И́кос 5.
Ви́девши пра́веднии Иоаки́м и А́нна ро́ждшуюся от ни́х Богоотрокови́цу Мари́ю, о Не́йже А́нгел Бо́жий не́кая чу́дная и ди́вная те́м провозвести́, я́ко киво́ту Бо́жию, То́й послужи́ша, воспитава́юще и храня́ще Ю́, я́коже зе́ницу о́ка. Те́мже и мы́ похваля́юще Богоотце́в, сподо́бившихся роди́тельми бы́ти таковы́я Дще́ри, Де́ве Мари́и ра́достно воспева́ем:
Ра́дуйся, Пречи́стая Де́во, я́ко по рождестве́ Твое́м роди́телие Твои́ вельми́ возликова́ху; ра́дуйся, я́ко в явле́нии Твое́м в ми́р А́нгели и челове́цы согла́сно возра́довахуся.
Ра́дуйся, я́ко о Тебе́ вси́ проро́цы многообра́зне предглаго́лаху; ра́дуйся, я́ко еди́н от ни́х Врата́ми затворе́нными, и́н же Горо́ю преосене́нною Тя́ именова́ху.
Ра́дуйся, я́ко вся́ пресла́вная дре́вле та́инственно о Тебе́ предглаго́лано бы́ша; ра́дуйся, я́ко Градо́м и Селе́нием Бо́жиим псало́мская уста́ Тя́ наименова́ша.
Ра́дуйся, седмосве́щным свети́льником, я́ко седмию́ дара́ми Свята́го Ду́ха испо́лнена бы́ти име́вшая, предука́занная; ра́дуйся, позлаще́нною трапе́зою с хле́бами предложе́ния, я́ко Хле́б Жи́зни, Христа́, роди́ти име́вшая, предука́занная.
Ра́дуйся, Пречи́стая Де́во, Ма́терию Спаси́теля ми́ра от ве́ка предъизбра́нная.
Конда́к 6.
Пропове́дник богоно́сных веща́ния и глаго́лы исполня́я, изволе́нием Зижди́теля тва́ри на земли́ яви́лася еси́, Пресвята́я Де́во, естества́ на́шего цве́те, Ада́ма же и Е́вы воззва́ние и на пе́рвую добро́ту возведе́ние. Те́мже вси́ ве́рнии в рождестве́ Твое́м ра́дость обре́тши, духо́вно торжеству́ющим, пою́ще ди́вному в Сове́те Свое́м Бо́гу на́шему: Аллилу́иа.
И́кос 6.
Возсия́ в рождестве́ Твое́м, Пречи́стая, заря́ спасе́ния на́шего, во исполне́ние Боже́ственнаго смотре́ния, и́мже еди́на Ты́ от все́х родо́в досто́йна яви́лася еси́ пло́ть заимода́ти Зижди́телю Твоему́, прише́дшему спасти́ ро́д на́ш от дре́вния пра́отеческия кля́твы. Сего́ ра́ди взыва́ем Ти́ си́це:
Ра́дуйся, Ада́ма и Е́вы воззва́ние; ра́дуйся, дре́вния кля́твы разреше́ние.
Ра́дуйся, сено́внаго зако́на коне́ц и но́выя благода́ти нача́ло; ра́дуйся, промышле́ния Боже́ственнаго Таи́нница и на де́лания блага́я на́с при́сно наставля́ющая.
Ра́дуйся, еди́на во все́х ро́дех досто́йно обре́тшаяся бы́ти Ма́терию Бо́га-Сло́ва; ра́дуйся, и на́м но́вым во Христе́ лю́дем духо́вная Ма́ти я́вльшаяся.
Ра́дуйся, Ма́терним Твои́м попече́нием николи́же на́с оставля́ющая; ра́дуйся, в сы́ны и дще́ри Сы́ну Твоему́ досто́йны и благоуго́дны на́с приуготовля́ющая.
Ра́дуйся, Пречи́стая Де́во, Ма́терию Спаси́теля ми́ра от ве́ка предъизбра́нная.
Конда́к 7.
Хотя́ще обе́ты своя́ Го́сподеви возда́ти, пра́веднии роди́телие Твои́, Пресвята́я Де́во, триле́тствующую Тя́ отрокови́цу приведо́ша в хра́м Госпо́день со сла́вою и ра́достию мно́гою, первосвяще́нник же (Заха́рия), Ду́хом Бо́жиим объя́тый, введе́ Тя́ во Свята́я Святы́х, я́же проо́бразом то́кмо бы́ша Твоея́ Святы́ни. Ты́ бо вмести́ла в Себе́ не киво́т Заве́та, но святы́х Святе́йшаго Сы́на Бо́жия, во утро́бе Твое́й де́вственней пло́ть восприя́вшаго. Ему́же Ты́ с ли́ки деви́ческими вы́ну воспева́ла еси́: Аллилу́иа.
И́кос 7.
Но́вое и пресла́вное промышле́ние Боже́ственное бы́сть о Тебе́, Де́во Мари́е. В хра́ме бо Бо́жием жи́тельствующи пи́щу от ру́к А́нгельских принима́ла еси́, Пресвята́я. Те́мже мо́лим Тя́: напита́й на́с пи́щею благода́тною, да возрасте́м духо́вно в му́жа соверше́нна и Тебе́, Всецари́це, похва́льная возопие́м:
Ра́дуйся, преукраше́нная доброде́тельми, Отрокови́це, в хра́ме Бо́жием жи́ти и А́нгелом Собесе́днице бы́ти сподо́бльшаяся; ра́дуйся, посыла́вшуюся Тебе́ Бо́гом пи́щу от А́нгелов во Свята́я Святы́х принима́вшая.
Ра́дуйся, небе́сным хле́бом во хра́ме чуде́сно воспита́нная; ра́дуйся, к вели́кому та́инству воплоще́ния Сы́на Бо́жия та́мо предугото́ванная.
Ра́дуйся, я́ко повеле́нием Бо́жиим А́нгели на земли́ Тебе́ усе́рдно служа́ху; ра́дуйся, я́ко ти́и ны́не на Небесе́х, я́ко Цари́це, благогове́йно Тебе́ слу́жат.
Ра́дуйся, я́ко и мы́ недосто́йнии пе́сньми хвале́бными при́сно Тя́ велича́ем; ра́дуйся, я́ко и ро́ждших Тя́ Богоотце́в всегда́ ублажа́ем и в моли́твах и́х призыва́ем.
Ра́дуйся, Пречи́стая Де́во, Ма́терию Спаси́теля ми́ра от ве́ка предъизбра́нная.
Конда́к 8.
Стра́нное рождество́ Пречи́стыя Де́вы ви́девше, устрани́мся су́етнаго ми́ра, у́м на Небеса́ прело́жше, иде́же Богома́терь во сла́ве предстои́т Сы́ну Своему́ и Бо́гу, хода́тайствующи пред Ни́м о все́х ве́рных, всесла́вное рождество́ Ея́ (и в хра́м введе́ние) любо́вию пра́зднующих и вопию́щих Бо́гу: Аллилу́иа.
И́кос 8.
Вся́ тва́рь в рождестве́ Твое́м, Пречи́стая, обре́те ра́дость, печа́ль праоте́ческую потребля́ющую: произше́дшим бо от Тебе́ Христо́м Бо́гом, па́дшее во гре́х преслуша́ния естество́ на́ше от паде́ния воста́ и па́ки любе́зно Зижди́телю сотвори́ся. Те́мже уми́льно Ты́ взыва́ем:
Ра́дуйся, всеми́рныя ра́дости предвозвеще́ние; ра́дуйся, та́инство от ве́ка сокрове́ннаго явле́ние.
Ра́дуйся, Е́юже паде́ния воста́хом; ра́дуйся, Е́юже пре́жде отринове́нное естество́ на́ше и́стее Бо́гу присво́ися.
Ра́дуйся, Е́юже Иоаки́м и А́нна поноше́ния безча́дия свободи́шася; ра́дуйся, Е́юже безпло́дие серде́ц на́ших в благопло́дие примени́ся.
Ра́дуйся, Е́юже оби́лие бла́г ве́чных ве́рным от Го́спода подае́тся.
Ра́дуйся, Пречи́стая Де́во, Ма́терию Спаси́теля ми́ра от ве́ка предъизбра́нная.
Конда́к 9.
Вси́ А́нгели Бо́жии не ве́девшии та́йны Боговочелове́чения в Сове́те Триипоста́снаго Божества́ от ве́ка сокрове́нныя и напосле́док Де́вою Мари́ею явле́нныя, вельми́ удивле́ни бы́ша, зря́ще, ка́ко Дщи́ Иоаки́ма и А́нны необы́чно естеству́ же́нскому, во Свята́я Святы́х введе́ся. Те́мже недоуме́нием объя́ти бы́вше, благогове́йно вопия́ху: Аллилу́иа.
И́кос 9.
Вети́я дре́внейший, всему́дрый в царе́х Изра́илевых Соломо́н, прови́дя рождество́ Твое́, Пречи́стая, в Пе́снех Пе́сней со удивле́нием возглаша́ша: “Кто́ Сия́, проница́ющая, а́ки у́тро, добра́, я́ко луна́, избра́нна, я́ко со́лнце”. Те́мже Це́рковь ликовству́ющи в пра́зднице Твое́м, ве́село Тебе́ вопие́т:
Ра́дуйся, невече́рняго дне́ Богове́дения у́тро светле́йшее, в зако́нней се́ни, я́ко во мра́це, возсия́вшее; ра́дуйся, солнцеобра́зная Де́во, и́стинное Со́лнце — Христа́, де́вственным воплоще́нием в ми́р вве́дшая и те́м вся́ просвети́вшая.
Ра́дуйся, светови́дная стихи́я, су́щественно прия́вшая Бо́га, живу́щаго во све́те непристу́пнем; ра́дуйся, Свои́м ма́лым чре́вом объя́вшая Безпреде́льнаго, вся́ концы́ вселе́нныя объе́млющаго.
Ра́дуйся, по́лная луно́, све́т боже́ственный непосре́дственно восприе́млющая и на́с те́м озаря́ющая; ра́дуйся, чисте́йшее зерца́ло, в не́мже мно́гая соверше́нства Бо́жия чу́дно и ве́рно изобража́ются.
Ра́дуйся, соверше́нством Твои́х доброде́телей и на́с к тому́ же подвиза́ющая; ра́дуйся, немощны́я на́ши си́лы к творе́нию до́брых де́л подкрепля́ющая.
Ра́дуйся, Пречи́стая Де́во, Ма́терию Спаси́теля ми́ра от ве́ка предъизбра́нная. Конда́к 10.
Спасти́ хотя́ ро́д челове́ческий от перворо́дныя кля́твы, ди́вное смотре́ния Своего́ та́инство сотвори́ Госпо́дь: избра́ бо Тя́, Пречи́стая, от ро́да Авраа́мля и Дави́дова, и от Тебе́ безсе́менно воплоти́тися благоизво́ли, преше́д уста́вы естества́, но и тя́ произведе́ от заматоре́вша и непло́дна ко́рене Иоаки́ма и А́нны пра́ведников. Те́мже рождество́ Твое́ (и в хра́м вхожде́ние) дне́сь пра́зднующи и ро́ждших Тя́ пе́сньми восхваля́ющи, вопие́м Бо́гу: Аллилу́иа.
И́кос 10.
Царю́ Небе́сный, спасе́ния на́шего ра́ди хотя́ на земли́ яви́тися и с челове́ки пожи́ти, черто́г свя́т воплоще́ния Своего́, Тя́, Пречи́стая, предугото́ва, пода́в пло́д безча́дной А́нне, сле́зно с супру́жником Свои́м, моли́вшимся о разреше́нии своего́ непло́дства. Те́мже мо́лим Тя́, Богома́ти: разреши́ непло́дие ду́ш на́ших, да возмо́жем принести́ Бо́гу пло́д благи́х де́л доброде́тели, взыва́юще Ти́ си́це:
Ра́дуйся, пресве́тлый Черто́же безсе́меннаго Бо́жия воплоще́ния; ра́дуйся, одушевле́нная Пала́то, в жили́ще все́х Царя́ предугото́ванная.
Ра́дуйся, светле́йший о́блаче, и́мже Седя́щий на престо́ле Божества́ к на́м сни́де; ра́дуйся, Посре́днице зако́на и благода́ти, запечатле́ние Ве́тхаго и Но́ваго Заве́тов.
Ра́дуйся, неувяда́емая Лозо́, прекра́сный цве́т — Спаси́теля ми́ра, произрасти́вшая; ра́дуйся, благово́нное я́блоко, от непло́дове произра́стшее и Христу́ благоуго́дно я́вльшееся.
Ра́дуйся, и на́с, певце́в Твои́х, благоуго́дны Христу́ предста́вити тща́щаяся; ра́дуйся, я́ко и на́с, безпло́дны су́щих де́лы благи́ми, не лиша́еши духо́внаго утеше́ния.
Ра́дуйся, Пречи́стая Де́во, Ма́терию Спаси́теля ми́ра от ве́ка предъизбра́нная.
Конда́к 11.
Пе́снь хвале́бную рождеству́ Твоему́ (и в хра́м введе́нию) принося́щих не отри́ни, Влады́чице Блага́я, но ро́ждших Тя́ ра́ди, благоцве́тлива на́м бу́ди, моля́щи о на́с Сы́на Твоего́ и Бо́га на́шего, да пода́ст грехо́в проще́ние и жития́ исправле́ние, е́же в покая́нии сле́зном вы́ну благода́рно воспева́ем Ему́: Аллилу́иа.
И́кос 11.
Светоприе́мная и преми́рная Боже́ственнаго све́та Свеща́, единоро́дная Дще́рь Иоаки́ма и А́нны, предъизбра́нная в Ма́терь Единоро́дному Сы́ну Бо́жию, дне́сь от непло́дове пресла́вно произы́де, и просвеща́ет все́х рождество́ Ея́ (и в хра́м вхожде́ние) ве́рно пра́зднующих и благогове́йно взыва́ющих:
Ра́дуйся, светоза́рная Свеще́, Боже́ственным пла́менем возжже́нная; ра́дуйся, и на́с те́м благода́тно просвеща́ющая и согрева́ющая.
Ра́дуйся, та́инственная Клеще́, У́гль Боже́ственный Христа́ Го́спода во утро́бе и на рука́х Твои́х носи́вшая; ра́дуйся, и на́с в Та́инстве Причаще́ния приима́ти Того́ сподобля́ющая.
Ра́дуйся, живы́й и преукраше́нный Хра́м Госпо́день, о Не́мже пое́т Дави́д: “Свя́т Хра́м Тво́й, ди́вен в пра́вде”; ра́дуйся, Кади́льнице Свята́я, не фимиа́м, в возду́хе разлива́ющийся, но Христа́, ве́чное благово́ние в Себе́ вмести́вшая, и всю́ тва́рь те́м облагоуха́вшая.
Ра́дуйся, Престо́ле, превознесе́нный со сла́вою, одушевле́нное седа́лище Вели́каго Царя́, на́шего же Спаси́теля и Го́спода; ра́дуйся, Цари́це Небесе́ и земли́, с Сыно́м Твои́м и Бо́гом ве́чно ца́рствующая и на́с, убо́гих, не забыва́ющая.
Ра́дуйся, Пречи́стая Де́во, Ма́терию Спаси́теля ми́ра от ве́ка предъизбра́нная.
Конда́к 12.
Благода́ти па́че, не́же естества́ де́йство прояви́ся в рождестве́ Твое́м, Пречи́стая; моли́тву бо безча́дных роди́телей Твои́х, Госпо́дь услы́шав, подаде́ Тя́ и́м в утеше́ние, я́коже Авраа́му и Са́рре Исаа́ка, восхоте́в вку́пе и Своего́ смотре́ния та́инство на Тебе́ соверши́ти и угото́вати Тя́ в Ма́терь Единоро́дному Сы́ну Своему́, обетова́нному на́шему Искупи́телю. Ему́же благода́рно пое́м: Аллилу́иа.
И́кос 12.
Пою́ще сла́вное Твое́ от непло́дове рожде́ние (и в хра́м Госпо́день введе́ние), хва́лим Тя́ Пречи́стая, я́ко Таи́нницу Бо́жия о на́с спаси́тельнаго смотре́ния, воплоще́нием от Тебе́ Бо́га-Сло́ва явле́ннаго, и вопие́м Ти́ си́це:
Ра́дуйся, чи́стая Но́ева Голуби́це, рождество́м Твои́м преста́тие пото́ка сме́ртнаго возвести́вшая; ра́дуйся, ве́твь благове́стия Христа́ Спаси́теля погиба́вшему грехо́м ро́ду челове́ческому прине́сшая.
Ра́дуйся, еди́на блаже́нная в жена́х, послуша́нием Твои́м Бо́гу преслуша́ние прама́тери Е́вы испра́вившая; ра́дуйся, печа́ль Ада́ма и про́чих пра́отцев, (истоми́вшихся ожида́нием прише́ствия Изба́вителя) рождество́м Твои́м в ра́дость преложи́вшая.
Ра́дуйся, я́ко рождество́ Твое́ ра́дость возвести́ все́й вселе́нной; ра́дуйся, я́ко в рождестве́ Твое́м ма́тери ра́дуются и непло́ды веселя́тся (ве́дуще, я́ко и Ты́ от непло́дове произошла́ еси́).
Ра́дуйся, я́ко и все́х рождество́ Твое́ (и в хра́м вхожде́ние) ве́рно и благоче́стно пра́зднующих сподобля́еши благода́тнаго весе́лия; ра́дуйся, с Сыно́м Твои́м, одесну́ю Отца́ во сла́ве Его́, спосади́ти на́с, Его́ мно́го умоля́ющая.
Ра́дуйся, Пречи́стая Де́во, Ма́терию Спаси́теля ми́ра от ве́ка предъизбра́нная.
Конда́к 13.
О, Всепе́тая и Пречи́стая Ма́ти Де́во, приими́ сие́ на́ше хвале́бное пе́ние в че́сть пресла́внаго рождества́ Твоего́ (и в хра́м введе́ния) приноси́мое, и возроди́ в на́с жела́ние бла́г ве́чных, вку́пе же и изба́ви на́с, Це́рковь Твою́ Святу́ю, Оте́чество на́ше и оби́тели и́ноческия от вся́ких бе́д и напа́стей, от враго́в ви́димых и неви́димых, и бу́дущия изми́ му́ки и Небе́снаго Ца́рствия на́с сподо́би, да во ве́ки веко́в о Тебе́ вопие́м: Аллилу́иа. Этот конда́к чита́ется три́жды, зате́м и́кос 1 и конда́к 1.
И́кос 1.
А́нгел небе́сный предстоя́й пред Бо́гом, по́слан бы́сть к пра́ведным Иоаки́му и А́нне возвести́ти и́м ра́дость ве́лию, я́ко по непло́дствии свое́м и́мут роди́ти Дще́рь Преблагослове́нную, от Нея́же всему́ ми́ру ра́дость произы́дет. Те́мже и мы́, ра́дости сея́ прича́стницы, похва́льная пе́сни Де́ве воспое́м:
Ра́дуйся, в Тро́ичном Сове́те Ма́терию Сы́на Бо́жия от ве́ка предъизбра́нная; ра́дуйся, дре́вними проро́ками с патриа́рхи многообра́зне в о́бразех и се́нех прообразова́нная.
Ра́дуйся, вя́щшие пяти́ ты́сящ ле́т от созда́ния ми́ра ве́рными Бо́жиими рабы́, я́ко Ма́терь Изба́вителя ожида́нная; ра́дуйся, ле́ствицею Иа́ковом ви́денною, Бо́жие к челове́ком снизше́ствие прообразова́вшаго предука́занная.
Ра́дуйся, неопали́мою купино́ю в пусты́ни Сина́йстей Моисе́ом ви́денною, предвозвеще́нная; ра́дуйся, Чермны́м мо́рем Изра́илю су́х пу́ть да́вшему, фарао́на же потопи́вшему, о́бразне преднапи́санная.
Ра́дуйся, написа́тися на́м в кни́зе Живота́ Ве́чнаго посо́бствующая; ра́дуйся, Ца́рствия Небе́снаго невозбра́нный вхо́д на́м хода́тайствующая. Ра́дуйся, Пречи́стая Де́во, Ма́терию Спаси́теля ми́ра от ве́ка предъизбра́нная.
Конда́к 1.
Избра́нней от челове́ческаго ро́да и ро́ждшейся от непло́дове, Пречи́стей Де́ве Мари́и соста́вим похвалу́, я́ко рождество́м Ея́ нача́ло спасе́ния на́шего бы́сть и прише́ствие в ми́р Изба́вителя возвести́ся. Те́мже ра́достно Е́й возопии́м:
Ра́дуйся, Пречи́стая Де́во, Ма́терию Спаси́теля ми́ра от ве́ка предъизбра́нная.
Моли́тва пе́рвая.
О, Пресвята́я Влады́чице, Христа́ Спаси́теля на́шего Богоизбра́нная Ма́ти, у Бо́га святы́ми моли́твами испро́шенная, Бо́гу посвяще́нная и Бо́гом возлю́бленная! Кто́ Тебе́ не ублажи́т или́ кто́ не воспое́т, Твоего́ пресла́внаго рождества́. Рождество́ бо Твое́ бы́сть нача́лом спасе́ния челове́ков, и мы́, седя́щии во тме́ согреше́ний, зри́м Тя́, Непристу́пнаго Све́та жили́ще. Сего́ ра́ди вити́йствующий язы́к не мо́жет песносло́вити Тя́ по достоя́нию. Па́че бо серафи́м возвы́силась еси́, Пречи́стая. Оба́че приими́ от недосто́йных ра́б Твои́х ны́нешнее похвале́ние и не отри́ни мольбы́ на́шея. Твое́ вели́чие испове́дуем, Тебе́ во умиле́нии припа́даем и ско́рую в заступле́нии чадолюби́вую и благосе́рдую Ма́терь дерзнове́нно про́сим: умоли́ Сы́на Твоего́ и Бо́га на́шего дарова́ти на́м, мно́го согреша́ющим, и́скреннее покая́ние и благоче́стное житие́, да возмо́жем твори́ти вся́ Бо́гу уго́дная и душа́м на́шим поле́зная. Возненави́дим вся́ зла́я, укрепля́еми Боже́ственною благода́тию во благо́м произволе́нии на́шем. Ты́ непосты́дная наде́жда на́ша в ча́с сме́рти, да́руй на́м христиа́нскую кончи́ну, безбе́дное ше́ствие на стра́шных мыта́рствах возду́шных и насле́дие ве́чных и неизрече́нных бла́г Ца́рствия Небе́снаго, да со все́ми святы́ми немо́лчно испове́дуем Твое́ о на́с заступле́ние и да сла́вим еди́наго И́стиннаго Бо́га, во Святе́й Тро́ице покланя́емаго, Отца́ и Сы́на и Свята́го Ду́ха. Ами́нь.
Моли́тва втора́я.
Преблагослове́нная Де́во Мари́е, Цари́це небесе́ и земли́, Твоему́ чудотво́рному о́бразу припа́дающе, умиле́нно глаго́лем: при́зри ми́лостиво на рабы́ Твоя́ и Твои́м всеси́льным хода́тайством ниспосли́ коему́ждо потре́бная. Вся́ ве́рныя ча́да Святы́я Це́ркви спаси́, неве́рныя обрати́, заблу́ждших на пу́ть пра́вый наста́ви, ста́рость и сла́бость си́л поддержи́, ю́ных в ве́ре свято́й возрасти́, му́жество ко бла́гу напра́ви, гре́шников к покая́нию приведи́ и все́х христиа́н мольбы́ услы́ши, боля́щих уврачу́й, ско́рби утоли́, путеше́ствующим спутеше́ствуй. Ты́ ве́си, Всеми́лостивая, я́ко не́мощны, я́ко гре́шнии, я́ко озлобля́еми и недосто́йни проще́ния Бо́жия, оба́че бу́ди на́м в по́мощь, да ни ко́им грехо́м самолю́бия, собла́зна и диа́вольскаго прельще́ния прогневля́ем Бо́га: Тя́ и́мамы Предста́тельницу, И́же не отри́нет Госпо́дь. А́ще бо восхо́щеши, вся́ дарова́ти на́м мо́жеши я́ко благода́тный исто́чник, ве́рно пою́щим Ти́ и превознося́щым пресла́вное Твое́ рождество́. Изба́ви, Влады́чице, грехопаде́ний и бе́д все́х, благоче́стно призыва́ющих свято́е и́мя Твое́ и покланя́ющихся честно́му о́бразу Твоему́. Ты́ бо моли́твами беззако́ния на́ша ту́не очища́еши, те́мже Тебе́ припа́даем и па́ки вопие́м: отжени́ от на́с вся́каго врага́ и супоста́та, вся́кия напа́сти и губи́тельнаго неве́рия; моли́твами Твои́ми, подаю́щи дожди́ благовре́менны и земле́ оби́льное плодоно́сие, вложи́ в сердца́ на́ша стра́х Боже́ственный ко исполне́нию за́поведей Госпо́дних, да вси́ ти́хо и ми́рно поживе́м во спасе́ние ду́ш на́ших, во бла́го бли́жних и во сла́ву Го́спода, Ему́ бо, я́ко Творцу́, Промысли́телю и Спаси́телю на́шему вся́кая подоба́ет сла́ва, че́сть и поклоне́ние, ны́не и при́сно и во ве́ки веко́в. Ами́нь.
Моли́тва тре́тья.
О, Пречи́стая и Преблагослове́нная Де́во, Влады́чице Богоро́дице, от непло́дове по обетова́нию ро́ждшаяся и чистоты́ ра́ди души́ и те́ла Твоего́ сподо́бльшаяся бы́ти Ма́терию Сы́на Бо́жия, Го́спода на́шего Иису́са Христа́, с Ни́мже ны́не на небеси́ пребыва́еши и и́маши ве́лие дерзнове́ние ко Пресвято́й Тро́ице, от Нея́же, я́ко Цари́ца, венце́м ве́чнаго ца́рствования уве́нчана еси́. Те́мже смире́нно к Тебе́ прибега́ем и про́сим: исхода́тайствуй на́м у Всеми́лостиваго Го́спода Бо́га проще́ние все́х прегреше́ний на́ших во́льных и нево́льных; стра́ждущему оте́честву на́шему спасе́ния, ми́ра, тишины́ и благоче́стия возстановле́ние, времена́ ми́рны и безмяте́жны, крамо́л злы́х неприча́стны; ко изоби́лию же плодо́в земны́х, возду́ха благорастворе́ния, дожди́ ми́рны и благовре́менны. И вся́, я́же к житию́ и спасе́нию на́шему потре́бная, испроси́ на́м у Сы́на Твоего́, Христа́ Бо́га на́шего. Наипа́че же благопоспеши́ на́м украси́тися благи́ми нра́вы и до́брыми де́лы, да, ели́ко мо́щно, подража́тели бу́дем свято́му Твоему́ житию́, и́мже от ю́ности на земли́ украша́лася еси́, благоугожда́юще Го́споду; сего́ ра́ди яви́лася еси́ честне́йшая Херуви́м и сла́внейшая Серафи́м. Е́й, Госпоже́ Пресвята́я, бу́ди на́м во все́м ско́рая Помо́щница и прему́драя ко спасе́нию Наста́вница, да Тебе́ после́дствующи и Тобо́ю воспомоществу́еми, сподо́бимся насле́дницы бы́ти Небе́снаго Ца́рствия, страда́ниями Сы́на Твоего́ исхода́тайственнаго, исполни́телям же святы́х за́поведей Его́ обеща́ннаго. Ты́ бо еси́, Госпоже́, еди́на на́ша по Бо́зе наде́жда и упова́ние, и Тебе́ ве́сь живо́т на́ш предае́м, ча́юще Твоего́ ра́ди хода́тайства и заступле́ния не посра́млены бы́ти в ча́с исхо́да на́шего от жития́ сего́, и на Стра́шном Суде́ Сы́на Твоего́, Христа́ Бо́га на́шего десна́го Его́ стоя́ния сподо́битися, и та́мо ве́чно ра́доватися со все́ми от ве́ка Ему́ благоугоди́вшими и немо́лчно сла́вити, хвали́ти, благодари́ти и благословля́ти Его́ со Отце́м и Ду́хом во ве́ки веко́в. Ами́нь.
Акафист Рождеству Пресвятой Богородицы (иной)
Конда́к 1.
Избра́нней от все́х родо́в Бо́жией Ма́тери, небеси́ и земли́ Цари́це, освяти́вшей ро́д челове́ческий прише́ствием к на́м во всечестне́м рождестве́ Твое́м, благогове́йная пе́ния прино́сим Ти́ раби́ Твои́, Богоро́дице. Ты́ же, я́ко прише́дшая на утеше́ние и спасе́ние на́ше, от вся́ких на́с бе́д свободи́, да зове́м Ти́:
Ра́дуйся, Пречи́стая, ве́сь ми́р рождество́м Свои́м возвесели́вшая.
И́кос 1.
Арха́нгел Гаврии́л по́слан бы́сть к пра́ведней А́нне, егда́ та́ в ско́рби непло́дства своего́ возопи́ ко Го́споду из глубины́ серде́чныя, узре́вше в са́де свое́м гнездо́ пти́чее, птенцы́ ма́лыя иму́щее, и благовести́ е́й ра́дость ве́лию, глаго́люще: Услы́шана моли́тва твоя́, сле́зы же твои́ пред Бо́гом внидо́ша, и се́ роди́ши Дще́рь преблагослове́нную, о Не́йже возблагословя́тся вся́ коле́на земна́я, нарече́тся же и́мя Е́й — Мари́я. Сему́ ра́достному обетова́нию чудя́щеся, возопие́м Преблагослове́нней:
Ра́дуйся, от благоро́днейшаго ца́рскаго ко́рене Иоаки́мом произраще́нная; ра́дуйся, от свяще́ннейшаго архиере́йскаго ро́да А́нною рожде́нная.
Ра́дуйся, прароди́телей на́ших от тли́ сме́ртныя свободи́вшая; ра́дуйся, роди́телей Твои́х поноше́ние безча́дства разреши́вшая.
Ра́дуйся, Святы́я Врата́ на Восто́к зря́щая, непло́дная врата́ рождество́м свои́м отве́рзшая; ра́дуйся, де́вственная Две́рь заключе́нная, вхо́да Святи́теля Вели́каго ожида́ющая.
Ра́дуйся, сле́з ма́тери Твоея́ премене́ние на ра́дость; ра́дуйся, тоя́ поноше́ния в лю́дех отъя́тие.
Ра́дуйся, вели́кое ро́ждшим Тя́ утеше́ние; ра́дуйся, всему́ ми́ру наслажде́ние.
Ра́дуйся, па́дшаго Ада́ма воззва́ние; ра́дуйся, сле́з Е́виных избавле́ние.
Ра́дуйся, Пречи́стая, ве́сь ми́р рождество́м Свои́м возвесели́вшая.
Конда́к 2.
Ви́дящи пра́ведная А́нна вели́каго арха́нгела явле́ние и слы́шавши глаго́лы его́, поклони́ся Бо́гу и рече́: Жи́в Госпо́дь Бо́г, я́ко а́ще рожду́ Отроча́, да́м Е́ в слу́жбу Ему́, да бу́дет служа́ и хваля́ и́мя Его́ Свято́е де́нь и но́щь во вся́ ле́та живота́ Своего́. Испо́лнися же ра́дости неизглаго́ланныя, тече́ во Иерусали́м со тща́нием, да та́мо в це́ркви воспое́т Бо́гу благода́рственно: Аллилу́иа.
И́кос 2.
Ра́зум чи́ст име́яй пред Бо́гом пра́ведный Иоаки́м, оба́че от люде́й отве́ржен бы́сть во хра́ме безча́дия ра́ди, и в ско́рби се́й и́де в пусты́ню, и та́мо моля́щеся со слеза́ми, рече́: Не вложу́ во уста́ моя́ пи́щи, ни в до́м мо́й возвращу́ся, но сле́зы моя́ пи́щею ми́ да бу́дут и пусты́ня — домо́м, до́ндеже посети́т мя́ Госпо́дь Бо́г Изра́илев. И се́ А́нгел Госпо́день яви́ся ему́ и благовести́, я́ко роди́тся ему́ Дще́рь, о Ея́же рождестве́ ра́дость бу́дет всему́ ми́ру. Се́ю ра́достию испо́лнився, и́де в Иерусали́м, и та́мо ку́пно с А́нною просла́ви Бо́га, глаго́люще Обетова́нней:
Ра́дуйся, от ле́т дре́вних все́ми ча́емая; ра́дуйся, от все́х проро́к я́ве предрече́нная.
Ра́дуйся, от сложе́ния ми́ра Бо́гом предъизбра́нная; ра́дуйся, от паде́ния прароди́телей гре́шным обетова́нная.
Ра́дуйся, Сове́те неизрече́нный Предве́чнаго попече́ния; ра́дуйся, О́бразе благонапи́санный Боже́ственнаго Предве́дения.
Ра́дуйся, Сви́тче одушевле́нный, в не́мже пе́рстом Бо́жиим написа́ся Сло́во; ра́дуйся, Исто́чниче присноживо́тный, из Него́же изоби́льно источи́ся благове́стие Христо́во.
Ра́дуйся, Боготка́нная Порфи́ро, в Ню́же облече́ся Предве́чное Сло́во; ра́дуйся, благоуха́нное Ми́ро, в Него́же, всели́ся благода́ть Ду́ха Пресвята́го.
Ра́дуйся, па́че зла́та вся́каго блиста́ющая, Нерукотворе́нная Пала́то Прему́дрости Бо́жия; ра́дуйся, у́тра вся́каго со́лнечнаго светле́йшая, Жили́ще Христо́во.
Ра́дуйся, Пречи́стая, ве́сь ми́р рождество́м Свои́м возвесели́вшая.
Конда́к 3.
Си́ла Вы́шняго осени́ тогда́ к зача́тию заматоре́вшую во дне́х свои́х пра́ведную А́нну, и непло́дная тоя́ ложесна́, я́ко ни́ву показа́ благопло́дную, да прозя́бнет от нея́ на ра́дость всему́ ми́ру, в ско́рби погиба́ющему, Село́ Сла́дкое, Преблагослове́нная Де́ва Мари́я, все́м хотя́щим жа́ти спасе́ние, и воспева́ти из глубины́ душе́вныя: Аллилу́иа.
И́кос 3.
Иму́ще, Пречи́стая, роди́тели Твоя́ житие́ непоро́чное, зача́ша Тя́ в ста́рости до́брей, не плотски́м сласте́м прилежа́ще, но в целому́дрии и воздержа́нии подвиза́ющеся, да яви́тся в рождестве́ Твое́м не естества́ произволе́ние, но благода́ти Бо́жия си́ла, естества́ чи́н побежда́ющая, и да позна́ют вси́, я́ко моли́тва, вку́пе и воздыха́ние непло́дства прозябе́ Тя́, пло́д Живоно́сен ми́ру. Сего́ ра́ди, почита́юще непоро́чное зача́тие Твое́, пое́м Тебе́ сицева́я:
Ра́дуйся, непло́дныя ма́тере увеселе́ние; ра́дуйся, безча́дных роди́телей утеше́ние.
Ра́дуйся, от суха́ ко́рене Иессе́ева прозя́бшая; ра́дуйся, и Цве́т от него́ Христа́ произрасти́вшая.
Ра́дуйся, естества́ уста́вы еще́ в зача́тии Твое́м побежда́ти нача́вшая; ра́дуйся, си́м Своего́ де́вства в рождестве́ сохране́ние предвозвести́вшая.
Ра́дуйся, я́ко отто́ле возве́яше ве́три спасе́ния провозве́стницы; ра́дуйся, я́ко отону́дуже пло́д рожда́ти Благода́ть начина́ет.
Ра́дуйся, я́ко Тобо́ю естества́ на́шего непло́дство побежда́ется; ра́дуйся, я́ко Тобо́ю прама́терняя кля́тва разреша́ется.
Ра́дуйся, всеми́рная ра́дости провозвеще́ние; ра́дуйся, Нача́ло на́шего спасе́ния.
Ра́дуйся, Пречи́стая, ве́сь ми́р рождество́м Свои́м возвесели́вшая.
Конда́к 4.
Бу́рею печа́лей и скорбе́й мно́гих одержи́ми бы́ша пра́ведныя роди́тели Твоя́, Пречи́стая, я́ко до ста́рости безпло́дни бы́ша, мня́ше, я́ко недосто́йни име́ти насле́дие во Ца́рствии Бо́жием. Сострада́ше же с ни́ми от ве́ка о непло́дстве естества́ на́шего вся́ тва́рь, суете́ повину́вшеся: сте́нет у́бо Ада́м, я́ко проклята́ бы́сть земля́ его́ ра́ди; рыда́ет же и Е́ва, я́ко умно́жишася печа́ли и боле́зни ея́; совоздыха́ет же с ни́ми и ве́сь ро́д челове́чь, тле́нию приобщи́вшися. Егда́ же, о Богома́ти, рождество́м Твои́м разреши́ся дре́внее непло́дство и тле́ние потреби́ся, вся́ тва́рь благода́рственне о Тебе́ возопи́ Бо́гу: Аллилу́иа.
И́кос 4.
Услы́ша Госпо́дь Бо́г пра́ведных Иоаки́ма и А́нны воздыха́ния и дарова́ и́м по обетова́нию арха́нгелову Дще́рь Пречи́стую и Преблагослове́нную, Де́ву Мари́ю, спасе́ния на́шего Нача́ло и Хода́таицу, о Ея́же рождестве́ не́бо и земля́ возра́довастася, а́нгели и арха́нгели возвесели́шася, лю́ди е́же, просла́вивше Бо́га, воспе́ша си́це:
Ра́дуйся, Мари́е, вели́кое всея́ тва́ри чу́до; ра́дуйся, Дщи́ Дави́дова, Госпо́дня же Ма́ти.
Ра́дуйся, Еди́ная в жена́х благослове́нная; ра́дуйся, от а́нгел на небесе́х препросла́вленная.
Ра́дуйся, Заре́ незаходи́мая, све́т ми́рови возсия́вшая; ра́дуйся, Лампа́до неугаси́мая, но́щь скорбе́й просвети́вшая.
Ра́дуйся, я́ко ви́дение зра́ка Твоего́ а́нгелом пресла́достно; ра́дуйся, я́ко явле́ние Твое́ ми́ру челове́ком прера́достно.
Ра́дуйся, но́вый Раю́, на земли́ насажде́нный; ра́дуйся, све́тлый Черто́же, Небе́сному Царю́ преукраше́нный.
Ра́дуйся, Пала́то Ду́ха Пресвята́го; ра́дуйся, Ски́ния Бо́га с челове́ки.
Ра́дуйся, Пречи́стая, ве́сь ми́р рождество́м Свои́м возвесели́вшая.
Конда́к 5.
Боготе́чную звезду́, от Назаре́та возсия́вшую и ве́сь ми́р просвети́вшую, зри́м Тя́, Пресвята́я Де́во: ма́л бо бе́ гра́д, его́же освяти́ла еси́ рождество́м Твои́м, и презира́ем бе́ у люде́й, чесо́ ра́ди вси́ глаго́лаху: от Назаре́та мо́жет ли что́ добро́ бы́ти? Оба́че немощна́я и уничиже́нная избра́ Бо́г, да кре́пкая посра́мят, и яви́ от Назаре́та Тя́ всему́ ми́ру Цве́т Неувяда́емый, де́вством присноцвету́щий, все́х святы́х Святе́йшую Де́ву, греха́ во все́м житии́ Свое́м ни еди́наго же позна́вшую, да вси́ о Тебе́ благода́рственно воспое́м Бо́гу: Аллилу́иа.
И́кос 5.
Ви́девше роди́тели Твоя́ чу́дное рождество́ Твое́, Пречи́стая, принесо́ша Бо́гу да́ры вели́кия, и благослове́нны бы́ша от свяще́нник и от все́х люде́й, я́ко восприя́вшия благослове́ние Бо́жие, и сотвори́ша учрежде́ние ве́лие в дому́ свое́м, веселя́шеся ду́хом и прославля́юще Бо́га. Помина́юще же обетова́ние а́нгельское, почита́ху Тя́, я́ко Госпожу́ Свою́, и поклони́вшеся, воспе́ша Тебе́ си́це:
Ра́дуйся, пре́жде все́х ве́к пронарече́нная Ду́ха Свята́го Неве́сто; ра́дуйся, в после́дняя времена́ я́вльшаяся Сы́на Бо́жия Ма́терь — Де́во.
Ра́дуйся, Бо́гу Отцу́ Дще́рь от все́х родо́в избра́нная; ра́дуйся, Живонача́льныя Тро́ицы заря́ми ди́вно осия́нная.
Ра́дуйся, вся́ Небе́сныя си́лы без разсужде́ния превосходя́щая; ра́дуйся, вся́ де́монския ра́ти без посрамле́ния отгоня́ющая.
Ра́дуйся, всему́ ро́ду челове́ческому всемо́щная Засту́пнице; ра́дуйся, все́м ка́ющимся гре́шником всеми́лостивая Хода́таице.
Ра́дуйся, честны́х же́н Похвало́; ра́дуйся, чи́стых де́в Сла́во.
Ра́дуйся, от ма́лаго Назаре́та добро́ всему́ ми́ру прине́сшая; ра́дуйся, да́же до после́дних земли́ любо́вию Свое́ю все́х покры́вшая.
Ра́дуйся, Пречи́стая, ве́сь ми́р рождество́м Свои́м возвесели́вшая.
Конда́к 6.
Пропове́дницей Твоего́ прише́ствия в ми́р, Богоро́дице, бы́сть пра́ведная Елисаве́та. Поне́же, егда́ уви́де Тя́, в до́м ея́ гряду́щую, изы́де на сре́тение Твое́ и возопи́ гла́сом ве́лиим: Благослове́нна Ты́ в жена́х и благослове́н Пло́д чре́ва Твоего́. И отку́да мне́ сие́, да прии́де Ма́ти Го́спода моего́ ко мне́? Си́це и мы́, пресла́вное рождество́ Твое́, я́ко пе́рвое земли́ на́шея посеще́ние Твое́, пра́зднующе, срета́ем Тя́ приве́тствием си́м: отку́да на́м сие́, да прии́де Ма́ти Го́спода на́шего к на́м. Благослове́нна Ты́ в жена́х, и благослове́н Пло́д Чре́ва Твоего́, Ему́ же вси́ благода́рственно да воспое́м: Аллилу́иа.
И́кос 6.
Возсия́ ра́дость рождества́ Твоего́, Пречи́стая, не то́чию пра́ведным роди́телем Твои́м, но и все́м бли́жним и дале́че су́щим, и да́же до коне́ц вселе́нныя, я́ко Бо́г на разу́мных Престо́лех почива́яй, Престо́л Свя́т Себе́ предугото́ва уже́ на земли́ и Заря́ но́вая яви́ся, предвозвеща́юще Со́лнца Пра́вды Христа́ прише́ствие ско́рое. Сего́ ра́ди воспое́м Ти́, Чи́стая, си́це:
Ра́дуйся, Заре́ Светле́йшая, Вели́каго Со́лнца Христа́ Провозве́стнице; ра́дуйся, Луче́ незаходи́мая, Невече́рняго Све́та Роди́тельнице.
Ра́дуйся, огне́м Твои́х моли́тв челове́ки от страсте́й очища́ющая; ра́дуйся, росо́ю Твоея́ благода́ти пла́мень гее́нны немощны́м охлажда́ющая.
Ра́дуйся, о́блаче Све́та Боже́ственнаго, вся́кое помраче́ние разоря́ющее; ра́дуйся, благоуха́нное Кади́ло, моли́твы ве́рных к Сы́ну Твоему́ вознося́щее.
Ра́дуйся, Небе́сный Киво́те, от превы́шних к земны́м пренесе́нный; ра́дуйся, огнеобра́зный Престо́ле, Небе́сному Царю́ на земли́ угото́ванный.
Ра́дуйся, Ски́нию Дави́дову па́дшую возста́вившая; ра́дуйся, превы́шний Иерусали́м небе́сный на земли́ яви́вшая.
Ра́дуйся, пречестну́ю багряни́цу от крове́й Твои́х А́гнцу Бо́жию приугото́вившая; ра́дуйся, Боготка́нную порфи́ру Сло́ву Бо́жию от пло́ти Твоея́ истка́вшая.
Ра́дуйся, Пречи́стая, ве́сь ми́р рождество́м Твои́м возвесели́вшая.
Конда́к 7.
Хотя́й долготерпели́вый Госпо́дь яви́ти бе́здну человеколю́бия Своего́ к па́дшему дре́вле в раи́ ро́ду челове́ческому, даде́ та́мо прароди́телем на́шим обетова́ние, я́ко се́мя жены́ сотре́т главу́ зми́я, в после́дняя же времена́ испо́лни на Тебе́, Пречи́стая, первообетова́ние Свое́, избра́в Тя́ Еди́ну от все́х родо́в в Ма́терь Себе́, да рождество́м Твои́м сотре́ши главу́ дре́вняго зми́я, чесо́ ра́ди благода́рственно воспое́м Бо́гу: Аллилу́иа.
Конда́к 8.
Стра́нное рождество́ Твое́ от непло́дове ви́дяще сла́сти не прича́стное, но от целому́дрия и воздержа́ния просия́вшее, устрани́мся су́етнаго ми́ра, и вся́каго нецелому́дрия душе́внаго и теле́снаго, у́м и се́рдца на небеса́ прело́жше. На сие́ бо пришла́ еси́ в ми́р Ма́ти целому́дрия, да ни́жняя возведе́ши к го́рней высоте́, и да научи́ши все́х чи́стыми усты́ и нескве́рным се́рдцем воспева́ти Бо́гу: Аллилу́иа.
И́кос 8.
Вся́ добра́ еси́, бли́жняя Моя́, и поро́ка не́сть в Тебе́. Возста́ни, прииди́, Голуби́це Моя́, яви́ Ми́ зра́к Тво́й и услы́шан сотвори́ Ми́ гла́с Тво́й, я́ко гла́с Тво́й сла́док и о́браз Тво́й красе́н. Еди́на еси́ ма́тери Твоея́, избра́нна еси́ роди́вшей Тя́, та́ко глаго́лаше Сы́н Тво́й и Госпо́дь, Пречи́стая, срета́юще, е́же от непло́дове рождество́ Твое́ и прише́ствие Твое́ в ми́р. Сему́ Боже́ственному гла́су вне́млюще, дерза́ем воспева́ти Тебе́ такова́я:
Ра́дуйся, Цари́це, одесну́ю Царя́ Христа́ предста́вшая; ра́дуйся, Влады́чице, в ри́зы позлаще́нны де́вства оде́янная и преукраше́нная.
Ра́дуйся, Ея́же добро́ты возжела́ Ца́рь Небе́сный; ра́дуйся, И́мже бли́жнею и до́брою в жена́х нарече́на была́ еси́.
Ра́дуйся, Восходя́щая от пусты́ни, я́ко о́блако ды́ма, сми́рну и лива́н кадя́щее; ра́дуйся, Ми́ро излия́нное, благоуха́ние от Небе́снаго Мирова́рца износя́щее.
Ра́дуйся, Вертогра́де заключе́нный, в него́же никто́же возмо́жет взы́ти; ра́дуйся, Кла́дезю запечатле́нный, от его́же глубины́ никто́же возмо́жет испи́ти.
Ра́дуйся, блиста́ющаяся, я́ко у́тро во тьме́ сидя́щим; ра́дуйся, восходя́щая, я́ко луна́, избра́нная, я́ко со́лнце.
Ра́дуйся, Исто́чниче во́ды живо́тныя, приснотеку́щия от Престо́ла Бо́жия; ра́дуйся, Дре́во жи́зни, присноцвету́щее посреде́ рая́.
Ра́дуйся, Пречи́стая, ве́сь ми́р рождество́м Свои́м возвесели́вшая.
Конда́к 9.
Вся́кое естество́ А́нгельское ра́достию возра́довася, прославля́юще Бо́га, егда́ по рождестве́ Твое́м, Пречи́стая, святи́тель вели́кий со иере́и и лю́ди избра́нны прии́де в до́м роди́телей Твои́х, моли́твы благода́рственныя возсыла́юще. Егда́ же благослови́ Тя́, воздви́же гла́с сво́й, глаго́люще: Бо́же оте́ц на́ших, благослови́ младе́нца сего́ и да́руй Е́й и́мя, да бу́дет просла́влено во все́ ро́ды. И нарече́ Тебе́ и́мя Мари́я, вели́кое и благода́тное, лю́дем пресла́достное, де́моном же стра́ха испо́лненно, и возопи́ с весе́лием: Аллилу́иа.
И́кос 9.
Вити́я многовеща́нныя, я́ко ры́бы безгла́сныя, недоумева́ют, ка́ко воспе́ти Твою́ равноа́нгельскую от младе́нческих пеле́н чистоту́, Пречи́стая, ю́же дарова́ Ти́ Госпо́дь, да предста́вит Тя́, Ма́терь Свою́, не иму́щу скве́рны или́ поро́ка, или́ не́что от таковы́х, но да бу́деши свя́та и непоро́чна. Сего́ ра́ди ма́ти Твоя́ со тща́нием соблюда́ше Тя́ в непоро́чней чистоте́, да ника́коже Одушевле́нному Киво́ту Бо́жию ко́снется рука́ скве́рных: та́ бо освяти́ ло́же Твое́, и себе́ саму́ отчужда́ше от вся́кия скве́рны, и призва́ чи́стыя де́вы храни́ти поко́й Тво́й. И егда́ сосцы́ пита́ше Тя́, моли́тву де́яше, да с млеко́м ма́терним наипа́че напита́ешися Бо́жиим Сло́вом. Такове́й непоро́чней чистоте́ Твое́й чудя́щеся, вопие́м Ти́ си́це:
Ра́дуйся, от младе́нчества Твоего́ ни еди́наго греха́ позна́вшая; ра́дуйся, от рождества́ Твоего́ все́х святы́х Святе́йшая.
Ра́дуйся, моли́твою па́че млека́ одое́нная; ра́дуйся, Сло́вом Бо́жиим па́че хле́ба насыще́нная.
Ра́дуйся, небе́сное произраста́ние, на земли́ насажде́нное; ра́дуйся, ра́йское прозябе́ние, от роди́телей Твои́х воспита́нная.
Ра́дуйся, чи́стая Голуби́це, Ея́же чистоты́ не бе́ досто́ин ве́сь ми́р; ра́дуйся, нескве́рная А́гнице, Ея́же непоро́чность яви́ Ю́ досто́йну Ма́терь Христу́.
Ра́дуйся, ма́нием Вседержи́теля от непло́дове пло́д возсия́вшая; ра́дуйся, досто́йное Твоея́ чистоты́ рождество́ восприя́вшая.
Ра́дуйся, я́ко от восто́к со́лнца до за́пад хва́льно и́мя Твое́; ра́дуйся, я́ко от все́х родо́в благослове́нна Ты́ в жена́х.
Ра́дуйся, Пречи́стая, ве́сь ми́р рождество́м Свои́м возвесели́вшая.
Конда́к 10.
Спасти́ хотя́й ми́р от пре́лести вра́жия, Человеколю́бец Госпо́дь избра́ Тя́ от земна́го ро́да, от ма́лаго гра́да и от непло́дныя утро́бы в Ма́терь Себе́, от ве́ка предопределе́нную, проро́ки же дре́вле пропове́данную, Хода́таицей бы́ти на́шего спасе́ния, да бу́деши печа́льным и в беда́х су́щим ско́рое утеше́ние и мирска́го непло́дства разреше́ние, все́м же во мра́це греха́ блужда́ющим да яви́ши Со́лнце пра́вды Христа́, пою́щим Ему́: Аллилу́иа.
И́кос 10.
Стена́ еси́ и прибе́жище все́м челове́ком, Богоро́дице Де́во, Твое́ рождество́ пра́зднующим: Ты́ бо от черто́га ма́лаго Гра́д Бо́жий су́щая, е́же бы́ти начина́еши, и от утро́бы нерожда́ющия исхо́д соверша́еши, да уготова́еши вхо́д Святи́телю Вели́кому: Еди́н бо Бо́г Тобо́ю про́йде стра́нною стезе́ю, неопа́льну Тя́ сохра́ньше. Сего́ ра́ди со дерзнове́нием зове́м Ти́, Еди́ней чи́стей и благослове́нней, такова́я:
Ра́дуйся, на небесе́х преблагослове́нная; ра́дуйся, на земли́ препросла́вленная.
Ра́дуйся, а́нгелов Ра́досте и Увеселе́ние; ра́дуйся, земноро́дным Отра́до и Утеше́ние.
Ра́дуйся, Го́рлице богогла́сная и незло́бивая; ра́дуйся, Ю́нице кро́ткая и ти́хая.
Ра́дуйся, Ду́ха Всесвята́го Хра́ме Святе́йший; ра́дуйся, небе́снаго уневе́щения Черто́же Чисте́йший.
Ра́дуйся, росо́ Аермо́нская, на го́ры Сина́йския соше́дшая; ра́дуйся, алава́стре Ми́ра многоце́ннаго, зе́млю облагоуха́вшая.
Ра́дуйся, Гра́де Бо́жий, от черто́га ма́лаго прозябе́ние; ра́дуйся, Назаре́та гра́да от суха́ ко́рене произраста́ние.
Ра́дуйся, Пречи́стая, ве́сь ми́р рождество́м Свои́м возвесели́вшая.
Конда́к 11.
Пе́ние благода́рственное воспева́ет ду́хом боже́ственный Иоаки́м чу́дный и боже́ственная А́нна, я́ко ви́дяще на земли́ Ма́терь Созда́теля, Ю́же роди́ша, дще́рь Мари́ю, с ни́ми же и мы́, Влады́чице, равночи́сленнии па́че песка́ морска́го пе́сни прино́сим Ти́, восхваля́юще пресла́вное от непло́дных ложе́сн рождество́ Твое́, благода́рственно воспева́юще Бо́гу: Аллилу́иа.
Конда́к 12.
Благода́ти тезоимени́тая Боже́ственная А́нна весели́тся и хва́лящися вопие́т: Непло́ды су́щи, роди́х Бо́жию Ма́терь, Ея́же ра́ди осужде́ние Е́вино разреши́ся и я́же в печа́лех боле́знь. И та́ко ра́дующися, даде́ обетова́ние, да приведе́т Дще́рь свою́ ро́ждшуюся Бо́гови и да бу́дет Ему́ в да́р соверше́н от все́х родо́в земны́х, челове́ком же — в ве́чное утеше́ние и ра́дование, во е́же пе́ти и́м вы́ну: Аллилу́иа.
И́кос 12.
Пое́м Твое́ Пречи́стое рождество́, чти́м и несказа́нное зача́тие, прославля́ем неизглаго́ланное от непло́дове рожде́ние Твое́, поклоня́емся са́мым пелена́м Твои́м, Неве́сто Богозва́нная и Де́во; славосло́вят же с на́ми вку́пе Твое́ в ми́р прише́ствие а́нгелов и арха́нгелов чи́ни и ду́ш святы́х Собо́ри: о́бщая бо ра́дость возсия́ на небеси́ и на земли́ от пра́ведных Иоаки́ма и А́нны рождество́м Твои́м, Богоро́дице, его́же прославля́юще, вопие́м Ти́ такова́я:
Ра́дуйся, Всенепоро́чная, по Святе́й Тро́ице о́бщая все́х а́нгел и челове́к Влады́чице; ра́дуйся, Всеблагослове́нная, по Уте́шителе о́бщая все́х на небеси́ и на земли́ Уте́шительнице.
Ра́дуйся, Красото́ в десни́це Госпо́дней, украша́ющая блажа́щих Тя́ все́х небе́сных; ра́дуйся, Утеше́ние Вседержи́телево, возвеселя́ющая призыва́ющих Тя́ все́х земны́х.
Ра́дуйся, Не́бо небе́с, вся́ а́нгельския си́лы без сравне́ния превосходя́щая; ра́дуйся, Чу́до чуде́с, все́х челове́ков пе́рсть в Те́ло Бо́жие созида́ющая.
Ра́дуйся, Цари́ца цари́ц, все́й вселе́нней преде́л соде́ловавшая грехо́вному растле́нию; ра́дуйся, Свята́я Святы́х все́й Це́ркви Христо́вой, нача́ло положи́вшая на́шему спасе́нию.
Ра́дуйся, Боголе́пная Деви́це, все́х време́н и веко́в Бо́жие благослове́ние; ра́дуйся, Богоизбра́нная Отрокови́це, все́х язы́к и родо́в благода́тное примире́ние.
Ра́дуйся, Сто́лпе де́вства, все́м, де́вства жела́ющим, добро́ту де́вства я́ве низпосыла́ющая; ра́дуйся, Две́ре спасе́ния, все́м, спасе́ния ча́ющим, ру́ку по́мощи вско́ре подаю́щая.
Ра́дуйся, Пречи́стая, ве́сь ми́р рождество́м Свои́м возвесели́вшая.
Конда́к 13.
О, Всепе́тая Ма́ти, от непло́дове ро́ждшаяся на спасе́ние ми́ру, ны́нешняя на́ша о всечестне́м рождестве́ Твое́м прие́мши приноше́ния, не оста́ви на́с во вре́мя живота́ на́шего, от вся́кия напа́сти и пле́на вра́жия изба́ви на́с, и от непло́дства душе́внаго разреши́ все́х, о Тебе́ вопию́щих: Аллилу́иа. Этот конда́к читается трижды, затем 1-й икос и 1-й конда́к.
И́кос 1.
Арха́нгел Гаврии́л по́слан бы́сть к пра́ведней А́нне, егда́ та́ в ско́рби непло́дства своего́ возопи́ ко Го́споду из глубины́ серде́чныя, узре́вше в са́де свое́м гнездо́ пти́чее, птенцы́ ма́лыя иму́щее, и благовести́ е́й ра́дость ве́лию, глаго́люще: Услы́шана моли́тва твоя́, сле́зы же твои́ пред Бо́гом внидо́ша, и се́ роди́ши Дще́рь преблагослове́нную, о Не́йже возблагословя́тся вся́ коле́на земна́я, нарече́тся же и́мя Е́й — Мари́я. Сему́ ра́достному обетова́нию чудя́щеся, возопие́м Преблагослове́нней:
Ра́дуйся, от благоро́днейшаго ца́рскаго ко́рене Иоаки́мом произраще́нная; ра́дуйся, от свяще́ннейшаго архиере́йскаго ро́да А́нною рожде́нная.
Ра́дуйся, прароди́телей на́ших от тли́ сме́ртныя свободи́вшая; ра́дуйся, роди́телей Твои́х поноше́ние безча́дства разреши́вшая.
Ра́дуйся, Святы́я Врата́ на Восто́к зря́щая, непло́дная врата́ рождество́м свои́м отве́рзшая; ра́дуйся, де́вственная Две́рь заключе́нная, вхо́да Святи́теля Вели́каго ожида́ющая.
Ра́дуйся, сле́з ма́тери Твоея́ премене́ние на ра́дость; ра́дуйся, тоя́ поноше́ния в лю́дех отъя́тие.
Ра́дуйся, вели́кое ро́ждшим Тя́ утеше́ние; ра́дуйся, всему́ ми́ру наслажде́ние.
Ра́дуйся, па́дшаго Ада́ма воззва́ние; ра́дуйся, сле́з Е́виных избавле́ние.
Ра́дуйся, Пречи́стая, ве́сь ми́р рождество́м Свои́м возвесели́вшая.
Конда́к 1.
Избра́нней от все́х родо́в Бо́жией Ма́тери, небеси́ и земли́ Цари́це, освяти́вшей ро́д челове́ческий прише́ствием к на́м во всечестне́м рождестве́ Твое́м, благогове́йная пе́ния прино́сим Ти́ раби́ Твои́, Богоро́дице. Ты́ же, я́ко прише́дшая на утеше́ние и спасе́ние на́ше, от вся́ких на́с бе́д свободи́, да зове́м Ти́:
Ра́дуйся, Пречи́стая, ве́сь ми́р рождество́м Свои́м возвесели́вшая.
Моли́тва.
О, Пресвята́я и Богоизбра́нная Де́во, Влады́чице на́ша Богоро́дице, Небеси́ и земли́ Цари́це, на ра́дость и утеше́ние всему́ ми́ру от безпло́дных и безча́дных роди́телей Бо́гом дарова́нная! Роди́вшися Бо́жиим промышле́нием, Ты́ разреши́ла еси́ непло́дствие ро́ждшия Тя́, и ны́не непло́дное се́рдце мое́ плодоно́сно сотвори́ предста́тельством Твои́м у Престо́ла Вседержи́телева, непло́дствовати же соде́лай мя́ злы́ми де́лы, гнилы́ми словесы́ и нечи́стыми помышле́ньми. О, Всеблаже́нная, да явлю́ся ча́до Бо́жие, доброде́телей благопло́дие при́сно принося́щее. Ты́ утоли́ла еси́ пречи́стым рождество́м Твои́м пла́ч прама́тери на́шея Е́вы, и пра́ведныя роди́тели Твоя́ изба́вила еси́ поноше́ния безча́дства, и ны́не утоли́ пла́ч и воздыха́ния многоболе́зненныя и любогрехо́вныя души́ моея́ и изба́ви все́х на́с поноше́ния злосмра́дных де́л на́ших, страсте́й безче́стия и от вся́каго порабоще́ния вра́жескаго. Наипа́че же да́руй на́м, Пресвята́я Богоро́дице Де́во, во всесве́тлый де́нь рождества́ Твоего́ чи́стым се́рдцем разуме́ти и па́мятовати, с коли́кою ра́достию и благодаре́нием непло́дная утро́ба святы́я пра́ведныя А́нны ноша́ше Тя́, да и мы́ не то́чию словесы́, но наипа́че де́лы свои́ми вы́ну бу́дем со умиле́нием серде́чнем прославля́ти Тя́, вопию́ще: Сла́ва прише́ствию Твоему́, Чи́стая. Сла́ва рождеству́ Твоему́. Сла́ва де́вству Твоему́, Ма́ти Безневе́стная. Ку́пно же с Тобо́ю сподо́би на́с непреста́нно сла́вити и велича́ти Всесвяты́й Пло́д Тво́й, Сло́во воплоще́нно, во чре́ве Твое́м неопа́льно носи́мо, Ему́же сла́ва подоба́ет, че́сть и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом ны́не и при́сно и во ве́ки веко́в. Ами́нь.
Пе́снь 3.
Ирмо́с: Утверди́ на́с в Тебе́, Го́споди, Дре́вом умерщвле́й гре́х, и стра́х Тво́й всади́ в се́рдца на́с, пою́щих Тя́.
Непоро́чно Бо́гу пожи́вшии, все́х роди́сте Спасе́ние, богому́дрии роди́теле Зижди́теля Ро́ждшия и Бо́га на́шего.
Все́м жи́знь источа́яй Госпо́дь от непло́дове произведе́ Де́ву, в Ню́же всели́тися изво́ли, и по Рождестве́ сохрани́в нетле́нну.
А́ннин пло́д, Мари́ю, дне́сь, Гро́зд ро́ждшую живоно́сный, я́ко Богоро́дицу воспои́м, Предста́тельницу же все́х и Помо́щницу.
Седа́лен, гла́с 4.
Де́ва Мари́я и Богоро́дица и́стинно, я́ко о́блак све́та, дне́сь возсия́ на́м и от пра́ведных предгряде́т в сла́ву на́шу. Не ктому́ Ада́м осужда́ется, и Е́ва от у́з свободи́ся, и сего́ ра́ди зове́м вопию́ще со дерзнове́нием еди́ней Чи́стей: ра́дость возвеща́ет рождество́ Твое́ все́й вселе́нней.
Пе́снь 5.
Ирмо́с: Сеннопи́санный мра́к гада́ний разори́в и ве́рных прибы́тием и́стины, Богоотрокови́цею, озари́в сердца́, и на́с све́том Твои́м, Христе́, наста́ви.
Воспои́м лю́дие все́х вину́ су́щаго по на́м бы́ти Вино́внаго: Ея́же о́бразу ра́довахуся сподобля́еми проро́цы, явле́нное спасе́ние от Тоя́ плодя́ще.
От су́ха прозябе́ние жезла́ иере́ева Изра́илю показа́ проразсужде́ние, и ны́не све́тлость прозя́бших пресла́вно све́тит, от непло́дове всесла́вное рожде́ние.
Пе́снь 6.
Ирмо́с: Ко Го́споду от ки́та Ио́на возопи́: Ты́ мя возведи́ из глубины́ а́да, молю́ся, да я́ко Изба́вителю, во гла́се хвале́ния, и́стины же ду́хом пожру́ Тебе́.
Ко Го́споду в ско́рби непло́дства возопи́ша Богома́тере богому́дрии роди́тели и Сию́ в ро́ды родо́в роди́ша, на о́бщее спасе́ние и похвалу́.
Прия́ша Небе́сный да́р от Бо́га досто́ин, Богома́тере богому́дрии роди́тели, саме́х Херуви́мов превы́шшее носи́ло, Сло́ва и Зижди́теля Роди́тельницу.
Конда́к, гла́с 4.
Иоаки́м и А́нна поноше́ния безча́дства и Ада́м и Е́ва от тли́ сме́ртныя свободи́стася, Пречи́стая, во святе́м рождестве́ Твое́м. То́ пра́зднуют и лю́дие Твои́, вины́ прегреше́ний изба́вльшеся, внегда́ зва́ти Ти́: непло́ды ражда́ет Богоро́дицу и Пита́тельницу жи́зни на́шея.
И́кос.
Моли́тва ку́пно и воздыха́ние непло́дства и безча́дства Иоаки́ма же и А́нны благоприя́тное и во у́ши Госпо́дни вни́де, и прозябе́ пло́д живоно́сен ми́ру. О́в бо моли́тву на горе́ творя́ше, о́ва же в са́де поноше́ние ноша́ше, но с ра́достию непло́ды ражда́ет Богоро́дицу и Пита́тельницу жи́зни на́шея.
Пе́снь 7.
Ирмо́с: Купина́ в горе́ огненеопа́льная и росоно́сная пе́щь халде́йская я́ве предписа́ Тя́, Богоневе́сто, Боже́ственный бо Невеще́ственный в веще́ственнем чре́ве О́гнь неопа́льно прия́ла еси́. Те́мже из Тебе́ Ро́ждшемуся пое́м: благослове́н еси́, Бо́же оте́ц на́ших.
Твое́ в веще́ственных явле́ниих законополо́жник возбрани́ся разуме́ти и вели́кое, Пречи́стая, та́инство, не му́дрствовати земноре́вностная обра́зно наказу́емь иногда́. Те́мже, уди́влься чудеси́, глаго́лаше: благослове́н Бо́г оте́ц на́ших.
Го́ру и Две́рь небе́сную и мы́сленную Тя́ ле́ствицу боголе́пно ли́к боже́ственный пронарече́, от Тебе́ бо́ Ка́мень отсече́ся не рука́ми му́жескими, и две́рь, Е́юже про́йде Госпо́дь, И́же чуде́с Бо́г оте́ц на́ших.
Пе́снь 8.
Ирмо́с: В пещи́ о́трочестей прообрази́л еси́ иногда́ Твою́ Ма́терь, Го́споди, о́браз же Сия́ из огня́ изыма́ше неопа́льно входя́щия, Ю́же пое́м я́вльшуюся Тобо́ю конце́м дне́сь, и превозно́сим во вся́ ве́ки.
Я́же к Бо́гу на́шего примире́ния предопределе́нная ски́ния е́же бы́ти ны́не начина́ет, иму́щи роди́ти Сло́ва, на́м дебельство́м Пло́ти я́вльшася, Его́же пое́м, из не су́щих во е́же бы́ти Те́м прие́мшии, и превозно́сим во вся́ ве́ки.
Непло́дства преложе́ние мирско́е благи́х разреши́ непло́дство и я́сно чу́до Христа́ показа́, к земны́м прише́дша, Его́же пое́м, из не су́щих во е́же бы́ти Те́м прие́мшии, и превозно́сим во вся́ ве́ки.
Пе́снь 9.
Ирмо́с: Я́же пре́жде Со́лнца Свети́льника Бо́га возсия́вшаго, пло́тски к на́м прише́дшаго, из боку́ Деви́чу неизрече́нно воплоти́вшая, Благослове́нная Всечи́стая, Тя́, Богоро́дице, велича́ем.
И́же непокори́вым лю́дем из ка́мене источи́в во́ду, благопокори́вым же язы́ком да́рует от чре́сл непло́дных пло́д на весе́лие на́м, Тя, Богома́ти Пречи́стая, Ю́же досто́йно велича́ем.
Напра́снаго дре́вняго Отъя́тельницу осужде́ния и прама́тере исправле́ние, Ю́же ро́да к Бо́гу вы́ну присвое́ния, к Зижди́телю мо́ст, Тя, Богоро́дице, велича́ем.
Канон второй Рождеству Пресвятой Богородицы
глас 8
Песнь 1
Ирмос: Сокрушившему брани мышцею Своею, и проведшему Израиля сквозе Чермное море, поим Ему, яко Избавителю нашему Богу: яко прославися.
Да ликовствует вся тварь, да веселится же и Давид: яко от колена и от семене его произыде Жезл, Цвет носящи Господа, Творца всяческих.
Святая святых, во святем святилищи Младенец возлагается воспитатися от руки ангеловы: вси убо верно спразднуим в Рождестве Ея.
Неплоды нераждающая Анна, но не безчадна Богу: се бо пронаречеся от родов Чистая Дева Мати. Темже естества израсти Зиждителя в рабии образе.
Тя незлобивую Агницу, Агнца Христа, Младенца от чрева Твоего приведшую в наше существо, вси, от Анны рожденную Тя, песньми почитаем.
Троичен: Три Безначальна славлю, Три Свята пою, Три Соприсносущна в Существе Едином проповедую: Един бо во Отце, и Сыне, и Дусе, славословится Бог.
Богородичен: Кто виде Отроча, Егоже не всея Отец, млеком питаемое; или где видена бысть Дева Мати; истинно паче ума обоя, Богородительнице Чистая.
Песнь 3
Ирмос: Утвердися сердце мое во Господе, вознесеся рог мой в Бозе моем, разширишася на враги моя уста моя, возвеселихся о спасении Твоем.
Воспитавшися во Святая святых, Дево Пречистая Богородице, вышши явилася еси твари, Зиждителя плотию порождши.
Благословено чрево Твое, целомудренная Анно, Плод бо израстила еси девства, Юже безсеменно Питателя твари Рождшую и Избавителя Иисуса.
Тя блажит, Приснодево, вся тварь, от Анны днесь рождшуюся, от корене Иессеева Жезл Пречист Цвет, Христа израстившую.
Тя вышитую всея твари Богородице, показуя Чистая, Сын Твой, еже от Анны величит Твое Рождество, и всех веселит днесь.
Троичен: Тебе покланяемся, Отче, Безначальне Существом, поем Безлетнаго Сына Твоего, и чтем Соприсносущнаго Духа Твоего, яко Единаго Трое естеством Бога.
Богородичен: Светодавца и Начальника жизни человеческия, рождшая Чистая Богородице, явилася еси Сокровище жизни нашея, и Дверь неприступнаго Света.
Седален, глас 4
Дева Мариа и Богородица истинно, яко облак света днесь возсия нам, и от праведных предгрядет в славу нашу. Не ктому Адам осуждается, и Ева от уз свободися, и сего ради зовем вопиюще со дерзновением Единей Чистей: радость возвещает Рождество Твое всей вселенней.
Песнь 4
Ирмос: Пророк Аввакум, умныма очима провиде Господи, Пришествие Твое, тем и вопияше: от юга приидет Бог. Слава силе Твоей, слава снизхождению Твоему.
Патриарх Иаков, провидев, Спасе, величия ясно строения Твоего, вопияше Духом, ко Иуде глаголя тайно: от леторасли возшел еси Сыне мой, возвещая Тя от Девы Бога.
Ныне Жезл Ааронов, от корене Давидова прозябший, ныне Дева Чистая происходит: и сликовствует небо и земля, и вся отечествия языков, и Анна и Иоаким таинственно.
Ныне да веселится небо, да радуется же земля, и да ликуют Иоаким и Давид. Ов убо яко родитель Твой, истинно Рождшия Бога: ов же яко праотец Твой, проповедая Твоя величествия, Чистая.
Срадуется Тебе днесь, богомудренная Анно, вселенная: Избавителя бо тоя Матерь процвела еси, Юже от корене прозябшую Давидова, Жезл Силы нам носящую Цвет, Христа.
Троичен: Славлю Безначальна Бога, Отца и Сына и Святаго Духа, Единосущную Троицу Несозданную, Ейже предстоят Серафими благоговейно, зовуще: Свят, Свят, Свят еси Боже.
Богородичен: Пребезначальное Начало начало приемлет из Тебе, Богородительнице, плотским временем, и пребывает собезначально, и воплощся Слово Отчее, и Духу соприсносущное, сохраняя Божественное достоинство.
Песнь 5
Ирмос: Господи Боже наш, мир даждь нам, Господи Боже наш, стяжи ны, Господи, разве Тебе иного не вемы, Имя Твое именуем.
Пречистое Твое Рождество, Дево Непорочная, несказанное, и зачатие неизглаголанно и рождение Твое, Невесто Неневестная: Бог бо бе весь в мя облекийся.
Днесь да веселятся ангельстии чини, песньми да ликуют сущии из Адама: родися бо Жезл, Цвет возрастивший Христа Единаго, Избавителя нашего.
Днесь Ева разрешается осуждения, разрешается же и неплодство, и Адам древния клятвы, о Рождестве Твоем: Тобою бо от тли избавихомся.
Слава Тебе прославльшему неплодную днесь: родися бо Жезл присноцветущий от обещания, от Негоже прозябе Христос, Цвет жизни нашея.
Троичен: Слава Тебе, Отче Святый, Боже Нерожденне: слава Тебе, Сыне Безлетне, Единородне: слава Тебе, Душе Божественный и Сопрестольный, от Отца происходяй, и в Сыне пребываяй.
Богородичен: Бысть чрево Твое Солнца носило: пребысть чистота Твоя якоже прежде невредима, Дево: Христос бо Солнце, яко от чертога Жених, явися из Тебе.
Песнь 6
Ирмос: Яко воды морския, Человеколюбче, волнами житейскими обуреваюся, темже яко Иона, тако вопию Ти: возведи от тли живот мой, блатоутробне Господи.
Святую святых сущу, целомудреннии родители Твои, Чистая, возложиша Тя в храме Господни воспитатися честно, и уготоватися в Матерь Ему.
Неплоды и матери ликуйте, дерзайте и играйте безчадныя: безчадна бо неплоды Богородицу прозябает, яже избавит от болезней Еву, и клятвы Адама.
Слышу Давида поюща Тебе: приведутся Девы во след Тебе, приведутся в храм Царев. И с ним Тя и аз, Дщерь Цареву, воспеваю.
Поем святое Твое Рождество, чтим и непорочное зачатие Твое, Невесто Богозванная и Дево: славят же с нами Ангелов чини, и святых души.
Троичен: В Тебе Троическое таинство поется, и славится Чистая: Отец бо благоволи, и Слово вселися в Тя, и Божественный Дух Тебе осени.
Богородичен: Златая Кадильница была еси, Огнь бо во утробе Твоей вселися, Слово от Духа Свята, и человеческим зраком в Тебе видеся, Богородительнице Чистая.
Кондак, глас 4
Иоаким и Анна поношения безчадства, и Адам и Ева от тли смертныя свободистася, Пречистая, во святем Рождестве Твоем. То празднуют и людие Твои, вины прегрешений избавльшеся, внегда звати Ти: неплоды раждает Богородицу и Питательницу жизни нашея.
Икос
Молитва купно и воздыхание, неплодства и безчадства, Иоакима же и Анны благоприятное, и во уши Господни вниде, и прозябе Плод живоносен миру. Ов бо молитву на горе творяше: ова же в саде поношение ношаше: но с радостию неплоды раждает Богородицу, и Питательницу жизни нашея.
Песнь 7
Ирмос: Халдейская пещь огнем распаляемая, орошашеся Духом, Божиим предстоянием, отроцы пояху: благословен еси, Боже отец наших.
Празднуем, Чистая, и верно покланяемся святому Твоему Рождеству, поюще Сына Твоего, Имже избавихомся древняго Адамова ныне осуждения.
Ныне Анна веселится, и вопиет хвалящися: неплоды сущи родих Божию Матерь, Еяже ради осуждение Евино разрешися, и яже в печалех болезнь.
Адам свободися, и Ева ликует, и вопиют духом к Тебе Богородице: Тобою избавихомся первородныя клятвы, явльшуся Христу.
О, чрево, вместившее Божие Селение! О, утробо, носившая небес Ширшую, Престол святый, мысленный Кивот Священия.
Троичен: Отца прославим, Сына, и Духа, во Единстве Божества Троицу Пресвятую, Нераздельную, Несозданную, и Соприсносушную, и Единосущную.
Богородичен: Ты Бога Едина родила еси Дево преславно, Ты естество обновила еси Рождеством Твоим, Марие, Ты Еву разрешила еси первородныя клятвы, Богородительнице Чистая.
Песнь 8
Ирмос: Покрываяй водами превыспренняя Своя, полагаяй морю предел песок, и содержай вся, Тя поет солнце, Тя славит луна, Тебе приносит песнь вся тварь, яко Содетелю всех во веки.
Сотворивый преславная неплодней утробе, отверзый Анны нераждающая ложесна, и Плод ей дав, Ты Боже Святый, Ты Сыне Девы, Ты от Сея плоть приял еси, Присноцветущия Девы и Богородицы.
Затворяяй бездну, и отверзаяй ю, возносяй воду во облацех и даяй дождь, Ты давый Господи, от неплоднаго корене прозябнути Анны святыя пречист Плод, и родити Богородицу.
Делателю мыслей наших и Насадителю душ наших, Ты неплодную землю благоплодну показавый, Ты древле сухую, родовиту, благокласну, бразду плодоносну соделал еси Анну святую, Пречист Плод израстити Богородицу.
Приидите вси узрим, яко от чертога мала, Божий Град ныне раждаемый, иже от двери утробныя исход имущую, вход же не ведущу общения: Един Бог Зиждитель Сею пройде стезею странною.
Троичен: О, Троице Присущная, Единице Собезначальная! Тя поет и трепещет множество Ангел, Небо и земля, и бездны ужасаются, человецы благославят, огнь работает, вся послушают Тебе, Троице Святая, со страхом, яже в твари.
Богородичен: О, новейшаго слышания: Бог, Сын Жены! О, безсеменнаго Рождества! Безмужная Мати и Рожденное Бог! О, ужаснаго видения! О, зачатия страннаго Девы! О, несказаннаго Рождества! Истинно паче ума вся, и видения.
Песнь 9
Ирмос: Чужде матерем девство, и странно девам деторождение: на Тебе, Богородице, обоя устроишася. Тем Тя вся племена земная непрестанно величаем.
Достойное, Богомати, Твоея чистоты Рождество наследовала еси, чрез обещание: иногда бо неплодней, Богопрозябен Плод вдалася еси: тем Тя вся племена земная непрестанно величаем.
Исполнися вопиющаго пророчество, глаголет бо: возставлю скинию падшую священнаго Давида, в Тебе Чистая преобразившуюся, Еяже ради всех человеков персть в тело создася Божие.
Пеленам покланяемся Твоим Богородице, славим давшаго Плод прежде неплодней, и отверзшаго ложесна нераждающей преславно. Творит бо вся, елика хощет, Бог Сый Самовластен.
Яко дар Тебе, Богородице, песнопение от Анны рождшейся верно дароносим: матери Матерь, девы же Деву Едину славословяще покланяемся Тебе, поем и славим.
Троичен: Чужде есть беззаконным славити Безначальную Троицу, Отца, и Сына же, и Святаго Духа, несозданное Вседержавство, Еюже мир весь содержится, манием Державы Ея.
Богородичен: Вместила еси во утробе Твоей, Дево Мати Единаго от Троицы Христа Царя, Егоже поет вся тварь, и трепещут вышнии чини: Того моли, Всечистая, спастися душам нашим.
Светилен
От неплодныя днесь Анны Цвет произыде Богородица, вся благовония Божественнаго исполняющи концы мира, и радости всю наполняющи тварь: Юже поюще достойно восхваляем, яко сущу земнородных Превышшую.
