Акафисты и Канон святому праведному Иоанну Кронштадтскому

Иоа́нн Кронштадтский
Акафист святому праведному Иоанну Кронштадтскому, чудотворцу
Утвержден Священным Синодом Русской Православной Церкви 24.12.2008 (журнал № 108)
Память: 02 января (20 декабря ст. ст.); 14 июня (01 июня ст. ст.)
Утвержден для общецерковного использования


Конда́к 1.
Избра́нный уго́дниче и пресла́вный чудотво́рче, о́тче пра́ведный Иоа́нне, гра́да Кроншта́дта пресла́вное украше́ние! Ты́, от младе́нства Христу́ после́дуя, сораспя́тися Ему́ возжеле́л еси́ и, жи́знь твою́ в Не́м утверди́в, да́р чуде́с от Бо́га прия́л еси́ и сло́вом живоно́сным все́х напита́л еси́. Мы́ же, недосто́йнии, благода́рне вопие́м ти́: Ра́дуйся, Иоа́нне, земли́ Росси́йския моли́твенниче преди́вный.

И́кос 1.
А́нгела све́тла, еще́ о́трок сы́й, я́ве узре́л еси́, о́тче Иоа́нне, и́же и рече́ ти́, я́ко повеле́нием Госпо́дним приста́влен храни́ти тя́ во все́х путе́х твои́х. Те́мже я́ко избра́нника Бо́жия ве́дуще тя́, взыва́ем си́це:

Ра́дуйся, благода́ти Бо́жия сосу́де избра́нный;

Ра́дуйся, сло́вом Бо́жиим измла́да наста́вленный.

Ра́дуйся, во о́трочестве явле́ния А́нгела Храни́теля сподо́бивыйся;

Ра́дуйся, от ю́ности води́тельству Ду́ха Свята́го преда́выйся.

Ра́дуйся, роди́телей боголюби́вых благоче́стие восприе́мый;

Ра́дуйся, целому́дрием и чистото́ю себе́ огради́вый.

Ра́дуйся, духо́вным наста́вником твои́м все́м се́рдцем внима́вый;

Ра́дуйся, почита́нием роди́телей благоволе́ние Бо́жие стяжа́вый.

Ра́дуйся, Иоа́нне, земли́ Росси́йския моли́твенниче преди́вный.

Конда́к 2.
Прови́дя, богоно́сне о́тче Иоа́нне, я́ко мно́гия беды́ и собла́зны гряду́т на Це́рковь Ру́сскую и ча́да Бо́жия гони́ма бу́дут, увеща́л еси́ лю́ди, глаго́ля: пока́йтеся, сто́йте в ве́ре правосла́вней, крепи́теся и сла́вите Го́спода, взыва́юще Ему́: Аллилу́иа.

И́кос 2.
Ра́зумом Боже́ственным наставля́емь, всеблаже́нне о́тче Иоа́нне, све́том и́стиннаго богопозна́ния все́х, приходя́щих к тебе́, просвеща́л еси́. Мы́ же, писа́ньми твои́ми науча́еми, вопие́м ти́ такова́я:

Ра́дуйся, ева́нгельския И́стины пла́менный служи́телю;

Ра́дуйся, глаго́лов жи́зни ве́чныя немо́лчный возвести́телю.

Ра́дуйся, пра́ведным житие́м твои́м Бо́гу угоди́вый;

Ра́дуйся, Це́рковь Бо́жию писа́нии твои́ми просла́вивый.

Ра́дуйся, Кре́ст Христо́в пред очи́ма твои́ма вы́ну созерца́вый;

Ра́дуйся, сораспя́тися Христу́ вседу́шне возжела́вый.

Ра́дуйся, Бо́га и бли́жних все́м се́рдцем возлюби́вый;

Ра́дуйся, лю́дем, в ско́рбех и печа́лех су́щим, утеше́ние подава́вый.

Ра́дуйся, Иоа́нне, земли́ Росси́йския моли́твенниче преди́вный.

Конда́к 3.
Си́лою Боже́ственныя благода́ти, я́ко свети́льник многосве́тлый Правосла́вныя Це́ркве, во гра́де Кроншта́дте просия́л еси́, пра́ведне Иоа́нне, и лю́ди, во тьме́ грехо́вней седя́щия и собла́зном богобо́рчества смуща́емыя, просвети́в, наставля́л еси́ пе́ти Бо́гу: Аллилу́иа.

И́кос 3.
Име́я любо́вь па́стырскую, пра́ведне о́тче Иоа́нне, поте́кл еси́ к лю́дем, не иму́щим кро́ва и хле́ба насу́щнаго и во отча́янии погиба́ющим, и си́х любо́вию и милосе́рдием Христу́ приобре́л еси́. Мы́ же благода́рне взыва́ем ти́ си́це:

Ра́дуйся, в хра́ме Бо́жии дерзнове́нный о лю́дех моли́твенниче;

Ра́дуйся, си́рым и вдови́цам ми́лостивый помо́щниче.

Ра́дуйся, окамене́нныя се́рдцем к покая́нию побужда́яй;

Ра́дуйся, неве́дущия Бо́га Боже́ственною прему́дростию просвеща́яй.

Ра́дуйся, стро́потных и злонра́вных ти́хое исправле́ние;

Ра́дуйся, лени́вых и малове́рных ре́вностное обличе́ние.

Ра́дуйся, Ца́рствия Бо́жия и пра́вды его́ пропове́дниче неустраши́мый;

Ра́дуйся, проти́ву ко́зней духо́в зло́бы поднебе́сных вои́телю неуста́нный.

Ра́дуйся, Иоа́нне, земли́ Росси́йския моли́твенниче преди́вный.

Конда́к 4.
Бу́рю злоче́стия, воздвиза́ему на Це́рковь на́шу святу́ю, прови́дя, о́тче Иоа́нне, я́ко ве́рный стра́ж до́ма Госпо́дня, поуча́л еси́ ча́да Бо́жия бде́ти, во и́стинней ве́ре пра́во ходи́ти и в за́поведех Госпо́дних непоро́чно пребыва́ти, да спасе́т Госпо́дь лю́ди Своя́, в покая́нии Ему́ зову́щия: Аллилу́иа.

И́кос 4.
Слы́шаще лю́дие Бо́жии, я́ко ты́ еси́, о́тче Иоа́нне, сосу́д избра́нный и благода́тных даро́в преиспо́лненный, не то́кмо от Кроншта́дта, но и от все́х конце́в земли́ к тебе́ притека́ху, я́ко да исцеле́ния и по́мощь улуча́т. С ни́ми же и мы́, я́ко хода́таю пред Бо́гом те́плу, уми́льно зове́м ти́:

Ра́дуйся, се́ятелю пра́вды, а́лчущия жи́зни ве́чныя напита́вый;

Ра́дуйся, обличи́телю непра́вды, ве́рныя от пре́лести грехо́вныя огражда́вый.

Ра́дуйся, заблу́ждшим и неразу́мным пу́ть к Бо́гу указу́яй;

Ра́дуйся, писа́ньми твои́ми ча́да Бо́жия наставля́яй.

Ра́дуйся, скорбя́щих и обремене́нных при́сное упова́ние;

Ра́дуйся, боля́щих и стра́ждущих благода́тное врачева́ние.

Ра́дуйся, сосу́де избра́нный, да́ры Ду́ха Свята́го ди́вно укра́шенный;

Ра́дуйся, свети́льниче всесве́тлый, на све́щнице церко́внем Бо́гом поста́вленный.

Ра́дуйся, Иоа́нне, земли́ Росси́йския моли́твенниче преди́вный.

Конда́к 5.
Я́ко звезда́ многосве́тлая, священноле́пным житие́м твои́м просия́л еси́, па́стырю Христо́в Иоа́нне! Ты́ бо ста́до, Бо́гом вруче́нное тебе́, от волко́в, губя́щих е́, огражда́л еси́, взыва́я: пока́йтеся и жи́ви бу́дете, отыми́те лука́вство от ду́ш ва́ших, да чи́стым се́рдцем Бо́га у́зрите и воспое́те Ему́: Аллилу́ия.

И́кос 5.
Ве́дая мно́жество люде́й, утеше́ния ча́ющих, я́ко апо́стол Христо́в, обходи́л еси́ гра́ды и ве́си Росси́йския, чудотво́рче изя́щне, сея́ сло́во Бо́жие, исцеля́я неду́жныя и малове́рныя исправля́я, бы́в все́м вся́, да вся́ко не́кия спасе́ши. Мы́ же боле́зни и труды́ твоя́ почита́юще, вопие́м ти́ си́це:

Ра́дуйся, я́ко си́лою благода́ти немощны́я укрепля́л еси́;

Ра́дуйся, я́ко моли́твами твои́ми гре́шныя к покая́нию приводи́л еси́.

Ра́дуйся, а́лчущия и жа́ждущия по за́поведи Госпо́дни насыща́вый;

Ра́дуйся, благове́стием Христо́вым лю́ди к пра́вде Бо́жией приводи́вый.

Ра́дуйся, моли́твами твои́ми малове́рныя в ве́ре укрепля́вый;

Ра́дуйся, си́лою Бо́жиею немощны́м здра́вие подава́вый.

Ра́дуйся, зе́млю на́шу благогове́йно с про́поведию обходи́вый;

Ра́дуйся, ми́р се́й, я́ко прему́дрое творе́ние Бо́жие, воспева́вый.

Ра́дуйся, Иоа́нне, земли́ Росси́йския моли́твенниче преди́вный.

Конда́к 6.
Пропове́дницы чу́дных дея́ний твои́х, блаже́нне Иоа́нне, яви́шася мно́зи: бога́тии и ни́щии, ста́рцы и ю́ноши, ты́ бо все́м любо́вь твою́ излива́л еси́ бога́тно. Те́мже не то́кмо правосла́внии, но и инове́рнии си́лою моли́тв твои́х ми́лость Бо́жию обрета́ху, пою́ще Бо́гу: Аллилу́иа.

И́кос 6.
Возсия́л еси́ житие́м твои́м в Це́ркви Правосла́вней па́че сия́ния се́вернаго, блаже́нне Иоа́нне, пу́ть пра́вый лю́дем указу́я. Те́мже моли́ Го́спода Си́л, да любо́вь свята́я утверди́тся в сердца́х на́ших, да ни ско́рбь, ни теснота́, ни сме́рть, ни бла́га ми́ра сего́ возмо́гут разлучи́ти на́с от любве́ Бо́жия, благода́рне тебе́ вопию́щих:

Ра́дуйся, ве́ру Правосла́вную в чистоте́ храни́ти завеща́вый;

Ра́дуйся, те́сным путе́м за́поведей Христо́вых ходи́ти поуча́вый.

Ра́дуйся, в ско́рбех и печа́лех су́щим ра́дость подава́вый;

Ра́дуйся, к и́стинному покая́нию гре́шники призыва́вый.

Ра́дуйся, Бо́жиим смотре́нием гряду́щая на́м возвеща́вый;

Ра́дуйся, от сете́й вра́жиих оте́чество на́ше огражда́вый.

Ра́дуйся, ми́р с Бо́гом свя́то храни́ти запове́давый;

Ра́дуйся, сло́вом и́стины и любо́вию ве́рным лю́дем послужи́вый.

Ра́дуйся, Иоа́нне, земли́ Росси́йския моли́твенниче преди́вный.

Конда́к 7.
Хотя́ Всеблаги́й Госпо́дь спасти́ лю́ди земли́ на́шея и угото́вати я́ к же́ртвенному служе́нию, испо́лни тя́, всеблаже́нне Иоа́нне, ду́ха проро́чества, прему́дрости и ра́зума, я́ко да, сло́вом твои́м наста́влени, во дни́ гряду́щих испыта́ний непоколеби́мо вопию́т Бо́гу: Аллилу́иа.

И́кос 7.
Но́ваго избра́нника Бо́жия, всеблаже́нне Иоа́нне, ве́дуще тя́ боголюби́вии лю́дие, на вся́к де́нь Же́ртву безкро́вную принося́ща и со дерзнове́нием за все́х Христу́ моля́щася, с ве́рою к тебе́ притека́ху и исцеля́хуся. Те́мже и мы́, испо́лненнии твои́х благодея́ний, с любо́вию воспева́ем ти́ сицева́я:

Ра́дуйся, у Престо́ла Бо́жия приле́жный о на́с моли́твенниче;

Ра́дуйся, и́стиннаго покая́ния усе́рдный пропове́дниче.

Ра́дуйся, я́ко неле́ностно рабо́тати Христу́ Бо́гу на́с наставля́еши;

Ра́дуйся, я́ко стоя́ти на боже́ственней стра́жи на́с призыва́еши.

Ра́дуйся, о́браз воздержа́ния и целому́дрия ве́рным яви́вый;

Ра́дуйся, па́ству твою́ от ересе́й и раско́ла му́дре защити́вый.

Ра́дуйся, су́щих во тьме́ неве́дения ре́вностный просвети́телю;

Ра́дуйся, ду́ш челове́ческих от суеты́ жите́йския ди́вный огради́телю.

Ра́дуйся, Иоа́нне, земли́ Росси́йския моли́твенниче преди́вный.

Конда́к 8.
Стра́нное чу́до ви́дим, явле́нное тебе́, преди́вный па́стырю Христо́в Иоа́нне! Тя́ бо и лю́ди ве́рныя Сама́ Пречи́стая Ма́ти Бо́жия я́ко миле́йшая ча́да Отца́ Небе́снаго нарече́. Сего́ ра́ди мы́, си́ми словесы́ утеша́еми, вопие́м Царю́ веко́в: Аллилу́иа.

И́кос 8.
Ве́сь жела́нием Боже́ственным распаля́емь, любве́ Христо́вы преиспо́лнился еси́, па́стырю до́брый! Мы́ же, неради́вии, сокро́вищ ея́ не стяжа́вше, мно́гих скорбе́й и печа́лей досто́йни яви́хомся. Оба́че, ве́дуще тя́ помо́щника неусы́пна, со упова́нием взыва́ем ти́ си́це:

Ра́дуйся, любве́ Христо́вы сосу́де избра́нный;

Ра́дуйся, явле́ния Бо́жия Ма́тере удосто́енный.

Ра́дуйся, Це́ркве Христо́вы неугаса́ющий свети́льниче;

Ра́дуйся, о все́м ми́ре хода́таю и печа́льниче.

Ра́дуйся, ми́ра и пра́вды Бо́жия ревни́телю;

Ра́дуйся, благоче́стия и добронра́вия насади́телю.

Ра́дуйся, Росси́йския Це́ркве похвало́ и украше́ние;

Ра́дуйся, земли́ на́шея благода́тное утвержде́ние.

Ра́дуйся, Иоа́нне, земли́ Росси́йския моли́твенниче преди́вный.

Конда́к 9.
Все́м лю́дем, в неве́дении, ско́рбех и печа́лех су́щим, воздви́же тя́ Госпо́дь па́стыря и чудотво́рца преди́вна, о́тче Иоа́нне, е́же гре́шныя на пу́ть пра́вый наста́вити, неве́рныя к Бо́гу обрати́ти и боля́щия исцели́ти, да согла́сно воспою́т вси́ спаси́тельную пе́снь: Аллилу́иа.

И́кос 9.
Вети́и многовеща́нии безгла́сни бы́ша о благода́ти, да́нней тебе́, Иоа́нне преди́вне, егда́ сло́вом еди́нем лю́ди от греха́ к покая́нию приводи́л еси́, неду́жныя от одра́ боле́зни воздвиза́л еси́, бе́сы изгоня́л еси́. Мы́ же я́ко чудотво́рца и уго́дника Бо́жия прославля́ем тя́ си́це:

Ра́дуйся, страстьми́ одержи́мых ди́вный врачева́телю;

Ра́дуйся, в долгонеду́жии су́щих безме́здный цели́телю.

Ра́дуйся, отпа́дшия к Бо́гу приводи́вый;

Ра́дуйся, безбо́жныя гро́зно облича́вый.

Ра́дуйся, ка́ющихся кро́ткий наказа́телю;

Ра́дуйся, ми́лостыни ще́дрый пода́телю.

Ра́дуйся, христиа́нскаго просвеще́ния и благоче́стия ре́вностный насади́телю;

Ра́дуйся, ю́ных по стезя́м пра́вды му́дрый путеводи́телю.

Ра́дуйся, Иоа́нне, земли́ Росси́йския моли́твенниче преди́вный.

Конда́к 10.
Спасти́ хотя́ лю́ди Росси́йския, ересьми́ и неве́рием соблазня́емыя, о́тче Иоа́нне, ко́зни бесо́вския обличи́л еси́ и правосла́вное испове́дание ве́ры тве́рдо яви́л еси́. Сего́ ра́ди Ца́рствия Небе́снаго дости́гл еси́, иде́же со А́нгелы и ли́ки святы́х непреста́нно о на́с мо́лиши Бо́га и пое́ши Ему́: Аллилу́иа.

И́кос 10.
Стена́ тве́рда яви́лся еси́ лю́дем стра́ждущим, от все́х конце́в земли́ Росси́йския к тебе́ приходя́щим, богоно́сне о́тче Иоа́нне. Те́мже и на́с, бе́дствующих и немощству́ющих душе́ю и те́лом, укрепи́ моли́твами твои́ми, и́миже огражда́еми, прино́сим ти́ похвалы́ сия́:

Ра́дуйся, свети́льниче неугаси́мый, огне́м Ду́ха Свята́го возжже́нный;

Ра́дуйся, кри́не благоуха́яй, росо́ю благода́ти Бо́жия напое́нный.

Ра́дуйся, лозо́ многопло́дная, благода́тными да́ры ве́рных пита́ющая;

Ра́дуйся, со́ле земли́, от грехо́внаго тле́ния на́с сохраня́ющая.

Ра́дуйся, в мо́ри жите́йстем обурева́емым ти́хое приста́нище;

Ра́дуйся, душе́вне и теле́сне изнемога́ющим благо́е вспоможе́ние.

Ра́дуйся, сердцеве́дче прему́дрый, ве́рныя лю́ди от мудрова́ния ми́ра сего́ огражда́яй;

Ра́дуйся, се́ятелю Христо́в, се́янием ева́нгельским се́рдца мно́гих увеселя́яй.

Ра́дуйся, Иоа́нне, земли́ Росси́йския моли́твенниче преди́вный.

Конда́к 11.
Пе́снь достохва́льную прино́сим ти́, о́тче Иоа́нне, все́м житие́м твои́м Бо́га просла́вльшему. И я́коже на земли́ за все́х и за вся́ Влады́ку ми́ра умоля́л еси́, си́це и ны́не на Небеси́ вознеси́ моли́твы твоя́, да во оте́чествии на́шем при́сно воспева́ется Бо́гу побе́дная пе́снь: Аллилу́иа.

И́кос 11.
Светоза́рную свещу́ ве́мы тя́, Бо́гом избра́нне о́тче Иоа́нне, ты́ бо и по отше́ствии от земны́х к Небе́сным у Престо́ла Бо́жия в со́нме святы́х и Си́л а́нгельских о на́с при́сно хода́тайствуеши. Сего́ ра́ди благода́рственно взыва́ем ти́ си́це:

Ра́дуйся, я́ко в по́двизе твое́м И́мя Пресвяты́я Тро́ицы ди́вно просла́вися;

Ра́дуйся, я́ко благоче́стием и ве́рою твое́ю Це́рковь Христо́ва украси́ся.

Ра́дуйся, па́стырей богому́дрый наста́вниче;

Ра́дуйся, и́нокинь до́брый учи́телю.

Ра́дуйся, супру́ги соу́з бра́чный свя́то храни́ти поуча́вый;

Ра́дуйся, ча́да почита́ти роди́тели своя́ увещава́вый.

Ра́дуйся, я́ко сострада́нием твои́м к бли́жним ско́рби и печа́ли утоля́ются;

Ра́дуйся, я́ко моли́твами твои́ми гре́шницы на пу́ть спасе́ния обраща́ются.

Ра́дуйся, Иоа́нне, земли́ Росси́йския моли́твенниче преди́вный.

Конда́к 12.
Благода́тных даро́в Ду́ха Свята́го испо́лни тя́ Госпо́дь, о́тче на́ш Иоа́нне, и́миже ре́вностно послужи́л еси́ наро́ду Бо́жию. Вознеси́ моли́тву к Бо́гу и о на́с, да ве́ры, наде́жды и любве́ дости́гше, прича́стницы жи́зни во Христе́ бу́дем и сподо́бимся воспева́ти благода́рственную пе́снь: Аллилу́иа.

И́кос 12.
Пою́ще твое́ достохва́льное житие́ на земли́ и сла́ву, ю́же стяжа́л еси́ на Небеси́, о́тче Иоа́нне, притека́ем во оби́тель тобо́ю созда́нную и припа́даем к гробни́це твое́й, от нея́же исцеле́ния и по́мощь улуча́юще, возглаша́ем ти́ сицева́я:

Ра́дуйся, пропове́дниче изря́дный, проро́ком и апо́столом до́бре поревнова́вый;

Ра́дуйся, па́стырю земли́ Росси́йския, Бо́гом избра́нный и просла́вленный.

Ра́дуйся, оби́тель преподо́бнаго покрови́теля твоего́ Иоа́нна Ры́льскаго ди́вно устро́ивый;

Ра́дуйся, оби́телию се́ю гра́д свята́го Петра́ сла́вно украси́вый.

Ра́дуйся, в возсозда́нную оби́тель и́нокини собира́яй;

ра́дуйся, я́ко оте́ц чадолюби́вый, при́сное попече́ние о ни́х име́яй.

Ра́дуйся, все́м притека́ющим к тебе́ ско́рое вспоможе́ние подава́яй;

Ра́дуйся, о́браз до́браго па́стыря сло́вом, житие́м и ве́рою на́м яви́вый.

Ра́дуйся, Иоа́нне, земли́ Росси́йския моли́твенниче преди́вный.

Конда́к 13.
О святы́й пра́ведный о́тче Иоа́нне, всеросси́йский свети́льниче и преди́вный чудотво́рче! Приими́ хвале́бное сие́ пе́ние на́ше и умоли́ Христа́ Бо́га Це́рковь Святу́ю в благоче́стии утверди́ти, еди́нство в сою́зе ми́ра и любве́ Христо́вы соблюсти́, да и мы́ воспое́м с тобо́ю Бо́гу: Аллилу́иа.

Этот конда́к чита́ется три́жды, зате́м и́кос 1-й и конда́к 1-й.

И́кос 1.
А́нгела све́тла, еще́ о́трок сы́й, я́ве узре́л еси́, о́тче Иоа́нне, и́же и рече́ ти́, я́ко повеле́нием Госпо́дним приста́влен храни́ти тя́ во все́х путе́х твои́х. Те́мже я́ко избра́нника Бо́жия ве́дуще тя́, взыва́ем си́це:

Ра́дуйся, благода́ти Бо́жия сосу́де избра́нный;

Ра́дуйся, сло́вом Бо́жиим измла́да наста́вленный.

Ра́дуйся, во о́трочестве явле́ния А́нгела Храни́теля сподо́бивыйся;

Ра́дуйся, от ю́ности води́тельству Ду́ха Свята́го преда́выйся.

Ра́дуйся, роди́телей боголюби́вых благоче́стие восприе́мый;

Ра́дуйся, целому́дрием и чистото́ю себе́ огради́вый.

Ра́дуйся, духо́вным наста́вником твои́м все́м се́рдцем внима́вый;

Ра́дуйся, почита́нием роди́телей благоволе́ние Бо́жие стяжа́вый.

Ра́дуйся, Иоа́нне, земли́ Росси́йския моли́твенниче преди́вный.

Конда́к 1.
Избра́нный уго́дниче и пресла́вный чудотво́рче, о́тче пра́ведный Иоа́нне, гра́да Кроншта́дта пресла́вное украше́ние! Ты́, от младе́нства Христу́ после́дуя, сораспя́тися Ему́ возжеле́л еси́ и, жи́знь твою́ в Не́м утверди́в, да́р чуде́с от Бо́га прия́л еси́ и сло́вом живоно́сным все́х напита́л еси́. Мы́ же, недосто́йнии, благода́рне вопие́м ти́: Ра́дуйся, Иоа́нне, земли́ Росси́йския моли́твенниче преди́вный.

Моли́тва.
О вели́кий чудотво́рче и преди́вный уго́дниче Бо́жий, богоно́сне о́тче Иоа́нне! При́зри на на́с и внемли́ благосе́рдно моле́нию на́шему, я́ко вели́ких дарова́ний сподо́би тя́ Госпо́дь, да хода́тай и при́сный моли́твенник за на́с бу́деши. Се́ бо, страстьми́ грехо́вными обурева́еми и зло́бою снеда́еми, за́поведи Бо́жия пренебрего́хом, покая́ния серде́чнаго и сле́з воздыха́ния не принесо́хом, сего́ ра́ди мно́гим ско́рбем и печа́лем досто́йни яви́хомся. Ты́ же, о́тче пра́ведне, ве́лие дерзнове́ние ко Го́споду и сострада́ние к бли́жним свои́м име́я, умоли́ Всеще́драго Влады́ку ми́ра, да проба́вит ми́лость Свою́ на на́с и поте́рпит непра́вдам на́шим, не погуби́т на́с гре́х ра́ди на́ших, но вре́мя на покая́ние ми́лостивно на́м да́рует. О свя́тче Бо́жий, помози́ на́м ве́ру правосла́вную непоро́чно соблюсти́ и за́поведи Бо́жия благоче́стно сохрани́ти, да не облада́ет на́ми вся́кое беззако́ние, ниже́ посрами́тся пра́вда Бо́жия в непра́вдах на́ших, но да сподо́бимся дости́гнути кончи́ны христиа́нския, безболе́зненныя, непосты́дныя, ми́рныя и Та́ин Бо́жиих прича́стныя. Еще́ мо́лим тя́, о́тче пра́ведне, о е́же Це́ркви на́шей Святе́й до сконча́ния ве́ка утвержде́нней бы́ти, Оте́честву же на́шему ми́р и пребыва́ние в пра́вде Бо́жией испроси́ и от все́х зо́л сохрани́, да та́ко наро́ди на́ши, Бо́гом храни́ми, в единомы́слии ве́ры и во вся́ком благоче́стии и чистоте́, в ле́поте духо́внаго бра́тства, трезве́нии и согла́сии свиде́тельствуют: я́ко с на́ми Бо́г! В Не́мже живе́м, и дви́жемся, и есмы́, и пребу́дем во ве́ки. Ами́нь.

И́на моли́тва.
О святы́й пра́ведный о́тче Иоа́нне, всеросси́йский свети́льниче и преди́вный чудотво́рче! Ты́ от младе́нческих ле́т Бо́гом избра́н бы́л еси́ и, ду́хом пламене́я, я́ко и́стинный па́стырь, житие́м, сло́вом, любо́вию, ве́рою, чистото́ю лю́дем послужи́л еси́. Сего́ ра́ди мо́лим тя́, пра́ведный о́тче: моли́ Человеколю́бца Бо́га Це́рковь Святу́ю ми́ром и тишино́ю огради́ти, зе́млю Росси́йскую во благоде́нствии сохрани́ти, па́стыри благода́ти и и́стины преизоби́льно испо́лнити, вла́сти умудри́ти, правосла́вное во́инство укрепи́ти, немощны́я исцели́ти, развраще́нныя испра́вити, ю́ныя воспита́ти, ста́рцы и вдови́цы уте́шити и на́м все́м во Ца́рствии Небе́снем сподо́битися со все́ми святы́ми прославля́ти Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.

Акафист святому праведному Иоанну Кронштадтскому, чудотворцу (другой акафист)
Составитель иеросхимонах Пахомий, келейной обители Вознесения Господня на Афоне. 1932 год.
Память: 02 января (20 декабря ст. ст.); 14 июня (01 июня ст. ст.)

Конда́к 1.
Избра́нному во иере́ех, ди́вному уго́днику Бо́жию Иоа́нну, па́стырю и учи́телю, о царе́х моли́твеннику, ско́рбных уте́шителю, земли́ Росси́йския све́тлому свети́льнику, все́ житие́ свое́ на служе́ние Бо́гу и бли́жним посвяти́вшему, и мно́жество гре́шников на покая́ние обрати́вшему; мно́гим же боля́щим исцеле́ние у Бо́га испроси́вшему, похвалы́ вознесе́м, я́ко хода́таю на́шему и ско́рому помо́щнику. Ты́ же, о́тче, я́ко име́яй дерзнове́ние ко Го́споду, от вся́ких на́с бе́д свобожда́й, да зове́м ти́ хвале́бно:

Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.

Икос 1.
Ангела-храни́теля своего́, еще́ шестоле́тен сы́й, в све́тлости неизрече́нней я́ве узре́л еси́, Иоа́нне, и́же и рече́ тебе́, я́ко по повеле́нию Госпо́дню всегда́ неви́димо сопрису́тствует и храни́т тя́ от все́х зо́л. Те́мже от ю́ности избра́нника Бо́жия тя́ ве́дуще, взыва́ем си́це:

Ра́дуйся, от младе́нства по предуве́дению Бо́гом избра́нный; ра́дуйся, от ю́ности в служе́ние Ему́ Того́ благода́тию призва́нный.

Ра́дуйся, а́нгела-храни́теля твоего́ из де́тства до́брыми нра́вы весели́вый; ра́дуйся, николи́же того́ чи́м опеча́ливый.

Ра́дуйся, яко незри́мый храни́тель тво́й я́ве тебе́ яви́ся; ра́дуйся, я́ко то́й всегда́ храни́ти тя́ обеща́ся.

Ра́дуйся, благочести́вых роди́телей ча́до возлю́бленное; ра́дуйся, те́ми изде́тска в стра́се Бо́жием воспита́нный.

Ра́дуйся, воздержа́нию от ю́ности себе́ обучи́вый; ра́дуйся, во убо́жестве и нищете́ млады́я дни́ своя́ препроводи́вый.

Ра́дуйся, я́ко благонра́вия твоего́ ра́ди благода́ть Бо́жия я́ве на тебе́ почива́ше; ра́дуйся, я́ко та́ лице́ твое́ всегда́ благоумиле́нно творя́ше.

Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.

Конда́к 2.
Ви́дим тя́, богому́дре Иоа́нне, от ю́на во́зраста благода́тию Бо́жиею осене́на бы́вша, и е́ю та́инственно на доброде́тельное житие́ наставля́ема и руководи́ма. Те́мже, иму́ще тя́ во о́браз на́м и подража́ние, уми́льно вопие́м Христу́ Бо́гу: Аллилу́ия.

Икос 2.
Ра́зум тво́й измла́да в изуче́ние Свяще́нных и оте́ческих Писа́ний углуби́в, Иоа́нне, и из ни́х восприя́л еси́ оби́льно во́ду жи́ву, от исто́чника Свята́го Ду́ха проистека́ющую. Те́мже мо́лим тя́, умоли́ блага́го Го́спода, да сподо́бит прича́стники бы́ти сея́ живи́тельныя струи́ и на́с, взыва́ющих ти́ си́це:

Ра́дуйся, от младе́нчества чи́ста себе́ от страсте́й соблюды́й; ра́дуйся, благода́ть свята́го креще́ния це́лу и невреди́му сохрани́вый.

Ра́дуйся, чте́ние Боже́ственных Писа́ний усе́рдно возлюби́вый; ра́дуйся, сокрове́нный в ни́х смы́сл пра́во и до́бре уразуме́вый.

Ра́дуйся, во уче́нии кни́жнем прилежа́ние приме́рное показа́вый; ра́дуйся, в любому́дрии есте́ственнем и духо́внем сла́вно преуспе́вый.

Ра́дуйся, любому́дрием твои́м ми́ра пре́лести ско́ро распозна́вый; ра́дуйся, те́х се́тей, я́ко оре́л высокопа́рный, му́дре избежа́вый.

Ра́дуйся, се́верныя Росси́йския страны́ чу́дное и све́тлое воспита́ние; ра́дуйся, мра́ка грехо́внаго в лю́дех разгна́ние.

Ра́дуйся, все́м притека́ющим к тебе́ ско́рое вспоможе́ние подава́яй; ра́дуйся, многомо́щное на́м пред Бо́гом заступле́ние явля́яй.

Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.

Конда́к 3.
Си́ла благода́ти Бо́жия, недостаю́щая восполня́ющая, оби́льно излия́ся на тя́, Иоа́нне приснопа́мятне, егда́ от святи́теля Христофо́ра во иере́я рукополо́жен бы́л еси́, и гра́ду Кроншта́дту па́стырь учине́н; отто́ле бо нача́л еси́ учи́ти лю́ди е́же ве́рно служи́ти Святе́й Тро́ице и пе́ти Ей: Аллилу́ия.

Икос 3.
Име́я любо́вь Боже́ственную в се́рдце свое́м, му́дре Иоа́нне, и уста́вы воздержа́ния стро́го соблюда́я, удо́бь побора́л еси́ страсте́й двиза́ния, николи́же те́ми запя́т бы́в. Те́мже, я́ко му́ж си́лен, изше́л еси́ на де́лание ни́вы Госпо́дни: сло́вом, я́ко ра́лом, разрыхля́я отверде́вшая и оледене́вшая сердца́ челове́ческая, согрева́я та́ моли́твою и теплото́ю любве́ твоея́, и насева́я в ни́х се́мена и́скренняго покая́ния и живы́я ве́ры. Сего́ ра́ди воспису́ем ти́ похвалы́ таковы́я:

Ра́дуйся, избра́нный сосу́де Бо́жия благода́ти; ра́дуйся, даро́в небе́сных вмести́лище.

Ра́дуйся, все́м се́рдцем и все́м помышле́нием твои́м Бо́га возлюби́вый; ра́дуйся, сего́ ра́ди и ча́да твоя́ духо́вная и́скренне Того́ люби́ти научи́вый.

Ра́дуйся, за́поведи Бо́жия и уста́вы Це́ркве о посте́х опа́сно храни́вый; ра́дуйся, любо́вь твою́ к Бо́гу и бли́жним дея́ньми и уче́нии твои́ми прояви́вый.

Ра́дуйся, от ю́ности над страстьми́ воцари́выйся; ра́дуйся, сла́вен победи́тель над те́ми яви́выйся.

Ра́дуйся, в ми́ре пожи́вый преми́рно; ра́дуйся, на земли́ му́дрствовавый небе́сно.

Ра́дуйся, ца́рства Правосла́вно-Росси́йскаго сто́лпе непоколеби́мый; ра́дуйся, Правосла́вия и до́брых обы́чаев блюсти́телю непозы́блемый.

Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.

Конда́к 4.
Бу́рею мно́гих бе́д и волне́ний жите́йских одержи́мым, на́м помога́й, о́тче Иоа́нне, я́коже и в животе́ твое́м помога́л еси́ все́м, с ве́рою к тебе́ притека́вшим, да вси́ тобо́ю вспомоществу́еми, благода́рно о тебе́ пое́м Бо́гу: Аллилу́ия.

Икос 4.
Слы́шав апо́стола глаго́люща: «на́ше житие́ на небесе́х е́сть», и измла́да возжела́в насле́довати е́, маловре́менное сие́ житие́ не во угожде́нии пло́ти и страсте́м ижди́л еси́, Иоа́нне, но во очище́нии души́ от по́мыслов грехо́вных. Те́мже, иму́ще тя́ во о́браз богоуго́днаго жития́ и помо́щника во благоче́стии, взыва́ем ти́ си́це:

Ра́дуйся, све́та ева́нгельскаго в на́ша дни́ све́тлое блиста́ние; ра́дуйся, омраче́нных ду́ш вседе́йственное просвеще́ние.

Ра́дуйся, я́ко в Боже́ственная Писа́ния ве́сь у́м тво́й впери́л еси́; ра́дуйся, в ни́х бо стезю́ пра́вую в Ца́рствие небе́сное обре́л еси́.

Ра́дуйся, я́ко вся́ дея́ния твоя́ све́т ми́ру бы́ша; ра́дуйся, я́ко тобо́ю Оте́ц Небе́сный ди́вно просла́вися.

Ра́дуйся, я́ко сло́во твое́ не бе́, я́коже кимва́л бряца́яй, ме́ртв, нечу́вствен; ра́дуйся, я́ко то́е бя́ше вои́стину жи́во и де́йственно.

Ра́дуйся, я́ко тобо́ю ме́ртвии ду́хом ве́рою оживля́ются; ра́дуйся, я́ко па́дшии в бе́здну грехо́вную тобо́ю к покая́нию возбужда́ются.

Ра́дуйся, [я́ко тебе́ во дни́ на́ша яви́ Госпо́дь земли́ Росси́йстей я́ко проро́ка и апо́стола; ра́дуйся,] я́ко в тебе́ неустраши́маго обличи́теля и кре́пкаго противобо́рца враго́м и́стины ве́рнии обрето́ша.

Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.

Конда́к 5.
Звезда́ многосве́тлая земли́ Росси́йския, мра́к грехо́вный просвеща́ющая, яви́лся еси́, свяще́нне Иоа́нне. Те́мже и ны́не пода́ждь просвеще́ние сыно́м Росси́йским, тьмо́ю заблужде́ния объя́тым и во вла́сть нечести́вых преда́вшихся, да позна́ют свое́ окая́нство, и обрати́вшеся ко Го́споду, в покая́нии возопию́т Ему́: Аллилу́ия.

Икос 5.
Ви́девше Росси́йстии наро́ди вели́каго тя́ благоче́стия пропове́дника и многомо́щна пред Бо́гом моли́твенника и предста́теля, во мно́жестве отовсю́ду к тебе́ притека́ху, ини́и же издале́ча письмена́ тебе́ посыла́ху, исцеле́ния в боле́знех, сове́та в недоуме́ниих и утеше́ния в ско́рбех прося́ще, и улучи́вше жела́нная, благода́рственно тебе́ взыва́ху:

Ра́дуйся, Иоа́нне, но́вый ми́ру свети́льниче; ра́дуйся, несре́дственный в моли́твах Бо́гу собесе́дниче.

Ра́дуйся, я́ко твоя́ моли́твы си́льны и многомо́щны Влады́ку умилостивля́ти; ра́дуйся, я́ко твое́ к Нему́ предста́тельство многоде́йственно бла́гость Его́ на щедрода́тельство подвиза́ти.

Ра́дуйся, я́ко тобо́ю, по ме́ре ве́ры, подаю́тся благода́тная исцеле́ния; ра́дуйся, я́ко неду́гующии прие́млют тобо́ю ско́рое неду́гов свои́х в здра́вие премене́ние.

Ра́дуйся, я́ко гре́шнии на покая́ние тобо́ю обраща́ются; ра́дуйся, я́ко безчи́ннии крамо́льницы тобо́ю вразумля́ются.

Ра́дуйся, я́ко безу́мнии глуми́телие над та́йнами ве́ры тобо́ю посрамля́ются; ра́дуйся, я́ко посмея́телие чуде́сных твои́х дея́ний тобо́ю подоба́ющее вразумле́ние прие́млют.

Ра́дуйся, скорбя́щих благода́тный уте́шителю; ра́дуйся, в недоуме́нии су́щих бла́гостный вразуми́телю.

Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.

Конда́к 6.
Пропове́дником и́стины, богоно́сным отце́м подража́я, всего́ себе́ на служе́ние Бо́гу и бли́жним вда́л еси́, и са́н свяще́нства нося́, поко́я не ве́дал еси́, слу́жбы Бо́жия в хра́ме при́сно соверша́я и в доме́х ве́рных моле́бныя пе́ния воспева́я, нужда́ющимся же ще́дро благотворя́, та́ко наименова́ние благотво́рца и безсре́бренника стяжа́л еси́, Иоа́нне. Те́мже и по успе́нии твое́м, Росси́йстии лю́дие прославля́ют и́мя твое́, и ве́чную па́мять тебе́ возглаша́юще, пою́т Бо́гу: Аллилу́ия.

Икос 6.
Возсия́вый от Де́вы Христо́с Бо́г на́ш и тьму́ идолобе́сия све́том Ева́нгелия разгна́вый, яви́ тя, о́тче Иоа́нне, ве́рна и ре́вностна пропове́дника Своея́ и́стины, клевре́ты лука́ваго извраща́емыя. Те́мже, я́ко име́яй дерзнове́ние ко Го́споду, изба́ви от те́х зло́бы и кова́рства все́х воспева́ющих ти́ такова́я:

Ра́дуйся, служи́телю Христо́в изря́дный; ра́дуйся, во иере́ех уго́дниче Того́ преизя́щный.

Ра́дуйся, я́ко бы́л еси́ до́му Бо́жия стра́ж неусы́пный; ра́дуйся, я́ко пасо́мым твои́м бы́л еси́ от та́тей духо́вных кре́пкий храни́тель.

Ра́дуйся, писа́ньми твои́ми мно́гих от любве́ мирски́я к любви́ Христо́ве подви́гнувый; ра́дуйся, веща́ньми твои́ми любо́вь Бо́жию к челове́ком, в искупле́нии и промышле́нии на́м явле́нную, изъяви́вый.

Ра́дуйся, де́йствие Ду́ха Бо́жия на сердца́ челове́ческая удобопости́жно сказа́вый; ра́дуйся, та́йну моли́твеннаго с Бо́гом собесе́дования я́ве указа́вый.

Ра́дуйся, целому́дрие в зако́нном супру́жестве твое́м чуде́сно сохрани́вый; ра́дуйся, мно́гая ча́да духо́вная покая́нием породи́вый.

Ра́дуйся, в сердца́х ве́рных благу́ю па́мять по себе́ оста́вивый; ра́дуйся, я́ко па́мять сия́, я́ко пра́ведника, незабве́нна пребу́дет во ве́ки.

Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.

Конда́к 7.
Хотя́ Всеблаги́й Госпо́дь уте́шити ве́рныя лю́ди Своя́ и отврати́ти беззако́нных от злы́х де́л и́х, воздви́же тя́, проро́ка земли́ на́шей, я́коже не́когда Ниневи́и, гра́ду вели́кому, Ио́ну: да пропове́си гне́в Бо́жий, гряду́щий вско́ре на зе́млю на́шу, е́же и сбы́сться по твоему́ веща́нию, и́бо непока́яни в горды́ни свое́й пребы́хом и не восхоте́хом с тобо́ю смире́нно пе́ти Христу́ Бо́гу: Аллилу́ия.

Икос 7.
Но́ва зна́мения гне́ва Бо́жия постиго́ша на́с, зане́ не восхоте́хом вня́ти богодухнове́нным твои́м глаго́лом: держа́ва бо Росси́йская паде́ся и лю́тым безбо́жником во вла́сть предаде́ся, и́же честны́я оби́тели и́ноческие разори́ша, святы́я хра́мы оскверни́ша, и вся́ благочести́выя лю́ди лю́те озло́биша, и мно́жество духо́внаго и мирска́го чи́на му́ченичестей сме́рти преда́ша. Те́мже из глубины́ души́ покая́ние Го́споду прино́сим, и к твое́й моли́тве прибега́ем, да проще́ние грехо́в на́ших и ми́лости Бо́жией сподо́бимся. Тебе́ же, я́ко предста́телю на́шему, уми́льно глаго́лем:

Ра́дуйся, покая́ния велегла́сный пропове́дниче; ра́дуйся, гряду́щаго гне́ва Бо́жия на лю́ди согреши́вшия нело́жный провозве́стниче.

Ра́дуйся, нече́стия людска́го громогла́сный обличи́телю; ра́дуйся, о исправле́нии те́х ре́вностный рачи́телю.

Ра́дуйся, ца́рства Правосла́вно-Росси́йскаго при животе́ твое́м кре́пкий опло́т бы́вый; ра́дуйся, от крамо́л во дни́ о́ны то́е сохрани́вый.

Ра́дуйся, Госуда́рей благочести́вых при́сный моли́твенниче и спобо́рниче; ра́дуйся, му́дрый те́х наста́вниче и храни́телю.

Ра́дуйся, о вла́сти ца́рстей, я́ко богоуста́вленной, мно́гая словеса́ провеща́вый; ра́дуйся, к послуша́нию и ве́рности зако́нной вла́сти то́й лю́ди тщали́во приводи́вый.

Ра́дуйся, моли́твами твои́ми престо́лы царе́й благочести́вых огражда́яй; ра́дуйся, суды́ пра́вы в лю́дех твори́ти те́х поуча́яй.

Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.

Конда́к 8.
Странноле́пный и ангелоподо́бный пу́ть жития́ земна́го соверши́л еси́, о́тче Иоа́нне: в ми́ре бо пожи́в в воздержа́нии и целому́дрии, и во всегда́шнем Бо́га славосло́вии вели́ким отце́м после́довал еси́. С ни́ми же ны́не на небеси́ Христу́ в весе́лии предстоя́, и моли́твы о ми́ре принося́, вы́ну пое́ши: Аллилу́ия.

Икос 8.
Вси́ правосла́внии лю́дие, я́коже в животе́ твое́м, та́ко и по преставле́нии, с ве́лиею любо́вию чту́т тя́, о́тче Иоа́нне, я́ко ве́лие дерзнове́ние к Бо́гу и́маши, и мо́лиши бла́гость Его́ о все́х к тебе́ притека́ющих, и та́ко взыва́ющих:

Ра́дуйся, блага́го ко́рене до́брое прозябе́ние; ра́дуйся, благочести́вых роди́телей честно́е рожде́ние и благо́е воспита́ние.

Ра́дуйся, я́ко ма́лая ве́сь Сура́, твоего́ ра́ди в не́й рожде́ния и воспита́ния, все́й земли́ Росси́йстей ве́дома сотвори́ся; ра́дуйся, я́ко гра́д Кроншта́дт твои́м в не́м служе́нием просла́вися.

Ра́дуйся, я́ко милосе́рдыми де́лы твои́ми вся́ земля́ Росси́йская напо́лнися; ра́дуйся, я́ко ве́сть о чу́днем и святе́м житии́ твое́м за преде́лы ея́ распространи́ся.

Ра́дуйся, я́ко писа́ньми твои́ми та́йна благода́тного с Бо́гом обще́ния изъясня́ется; ра́дуйся, я́ко си́ми писа́ньми све́т духо́внаго озаре́ния в сердца́ чту́щих я́ излива́ется.

Ра́дуйся, я́ко в писа́ниих твои́х чистота́ души́ твоея́ я́ве прозрева́ется; ра́дуйся, я́ко в ни́х, я́коже в зерца́ле, богоподо́бие души́ челове́ческия отобража́ется.

Ра́дуйся, я́ко богому́дрыми писа́ньми твои́ми не то́кмо лю́дие Росси́йстии, но и инозе́мнии ко благоче́стию своему́ назида́ются; ра́дуйся, я́ко те́ми писа́ньми и́стинная ве́ра возсиява́ет и мра́к ересе́й разгоня́ется.

Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.

Конда́к 9.
Вся́кое сло́во не довле́ет к похвале́ твое́й, о́тче Иоа́нне, ты́ бо Ду́хом Святы́м дви́жимь, от ю́ности Бо́гу усе́рдно послужи́л еси́: в изуче́нии Свяще́нных Писа́ний мно́га ле́та усе́рдно тружда́яся и ра́зум глубо́к стяжева́я, та́же о науче́нии отроко́в и о па́стве твое́й приле́жно пеки́йся, все́х поуча́л еси́ разу́мно пе́ти Бо́гу: Аллилу́ия.

Икос 9.
Вити́и нечисти́вии и суему́дреннии и ве́ры хули́телие тобо́ю я́ве посра́млени бы́ша во злоче́стии свое́м, правосла́внии же в ве́ре утверди́шася, боговеща́нными твои́ми глаго́лы наставля́еми. Те́мже, восхваля́юще тя́, взыва́ем си́це:

Ра́дуйся, цевни́це, боговеща́нная; ра́дуйся, гу́сли Ду́ха сладкозву́чныя.

Ра́дуйся, словесы́ и писа́ньми твои́ми догма́ты ве́ры уясни́вый; ра́дуйся, веща́ньми твои́ми ве́рных смы́слы в Правосла́вии утверди́вый.

Ра́дуйся, мно́гих коле́блющихся в и́стинней ве́ре утверди́вый; ра́дуйся, гордели́ваго в суему́дрии хули́теля та́инств Це́ркве Христо́вы небоя́зненно обличи́вый.

Ра́дуйся, я́ко тобо́ю полки́ богобо́рцев побежде́ни бы́ша; ра́дуйся, я́ко со́нмы пасо́мых твои́м па́стырским раче́нием Ца́рствие небе́сное улучи́ша.

Ра́дуйся, ра́зума боже́ственнаго му́дрый изъяви́телю; ра́дуйся, та́инств церко́вных благогове́йный соверши́телю.

Ра́дуйся, благонаде́жный на́ш в Ца́рствие небе́сное руководи́телю; ра́дуйся, пути́ спаси́тельнаго на́ш и́стинный учи́телю.

Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.

Конда́к 10.
Спасти́ хотя́ ду́шу твою́, полноту́ доброде́телей ева́нгельских в себе́ совокупи́л еси́, о́тче Иоа́нне: апо́стольское и святооте́ческое ве́ры испове́дание, му́ченическую в благоче́стии тве́рдость, всегда́шнее в моли́твах бо́дрствование, воздержа́ние и смире́ние, вку́пе же и по́двиги преподо́бных. Те́мже ны́не со святы́ми на небеси́ водворя́яся и непреста́нно Бо́га славосло́вя, помина́й на́с, сла́вную па́мять твою́ почита́ющих и пою́щих Бо́гу: Аллилу́ия.

Икос 10.
Царя́ Небе́снаго всеусе́рдный священнослужи́тель бы́в, о благоде́нствии земна́го оте́чества твоего́ ревнова́л еси́, правому́дренно поуча́я, е́же воздава́ти Бо́жие Бо́гови и ке́сареви ке́сарево. Сего́ ра́ди восхваля́ем тя́ си́це:

Ра́дуйся, ра́бе Бо́жий, благи́й и ве́рный; ра́дуйся, служи́телю Того́ усе́рдный.

Ра́дуйся, вся́ повеле́нная от Го́спода, тщали́во твори́вый; ра́дуйся, за́поведей Его́ иску́сный де́латель бы́вый.

Ра́дуйся, о вездесу́щии Бо́жии всегда́ помышля́вый; ра́дуйся, у́мным очесе́м свои́м Того́ вы́ну представля́вый.

Ра́дуйся, благочести́вых царе́й оте́чества твоего́, я́ко слу́г Бо́жиих, почита́вый; ра́дуйся, сло́вом твои́м и моли́твами в тру́днем по́двизе управле́ния и́м помога́вый.

Ра́дуйся, к попече́нию о благи́х Це́ркве и наро́да те́х подвиза́вый; ра́дуйся, от крамо́л и мяте́жей и́х оберега́вый.

Ра́дуйся, и ны́не о земли́ Росси́йстей и о все́х ца́рствах правосла́вных Бо́га умоля́яй; ра́дуйся, я́ко предста́тель еси́ все́х на тя́ наде́ющихся.

Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.

Конда́к 11.
Пе́сненными похвала́ми невозмо́жно е́сть изобрази́ти мно́жество о Бо́зе исправле́ний твои́х, о пречу́дне о́тче Иоа́нне, я́же соверши́л еси́ во все́м житии́ твое́м: немощны́я, моли́твами твои́ми, исцеля́я, бе́сы от челове́к изгоня́я, неду́говавшим пия́нством и ины́ми страстьми́ врачу́я, в нищете́ же и убо́жестве су́щия оби́льно ущедря́я, и все́м по коего́ждо потре́бе помога́я и благотворя́, во е́же благода́рно о тебе́ пе́ти Бо́гу: Аллилу́ия.

Икос 11.
Свети́льника све́тла и прозорли́вца ди́вна тя́ Госпо́дь во дне́х на́ших, провозвести́вша гряду́щий гне́в Его́ на ца́рство Росси́йское, зане́ непока́яхомся про́поведию твое́ю. Те́мже, я́ко проро́ка Бо́жия и провозве́стника Того́ суде́б, ублажа́ем тя́ и в покая́нии взыва́ем:

Ра́дуйся, прови́дче ди́вный; ра́дуйся, бу́дущих собы́тий предсказа́телю нело́жный.

Ра́дуйся, дре́вним покая́ния пропове́дником ра́вный; ра́дуйся, гряду́щаго гне́ва Бо́жия на нераска́янныя гре́шники возвести́телю.

Ра́дуйся, покая́ния сладкогла́сный глаша́таю; ра́дуйся, смяте́нных серде́ц умири́телю.

Ра́дуйся, многомо́щный на́ш пред Бо́гом хода́таю; ра́дуйся, благонаде́жный на́ш пред Ни́м предста́телю.

Ра́дуйся, до́брый слове́сных ове́ц па́стырю, мно́жество заблу́дших ду́ш взыска́вый; ра́дуйся, от у́з темни́чных и сме́рти мно́гих свободи́вый.

Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.

Конда́к 12.
Благода́ть Бо́жия, ю́же прия́л еси́ сугу́бо во cвяте́м креще́нии и во иере́йстем рукоположе́нии, не вотще́ в тебе́ бы́сть, о́тче Иоа́нне: раче́нием бо твои́м употреби́л еси́ сию́ на по́льзу мно́гим и во сла́ву Дарода́теля ея́; све́тлостию бо жития́ твоего́ и де́лы милосе́рдными вели́кий уго́дник пред Бо́гом яви́лся еси́, и от мно́жества у́ст, тобо́ю духо́вно и теле́сно облагоде́тельствованных, возно́сится Тому́ вели́кая пе́снь: Аллилу́ия.

Икос 12.
Пою́ще богоуго́дное твое́ от ю́ности житие́, и духо́вное от си́лы в си́лу восхожде́ние, ублажа́ем пра́ведную твою́ кончи́ну и сла́вное погребе́ние благода́тных твои́х моще́й, ве́чный поко́й обре́тших в созда́нней тобо́ю деви́чей оби́тели. Ве́руем же, я́ко и свята́я душа́ твоя́ упоко́ися в пресве́тлых ра́йских селе́ниих, я́же насле́довати помози́ и на́м, возглаша́ющим ти́ похвалы́ сицевы́я:

Ра́дуйся, тече́ние вре́менныя жи́зни ра́вно и богоуго́дно сконча́вый; ра́дуйся, ве́ру пра́вую непоро́чну сохрани́вый.

Ра́дуйся, ми́рною христиа́нскою кончи́ною пра́ведность твою́ извести́вый; па́дуйся, поко́й ве́чный на небеси́ со святы́ми получи́вый.

Ра́дуйся, ра́дости пра́ведных во оби́телех ра́йских причасти́выйся; ра́дуйся, со мно́жеством ду́ш, тобо́ю спасе́ние улучи́вших, блаже́нства ве́чнаго сподо́бивыйся.

Ра́дуйся, с ца́рственными новому́ченики Ца́рство небе́сное насле́дивый; ра́дуйся, с ни́ми Царю́ Сла́вы предстоя́й и о избавле́нии оте́чества на́шего от безбо́жных вра́г моли́твы вознося́й.

Ра́дуйся, вели́кий Правосла́вия побо́рниче; ра́дуйся, непреодоли́мый благоче́стия защи́тниче.

Ра́дуйся, со́нными явле́ньми пресла́вно чудотворя́й; ра́дуйся, иносла́вныя ко Правосла́вию приводя́й.

Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.

Конда́к 13.
О, всечестны́й о́тче Иоа́нне, не кроншта́дтский то́кмо, но и всеросси́йский, па́че же — всеми́рный свети́льниче и вели́кий Христо́в уго́дниче и чудотво́рче! Приими́ от на́с, недосто́йных, хвале́бное пе́ние сие́, и благоприя́тными твои́ми ко Бо́гу моли́твами изба́ви на́с от бе́д вре́менных и муче́ний ве́чных, да сподо́бимся с тобо́ю в Ца́рствии небе́снем ве́чно воспева́ти: Аллилу́ия.

[Се́й конда́к глаго́лется три́жды. Та́же и́кос 1-й: Ангела-храни́теля своего́... и конда́к 1-й: Избра́нному во иере́ех...]

Моли́тва свято́му пра́ведному отцу́ на́шему Иоа́нну, Кроншта́дтскому чудотво́рцу.
Святы́й пра́ведный о́тче на́ш Иоа́нне, вели́кий чудотво́рче и свети́льниче Ру́сския земли́! Ты́ во све́те пренебе́снем Христа́ Бо́га на́шего зри́ши, ми́лости Его́ за любо́вь твою́ сподобля́емь. Боже́ственныя благода́ти испо́лнен бы́в, Те́лом Христо́вым и Кро́вию Его́ при́сно пита́емь, изше́л еси́ на па́стырское де́лание да́же до ве́чера жи́зни твоея́. Оба́че не преста́л еси́ и ны́не от де́лания твоего́, во ве́ки живы́й во Христе́. Ве́мы, вели́кий па́стырю на́ш, я́ко свяще́нствовавшу ти́, ини́и милосе́рдию тобо́ю научи́шася, друзи́и же от нищеты́ и паде́ний грехо́вных тобо́ю возведе́нии бы́ша и зело́ возлюби́ша тя́, вся́кому добру́ и́х науча́юща. Те́мже мо́лим тя́: научи́ и на́с добро́ твори́ти, греха́ огреба́тися, о спасе́нии ду́ш на́ших пещи́ся, и во вся́ком де́ле бла́зе бу́ди на́м помо́щник благи́й, тебе́ бо сказа́ Бо́г ну́жды люде́й Свои́х, цели́телю и благоде́телю на́ш! Ве́мы и сия́, пра́ведный о́тче, я́ко вели́кий моли́твенник и чу́дный соверши́тель Безкро́вныя Же́ртвы ты́ бы́л еси́, испо́лнен сы́й ду́ха ве́ры, наде́жды и любве́ христиа́нския. Се́ бо Боже́ственную Литурги́ю соверша́я и о вручи́вших себе́ моли́твенному твоему́ заступле́нию пла́менно моля́ся, я́ко оте́ц чадолюби́вый все́х любо́вию твое́ю объима́л еси́, поминове́ние о ни́х творя́, да омы́ются грехи́ и́х святе́йшею Кро́вию Христо́вою. Те́мже и мы́, гре́шнии, упова́юще на любо́вь и по́мощь твою́, усе́рдно взыва́ем ти́: моли́ся, вели́кий па́стырю Ру́сския земли́, о бра́тии твое́й, архипа́стырех и па́стырех на́ших, да поживу́т по во́ли Бо́жией, я́коже пре́жнии пасты́ри, Бо́гу угоди́вшии, и да внуши́т Госпо́дь моле́ния и́х на вся́к ча́с. Моли́, чудотво́рче преди́вный, Всеми́лостиваго Спа́са на́шего о все́х неду́гующих и многообра́зне бе́дствующих, утеше́ния ча́ющих, да исцеле́ние и по́мощь прии́мут и да уте́шении бу́дут. Моли́ся Бо́гу, о́тче Иоа́нне, о де́тех и о́троцех уча́щихся, я́ко да позна́ют ти́и ве́ру Христо́ву и да поживу́т по ве́ре, возлюби́в кре́пко Го́спода на́шего, Пречи́стую Влады́чицу Богоро́дицу и вся́ святы́я, с ни́ми же и тя́, вои́стину до́брого отца́ и наста́вника и́х, и да соблюда́ют и́х а́нгели-храни́тели и́х, я́коже и тя́ а́нгеле-храни́телю тво́й соблюда́ше от прираже́ний вра́жиих. Ду́хом апо́стольския ре́вности о ве́ре Правосла́вной пламене́я, гро́зно и непреста́нно облича́л еси́ хулы́ искази́телей Ева́нгелия Христо́ва. Те́мже мо́лим тя́: порази́ и ны́не, уго́дниче Бо́жий, вся́ собла́зны и разделе́ния, толи́ко умно́жившияся ны́не, да поживу́т лю́дие правосла́внии в едине́нии и ми́ре, и в ве́рности Ма́тери свое́й, Це́ркви Христо́вой. К си́м же и сию́ вели́кую мольбу́ с ве́рою ти́ прино́сим: предста́тельствуй, вели́кий чудотво́рче и проро́че, ро́ду твоему́ явле́нный, у стра́шнаго престо́ла Го́спода Сла́вы, да пощади́т и поми́лует стра́ждущую зе́млю Ру́сскую, в не́й же толи́ко просия́ любы́ твоя́. И да изба́вит Госпо́дь лю́ди Своя́ от и́га лю́тых безбо́жник и го́рькаго мучи́тельства и́х. О, пречу́дный о́тче Иоа́нне, вели́кий иере́ю Бо́га Вы́шняго! Се́ о́браз тво́й честны́й лобыза́ем, ве́дуще, я́ко вели́кого засту́пника и уте́шителя дарова́ тя́ Госпо́дь лю́дем Свои́м. Испроси́ у́бо на́м ду́х покая́ния и обновле́ния и́стиннаго. Ве́мы, я́ко во дни́ земна́го жития́ твоего́ мно́гое мно́жество люде́й во святе́м хра́ме, го́рдость и смуще́ние отло́жше, пла́чуще и рыда́юще, о та́йных свои́х гресе́х я́ве ка́ющееся, чрез тя́ живи́тельное разреше́ние от Бо́га Спа́са приима́ху. Якоже тогда́ над ни́ми, простри́ и ны́не неви́димо благословля́ющую ру́ку твою́, и проще́ние грехо́в на́ших у Бо́га Милосе́рднаго испроси́. Посо́бствуй у́бо на́м про́чее вре́мя живота́ на́шего богоуго́дне преити́, да сподо́бимся святы́ми твои́ми моли́твами дости́гнути небе́снаго Ца́рствия, и та́мо вку́пе с тобо́ю, отце́м, моли́твенником и засту́пником на́шим, сла́вити Ди́внаго во святы́х Свои́х Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Акафист святому праведному Иоанну Кронштадтскому, чудотворцу (третий акафист)
Память: 02 января (20 декабря ст. ст.); 14 июня (01 июня ст. ст.)

Кондак 1
Избраннаго и вернаго во иереех Божиих восхваляем тя, богоносне отче Иоанне! Ты бо Евангельской Истине последуя, Христу всем сердцем сораспялся еси, струю чудес и исцелений всем верным источаеши и ко спасению их направляеши. Мы же, молитвами твоими в вере, надежде и любви укрепляеми, благодарно зовем ти: Радуйся, Иоанне, земли Российския молитвенниче предивный.

Икос 1
Ангела молитвы и проповедника покаяния ведаем тя, блаженне отче. Ходатайствуеши бо за нас у Престола Божия, да в разум истинный приидем и жизнь свою на путь спасения направим, взывая тебе:

Радуйся, благодати Божия сосуде избранный; радуйся, Премудрость Божию, яко млеко матери, сладостно впитавый.

Радуйся, Ангелу хранителю твоему, яко Товия древле, вседушевне последовавый; радуйся, боголюбивых родителей целомудренный плод чистоты непререкаемый.

Радуйся, в повиновении родителям своим благословение Божие стяжавый; радуйся, от юности твоея водительству Духа Святаго прилежавый.

Радуйся, всем сердцем твоим Бога возлюбивый; радуйся, в меру возраста Христова богомудренно возраставый.

Радуйся, Иоанне, земли Российския молитвенниче предивный.

Кондак 2
Предвидя, яко многия беды и соблазны грядут на Церковь Русскую и чада Божии в смятении будут, яко пастырь добрый, душу свою за паству свою готовый положити, глаголал еси людям: «Убойтесь соблазнов, стойте в вере Православной, мужайтесь, и крепитесь, и славьте Господа, взывая Ему: Аллилуиа».

Икос 2
Разумом Божественным просвещаемый, богословия струи животочныя источил еси, всеблаженне отче Иоанне, в посте и молитве словеса Божия со слезами в сердца верных сея, к свету истиннаго богопознания чад земли нашея призывал еси. Тии же, в любви Божии укрепляющеся, пояху тебе таковая:

Радуйся, Евангельския Истины пламенный ревнителю; радуйся, глаголов жизни вечныя неумолкаемый возвестителю.

Радуйся, равноангельным житием твоим достойно украшенный; радуйся, у Престола Божия о людях ходатаю верный.

Радуйся, от юности Церкви Христовой всем сердцем прилепивыйся; радуйся, Христу сораспятися о людях вседушевне возгоревыйся.

Радуйся, любовию Христовою сердце твое, аки ниву благоплодную, возделавый; радуйся, людям, в скорбех и печалех изнемогшим, состраданием и молитвою облегчение подававый.

Радуйся, Иоанне, земли Российския молитвенниче предивный.

Кондак 3
Силою Божественныя благодати, яко углем горящим у жертвенника Божия возжжен, светильниче многосветлый во граде Кронштадте просиял еси, отцев наших похвало, отче Иоанне. Сице бо во тьме греховней обуреваемых и соблазном богоборчества колеблемых зарею Божественнаго разума просветил еси и научил еси пети: Аллилуиа.

Икос 3
Имея любовь велию к людем, Кровию Сына Божия искупленным, потекл еси к неимущим благочестия, трезвения и страха Божия и отчаянием обуреваемым, пастырю добрый Иоанне, сих же кротостию и смиренномудрием покорив Христу, научил еси благодарно взывати тебе таковая:

Радуйся, сущих во тьме и сени смертней премудрый просветителю; радуйся, о спасении людей, в пучине греховней обуреваемых, благостный попечителю.

Радуйся, неведущих Бога и окамененных сердцем к покаянию пробуждаяй; радуйся, Божественною премудростию в писаниях твоих нас озаряяй.

Радуйся, сердец строптивых и злонравных благодатное умягчение; радуйся, ленивых и коснеющих совестию щедролюбивое обличение.

Радуйся, Слова Божия и правды Его проповедниче неустрашимый; радуйся, житием благонравным козни духов злобы поднебесных победивый.

Радуйся, Иоанне, земли Российския молитвенниче предивный.

Кондак 4
Бурю злонравия воздвизаему на Церковь нашу Святую ведал еси, отче Иоанне, яко верный страж дома Господня, научал еси овцы Христовы бдети и право ходити в истенней вере и в заповедех Господних непорочно пребывати, да чистым сердцем и усты непрестанно взывают к Богу победную песнь: Аллилуиа.

Икос 4
Слышаще о тебе, яко ты еси сосуд избранный и благодатных даров преисполненный, подвигов милосердия и нищелюбия ревнитель, вдов и сирот, страждущих и обремененных утешитель и о нераскаянных грешницех молитвенник слезный, не токмо от Кронштадта, но и от всех конец земли потекоша к тебе людие Божии, исцеления от тебе получаху. С ними же и мы, о гресех своих кающеся, яко ходатаю о нас пред Богом теплу, умильно зовем ти:

Радуйся, сеятелю правды, слезами твоими землю нашу освятивый; радуйся, обличителю неправды, души верных от прелести греховныя свободивый.

Радуйся, свете сердец кротких и разумных, путь к Богу указуяй; радуйся, ученьми твоими, яко кормилица кроткая, нас греяй и питаяй.

Радуйся, всех скорбящих и обремененных неложное упование; радуйся, болящих и от духов злых страждущих благодатное врачевание.

Радуйся, сосуде избранный, дары Духа Святаго туне верным источивый; радуйся, не о людех токмо, но и о скотех милосердовавый.

Радуйся, Иоанне, земли Российския молитвенниче предивный.

Кондак 5
Яко небосветлая звезда священнолепным житием твоим просиял еси, пастырю Христов Иоанне! Богом дарованное тебе наследие от волков, губящих е, словом Божиим ограждал еси, пастырски взывая: возьмите Крест Господень, на Нем же Христос Царь Славы рукописание грехов наших изглади, в Немже миру востание во веки. Мы же, сим знаменающеся, поем с тобою Богу победную песнь: Аллилуиа.

Икос 5
Видевше тя Российстии людие дивно на свещнице церковней сияюща, правды Божия ищуще, к тебе притекаху, и яко другу Христову, исповедаху грехи своя. Мы же, обремененнии многими прегрешениями, к тебе, блаженне Иоанне, прибегаем и тако глаголем:

Радуйся, яко силою благодати, яже в тебе, немощнии духом в любви Божии укрепляются; радуйся, яко твоими молитвами кающиеся плена греховнаго свобождаются.

Радуйся, яко труды твоими алчущии и жаждущии Правды Христовой насыщаются; радуйся, яко благовестием твоим врази Христовы посрамляются.

Радуйся, яко молитвами твоими силы ада содрагаются; радуйся, яко воздеянием рук твоих, врата небесная верным отверзаются.

Радуйся, в умилостивление за народ наш молитву, яко кадило благовонное, херувимски Богу приносивый; радуйся, за неведущих правды и любве Божия молитися нас подвигнувый.

Радуйся, Иоанне, земли Российския молитвенниче предивный.

Кондак 6
Проповедницы чудных деяний твоих, блаженне Иоанне, явишася мнози: богатии и нищии, старцы и юноши. Ты бо всем любовь свою изливал еси. Темже не токмо православнии, но и иновернии силою молитв твоих милость Божию обретаху, поя Богу: Аллилуиа.

Икос 6
Возсиял еси житием твоим в Церкви Православней лучезарнее сияния севернаго, светом Евангелия Христова Отечество наше просвещал и от сетей вражиих чада ея ограждал. Темже и ныне молим Господа Сил, да любовь святая утвердится в сердцах наших, во еже ни скорбь, ни теснота, ни смерть не возмогут нас разлучить от любве Божия. И тако достигше сего, тебе воззовем:

Радуйся, яко Божиим смотрением грядущая на ны предвозвестивый; радуйся, тесным путем в заповедех Божиих ходити нас научивый.

Радуйся, в скорбех и печалех сущим источник радости в Бозе указавый; радуйся, оную радость, яко зеницу ока, свято хранити нам завещавый.

Радуйся, десницею и шуйцею оружие Правды Божия содержавый; радуйся, в словесе истины и любви нелицемерней Сыну Громову уподобивыйся.

Радуйся, порфирою покаяния всех облекаяй; радуйся, диадимою благодати славно увенчанный.

Радуйся, Иоанне, земли Российския молитвенниче предивный.

Кондак 7
Хотя Всеблагий Господь спасти люди земли нашея и, яко злато в горниле огненнем, очистити я, вложи в уста твоя, всеблаженне, дух премудрости и разум провидца, во еже чрез покаяние сердечное и сокрушение слезное преуготовити я, в вере непоколебимых, к жертвенному служению, да со всеми святыми, в земле Российстей просиявшими, ангельски вопиют Богу: Аллилуиа.

Икос 7
Новаго избранника Божия, всеблаженне Иоанне, ведяще тя у Алтаря Господня за всех молитвою слезною Христу сраспинающася, боголюбивии людие с верою к тебе притекаху и душевне и телесне исцеляхуся. Темже и мы, в немощи сущии, молим тя прилежно: воздвигни руце твои и не премолчи за ны ко Господу, якоже отец о чадех своих, да умножит Господь милость Свою на нас, приносящих ти сицевая:

Радуйся, у Престола Божия прилежный о нас печальниче и ходатаю; радуйся, покаяния слезнаго усердный глашатаю.

Радуйся, образе неусыпнаго делания, Христу Богу работати прилежно нас наставляеши; радуйся, яко на Божественней страже веры апостольския стояти нас утверждаеши.

Радуйся, образ воздержания и целомудрия добре показавый; радуйся, суеверия, ереси и злохуления от стада твоего отсекавый.

Радуйся, сущих во тьме неведения славный просветителю; радуйся, душ человеческих от суеты житейския мудрый восхитителю.

Радуйся, Иоанне, земли Российския молитвенниче предивный.

Кондак 8
Странное чудо видим на тебе, предивный пастырю Христов Иоанне! Сама бо Пречистая Матерь Божия ублажи тя и последующих тебе и с радостию благоволение Божие всем возвести: о милейшие вы чада Отца Небеснаго! Сице бо радость Церкви Небесныя о подвизе земныя предвозвести. Сего ради и мы, надеждею на предстательство о нас Матери Господа Сил согреваеми, вопием Царю всех веков: Аллилуиа.

Икос 8
Весь желанием Божиим распаляем, носитель любве Христовы явился еси, пастырю добрый. В ней бо милость и истина сретостася, правда и мир облобызастася; всякая же лесть упразднися, еретическое же злонравие, яко тля, попалися, скорби же человеческия елеем милосердия твоего утолишася. Мы же, нерадивии, сокровищ сих не стяжахом, праведным судом Божиим многим скорбем и печалем достойни явихомся. Но, ведуща тя помощника неусыпна, умильно зовем ти:

Радуйся, любве Христовой неутомимый носителю; радуйся, мира и правды ревностный сеятелю.

Радуйся, веры православныя незыблемый хранителю; радуйся, благочестия и добронравия насадителю.

Радуйся, о всем мире печальниче и слезный молитвенниче; радуйся, Церкве Христовой немеркнущий светильниче.

Радуйся, отцев наших похвало, нам же надеждо и утешение; радуйся, Богоизбранный пастырю, Святыя Руси благодатное украшение.

Радуйся, Иоанне, земли Российския молитвенниче предивный.

Кондак 9
Всем сущим в бедах и скорбех житейских воздвиже Господь на радость пастыря и чудотворца предивна Иоанна, да хромыя и расслабленныя, слепыя и от духов злых томимыя исцелит, в пагубнем пиянстве и супружестей неверности растлеваемыя к непостыдней жизни призовет, а яже во озлоблении сущия к Богу приведет и сице в душах верных царство Правды Божия насадит, да воспоем вси спасительную песнь Богу: Аллилуиа.

Икос 9
Витии многовещаннии недоумеют изъяснити силу молитвы твоея, Иоанне предивне, егда три юноши, дерзнувшия поглумитися о тебе и молитве твоей, спасительне наказал еси. Узрев же я кающихся и слезно молящихся, исцеление злохулителю от Бога испросил еси. Тии же, познавше молитвы твоея силу чудодейственную и любве твоея милосердие теплейшее, яко Божия провидца, ублажиша тя похвалами таковыми:

Радуйся, благое икономство чина своего богомудренно соблюдый; радуйся, данный тебе залог, Тело Христово, цел и невредим до последняго твоего издыхания сохранивый.

Радуйся, скрижали Богоначертанныя обою Заветов достойне возвестивый; радуйся, Церковь Христову благочестием пастыря добра прославивый.

Радуйся, истиннаго просвещения и христианскаго благочестия ревностный насадителю; радуйся, кающихся грешников, сирых и убогих милостивый покровителю.

Радуйся, мудрый путеводителю, стези правды юным указуяй; радуйся, судие нелицеприятный, зломудрствующия любовию наказуяй.

Радуйся, Иоанне, земли Российския молитвенниче предивный.

Кондак 10
Спасти хотя души ближних своих, ересьми и маловерием обуреваемыя, противу кознем диавольским воздержанием и смирением вооружился еси, отче Иоанне, апостольское и святоотеческое веры исповедание твердо сохранив. Жертвенною же любовию Христу сраспинаяся, душу твою за спасение народа Божия положив, Царствия Небеснаго достигл еси, идеже со Ангелы и лики святых непрестанно Бога славословя, поминай нас, славную память твою празднующих и поющих Богу: Аллилуиа.

Икос 10
Стена твердая бысть любовь твоя ко Господу, в ней же утвердися сердце твое, богоносне отче Иоанне. Сего ради всем, притекающим к тебе с верою, прибежище и утверждение явился еси, да всяческая Христу приобрящеши. Темже и нам, к тебе припадающим, буди стена крепка и ограждение непреодолимое, да не посмеются о нас, хотящия нам злая, во еже в мире и любве Христове пребывати и приносити сия похвалы:

Радуйся, светильниче неугасимый, огнем Духа Святаго возжженный; радуйся, крине, присно благоухаяй, росою благодати Божия напоенный.

Радуйся, росо сладкоплодная, благодатными дары верных оживотворяющая; радуйся, соле земли, от греховнаго тления нас сохраняющая.

Радуйся, в море житейстем обуреваемым тихое пристанище; радуйся, яко душевне и телесне изнемогающим о помощи Божией умоляеши.

Радуйся, сердцеведче предивне, верныя от лжемудрствования ограждаяй; радуйся, силою молитвы чистыя союз супружеския верности укрепляяй.

Радуйся, Иоанне, земли Российския молитвенниче предивный.

Кондак 11
Песнь достохвальную приносим ти, всеблаженне отче Иоанне, всем житием твоим прославившему Бога. И якоже видехом тя на земли долу у Престола Господня за всех и за вся Владыку мира умолявшаго, сице и ныне на Небеси горе вознеси молитвы твоя, во еже непоколебимей быти Церкви нашей, да из рода в род в Отечестве нашем благочестно славится Имя Триединаго Бога поющими Ему: Аллилуиа.

Икос 11
Светозарную свещу, во мраце жития сущим, зрим тя, Богом избранне отче Иоанне, ты бо на Небесех у Престола Божия в сонме святых и Сил Небесных о нас присно ходатайствуеши, воззри на нас, чад твоих, облегчи наша скорби и исцели наша недуги, да зовем ти:

Радуйся, яко в подвизе твоем Имя Пресвятыя Троицы дивно прославися; радуйся, яко благочестием веры твоея Церковь Христова украсися.

Радуйся, яко состраданием к ближним твоим скорби, и болезни, и печали всяческия утоляются; радуйся, яко молитвами твоими кающиися грешницы Царствию Небесному приуготовляются.

Радуйся, спасительных благ земных и небесных щедрый подателю; радуйся, от враг видимых и невидимых надежный избавителю.

Радуйся, яко в земном Едеме, Церкви Христовой, подвигом добрым просиял еси; радуйся, яко доброты райския, уготованная праведным, восприял еси.

Радуйся, Иоанне, земли Российския молитвенниче предивный.

Кондак 12
Благодатных даров Духа Святаго кладезь преисполненный яви в тебе Господь, отче наш Иоанне, да тобою и мы сих причастницы будем и тако познаем милость Божию к нам, яко не отступит, ниже посрамит нас Господь, егда благодарными усты и чистым сердцем, уповающе на милость благоутробия Его, воспоем Ему: Аллилуиа.

Икос 12
Поюще твое достохвальное житие на земли и славу, юже стяжал еси на Небеси, молим тя, блаженне Иоанне, вознеси о нас молитвы Богу, да помиловани будем в день судный и, спасаеми твоими молитвами, тако тебе воззовем:

Радуйся, богоизбранне и богопрославленне пастырю земли Российския; радуйся, яко воспел еси имя Божие, аки орган мусикийский.

Радуйся, пророком и апостолом добре поревновавый; радуйся, бежати гнева Божия и творити плоды покаяния мудре наставивый.

Радуйся, об Отечестве и народе нашем теплый молитвенниче; радуйся, веры православныя истинный исповедниче.

Радуйся, пресветлый лучу, путь к жизни вечней осияваяй; радуйся, неисчерпаемую благость Божию нам открываяй.

Радуйся, трапезо неоскудеваемая, от неяже монаси и мирстии питаются; радуйся, учителю Правды Божия, еюже старцы и юноши украшаются.

Радуйся, яко ихже даде тебе Господь, сотворил еси я Богу в радование; радуйся, яко от небожителей приял еси о Господе целование.

Радуйся, Иоанне, земли Российския молитвенниче предивный.

Кондак 13

О всеблаженне отче Иоанне, всероссийский пресветлый светильниче и предивный чудотворче! Приими хвалебное сие пение и умоли Христа Бога в мире и благочестии утвердити Святую Церковь, нас же всяких бед избавити и в единомыслии веры в союзе любве Христовы соблюсти, да единеми усты и единем сердцем воспоем с тобою Богу: Аллилуиа.

Этот кондак читается трижды, затем 1-й икос «Ангела молитвы…» и 1-й кондак «Избраннаго и вернаго…».

Молитва первая
О великий угодниче Христов, святый праведный отче Иоанне Кронштадтский, пастырю дивный, скорый помощниче и милостивый предстателю! Вознося славословие Триединому Богу, ты молитвенно взывал:

Имя Тебе - Любовь: не отвергни меня, заблуждающагося.

Имя Тебе - Сила: укрепи меня, изнемогающаго и падающаго.

Имя Тебе - Свет: просвети душу мою, омраченную житейскими страстями.

Имя Тебе - Мир: умири мятущуюся душу мою.

Имя Тебе - Милость: не переставай миловать меня.

Ныне благодарная твоему предстательству всероссийская паства молится тебе: христоименитый и праведный угодниче Божий!

Любовию твоею озари нас, грешных и немощных, сподоби нас принести достойныя плоды покаяния и неосужденно причащатися Святых Христовых Тайн. Силою твоею веру в нас укрепи, в молитве поддержи, недуги и болезни исцели, от напастей, врагов видимых и невидимых избави.

Светом лика твоего служителей и предстателей Алтаря Христова на святыя подвиги пастырскаго делания подвигни, младенцем воспитание даруй, юность настави, старость поддержи, святыни храмов и святыя обители озари!

Умири, чудотворче и провидче преизряднейший, народы страны нашея, благодатию и даром Святаго Духа избави от междоусобныя брани, расточенныя собери, прельщенныя обрати и совокупи Святей Соборней и Апостольстей Церкви.

Милостию твоею супружества в мире и единомыслии соблюди, монашествующим в делах благих преуспеяние и благословение даруй, малодушныя утеши, страждущих от духов нечистых свободи, в нуждах и обстояниих сущих помилуй и всех нас на путь спасения настави.

Во Христе живый, отче наш Иоанне, приведи нас к Невечернему Свету жизни вечныя, да сподобимся с тобою вечнаго блаженства, хваляще и превозносяще Бога во веки веков. Аминь.

Молитва вторая
О великий чудотворче и предивный угодниче Божий, богоносне отче Иоанне! Призри на нас и внемли благосердно молению нашему, яко великих дарований сподоби тя Господь, да ходатаем и присным молитвенником за нас будеши. Се бо страстьми греховными обуреваеми и злобою снедаеми, заповеди Божия пренебрегохом, покаяния сердечнаго и слез воздыхания не принесохом, сего ради многим скорбем и печалем достойни явихомся.

Ты же, отче праведный, велие дерзновение ко Господу и сострадание к ближним своим имея, умоли Всещедраго Владыку мира, да пробавит милость Свою на нас и потерпит неправдам нашим, не погубит нас грех ради наших, но время на покаяние милостивно нам дарует.

О, святче Божий, помози нам веру православную непорочно соблюсти и заповеди Божии благочестно сохранити, да не обладает нами всякое беззаконие, ниже посрамится Правда Божия в неправдах наших, но да сподобимся достигнути кончины христианския, безболезненныя, непостыдныя, мирныя и Таин Божиих причастныя.

Еще молим тя, отче праведне, о еже Церкви нашей Святей до скончания века утвержденней быти, Отечеству же нашему мир и пребывание испроси и от всех зол сохрани, да тако народы наши, Богом хранимии, в единомыслии веры и во всяком благочестии и чистоте, в лепоте духовнаго братства, трезвении и согласии свидетельствуют: яко с нами Бог! В Нем же живем и движемся, и есмы, и пребудем во веки. Аминь.

Канон святому праведному Иоанну Кронштадтскому
Припев: Святы́й пра́ведный Иоáнне, моли́ Бо́га о на́с.
Память: 02 января (20 декабря ст. ст.); 14 июня (01 июня ст. ст.)
Глас 1.


Пе́снь 1.
Ирмо́с: Пе́снь побе́дную пои́м вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Чистоту́ помышле́ний да́ждь ми́, Спа́се мо́й, е́же воспе́ти чистото́ю А́нгелом подо́бнаго, пра́веднаго Иоа́нна пресви́тера, я́ко А́нгела Го́спода Вседержи́теля.

Е́же люби́ти Христа́ и Ему́ служи́ти, Иоа́нне свя́те, де́лом и сло́вом испо́лнил еси́, во свяще́нстве ве́рным о́браз бы́в сло́вом и житие́м.

Иоа́нну Крести́телю подража́я, покая́ния пропове́дниче, о́тче Иоа́нне пра́ведне, о́браз воздержа́ния, целому́дрия и де́вственника чистоту́ яви́л еси́.

Богоро́дичен: Облагодати́ на́с, Ма́ти Бо́жия, е́же к богоугожде́нию житие́ на́ше упра́вити, да Твое́ю по́мощию и моли́твами пра́веднаго Иоа́нна живо́т ве́чный насле́дуем.

Пе́снь 3.
Ирмо́с: Ка́мень, его́же небрего́ша зи́ждущии, се́й бы́сть во главу́ у́гла: То́й е́сть Ка́мень, на Не́мже утверди́ Це́рковь Христо́с, ю́же от язы́к искупи́.

Апо́стольски труди́лся еси́ от у́тра па́стырскаго жития́ твоего́ да́же до ве́чера, о́тче Иоа́нне, николи́же в любви́ к Бо́гу и бли́жнему оскудева́я.

Небе́снаго Ца́рствия взыску́я, усе́рдный де́латель благи́х на земли́ яви́лся еси́, моли́твою ве́ры неду́ги исцеля́я и заблу́ждшия к покая́нию призыва́я, свя́те.

Никого́же отвраща́лся еси́, то́кмо отверга́ющихся Го́спода Иису́са Христа́ и Це́ркве Его́ Святы́я, Е́йже сыны́ ве́ка сего́ противля́ются. Но и о си́х заблу́ждших в ско́рби мно́зей моле́ние твое́ к Бо́гу возноси́ти не престава́л еси́.

Богоро́дичен: Едине́ние ве́рных в Це́ркви Сы́на Твоего́ и Бо́га на́шего сохрани́, Пречи́стая Де́во Ма́ти, да при́сно в любви́ Христо́ве дру́г ко дру́гу утверди́мся.

Седа́лен, гла́с 2:
Мы́, немощни́и, к тебе́, пра́ведне Иоа́нне, я́ко си́льному моли́твеннику пред Бо́гом, притека́ем, прося́ще неду́гом душе́вным и теле́сным исцеле́ния, в ско́рбех о гресе́х на́ших покая́нием избавле́ния, стране́ на́шей и лю́дем ея́ ми́рное жи́тельство и вся́ потре́бная ко спасе́нию.

Богоро́дичен: Отрокови́це благода́тная, Ма́ти безневе́стная, Наде́ждо на́шего спасе́ния, да́ждь на́м в ве́ре утвержде́ние и во благочести́вем житии́ преуспе́яние, в ско́рбех и печа́лех утеше́ние. Тя́ бо, я́ко Ро́ждшую Спа́са Христа́, при́сно велича́ем.

Пе́снь 4.
Ирмо́с: Ду́хом прови́дя, проро́че Авваку́ме, Словесе́ воплоще́ние, пропове́дал еси́, вопия́: внегда́ прибли́житися ле́том — позна́ешися, внегда́ приити́ вре́мени — пока́жешися. Сла́ва си́ле Твое́й, Го́споди.

Ло́жная мудрова́ния сыно́в ве́ка сего́, возстаю́щих проти́ву и́стины Святы́я Це́ркве Христо́вы, отве́ргл еси́, свя́те Иоа́нне, сло́вом и житие́м Правосла́вие утвержда́л еси́, поя́: сла́ва си́ле Твое́й, Го́споди.

И́мя Христо́во при́сно в се́рдце нося́, свято́му Богоно́сцу Игна́тию подража́я, в себе́ само́м вся́кое прираже́ние греха́ истреби́л еси́, поя́: сла́ва си́ле Твое́й, Го́споди.

Си́ла Бо́жия, в не́мощи соверша́ющаяся, яви́ тя́ ди́внаго чудотво́рца, цели́теля неду́жных и немощны́х, учи́теля покая́ния, моли́твы де́лателя, пою́ща: сла́ва си́ле Твое́й, Го́споди.

Богоро́дичен: Яви́лася еси́, Влады́чице Богоро́дице, благода́тная Помо́щница пра́ведному пресви́теру Иоа́нну, при́сно моля́щемуся Ти́ и Сы́ну Твоему́ и благода́рно пою́щему: сла́ва си́ле Твое́й, Го́споди.

Пе́снь 5.
Ирмо́с: Тво́й ми́р да́ждь на́м, Сы́не Бо́жий: ино́го бо, ра́зве Тебе́ бо́га не зна́ем, и́мя Твое́ имену́ем, я́ко Бо́г живы́х и ме́ртвых еси́.

Бла́го мне́, я́ко смири́л мя́ еси́, Го́споди,— си́це моли́лся еси́, терпя́ поноше́ния хули́телей твои́х, свя́те Иоа́нне, храня́ ми́р се́рдца Твоего́ непреста́нною моли́твою и незло́бием.

Обле́кся во Христа́ ве́рою и прича́стием Святы́х Та́ин, бы́л еси́ тве́рд, я́ко скала́, глаго́ля: мне́ Христо́с полнота́ все́х бла́г, живо́т и ми́р, превосходя́й вся́к у́м.

Госпо́дни Трапе́зы при́сно причаща́яся, стяжа́л еси́ све́т Христо́в, просвеща́ющий вся́каго челове́ка, гряду́щаго в ми́р. Си́м же и на́с просвети́, Иоа́нне светоно́сче, тя́ почита́ющих.

Богоро́дичен: Ужасо́шася вся́ческая о Боже́ственней сла́ве Твое́й, Пречи́стая Де́во, о́бщники сла́вы Твоея́ соде́лай и на́с, Тя́ при́сно ублажа́ющих.

Пе́снь 6.
Ирмо́с: Проро́ка Ио́ну подража́я, вопию́: живо́т мо́й, Бла́же, свободи́ из тли́ и спаси́ мя́, Спа́се ми́ра, зову́ща: сла́ва Тебе́.

Оживля́я ду́шу непреста́нною ко Го́споду моли́твою, си́це взыва́л еси́, Иоа́нне богому́дре: Го́споди, да́ждь ми́ люби́ти вся́каго челове́ка, я́ко самаго́ себе́. Сию́ доброде́тель помози́ и на́м стяжа́ти.

Призыва́я и́мя Бо́жие во спасе́ние твое́, спасе́нию мно́гих послужи́л еси́. Да пребу́дем и мы́ в едине́нии с Бо́гом и в любви́ между́ собо́ю, мо́лимтися, о́тче Иоа́нне.

Ра́зум богопросвеще́нный стяжа́л еси́, Иоа́нне прему́дре, о Святе́й Тро́ице богосло́вствуя, ре́кл еси́: высота́ и́стины сея́ животво́рна душе́, в простоте́ се́рдца ве́рующей.

Богоро́дичен: Изба́вителя на́шего неизрече́нно ро́ждшая, Пресвята́я Де́во, бу́ди на́м гре́шным прибе́жище спасе́ния и ве́чныя жи́зни Хода́таица.

Конда́к, гла́с 3:
Дне́сь па́стырь Кроншта́дтский предстои́т Престо́лу Бо́жию и усе́рдно мо́лит о ве́рных Христа́ Пастыренача́льника, обетова́ние да́вшаго: сози́жду Це́рковь Мою́, и врата́ а́дова не одоле́ют е́й.

И́кос:
Восхва́лим, ве́рнии, ди́внаго па́стыря Кроншта́дтскаго, благода́ти тезоимени́таго, свети́льника, присногоря́щаго у Престо́ла Святы́я Тро́ицы, с Богоро́дицею и со все́ми святы́ми земли́ Росси́йския моля́щагося о спасе́нии все́х, и́мя Госпо́дне призыва́ющих, да укрепи́тся в стране́ на́шей Правосла́вие си́лою Христа́ Пастыренача́льника, обетова́ние да́вшаго: сози́жду Це́рковь Мою́, и врата́ а́дова не одоле́ют е́й.

Пе́снь 7.
Ирмо́с: Су́щим в пещи́ отроко́м Твои́м, Спа́се, не прикосну́ся, ниже́ стужи́ о́гнь. Тогда́ трие́, я́ко еди́неми усты́, поя́ху и благословля́ху, глаго́люще: благослове́н Бо́г оте́ц на́ших.

Наста́ви на́с, па́стырю до́брый, жи́зни во Христе́, по сло́ву бо твоему́, вели́ко де́лание е́сть, е́же побежда́ти гре́х, в на́с живу́щий. Да не опали́тся душа́ на́ша пла́менем его́, помоли́ся.

Очище́ние на́ше и избавле́ние е́сть Христо́с Спаси́тель, Ему́же ты́, па́стырю пречу́дный, о на́шем духо́внем возрожде́нии, чрез покая́ние и исправле́ние, помоли́ся.

Си́лою Ду́ха Свята́го в непреста́нней моли́тве безстра́стие стяжа́вый, до́брый па́стырю Иоа́нне, страсте́й любогрехо́вных на́м изба́витися помоли́ся.

Богоро́дичен: Яви́ на́м ми́лость Твою́, Богоро́дице Де́во, Ма́ти Живота́, к Тебе́ с ве́рою притека́ющим и Сы́ну Твоему́ и Бо́гу покая́ние принося́щим.

Пе́снь 8.
Ирмо́с: Его́же ужаса́ются А́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́дие, и превозноси́те во вся́ ве́ки.

Ще́дрою руко́ю твое́ю ми́лостыню прося́щим подава́л еси́, Иоа́нне ми́лостиве. Не ве́де бо шу́йца, е́же твори́ десни́ца твоя́, тщету́ бо земна́го стяжа́ния на Небе́сная премени́л еси́.

Иму́щему дано́ бу́дет и преизбу́дет, рече́ Госпо́дь, та́ко и ты́, о́тче Иоа́нне, тща́нием ве́лиим благода́ть Ду́ха Свята́го стяжа́л еси́, е́юже и на́с моли́твами твои́ми ны́не уще́дри.

Хране́ние усто́м полага́я, николи́же су́етная возглаго́лал еси́, Иоа́нне, зако́на Госпо́дня взыску́я, и на́с в не́м ходи́ти при́сно науча́еши.

Богоро́дичен: Тя́, Богоро́дицу, вы́шшую Небе́с и чи́стшую све́тлостей со́лнечных, в пе́снех немо́лчных воспева́ют Херуви́ми и Серафи́ми. С ни́миже и мы́, недосто́йнии, Тя́ ублажа́ем.

Пе́снь 9.
Ирмо́с: Живоприе́мный Исто́чник приснотеку́щий, светоно́сный Свети́льник благода́ти, Хра́м одушевле́нный, Се́нь пречи́стую, Небесе́ и земли́ простра́ннейшую, Богоро́дицу, ве́рнии, велича́ем.

Иису́са Христа́ Пастыренача́льника о́браз в себе́ нося́, Иоа́нне, угото́вал еси́ по вся́ дни́ ду́шу твою́ за па́ству полага́ти и во гресе́х погиба́ющих к Бо́гу обраща́ти.

Принося́щих ти́ похвалу́ сию́, о́тче Иоа́нне, не отри́ни, но ми́лость Христа́ Бо́га испроси́ к проще́нию мно́гих прегреше́ний.

Очи́ма твои́ми при́сно взира́я ко Го́споду, о́тче Иоа́нне, врата́ се́рдца твоего́ отве́рста Ему́ име́л еси́, да отве́рзется и на́м две́рь покая́ния моли́твами твои́ми.

Богоро́дичен: Христа́ Бо́га на́шего, пре́жде ве́к от Отца́ рожде́ннаго без ма́тере, Ро́ждшагося же от Тебе́ без отца́ на́с ра́ди, моли́, Чи́стая Богоневе́сто, да спасе́ние улучи́м, Тя́ велича́юще.

Свети́лен:
Ве́сь испо́лнился еси́ све́та Христо́ва, освяти́в себе́ Бо́гови, просвети́ и на́с све́том благода́ти Ду́ха Свята́го моли́твами твои́ми, Иоа́нне светоно́сне.

Комментарии

Комментарии не найдены ...
Добавлять комментарии могут только
зарегистрированные пользователи!
 
Имя или номер: Пароль:
Регистрация » Забыли пароль?
© LogoSlovo.ru 2000 - 2020, создание портала - Vinchi Group & MySites