́ тя́, великому́чениче Фео́доре Стратила́те, те́мже и на́с, па́мять твою́ дне́сь све́тло пра́зднующих, помяни́ и защити́, да любо́вию зове́м ти́ вопию́ще:

Ра́дуйся, я́ко мольбы́ гре́шных прие́млеши.

Ра́дуйся, я́ко ско́рби душе́вныя утоля́еши.

Ра́дуйся, я́ко страсте́й о́гнь укроща́еши.

Ра́дуйся, я́ко от вся́кия скве́рны пло́ти и ду́ха соблюда́еши.

Ра́дуйся, я́ко от искуше́ний лука́ваго избавля́еши.

Ра́дуйся, я́ко моля́щихся у престо́ла Вседержи́теля помина́еши.

Ра́дуйся, Святы́й великому́чениче Фео́доре, Вели́кий Стратила́те.

Конда́к 13.
О, всехва́льный и всеблаже́нный Стратила́те, великому́чениче святы́й Фео́доре! Приими́ сие́ умиле́нное моле́ние на́ше, и ко Престо́лу Небе́снаго Царя́ Христа́ ско́ро вознеси́, да предста́тельством твои́м от вся́ких зо́л и напа́стей свободи́мся, вопию́ще Бо́гу при́сно: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.
А́нгелов Творе́ц и всея́ тва́ри Созда́тель яви́ тя́ Це́ркви Свое́й, я́ко страда́льца до́блественна и во́ина непобеди́ма, да вси́ по достоя́нию страда́ния твоя́ восхва́лят, страстоте́рпче Фео́доре. Сего́ ра́ди и мы́, я́ко му́ченика дне́сь чту́ще, восхваля́ем ти́, вопию́ще:

Ра́дуйся, и́дольскаго служе́ния пре́лесть обличи́вый.

Ра́дуйся, я́рость безу́мнаго царя́ язы́ческаго презре́вый.

Ра́дуйся, сего́ ра́ди муче́ния ве́лия и ра́ны сме́ртныя претерпе́вый.

Ра́дуйся, я́ко Христо́с от Пила́та, от Лики́ния царя́ пло́тию на кресте́ пригвожде́нный.

Ра́дуйся, от А́нгела Госпо́дня па́ки живо́т и кре́пость ди́вно восприя́вый.

Ра́дуйся, с ра́достию о Го́споде главу́ свою́ честну́ю под ме́ч преклони́вый.

Ра́дуйся, святы́й великому́чениче Фео́доре, Вели́кий Стратила́те.

Конда́к 1.
Возбра́нному воево́де и сла́вному во страда́льцех во́ину, свято́му великому́ченику Фео́дору, прииди́те пе́снь хвале́бную вку́пе воспои́м. Ты́ же, великому́чениче, я́ко име́я дерзнове́ние ко Го́споду, от вся́ких на́с бе́д свободи́, да зове́м ти́:

Ра́дуйся, святы́й великому́чениче Фео́доре, Вели́кий Стратила́те.

Моли́тва.
О, пресла́вный и прехва́льный великому́чениче святы́й Фео́доре, вели́кий Стратила́те! Не отри́ни гре́шных сия́ ма́лыя моли́твы и приноше́ния, но я́ко име́я дерзнове́ние ко Всеми́лостивому Влады́ке, потщи́ся к на́м недосто́йным ско́рою твое́ю по́мощию и яви́ся хода́тай за ны́ те́плый у Христа́ Бо́га, да не поги́бнем вси́ во греха́х на́ших, но да сотвори́т с на́ми по вели́кой ми́лости Свое́й, да умири́т ми́р и сохрани́т на́с от вся́каго зла́го обстоя́ния, да да́ст на́м ти́хое и безмяте́жное житие́ пожи́ти в чистоте́ и благоче́стии, и по исхо́де ду́ш на́ших неосужде́нно предста́ти суди́лищу Его́ и десна́го стоя́ния сподо́битися, да вы́ну пое́м и сла́вим Его́ Всесвято́е и́мя со Отце́м и Святы́м Ду́хом во ве́ки веко́в. Ами́нь.

-----------------------------------------------------------------------------------------

Канон святому великомученику Феодору Стратилату
Память: 21 февраля (08 февраля ст. ст.); 21 июня (08 июня ст. ст.)
Глас 4.

Пе́снь 1.

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Му́ченик, я́ве светлостьми́ украша́емь, Добротво́рцу предстои́ши Христу́, от Него́ удобря́емь, я́ко даро́в тезоимени́т боже́ственных, му́чениче Фео́доре.

Боже́ственными вооружи́вся, Фео́доре, ору́жии ве́ры, вра́жия ссе́кл еси́ тве́рдо душетле́нныя полки́ и, победи́тель бы́в, с му́ченики венча́лся еси́.

Све́тлое твоея́ души́ хра́брство показу́я злочести́вому, богому́дре, царю́, прему́дростию слове́с твои́х и благода́тию де́л, сего́ посрами́л еси́, Фео́доре.

Богоро́дичен: Без се́мене О́тчею во́лею от Боже́ственнаго Ду́ха Бо́жия зачала́ еси́ Сы́на и пло́тию родила́ еси́, И́же из Отца́ без ма́тере, на́с же ра́ди из Тебе́ без отца́.

Пе́снь 3.
Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Ополче́ние злочести́вое, я́ко воево́да си́лен, победи́л еси́ и стропти́ваго зми́я вся́ хи́трости попра́л еси́.

Я́ко усе́рден душе́ю, умышле́нием благочести́вым, сла́вне, злочести́вых погуби́л еси́ прелюбоде́йственная чти́лища.

Кре́постию по́мысла лю́тых наноше́ния претерпе́л еси́, животво́рней ме́ртвости Подвигополо́жника подо́бяся.

Богоро́дичен: Ты́ еди́на, су́щим на земли́, па́че естества́, благи́х Хода́таица, Ма́ти Бо́жия была́ еси́. Те́мже Ти́, ра́дуйся, вопие́м.

Седа́лен, гла́с 8.
Боже́ственное всеору́жие восприи́м и и́дольскую ле́сть низложи́в, а́нгелы возста́вил еси́ восхвали́ти по́двиги твоя́, и́бо, боже́ственною любо́вию у́м распали́в, на о́гненную сме́рть до́блественно дерзну́л еси́. Те́мже тезоимени́тно прося́щим тя́ дае́ши боже́ственная дарова́ния, страстоте́рпче Фео́доре. Сего́ ра́ди вопие́м ти́: моли́ Христа́ Бо́га грехо́в оставле́ние пода́ти чту́щим любо́вию па́мять твою́.

Сла́ва, и ны́не: В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х, и я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ воплоще́нному безсе́менно моли́ся приле́жно о все́х рабе́х Твои́х, непреста́нно моля́щих Ти́ ся́, Богоро́дице Пречи́стая, моля́щи Его́ при́сно согреше́ний оставле́ние дарова́ти воспева́ющим досто́йно сла́ву Твою́.

Крестобогоро́дичен: Де́ва и Ма́ти Иису́сова, на дре́ве зря́щи Творца́, стеня́ше, слезя́щи, и лю́те уязвля́шеся, ду́шу и те́ло растерза́ющи, бию́щися, и к Нему́ вопию́щи го́рько, и взыва́ющи: увы́ Мне́, о Сы́не Мо́й! Ка́ко претерплю́ стра́сть Твою́, гво́здие и копие́, Я́же без боле́зни Тя́ ро́ждши? Но потщи́ся воста́ти, и ви́дети Тя́, Сы́не Мо́й и Бо́же, и от рыда́ния преста́ти и боле́зни, и пою́щии Твоя́ стра́сти согреше́ний разреше́ние прии́мут.

Пе́снь 4.
Ирмо́с: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Уязви́л еси́ зми́я, уязви́ти тя́ хотя́щаго, и терпели́выми сопротивле́нии му́ченик яви́лся еси́, поя́ приле́жно тя́ Укре́пльшему: сла́ва си́ле Твое́й, Го́споди.

Изнури́в пло́ть мно́гими ра́нами, по́мысл непрекло́нен поста́вил еси́, треблаже́нне, поя́ усе́рдно тя́ Укре́пльшему: сла́ва си́ле Твое́й, Го́споди.

Украси́лся еси́ страда́ньми Влады́ки, твоя́ честна́я страда́ния, прему́дре, совоку́пль, и сподо́бился еси́ Того́ све́тлости и жела́емыя красоты́.

Богоро́дичен: Неискусобра́чно родила́ еси́, о Де́во, и по рождестве́ яви́лася еси́ де́вствующи па́ки. Те́мже немо́лчными гла́сы, е́же ра́дуйся, Тебе́, Влады́чице, ве́рою несумне́нною взыва́ем.

Пе́снь 5.
Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Кропле́нием плотски́х крове́й уста́вил еси́ де́монскую на па́губу приноси́мую кро́вь, непобеди́ме Фео́доре.

О, нра́ва благочести́ва! О, до́блественна ра́зума! О, ве́ры тепле́йшия честна́го страстоте́рпца, е́юже Бо́га получи́!

У́м име́я, све́том Бо́жиим осия́емь, побо́рника зло́бы омрачи́л еси́, зми́я, богоно́се Фео́доре.

Богоро́дичен: Тя́ ору́жие непобеди́мое на враги́ предлага́ем, Тя́ утвержде́ние и наде́жду на́шего спасе́ния, Богоневе́сто, стяжа́хом.

Пе́снь 6.
Ирмо́с: Пожру́ Ти́ со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Победи́л еси́ усе́рдием де́рзостным низлага́ющих, на кресте́ просте́рт и гвоздьми́ пробода́емь, блаже́нне, изобража́я спаси́тельную стра́сть Зижди́теля.

Зако́нно стра́ждущему, Христо́с тебе́ явля́ется, в темни́це затворе́ну, воздвиза́я я́ко Подвигополо́жник к подвиго́м на враги́ боре́ния, пресла́вне.

Же́ртву чи́сту, и свя́ту, и непоро́чну тебе́ ра́ди во́лею Себе́ же́ртву прине́сшему, приве́л еси́ себе́, страстоте́рпче Фео́доре.

Богоро́дичен: О, чу́до, все́х чуде́с нове́йшее! я́ко Де́ва, во утро́бе вся́ Содержа́щаго неискусому́жно заче́нши, не тесновмести́.

Конда́к, гла́с 2.
Му́жеством души́ в ве́ру оболки́йся и глаго́л Бо́жий, а́ки копие́, в ру́ку взе́м, врага́ победи́л еси́, му́чеников преве́лий Фео́доре, с ни́ми Христу́ Бо́гу моля́ся не преста́й о все́х на́с.

И́кос:
Страда́льцев пресве́тлую добро́ту, прииди́те вси́, пе́сненными венцы́, ве́рнии, Фео́дора венча́ем: да́р бо Бо́жий вели́к ми́ру яви́ся сия́ньми чуде́с. Врага́ бо побе́ждь велиа́ра страда́нии честны́ми, одождя́ет вме́сто кро́вных ка́плей исцеле́ний то́ки, с си́ми у́бо все́ми ра́дуется Христу́ и дае́т ми́р неоскуде́н. Те́м вопие́м ему́: моли́ непреста́нно о все́х на́с.

Пе́снь 7.
Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

В пещи́ твои́х подвиго́в, му́чениче сла́вне, ве́щь злоче́стия попали́л еси́ и свети́ло благоче́стия, поя́, бы́л еси́: благослове́н еси́ в хра́ме сла́вы Твоея́, Го́споди.

Я́ко воево́да, я́ко смы́слен и тре́звеник де́лом, царя́ несмы́сленна и злочести́ва премо́гл еси́ и показа́л еси́ сего́ некре́пка, укрепи́вся си́лою духо́вною.

Зако́н побежда́ется похвала́ми вели́чества твоего́: ты́ бо пресве́тлыми просия́л еси́ облиста́нии муче́ния, Влады́це твоему́ вопия́, Фео́доре: благослове́нна держа́ва Твоего́ влады́чества.

Богоро́дичен: Вы́шняго освяще́нное боже́ственное селе́ние, ра́дуйся, Тобо́ю бо даде́ся ра́дость, Богоро́дице, зову́щим: благослове́на Ты́ в жена́х еси́, Всенепоро́чная Влады́чице.

Пе́снь 8.
Ирмо́с: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

На Тя́ упова́в, мене́ ра́ди Кре́ст и сме́рть претерпе́вшаго, на кре́ст воздвиго́хся, Влады́ко, и уязвля́емь стреля́ньми, и лю́тым прикаса́яся ра́нам, Го́споди, — вопия́л еси́, му́чениче, стражда́, доблему́дренне Фео́доре.

Приве́л еси́ же́ртву чи́сту тебе́ Зижди́телю твоему́, ра́дуяся, Фео́доре, и отлучи́вся, сла́вне, к Ца́рству небе́сному, с му́ченики свяще́нно взыва́я всегда́: благослови́те, вся́ дела́ Госпо́дня, Го́спода.

Я́ко кри́н, я́ко ши́пок разу́мный, воня́ми страда́ний твои́х благоуха́еши на́с, отгоня́ благода́тию всегда́ злосмра́дие страсте́й на́ших и понужда́я вопи́ти благово́нною душе́ю: благослови́те, вся́ дела́ Госпо́дня, Го́спода.

Богоро́дичен: Ты́ еди́на во все́х роде́х, Де́во Пречи́стая, Ма́ти яви́лася еси́ Бо́жия, Ты́ Божества́ была́ еси́ жили́ще, Всенепоро́чная, не опа́льшися огне́м непристу́пнаго Све́та. Те́мже вси́ Тя́ благослови́м, Мари́е Богоневе́сто.

Пе́снь 9.
Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Ны́не со блаже́нными собо́ры и му́ченическими ли́ки, я́ко укра́шен страда́ньми, соводворя́яся и свеселя́ся, вене́ц нося́, предстои́ши Жела́емому тебе́, Фео́доре.

К высоте́ небе́сней взя́тся, о земны́х небре́г, и жела́емаго тебе́ конца́ сподо́бился еси́, то́ са́мое соверше́ние жела́ний, Фео́доре, восприе́м, ра́дуяся.

Имы́й к Бо́гу дерзнове́ние, я́ко до́бль и му́др страда́лец, восхваля́ющим тя́ любо́вию согреше́ний оставле́ние проси́, от страсте́й и скорбе́й все́х на́с избавля́я.

Еди́наго Тя́, безсме́ртна Сло́ва, пло́тию пострада́вша и уме́рша, му́ченик богому́дрый возжела́в, безсме́ртия Твоего́ получи́в, на небеса́ всели́ся, к Зижди́телю все́х Всеси́льну.

Богоро́дичен: Благослове́нную Мари́ю и Бо́жию Ма́терь Де́ву, прииди́те вси́, ве́рою и любо́вию непреста́нно восхва́лим, Ея́же ра́ди обре́тше ве́чное ра́дование.

Свети́лен.
Ты́, красе́н добро́тою, и воево́да благомо́щен, и сла́вный во страда́льцех во́ин, прине́слся еси́ Христу́ и ми́ру да́р боже́ственный, Фео́доре, показа́лся еси́.

Сла́ва, и ны́не: Держа́вным Твои́м кро́вом от вра́г наве́та на́с, Чи́стая, Твоя́ рабы́, сохраня́й вся́ невре́дны: Тя́ бо стяжа́хом еди́ну прибе́жище в ну́ждах.

Комментарии (1)

Всего: 1 комментарий
  
#1 | Ольга З. »» | 21.02.2019 18:27
  
0
Сегодня ездили в сельский храм на престольный праздник муч Феодора Стратилата Там его икона с частичкой мощей
Добавлять комментарии могут только
зарегистрированные пользователи!
 
Имя или номер: Пароль:
Регистрация » Забыли пароль?
Просьба о помощи
© LogoSlovo.ru 2000 - 2019, создание портала - Vinchi Group & MySites