Акафист и Канон святому благоверному князю Георгию, Владимирскому чудотворцу.

Гео́ргий (Ю́рий) Всеволодович, Владимирский
Акафист святому благоверному князю Георгию, Владимирскому чудотворцу
Одобрен: решение Св. Синода 14 марта/8 апреля 1889 года №539
Память: 17 февраля (04 февраля ст. ст.)
Утвержден для общецерковного использования.


Кондак 1
Избранный угодниче Христов, благоверный княже Георгие, возсиявый мирови, яко звезда богосветлая, святостию и чудесы твоими, приими похвальная пения любовию чтущих святую память твою и со сродники твоими, святыми князи Андреем и Глебом, моли Христа Бога сохранитися неврежденным нам от видимых и невидимых враг, да со умилением вопием ти:

Радуйся, святый благоверный великий княже Георгие.

Икос 1
Ангельское житие возлюбив от юности и ко исканию единаго на потребу направив помыслы твоя, княже Георгие, дивный образ был еси добродетелей христианских и совершенства духовнаго; темже и возвеличен был еси на земли пред братиею твоею и на небеси прославлен еси от Господа. Сего ради славяще, зовем ти сице:

Радуйся, богоизбранный княже земли Российския.

Радуйся, пречестная отрасль равноапостольнаго князя Владимира.

Радуйся, святости князя Андрея Боголюбскаго подражателю.

Радуйся, благоверия князя Глеба наследниче.

Радуйся, яко тобою град Владимир украшается.

Радуйся, яко Бог в тебе дивен является.

Радуйся, святый благоверный великий княже Георгие.

Кондак 2
Видение преславное Богоматере, бывшее благочестивому сроднику твоему князю Андрею, и множество чудес, явленных от чудотворныя Ея иконы, укрепиша в глубине юныя души твоея, святе Георгие, пламенную любовь ко Господу и усугубиша святыя подвиги твоя. Помози убо и нам, святче, добродетелем и любви твоей последовати, да благоприятно воспеваем Богу: Аллилуия.

Икос 2
Разум пленивый в послушание веры, богомудре, с молитвою и благоговением приял еси жребий служения стране твоей и, стяжав божественную благодать, всем был еси в нуждах скорый помощник и покровитель; темже ублажаем тя, святый княже, и, славяще Божие о тебе промышление, вопием ти:

Радуйся, Отечества нашего ревностный защитниче.

Радуйся, православия поборниче.

Радуйся, христианскаго благочестия блюстителю.

Радуйся, милости и помощи нуждающимся подателю.

Радуйся, яко тобою вернии просвещаются.

Радуйся, яко прославляяй тя чудесы Бог тобою всех к себе призывает.

Радуйся, святый благоверный великий княже Георгие.

Кондак 3
Силою молитв и благодати Божией подобен был еси, святе Георгие, благоверному князю Глебу, принесшему все житие свое в жертву Господеви, и твоим смирением удивил еси сродники твоя, хотящим лишити тя великокняжескаго стола властолюбия ради. Сего ради дивно прослави тя Господь, Емуже предстоя со Ангелы воспеваеши ныне: Аллилуия.

Икос 3
Имея велию веру и любовь к Господу и соблюдая божественная словеса Его "да любите друг друга", ты, святый княже Георгие, яко пастырь добрый, не восхотел еси мстити присным твоим, но кротостию обличая их, с любовию увещавал еси сохраняти мир в сердцах своих. Темже убо величающе смирение твое, взываем ти сице:

Радуйся, любовь Христову себе стяжавый.

Радуйся, люди, врученныя свыше скиптру твоему, добре управивый.

Радуйся, гнев на ближняго до конца в себе умертвивый.

Радуйся, уста своя от клеветы заградивый.

Радуйся, яко тобою всякая вражда и злоба побеждаются.

Радуйся, яко от Бога и человек достойне возлюблен был еси.

Радуйся, святый благоверный великий княже Георгие.

Кондак 4
Бурю бед и скорбей претерпел еси, святый княже Георгие, егда брат твой воздвиже брань на тя и, востав со многими полчищи, на изгнание тя осуди; незлобиво восприял еси чашу поругания, богомудре, и скорбь не возможе поколебати храмину души твоея, основана бо бе на твердем камени веры во Христа. Темже, дивящеся величию терпения твоего, воспеваем к укрепившему тя Господу песнь: Аллилуия.

Икос 4
Слышаще многую хвалу твоему великому милосердию к бедным, святе Георгие, стекахуся к тебе мнози томимии гладом и обретаху вся потребная; воспоминающе дивная твоя благодеяния, смиренно молим тя, не остави и нас милостию твоею, испроси нам у Небеснаго Владыки земли плодоносие, от глада избавление, да непрестанно восхваляем тя сице:

Радуйся, милости и сострадания преисполненный.

Радуйся, страждущим в жизни сей сострадателю.

Радуйся, безпомощным скорый помощниче.

Радуйся, всем сущим в напастех милосердый заступниче.

Радуйся, яко тобою немощнии сильни бывают.

Радуйся, яко молитвам твоим Господь благоутробно внемлет.

Радуйся, святый благоверный великий княже Георгие.

Кондак 5
Боголюбивый угодниче Божий Георгие, восприяв великия скорби, и яко язвы Господа Иисуса на телеси твоем понесый, укреплялся еси духом при гробе святых сродников твоих, князей Андрея и Глеба, изливая пред ними печаль твою. Мы же, взирающе с трепетом на пречистыя мощи ваша, преклоняем колена, со умилением взывающе Богу: Аллилуия.

Икос 5
Видевше тя людие града Владимира, по речным струям в легцей ладии носящася и во изгнание из древняго града в страну Волжскую преселяющася, с сокрушенным сердцем и слезами к тебе устремишася; ты же, угодниче Божий, молился еси о них, благословляя их. Не презри и нас, прибегающих к заступлению твоему и воспевающих ти хвалы сия:

Радуйся, дивную крепость духа в скорби показавый.

Радуйся, терпением злобу мира сего победивый.

Радуйся, яко всего себе в жертву за люди твоя принесл еси.

Радуйся, яко Отечество твое от погибели спасл еси.

Радуйся, яко заступлением твоим и ныне Царство Российское от междоусобныя брани охраняется.

Радуйся, яко предстательством твоим уповаем и мы от бед избавитися.

Радуйся, святый благоверный великий княже Георгие.

Кондак 6
Проповедника добрых дел явил еси себе, преблаженне княже Георгие; ты бо, ревнуя о благочестии, украшал еси церкви, христианом был еси покровитель, алчущим питатель, безпомощным и угнетенным защитник. Сего ради, надеющеся на твое милосердное о нас попечение, усердно прибегаем к твоему заступлению, взывающе благодарственно Богу: Аллилуия.

Икос 6
Возсиял еси пречудно добротою души твоея, святый угодниче Христов, егда видя слезное покаяние князя, брата твоего, иже на одре смертнем с сокрушенным и смиренным сердцем прощения прошаше у тебе, забыл еси вся козни его и понесенныя тобою скорби и, облобызав его, обещал еси быти чадом его во отца и покровителя. Ублажая таковое истинно христианское братолюбие твое, вещаем ти таковая:

Радуйся, брата твоего, враждовавша на тя, любовию Христовою возлюбивый.

Радуйся, того на смертнем одре прощением и утешением укрепивый.

Радуйся, благая за зло воздавый.

Радуйся, отеческую любовь вдовице и сирым обещавый.

Радуйся, яко дивный образ любве Отца Небеснаго в себе явивый.

Радуйся, пример братолюбия христианскаго и всем нам оставивый.

Радуйся, святый благоверный великий княже Георгие.

Кондак 7
Хотя Господь явити благодать Свою, дарова тебе, яко избраннику Своему, силу благоугождати Ему; ты же, святый княже Георгие, возлюбил еси Господа твоего всем сердцем твоим и всею душею твоею, и ближняго твоего, яко сам себе; явился бо еси сиротствующим чадом брата твоего воистинну покровитель и утешитель, споспешествуя благому устроению жития их. Сице убо яви милостивую помощь твою и нам, молящимся ти и поющим Господеви: Аллилуия.

Икос 7
Новое знамение благоволения Божия даровася тебе, святый угодниче Божий, егда Господь возврати тя на престол великокняжеский и прослави тя паче братий твоих. Темже, уповающе на святыя молитвы твоя, молим тя, помози нам достойно ходити звания, в немже поставлени есмы, да поем ти сице:

Радуйся, святых страстотерпцев Бориса и Глеба в Царствии Небеснем сонаследниче.

Радуйся, святых князей Андрея и Глеба богоизбранный преемниче.

Радуйся, в народоправлении велию мудрость проявивый.

Радуйся, подчиненныя ти люди на путь благочестия направивый.

Радуйся, яко молитвами твоими престоли правоверных царей утверждаются.

Радуйся, славо и утверждение града Владимира.

Радуйся, святый благоверный великий княже Георгие.

Кондак 8
Странное и преславное чудо совершися в дивней победе твоей, святый княже Георгие, над нечестивыми враги, пришедшими от брегов Оки и Волги; с молитвою бо во устех и мечем в руце усмирил еси я. Сице избави ны от враг видимых и невидимых, брань на ны воздвизающих, и на правый путь спасения направи нас, да возможем воспевати Богови: Аллилуия.

Икос 8
Всего себе предав воли Божией, неутомимое попечение имел еси о стране твоей, защищая ю и укрепляя; многотрудное бо совершил еси шествие для устроения Новаграда низовския земли, идеже церковь во имя Спаса устроил еси и многия неверныя ко Христу привел еси. Темже славяще благоприятное твое о людех попечение, вопием ти:

Радуйся, Новград на защищение Отечества от врагов устроивый.

Радуйся, святыми храмы той украсивый.

Радуйся, веры Христовы усердный проповедниче.

Радуйся, о спасении грешных теплый молитвенниче.

Радуйся, яко имя твое доныне в Новеграде прославляется.

Радуйся, яко и на небеси славою и честию от Бога превознесен еси.

Радуйся, святый благоверный великий княже Георгие.

Кондак 9
Вси людие радовахуся, егда цельбоносныя мощи святаго страстотерпца Авраамия по повелению твоему, святый княже Георгие, несены быша из Болгарския страны во град Владимир; ты же, святый угодниче Христов, со святителем Митрофаном и князи и всем священным собором, изшедше в сретение им, со умилением поклонение и молитву сотворил еси, взывая Господу Богу: Аллилуия.

Икос 9
Витии многовещании, от Рима посланнии, не возмогоша отклонити тя от Православныя Церкве и правыя веры; ты бо, святый исповедниче Христов, рекл еси: паче умрети ми, неже православныя веры отрещися, и тако суемудренныя учители посрамил еси. Сего ради ублажаем тя, зовуще:

Радуйся, православныя веры непоколебимый столпе.

Радуйся, Христовы Церкве стено и утверждение.

Радуйся, велию православнаго исповедания тайну иноверным открывый.

Радуйся, заблуждающихся в вере обличивый.

Радуйся, яко тобою и ныне от ересей Церковь ограждается.

Радуйся, яко твоим предстательством и град наш доныне в православии нерушимо пребывает.

Радуйся, святый благоверный великий княже Георгие.

Кондак 10
Спасти хотя страну твою от нашествия злых татарских полчищ, ты, святый княже Георгие, не усумнился еси оставити и дом, и жену, и братию, и сестры, и чада твоя; но ради спасения ближних твоих от погибели, яко истинный последователь Христов, живот свой положил еси, воспевая Господеви: Аллилуия.

Икос 10
Царю Небесный, Утешителю души моея, взывал еси, святе Георгие, на брани, весть прием о мученичестей кончине присных твоих и, подобно праведному Иову, преклонь колена, молился еси: да будет воля Твоя, Господи! Буди имя Твое благословенно от ныне и до века! Мы же, дивящеся великому терпению твоему, во умилении зовем ти:

Радуйся, образе вернаго служения Богу и Отечеству показавый.

Радуйся, дивное отвержение себе спасения ради ближних твоих явивый.

Радуйся, яко пострадати за имя Христово возжелел еси.

Радуйся, яко, мучеником подражавый, лику их сопричтен еси.

Радуйся, яко пред великим мужеством твоим всяк возраст преклоняется.

Радуйся, яко венец твой княжеский кровными каплями, яко камением чудным, украсил еси.

Радуйся, святый благоверный великий княже Георгие.

Кондак 11
Пение ангельское совершашеся на небеси, егда безбожнии воини мечем усекнуша честную главу твою, страстотерпче святый, и ты предал еси душу твою в руце Бога живаго, Егоже от юности возлюбил еси. Темже поминающе блаженное успение твое, с сокрушенным сердцем преклонше колена, прибегаем к тебе, святый угодниче Христов, и молитвенно просим тя о еже молитися за нас ко Господу, да и мы сподобимся вкупе со Ангелы на земли живых пети Ему: Аллилуия.

Икос 11
Свет Божественныя благодати озари блаженнаго епископа Кирилла, да совершит молитву по убиенным воином на поли брани, и егда шед, обрете обезглавленное честное тело твое, святе Георгие, потом же и главу твою, и благоговейне принесши я во град Ростов, предаде погребению в соборнем храме. Мы же, почитающе честная страдания твоя, за веру и Отечество претерпенная, величаем тя сице:

Радуйся, живот твой на брани мужественно положивый.

Радуйся, жизнь вечную в Царствии Небеснем получивый.

Радуйся, венец княжеский вкупе со главою твоею неверным за ближния твоя оставивый.

Радуйся, венец мученический от Царя Небеснаго приявый.

Радуйся, яко тобою и до сего дне Отечество наше от врагов избавляется.

Радуйся, дивный хранителю, от Бога всем нам данный.

Радуйся, святый благоверный великий княже Георгие.

Кондак 12
Божественная благодать явися на тебе, святый благоверный княже Георгие, и неизреченное чудо дивно открыся, егда бо пренесение святых мощей твоих во град Владимир совершашеся, вси людие со страхом и трепетом узреша, яко честное тело твое бысть цело, и отсеченная глава прильпе к телеси твоему, яко не отсечена. Дивящеся убо чудеси и преклоняюще колена, молим тя, угодниче Божий, испроси и нам недостойным благодать и милость от Господа, да возможем богоугодно воспевати Ему хвалебную песнь: Аллилуия.

Икос 12
Поюще радостную песнь хвалы и благодарения Господу, прославльшему тя, святый княже Георгие, восхваляем и святыя сродники твоя, вкупе с тобою нетленными мощами своими почивающия: святаго князя Андрея, мученический венец приявшаго, и святаго князя Глеба, дивными подвиги просиявшаго, и усердно молим тя с ними услышати хвалебное сие пение нас взывающих:

Радуйся, великий княже Георгие, Престолу Царя Небеснаго предстояй.

Радуйся, о грешнем роде человечестем молитву пред ним возносяй.

Радуйся, от святых мощей твоих многая чудесная исцеления болящим источаяй.

Радуйся, от страстей благодатию, данною ти от Бога, души наша свобождаяй.

Радуйся, яко тебе и святым князем Андрею и Глебу, сродником твоим, вернии всеусердно покланяются.

Радуйся, наша недостойная хваления благосердно приемляй.

Радуйся, святый благоверный великий княже Георгие.

Кондак 13
О преславный и святый угодниче, страстотерпче Христов, великий княже Георгие, вонми гласу моления нашего и ходатайством твоим испроси нам от Господа в жизни сей в вере и добродетелех утверждение, от ересей и расколов сохранение, от скорбей и напастей избавление, прегрешений наших прощение и в час смертный твердое спасения упование, да сподобимся Царствие Небесное наследовати и вечно воспевати Богу: Аллилуия.

Этот Кондак читается трижды. Затем читается Икос 1, затем Кондак 1.

Молитва
О богоизбранный чудотворче, преславный угодниче Христов, Церкве Православныя поборниче. Царства Российскаго защитниче, великий княже Георгие!

Преклоньше колена, молим тя: призри на ны грешныя, прибегающия к твоему заступлению, услыши сие малое моление наше и теплым твоим предстательством умоли Милостиваго Бога, Емуже предстоиши с лики Ангел и со всеми святыми, да сохранит нас в единении Православныя Церкве и утвердит в сердцах наших дух правыя веры и благочестия, и избавит нас от всякаго злаго искушения. По велицей любви твоей, еюже ближния твоя возлюбил еси, испроси у всещедраго Господа Отечеству твоему, и нашему купно, мир и благоустроение; всем же нам, недостойным, усердно к тебе припадающим, богоугодное и безмятежное житие.

О святый заступниче наш, не остави нас слабых и безпомощных, молися за ны ко Господу и Пречистей Владычице Богородице, подвигни с собою на молитву о нас богопрославленныя сродники твоя, святыя князи Андрея и Глеба, с нимиже вкупе зде на земли нетленными мощами почиваеши и на небеси, у Престола Царя Небесного предстоиши, да дарует Он всещедрый вся нам, яже к пользе временней и вечней потребная; да не воздаст нам по делом нашим, но по неизреченному человеколюбию Своему простит согрешения наша, да избавит нас от всякия нужды и печали, скорби и болезни; да ниспослет нам благое намерение и силу подвизатися в исправлении жития нашего, и в будущем веце да сподобит нас внити в Царствие Небесное и славити Всесвятое имя Отца и Сына и Святаго Духа во веки веков. Аминь.

---------------------------------------------------------------------------------------------------

Каноны святому благоверному князю Георгию Владимирскому
Припев: Святы́й благове́рный кня́же Геóргие, моли́ Бо́га о на́с.
Память: 17 февраля (04 февраля ст. ст.)
Глас 4.


Пе́снь 1.
Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Новоявле́н му́ченик, блаже́нне Гео́ргие, вселе́нней напосле́док яви́ся; те́мже ми́ пода́ждь сло́во твое́ Бо́жиею благода́тию, твоя́ по́двиги воспе́ти по достоя́нию.

Во́инством досточу́дным твоего́ сопротивле́ния побе́дная прия́хом на мучи́теля естеству́: соверше́ние бо посра́млен бы́в, не ктому́ мучи́тельская дерза́ти начина́ет.

Оде́явся во броня́ испове́данием ве́ры и шле́м возложи́в благода́ти светле́йший, и язы́ком же, Гео́ргие, благовеща́нным, я́коже мече́м, ссече́ окая́ннаго Баты́я.

Богоро́дичен: Гора́ превысо́кая, ю́же ви́де Дании́л, ка́мень горы́ отсече́ся, кроме́ ру́к му́жеских, Тебе́ прообразова́, Богоро́дице: без му́жа бо на́м пло́тию родила́ еси́ Емману́ила.

Пе́снь 3.
Ирмо́с: Твоя́ песносло́вцы, Богоро́дице, живы́й и незави́стный исто́чниче, ли́к себе́ совоку́пльшия, духо́вно утверди́, в Боже́ственней Твое́й сла́ве венце́в сла́вы сподо́би.

Му́ками, я́ко зла́то честно́е, искуси́лся еси́, страда́льче сла́вне, и Царе́ви Си́л прине́слся еси́, всепло́дие словеси́ и́стинно вме́сто огня́ олта́рнаго мече́м истне́емо.

С ва́рваром бра́вся, сего́ победи́л еси́ и, от Христа́ дерзнове́ние прии́м, мно́гу печа́ль бесо́м сотвори́л еси́, святы́м же А́нгелом весе́лие и ра́дость, с ни́ми же водворя́ешися.

Ма́слина плодови́тая в Це́ркви Жива́го Бо́га, твои́х моще́й ра́ка ны́не яви́ся, от нея́же прие́млем разли́чная неду́гов исцеле́ния, и́же тобо́ю обога́щшиися и чудесы́ твои́ми крася́щиися.

Богоро́дичен: Рече́ Боже́ственный Иезеки́иль: и бу́дет две́рь затворе́на. И сие́ на Тебе́ испо́лнися, Влады́чице: вни́де бо несказа́нно в Тя́ О́тчее Сло́во, и ми́ру яви́ся Плотоно́сец из Тебе́, Де́во, сохрани́в Тя́ во обои́х.

Седа́лен, гла́с 8.
Прему́дрости рачи́тель бы́в, сокро́вище доброде́телей, отону́дуже и почерпе́ Боже́ственная разуме́ния; те́мже и вре́мени прише́дшу, к подвиго́м усе́рдно подви́гся, прие́мля му́ченическия ра́ны: главе́ усече́ние, и кро́ви истече́ние. И ны́не живе́ши в неизрече́нне све́те с му́ченики. Те́мже вопие́м ти́: моли́ Христа́ Бо́га грехо́в оставле́ние дарова́ти покланя́ющимся ве́рою святы́м моще́м твои́м.

Богоро́дичен: Помышля́ю су́д и испыта́ния стра́шная, трепе́щу и ужаса́юся му́к, и огня́ боле́зни, и тьму́ же, и та́ртар. Увы́, что́ сотворю́? Сту́д ка́ко претерплю́, егда́ кни́ги разгну́тся, и дея́ния облича́тся? Сего́ ра́ди припа́даю Ти́, Богоро́дице Пречи́стая, тогда́ предста́ни ми́, ну́жды о́ныя изыма́ющи: Тебе́ бо и́мам прибе́жище, Влады́чице.

Пе́снь 4.
Ирмо́с: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный Нетле́нною Дла́нию и спасе́ зову́щия: сла́ва, Христе́, си́ле Твое́й.

Наступи́в на ва́рварское стремле́ние и попра́в сего́, му́чениче, росо́ю с Небе́с Боже́ственно обогати́ся, взыва́я Христу́: сла́ва си́ле Твое́й, Го́споди.

Па́че смы́сла страстоте́рпца Твоего́ любы́ превосхо́дит вся́ помышле́ния, Сло́ве, боре́ния, и му́жественныя по́двиги, и натрижне́ния, я́же по́дал еси́ зако́нно ему́ пострада́ти.

Я́ко до́бр во́ин, я́ко непобеди́мь му́ченик, я́ко Христо́в храбо́рник и я́ко благоче́стия побо́рник, Небе́сная селе́ния насле́довал еси́, лико́м А́нгельским всегда́ свеселя́ся.

Богоро́дичен: Изобразова́ше в Чермне́м проше́ствие дре́вле Изра́илево безму́жное Твое́ Рождество́, Всецари́це: я́коже бо о́н тогда́ пре́йде немо́кренно, та́ко и Христо́с безсе́менно от Твои́х пречи́стых крове́й произы́де, Де́во.

Пе́снь 5.
Ирмо́с: Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая.

Ра́нам те́ло твое́, вели́кий кня́же Гео́ргие, примеси́ся, и у́зами многообра́зных му́к, ми́ро благово́нно те́м источа́ет на́м, благоуха́ющи ду́ши ве́рою несумне́нною тя́ почита́ющим всегда́.

Кропле́нием кро́ве твоея́ погаси́л еси́ у́глие суровства́ Баты́ева, страстоте́рпче, Боже́ственных чуде́с огне́м, прему́дре, ти́ну страстну́ю лю́тых пожига́я, вели́кою благода́тию Спа́совою, Гео́ргие.

Ко́ль стра́шно же и сла́вно о Христе́ сопротивле́ние твое́, Ему́же почуди́шася племена́, обре́тшаяся на по́двизе, и похвали́ша терпе́ние; ва́рвари же посрами́шася, студо́м обле́кшеся.

Богоро́дичен: Горе́ бя́ше, Соприсносу́щен Отцу́ и Бо́гу Бо́г Сло́во и с на́ми Бо́г и Челове́к, Богоро́дице, Тобо́ю сше́д к на́шему смире́нию, свобожда́я от кля́твы пра́дедния. Тебе́ бо ви́де патриа́рх Иа́ков Ле́ствицу Небе́сную.

Пе́снь 6.
Ирмо́с: Боже́ственное сие́ и всечестно́е соверша́юще пра́зднество, Богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Ника́коже поколеба́ столпа́ благоче́стия свире́пство ва́рварское, ниже́ преще́ние Баты́ево, ниже́ ме́чное усече́ние, ни ра́ны, ни сме́рть ну́жнейшая.

Взыгра́шася све́тло му́ченичестии тогда́ ли́кове, ви́девше твое́ дерзнове́ние, и, прини́кше совоку́пленно со А́нгелы, неви́димо укрепля́ху тя́ в по́двизе.

Теле́с стра́сти неисце́льныя Бо́жиею благода́тию исцели́л еси́, вели́кий кня́же Гео́ргие, ми́ро благоуха́ющее источа́я у́бо твои́м честны́м моще́м прикаса́ющимся.

Богоро́дичен: Обра́зне руно́ Гедео́н прия́т ороше́но, Твое́ предвозвеща́я чу́до: сни́де бо, я́ко до́ждь на руно́, Богоро́дице, Еди́ный от Тро́ицы во утро́бу Твою́, воплоща́емь.

Конда́к, гла́с 8:
Христо́ве сме́рти подо́бяся и Того́ испи́ти ча́шу возжеле́в, я́ко Живота́, за Него́же му́жески подвиза́лся еси́, презре́в земно́е ца́рство, от безбо́жных ва́рвар пострада́в до сме́рти, Гео́ргие Богому́дре. Те́м моли́, спасти́ся ве́рным лю́дем моли́твами твои́ми.

И́кос:
Кто́ изглаго́лет си́лы Госпо́дня? или́ кто́ испове́сть страда́ния твоя́ и доброде́тели, му́чениче? или́ ки́й язы́к воспе́ти возмо́жет по досто́инству? Те́мже и а́з, недосто́йный, покуша́юся хвали́ти же и сла́вити Влады́ку Жизнода́вца, да́вшаго тебе́ на ва́рвары де́рзость, злочести́ваго Баты́я не убоя́тися, испове́дающу тебе́ и́стиннаго Бо́га. Сего́ ра́ди тя́ чти́м ве́рою и любо́вию, страстоте́рпче Гео́ргие, те́м моли́ спасти́ся ве́рным лю́дем моли́твами твои́ми.

Пе́снь 7.
Ирмо́с: Не послужи́ша тва́ри Богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

На ка́мени Боже́ственнаго ра́зума утверди́в се́рдца своего́ стопы́, сла́вне, враго́в же ухищре́ния не преврати́ша тя́, воспева́юща: оте́ц на́ших Бо́же, благослове́н еси́.

Све́т Невече́рний страда́вшу кро́вию возсия́ тебе́, и весе́лие я́ве тебе́ прия́т, великому́чениче, воспева́юща: оте́ц на́ших Бо́же, благослове́н еси́.

И́стинен му́ченик, и́стиннаго Христа́ Бо́га на́шего страда́лец взыва́ше: муче́ния бо цве́ты благово́ния вменя́ю и кро́вныя струи́ ба́нею креще́ния.

Богоро́дичен: Ри́торствующий язы́к, безгла́сен же и недви́жим о Тебе́ зри́м, Богора́дованная: не и́мать бо пости́гнути непостижи́маго зача́тия неизрече́нное Рожде́ние.

Пе́снь 8.
Ирмо́с: О́троки благочести́вый в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте дела́ и превозноси́те Его́ во вся́ ве́ки.

Ублажи́ша тя́ ца́рие, благослови́ша святи́телие, слы́шаще твое́ му́жественное терпе́ние и ко Христу́ хода́тая стяжа́вше тя́, и ны́не, приходя́ще честны́м твои́м моще́м, покланя́ются.

Боже́ственный Гео́ргий источа́ет ми́ро благода́ти, повелева́я ве́рным почерпа́ти на просвеще́ние и чистоту́, взыва́я: Го́спода по́йте дела́ и превозноси́те Его́ во ве́ки.

Хваля́ся я́звами Христо́выми, к ве́чным оби́телем восте́кл еси́, от кро́ве твоея́ обагри́в пло́ть, и све́тло Царе́ви Си́л предстои́ши, с му́ченики лику́я.

Богоро́дичен: Исáии у́гль дре́вле бы́сть, клеща́ми носи́м от Серафи́ма и, каса́яся тому́, грехи́ оставля́ет. Клеща́ же Ты́ еси́, Де́во, Боже́ственный у́гль носи́вшая во оставле́ние грехо́в челове́честву.

Пе́снь 9.
Ирмо́с: Вся́к земноро́дный да взыгра́ется, Ду́хом просвеща́емь, да торжеству́ет же Безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Во́ин и́стинный Христо́ва пропове́дания бы́л еси́, Гео́ргие, и ле́сти потреби́тель безбо́жия. Те́мже и ны́не моли́твами твои́ми потреби́ ва́рварское воста́ние, во́инству на́шему под но́зе сла́вне те́х низложи́.

А́ще и отсе́чена бы́сть глава́ твоя́ и кро́вь излия́ся, но прильпе́ ве́рно, и победи́тельная тобо́ю соверши́шася. Те́мже и на на́с востаю́щих си́лою твое́ю посрами́ и яви́ на́с победи́тели.

Лу́к сокруши́ нечести́вых, страстоте́рпче непобеди́ме, непра́ведно дви́жимый на твое́ достоя́ние, е́же себе́ избра́л еси́, возлюби́в, и во́инству на́шему си́лу утверди́, да и мы́ ти́хо препрово́дим жи́тельство.

Богоро́дичен: Его́же проро́цы провозвести́ша вси́ многообра́зне и вопло́щшася на́с ра́ди от Тебе́ ви́дехом, Богоро́дице, Бо́га и Челове́ка соверше́нна, избавля́юща челове́ки от кля́твы пра́дедния Твои́ми моли́твами и ве́чныя муки́ свобожда́юща.

Свети́лен.
Све́ту Невече́рнему предстоя́, страстоте́рпче, с му́ченическими ли́ки, воспева́ющия тя́ в па́мяти твое́й от искуше́ния спаса́й моли́твами твои́ми.

Богоро́дичен: Незаходи́маго Све́та носи́ло, Присноде́во, просве́щшаго седя́щих во тьме́ неве́дения пре́лести, озари́ и на́м, гре́шным, све́т Сы́на Твоего́.

Комментарии

Комментарии не найдены ...
Добавлять комментарии могут только
зарегистрированные пользователи!
 
Имя или номер: Пароль:
Регистрация » Забыли пароль?
© LogoSlovo.ru 2000 - 2024, создание портала - Vinchi Group & MySites
ЧИСТЫЙ ИНТЕРНЕТ - logoSlovo.RU